Камит

Роман

Автор описывает историческое время перед взятием Казани войсками Ивана Грозного, в связи с этим он через своих героев подробно рассказывает ход исторических событий с начала веков на территории Российского государства, Хазарского каганата, бассейна Волги, Камы, Вятки, Чепцы, Кильмези и Хазарского моря. Особое внимание  автор уделяет захватнической политике Византийского и Римско-католического императоров того времени и  о том как они при помощи генуэзских или ганзейских купцов рвались на наши территории, как захватывали торговые точки и солеварни, открывая на этих местах свои непреступные монастыри и епархии, превращая их затем в банки и надзирательские центры, ведь епископ с греческого переводится как «смотрящий» или «надзиратель» . Как известно  церкви никому дань не платили, деньги из этих монастырей и епархий напрямую уходили в Византию и Рим.  В романе подробно рассказывается и о причинах раскола христианских церквей в начале века, о разделении ветви восточных направлений – несторианской церкви и других. Некоторая часть романа посвящена тамплиерам, причем не только западным, которые были под папой, но и и других трех направлениях, которые были созданы параллельно с западными. Загадочная история Арсании, Золотых Коней Батыя, Хазарской Золотой Бабы – Варфаламеи, увлекательные похождения главных героев многое вам предстоит открыть из  романа Камит, и последующих романов из этой трилогии, объединенных под общим названием «Арсания и Золотая Баба».

1-тӥ люкет. Кам вылэ султон

Туж ӝог гылӟе ошкуй. Ву кошконлы пумит ке но мыно, куамын полысасьёс уг ик шӧдо Ваткалэсь бызёнзэ, ошкуй сьӧры сызӥськыса ик кыле шукы гож. Угось камчиослы туннэ ачиз тӧл  юрттэ. Ма, кызьы со уз юртты, Ӟапык, ошторма воргорон, котьку сое, кулэ дыръяз, вӧсь кылъёс вераса, тӧлпуйыысьтыз поттылэ. Тани али но, татазылэн куремезъя, тӧлпуйызэ сэрттӥз. Ошкуйчиосты кемалась тодӥсь тӧл, соосын ӟечъяськыса кадь, ошкуй котыртӥ позырскиз но, ву вылэ тулкымъёс ӝутыса ик, ас ужзэ ужаны кутскиз. Табере ваньзы ошкуйчиос ганяк кариськизы, ӝоглыклы шумпотыса пуко. Маӵкор борды юнматэм кырыж тӧлпо сокем зол пельтӥськемын – зурк-зурк каро гозыос, ӟукыртэ вамен кор, маӵкор ик някырскылэ, куез  урдэслань карыса.

Шумпотыса учко соос шоры Ваткалэн кык палаз ик пичи пыжъёсын чорыгасьёс. Туж гажало соос кам вылэз чакласьёсты, озьы ик кельше соослы куке ошкуйчиос тӧлъёсты энерало. Угось чорыгасьёс тодо, кам вылын туннэ чик но тӧл ӧвӧл, соин ик валало, кыӵе тӧл ошкуйчиосты выллань тубытэ…

Трос калыкъёс кам вылэ потало ярдуръёсысь пичи каръёс но гуртъёс котырын. Таӵе шуныт гужем шорын ваткаосты кыр сюдэ уга. Малы ке шуоно арсавыл калык, инкуазь воштӥськонъёсын сэрен, я кезьыт, я пӧсь луэмен, яке дугдытэк зорыса ву нюртэмен, яке кышкыт ожмаськонъёслы луыса, сютэм аръёсты уно пол адӟылэмез бере, ваньзэ тырше дырыз дыръя дасяны, кыр инкуазьлэн сиёнэзлы но со бадӟым саклык висъя. Талы луыса ик со аслаз сьӧд-сьӧд гыбедо бусыосаз туж трос будэтэ ӟег, чабей, йыды, сезьы, сьӧд чабей но уно мукет ю-тысьёсты, соин ик али вакытэ со ӧжытак эрикогес, ю-нянь котырын ачиз Инмар тырше уга. Но калыклэн мукет ужъёсыз но тачак, бакчаосын уриськемез, кукчаськемез, лудъёсын турнаськемез бере со дыртыса потэ кыре, соин тросэз гурт нылпиос, егитъёс но мӧйы калык шунды шорын та дыре пырсало. Музъем ужлэн сиёнэз ваньмыз вуэмын ӧвӧл на ук, соин ик кам котырысь луд вылъёсысь трос адӟыны луэ узы-боры но турлы турын-куар, выжы-модос октӥсьёсты, нюлэсъёсысь – губиясьёсты, пӧйшурасьёсты, муш утисьёсты, нош кам вылысь – чорыгасьёсты, асьсэлэсь ӧнер ужъёссэс вузасьёсты. Ма, пичи пыжъёс но кам вылтӥ трос ветло, кин кытчы: кудаз озынэ мынэ яке вузаны, яке воштыны, яке мар но со басьтыны. Ошкуйчиос дышем синмынызы соку ик ваньзэсты тодмало, валало кин мар каре, кин кытчы дыртэ, кин мар вуза. Алигес гинэ соос, одӥг озын доры дугдыса, басьтӥзы шуныт палась турынъёсын кузятыса куасьтэм лудкеч сӥль. Ярато зарезьчиос шуныт палась куасьтэм емышъёс быдӟа кузятэм сӥлез кыл улазы донганы. Кӧтсы сюмаку, таӵе сиён соку ик кӧтсэс басылдыре, мугоразы батыр кужым пыӵатэ. Тужгес но ярато ошкуйчиос лудкечлэсь куасьтэм сӥльзэ. «Лудкеч валлэсь но кужмо  ӟигар пыртэ!» – шуо соос.

Казак пи арлыдаз выжем Камит но, ошкуй ныр доры султыса, куинетӥзэ лудкеч сӥль моклоксэ кыл улаз донгиз ни. Ненег но ческыт кузятэм сӥльзэ ым пушказ отчы-татчы берыкъяса, каллен гинэ сюпсе солэсь эзылыса вирсэръёсаз пыӵась, ческыт мызьзэ. Кык киосыныз ик со кырмиськиз вайяськись бордъёс борды. Ӧй вал на солэн таӵе кужмо тӧлэз адӟемез.

«Паймымон та Ӟапык!» – шумпотэ пияш. Солэн трос кылэмез вань «тӧл куды, тӧл песьтэр, тӧл пуйы» сярысь. Озьы ик тодэ со, кытысь со тӧл кылдэмын. Тӧл нырысь-валысь агай-вынъёсыныз – тютюпиосын – ӵош кылле кудыын яке ӟазег, яке ӵӧж, яке мукет тылобурдо пузъёс пӧлын. Тыро пузъёсысь ӵогисько тютюос, нош буш пузысь нокин уг вордскы – соосты «тӧлпуз» шуо. Сыӵе пузъёсты пеймыт пуйые поно но кытчы ке аллак сэреге, ӵоге ошо, шунды медаз быдты, коӵыш яке шыр-комак медаз си, яке асьсэос ик янгышен медаз сӧре шуыса. Собере кулэ луыкуз сое потто я кужмо тӧлэз чускатыны, я кемалы лыктэм зорез улляны, я зор пилем уллёосты вайыны, я тылпуэз кысыны но уно мукет ужъёсты ужатыны. Ог кылын – тодӥсьёс пӧртэм югдуре, пӧртэм кулэлыкъя со тӧлпузэз пыргыто но дунне вылэ выль тӧлэз вордскыто. Соин ик ваткаос пӧлын котькуд гуртъёсын но шедё на тӧлэз куйласьёс, соос котькытысь тӧлэз асьсэлэн пуйы пушказы ӧтьыны быгато. Угось котькуд тӧл яратэ кудыез, песьтэрез яке пуйыез – тӧл, шуо, адями кадь ик, ноку уг вунэты ческыт но шудо кӧлон сэрегъёссэ, пичи дырзэ. Кыӵе ке тодӥсь ӧте ке тӧлэз солы тодмо кылын, со нош ик пичия, шумпотыса, куаныса пыре аслаз пичи юрт сэрегаз, тӧлкудые яке тӧлпуйые… Ма, кинлы бон дунне вылын уг кельшы буйгатӥсь инты, аслад пичи юртад чыс-чыс но гань-гань кӧлон. Тӧл но пуйы-корказ пичи нуны кадь кӧлэ, шутэтске, кужым люка. Нош  собере тӥни, Ӟапык кадь ик, сое ужаны куро, угось тӧл тау карыны но быгатэ. Камит ачиз но мар но со пӧрмытэ, но тӧлэн ужаны солы ӧз кемдылы на. Угось тӧлэз энеран удыс – со омырен ужась туноослэн эсэпзы, нош ачиз Камит ву дуннеен ужась туноос пӧлысь, соин ик куанэ со ваткаослэн таӵе быгатонзылы.

Кельше Камитлы, Ӟапык тӧллэн пельтэмезъя, ошкуйлэн тулкымъёсты вандыса ик ву вылтӥ лобӟонэз. Капчи пыжлэн выллань чатырскем ныр йылысьтыз Ош йыр но солы туж кельше. Ошкуйчиос «Ош» шуо гондырез. Асьсэлэсь дор палъёссэс но соос ОШ-ТОР-МА яке ОШ-МА шуо, яке, ОШ кылзэс вунэтыса, ИШ-МА, ЫШ-МА, ЭШ-МА, ОӴ-МА, КОШ-МА, КОӴ-МА, яке воксё ЭШ-ТУГАН, ИШ-ТУГАН, яке куд-ог интыосын ОШ интые кутыло воксё мукет валанъёсты КАШ, БАШ, БЫШ, БЫЖ, НУШ, НЫШ, МЫШ, МЫЖ, ДЫШ, ТЫШ. Валамон, со ӧжытак серем табере адӟиське, оло ке ачиз ТОКТАМЫШ соос вылтӥ ортчиз: МАЛ-МЫЖ, МАМА-ДЫШ, ТА-НЫШ, ТАНЫП, ТАКА-НЫШ, АЛ-НАШ, БЕ-МЫЖ, АР-ЫШ, АР-НЫШ, КАТ-МЫШ, БУ-КАШ, КУКТА-БАШ но уно мукет БАШ-ъёс, МАШ-ъёс, МЕШ-ъёс. Нош Камитлэн вордскем палъёсаз сыӵе сураськонъёс ортчиллямтэ, шӧдске. Каме усись шурзэс но соос – Ошторма шуо, пыр потонтэм нюлэсъёс сьӧры ватскем гуртъёссэс но –  Вуж Ошторма, Шор Ошторма, Вылӥ Ошторма, Улӥ Ошторма яке уно пӧртэм Ошмаос. Вож-вож узьымъёсын ӝужась ю-нянь бусыоссэс, пудо уллёосын бӧксӥсь лудъёссэс, муш утён интыоссэс но Ягул Ошторма, Кузькуак Ошторма, Кезьытошмес Ошторма, Муш Ошторма, Палэп Ошторма, Ӟазег Ошма, Шыртурын Ошма…

Ошкуй азьысь Ошлэн вӧлэм йырыз вылтӥ Камитлэн ымныраз тулкым шапыкъёс пазьгисько, нош шапыкъёсын ӵош выль но выль малпанъёс йыраз сынасько, кугӟасько, сэрасько.

Ӟеч тодэ Камит Быдӟым Ош сярысь. Зэмзэ ке со уйпалась Тӧдьы Гондыр, кудзэ уйпал зарезьёс котырысь ӟучъёс али ке но ОШКУЙ шуо. Нош Тӧдьы Гондыр сьӧрын – гудыри кадь ик чилектэ вань тушмонъёсты кышкатӥсь Перун, Свароглэн пиез, гудыри инмар, кинлэн «руна» пусэз вань вашкала «Перма» музъемез но солэсь калыксэ уте, возе. Соин ик со огшоры гинэ гондыр ӧвӧл, со вань гондыръёслэн гондырзы, гудыриослэн гудыризы. Со вань зарезьёслэн, вань камъёслэн, вань шуръёслэн кузёзы. Соин ик ошкуй ныразы ошкуйчиос одно ик Ошез юнмато. Ошез яратон паськыт вӧлмемын ватка калык пӧлын. Соинтэк-а котькуд ошмес Ошез данъя, тросэз шуръёс Ош нимез нулло. Ошез озьы ик Шундыен герӟало, угось гондыр но «Оштолэзе», «Яр» шунды сямен ик, «Вӧй» дыре выльысен «кулэмысь» улӟе. Ӟучъёс та кык арня шулдыръяськон нуналъёссэс «Масленица» нимало. Та вакытэ котькытын «первый блин комам» шуыса гондыръёслы табанянь куяло. Угось «Быдӟым Ком» но Быдӟым Ошлэн вашкала нимыз. Ошкуйчиос верамъя, отысен ик арсавыл калык понна котькуд бадӟым шур – «КАМ» луэ, кудӥз «Быдӟым» шуэмез вера. «Ра, Яр, Ярило» – со асьмелэн ӧжытак вунэтэм шунды Инмармы, яке ачиз «Яркыт Шундымы». Соин Волга-Булга-Идэль камез куд-ог интыосын али ке но, шундыез кадь ик, Быдӟым Ра шуыло. «Ярлэн» кузпалыз «Яра» вылэм, ӵапак со луэ «яратонлэн инмарез»… Нош Ралэн кузпалэз – Рея, кудзэ асьмеос Рая шуиськомы. Соос бордысен кылдэмын «ракатланон, ракат улон», отысен ик «ранӟон, рана». «Яр» но «Яра», «Ра» но «Рея-Рая» бордысен кылдэмын «яратон», «яркыт», «ярдыт», «ӟардон», «ӟаректон», «ӟырдан» яке висись, пыктӥсь «яра» кылъёсмы. Нош ӟучъёслэн татысь ик кылдо «яркий», «заря», «зарево», «жар», «радуга», «рана», «расстояние» но уно мукет кылъёссы. Ма «Рай» но, «Ирий» но соос бордысь ик кылдэмын. «Ра» яке «Яр» ошкуйчиос понна – «Йыр» луэ. «Яр шунды тылсизэ пазя, нош Йыр – йырызлэсь сиоссэ» – ярато вераны ошкуйчиос. Вань каръёслы кузё луись карлэсь нимзэ – «Иерусалимез» но соос «Йыр» но «Селим» бордысь потто. «Иеру», пе, «тылсиясь» шуэмез вера. Соин ик, уй зарезьтӥ ветлыкузы, ошкуйчиос, нуназе сюрес возьматӥсь «Яр, Йыр» шунды ышем бере, сое вошто уйпалась «Йыр» яке «Ӟыры» кизилиен, кудӥз котыртӥ бергало Пичи но Бадӟым кобыос яке Пичи но Бадӟым гондыръёс. Нош Камит понна бадӟымез кобы – «вайткар» пыж, пичиез – сьӧраз ветлӥсез «вайтман» куй. Уй инбамысь ошкуйчи пыжъёс кадь соос адӟисько ошкуйчиос понна. Соин «Йыр» кизилиез, вань уй инбамез ас бордаз «Ӵог» кадь «ошемез» сэрен, ӵемысь шуо «Ош», угось со ваньзэ ас бордаз «ошыса» возе.

Вашкалаос верамъя, «вайткаръёс» но «вайтманъёс» асьме Митгард музъеммылэн озынъёсазы ялан вузаськыны вуыло вылэм. Та сярысь уно выжыкылъёс кылемын. Асьмелэн 300 ар пала улӥсь пересьёсмы али ке но туж трос выжыкылъёсты мадьыны быгато. Кылсярысь, Финистлэн чертогысьтыз Ясный сокол но Настенька сярысь, кытын нылаш Ясный соколзэ утчаса, «вайтманъёсын» ветлӥсь вузчиосын ӵош инсьӧр дуннеосы вуылэ «карнанэз» яке «кармаез» чаклась Карна доры, выль вордӥськон жильы борды думись Желя доры, дэлето яке удалтэм улон кузьмась Доля (Среча) доры, дэлеттэм улонэ юнматӥсь Недоля (Несреча) доры, Тархлэн Тара сузэрез доры, Джива кузпалэз доры но асьмеды ас нуныоссэ кадь утись Тархмы доры, кудӥзлэн атаез ачиз Перун луэ. Али, жаляса верано, «Свароглэн Кругез», асьмелэн «Ӟазег Сюресмы», «сьӧдъёслэн» яке «пеймытъёслэн» дуннеоссы доры матэктэмын. Асьме Мидгард музъеммы но али со «пеймыт» дуннеос вӧзын сылэ, кудзэ ведаосын сюрс ар пала кыстӥськись «Свароглэн Уез» яке «Кали-Юга» шуыса пусъё. Соин ик югыт дуннеосысь «вайтманъёс» асьме музъеммы доры али уг вуыло. Лыктӥзы ке но, лушкемен гинэ лыктыло, «пеймытъёслэсь» пегӟыса. Но озьы ке но, со вань вашкала сямъёс, вашкала тодонъёс быдэсак ӧз ӵушиське, туж зол быдтыны туртто ке но «Ар» но «Ас» тодонъёсмес «пеймыт» дуннеосысь лулъёс. Ваткаослэн дышетскон юртъёсазы туж кадырлало вашкала тодонъёсмес, соин ик котькуд ошкуйчи пичиысен ик туж ӟеч тодэ ас выжы сямъёссэ, нош дышетскон юрттъёсты йылпумъятэк нокыӵе ватагай ошкуйчи уг луы, вылаз ик со тодыны кулэ ог сизьым-тямыс кылъёсты, сыӵе ик куронъёссы пуксён палась «орденъёслэн», кудъёсызлэн лыдзы, Камит тодэмъя, даслэсь но  ятыргес ни.

Ра-Идэль-Булга-Волга, Быдӟым Кам, Ватка, Чусовка, Чупчи, Калмез вӧзын улӥсьёс туж сӥлы каро кызьы ассэ Ошез, озьы ик сьӧраз ветлӥсьёссэ но. Куй азязы Ош йырен ветлӥсь ошкуйёслы камъёс вылын котьку сюрес усьтэмын, малы ке шуоно ӵапак соос луо «сьӧдъёслэсь» утись ожгарчиос. Котькуд пыжъёсты таӵе ошкуй дугдытыны, эскерыны быгатэ, ошкуйчиос учко, тырем-а васькись яке тубись бадӟым пыж «Ош» понна вытсэ, тырем ке соослэн азвесь пуссы, тамгазы, луыны кулэ… Тамгазэс эскерон сяна, ошкуйчи ватаманъёс, татаос, огдыре ик соосты сӥсъяло, пӧлысьтызы «пеймытъёсты» шедьтон ласянь. Нош сыӵе учыр кылдэ ке, ортчыто кулэ сэбедъёсты, адями лулэз «пеймыт» кырмет улысь мозмытон понна, «кырмисьсэ» но, валамон ини, кытчы кулэ отчы «келяло». Озьы кылдо камъёс вылын улон катъёс. Ошкуйчиос, эмчиос кадь, ву сюресъёсты чылкыт возё, нокин нокинэ медаз «сермета», медаз тала, нош талазы, «серметазы» ке, ӝог шедьто воръёссэ но, «серметасьёссэ» но. Соин кам ярдуръёсысь ӵемысь пумитано ошкуйчиослэсь тӧдьы изъёслэсь сюрем кызымат юртъёссэс. Со юртъёс вӧзын озьы ик трос сыло кунокуа юртъёс, улон коркаос, одно ик ужало лавкаос, торжокъёс, базаръёс. Угось кадыр но ракат интыосы калык но кыстӥське. Ошкуйчиос вӧзын улыны но капчи уга, нокин соосты татын уз иса, вылаз ик камтӥ ветлӥсьёс тросэз таӵе интыосы дугдыло. Ваньзы тодо: татын соосты уз талалэ, шутэтскыны но инты висъялозы. Нош ошкуйчиослэн из юртъёссы вӧзын котьку сыло кызымат карись ошкуйёс. Угось та юртъёс юри кылдытэмын казна возьыны, ошкуйчиослы кӧлыны, шутэтскыны, кызымат карыны. Та юртъёсын тачак ожтӥрлык, озьы ик тырмыт ожгарчи-ошкуйчиос. Соос Хазар кунэз «ӵуж чалмаос» киултыку, валамон ини, таӵеесь ӧй вал ни. Угось ашкынэм «ӵуж чалмаос» адямиосын вуз каризы, вузаськон сюресъёсты оброкъёсын ӝокатӥзы. Нош Бату хан, та пала вуыса, выльысен кызымат юртъёсты улӟытӥз, вузаськон сюресъёсты воръёслэсь но «сьӧдъёслэсь» чылкытатон понна «ошкуйчиосты» кылдытӥз. «Тӥ табере, тамплиеръёс кадь, та инмар сюресъёсмес, Джучи улосмылэсь вирсэръёссэс утёды!» – шуиз со ошкуйчиослы. Бату хан гажа вылэм тамплиеръёсты, ӵемысь ӧтьылэ вылэм соосты ас дораз, аслаз Сараяз но соослы нимысьтыз юрт пуктэм. Куд-огез талы уг оско, шуо, Бату хан ӵапак со тамплиеръёсын ожмаськиз. Но Камит тодэ, со озьы ӧй вал. Озьы вераськисьёс сурало тамплиеръёсты мукет орденъёсын. Тамплиеръёс ноку Бату ханэн ӧз ожмаське, соос ярато вал сое, юртто вал солы. Тамплиеръёс сярысь малпанъёсыз Камит доры огпол гинэ ӧз лыктылэ ни, ялан соос пияшлэсь визьзэ туж мур бугыръяло. Соин ик, отчы мур пыӵантэм понна, Камит дугдытӥз соос сярысь малпаськонзэ. «Тамплиеръёс доры тупен-тупен мукет югдуръёсты но лыдэ басьтыса вуоно…» – шуиз со аслыз. Со дыре ик йыраз солэн кенжиз мукетыз сюлэмшугъяськытӥсь малпанэз. Музъем вылысь вузчи сюресъёс вылын таӵе казна утись кызымат юртъёсты воштӥзы черкъёс но монастырьёс, кудъёссэ али дыре троссэ киултӥзы ни пуксён палась генуя вузчиос, Византиысь но Римысь черкъёс. Нош уйпаласен – простетантъёс, кудъёсыз ганза вузчиосын но англичанъёсын туж юн герӟаськемын. Таосыз но кемалась ини Быдӟым Новгород дорозь  вуизы. Ярам ай, кам сюресъёс вылэ коть соослэн киоссы уггес на сузё. Малы ке шуоно татын Бату ханлэн пуктэм югыт кызымат юртъёсыз но ошкуйчиосыз сыло на. Одӥгез сыӵе казна утись юрт Ошторма шурлэн Ваткае усён азяз сылэ. Туннэ нырысьсэ Камит татаез сьӧры со Ош ымнырен пумитась тӧдьы из юртэ пыраз. Угось егитъёсты арессы тырмытэк но «ошкуйчи сэбед» ортчытытэк отчы пыраны уг лэзё. Нош Камитлэн табере арес но тырмемын, «ошкуйчиослэсь сэбедзэс» но со ортчиз. Соин солы туннэысен вань Ош йыро ӧсъёс усьтӥськемын. Туж паймиз Камит чылк-чылк возиськись юртлы. Азбар азьын но, юрт пушкын но кык возьмасьёс пыӵалъёсын сыло. Пыӵалъёссы сяна мукет ожтӥрлыксы но соослэн вань. Одӥг мултэс арбери но, жаг но ӧвӧл. Ваньмыз аслаз интыяз. Нош ӝужыт из борддоръёсын кыдёке ыбись пешкалъёс пуктэмын, соослы борддоръёсын юри пасьёс лэсьтэмын, ваньмыз ӟеч дасямын ожмаськыны – тубатъёс, сюрыос, дары пуйыос, пешкал ядроос но мукет. Та изэн котыртэм кызымат азбарлэн сэрегаз, ӟусъёс вылын, думылэм воръёс пуко вал. Али гинэ соосты ошкуйчиос камлэн усён паласьтыз вуттӥллям. Талам муртъёссы но татын ик ошкуйчиосын берыктэм сандыкъёссэс лыдъяса сылӥзы. Сыӵе шумпотыса соос ошкуйчиослы ужамзы понна азвесьсэс сётӥзы. Нош ошкуйчиос – ваньзэ Камитлэн татаезлы. Вылаз ик кызымат юртысь но кык пуйы поттӥзы на, ачид, пе, ватаман, сопала мынӥськод бере Усман тата доры, Кикыкуше пыртод.

Шумпотэ Камит, табере со но Быдӟым Арсавыл шаерлы кызымат каре. Оло, со но табере Кикыкушез но Усман татаез, кылдэм ке, ас синмыныз адӟоз?..

Тӧл нюлэм вылысь нюлэ Камитлэсь ымнырзэ, ву шукы но, шуак пазьгиськыса, бамъёссэ чуп карылэ. Ӵапак соин, оло, ошкуй азе юнматэм Быдӟым Кузёез азьын ачиз Ватка но, воксё кышномурт кадь, шулдыр мылкыдо луылэ. Тани со шуак азвесь коньдоно камалиеныз чилектэ, жингыртэ, шильыртэ. Яке чабкыса вуоссэ пазьге, яке, чебер кышномурт кадь, ненег куско но котырес ямбашо луыса, кызо, пужымо, сусыпуо муӵъёсыз сьӧры ватске. Тани со, шаян нылаш, ярдур позырскон сьӧрысен, Нурдаган луд вылын кадь, вуюись дэременыз берганы кутске ни! Яке выльысь азвесь дирхемъёссэ шунды шорын чилекъятыса жомбылляське.

– Ма адӟы ни сое, Тӧдьы Эксэй, вера мусо кылдэ, мынекты, кырмышты, сокем яратэ ук тонэ тынад Ваткаед! – пальпотэ Камит, туно синмыныз ваньзэ адӟыса но валаса, угось со ваньзэ шӧдэ но тодэ – вань берганъёсты, мыдлань бызёнъёсты, вань та Ватка нылашлэсь сямъёссэ, кильтыръяськонъёссэ, гочатонъёссэ. Озьы ке но, туно тодон, яке калык тодон со калык тодон гинэ, воксё мукет тани тазьы аслад синмыныд – Ваткалэсь уно дуннеосты герӟась «выжзэ», котькытчы вуттӥсь вуоссэ зэмос ошкуй ныр шорысен адӟон…

Камит вань Арсавыл музъемлэсь шокамзэ ошкуйлэн тӧлпоысьтыз адӟе. Угось тӧлпо кадь ӝутӥськемын Быдӟым Арсавыл уйпаласен Хазар яке Каспар зарезе васькись камъёс котырысь музъемъёс вылын. Олокытысь но кужмо тӧлъёс сое кыскало, я сопала, я тапала берыктыны турттыса. Но Арсавыл кужмо возиське. Угось дугдытэк вордскыло солэн Камит кадь югыт туноосыз, ошкуйчиосыз, кудъёсыз вань сюлмынызы ярато Быдӟым Арсавыл музъем анайзэс, инбам, инбамал, ингурезь атайзэс. Арсавыл но яратэ аслэсьтыз будӥсь тунооссэ, уно пӧртэм адӟонъёс пыртӥ соосты кыдатэ. Тужгес но та югыт дуннеосты, адями мугоръёсты, адями лулъёсты сиись «сьӧд» дуннелэн нюртэтэз улын, кудзэ огшоры калыкъёс тросэз уг валало. Соос вунэтӥзы Сварог Круглэн, Ӟазег Сюреслэн чертогъёсаз улӥсь вылӥ лулъёсты, югыт Чертогъёсысь вылӥ дуннеосты, Карна яке Карма инмар апайлэсь «карнанзэ» ортчыса, Желя инмар апайлэн «жальы» пыртӥз, «жильы пунэттӥз», вылӥ дуннеосы выжем песятайёсмес но песянайёсмес. Табере «инмар» кыл воксё мукет пуштросэн троссэ воштэ. Котькытын пеймыт калык табере сыӵе «инмаръёсты» кылдытъя: «ву инмар, тыл инмар, пудо инмар, коньдон инмар, иудей инмар, мусульман инмар, христиан инмар, католик инмар», кыӵе но «инмаръёссы» соослэн ӧвӧл, асьсэос ик соослэсь йыромо. Ярам ай, ведаосты тодӥсь югыт лулъёсмы но асьмелэн ӧжыт ӧвӧл на…

Тани Камит азе лыктӥз кузонысь бигер-удмурт ныллэн пальпотӥсь ымнырыз. Соос кам вӧзын сыло. Туж яратыса учке пичи эрпечка Камит шоры. Такъя улысьтыз ӝикыт гинэ пунэм сьӧд-сьӧд йырсиосыз тӧлэн шонасько. «Камит тон мынам луод! Нокинлы тонэ Узыбей уз сёты, нокыӵе мукет ныл тонэ мынэсьтым уз тала!» – шуэ бигер ныл чупрес ымдуреныз.

– Эй, кылпочкы, мар тон сыӵе вераськиськод?.. – серекъя солэн анаез, Гульсиля кенак.

– Верасько сое, мар вань! Мынам пушкам эксэй вир бызе, озьы мыным пересь нэнэе, ӵужанае, шуиз, мон тодӥсько мар аслэсьтым верамме! – чутырак вера пичи ныл.

Камит мыняса учке Узыбей шоры, кельше солы кузон ныллэн эксэй ныл кадь вераськемез. Камлэн ярдуртӥз лыктӥсь Узыбейлэн анаез но Камитлы туж кельше. Сыӵе мусо со серекъя, сыӵе чебер ватка кылын вераське, сыӵе чебер дӥсяське, инӧс усьтӥськыку, ин тубаттӥ васькем кышномурт кадь со, пальпотыса вамышъя, тӧдьы юсь кадь возе мугорзэ. Камит ваньзэ сое тодаз вайыса амалтэк серекъя пичи Узыбейзэ… Мар ай та нош ик Кузонысь, вашкала Быдӟым Озонысь, бигер-ватка ныл выльысь солэн син азяз лыктӥз? Малы ай пияшлэн со эрпечкаез вунэтэмез уг луы? Малы нимыз но сыӵе мусо потэ солы? Ачиз кадь ваткаё-бигеро – Узы но бей – Узыбей… Оло, сокем мӧзмиз ни Камит аслаз бигер-ватка нылызлэсь? Азьвыл соос котькуд гужем пумиськыло вал. Нош берло дыре Узыбей ог-куинь ар пала ӧз вуылы ни арча байаръёслэн Мамадыш кар котырысь шутэтскон гуртъёсазы, нылпиосты дышетон мактабъёсазы но кюттабъёсазы… Юнме Камит вуылӥз Мамадышысь медресэе, черкъёслэн дышетскон юртазы. Дышетӥсьёс но ӧз тодэ Узыбей сярысь мар вераны. Туж тодэмез потэ вал Камитлэн нылаш сярысь, но Узыбейлэн дуннеез Камитлы малы ке усьтыны луонтэм ворсаськемын вал. Нокызьы со сое туно синмыныз но адӟыны ӧз быгаты…

– Луылэ озьы, куд-ог адямиосты Югыт Инмарлы ужась вылӥ лулъёс туно синъёслэсь но ворсало, уг возьмато…– валэктӥз солы песятаез.– Озьыен уг яра учкыны, дырыз вуиз ке, асьсэос усьтозы… Чылкыт лулъёсты, дуннелы усьтытэк, ворсаса будэто…

– Нош «озонаськи» ке… солэн Кузонысь азбараз?..– юа Камит.– Соку мон ваньзэ ачим тодысал?..

– Тырмоз!– шуак уриз сое песятаез.– Тон югыт Ас дуннелэн вуоно ожгарчиез, тонэ, зарни комокез кадь, «сьӧдъёслэсь» ватыса возё. Тонэ уно лулъёс пӧлысь бырйизы «сьӧдъёсын» ожмаськыны, тон туж бадӟым ужез быдэстыны кулэ, кудӥз сярысь нокин уг тод на, мон но уг тодӥськы… Дырыз вуиз ке, тыныд сое усьтозы. Соин ик быдӟым дышетӥсьёс тонэн ужало, тыныд возьмато туж пыдло ватэм тодонъёсты. Тынэсьтыд Кузонэ «озонаськемдэ» соку ик адӟозы, Кузонын трос синъёс «сьӧдъёслы» ужало. Соос Ирий Аскар дорозь но сузизы. Кин малпа вал, кыӵе ке джунгаръёс Ирий Аскарез тарканы быгатозы шуыса?.. Вылӥ инбамъёсысь вить «купырес кыметъёс» утё вал Аскарез…

Песятаезлэн секыт лулӟемез Камитэз шуак сайкиськытӥз. Соку ик вунӥзы солэн Узыбей сярысь малпаськонъёсыз. «Аскар» шуэ вал песятаез Ирийысь Асгардэз, кудӥз Урал сьӧрын куке-соку сылэ вал. Отчы трос пол «озонаськылӥз» ни Камит. Но со Камитлэн вордскемезлэсь куинь ар азьвыл куашкамын ни вал, вакчиятэм лыдъяськонъя, Юлийлэн календарезъя ке верано, 1530 арын. Озьы ке но, куашкатэм Асгард вӧзысь гутёосын улӥсь быдӟым волхвъёс Камитэз трос ведаосын тодматӥзы. Камит, мукет арсавыл нылпиос кадь ик, пичиысен тодэ вал укмыс кылэз, ведаослэн кылзы но со понна анай кыл кадь луиз. Ирийысь Асгардэз нокинлэн куашкатэмез ӧй луысал, со вить «купырес тыл кыметъёсын» ворсамын вал ук. Но волхвъёс верамъя, одӥгез волхв сое джунгаръёслы усьтӥз. Ӧвӧл, волхв ачиз татын янгыш ӧвӧл, «сьӧдъёс» солы пичи дыръяз ик «вуко» юнматӥллям. Вот ӵапак джунгаръёс лыктыку, со «вуко» ужаны кутскем но «кымет купыръёсты» кысэм… Ма, джунгаръёс но валазы меда мар дауртэмзэс, угось соос пӧлын но «вукоос» ужазы. Туноос верамъя адямиос уг ик шӧдо, кызьы соосты «сьӧдъёс» кытко. Серметало соосты жадьыса изьыкузы, яке пичи нуны дыръязы.

Асгардысь волхв-туноос вань Джучи музъемъёсты со адскисьтэм тушмонлэсь возьмаса улӥзы ке но, асьсэды соосты ог дасо ожчиоссы сяна нокин ӧз возьма. Соос юн оскизы вить «кыметъёссылы». Но соосты «сьӧдъёс» туж капчиен усьтӥзы… Табере Асгард быремын, кысӥз берпуметӥез Вылӥ Чертогъёсын но Вылӥ Лулъёсын огазеясь герӟет. Со ужаку Асгардысен трос Вылӥ Лулъёсын огак герӟаськыны луэ вал. Табере со ӧвӧл. Табере асьсэлы волхвъёслы со Вылӥ Дуннеосы «озонаськыны» кулэ. Кулэ тодонэз азьвыл кадь ӝог басьтыны уг лу ни. Нош визьмын ожмаськон удысын ӝоглык быре ке, соку вормон но ӵемысь чиньы вискытӥ луо кадь кошке. Оглом, табере Джучи улос визьтэк кылемын, уно сэрегъёслы тэшкамын, трос книгаос ӝуатэмын яке «лусъемын», валантэм карыса. Но озьы ке но югыт ожгарчиослы книгаос кылемын на, соос пыдлон музъем улын «пещёраын». «Пещёра» кыл «пища ара» валан бордысь кылдэмын…– валэктӥзы Камитлы улэп кылем волхвъёс. – Тыныд кызь одӥг арес тырмиз ке, тон отчы ачид но пыраны быгатод. Татчы вуид ке, со «лул сиён» ачиз тыныд усьтӥськоз…»

Тае ваньзэ тодаз вайыса, нош ик туж возьыт луиз Камитлы песятаез азьын…

– Со егит вирлэн бугыръяськонэз… – солэсь йырзэ маялтыса, пальпотӥз песятаез. – Буйга… Кызь одӥг арес тырмем берад, солы но 16 луоз ни. Ваньмыз тӥледлы усьтӥськоз… «Озонаськыны» но кулэ уз лу…

Но Камит али ке но малы ке буйгатскыны уг быгаты, вирыз солэн урмем кадь Узыбейзэ утча. Туннэ солы кызь одӥг тырмиз, со вуиз казак пи арлыдаз, табере со воргорон, соин ик татаез солы туннэ таӵе «кузьым» кузьмаз, ошкуяз чортӥз. Но озьы ке но, али ке но уг вала, уг тоды Камит, кыӵе мугъёслэн тӧлъёссы отын Кузонын пелляло… Камит котькуд аре возьма вал бигер-ватка нылзэ. Нош али эшшо но зол адӟемез потэ. Угось Узыбейлы но табере 16 арес. Табере соос кыкназы ик быдэ вуизы, азязы вань сюресъёс усьтӥськемын. Узыбей но табере бызьыны быгатэ… Сыӵе чебер нылэз казак пиос адӟытэк уг уло… Нош Камитлэн уг поты сое ыштэмез, тӥни мар бордын ужпум. Но ошкуй Мамадыш пала уг мыны, Мамадыше ву кошкемъя уллань мыноно, али соос Маскара но Вортча (Пичи Арча) пала выллане дырто. Но Маскара но, Вортча но Камитэн Узыбейлэн яратоно интыоссы вал. Трос пол соос  пумиськылӥзы Вортчаын, кудзэ тросэз Пичи Арча шуо. Угось Арча но, Ворча но, Ворса но, Арса но, Борса но, Бордӟа-Вордӟа но ваньзы соос «сусыпу» шуэмез верало. Нош «сусыпу» писпу бордын мур возиське «ворсан, борсан» яке «утён» пуштрос. Соин ик Камитлы Вортчалан пумиськылонъёсыз котьку матынгес вал. Нош Маскара карын пумиськылонъёс малы ке Камит понна шулдыресь ӧй вал. Со ассэ татын сокем ик эрико ӧз шӧды. Укыр зол кузёяськись кышномурт дунне, котьма ке но, ӟибе вал Камитлэсь воргорон лулзэ. Ӧвӧл, Камитэз Маскарын урод ӧз пумиталэ, учконо ке, Камитэз ӟеч пумиталлязы. Тужгес но кышномурт дышетӥсьёс. Соос соку ик сое дуно кунозэс кадь котырто вал. Ваньзылэн малы ке эскеремзы потэ вал Камитлэсь тодон валанзэ куд-ог ведаосъя но дунне вылысь осконъёсъя. Кадыръёслэн одӥг юан шоры пӧртэм сямен учконъёссы нырысь Камитэз йыромытыло вал, нош со ӝог валаз кызьы отысь потыны. Кылсярысь, Маскараысь кышномуртъёс гинэ быгато вал котыразы «тыл купыр» кылдытыны, кудӥз пыртӥ уг быгато вал потыны вортча воргоронъёс. Но со дыре ик вортча воргоронъёс гинэ быгато вал «тыл-шар» кылдытыны, кудӥз пеймыт уйин сюресэз югдытыса соос вылын мынэ, яке, кулэ ке, кинэ ке ӵашйыны но быгатэ. Но Камит туж капчиен кыксэ ик та амалъёсты энераз. Со маскара кышномуртъёс кадь ик быгатэ вал котыраз «тыл купыр» кылдытыны. Нокыӵе луытэк пыре вал кышномуртъёслэн «тыл купыр» пушказы. Маскараос паймыса кылзо вал пияшлэсь ас сяменыз учконзэ, тодон валанзэ. Кызьы, пӧй, таӵе пичи адями сыӵе секыт тулкымъёс улысь сыӵе капчиен ӵӧж кадь зымыса потэ?.. Угось Пичи Арчалэн но Маскаралэн дышетскон юртъёссы пӧртэм юанъёс пумысен ог-огзылы котьку ваче пумит сылӥзы. Нокин соосты та ласянь буйгатыны ӧз быгаты. Маскара вылӥ дунъя вал кышномурт дуннеез, нош Вортча-Пичи Арча – воргорон дуннеез. Куд-ог дыръя, зэмзэ но, секыт вал Камитлы та ваче пумит сылӥсь тулкымъёс улысь потыны. Но соос ӧй ке луысалзы, Камит троссэ ӧй валасал, ӧй быгатысал сыӵе капчиен быдӟым тодон амалъёссэс уже кутыны. Соос Камит азе ноку йыраз лыктӥсьтэм малпанъёсты поттылӥзы, кудъёссэ пияш трос адӟылӥз улонысь, но бадӟым саклык соослы азьвыл ӧз висъя вал. Но соосты валатэк, уг лу вылэм азьлань вамыштыны. Угось, котькуд секыт югдурысь потон понна, тон амалтэк бырйыны кулэ яке воргоронлэсь, яке кышномуртлэсь сюрессэ, яке ини, Камит сямен, аслэсьтыдзэ, кышномурт дуннеез но, воргорон дуннеез но лыдэ басьтыса… Камитлэн Мамадыш котырысь дышетӥсьёсыз пальпотыса учко вал та кык ваче пумит сылӥсь дышетсконъёс шоры, нош нокин но соосты ултӥяны ӧз дырты. Тросэз гажало вал соослэсь ӟырдыт юанъёсъя споръяськонъёссэс, асьсэос юри лыкто вал та дышетсконъёс улэ сюрыны, выльзэ тодыны. Озьы ке но Маскараен Вортча вискын Камит кема улыны уг чида вал. Та каръёс ялан Камитэз Узыбейлэсь люкылӥзы. Камитэн Узыбей куспын ӧвӧлтэм пичи мугъёсъя но ӵем гинэ споръяськонъёс кылдо вал. Соос сыӵе ӟырдыт пуромылӥзы, Узыбей витьымтэ шорысь «тыл купырзэ» кылдытыса куинь пол Камитэз ас бордысьтыз пезьдытӥз. Нош Камит, сыӵе кужмо тыл кужымлэн коскатӥсь вӧсезлы чидатэк, пичи гинэ Узыбей вылэ ӵашйись «тыл-шарзэ» ӧз зырты. Соос шиетыса ик Узыбей вӧзтӥ ортчылӥзы, со сьӧрысь арбериосты пазьгылыса. Соин, вылды, Мамадыш котырын кыкназылы ик соослы трослы ӟечгес вал. Но котьма ке но, Маскара но, Пичи Арча но туж мур кылизы сюлэмазы, асьсэды гажатӥсь мылкыд пыӵатыса. Ма, ваткаос но туж ярато та чылк-чылк ватка каръёсты, соинтэк-а та каръёс котырын сомында мадьёс но акиатъёс бергало. Валамон, татын кемалась-кемалась дырысен ужало дышетскон юртъёс, кюттабъёс, мактабъёс, медресэос но несториан черкъёс манерен дышетон амалъёс. Камит но, Узыбей но трос татын дышетскизы. Шуо, кескич Одиссей но, кескич Лӧпшо Педунь но та интыосты ярато вал… Пальпотэ Камит та каръёсын дышетскыкузы Узыбеен споръяськонъёссэ тодаз вайыса… Маскараысь дышетӥсьёсын пумиськылыса, Узыбейлэн ымнырыз ик воштӥське вал, со Таро картаысь яке Бадӟым Арканысь «Императрицалы» яке «Верховная жрицалы» пӧрмылӥз. Мукет сямен Камитлэн валэктэмез сое уг луы. Таро карталэн Арканъёсыз пыртӥ дунне шоры учкон гинэ со вакытысь Узыбеез валэктыны быгатэ. Угось Таро картаосты но Камит Маскараысь дышетӥсьёслэсь гинэ аслыз ӟечгес но мургес усьтӥз. Туж бадӟым саклык висъяло вал «маскараос» Таро картаен ужанлы. Шӧдске, Узыбеез но соос трос Тароен ужатӥзы. Сое шуак шӧдӥз Камит, Узыбейлэн мугораз шӧдтэк шорысь кышномурт кужым кивалтыны кутскемен сэрен. Кузон караз эркияса ортчытэм нылаш йыг-йыг сылыны кутскиз музъем вылын, кызьы шуо, «пирамида» кадь, кудӥзлы туж юн дышето «маскараос». «Пирамидалы» берытскон сыӵе зол юнматэ нылмуртъёслэсь кышномурт дуннезэс, ӵапак Маскара карысен ӟеч валаз сое Камит. «Пирамидаез» энераса, нылмуртъёс мур валаны но яратыны кутско, конус кадь инбаме йылсаськись нылмурт дуннезэс. Ныл кужымъёслэсь кытысь лыктэмзэ шӧдыса гинэ соос, зэмос ожгарчи кадь, гырлы кадь, энерало нылмурт дэремзы сямен музъемысен инбаме ӝутӥськись тылъёссэс, ӵапак соку соос бордысь дугдытэк тылсияны кутске музъемлэн пыдэстэм кужымыз. Воргоронлэн музъем борды йылсаськись «тӧдьы треугольникез» ачиз ик сётскыны ӧдъя кышномуртлэн инбаме йылсаськись «сьӧд треугольникезлы» – шуо пирамидаез энератӥсь маскараос. Валэктонэз туж огшоры, угось музъем улонэз ӟеч валась кышномурт, вужер кадь, кивалтэ воргоронлэн инбамлыко югыт дуннееныз. Камит доры та валан нырысь-валысь ӵапак Узыбей пыртӥ лыктӥз, Кузон нылашлэн музъем ненеглыкен тылсиясь синъёсыз Камитлэн сюлэмаз сыӵе паймымон яратон тулкымъёсты вордскытӥзы. Камит та вакытэ Узыбейзэ ки вылаз нуллыны дась вал. Ӵапак соин ик, оло, чик но уг кельшы вал Камитлы «маскара» кужымъёсты тулкымъясь Узыбей, угось солэн уг поты вал аслэсьтыз инбамен, воргорон дуннеен, герӟаськем йырзэ ыштэмез… Вал Камитлы марлэсь кышканы. Вань туно дышетӥсьёсыз сое воргорон но кышномурт кужымъёс вискысь карнанзэ тэгыз возьыны дышетӥзы. Нош Узыбей азьын солэн карнанэз воргорон пала кырыжаны кутскылӥз. Ыштылэ вал Камит зӥбытлыксэ возьытӥсь серметзэ. Нош туно ожчилы котьку вукарнан кадь тэгыз сылоно, сотэк сое шонаны кутске. Зэмзэ ке, Камитэз Маскараос доры юри ыстӥзы вылӥ дышетӥсьёсыз. Учкон понна, эскерон понна, быгатоз-а Камит тэгызлыксэ возьыны та туж юн кышномурт дуннее палдурскем дышетон карын. Угось Камит улӥ дуннеосы тодонъёс басьтыны ветлыкуз, огполаз шӧдтэк шорысь ыштӥз лул тэгызлыксэ но мумы дуннелэн вотэсаз шедиз. Соку Камитлы туж ӧз кельшы со улӥ мертэтысь мумы дунне, кудӥз котькытысен мумы тодметъёссэ со азе вӧлъя вал. Соин, вылды, егит тунолы со адӟемпотостэм луыны кутскиз, валамон ини, та вие карнанэз но солэн воргорон кужымъёс пала шонскыса, солэсь воргорон тылъёссэ ярктгес гомӟытӥз. Камит валаса ик ӧз вуы, кызьы «мумы дуннелэн пӧйшурасьёсыз» сое «вотэсазы». Огшоры адямиослэн таӵе югдуръёс сярысь кылэмзы ик ӧвӧл, но туноос пичиысен ик сое тодо. Сыӵе «вотэсэ» ӟугаськон воргорон туно понна тужгес но кышкытэз луэ. Мугез татын со бордын, котькуд дунне мумы кужымъёс вылын возиське, соин ик котькуд музъемез асьмеос, мумы тодметсэ лыдэ басьтыса, МУ шуиськомы. Ӟучъёс но МА, МАМА, МАТЬ СЫРА ЗЕМЛЯ. Нош мумы дунне котьку воргорон лулъёсты кырмыны турттыса улэ. Кылдэмез солэн сыӵе – воргорон лулэз утчан. Сотэк со уг быгаты дуннезэ возьыны. Нош воргорон луллэсь кужымзэ басьтэмез бере, со сое сие… Сое ӵошатыны луэ чонари дуннеен. Котькуд мумы чонари ӝуась синъёсын утча айы чонариез. Айы чонариез утчан вакытаз со сокем кӧшкемыт луэ, векчи айыосты соку ик сие, нош  бадӟым мугоро айызэ но, бен, ворттылэмез бере сыске… Соин ик куд-ог айы чонариос, тае тодыса, уг возьмало мумы чонарилэсь айыослы усьтӥськон вакытсэ. Сое соос усьтӥськон азяз кыро но мызьзэс со пушкы кельто. Нош мумы чонари усьтӥськыку, солэн тужгес но сьӧсьлыко но агуо дырыз вуыку, со пушкын айылэн кидысэз луэ ни, озьы айы чонари улэп кыле. Айы чонариослэсь югдурзэс валаса, воргорон туноос куинь утиськон амал шедьтӥзы. Нырысетӥез, мумы дуннелэн вотэсаз сюронтэм понна, соос пичиысен ик дышетско мумы но воргорон кужымъёс вискын тэгызлык возьыны. Кыкетӥез, мумы вотэсэ ӟугыяськем воргорон тунолы дэмлало будэтыны кышномурт кужымъёссэ, медаз со югекъя воргорон кужымъёсын, соку со мумы дуннелы кулэ уз луы ни, яке ачиз вотэсысь мозмиськоз, яке сое мозмытоз ачиз ик мумы дунне, угось солы чик но кулэ ӧвӧл айы кужымъёссэ тулкымъясьтэм лул. Камит но вотэсэ сюрем бераз, нырысь-валысь вань кужмысьтыз выриз кышномурт кужымъёссэ улӟытыны, нош нокызьы но ӧз вормы та мумы дуннеез синазькыль каронзэ. Мумы кужымъёссэ будэтон интые, со воргорон кужымъёссэ гинэ кужмоятӥз. Сое адӟыса, дышетӥсьёсыз Камитэз мозмытыны со доры кышномурт туноосты ыстӥзы. Ӵапак таиз луэ куинетӥез амал. Мумы дуннеос кышномурт лулъёсты уг исало. Соин ик кышномуртъёс капчиен ветло вань тодмотэм дуннеостӥ. Тросэз воргорон туноос соин сэрен бордазы возё кышномурт юрттӥсьёссэс, марысь мар ке, кышномурт юрттӥсьёссы соосты мозмытыны мед лыктозы шуыса. Яке соос кышномурт туноосын гинэ мукет дуннеосы потало. Но котьма ке но тужгес но ӟечез амал, со ас карнандэ тэгыз возён, кышномурт дуннеез валаса, кышномурт кужымез люкаса. Соинтэк-а уноез воргорон туноос асьсэлы кышномурт нимъёс поно, кышномурт дӥськутъёсын ветло, кышномурт кадь педло потало, кышномурт инмаръёслы вӧсясько, кышномурт кадь пичиысен ик нылпиосты будэто, анай мурт кадь соос сярысь сюлмасько, кышномурт кадь верасько, кышномурт выросъёсты асэсто, кышномурт кадь ветло, кышномурт кадь сюлмасько, кышномурт кадь малпасько, экто, кырӟало. Табере Камит сое туж ӟеч вала, но соку сое кышномурт туноос но мырдэм шедьтӥзы, мырдэм мозмытӥзы, гуын кадь со кыллиз, нокыӵе осконэз ӧз ни кыльы вал «вотэсысь» мозмыны…

Табере пальпотыса малпаське Камит со югдуръёсты тодаз вайыса. Шузигес вал ук ай…

Нош али Камитлэн вылаз ошкуйчи дӥськут, кусказ кортэк нимо вакчи пуртэз, сабыр палашез. Ньӧлъёсын кӧрыкез, пукыӵез но тыбыраз. Ваньмыныз зэм-зэмос ошкуйчи-казак, мыйыкыз, тушыз но кызымат карисьёслэн кадь бычыра ини. Но со дыре ик солэн пушказ кышномурт дунне но бадӟым гырлы кадь тылӝуа. Камит син куспын быгатэ карнанзэ нылкышно дунне пала някыртыны, ымныраз чалма ке понӥз, нокин уз вала, со воргорон шуыса. Озьы ик со быгатэ воргорон кужымъёссэ бадӟыматыны. Соин-а туннэ вань вашкала кырӟан куйёсты со кылэ, вань ву выл ветлонъёсты шӧдэ. Но со дыре ик, сюлэмыз кырӟа ке но, мылкыдыз лоба ке но, синъёсыз солэн сакесь, пичиысен ик ошкуйчилы дышетэм мугорыз, треугольник кадь, инбамысен музъеме йылсаськыса, таза но юн сылэ ошкуй азьын. Камит вань ошкуйчи косонъёсты, вань ожтӥрлыкъёсты тодэ: кудӥз, кыӵеез ожтӥрлык марлы но куддыръя кутӥське, кудӥз кызьы ужа, марлы кулэ кортэк, марлы сабыр палаш, пукыӵ, шибоды, бадӟым но пичи арбалетъёс, марлы кулэ акар, гудыри кадь тыл поттыса ыбись пешкал, яке берло дыре туж вылӥ дунъяськись пыӵал.

Озьы ке но, туннэ со ӧжытак тулкымъяське. Малы меда сое, татаез, ошкуйчиослэн ватаманзы, Ватка кам вылэ поттӥз?.. Татаез интыын мукет адями ке луысал, Камит тодысал. Угось со котькуд ошкуйчиослэсь малпанъёссэс кылэ. Но татаез солэн кужмо туно, вылаз ик тыл дуннеен герӟаськем туно, соин ик солэн малпанъёсыз Камитлы ворсаськемын. Озьы ик Камитлэсь но малпанъёссэ татаез адӟыны уг быгаты. Угось Камит пичи дырысеныз ик ву дуннеен герӟамын. Ву но Тыл дуннеос ог-огзылэсь чурыт ворсасько. Нош песятаез Камитлэн музъем дуннеен герӟаськем туно. Со гинэ та кык дуннеысь туноосты куд-ог дыръя адӟе, но со но нокинлы соослэсь пуш дуннезэс уг усьты. Туноослы уг яра муртлэсь, тужгес но тунолэсь, пуш дуннезэ мукетызлы ӟубистыны. Татын кык мугез вань. Нырысь ик, уг яра Макошьлэсь адями лулъёслы гожтэм адӟонзэ шараяны. Сотэк Карна (Карма) апаймылэн со луллы сётэм «карнанэз» карнан кадь уз ужа ни, сӧриськоз тэгызлык, яке паллянэз, яке бурез «кесмек» секытес яке капчигес луоз. Нош адямилэн лул-урт мугорыз, вукарнан кадь, тэгыз возиськыны кулэ, нокыӵе кужым солэсь «дыркарнанзэ» тулкымтыны медаз вормы. Сыӵе дыръя огъя дуннеын но мар ке воштӥськоз. Кыкетӥ муг ласянь ке верано, котьма ке но, туноос но асьсэлы быдэсак уг оско, юнме уг шуо ук: нырысь сизьым пол мерта, собере гинэ ванды… Туноослэн дуннезы — со туж аспӧртэм дунне, одӥг ласянь соос ваньзэ тодо но адӟо кадь, но мукет ласянь соос кадь сизьым пол мертасьёсты тон нокытысь уд шедьты.

– Сак учкы, кык палзэ ик ярдурез сӥсъя, мае ке шӧдӥд ке, шуак вера мыным зарезьчи пусъёсын… – шуиз солы татаез, ошкуй азе султытыса. Нош кинъёсты сӥсъяно Ӟумъя ватаман кыл но ӧз потты. Камит вала малызэ. Угось озьы вераз ке, сӥсъяса басьтэм ивор шонертэм луыны быгатоз. Кыӵе иворез возьмаськод, сое ик тон басьтӥськод, озьы ужа дырлэн эркынаез. Соин ик тон тодыны кулэ ӧвӧл, кыӵе иворез утчамдэ. Малы уйпала сокем зол дырто, ошкуйчиос но номыр уг верало. Кышкыт ож азьын кадь, соос туж сак учкыло ярдуръёсты. Таиз ласянь ватаманлэн ваньмыз юн пуктэмын. Ачиз ватаман ӧз вера ке, нокин ымзэ уз усьты. Камит сое ӟеч тодэ. Татаез уго пичи дырысеныз дышетэ ваньзэ аслыз валаны. Ву вылын мултэс куара люкетэ. Ошкуйчилэн йыраз нокыӵе малпанъёс гужланы кулэ ӧвӧл. Ву вылын нырысь ик сак луоно. Учконо сое гинэ, мар адӟиське, кылоно сое гинэ, мар кылӥське. Тани ачиз но татаез, оло, чик но со шоры уг учкы, нош ачиз учкылэ, эскере пиезлэсь адӟон кужымзэ. Ошкуйчиос но озьы ик – киосынызы, синъёсынызы гинэ верало ог-огзылы мар ке сярысь. Вулэн чабкылӥськемез гинэ кылӥське котырын. Бурдоос но, оло, куараоссэс уг поттыло…

Угось, вань музъем лулъёс тодо, туннэ вань вожвылъёслэн огазеяськон нуналзы – «Вожо дыр», кудзэ арсавылъёс «Инвожо» шуо, яке «Абалгы сяськаяськон нунал». Туннэ дунне вылын туж трос паймымонэз луылэ. Малы ке шуоно та дыре вылӥ дуннеосы ӝутскем тодӥсьёслы усьтӥське дуннелэн «пеймыт арбериез», кудӥзлэсь ваньзэ, мае мылыд потэ, кылдытыны луэ. Огшоры нуналъёсы «анайлыко арбери» яке «тёмная материя», нокинлы сузёнтэм пыдло ватӥськемын – дуннелэн туж бадӟым люкетэз ке но ачиз луэ. Туноос верамъя, огшоры адями дуннелэсь 10 люкетсэ гинэ адӟе, нош мукетыз 90 люкетэз со «анайлыко пеймыт арбери», кудӥз уг адӟиськы, соин ик сое «пеймыт арбери» шуо. Вань сыӵе югыт адямиос, кудъёсыз быгато «анайлыко пеймыт арбериен» ужаны. Туннэ кадь Инвожо нуналъёсы гинэ ӧвӧл, котькуд нуналэ соос быгато. Куд-огъёсыз асьсэлэсь дуннезэс кылдытыса ноку берытсконтэм со 90 люкет пӧлы ышо. Камитлы кӧшкемыт луэ, сыӵе малпан йыраз лыктыку. Со ӧй быгатысал огназ ӧзьы ышыны. Шуо, Чудья калыкъёс туж устоесь вал «анайлыко арбериен» ужаны, соин сэрен вылӥ лулъёс соосты «сьӧдъёс» лыктон азьын та дуннеысь кошкыны куризы, уг яра вал сыӵе тодонэз «пеймытъёслы» усьтыны. Соин ик, «анайлыко арбериез» уже кутӥсьёслы луыса, «Вожо дыре» оломар но адӟыны луэ. Кылсярысь, куд-ог кадыр интыосын, арсавылын, шӧдтэк шорысь кылдо «ыж-така будосъёслэсь лудъёс», кудъёссэ герӟало Асклепийлэн нимыныз. Яке, христианъёс верамъя, трос интыосысь адӟыны луэ вуын чукындырись Иоанн Крестителез, Иван Купалаез, куд-ог дыръя со аслэсьтыз Иродэн ӵогем йырзэ кияз кутыса ветлэ… Угось Камитлэн кадь ик, солэн но туннэ вордскем нуналыз…

2-тӥ люкет. Кырет сярысь мургес валан

Муско но Кузон вискын берло дыре бадӟым ӟугыяськонъёс мыно. Та ваткаос понна умойтэм югдур. Угось со ӟугояськонлэн кыретэз ялан паськыта но мура. Та кыретлэн мугъёсыз трос. Со мугъёсты нокин уз вала вылласянь гинэ учкыса. Вылласянь со адӟиське, Муско но Кузон эксэйёс куспазы тупан кыл уг шедьто шуыса. Но со озьы ӧвӧл. Соос туж ӝог тупасалзы. Угось кыксы ик солэсь барыш гинэ басьтысалзы. Но ужпум мукетыз бордын, Иоанн сьӧрын но, Ядыгар хан сьӧрын но туж трос кышкыт кужымъёс бугыръясько. Ма, соос сьӧрын гинэ ӧвӧл, со кужымъёс вань дуннеын асьсэлэсь ужъёссэс лэсьто.

Камитэз берло аръёсы юри дышетӥзы, сыӵе ужпумъёсты шуак сэрттыса куаданы, кудпалась «тӧллэсь» пельтэмзэ валаны. Табере Камит троссэ шуак адӟе, солы та ласянь аслаз нимыз но юрттэ. Арсавыл туноос нылпиоссылы ним поно сизьым арес тырмемзы бере. Соос адӟо кин кыӵе ужез лэсьтыны вордскемын, кыӵе солы кужым сётэмын, кӧня пол со та дуннеын улэмын-вордскылэмын ни, кыӵе дуннеосысь со татчы вуэмын. Соин ик ним поно сыӵезэ, кудӥз сое та дуннелы усьтэ, вань дунне кужымъёсын тодматэ, аслаз лэсьтоно ужъёсыныз герӟаса. Камитлэн нимыз валамон ини «камен» герӟаськемын, но «камен» гинэ со уг йылпумъяськы, «кам» сьӧрын вань «ош-гондыр», нош «кам» пушкын «ам» яке «ом» яке «аум» куараос, кудъёсыз вань дуннеез утё, буйгато, кужмоято. Угось «АУМ» яке «АУОМ» со вань дуннелы тодмо эрико куараос. Соос  кылэз выртытэк та дуннее кылдо, кионлэн вузэмез кадь, яке пунылэн эрико вушъемез кадь, яке котькуд пудолэн бурсэмез-бӧксэмез кадь, кылсярысь, скаллэн бӧксэмез ӵапак та куараосты сётэ – «муоум». Та куараос дунне мугорез пуш ласянь но, вылласянь но юнмато. Соин та куараосты кырӟаса адями вань висёнъёссэ бурмытыны быгатэ. Нош «Камит» пушкысь «АУМ» яке «АУОМ» куараоссэ палэнтӥд ке, кыле «к…ит». «Кыит потӥз» шуо арсавылъёс «кышкытлыкысь» лул кужымзы юрттэмъя потыкузы… Соин ик Камит, уно мугъёслы луыса, чорыг кадь уя «ву» дуннеын. «Ву» Камит понна «дыр но эркынай», кудъёсызлэн инвис гожзы ӧвӧл. Но со дыре ик «ву» Камитэз кылзэ, ужпи кадь, вал кадь, аслэсьтыз серметсэ со кие сётэ. Усьтыны ке косэ, усьтэ, валэктыны ке косэ, валэктэ. Соин вуэн герӟаськем туно ӵемысь ӟеч вала, кытысен мар кылдӥз но кытысен мар лыктэ. Камит тодэмъя. Ирий Асгардлэн арий но славян тӧдьы выжыоссы, вань дуннее вӧлмыса, югыт кужымез гинэ данъяса улӥзы. Ӧй вал отын кыӵе ке калыкез эриктэм карон. Калыкъёс ваньзы тупаса улӥзы, котькудӥз аслэсьтыз ужзэ ужаз, дуннеез югдытыса. Кин ке сиён будэтӥз, кин ке корт-андан дуриз, кин ке сылал поттӥз, кин ке дӥськут дасяз, кин ке вузаськиз, ваньзэсты мукет вылӥ дуннеосты но огазеяса. Котькудӥз кадырласа утиз быдӟым катлэсь «дас куронъёссэ»…

Но асьме дуннемылэн «Ӟазег Сюресэз», «Свароглэн Кругез», асьме Музъеммы кадь ик, аслаз Ӵог котыртӥз бергаса, огпол «сьӧд дуннеосын» пумиськемез бере, ваньмыз воштӥськиз. Со «сьӧд дуннеосын» пумиськон, «Кали Юга» яке «Свароглэн Уез», сюрс ар пала кыстӥське ке, сомында ик дыр кулэ «Ӟазег Сюреслы» со «пеймыт дуннеос» дорысь палэнскыны.  Со «уйёс» чик но капчи ӧз ортче асьме дуннемылы. «Пеймытъёсын» ожмаськыса, трос вылӥ тодонъёсмес асьмеос ыштӥмы, кышкытэсь «дуннезаманъёсты» адӟимы. Митгард музъеммес ву но нюртӥз, йӧ но кынтӥз, инбамын куинь шунды но кылдылӥз, куинь толэзьёсмы пӧлысь кыкез бырыны шедизы. Вань со «пемытъёсын» ожмаськонъёс но «уйёс» сярысь Быдӟым Перунлэн «Сантиосаз» – ведаосаз гожтэмын… Отын верамын, ку асьмеос со «пеймыт дуннеосын» нырысетӥзэ пумиськимы, кыӵе  ожмаськонъёс соку луизы.  Озьы ик верамын, мар луиз кыкетӥзэ, куинетӥзэ «соосын» пумиськыку, мар луоз ньылетӥез сыӵе «уй» вуыку… Таиз, алиез «Кали Юга», лыдызъя  ӵапак ньылетӥез луэ ини.

Таиз «уй» лыктӥз 500 ар талэсь азьвыл, сомында ик со кыстӥськоз на. Соин югыт калыкъёс 500 ар ожмасько ни «пеймыт дуннелэн» адскисьтэм но адскись ожчиосыныз. Ирий Асгард нырысь-валысь соослы пумит быдӟым тунооссэ пуктылӥз, но ӝог валаз озьы гинэ пумитъяськыны уг лу шуыса. Малы ке шуоно «югытъёс» но «сьӧдъёс» ог-огзылэсь туж зол висъяськизы. «Югытъёс» ужазы «югыт» амалъёсын, калыкъёсты жаляса, визьманы турттыса, нош «сьӧдъёслэн» амалъёссы вал «сьӧдэсь» соос уг тодо вал жалянэз. Асьсэды но соос ӧз жалялэ, огез ожчизы ке быриз, со интые соку ик дассэ яке сюзэ пуктылӥзы… Соос туж ӝог аздыризы-пожомытӥзы вань дуннеез, калыкъёслэсь чылкыт осконзэс, дунне валанъёссэс кырсёмытыса, ог-огзылы пумит люкылӥзы, кылдытъязы ог-огзылы пумит карись осконъёсты. Куашкатъязы, ӝуатылӥзы чылкытлыкез утись храмъёсты,.. Пӧяськон, талан, лушкан, вузан, виён, семья таркан, пи-нылмурт кусыпъёсты аздырон, гожъёс сьӧры ортчон – туж ӝог вӧлмизы куке но югыт калыкъёс пӧлын. Соин ик дунне вылысь ньылезлы ик Асгардъёслы мукет ожмаськон амалъёс чаклано луиз. Соос котькытын кылдытылӥзы асьсэлэсь монах-ожгарчиоссэс. Кылсярысь, мусульманъёс пӧлын кылдӥзы «дервишъёс», шунды пуксён палан 400 ар талэсь азьвыл озьы кылдытэмын вал «храмчи-тамплиеръёс». Соос огшоры куанер калык пӧлысь дябык адямиос вал, тросэз одӥг вал вылын кык кузя ветлӥзы. Тамплиер пуссы но соослэн – «вал вылын кык кузя пукисьёс». Со серемгес адӟиськиз, кыӵе ожгарчиос луозы та куанеръёслэсь. Соин ик Асгардъёс соослы усьтӥзы вашкала тодонъёсты но узыресь кладъёсты. Тамплиеръёс син куспын узырмизы. Ачиз понтифик-папа но, солэн пуктылэм корольёсыз но соослы вожъяськизы. Но тамплиеръёс трос ужазы асьсэды инмар доры матэктытон но асьсэлэсь лулзэс будэтон бордын. Соос  чаклазы инмар куала доры нуись сюресъёсты, озьы ик вузчи сюресъёсты, соин сэрен уно выль сюресъёс лэсьтылӥзы. Утиськон интыос кылдытъяса пуктылӥзы замокъёс, храмъёс. Возьмазы чылкыт осконэз вӧлмытӥсь черкъёсты. Ӵапак тамплиеръёс кылдытӥзы нырысетӥ банкъёсты, соосты огазеязы пӧртэм каръёсын. Инмар музъемлы йыбырттыны мынӥсь калык быгатэ вал табере коньдонзэ аслаз караз банке поныны, нош Иерусалимысь басьтыны. Нокин соосты сюрес вылын ӧз ни тала. Банкъёс ужзы понна дасмос люкетсэ гинэ асьсэлы кельтӥзы. Ӵошатыса учконо ке, иудейёслэн, озьы ик понтификъёслэн черкъёсазы ужась казна коркаоссэс, таосыз басьто вал 40-50 люкетсэ. Но тамплиеръёс тросэз француз христианъёс вал, соин ик соос, чылкыт православной осконзылы луыса, «сьӧд» дуннелэн амалъёссы дорозь ӧз усе. Тамплиеръёслэн зарезьёс вылын самой кужмо флотъёссы кылдӥзы, вань дуннеез котыръясь карубъёссы. Нош музъем вылын самой кужмоесь ожгарчиоссы. Озьы тамплиеръёс трослы чускатӥзы шунды пуксён палась «сьӧдъёслэсь» калыке вӧлмон амалъёссэс. Но «сьӧдъёс» но учкыса ӧз пуке, соос но дышетскыны быгато вал, шедьтӥзы тамплиеръёсты быдтон амал. Ваньзы паймо, кызьы одӥг уй куспын вань кивалтӥсьёссэс тамплиеръёслэсь Француз король арестовать карыны быгатӥз? Малы папа-понтифик аслэсьтыз ожгарчиоссэ солы вузаз? Малы сыӵе кужмо ожгарчиос пумит сылытэк, сыӵе капчиен сётскизы? Вылаз ик арестовать каризы 40-50 кузя тамплиеръёсты, нош соос 3000-лэсь трос вал, соин ик, кулэ ке луиз, соос Француз корольлэсь ожчиоссэ син куспын быдтысалзы… Но тамплиеръёс сётскизы… Но со дыре ик арестовать каронзылэсь азьвыл, соослэн замокъёсысьтызы уйин кошкизы маин ке туж секыт тырмытэм экипажъёс но люкиськылыса-люкиськылыса ышизы озынъёс пала, кытын сыло вал соослэн галера-карубъёссы. Арестовать карисьёс замокъёсысьтызы соослэсь нокыӵе узырлыкзэс но артефактъёссэс ӧз шедьтэ. Нош марзэ шедьтӥзы, соку ик со узырлык понтифик но Франциысь король кие кылиз. Озьы соослэн замокъёссы, банкъёссы, коньдон поттон интыоссы, музъемъёссы луизы Римысь папалэн но Франциысь корольлэн. Нош галераос, кудъёсыз сярысь бӧрысь ини тодӥзы, тодмотэм палъёсы ышизы… Озьыен, тамплиеръёс ваньзэ тодыса улӥзы, но озьы ке но валтӥсьёссы ӧз пегӟе.  Малы? Тазэ Камит уггес вала, но малпаське со огшоры ӧй вал шуыса. Сыӵе малпаськонэ сое выёмытэ мукетыз но паймымон югдур. Ышем карубъёс пӧлысь дас одӥг галераос кӧня ке улыса вуизы Быдӟым Новгородэ, кытын соосты дуно куноосты кадь возьмаса уло ни вал  Новгородысь князь Юрий но Мускоысь Иван нимо князь пи, ӵапак со, кинэ бӧрысь шуизы князь Иван Калита, кудӥз куанер, нокинлы тодмотэм Муско княжествоез туж кужмо но ваньзылы тодмо кариз, мукет княжествоосты ас котыраз люкаса. Озьыен, али Муско эксэйлэн, Иоаннлэн, песятаезлэн песятаез, азьло пала ик тодэ вал тамплиер галераослэсь лыктонзэс но мар соослэсь Муско князьлы ваемзэс. Ӝыны ар пала со, уно ожчиосын возьмаса, нуллӥз Новгородысь обозъёссэ. Мусколэсь та учыр бере ӝутскемзэ лыдэ ке басьтоно, вератэк но валамон, мар кузьым вал со. Но малы меда тамплиеръёс Мускоез ӝутыны малпазы? Оло, соос понна мар ке вера вал, Рим кадь ик, сизьым мувыр вылын сылӥсь Муско?.. Оло татын тамплиеръёслы, асьме несториан осконмылы матэ луись вашкала православной осконзы мар ке усьтӥз?.. Тазэ Камит али ке но уг вала. Зэмзэ ке тамплиеръёсты но со ӟеч уг вала, кыӵе уж соос азе пуктэмын вал? Малы соос латин кыло католик осконэз вӧлмытӥсь папалэн ожгарчи-монахъёсыз луизы, асьсэос франциысь грек кыло православной христианъёс ке но вал? Малы собере папа соосты вузаз? Уно юанъёс бергало Камитлэн йыраз. Но огзэ со ӟеч вала, туала Муско эксэйлэн, Иоаннлэн песятаезлэн песятаезлы тамплиеръёс юнме ӧз юрттэ… Соин Камит та сярысь ноку уг вунэты, со ӟеч вала, куке но та ватосъёс солы одно ик усьтӥськозы шуыса.

Нош шунды потон палан «сьӧдъёсын» ожмаськыны Ирийысь Асгард юри кылдытӥз югыт ожчиослэсь каганат-империзэс. Нош каганэ  курултай бырйиз Тимуджинэз, кудӥзлы Чингисхан ним сётӥзы. Тӥни озьы Чингисхан выльысен люканы кутскиз пилиськылэм калыкъёсты, выльысен соос пӧлы вашкалаослэсь «дас вужкатъёссэ» но аслэсьтыз «выль ясакзэ» юнматыса. Но секыт вал «сьӧдъёсын» урмытэм калыкъёсты выльысен югдытыны. Угось тушмон адӟиськисьтэм вал. Огшоры калык ӧз тоды,  кызьы со тушмонэз адӟыны. Чингисхан ачиз адӟе ке но вал, ожмаськон музъемез укыр бадӟым луэмен со котькытчы вутскыны ӧз быгаты. Ас юрттӥсьёссэ но ваньзэсты адӟыны дышетэмез солэн ӧз лу. Угось туж ӧжытэз адӟыны дышетско. Адӟыны быгатӥсьёс но та дуннее трос уг вордӥсько. Чингисхан озьы ик шӧдӥз тушмон солэн империя пушказ но котыр ласянь пыӵа шуыса, соин аслаз котыръёсызлы тросэзлы оскемысь дугдӥз. Со валаз, пиосыз пӧлын но «сьӧдъёслэн» пыӵатэм висёнзы каръяське, котькызьы соосты утьыны тыршиз ке но. Озьы солы амалтэк висъяно луиз аслэсьтыз югыт йырвизьмо Джучи пизэ. Малы ке шуоно Джучи гинэ аслэсьтыз сюлэмзэ чылкыт возиз, Чингисханлэсь империзэ бадӟыматыса, одӥг шапык но вир кисьтытэк, туж трос нюлэс калыкъёсты каган борды огазеяз. Соин Джучилы Чингисхан сётӥз Урал гурезьлэн кыкпаласьтыз ик музъемъёсты, озьы ик Кавказэз, Крымез, асьме палэз, ваньзэ Шунды пуксён палась кунъёсты. Но Джучилы асьме пала вуыны ӧз кылды, солы пӧйшуракуз «янгышен» агуэн зырам ньӧл бышкалскиз. Джучи, висись яраезлы луыса, туж вазь кулӥз. Чингисхан валаз, кинъёс сое быдтӥзы, но ӧз усьты соосты калыкъёслы. Котьма ке но, Джучилэсь агай-вынъёссэ шараяса, шонер ӧй луысал, угось Чингисхан тодэ вал соос пӧлы «сьӧдъёслэсь» пыӵамзэс. Соин яратоно пизэ ватэмез бере, со ваньзылы ялӥз, табере Джучилэн выжыосыз гинэ калыкъёсын кивалтозы, соос гинэ империя борды огазеям музъемъёс вылын ханъёс но эксэйёс луозы. Озьы Чингисхан кылдытӥз «эксэй вир» валанэз. Чингисханлэн мукет пиосызлы номыр талы пумит вераны вал, ӧз кельшы ке но атайзылэн кылыз. Империзэ, «сьӧдъёслы» пумит эшшо но золгес юнматон понна, озьы ик Чингисхан котькытчы вӧлмытыны косӥз несториан черкъёсты, малы ке шуоно со яратэ вал несториан христианъёсты, Угось аслаз Бортэ кузпалыз но, сопал дуннее кошкем Джучи пиез но, атаезлэн Ван Хан агаез но несторианъёс вал. Нош несторианъёс борды, кызьы адӟиз Чингисхан, нокыӵе «сьӧдъёслэн» кырмиськемзы ӧз луы, малы ке шуоно соос, староверъёс кадь ик, ведаослэсь кыдёке кошкемын ӧй вал. Угось несторианъёс ӟеч тодо вал, кин со «югыт инмар», но кин со «сьӧдэз». Вылаз ик Чингисхан котькыӵе оскон улын сылӥсь храмъёсты но мозмытӥз оброкъёслэсь. Нош кин дӥсьтэ вал черкъёсты, оскон юртъёсты таланы, соос кӧшкемыт кулонэн кулӥзы. Таӵе ужрадъёссэ пуктэмез бере Джучилэн улусаз атаезлэсь ужзэ азьланьтыны со ыстӥз Бату ханэз, Джучилэсь ачиз кадь ик чылкыт но югыт пизэ. Озьы аслаз югыт ожгарчиосыныз но Чингисханлэн Субэдэй батыреныз, «сӧдъёслэсь» ужам ужъёссэс тупатыса, Бату хан вуиз асьме пала. Асьме пал калыкъёс сое туж шуныт пумитазы. Малы ке шуоно адӟизы, кызьы ужаз Бату хан, пуксён палась черкъёслы сётскем князьёсты чускатыса но югыт князьёсты соос интые пуктылыса. Вылаз ик черкъёсты но Бату хан ӧз иса, тодэ ке но вал соос пуксён палъёсын герӟаськемын шуыса. Со кылзӥз гинэ, кыӵе осконлы соос оско. Угось тапалась Джучи улусысь черкъёс Византиысь но Римысь епархиос улын ке но ужазы, осконзы ласянь соос ӧз висъяськылэ несториан черкъёслэсь. Угось вань огшоры калыкъёс улӥзы несториан черкъёслы матэ луись вашкала осконъёсынызы, нош пуксён палась черкъёс нырысь ик лыктӥзы узыр музъемъёсты басьтыны. Соослы нокыӵе но ӧй вал калыкъёслэн кыӵе инмарлы оскемзы. Римысь латин кыло папа-император улын, католикъёс сяна, 70-лэсь ятыр пӧртэм инмаръёслы оскисьёс люкаськизы. Папа чик но ӧз тыршы соосты католик карыны. Солэн черкъёсаз Римысь калыкъёслэн инмаръёсыныз артэ сылӥзы мукет калыкъёслэн языческой инмаръёссы, нош языческой инмаръёсын артэ Вуж Заветысь кадыръёс. Озьы ик вал асьсэды православной шуись грек кыло Византиысь-Константинопольысь патриарх-императорлэн черкъёсаз. Кыксы ик соос нырысетӥ интые пуктӥзы выль но выль музъемъёсты асьсэ улэ кырмонэз. Соос черклэн нимыныз пуктылӥзы корольёсты, герцогъёсты, князьёсты. Оглом кивалтӥзы вань шунды пуксён палась музъемъёсын. Туж яратӥзы вузаськон но коньдон поттон удысъёсты. Соин ик соослэн черкъёсазы ужазы иудей, араб, грек, тюрк, генуя вузчиос. Асьме Джучи улусамы вуыса соос нырысь ик осконзэс вӧлмытыны ӧз сюлмаське, соослы нырысь ик кулэ вал тапалась калыкъёслэн осконъёссы но сямъёссы доры матэктыны, малы ке шуоно соослы кулэ вал калыкъёсты асьсэ улэ пыньыртыны. Соин соос, генуя вузчиосын ӵош  асьсэ ожчи орденъёссэс сьӧразы кыткыса, нырысь ик пуксьылӥзы коньдон поттон интыосы, вузчи сюресъёсы но мукет. Нош пуксьылэм беразы ужаны кутскизы князьёсын, угось шунды пуксён палазы соослэн та ласянь трос люкаськемын вал тодонзы. Валамон ини одӥгъёссэ князьёсты асьсэ пала карыса, мукетъёссэ ог-огзылы пумит пуктылыса соос кылдытӥзы пӧртэм ожмаськонъёсты. Котькытын тылэн гомӟизы гуртъёс, каръёс, бусыос, нюлэсъёс. Озьы соос туж ӝог лябӟытӥзы асьме палась несториан осконэн улӥсь музъемъёсты. Вылаз ик шуо, инкуазь но куинь ар ӵоже нянь ӧз сёты, татын но, шӧдске, ужазы орденъёслэн сьӧд ведӥнъёссы. Соин ик Бату хан асьме пала вуыку, тросэз кужмо каръёс таркамын, ӝуатэмын вал, калыкъёс сютэмзылы чидатэк, писпуосты йырйизы, сюрсэн-сюрсэн музъеме выдылӥзы. Нош со дыре ик князьёслэн но черкъёслэн ю-нянен тырмытэм мурӝолъёссы ӧз дыртэ сютэм калыкъёслы усьтӥськыны. Соин Бату хан нырысь ик калыкъёсты утён борды басьтӥськиз, усьтӥз соослы ю-нянь мурӝолъёсты, юри ыстӥз вузчиосты сютэм калыклы нянь вайыны. Валамон ини, пуксён палась епископъёс ожчи орденъёсынызы ӵош, Бату ханлэсь пегӟыса, ышизы сопала, пуксён пала, кытын дасяськемын ни вал туж трос орден-ожгарчиос Джучи улусэз басьтыны. Со ожгарчиос пӧлын вал мадяръёс, ляхъёс, литваос но уно мукетъёсыз католикъёс улэ сюрем калыкъёс. Бату хан Субэдэен ӵош ваньзэс со орденъёсты пазьгиз. Собере пыдло палаз пырыны кутскиз. Асьсэды император шуись кыкез ик патриархъёс асьсэлэсь каръёссэс кельтыса, кыдёке пыдло пегӟизы. Мар луысал отӥяз, али тунаны гинэ кыле. Нош Бату ханлы дугдоно луиз, угось солы дурбасьтӥсь Угэдэй каган кулэмен сэрен со интые Бату ханлэсь тушмонзэ курултай пуктӥз. Тушмонэзлы пумит выль ожчиос дасян понна Бату хан берен асьме пала Булгар каре берытскиз. Собере кема ик ӧз улы, кулӥз. Бату хан сыӵе вазь ӧй кошкысал ке, сомында курадӟонэз асьме калык ӧй адӟысал. Бату хан бере Булгар карысь палэнскем Сарае лыктэмъёс туж зол куашкатӥзы асьме палъёсты. Асьсэос но туж векчи пилетъёслы люкиськылӥзы.

Югыт Перунлэн тунооссылэн верамзыя, ваньмыз со урод югдур кылдӥз «сьӧдъёслэн» тыршемзы сэрен. Тимуджинлэсь Чингизит империзэ йырвизьтэк  кельтон понна, соос быдтӥзы Асгард карез. Ваче пумит ӝутылӥзы чингизитъёсты, пичигес но пичигес пилетъёслы люкылыса. Ӵапак та векчиян вакытэ Джучи улусэ азьвыл шунтэм интыосазы выльысен берытскизы пуксён палась кыкез ик кузёос, Византия но Рим черкъёс. Та удысын тужгес но кескичгес ужаз Византия, таосызлэн епархиоссы Сарай дорозь ик вуизы. Муско но соос кие шедиз. Малы со озьы луиз, Камит нырысь уг вала вал, но умойгес ке чаклано со адӟиське. Муско турттэ вал ассэ Джучи улусын Быдӟым эксэйлык карыны. Нош князез «эксэй» карыны со вакытэ быгатэ вал яке Византия-Константинопольысь патриарх-император, яке Римысь папа-император. Иван Калита  Мускоен кивалтыку, солэн выжыосыз огшоры князьёс гинэ вал, тамплиеръёслэн коньдонзы но соосты эксэйлык дорозь ӧз на ӝуты. Дмитрий Донскойлэн выжыосыз Мускоен кивалтыку, соос ӧжытак ӝутскизы – луизы Быдӟым князьёс. Нош Иван Васильевич (Куинетӥ) Муско княжествоен кивалтыку, ӵапак Византилы но Римлы луыса, Муско пӧрмиз эксэйлыклы, нош ачиз Иван Васильевич нырысетӥ Муско эксэйлы.

Иван Васильевичлы «эксэй» ним басьтыны юрттӥз кык югдур. Нырысетӥез югдур, туркъёслэн Крым котырын кылдэм Осман империзы, кудӥз Византиез пазьгиз но вань император выжыоссэс соослэсь быдтӥз. Но озьы ке но кык агаеныз Риме пегӟыны быгатӥз Зоя Палеолог, кудзэ бӧрысь София Палеолог шуизы. Ӵапак та нылашез Римысь папа-император дэмлаз Иван (Куинетӥ) Васильевичлы аслыз кышно басьтыны. Римысь папалэн туж потэ вал та сюан пыртӥ со вакытэ туж кужмо луэм Мускоез Осман империя вылэ узатэмез, малы ке шуоно Римысь понтификъёс туж кышкало вал, османъёс Римез но, Византиез кадь, пазьгозы шуыса. Кыкетӥ мугез Римысь понтификъёслэн асьсэ кие кырмемзы потэ вал Джучи улусысь йыртэк кылем Византия черкъёслэсь епархиоссэс. Угось Чингисханлэн ясакеныз вань черкъёс мозмытэмын вал оброкъёслэсь, соин ик соос пӧрмемын вал коньдон дурись банкъёслы. Нош коньдонзы шонерен мынэ вал асьсэлэн кузёоссы доры, уг кыльы вал князьёслы. Вал на эшшо одӥг мугзы Римысь понтификъёслэн – со тамплиеръёслэн Муское лыктэм ваньбурзы но артефактъёссы, кудӥз доры соос кемалась дырысен кыстӥськизы…

Римысь понтификъёс шонер малпаськизы, Иван Васильевич соглаш луиз, София Палеологез кышно басьтыса, аслыз «эксэй» ним юнматыны. Ӵапак София солы бӧрысь  ваиз Василий нимо пизэ, кудӥз туала Муско эксэйлэн, Иоанлэн, атаез луиз.

Но понтификъёслэн малпам ужъёссылы быдэсмыны ӧз кылды, Римысь понтификъёс бадӟым пӧлы пум гинэ адӟизы. Ӧз султы Иван (Куинетӥ) османъёслы пумит. Озьы ик со ӧз сёты Римысь понтификъёслы Джучи улусысь йыртэк кылем грек черкъёсты асьсэ кие басьтыны, малы ке шуоно ачиз со табере Мускозэ кариз Куинетӥ Рим но вань черкъёсты аслаз Муско митрополит улаз юнматӥз. Тамплиеръёслэн узырлыксы но нокинлы ӧз усьтӥськы, малы ке шуоно тамплиеръёс но нокытчы Муско котырысь ӧз кошке…

Но озьы ке но Муско котырысь тӧлъёс ӧз чускалэ. Ачиз Иван (Куинетӥ) Васильевич сопал дуннее кошкем бере Римысь понтификъёс Литва княжество пыртӥ Иванлэн Василий пиез доры матэктыны кутскизы. Кышноязы сое Мамайлэн выжыысьтыз Литваысь принцессаен Елена Глинскаяен. Озьы соос ялан матэктӥзы Муско эксэйлык доры. Котькытын вал соослэн синъёссы, пельёссы, пеллясь тӧлъёссы. Мускоын тросэз уг валало вал, кытысь со тӧлъёслэсь пеллямзэс. Византилэн кылдытэм епархиосыз Муско кие ке но сюремын ни вал, соос тросэз ялан, азьвыл сямен ик, пуксён паласьёслы  лушкемен ужазы. Угось котькуд епархиен кивалтӥз грек кылысь кылдытэм «епископ», асьме сямен ке верано со «учкись яке чаклась» шуэм луэ. Камит валамъя трос интыысен Муско улонэз «сьӧдъёс» чаклаллязы. Но котьма ке но, Муско быдэсак «сьӧдъёслы» ӧз сётӥськы. Василий, аслаз атаез кадь ик, ялан юнматӥз Муско эксэйлыксэ, ӧз шонтӥськы Литва княжество пала. Соин сэрен «сьӧдъёс» Василиез быдтӥзы, Елена Глинская пыртӥ Муское пыӵаны малпаса. Но Елена но, шӧдтэк шорысь, соос пала ӧз кариськы, соин ик ассэ но сое картсэ кадь ик быдтӥзы. Табере соос малпало ни вал пичи Иоанн пыртӥ Мускоез ӧнераны. Но пичиысен ик атайтэк-анайтэк кылем Иоанн туж визьмо вал, со пичысен ик ваньзэ тае тодыса будӥз. Эксэй луэмез бере со но песятаезлэсь но атаезлэсь сюрессэ азьланьтӥз. Соин ик пуксён паласьёслы со шуиз: «Мынам калыке шунды ӝутскон палась, со тӥ палась ӧвӧл! Милемды Шунды потон палась апостол Андрей крестить кариз! Нокыӵе Владимир ми доры ӧз вуы. Ми Вуж осконэз гажаськомы, милемлы тӥлядэз выль осконды, выль Иисус инмарды кулэ ӧвӧл!» Малы Иоанн озьы шуиз, угось со ӟеч тодэ вал, католикъёс но протестантъёс табере вуж осконэз палэнтыса, вань калыкъёсты выль осконзы пӧлы юнматыны тыршизы. Радомирез, кудӥз вуж осконэз югдытыны лыктӥз вал, соос каризы Иисус Христос нимо выль инмар. Оглом, калыкъёсты уарлы берыктон понна, соос троссэ вуж осконысь воштӥзы, кылсярысь, ӵушизы «уно пол та дунне вордскылон» сярысь, «реинкарнация» сярысь валанэз. Туж уг ярато вал Карна яке Желя сярысь тодонэз. Соос шуизы,  калык кулэм бӧрсяз яке «рае» яке «адэ» гинэ сюре. Папалэн вуж осконэн нюръяськыны кылдытэм «иезуитъёссылы», кудъёсыз лыктӥзы вал Иоанэз асьсэ пала берыктыны, Муско эксэйлэн верам кылыз туж но туж ӧз кельшы.  Соин ик уг ярато табере Иоаннэз генуя вузчиос но, католикъёс но, соос улэ шедем ляхъёс, литваос, крымъёс но. Нош со понна асьме палъёс Чингисханлэн Джучи пиезлэсь вирзэ нуллӥсь Муско эксэез ярато. Угось Джучи выжыысь вирез котькытын зэмос эксэй вир шуо, сое котькудӥз арсавыл калык ӟеч тодэ. Муско но вала, асьмеос Джучи эксэйзэс яратӥськомы шуыса. Соин ик трос соослэн асьме палась калыкъёсын ужась адямиоссы. Но Крым палъёс, кудъёсыз, «сьӧдъёслэн» кивалтэмзы улсын, Быдӟым Тартариез вунэтон вылысь, асьсэды татаръёс шуыны кутскизы, кемалась Мусколы пумит ужало. Табере туж паськыт вӧлмо «монголо-татаръёс» сярысь выжыкылъёс. Трос ужало та понна иезуитъёс. Арсавыл калыкъёс воксё паймемын та юри пӧясь иворъёсты кылыса. Валамон ини, со юри лэсьтӥське, Быдӟым империез таркан понна. Табере Кузонын но, Азьтарханын но, Ногай, Сибыр эксэйлыкъёс пӧлын но тросэз асьсэды татаръёс шуыны кутскизы. Кытысь со кылдэ, волхвъёс валало, «сьӧдъёслы» кулэ жугиськон, озьы соос кужым басьто, соин ик пильыло калыкъёсты, пичиято, лябӟыто соослэсь азьвыл данзэс но кужымзэс. Озьы ик туж уг кельшо соослы «вуж осконэз» нуись, ведаосты гажась несториан яке православной христианъёс. Соин соос Бату хан кулэм бере солэсь вынзэ Берке ханэз мусульман карыса, асьсэ пала берыктӥзы. Соин Берке туж зол ортчиз несториан осконэн улӥсьёс вылтӥ. Нырысь ик быдтӥз Бату ханлэсь несториан кузпалзэ но солэсь несториан пиоссэ. Собере мукет несторианъёсты но туж зол тарказ, котькытчы пуктылӥз мечетьёс. Озьы мынэ адскисьтэм пушлапалыз та ожмаськонлэн. Сое Камит туж ӟеч вала, малы ке шуоно сое ӟеч дышетӥзы. Нош огшоры калык вылласянь гинэ адӟе. Солы уг адӟисько генуя вузчиос юрттэмъя пуксён палась ляхъёс дорысь, Литваысь, Византиысь, Римысь, Крымысь, Киевысь лыктӥсь католикъёс, шуныт палась Крымысь но мукет ёросъёсысь лыктӥсь мусульман вузчиос, уйпалась немецъёслэн ганза вузчиоссы юрттэмъя Новгород пыртӥ лыктӥсь протестанъёс. Огшоры калык уг вала, малы Иоанн Кузонэн ожмаське, малы Мускоос табере тапала  ӵемысь вуыло. Но уг быгаты Иоанн тапала вуылытэк. Со котыр ласянь тушмонъёсын котыртэмын. Уйпалась Балтика зарезе сое уг лэзё шведъёс, пуксён паласен сое литваос но ляхъёс пыртӥ кырмыны туртто католикъёс, папалэн кылдытэм иезуитъёсыз. Крымысен – османъёсын герӟаськем крым ханъёс. Кузон паласен Сибырь, Азьтархан, Ногай но Кузон ханъёс. Уг поты Иоаннлэн Джучи улусэс «сьӧсьёслы» сётэмез. Но соиз но вань, мускоос но сураськемын пуксён палась, уйпалась, шуныт палась лыктӥсь тулкымъёслы луыса. Кудзэс ке коньдон берыктэ, кудзэс ке «сьӧдъёслэн» кужымзы.

Но озьы ке но ошкуйчиос вылэ мускоос ӧз урдскылэ на. Тодо соос ошкуйчиослэсь кин луэмзэс, соин, лэся, уг исало. Нош бигер пыжъёсты соку ик котырто, уг ярато бурдо арыслан пусъёссэс, одно ик вандылӥськон кутске. Ма бигеръёс но трос табере ветло кам вылтӥ. Тужгес но Крым палъёс яке Мамайлэн Бату ханлэсь Зарни Валзэ утчась выжыосыз. Таосыз асьсэос уга ӟучъёсын ожмаськон муг гинэ утчаса ветло. Крым палъёслэн со виразы пыӵамын, нош Мамай выжыослэн сыӵе дуно Зарни Валзэс Сарайысь лушкамзылы али но йырзы кур. Сокем тодэмзы потэ, кытчы ышиз кыкетӥ Зарни Валзы, ӵапак та муген ӟучъёсты думылыны ярато. Нош ошкуйчиос вылэ таосыз но, соосыз но ӧз ожалскылэ на. Оло кышкало, оло ханъёссы уг косо. Но, озьы ке но, ваче вуылонъёс воксё ӧвӧл шуыны уг лу. Бигеръёсын но, ӟучъёсын но вандылӥськонъёс вань вал ини – мугъёссы та байланонъёслэн пӧртэм: ӧм тодмалэ яке ӧм валалэ шуо, нош асьсэос, оло, юри ошкуйчиосты кырмаса эскерыны туртто… Кыӵеесь, пӧй, та ар малайёс, зэмзэ но-а сокем ӧткын ожгарчиос, кызьы соосты вань камъёс вылын верало? Но соос ӝог валало ошкуйчиослэсь кам вылын кузё луэмзэс. Соку ик ожез дугдытыны куро.

Бон, ӟырданы кутскизы кам сюресъёс… Уг кельшы Камитлы Кузон ханъёслэн тылэн шудэмзы. Татаез шуэ: бигеръёс Муско шоры али но вашкала сямен учко, нош Муско табере кужмо луэмын, ӧвӧл ни со азьвыл кадь ляб сылӥсь Муско Тартария. Тани бигер ханъёс кузон базарез ӟучъёслы пытсазы вал – мар ӟечез солэсь пӧрмиз? Татаез верамъя, Кузонэ Крым палась вуэм ханъёс ӧз валалэ, мар йӧндыремзэс. Угось та базар аслаз вужкатъёсыныз гинэ улэ, кужмо киос гинэ сое  кутыны быгато. Куке но азьвыл сое кутыса возё вал хазаръёс. Хазаръёсты ашкеназъёс ки улазы пыньыртэмзы бере, валамон ини ашкеназъёс кырмалтӥзы та зарни сюресъёсты. Таман ашкынэмзы бере, ярам ай, пазьгиз соосты Кый (Кыев) карысь Святослав. Собере базар нош ик лябӟем хазаръёс кие кылиз. Но Быдӟым Бату хан тапала вуэм бере, базар выльысен улӟиз. Бату хан туж уно выль каръёс ӝутӥз, вузчиослы эрик сётӥз, ашкеназъёсын кылдытэм секыт оброкъёслэсь мозмытӥз, вузчиослы котькуд каръёсын лавкаоссэс усьтылыны музъем удӥз. Аслэсьтыз Сарайзэ но со Волга- Булга-Идель кам вӧзы пуктӥз, нырысь Булгар каре, бӧрысь выльзэ лэсьтӥз. Нош Булгар дорозь арсавылъёслы кык вамыш сяна ӧй вал, озьы булгаръёс но арсавылъёс кие кылиз Быдӟым Базар, оглом – асьме выжыосмылы. Нош Крым палась вуэм бигеръёс, кинъёс тодо вал лушкам, талам нуныосты но полонэ басьтэм адямиосты гинэ турк-османъёлы но арабъёслы вузаны, татчы вуыса малпазы вань Базар ужез асьсэ кие серметаны. Но Базар со кобла ӧвӧл ук, кам но скал ӧвӧл, ас гидад ворсаны. Кузон озон табере ӟучъёс пала, Кузонлэсь вылэгес, Улӥ Новгородэ, Чускуалае, кошкиз. Гырпумъёссэс сыско Крым палась Кузонэ вуэм бигеръёс, уг лэзё ни соосты ӟучомем базаре. Уйпал вуостӥ лыктӥсь вузъёс Кузон дорозь тросэз табере уг вуо, уг адӟо ни бигеръёс уйпалась лыктӥсь дуно куосыз, уйпалтӥ васькись шунды пуксён палась вузчиосты. Озьы ик вӧзтӥзы табере ортче Индиысь, Персиысь, Иранысь, Турциысь, Китайысь лыктӥсь парча, аксамит, алтабас, бархат, буртчин. Нош азвесь сярысь веранэз ик ӧвӧл. Ярам ай, асьме ошкуйчиосмес отчы пыраны лэзё. Уггес ярато ке но ошкуйчиосты, гажало, валало соослэсь кулэзэс. Соин ик Кузонысь но, Мускоысь но, пуксён палась но байаръёс уллёосын ветло ватка ошкуйчиос сьӧрын, угось мукет амалзы ӧвӧл, асьсэ коже уг быгато шуныт пала но, уй пала но потаны. Малы ке шуоно со сюресъёс Быдӟым Арсавыл выжыосмы пыртӥ ортчо. Ӧвӧл соослэн кык паласьтыз ик вузчиосын дауръёсын герӟаськем кусыпъёссы. Соослы одно ик асьме вузчиосын герӟаськоно луэ. Ватка но, Кам но, Волга-Булга-Идель-Ра но дауръёсын асьме выжысмы пыртӥ вуз сюресъёс вылэ потто. Быдӟым Ошмылы тау, Быдӟым Арсавыл ярдуръёсы котькуд вузчи сюресъёс али ке но вуыло. Ма Кузон Базар но воксё быриз уд шу, лыктыло на татчы вузчиос, тужгес но тулыс, Базар усьтӥськон вакытэ, оштолэзе, Быдӟым Гондырлэн йырыз-пыдыз азьын шертовать карыны – быдӟым Ингурезь азьын, Инлэн бамез-бамалэз азьын, кыл сётыны…

Азвесё шаер шуо асьме палъёсмес кыдёкысь вузчиос но. Яке уйпал зарезьчиос «Биарма» шуо – «Быдӟым гондыр-ошлэн узыр музъемез», яке сое ик вакчиятыса – «Парма». Нош шуныт палдуръёс тапалась шаерез Артани, яке Арсани шуо. Асьмеос Арсавыл шуиськомы. Асьме шаере дауръёсы люкаськемын азвесь но, зарни но. Соин Мускоысь яке Уйпал Новгородысь «сьӧд ошкуйчиос», уйпал зарезь муземъёсысь варягъёс кадь ик, тапала ветлыны дышизы… Ялан соос кортнаны туртто асьмелэсь вузаськон сюресъёсмес… Ялан тодыны туртто, кызьы асьмеос со сюресъёсты возиськомы…

– Со витьымтэ «куноосты»-а, мар-а утчаськом, кинъёс азвесьмес утчаны-таланы вуизы?.. – оломар но лыктэ Камитлэн йыраз. Со вала умойтэм лэсьтэ шуыса. Уг яра солы номыр сярысь али малпаськыны. Йырыз но лулыз но отчы-татчы медаз ветлы. Но трос тодэ пияш, соин ик быдӟым кам вылын уг лу йырзэ серметамез, ачиз но аслаз  малпанъёсызлэсь кышка. Укыр бадӟым дуннее выйисько шуыса, ӝогак аслэсьтыз йырзэ отысь поттыны тырше. Нош выйыны со котькытчы быгатэ, сыӵе быгатон солы пичиысен сётэмын, озьы ке но тырше эсэпсэ возьыны, укыр пыдло пыремез уг поты. Азвесь со азвесь, зарни но зарни, соос кужымзэс ӧз ыштэ, но табере уго камъёс вылын  «кун» нимо коньдон кивалтэ. Огшоры кулэсь лэсьтэм уксё – акся. Ма арабъёслэсь азвесь «дирхемзэс» но «кун» шуыны туртто. Но со озьы ӧвӧл. «Кун» кылдэмын «коньы» но «куница» кылъёслэсь. Со сыӵе валан гинэ – одӥг коньы ку, араб азвесь «дирхемлэн» одӥг ныльмосэз  яке одӥг «кун». Соин ик купечъёсты но байяръёсты но, кинъёс ваткаос доры ку басьтыны ветло, табере «куно» шуо. Угось соос «кунъёсын» лыкто куосмес басьтыны. Камит «ку нуллӥсь» валан бордысь со кылдэмын малпа вал, удмурт «кунул» но ӟуч «кунка» кылъёслэн кылдэмзы мактал, но «куно» – «кунъёсыз вань», «трос куно адями» бордысь кылдэмын. Ӟучъёслэн но со озьы ик, «гость» уно коньдоно адями. Соин котькытын табере соослы «кунокуаос», ӟучъёслэн кадь «гостинницаос, гостин азбаръёс» лэсьто. Вылын но, улын но табере азвесез «кун» коньдон воштэ. Татаезлэн верамезъя, ӟучъёс сое кылдытӥзы, нош ӟучъёсты талы дышетӥзы соос доры вуэм тамплиеръёс, вашкалаосыз храмчиос, мукет сямен ке верано.

Тамплиеръёсты нокытын тодӥсьтэмез ӧвӧл. Но табере, ӟеч тодэ Камит, выльёсыз «тамплиеръёс» кылдӥзы. Соосты янгышаса, «тамплиеръёс» шуо. Но соос чик но Муско котырысь тамплиеръёс ӧвӧл, соос «тамплиеръёс» сьӧры ватӥськыса ветлӥсь папалэн орденъёсыз… Папа «тамплиеръёсты» быдтэм бераз ас котыраз уно орденъёсты кылдытӥз. «Орден, ордо» немец но латин кылын «радлык», «порядок» луэ. Соин ик Джучи улусэз «Зарни орда» шуон но Римысь Папа котырысь ик, латин кылысь лыктэ. Соос юри «Зарни орда» шуо, асьмеос асьмеды озьы мед нималомы шуыса. Мед, пӧй, оскомы, соослэн кылдытэм выжыкылъёссылы. Но асьмеос ноку сыӵе кылъёсын ӧм вераське. Соос асьсэлэсь ожгарчи уллёоссэс «орден» шуо, нош асьмеды уродос пуштрос пыртыса «орда» шуыны выро. Камит ӟеч тодэ соослэсь котькуд орденъёссэс, ӟеч вала кызьы, кин понна соос ужало. Дышетӥсьёсыз тае пыр-поч тодытон ласянь туж бадӟым саклык солы висъязы. Малы солы сыӵе бадӟым саклык висъязы та орденъёсты но соослэсь школа-университетъёссэз валан понна, Камит али ке но пыр-поч уггес вала. Соин ик нырысь Камит мылыз потытэк сое дышетӥз, но бӧрысь ӧжытак валаз, шӧдске, малы та удысэз сое валаны дышето. Угось ӵапак соос бордысен лыктэ кышкытлык. Соос бордысен лыктэ калыкъёсты уаръёслы берыктӥсь кужым. Соосты, вань векчи орденъёссэс огазеяса, оглом куиньлы люкыны луэ: Доминиклэн орденэз пушкы пырисьёс, Францисколэн орденэз котыре огазеяськисьёс но берпуметӥез выль кылдэм ордензы Игнатий Лайолалэн орденаз пырись «иезуитъёс». Вылласянь ке учконо, соос туж чебересь адӟисько. Куиньназылэн та орденъёслэн пуксён палан туж трос ӝужало дышетскон «школаоссы» но «университетъёссы». Соос сюлэсь трос ни. Тужгес но Доминиклэн орденэзлэн. Но Святой Францисколэн орденъёсыз ваньзылэсь ӟечгес висъясько. Кылсярысь, Святой Франциско, тон мынам братэ шуыса, ӟыгыртӥз чумаен висись шадра ымныро адямиез. Сыӵегес ик манерен ужа солэн орденэз. Камит понна тужгес но тодмо луэ францисколэн орденаз пырись монах Плано Карпини, кудӥз Ньылетӥ Иннокентий папалэсь кык гожтэтсэ басьтыса 1246 арын ветлэмын асьме пала, Сарае, пумиськемын Бату ханэн, собере кошкемын Каракорума ставкае, отын али гинэ пуктэм каганэн Гуюкен пумиськыса, 1247 аре берен бертэмын Герман шаераз. Камит туж ӟеч тодэ тазэ монахез, малы ке шуоно лыдӟиз солэсь серемлэсь но серем книгазэ, кудаз со асьме палъёсысь адӟе кӧшкемыт кышномурт драконъёсты, кудъёсыз уло камлэн одӥг палаз, нош мукет палаз, солэн верамезъя, уло пуны йыро гоно воргоронъёс. Валамон, Карпини, шӧдске, аслаз йырыныз гинэ улэ, мукетъёслэсь нокыӵе тодон-валанъёссэс со басьтыны уг туртты, ӧвӧл солэн сыӵе малпанэз ик, соин со номыре адӟымтэ но валамтэ, троссэ йырысьтыз малпаса гожтэм. Яке юри озьы тартарилэсь калыкъёссэ сьӧдманы вырем. Но Доминиклэн орденысьтыз монахъёс мукетэсь, соос ӵап демократъёс луо, Аристотельлэсь валанзэ лыдэ басьтоно ке. Соос мукет тодонъёслэсь но уг возьдасько. Соос утчало, лушкало мукет калыкъёслэсь вашкала книгаоссэс, артефактъёссэс. Валамон, «университетъёссэс» кужмогес карон понна… Но кытын уно тодон люкаське, отын катъёс сьӧры ортчон но кужмоя. Тросэз отын «сьӧд вегинъёслэсь» но амалъёссэс дышето яке Тот Гермеслэсь ужзэ азинтыса, алхимиез эскеро, утчало «кулӥсьтэм элексирез», «философъёслэсь иззэ», «одӥг сюро ошлэсь сюрзэ», «огшоры кортъёслэсь зарни пӧрмытон амалэз» но уно мукетсэ. Волхвъёс Камитлы соослэсь трос кышкыт ужъёссэс усьтӥзы. Камит шӧдэ, сое юнме ӧз дышетэ та орденъёсты сокем пыр-поч валаны. Оло ини Камитэз но соос пӧлы мыныны дасяло? Таӵе малпанэ со вуиз огпол вылӥ дышетӥсьёсыныз пумиськылэмез бере. Укыр ини мур сое та ласянь дышетӥзы. Ӵапак Доминиклэн орденъёсыз, шӧдске, тамплиеръёс сьӧры ватӥськыса, Джучи улустӥ ветло. Со «христос ожгарчиосын» Камит пумиськылӥз ни вал, Ваткатӥ но соос куд-ог дыръя ортчыло. Утчало вашкала сульдэръёсты, чеберманъёсты, веда книгаосты, истуканъёсты но уно мукетсэ, юаллясько инмар вӧсьёсмес тужгес но ярато зэрпалъёслэсь яке чудьяослэсь бадӟым ву нюртон бере куашкам каръёссэс эскерыны… Нош куашкам зэрпал но чудья каръёс туж трос камъёс котырын, тужгес но Идель-Булга  но Нукрат-Ватка кам ярдуръёсын… Со ӝутыны луонтэм бадӟым тӧдьы изъёслэсь сюрем каръёс котыртӥ ваткаос уг калтырто. Отын трос валантэмез вань… Ву нюртон бере кылем зэрпалъёс гинэ яке кытысь ке чудья выжыослэн выжыоссы гинэ со каръёсты выльысен ӝутыны быгато. Угось со тӧдьы изъёслэн секталазы интыысьтызы ик выртыны луонтэм, нош зэрпалъёс но чудьяос соосты, мугоръёссы ке но ог вить-дас пол асьмелэсь бадӟымесь, чик но киосынызы уг ӝуткало, пе, соос кызьы ке мукет сямен ӝутыны, вӧлыны, небӟытыны, лякыны быгато. Зэрпалъёс туж визьмоесь но кужмоесь, мар но соос уг тодо, мар но уг быгато. Кыӵе чебер вӧло ӝужытэсь юртъёссы котыре пӧртэм сульдэръёсты. Но соос кадь ик визьмоесь вылӥллям  чудья калыкъёс но. Котькуд карын йыр берганы кутске оло чудьяослэн, оло зэрпалъёслэн ужъёссылы синмаськыса. Но зэрпалъёс пӧлын но турлыосыз вань. Камит ӟечъёссэ гинэ зэрпалъёсты адӟылӥз, но вань, пе, шуныт палан уродъёсыз, кудъёсыз адямиез но сиё. Но соосыз но, таосыз но туж трос тодо, оломар но пӧрмытъяны быгато. Соос пӧлын туж бадӟымесьёсыз но вылӥллям, но соос ву нюртон дыръя быриллям, ву нюртон бере инкуазь воштӥськемен но тросэз кулӥллям. Табере со укыр бадӟымъёсыз, ӟуч былинаосысь Святогор сямен, гурезьёсын гинэ, оло, пе, уло на, яке гурезь пушкысь каръёсын, гутёосын – озьы верало тодӥсь пересьёс. Соин ик покчиосыз но зэрпалъёс, асьсэ пичи калыкъёсынызы ӵош, кудъёссэ соос ву нюртонлэсь утизы, пӧртэм интыосын уло. Нош со выль «тамплиеръёс» соосыз доры но, таосыз доры но вутскыло…

– Соос тодо, зэрпалъёс ӝоген ваньзы бырозы шуыса, соин ик тодон-валанъёсмес утчало… – валэктӥз Камитлы куке но татаез.

Зэрпалъёслэн быронзы сярысь Камит тодэ ни вал. Бадӟым Ву Нюртон бере кылдэм куазь воштӥськон соосты кышкыт висён кадь турна, со ваньзылы тодмо.

– Кыӵе сыӵе тодон-валанъёсмес? – паймиз соку Камит.

– Зэрпалъёс соослы уг верало, нош асьмеды дышето пӧртэм тодонъёслы – тылэз гозыяны, вуэз гозыяны, кезьытэн кынтыны, вашкала му адямиез султытыны, зорез ӧтьыны, тыл адямиез, корт адямиез ӧтьыны, тодонъёсмы асьмелэн тырмыт ук, асьмелэн зэрпалъёсмы асьмеды ярато, ма зэрпалъёсмы гинэ ӧвӧл, чудьяос пыртӥ дышетскем тодӥсьёсмы но асьмелэн трос на… – пальпотыса  нош ик валэктӥз татаез.

Камит соку нокыӵе ӧз кариськы, зэм но тодонъёсмы тырме, тодӥсьёсмы но тачак, со ачиз но троссэ соосты адӟылӥз, соин сэрен тушмонъёс но палэнтӥгес ортчо арсавыл калыкмес. Камитлэсь одӥг пигонзэ но ӧз вырӟыты вал атаезлэн валэктэмез. Соку со юмоко сяменыз шуак пальпотыса, тодаз гинэ вайиз Падей выжыысь песянаезлэсь «исьтаканэ, исьтаканэ, исьтаканэ» шуыса чингылиосын истукан котыртӥ эктыса кырӟамзэ… Нош али, кык пала кыриськись ву шоры учкыса, со доры ваньмыз вуиз кадь, Камит ваньзэ валаз, йырсиосыз ик солэн пежырскизы. «Соос асьмеды вормыны туртто ук! – чилектӥз солэн йыраз. – Асьсэос котькуд сэргын кузёос луыны туртто, ваньзэсты талан понна, эриктэм карон понна… Иське, храмчи-ожгарчиос но «сьӧдъёслы» ужало?» Та малпан Камитлэсь тыбырзэ ик кынтӥз. Со малпа вал, храмчиос тодон гинэ утчало, нош соос асьмеды вормыны кужым утчало?.. Нош со озьы ке, ваньмыз табере палдурес луэ. Камитлэн «христос орденъёс» сярысь малпанъёсыз но. Соку арсавыл эксэйлыкез выльысен улӟытон сярысь малпанмы но кысоз ук! Ведь та малпан котькуд ошкуйчи сюлмын Улуг Мухаммедлэн Кузонэ куинь сюрс ожчиосын вуэмез дырысен лушкем гыбдаса улэ. Соин ик тросэз Чингисханлэсь вирзэ нуллӥсь Муско эксэйлы та ласянь оскыса уло. Со Крым палась вуэм висёнэз Иоанн Кузонысь ишкалтӥз ке, соку оло Арсавыл но улӟоз шуыса… Но та малпан но табере Камитэз уг буйгаты. Йыртӥз солэн сомында валанъёс кошкизы. Камит песятаез кадь ик, татаез кадь ик, адӟе Иоаннлэн лул дуннеез тылсиясь шуыса. Сыӵе тылсиясь князьёсты «ваше сиятельство» шуо адӟись адямиос. Но Иоанн котырысь лулъёс, Улуг Мухаммед сьӧры лыктэмъёс кадь ик, туж тросэз «пеймытэсь» но «пурысесь», Камит ӟеч вала, соос «сьӧдъёсын» герӟаськемын. Жаляса верано, нош асьсэос соос созэ уг валало, «сьӧд» ужъёсты лэсьтыкузы но уг шӧдо асьсэлэсь мар каремзэс, «вуко» кадь, шӧдтэк шорысь, «вукочилэн» улӟытэмезъя,  ужаны кутско «сьӧд» ужъёсты. Пеймыт дуннеысь убиръёс музъемысь огшоры калыклы уг адӟисько, угось соос асьсэды возьматытэк ужало, соин ик пичиысен ик тыршо адями лулъёсты энераны, аспӧртэм «вукоослы» берыктыны, кулэ дыръяз соосты «сьӧд дуннелы» ужатыны. «Сьӧд дунне» лулъёслэн ӧвӧл нокыӵе сюлэмзы, асьсэос но соос «вукоос» кадь ужало, кузёоссылэсь косэм ужъёссэс быдэсъяса. Волхвъёс верамъя, шуныт палась троссэ несториан черкъёсты соос исламлы берыктӥзы. Озьы тӥяськем несториан черкъёс вылын кылдӥз ислам. Ашкеназъёслэн но осконзы кемалась соосын берыктэмын. Чылкыт югыт лулъёсты но соос асьсэ пала берыктыло. Быгатонъёссы соослэн пыдэстэм. Трос учыръёсты возьматӥзы Камитлы Бадӟым Дышетӥсьёсыз. Возьматӥзы, кызьы «сьӧдъёс» Римын ужало, кызьы папаос ведаез тодӥсьёсты тылын ӝуатыло. Камитлы трос пол возьматӥзы со убир выжыослэсь дуннеосты басьтэмзэс, соос кузьылиос кадь уло, уллёен-уллёен, ог-огенызы кусып возьыса, туж зол дунне вылэ паськытало. Озьы инсьӧрысь дуннеос вылэ азыса, кӧшкемыт висён кадь, сомында дуннеосты соос быдтӥзы ни.  Вылаз ик асьсэос но со дуннеосын ӵош бырылӥзы, нош малы ке йыразы валанзы ӧз лыкты, дуннеосты быдтыса, асьсэос но со дуннеен ӵош быро шуыса. Йыразы соослэн огез гинэ улэ, югыт лулъёсты быдтон, югыт дуннеосты таркан, калыкъёсты курадӟытон, озьы соос кужым басьто, эзыло, сиё, унояло… Камит паймыса учке, малы сокем шузи лулъёс сокем кескичесь югыт дуннемес кырмыны? Кытысь соослэн сыӵе быгатонъёссы? Камитэз дышетӥсь лулъёслэн, аслаз Ошторма батыр нимо песятаезлэн, Субэдэй батырлэн, Бату хан батырлэн валэктэмзыя, асьмелы шузиесь пото соослэн ассьсэ улэ пачкатэм «пурысь» ляльчиоссы, но кузёоссы соослэн, кудъёсыз асмелы уг адӟисько, асьсэлэсь ужзэс туж ӟеч тодо, туж зол соос дышетско асьме тодон валанъёсмы вылын, ялан туртто асьмелэн валанъёсмылэсь вылэгес ӝутскыны, вылӥ дуннеосы потыны. Соин та Митгард музъеммы вылын соос самой кескичъёсыз тушмонъёс луо. Но соос уг быгато асьсэ коже чылкыт адями лул сямен вылӥ дуннеосы пыӵаны, малы ке шуоно отчы югыт малпанъёсын, югыт ужъёсын гинэ потыны луэ. Югытэз вылын кыдам лултэк, уно мертэтъёс но инвисъёс пыртӥ ортчытэк, вылӥ дуннеосы нокызьы но ӝутскыны уг луы. Но соослэн туж потэ отчыозь но сузьтӥськемзы. Соин ик соос эшшо но вожомыса котькуд Чертогысь, котькуд шунды-кизили вӧзысь улэп дуннеосы пыӵаны туртто. Песятаезлэн верамысьтыз, Камит пичи дырысеныз ик тодэ, ӵапак со «сьӧд» лулъёсты Мидгард музъеммы вылысь мукет инсьӧр музъемъёсы лэзёнтэм понна, вашкала тодӥсьёсын куашкатэмын вал, яке туж пыдло «сьӧдъёслы» сузёнтэм ватэмын – инсьӧр дуннеосы нуись карубъёс, выжъёс, инӧсъёс, инсьӧр ыбесъёс. «Сьӧдъёс» ӟеч тодо, куд-огъёсыз сыӵе «вукоос» али ке но асьме музъем вылын вань шуыса, ӵапак соосты ик утчало «сьӧд» лулъёслэн ожчиоссы, мукет дуннеосы сюрон понна. Соос понна инсьӧръёсысь асьме чылкыт лулъёслэн кылдытэм визьмо карубъёссы, вайтманъёссы, вайткаръёссы, ӧсъёссы, ыбесъёссы ваньмыз со «вукоос». Со «вукоосы» сюрон понна соос пичи дырысен трос адями лулъёсты асьсэ вылэ ужато. Озьы соос асьме югыт дуннелэсь трос тодонъёссэ басьтӥзы ни, соин ик паймоно ӧвӧл, кытын вань тодон, отын одно ик «сьӧд» лулъёс ужало шуыса. Соос кемалась тодо кыктосъёссэс кылдытыны, вайтманъёс, вайткаръёс но пӧртэм «вукоос» лэсьтыны. Но дышетскыны соос быгато, кылсярысь та музъем вылын одӥг интыысь мукет интые шуак «озонаськыны», кызьы адямиос пушкы пырыны, кызьы адямиосты кортнаны, кызьы соосын кивалтыны. Соос малпало, адями мугорез ӟеч кортнало но серметало ни ке, быгатозы мукет вылӥ югыт дуннеосы но сюрыны. Но адями мугор но, «сьӧдъёс» соос пушкы пыро ке, туж ӝог кырсёме ук. Нош кырсёмем мугорез нокыӵе ыбесъёс асьсэ пушказы уг лэзё. Нокызьы сое «сьӧдъёс» валаны уг быгато. Зэмзэ ке верано, валаны быгато, но уг быгато соос югыт луыны, тӥни мар бордын ужпум. Соин дунне кылдон дырысеныз кыклы люкемын. Малы ке шуоно кык кужымъёс та дунне вылын кузёясько – «сьӧд» но «югыт». Котькуд адями яке «сьӧдъёс» пӧлы сюре, яке «югытъёс» пӧлы, яке соос вискын дуриське. Соин ик кулэм бераз адями сюре «Быдӟым Кенеше», яке, ӟуч кылын вераса, «Советэ», яке туала христианъёс сямен вераса «Судэ», кытын адями лул выльысен аслэсьтыз дунне вылын улэмзэ адӟе. Нош Кенешын «сьӧдъёс» но, «югытъёс» но пуко. Ӵош соос эскеро адями луллэсь кӧня «сьӧд» яке «югыт» кужым люкамзэ. Луллэн «сьӧд кужым люкамез» 50 люкетэсь но ортче ни ке, сое туж но туж улӥ дуннее келяло яке со югытаны уг быгаты ке ни, воӵаклы «ӵыжато», быдто. Угось «сьӧдъёслы» но кулэ ӧвӧл копаксэ «сьӧдэктэм» яке «эгырӟем» лул. Соос ярато «югыт» лулъёсты, кинъёс азинскыны быгато, «югыт кужым» люканы. Нош «сьӧд кужым» ласянь ке учконо котькуд адями одно ик «сьӧд кужымез» но люка. Макем ӧжыт со ас улоназ люказ «сьӧд кужым», сокем вылӥе со ӝутске сояз дуннеын. Святой яке кадыр адямиос «сизьымысен» кутскыса «кызетӥ» яке эшшо но вылӥ мертэтъёсы вуо. Ачиз Камит та дуннее «сизьыметӥ» мертэтысен вордскемын. Но Камит тодэ «нырысетӥ» яке эшшо но улӥысьёссэ мертэтъёсты но. Со «озонаськылӥз» со дуннеосы. Дышетӥсьёсыз солы возьматӥзы, мар луэ «югыт» лулэн но, куке со «сьӧд кужым» трос люка. Кылсярысь, солы возьматӥзы «нырысетӥ» мертэтын курадӟись лулэз, со улоназ «югыт» волхв вылэм. Но со «ӟеч уж» лэсьтыса быдтэм «нылпиен ветлӥсь кышномуртэз», кудӥзлэн нылпиез, та дуннее ке вордскиз, туж кышкыт ужъёсты лэсьтысал, туж трос кадыр адямиосты быдтысал, туж трос калыкъёсты курадӟытысал. «Но котькыӵе «ӟеч уж» но тонэ уз утьы улӥ мертэтлэсь… – валэктӥзы Камитлы дышетӥсьёсыз. – Адямиез быдтон яке курадӟытон – со сьӧлык, нокыӵе ӟеч малпан но сое уг чылкытаты».

Камит пичиысен ик сыӵе арбериосты тодэ. Трос югыт лулъёс сое ожмаськыны дышетӥзы, та дуннеын гинэ ӧвӧл, мукет дуннеосын но. Оглом, Камит ваньмызлы дась. Но дышетӥсьёсыз сое ассэ «сьӧдъёслы» возьматыны уг косо. Соос шуо: «сьӧдъёслэн» ожгарчиоссы тӧдьы лулъёс пӧлын но вань: одӥгъёсыз асьсэос ик соос пала ужало, нош мукетъёсыз кортнэтъёс но серметъёс улын. Троссэ соосты Камит, дышетӥсьёсызлэн дышетэмзы улсын, «сӧдъёс» улысь мозмытыса бурмытылӥз, табере соос югытъёс пала ужало. Нош «сьӧд» лулъёсты, ожгарчиоссэс гинэ быдтылыса, вормыны уг лу, соос ожгарчиоссэс уг жаляло. Соин соосты «каренызы» быдтоно, нош со понна туж пыдло соослэн «каразы» пыроно, шедьтоно ляб интыоссэс. Камит туннэ чаклась ожгарчи, солы нырысь ик, аслаз валамезъя, чаклано «сьӧдъёслэсь» Мускоен но Кузонэн герӟаськем вотэсъёссэ… Кемалась возьма ни вал со та ужзэ. Шумпотэ Камит, табере со арлыдыныз но ошкуй вылэ султыны вуиз шуыса… Шӧдтэк шорысь Камит ву вылысь мае ке шӧдӥз, татаез но шуак ву шоры учкиз, пиезлэсь шӧдэмзэ адӟыса…

3-тӥ люкет. Зэрпал

…Ӵапак со дыре вань кам вылэз зуркатыса туж зол гудыртӥз. Ву вылэ ӝутскизы кыӵе ке зыръёс-коръёс но гозыос. Шимес кужымен кыстӥськись бадӟым калтон, ву пытсысь кор зӧкта чорыгъёсты ӝутыса, шуак люкаськиз ошкуй доры но, син куспын сое ву вылэ лобӟытыса, ярдуре кыскиз. Ошкуйчиос валаса ик ӧз вуттэ, кызьы ошкуйзэз бадӟымесь улвайёс вискытӥ гозыос ӝутӥзы но ярдур нюлэс шоры, кык ӝужытэсь пужымъёс вискы, пачкатӥзы. Таӵе таза писпуосты ошкуйчиослэн ноку адӟемзы ӧй вал, ваньзы ӵош кутскыса но соос та писпуосты ӟыгыртыны ӧй быгатысалзы. «Мар та? Кытчы ми сюримы?» – мар малпаны но уг валало омыре ӝутскем ошкуйчиос.

– Арсавыл эксэйлык сярысь малпанэлы кыӵе ке пус-а, мар-а – мар малпаны ик уг вала Камит, сюлэмыз шӧрлаз. Татаез но кӧсэктӥз. Но соослы йырзэс кема тӥяно ӧз луы, тани адӟиськиз нюлэслэсь но ӝужыт мугор. Писпуосты ик музъемен ӵош тэтчатыса лыктэ со. Ошкуйчиос ожтӥрлыкъёссэс кырмизы, соос котьку сямен дась вал котькыӵе тушмонэз кесяны. Камит но дасяськиз пуртъёссэ ыстыны. Но соку ик солы та выросэз понна туж возьыт луиз. Угось татаез, Ӟумъя батыр, котькызьы кышказ ке но, сабырлыксэ ӧз ышты, соку ик кизэ ӝутыса, ваньзэсты дугдытӥз.

– Нокин  уг выр, чалмыт кариське… – шыпыртӥз со.

Ошкуйчиос чалмытскизы. Пельёссы, синъёссы ваньзэ сак эскеро…

– Ӟумъя! – кылӥськиз вань нюлэсэз зуркатӥсь куара. – Тэтчы но сапегаськы мынам ки купырам, ошпидэ но сьӧрад калты!

Соослэн ошкуйзы доры писпуос вискытӥ лэзиськиз ошкуйзылэсь но бадӟым кикур… Йыр уг тэры тае адӟыны, оскыны, валаны… Нош бадӟым писпу вайёс вискытӥ учкись син, вуюись кадь, тулкымъяське… «Эн кышка, Камит…» – шуэ кадь вераны луонтэм быдӟым но со дыре ик пальпотӥсь ымныр.

– Мар карод, куро бере, кылзытэк уз лу… – ӧжытак куалектыса  пальыштэ  ватаман аслаз ошкуйчиосызлы, собере соос Камитэн ӵош, ошкуйзэс кырмись калтон вылтӥ кечырскыса, бадӟым ки вылэ тэтчо, соосты бадӟым ки шуак ӝутэ нюлэс вылэ…

– Ӟа, табере, дивора, Ӟумъя батыре, кин тусо мон?.. – кык туноосты пограм кыз вылэ султытыса, соос доры туж матэ мыкырске шайтан моклок…

– Мон валамъя, тон зэрпал тусо… – ӧжытак шӧрласа учке со шоры Ӟумъя батыр.

– Ыктымак тазьы! – вӧё мильым кадь пальпотэ зэрпал. – Нош  кушем нимме ӟубистод-а? – мыня со, азвесь кульчоен ворекъясь пельзэ со доры матэктыса.

– Алангасар, оло… – атаезлы юрттыса вера Камит.

– Ыктымак ӟубистӥд, Камит тунобыже… – пальпотэ зэрпал. – Дяраллям. Табере туналтэ, катысь мон тӥ дорняла  вуӟырамын?..

Ӟумъя пальышаса пиез шоры учке. Кыкназылэн ик туноослэн  кышканзы малы ке тӧлӟиз, кыкназы ик шумпото.

– Тон, мон кылэмъя, хазаръёс но аланъёс вискысь вузаськон сюресэз чаклась вал… – вазе Камит. – Соин, шӧдске, грекъёслэсь но каруб ӝутъянъёссэс  тодӥськод…

– Кисьтэм-басьтэм тамашаськод, пеллё-кече! – пальпотэ зэрпал. –  Ыктымак соняпалась мон нярак тодонъёсты дьырам гудӟатӥ, шактой котыръяй сопаладурес ву озын кожъёсты… Табере мон ас дорнялам, куанэ мынам лул сюлэм гыдыке, вордӥськон палдуръёсме сактылыса…

– Ми но шумпотӥськом! – куанэ Камит.

– Марлы ми, пичи сизьёс, зэрпал агайлы кулэ луимы ай, мар пумысен тон милемды четлыкад кырмид? – дыртытэк гинэ юа Ӟумъя ватаман.

Зэрпал ческыт ӝук дасясь кадь мыня. Ымдуръёсыз куаныса пеперскыло…

– Кылкутон асьме шӧртчи кусыпамы мимала дырысен тугемын-черсэмын… – кескич пальыштэ со. – Но тӥляд сэстонъёсты валляна визь шумес пыдэсысь тысьёссэ уг куадало ни. Ма, вувакыт но табере вукутэсъёссэ воштӥз. Мон тӥ муртъёслы выль кылкутон тугем-черсэм чӧлтӥсько индэ… Тапал но тупал калыкъёс нимысь табере тӥ гынэ, ыктымат туно выжыос, монэным кушласькоды, соиняла ик нырысё-валысё куронэ таӵе вазердуро луоз, тӥ моныкаелы сётоды палдур пельугыелы ганяк тырмымон азвесь, мон уго одӥг пельугыме кинлыке-солыке сётоно луиськи, та каръян ярдуре тӥ пала вуӟектыса вуон понна. Пель угытэк куара ӟардон ӟубисаськымон уг кылӥськы… Вал-а, скал-а мон верам кылме?..

– Курондэ одно быдэстом. – йыбырттэ ватаман… – Шедьтом  азвесь… Ошкуямы кык пуйы азвесьмы вань, тырмоз-а?..

– Тырмоз. Отын ӵаптэрег сомында, мармында мыным кулэ. Нош тон тунобыж-вайыж, соглаш-а куронэным? – Камит шоры учке зэрпал.

– Мон но соглаш… – йыбырттэ Камит.

– Кыкетӥез ужпум югдурча ыж-така вандон-курбонъёсты сярысь…

– Валамон… – йыбырттэ ватаман. – Вандом, ӝук пӧзьтом…

– Мар валдырмон-скалдырмон? Мар вандос вандом? Мон малпанме бурласа ярдуртыны ӧй вутты, нош тон ас малпандэ мычектӥськод ни. Мон сурымча грек зэрпалъёс сямен ыж но, кунян но, вал но уг сиыськы. Соинча ик мон шузь-мазь ӧвӧл. Мон арча-арсавыл зэрпал. Мыным ачиз  Быдӟым Инбамал ӵукна  лысвуэн ӵош пизь-нянь сётэ… Нош тӥ монэ шузиняла кариськоды, Алангасар, пе, горд сюесь пыдзэ тыл вӧзын куасьтыса пуке-ӝуштэ. Писпу подьясь адями культокез сизь шуыса, пе, анаезлы ваиз.  Анай ачиз мыным со писпу кокчась урдоез вайыны куриз, шуиз тани со ватка адями моклок, уть сое та дуннелэн сюсь карныказ. Озьы, пе, косӥз Ингурезь-Инмар. Ӵапак соинча дырысен мынам зэрпал улонэ-вылонэ тӥ муртняослы сӥземын… Нош тӥ сизь шуыса сизьдӥськоды… Сизез, пе, вайиз-маиз…

– Вождэ эн вай, зэрпал… Тросэз вунӥз ни, со мында ву кошкиз… – мыкырске со азе Ӟумъя батыр, Камит но озьы ик мыкырске.

– Мон уг возиськы бордам вожо чутыръёсме. Палэсмурт но, Нюлэсчуча но, Вумуртняла но, Тылмуртнялчи но, ваньзы нюняос тӥледлы ӟеч лэсьтыны чырешозы, марысь мар ке, вазиське. Нош Кузон, вашкала Озон карды, чапчара быроз-мароз, отын гурезьёс ӝутскозы казакпи йыркобы чачаослэсь, Арча но, кудзэ тросэз асьсэлэн каро, быттынай быроз-мароз. Кам дорозь вуозы тушмонъёстылэн ожчи-гарчиоссы, нярак нокинэ уз жалялэ. Ваелэ калыкдэс татчы, камъёс сьӧры поттэ. Валатырмон-а?

– Валамон… – мур лулӟе Ӟумъя.

– Мон ӧй вала… – итӥське вераськонэ Камит.

– Мазэ тон ӧд валтырты? – пайме зэрпал.

– Малы тӥ, зэрпал, вань мукет кузёосын валче, Кузонэз но Арчаез быдтыны сётӥськоды?..

– Ӧткын тынадэз юанча кидысэд. Нош тон кутсаськод-а, кин туннэ Кузон эксэйча? – юа зэрпал.

– Ядыгер хан… – вера Камит.

– Кин-о сӥньсо? Ватка?.. Калмез?.. Тодэ-а со ар выжыосмылэсь ведаоссэс?.. – юа зэрпал.

– Со Крым палась бигер…

– Ӵапакен соняпалась, кытысь-валысь мон лыктӥ-вуӟектӥ… Мынымзэ тодмо, марымча со марыманы турттэ… Угось солэн вирсэраз эксэй вирыз но ӧвӧл… Мон солы но, озьы ик Кузонэз асэстэм Крымъёслы но ноку уг дюртты… Кузон, Вашкала Озон, со крым бигеръёс кивалтыку, ноку но данлыко базар зыно табере уз лу инь… Соин ик со бырыны кулэ… Ваньзы мед адӟозы, кыӵе кыйёс сэрен со быриз…

– Нош Арчалы?.. – пайме Камит.

– Кыӵе Арчалы? Кузон улысь Арчалы номыр уз лу. Нош таиз Арча шуонды тӥляд Арчады шат со инизэ?.. Нош вань-а дуар-а сӥньсо Арча кар шуонлэн эксэйчаез? – юа зэрпал.

– Арчалэн эксэез?.. – шуак луыса, малпаське Камит…

– Арчалэн эксэез ӧвӧл, – валэктэ Ӟумья.

– Соин ик тӥляд та Арчады но Кузонча эксэйлюк улын сылэ. Нош Кузонча эксэйлюкды – я Муско эксэйлюк улын, я османъёслэн Сулейманзы улын. Огломча огпалаз суро-пожо христианъёс, мукет палаз христианъёс пӧлысь ик потэм мусульманъёс. Ӧвӧлы отынча асьме инмар катъёсмы… Берпуметӥ тӧдьы эксэймы асьмелэн – Кылдысин вал… Кереметэз эксэйчот каремды бере со кошкиз Сопалаз Вылӥ Дуннее. Табере Кылдысин сопал дуннеысь эксэй, соин ик сопал дуннеын ваньмыз умой но айбат. Нош Керемет тӥледыз азвесен но зарниен ӧрекчаз, калыкъёсты дурынчиосты кадь узатӥз. Монэ но грекъёс пала чуртназ… Табере котькытын ожчиос, вузчиос, ошкуйчиос. Милемды но со тарказ. Кытын со бадӟымала но югытала эксэйча табере? Кереметлэсьсэ ми эксэйча ум шуиське, со эксэйчот гинэ. Угось ачиз Зарни Мум но солэсь пегӟыса улэ…

Паймыса кылзэ Камит зэрпаллэсь татаезлы верам бадӟым кылъёссэ. Татаез, шӧдске, ваньзэ вала, мар сярысь ас кылыныз вера зэрпал. Малы Быдӟым Кылдысин эксэйлыксэ агаезлы кельтӥз, малы кошкиз?.. Яке со воксё ӧз кельты, Керемет сое кужмысь басьтӥз? Юалоз, одно ик юалоз татаезлэсь Камит со кемалась луэм ужпумъёс сярысь. Нош али, Камит валаз, зэрпал вералоз мар понна соос азе потэмзэ…

– Уг басылы нокузэ нэпсӥё Керемет, агайзэ ке но сопалдур дуннее чукындыриз, – азьланьтэ веранзэ зэрпал. – Табере азланыса ик со шӧятыны чутыре Зарни Мумез. Уго тросэз кадырлало Кылдысинлэсь сузэрзэ. Солы вӧсь кушъёс лушкем кушлало. Соинъя ик Кереметлэн окты-калтыосыз ялан копасько, утчасько Быдӟым Арсавыл музъеммы вылын… – мултэс пель медаз кылы шуыса шыпыртэ зэрпал, нош куараез озьы ке но вань нюлэсэз сэзъяса кошке. – Соиняла ик, Ӟумъя батыре, Камит тунобыже, мынам тӥняла тунокайёслы алангасар штыр кузьда ик веран кылэ вань. Зарни Мумлэсь зарни йырчача мугор тукайзэ, аватаразэ, кытчы со Инбам бамалыстыз дырын-дырын вууллань васькылэ но мукет интыосысь мугорчотъёсаз но пыӵаса, одӥг дыре олокӧня интыосы калыкъёс азе потылэ, отын ик пыдлон му улын возёно, кытчы нокинлэн вуӟырамез уг луы… Мон шуисько, Кузон карды улысь Арча карын, кудзэ таберезэ ву нюртон дырысен нокинча но уг тод, отын ик кытын Зарни Мумлэн аслаз аватара нергез, сылэ… Ӵаптэрак сое дивортыны-дебораны юриняла татчы вуӟырай. Эн курдалэ, та ӟабылтонэз нокин уз карныкты, та интыез мон ачим кылдытӥ-маралтӥ, вожодыр нунал-пиналлы луыса. Тӥ но мон кошкалтэм бере иньда, та инты-манты ӵушиськоз вань куараосмес но ас сьӧраз нуыса. Мар даур мон тае ӟубистӥсько? Олокинэз тодэ, мар моныкаен азьланьпалаз луоз-маралоз, тапала тӥняпала вуӟыраме понна, но тӥ та диворез тодыны кулэ… Соиняла ик тӥ та диворез-деборез нокудлане нокинлане эн ӟубистэ. Дырыз вуиз ке, сӧлмугоро ке луи, ми Камитэн ӵош сое кыдёкысь Сибырай Из сьӧрысь выжыосмы доры нуомы… Нош сӧлмугоро ӧй ке луы, мон соняпала дуннеысен диворто Камитлы, мар карыны. Нош та вакытэ нылмуртча шедьтоды… Ой, чутырдыроз со визьдэс-куазьдэс… – шыпыртэ Зэрпал, лушкем гинэ Камит шоры учкыса. – Оло, ваньмыз со мынам гинэ кышкан-мышканэ, ачиз Зарни Мум номыр уг куареты… Мон но дырызлэсь вазь уг ӟубисты… – малы ке пумозяз ӧз усьты зэрпал ас веранзэ, шуак мукетыз сярысь ялӥз. – Мон одӥг уж радлыкелы йылпумча лэсьтӥ. Но вань мукетыз – Кузонэз таркасьёслэсь калыкдэс утён – со туж пичи ужпумрад. Вань бадӟымез уж, та ожмаськонды бере нош ву нюртон луоз… «Сьӧдъёсты» со озьы кӧня ке туж чебер гылтоз… Музъем анай уг яраты, куке сое вӧсь каро, уг чида сьӧлыко ужъёсты, соин ик бадӟым вуэн ассэ чылкытатоз. Вот татын ыктымак но ужано луоз. Бадӟым пыж-карубъёсты лэсьтом-пӧралом. Куд-ог калыкдэс, сооссэ гинэ, кинэ утьыны луэ, отчы туйналом, нош куд-огъёссэ музъем улысь Арча каръёсады. Мон яке эшшо кин ке тӥледлы со ватоскаръёсты возьматоз, дырыз гудыртӥз ке… Чамалалэ, ваньзэсты утьыны кулэ ӧвӧл, тӥ асьтэос адӟоды соос пӧлысь «сьӧд» пала кырыжамъёссэс, чылкытъёссэс гинэ сайлалоды, соку тэроды со каръёсы но пыжъёсы. Чылкытъёсыз пӧлын но ай «вуко» юнматэмъёсыз шедёзы. Кызьы уз яралэ, тӥляд кам вылын лэстӥськись карубъёсты, ӧзьы ик уз яралэ со кырыжамъёс но, шелеплы но гынӟем сапегъёслы пӧрмытоз соосты бадӟым тулкым. Мон утчасько инты, кытын, «сьӧдъёслэсь» ватӥськыса, чидась карубъёсты тӥледын ӵош югыт лулъёстылы дасяломы. Инты шедьтӥ ке диворто-ӟубисто. Нош тыныд, Камит тунобыже, тон нырысь ик солы дасямын-марамын, кулэ луоз кытчыке-отчыке лушкемак ветлыны. Кызьы но ку отчы вуӟыраны тыныд дырыз дыръя дивортозы. Тон шедьтыны кулэ луод ваткаослэсь куке-сокуняла лушкам книга люкетъёссэ но татчы Арсавылэ Никон дӥне соосты вайыны… Соос вить интыын кыллё… Ватка кылэз тодӥсьтэмъёс уг валало сое, туж тодыны ке но туртто. Соин ик «сьӧдъёс» но кулэ уг каро, но соос пеймыт дуннеослы сюрыны кулэ ӧвӧл… Угось соос соку Быдӟым Гырлы доры вуозы… Нош соос чик тодыны кулэ ӧвӧл Быдӟым Гырлы сярысь… Огазеяны но со книга люкетъёсты уг яра, нимаз-нимаз соосты вуттоно… Вань-а тӥляд куронды, юанды?..

– Кыӵе сыӵе Быдӟым Гырлы сярысь тон вераськод?… – шуак юа Камит.

– Уг яра со сярысь али ӟубистыны, дырыз дыръя тодод но адӟод но… – озьы ик ӝог валэктэ зэрпал. – Иське, ӧвӧлы бере юанды, рейкат люкиськиськом! – шӧдтэк шорысь дыртыса йылпумъя со, туноослы вераны-юаны дыр ик сётытэк, шуак соосты кык чиньы висказ кутэ но ошкуй пушказы тэтчытэ…

– Сэрпалтэ кырым пыдэсам азвесь курбондэс… – пальыштӥз со вань ошкуйчиослы.

Ӟумъя куаныса ик азвесен тырем пуйыоссэ зэрпаллэн кырым пыдэсаз куштӥз. Соку ик гозыос лябӟизы но золскизы. Ошкуй пукыӵ ньӧл кадь ыбиськиз кам вылэ. Туж зол пазьгиськизы тулкымъёс – тани нош ик соос ыбем кадь тубо, кам тулкымъёсты гырыса. Ошкуйчиос тунооссылэсь номыр уг юаллясько, мылкыдзы соослэн валантэм, угось таӵе батырлыко учыръёс Быдӟым Арсавылын гумырлы огпол луо. Ошкуйчиос тодо, кам вылын ваньмыз вань, одӥг мертэтъёсын гинэ уг улы кам, тужгес но туннэ, вожо нуналэ, татын трос дуннеос пумисько… Ваньзы соос валало мар ке быдӟымзэ, Быдӟым Инмарлэсьсэ, Быдӟым Ошлэсьсэ соин ик ымныръёссы ваньзылэн югытэсь луэмын… Гажаса учко Камит шоры… Ӟумъя шоры… Зэрпалъёслэсь но кык пол, куинь пол бадӟым Алангасарлэн выльысь кам пала вуонэз – со туж югыт дивор. Озьыен, юрттэт луоз ваткаослы отысен но, кытысен ноку соос ӧз возьмалэ

Камит но куанэмын. Со вуюись кадь тылсия, озьы ик кызьы тылсияло вал зэрпаллэн синъёсыз. Татаез но пальпотыса учке пиез шоры, солэн но куанэмын вань пушкыз. Угось таӵе вань йырез бабалтӥсь-кымалтӥсь учыръёс Ваткатэк но солэн Быдӟым зарезь кузёезтэк уг лэсьтӥсько… Ву вылтӥ ветлӥсьёс ӟеч тодо – Ватка котькудзэ выль ошкуйчи тунозэ аспӧртэм учыре бурмытыса пусъе. Кин выль туно азе та вакытэ потоз, со вералоз солэсь азьпал улонзэ, кужмо-а со туно луоз, огшорыгес-а… «Но али учыр воксё валантэм маке…» – пайме Камит. Одӥг ошкуйчи тунолэн но та дырозь таӵе учырез адӟемез ӧй вал на, сыӵеез луысал ке, Камит тодысал.

4-тӥ люкет. Кулэм ки тяпа но бурлакъёс

Сак учке Камит вайяськись вуос вылэ. Соос вискын али ке но пальыша зэрпаллэн ымнырыз. Камитлэн туж троссэ юамез потэ вал зэрпаллэсь тужгес но «кулэм ки тяпа» сярысь, «кулэм ки гижыос» вылын ӝуась сюсьтылъёс сярысь… «Тон тодӥськод, тунобыже-ваёбыже…» – мыня солы зэрпал но шуак ыше. Шӧдске, уг яра вал солы кема вераськыны, усьтыны но, оло, уг яра вал. Сотэк но ук соосты, Кылдысинлэсь юрттӥсьёссэ, вань дуннее тарказы, яке воксё быдтӥзы, али но, шӧдске, котыр ласянь чакласа уло…

«Бен, Сьӧд Кереметлэн октос-калтосъёсыз татчы вуэмын, тӥни кинъёс Мултан пересьёслэсь кыдъёссэс бералтӥзы…» – шуак тодаз лыктэ Камитлы толон гинэ Мултанэ ветлэмез. Угось ошкуен кошкон азязы татаез сое борӟемен Мултанэ нуллӥз. Учкы, шуиз, ваньзэ туж сак, анланы тыршы мар соосын луэмын. Вал вылын кема дыр ӵоже ветлымтэ ошкуйчиос жадизы, шутэтскыны выдӥзы. Нош Камитлы нокыӵе ӧй вал, со дышемын борӟемен ветлыны, соин ик со татаеныз ӵош кошкиз коркаос кузя. Камитэз паймытӥз пересьёслэн йырвизьмазы ӝабыръяськись «кулэм ки тяпа», сьӧдэктыса куасьмем «ки тяпа», кудӥз кулэм кузёез бордысь ӵогемын. Выллань чатырскыса со улэ вал. Вить чиньы гижыосаз сюсьтылъёс ӝуало… «Мар со сыӵе?» – куалектӥз Камит. Татаез юаз вал, мар адӟемзэ, нош Камит ӧз вера. Серекъялоз, малпаз, кыӵе ке «кулэм ки тяпа» сярысь вераны ке кутскиз. Камитлы Вуж Мултан пересьёсты адӟыны малы ке укыр капчи сётскиз. Соин ик нырысь-валысь со аслаз адӟонэзлы ачиз но ӧз оскы. Нош али, вуэз вандыса ширтӥсь ошкуй азьын, солы шӧдтэк шорысь валан лыктӥз. Шонер, Камит пичи дырысеныз ик юн кусып возе ву дуннеен. Мултан пересьёс но вуэн герӟаськемын, ву кылэз тодо, улэп ошмесэн верасько, соин, шӧдске, Камитлы ваньмыз капчи усьтӥськиз. Бон, тани кузёез со «кулэм ки тяпалэн»… – шуак ву тулкым вискысь адӟиз сое Камит. Ашыкен но мукет коньдон утонъёсын шудыса, азгыномем адями вылэм.  Ошиськыса кулэм. Пунэмез трос люкаськем. Нош со адями, кинлэсь со трос пунэмам, ошиськемез бӧрсьы солэсь кизэ ӵогем, озьы гинэ мынэсьтым уд пегӟы, кулэм берад но мыным ужалод, шуэм… Тӥни со ымнырзэ «кулэм ки тяпа» сьӧры ватэ, кышкыт адями, кулэмъёсты но со ужатыны уг шӧрла… Камитлэн вань ньылоныз куасьмиз – сокем кышкыт шӧй зын но шайгу кезьыт со адями бордысь дыгиськиз… Марзэ меда ваткаос пӧлысь утчаны лыктӥз та шайгу урбо? Со тодэ ни, Муско эксэй Кузонэз басьтоз шуыса, нош Кузон сьӧры муско ожчиосыд, кызьы вераз зэрпал, Арча котыре, камъёс котыре узырлыкмес вораны вуозы. «Бӧрысь тапалась Быдӟым Арсавылысь нокыӵе тодӥсьёсты уд шедьты ни…» – малпа со шайгу урбо. Соин ик али утча, Кузонэз басьтыны дасяськон азьын… Нош Мултанэ вуыса, «ву тодонэз» утчаллям, шӧдске… Тросэз уга кылэмын вераськись ошмесъёсмы сярысь. Пересь туноос, кинъёсты соос бугыръяллям, пудоен-бурдоен ужан сяна, ву кылэз сокем мур уг тодо вал. Удалтымтэ урболы. Угось ачиз Акмар, Мултан вӧзысь «улэп вуэн» вераськись туноосын ӵош ӵапак Кузонэ кошкем, туно ужъёсты радъяны. Удмурт туноос тросэз табере уйёссэс но уг изё, ваньзы ужало Кузонысь югыт калыкез «кыйёслэсь» утён понна. Соин ик шурдыт жугиськон пуромемын Кузон но Муско палдуръёсысь тодӥсьёс вискын. Тодӥсьёслэн ужъёссы адӟиськытэк уг уло. Кӧня Муско пыжъёс выйытэмын Кузонэ вуттӥсь сюресъёссы вылын. Кӧня висён погыртӥз ни лыктӥсь ожчиосты. Кузон вӧзы шуак лэсьтэм Свияжск карзы но  юнме шорысь кык пол гомӟылӥз… Нош Мускоослэн но тодӥсьёссы кужмоесь, быгатӥзы тылпуэз буйгатыны. Кӧня зор кот Мускоослэсь сюресъёссэз кизертӥз, но соослэн тодӥсьёссы выльысь шундыез потто. Нош ик азьлань вырӟо Муско ожчиос. Туж каллен ке но лыкто, ялан матэкто. Кузонъёс но туж зол дасясько шуккет сётыны. Кузонъёслы но трос люкето Муско палдурысь тодӥсьёс. Нюлэсъёс но ӝуало, нюръёс но куасьмо. Кузон эксэйёс кӧняез ини вакчи дыр куспын огзы бӧрсьы огзы сопал дуннее кошкизы. Кузон пала дурбасьтӥсь калыкъёс но тросэз юнме шорысь Мускоос пала ужаны кошко. Кык паласен ик туноос утчало кужмо юрттӥсьёсты. Кин ке утча Бату ханлэсь палашсэ, кин ке Арчалэсь дукессэ, кин ке Шуралилэсь пиньзэ, мае но уг утчало… Камит ачиз но пайме, кытысь сыӵе арбериос сярысь мадьёсты калык шедьтэ шуыса. Но огез сое уг паймыты, ваньзы шузимыса ик утчало Бату ханлэсь кык Зарни Валъёссэ. Угось ваньзы тодо: кин киын луоз Зарни Вал, со ик вормоз. Малы ке шуоно со кык Зарни Валъёс – шундылэн валъёсыз, кудъёсыз шундылэсь эксэй уробозэ нулло. Бату хан соосты, туж кужмо туноосын вӧсяса, Сарай азяз пуктӥз, асьме палась нылкышно сынъёсысь, яке липет вылысь кык валъёсты адӟем карыса. Но Зарни Валэз кужмо туноос лушказы, шӧдске, туж кужмо кылъёсын ватӥзы, шедьтыны сое нокыӵе оскон ӧвӧл… Дырыз дыръя гинэ со усьтӥськоз, Бату ханлэсь выжыоссэ утён понна. Нош кинъёс со Бату ханлэн выжыосыз? Вот угось, ваньзы тапаласьёс «асьмеос» шуо. Нош кыкетӥзэ Зарни Валэз ачиз Мамай кытчы ке тяпалтӥз, вераськонъёс ветло со «Мамайлэн курганаз» Мамаен ӵош ватэмын шуыса… Но соиз Вал сярысь нокин табере уг вераськы ни. Утчало асьме пала ватэмзэ Валэз… Бату хан Камитлы вераз, кытын со ватэмын, кызьы сое шедьтыны луэ, но Камит та ласянь нокинлы ымзэ уз усьты, дырыз вуытэк…

Но котьма ке но, зэрпал шуиз, уз лу ни Кузонмес но, Арчамес но утьыны… Табере калыкмес кызьы ке утёно. Таиз одӥгез, нош кыкетӥез кыӵе сыӵе бадӟым вунюртэт сярысь вераське зэрпал?..

Камит татаез шоры учкиз. Татаез пиезлэсь юанзэ кылӥз ке но, синмыныз возьматӥз кам азьпала… Отчы, пе, учкы, дырызлэсь вазь оломар сярысь эн малпаськы. Созэ вань, кинлы туннэ малпаны…

Шӧдтэк шорысь кин ке Камитлэсь вань пушсэ ик кыскиз – гогыез ик ньылон дораз вуиз… Камит пыд йылыстыз  погра  вал… «Мар вал со?» – туж сак эскере Камит ярдуръёсты. Но со кужым ворсаськиз… Камитлэн татаез но кыскись кужымез шӧдӥз… Кыкназы ик соос сӥсъяса учко ярдуръёсты. Ышиз! – вожомо  туноос, ог-огзы шоры учкыса.

Азьпалан адскизы сылал пуйыосын Ватка кам кузя васькись кык бадӟым карубъёс – туж бадӟымесь пыжъёс, кудъёсыз ӵем гинэ выллань но уллань ветло камъёс кузя. Соос зэрпалъёс кадь адӟисько  ошкуйчиослэн ошкуйзы вӧзын. Карубъёсты буръясь бурлакъёс дэремтэк гинэ пыж бордъёс вӧзтӥ ветло, ваньзы быръем кадь тазаесь, вӧлэм кадь силё-вироесь, быгытъёссы кыӵе чебер люкаськыло. «Татысь-а, мар-а со кужым кыскиз?» – малпаське Камит. Буръясьёслэн но вань асьсэ ватаманзы, татазы, со одно ик бадӟым туно луэ, туноос гинэ тата луо кам вылын. Нокудӥз бадӟым кам уг чида адӟисьтэм, тодӥсьтэм калыкез. Соин ик ошкуйчиос но, буръясьёс но, воръёс но асьсэлы туноос пӧлысь гинэ тата быръё. Нош туноосты аслыз быръе ачиз Ватка, яке Идель-Булга, яке Быдӟым Кам – котькуд туно ортче кыӵе ке учыр борды бурмытыса пусъёнэз. Малы меда Ватка сое зэрпалэн бурмытӥз?.. Камит одно ик сое валалоз, малы ке шуоно эшшо пумиськонъёс луозы на. Татаез но куке-соку Тылмуртэн герӟаськиз… Табере Тылмурт солы юрттэ. Тӥни со али учке каруб пыжъёс шоры, Тылмуртлэн тодонэныз соосты сисъяса.

Та ву уллане буръясьёслэн шат ватаман-татазы сокем кужмо?.. Адӟысал ке сое Камит, валасал. Но Камитлэн татаез ачиз но валалоз. Ӟумъя батыр одно ик соос доры тубоз, буръясь татаен пумиськоз. Учкоз ошкуйчиослэсь ортчон пуссэс, ӧвӧл ке сыӵе пуссы, выт тырытоз но пус сётоз. Туж ӟеч тодэ аслэсьтыз татазэ Камит. Тани со ошкуйез каруб пала берыктэ ни. Выт тырытон но эскерон ужъёс – со камлэн куронъёсыз, вань вузчиос сое тодо.

Нош буръясь бурлакъёс копак мукет учыр, соос котьку асьсэ коже уло. Коранын вань «Бурак» нимо адями йыро «Вал Каруб», кудӥз пророкез туж вакчи дыр куспын инмар каре вуттэ. Камит малпамъя, соос озьы «вайтманлэсь» буръясьсэ нимало. Малы ке шуоно «буръясь» аслаз йырыныз но мугорыныз со лобась карубен кивалтэ. Соин ик «Буракез» арабъёс кадь мыдлань ке лыдӟоно со луэ «Каруб». Ма бурлакъёсты но «буракъёс» шуыны луэ. Соос но уга асьсэ йырынызы карубен кивалто. Туж секыт соос доры шедьыны, отын троссэ быгатоно, соин ик трос коньдон соос басьто. Одӥг гужем ужам уждунзы семьязэс куинь ар сюдыны тырме. Нылъёс но соосты сокем ярато, сьӧразы бӧрдыса бызьыло. Соизлы чик паймонэз ӧвӧл, нылъёс дышемын узыр пиос сьӧры бызьылыны, укыр соослэн сямзы кескич, юнме шат соосты карт шедьтӥз уг шуо, бызиз шуо. Зэмзэ ке, ужпум коньдон бордын гинэ ӧвӧл. Бурлакъёс котьма ласянь кибашлыос, мар но соос пӧрмытыны, лэсьтыны уг быгато. Тани Идель-Булга каме потэмзы бере, соос син куспын ӝутозы пӧртэм «туриосты», кыӵеоссэ куйыысь ву поттыны дасяло. Асьсэос бурлакъёс сыӵе «туриоссэс» малы ке «юсьёс» шуо, ӟучъёслэн «лебёдказы» мактал. Ӵапак со, туж капчи бергаса, гозыосты бинись «юсьёсын» соос бадӟым карубзэс вулы пумит кыскозы. Карубзы азьын мынозы куинь пыжъёс, вожен-вожен янкоръёссэс вуэ зыргытъяса, нош янкор гозыоссэс куинь «юсьёс» кыскалозы. Буръясьёс питыранъёссэс гинэ бергатозы, каруб ачиз вулы пумит гылӟоз. Нош ву пыдсысь жильы доры вуизы ке, зэрпалъёслэсь кужымзэс кыткозы. Угось котькуд паськыт кам пыдэстӥ корт жильы кыскемын. Со зэрпалъёслэн лэсьтэмзы, куке жильы борды карубъёс питыранъёсынызы кырмисько, каруб туж зол тубыны кутске кошкись вулы пумит. Зэрпалъёсын но бурлакъёсын лэсьтэм карубъёс гинэ со жильы борды кырмиськыны быгато. Бурлакъёс вань асьсэ ӧнерзылы кузон но перма зэрпалъёслэсь дышетско. Озьы ик соос тӧлпоосын но туж усто ужало. Ма сылал поттон интыосты но нырысь бурлакъёс шедьто, соос музъемез порто, куинь ӝужыт писпу кузьда портыны быгато, собере куинь ӝужыт писпулэсь гумы отчы лэзё, сылал вуэз кыскон лэсьто. Сылал пӧсьтонзэ но сыӵе мудрон лэсьто. Соос ваньзэ быгато, Камит котьку пальпотэ, бурлакъёс сярысь ке вераськон ӝутске. Кинъёс ке малпало, бурлакъёс карубъёсты ярдуртӥ кыскаса ветло, чик но со озьы ӧвӧл. Ма вань, шуо, Идель-Булга котырысь ӟучъёс пӧлын сыӵегес шузиосыз, векчи вузчиослэсь пыжъёссэс ярдуртӥ сюлзы потымон кыскасьёсыз. Пичигес шуръёсын но, пе, соос озьыгес ветло. Валамон ини коньдон но соос трос уг басьто. Нош удмурт камъёсысь буръясьёс туж но туж амалоесь, гозыосын соос туж шер кыскало – карубзы кыӵе ке ляме дыгиськыку, яке ярдуре султыны кулэ ке. Та сяна соос сокем ӧткын ужало ожтӥрлыкъёсын, соослэсь ӟечгес ожгарчиосты камъёс котырысь уд шедьты. Соос ошкуйчиос кадь ик умой тодо ожтӥрлык сямез, ожмаськон амалэз, ву сюресъёсты, ярдуръёсты. Маин мукетэсь ошкуйчиос бурлакъёслэсь? Бурлакъёс тодо тросгес. Ошкуйчи карубен ужаны уз быгаты. Карублы мукет тодонъёс кулэ на. Соин ик кам вылын ошкуйчиос туж гажало бурлакъёсты, ма бурлакъёс но ярато ошкуйчиосты, трос дыръя уга соос ӵош ветло, тужгес но воръёсын пачылмем интыосын. Воръёс но камъёс вылын вань. Кызьы соостэк вуз нуллон сюресъёсын? Воръёс тужгес но ярато таланы пичи камъёстӥ ветлӥсь вузчиосты. Ӵапак со интыосын, кытын пыжъёсты сюлъёссэс поттымон кыскаса ветло асьсэды бурлак карисьёс но векчи вузчиос. Но котьма ке но, воръёс сярысь ке верано, таосыз но, одӥг гозыосын герӟаськемын ошкуйчиосын но бурлакъёсын.  Ошкуйчиосын бурлакъёс верамъя гинэ соос талало валасьтэм вузчиосты. Угось, камъёс вылын палэнчиос ӧвӧл. Соосты ӝог шедьто. Ву сюресъёс вылын сотэк уг луы. Соинтэк-а бадӟым вузчиос асьсэлэн буръясьёсынызы гинэ ветлыны ярато. Тодмотэм буръясьёс-бурласьёс соослы кулэ ӧвӧл, дунъёсэс ке но улэ кушто. Соослы кулэ зэмос бурлакъёс, зэмос ошкуйчиос, кинъёс вӧзын пигонзы но уз ишкалскы. Нош тодмо бурлакъёс, ошкуйчиос, озьы ик «умой воръёс» тросэз луо асьме арсавылъёсмы, комиосмы, мордваосмы, поръёсмы, вогулъёсмы. Камит малпамъя «Зарни Валэз» лушкан сьӧрын ошкуйчиос но, буръясьёс но, воръёс но сыло. Соостэк ӧй луысал Мамайлэн Сарайысьтыз Батыйлэсь Валзэ лушкамзы…

«Вань камъёс, пие, асьме киын… Уйпалан гинэ асьме выжыосмы каллен ӟучъёслы пӧрмо, асьме бур осконмылы пумит ужаны кутско. Озьы ик куд-ог ватка вузчиосмы бигермо, Мусалэн осконэз пала берытско…» – сюлэмшугзэ куке но усьтӥз вал пиезлы Ӟумъя батыр. Татаезлэсь озьы верамзэ Камит пыдло сюлэмаз ватӥз. Угось уг яра, со тодмотэм суред ӧвӧл ке но, вань отын возьытэз но. Кык пала ужано луэ берло дыре тапал калыкъёслы. Бигеръёс пала но, ӟучъёс пала но. Югдур озьы куре, кызьы ке утиськоно уга калыкъёслы. Камит тодэ, Кузон понна ожмаськонын но ваньзы кык пала люкиськемын. Асьме калыкъёс сярысь ке луысал та вераськон, со валамон, нош куке асьсэос бигеръёс но озьы кыклы люкисько, соиз ини саергес адӟиське. Зэмзэ ке, мар саерез, соослэн кескич сямзы ваньзылы тодмо. Но кескич сям но огшоры уг кылды. Соослы но асьсэды утёно ук. Соин, вылды, Муско пала луэм бигеръёс лыдзыя тросгес Кузон котырысь бигеръёслэсь. Нош соос пӧлы ватсано на ке бигеромем калыкъёсты – отын карнан ик ужамысь дугдоз. Оглом, Кузон котырын сомында кугӟано интыосыз… Вылаз ик Кузон – со бигеръёслэн ӧвӧл. Отын мукет калыкъёс тросгес бигеръёслэсь. Нош бигер луэм калыкъёсты ке учконо, зэмос бигеръёс эшшо но ӧжытгес луо. Угось соос Крымысь Улуг Мухаммед сьӧры куинь сюрс кузя лыктэм бигеръёслэн выжыоссы гинэ луо… Кузон калыкъёслэсь кылдэм дунне шӧтэм бадӟымаса шуак усьтӥськиз али Камит азе. Со али гинэ валаз кадь татаезлэсь кыӵе дунне пӧлын пӧземзэ. Но валаз ик меда пумозяз? Нош муско зэрпалъёс, кузон зэрпалъёс, сулейманлэн зэрпалъёсыз, шунды пуксён палась зэрпалъёс – соос кивалто ук та дуннеен. Аслэсьтыз Алангасарзэ нош ик тодаз ваиз Камит. Сое ке кылзоно, дунне эшшо бадӟым дуннеослы люкиськемын на. Отын вань Кылдысинлэн зэрпалъёсыз, вань Кереметлэн шакшыосыз. Нош ву дуннелэн Быдӟым Ош бордысен кутскыса аслаз кузёосыз. Укыр бадӟым дуннеос сыло ваткаос азьын. Соин ик али Камит ӟеч вала, кыӵе бадӟым оскон сётэмын солэн татаезлы, Ӟумъя ватаманлы, ас калыксэ утён пумысен. Таиз пыж витетӥез пыж ни туннэ нуналлы. Нош кӧня соос та сюрес вылын! Кудӥз тушмон, кудӥз ӧвӧл, ошкуйчиос ӝог тодмало. Вань ожгарчи пусъёс, кудъёсыз соку ик верало кин тон, кытысь луиськод, мар тынэсьтыд витёно-возьмано.

Ошкуйчиос пыжзэс куруб борды лякизы, буръясьёс соослы гозы тубатъёс куштӥзы. «Парма палась ӵыжы-выжыосмы…» – каруб пусъёсты адӟыса валаз Камит.

Ӟумъя ватаман аслаз юрттӥсьёсыныз ӝог тубизы «кичка» вылэ. Кема вераськизы тӧлэз буръясь бурлакъёсын соослэн татаеныз, вузъёссэз нуись кузёосын. Камитлы номыр ӧз вералэ ке но, пияш ваньзэ кылӥз. Бурлакъёс веразы кык тодмотэм пыжъёс сярысь. Ошкуйчиослы, пе, уг кельшо, выллань тубо. Бурлакъёсын вераськемзы бере ошкуйчиос выльысен азьлань кошкизы. «Я, ӵок ни, уг ке верало, уг верало… Юнме шат шуо: «Гурто мурт – уртэн, ошкуйчи мурт – пуртэн…»  Вань, дыр, кыӵе ке зарезьчи сямзы, нергезы…» – серекъя ас понназ Камит. Татаез но пальыша, пиезлэсь малпанъёссэ кылыса. Но табере со но Камит кадь ик вала, кыскись кужым мукет интыын шуыса…

Камитлы туннэ быдэс нуналэз ик маскара потэ ни. Зэрпалэн луэм учыр но сое серекъятэ. Но туж паймытӥзы сое, анаезлэн сьӧд ӵукна ик вашкала сямъёсъя келяськонэз-бӧрдонэз, сузэрезлэн Камит борды сокем зол ӟыгырсконэз, гурт нылъёслэн синвуоссэс кутыса мур лулӟылонъёссы, мумыкоре тул шукконэз, гурт пиослэн, эшъёсызлэн, келян гурез кырӟаса, ваньзы ӵош ӟыгыртэт-котыртэт лэсьтыса бӧрдон-кырӟанзы, аслаз но шӧдтэк шорысь бӧрдонэз. Оло ке со кулыны кошке… Маскара… «Малы ай со «маскара» кыл туннэ кыл йылаз лякиськиз, чик но маскара ӧвол ук?.. – малпаське Камит. – Ваньмыз вашкала нергеосъя, трос пол адӟем эсэпъёсъя…»

Нош ачид вылтӥ ке со ортче, тани тазьы мар ке но тулкымъяськытэ, шӧдске. Ноку но таӵе мылкыдъёсты, тазьы оломар сярысь но малпаськонъёсты Камит ас вылаз ӧз шӧды на… Соин солы, пичи дырысен кызь одӥг аресозь ожмаськыны но ошкуен ветлыны дышетэм пияшлы, малы ке та валантэмгес но маскарагес йӧтэ… Тани со ачиз но ожчи ини, сомында кышкыт ожъёсты адӟем ватагайёс пӧлын, Камит луыны кулэ соос кадь ик чурыт сямо, нош солэн пушкыз тыре, синвуосыз бычырало… Али ке но со келяськон кырӟан пель сьӧраз на:

«Бууу-ууу-сыыы-эээ пооо-оооо-тыыы- сааа-аааааа,

Чииии-иии-йааак шоооол-тӥӥӥӥ!

Ииии-иии-зиии-иииись ӵӧӧӧ-жьёёёё-саааа-тааа-ааааа

Са-ааа-йаааа-ааа-каааааа-тӥӥӥӥ!»

Мукетъёссэ келяку сокем уд ик валаськы кадь со кырӟанэз, нош куке аслыд кырӟало, ваньмыз туж мур пыӵа, кӧт гогы ик чутыръя, йырсиос пежырско, сюлэм вузыны кутске. Матысь эшъёсыдлэсь люкиськыса кошкон, вылаз ик кытчы кошкемдэ тодытэк, мае ке но пушкысь бугыртэ… Нош Камит мукетъёслэсь верамъёссэс кылзыса малпа вал: «О-о-о! Кыӵе синву, кыӵе-сыӵе кузьылиос тыбырын, кыӵе йырси пежырскон, йырку кынмон? Юнме-а со вить аресысен воргорон луыны дышетскиз?..»

Малпанын огласянь, улонын мукет – соиз маскара… Дуртӥз ветлон сюресэз ваньзы тодо… Соин ик бӧрдо. Сьӧлыкъёссэс ог-огзылы верало, капчи кылён понна, медаз кыле вожзэс поттыса, вожъяськыса яке писыраса сьӧлыксы понна. Ошкуйчи луыны кулэ капчи, медаз секытаты куез, медаз со кышка кулонлэсь. Нокыӵе герӟетъёс медаз кыле ярдурын. Сотэк ачиз но ошкуйчи, ошкуй но ӟеч уз мыны. Ма, келясь мурт но сыӵе ик герӟеттэм луыны кулэ. Кошкон – со туж мур кыл вылэм… Ву коже кошкон – со ваньзэ вандыса кошкон… Желя инмар апайлэн катэзлы тупась «кенӟали» кадь быждэ куштыса… Кошконэз но оло кож кылысь ик потэ… Кыдёке шат пыдын кошкод, нош ву кожтӥ Кылдысин шаере но вуыны кема ӧвӧл… Тӥни кыӵе ӝогак ас шаераз кыскиз зэрпал…

5-тӥ люкет. Янычаръёс

– Куйёстэс куасьтэлэ! – Камитэз куаляк уськытыса кеське тӧлпо улын сылӥсь Камитлэн татаез. – Бур пала кошкиськомы, бур куйчиос, выйытэ куйёстэс! Паллянъёс, лэсьтэ кӧня ке куй сьӧрлань! Пертче тӧлпоез! Табере каллен, ярдур пала. Каньылля, каньылля, казакъёс… Ӟапык, Буйгаты тӧлдэ…

Ошкуйчиос шуак вордӥськизы кадь. Ожтӥрлыкъёссы ки бордазы лыктӥз: кинлэн ке кияз шибоды, кинлэн ке пукыӵ, кинлэн ке арбалет, кинлэн ке ыстон пурт, кинлэн ке ыстон тӥр… Камит валаса ик ӧз ву, кызьы сое, азьпалан сылӥсез, ошкуйчи киос, нурдаган такаез кадь, ки вылысь ки вылэ кырмыса, сьӧрысь ныр доры вуттӥзы но шуак, губиез кадь, ошкуй пыдсы пуктӥзы… Ымныръёссы ошкуйчиослэн воштӥськизы. Кинлэн ке пельёсыз, оло, бадӟымесь луизы, кинлэн ке пиньёсыз, кинлэн ке чырты лёгез, кинлэн ке чыртыез зӧкаса ӝутӥськиз, кинлэн ке шалтыр карыса сюрлыез но мукет лыосыз интыосазы пуксьылӥзы, быгытъёссы быгыльскизы ву тулкымъёс кадь…

«Янычаръёс!» – валатскиз Камит, вань тыбырыныз ик кынмыса. Ма, мукетъёс но тодмазы… Нош соос Камит кадь ӧз куалектэ, пигонзы но ӧз чогырскы. Бадӟым тангыра кадь вазьылэ пияшлэн сюлэмыз. Киыз вань кужмысьтыз пукыӵ бордаз кырмиськиз. Мукет кияз пукыӵ ньӧлъёсыз куалектыло. «Туп-туп! Туп-туп!» – кылӥське гадяз. Но со кемалы ӧй вал, югдур шуак воштӥськиз, табере сюлэм тэтчан куараосыз ышизы, нош пельыз но нырыз солэн укыр сакесь, лэчытэсь луизы. Ожмаськонлэсь кышканзэ палдуртыса, шоретӥ интые потӥз кыӵе ке бадӟым кужымез шӧдон. Со янычаръёс бордын ӧй вал. Мар ке укыр ненегез, но со дыре ик кыӵе ке вылӥлыкоез вал соос пӧлын… «Мар со сыӵе?» – валаны турттэ Камит, нырпелесъёсыз солэн бадӟымазы, тордэм нырыз мае ке туж аспӧртэмзэ шӧдэ… Одӥг пол Кузонын со таӵегес ик кужымез шӧдӥз ни вал – Идыгей выжыысь ногай бийлэсь, Юсуфлэсь нылзэ, Сафа-Гирей эксэйлэсь кышнозэ, Сююмбикеез, адӟыкуз… Сююмбике мынэ вал кузон базартӥ аслыз пӧртэм вузъёс октыса. Котыраз оломар мында ляльчиосыз-бигаръёсыз. Зэмзэ ке, «бигер» кыл «бигар» кылысь кылдэмын, шуо пересьёс. «Бигар» со вар мурт, ляльчи, кудзэ котькудӥз выжы тэраен валтӥсь ханъёслы берыктонтэм сётэ. Соос нокытчы кошкыны уг быгато, ялан хан котырын уло. Мар шоры Сююмбике возьматэ, бигаръёс соку ик басьто, мертало. Но бигаръёс бигарен, табере соос тросэз бигеръёс. Нош али Камитлы мукетыз тунсыкогес но тамашагес. «Кыӵе ке бий-мурза нылмуртсы вань-а, мар-а янычаръёс пӧлын?» – валаны турттэ казак пи… Поромымон зынъёс солэсь вань ӝушъёссэ сӥсъяло ни, пекляосыз ик чорк султыло, мусэз куаныса ик кӧтаз куалекъя. Тылъёс бызьыло кӧт сюлъёстӥз… Оло, со «шай урбо» озьы вегнаса пӧяны выре?..

Янычаръёс но шуак котырскизы, зэм но, кинэ ке асьсэ сьӧры ватӥзы… Камит воксё мар карыны уг вала, ӧй вал солэн Сююмбикеез адӟыкуз но таӵе луылэмез. Кыӵе-сыӵе нылмурт соос пӧлын пуке?.. Тани кивалтӥсь бейзы, мурзазы-а, кин тодэ, бур кизэ выллань ӝутӥз. «Ум ыбылӥське!» – шуэм кадь со янычар-ожчиослэн. Озьы ик кизэ ӝутӥз Камитлэн татаез но.

– Кинъёс луиськоды? – боз-боз куараеныз бигер кылын юаз ватка ватаман.

– Быдӟым Ошторма батыр! Ӟумъя батыр! – кылӥське ярдурысен бигер кыл. – Мон та, Эшмурза, ядыгар янычаръёслэн сювашсы…

«Эшмурза?..» – шуак пайме Камит.

– Эшмурза, тон-а, мар-а?! – шумпотэ Ӟумъя, со пумитэ ярдуре потыса.

– Мукетыз дӥсьтоз шат тон пала пыраны! – серекъя пумитаз Эшмурза.

– Ма, мукетыз но ӧй дӥсьтысал тон азе тэтчыса потыны – серекъя Ӟумъя ватаман.

Камит копаксэ воштӥськиз, Эшмурза нимез кылыса. Угось Эшмурза шуо Узыбейлэсь но янычар атайзэ. Оло, Узыбей ни отын пуке, янычаръёс сьӧрын?.. Камитлэн шумпотэменыз вань пушкыз кырӟаса кесяське. Нош ожчиос кыкпаласен ик ялан тӥр пуртъёссы борды кырмиськыса уло. Таӵе пумиськонъёсын нокинлы оскыны уг яра, ӟеч мылкыдо ке но вераськон мынэ… Сое ваньзы тодо, вандылӥськон учыръёс трос люкаськемын камъёс вылын… Ог-огзылы туж тодмо адямиос куспын но. Тужгес но оскыны уг яра янычаръёслы… Соос туннэ эшъёсыд, нош ӵуказе тушмонъёсыд…

Лэчыт но сак учкись синъёс азьын Эшмурзаен Ӟумъя ӟыгырскизы но мар ке сярысь улла пала, вылла пала возьматъяса верасько… Луо вылэ бодыен суредало… Нош ик верасько. Ӟумъя малпаське, собере кизэ шонтэ. Кырмо соос киоссэс но кошко янычаръёс пала… Бигер ожгарчиос, кивалтӥсь сювашсылэсь ки шонтэмзэ адӟыса, оштӥрлыкъёссэс палэнтӥзы.

Тани огез бызьыса потэ Ӟумъя пумитэ, ӟыгырско тыбыръёссэс чабкылыса. Мукетыз но озьы ик, куинетӥез но…

Чус-чус луизы ватагайёс. Ваньзылэн ёзвиоссы катӥзы… Медаз вал бышкалтэ ватаманзэс. Янычаръёс туж кескичесь. Соос пичи дырысен анайтэк-атайтэк кельтыса туркъёслы вузам нылпиос, отын османъёс дорын соос будэмын. Та ожчиос юри кылдытэмын асьсэ шаерзэс быдтыны, соин ик янычарлы кинэ ке вандыны нокыӵе но ӧвӧл, коть туж тодмо адями ке но со азьын сылоз. Янычар уг тоды жалянэз, сое нокин ӧз жаля, ӧз кӧкыя, ӧз ӟыгыръя, ӧз веша. Соосты, анайтэк кельтэм бӧрдӥсь нуныосты, кудые поныса борӟемен нуизы. Зарезь сьӧры, Сулейман доры поттӥзы. Котькуд янычар шаерезтэк будэтэмын, соин ик со быдтыны турттэ со шаерез, кытын со вордскиз, кудӥз сое утьыны ӧз быгаты. Сыӵе шаер улыны кулэ ӧвӧл – чурыт тодэ котькудӥз янычар. Соин ик солэн азьвыл шаерысьтыз котькуд адями со понна номыр сылӥсьтэм лул – умой тодо сое ошкуйчиос, ватаманзэс но туж ӟеч тодо, нош со номыр ӧз вера на, сак луон сяна.

– Ваньмыз умой! – кеськиз Ӟумъя батыр. Но озьы ке но ӧз буйгалэ уно адӟем ошкуйчиос…

Эшмурза янычаръёс пӧлысь нылмуртэз Ӟумъя азе поттӥз но куиньназы соос вамыштӥзы ошкуй пала. Нош куать янычаръёс асьсэ куйзы дорысь куинь сандыкез усьтыр гинэ соос сьӧры нуо…

«Узыбей!» – шумпотэменыз гуньдэ вал Камит. Ватагайёс но малы ке чус луизы.

– Мар ке мон ӧй вала, ватаман, мар пирданъёс тон вайиськод? – ӟазыртэ Шакай. – Кыӵе сыӵе сурымча эгыр моклокез пуктыны турттӥськод асьме югыт ошкуямы?..

– Шакай-макай, шуприч агай! Ку тон дугдод монэ эгыр моклок шуэмысь? – пальпотэ Сулейманлэн янычарез Эшмурза, ошкуйысь тэтчем Шакаез ӟыгыртыса.

Шакай сьӧры тэтче Мардан, Мардан сьӧры Ӟаньчок, Пиногор, Кусни, Эпок, Былай, Гадӟи… Оглом вань пересь зарезьчиос… Ваньзы соос пумитазы лыктӥсь янычаръёсын ӟыгыръяськыны кутско… Гур каро, ӟазегъёс кадь… Сулейманлэн янычаръёсыз кемалась ини Кузонын ужало. Соос эксэез возьманы Крым пыртӥ османъёс дорысь вуизы.

– Янычаръёс кыӵе шумпотӥзы… Камдуръёсмес ӵошен утён, мурт пыжъёсты выйытылон мур пыӵамын асьме сюлэмамы… – пальпотэ Эшмурза.

– Ай азьпалан оломар возьма… – секыт лулӟе Ӟумъя батыр. – Ку тазьы пумиськод на? Мускоос Кузонэз басьтытэк, гуртъёсмес талатэк уз кошке…

– Озьы… Иоанн, кузьыли кадь, выль каръёссэ пуктылыса лыктэ… Троссэ сювашъёсмес ачиз пала кыскиз, зэрпалъёсыз но солэн трос на, умой солы юртто, визьмо ужа, тодэ кызьы вӧяны, кинлы музъем, кинлы дворян нимтул сётэ, янычаръёс но куалак сётскизы, бийёсмы, мурзаосмы лушкем соин шудо…

– Ваньзы кыклы люкиськизы… – серектэ Ӟумъя. – Бигеръёсыд но…

– Быдӟым Сулейман сураз… – валэктыны тырше янычар сюваш.

– Шонер вераськод, Крым бигеръёс Сулейманлэн косэмезъя Муско пумитэ султо. Умойтэм ужа Сулейман, ачиз Чингисхан выжыысь ке но. Иоанн но Чингизсанлэсь вирзэ нуллэ ук. Соослэн кыкназылэн ик тушмонъёссы католикъёс. Нош мар со каре? Католикъёсты ӵош уллян интые, Мусколы пумит ужа…

– Валаськод ук тон, Ӟумъя, ваньмыз та керӟегъяськон Кузон базар бордысь потэ, бадӟым вузаськон сюресэз соос люко…

– Нош Муско вормоз ук! Нокинлы уз сёты ни со Кузон бордысь ишкалтэм Базарзэ.

– Сулейман но кужмо валтӥсь…

– Сулейман зарезь сьӧрын. Нош Муско урдэскын. Муско табере вань кужмысьтыз кырмиськиз Базар сюрес борды. Тӥни кыӵе кар со пуктӥз Кузон вӧзы ик. Кызьы сое пукыӵъёсын но валъёсын басьтод? Бадӟым пешкалъёсыныз огпол ыбиз ке, борӟеменъёстэ уд султыты ни. Табере со выль караз кужым люка. Сиён, дӥськут, ожтӥрлык, дары. Тон туж шонер вераськод, ӟучъёсты но зарни уд шу, кемалась ини булгар камъёсмес соос асьсэлы карыны туртто… Вузчи сюресъёс ваньзэсты кыско… Но луысал ук ожмаськытэк но улыны… – секыт синъёсын учке  Ӟумъя.

– Юнме соосты джучиос шуиськоды! – куаретэ Эшмурза. – Ӧвӧл соос джучиос. Кыйёс соос! Тарказы соос Джучи улусэз, князьёссы но ог-огзы шоры урдӥськылыса уло. Вунэтӥзы тартар ордалэсь вужкатъёссэ. Пӧртэм черкъёслы сётскизы, Шунды пуксён палась кунъёс кадь ик, Тартар кунмылы пумит султӥзы. Иоаннлэн вирыз Чингисхан дорысен ке но лыктэ, ӧвӧл солэн асьме палъёсты жалянэз…

– Кин тодэ, кин тодэ… Иоанн сярысь мон меӵак озьы ӧй шуысал. Со пумит султӥз Шундыпуксён пал черкъёслы но, эксэйёслы но. Мынам калыке Идэль котырын но Идэль сьӧрын шуэм со католикъёслы. Но огез ласянь тон шонер, котырез солэн ваньмыз со кадь уг малпаськы… – Эшмурза шоры учкыса, мур малпаське Ӟумъя. – Ма выль бигеръёсыд но сыӵеесь… – янычар шорысь синъёссэ воштытэк, аслэсьтыззэ ватса на со. – Крым палась сямъёссыя, ваньзэсты аслаб-уар карыса арабъёслы но туркъёслы вузамзы потэ… Хазаръёслэн ашкеназъёссы кадь ик асьме калыкмес вузаны туртто…

– Кыӵе бигеръёс, тон мар, Ӟумъя, бигаръёс шу. Соин ик нылме тыныд кельтӥсько… – шуак вера Эшмурза…– Бигаръёслы мынам кемалась оскеме уг лу ни. Шонер тон вераськод. Кин со Ядыгар ханэд Кузон понна, кин Азьтаркан ханэд, Ногай ханэд, Крымысь ханэд… Нылы понна сюлмы бӧрдэ… Медаз вал адӟы анаезлэсь кадь адӟонзэ…

– Нылдэ утём, верай кылме. Нош мар кузпалэныд, мон мае ке адӟытэк кыли?..

– Аслам ханэ ӵогиз…

– Кудӥз ханэд? Соос вал трос берло дыре… Сахиб Гирей, Ӟанали, Сафа-Гирей, Шах Али, Умтямыш?..

– Ваньзы одӥг кадесь… – ӵоге Эшмурза. – Сафа-Гирей быдтӥз… Нимзэ кылэм уг пот… Муско байаръёслы кышноме сётыны турттэ вылэм… Нош кышное «ӵог йырме» шуэм. Соиз ӵогем, хан луэменыз данъяськыса. Нош мон малпасько вал, со монэ гажа, эксэе мынам…

– Нош кин ассэ Сафа-Гиреез быдтӥз?..

– Уг тодӥськы, Ӟумъя… Тодэме но уг поты… – кизэ шонтэ Эшмурза. – Мон солэн виреныз асме ӧй сьӧдма. Троссэ со вӧсь кариз… Ярам, эше, уть мынэсьтым дыдыме, ноку уг вунэты юрттэмдэ… Тани тыныд… – мыче со пичи пуйызэ.

– Тон мар? – палэнтэ пуйызэ ватаман…

– Басьты, Ӟумъя… Мыным со табере сюрес вылын кулэ уз луы. Мон ожгарчи, мынам уже ожмаськыны, Кузон ханлы, Ядыгарлы, сётэм кылме быдэстыны…

– Эшмурза, дугды ай, кузпалыдлэн, Гульсиля, вӧзам султӥз, кыл верамез потэ… Мон адӟисько сое, кылӥсько мар верамзэ… Салам со тыныд вера, астэ утьыны косэ… Чакласькыны куре ӟучъёслэсь… Шуэ: ӧз быгаты мукет сямен… Со тӥледды яратэ, кыкнадэс ик… –  ивортэ эшезлы Ӟумъя.

– Тау, Ӟумъя, вера солы, мон но сое яратӥсько… Мон валасько но данъяськисько соин.  Мон но нимме уг сьӧдма…

– Со тонэ ачиз кылэ. Сямдэ но ӟеч тодэ. Гульсиля шумпотэ нылдэ татчы ваемысьтыд. Шонер карид, шуэ.

– Тау, Ӟумъя… – синъёссэ ватэ янычар.

Эшмурза нылыз доры лыктыса, ӟыгыртэ сое. Нылыз бӧрдыны кутске.

– Эн бӧрды, дыдые… Анаед но тӥни шумпотэ, татчы тонэ кельтӥсько шуыса. Кузонын ваньмыз буйгам бере, мон тонэ шедьто… Нош Кузонэ кельтыса, кышкасько, уг шедьты, соин татчы ваи, анаедлэн калыкез доры… Соослэн осконзы чылкыт, соос тонэ ӟеч утёзы…

Эшмурзалэн нылыз шуак учке Ӟумъя шоры…

– Ӟечбур, бадӟым будэм нылы, атаед тонэ ми доры кельтыса, туж умой лэсьтэ… – пальпотэ Ӟумъя батыр.

Нылаш мыкырскылыса тау шуэмзэ возьматэ.

Эшмурза кузь-кузь вамышъяса кошке. Со сьӧры дыртыса кошко янычаръёсыз.

– Эшмурза! – кеське Ӟумъя.

Эшмурза дугдэ.

– Кызьы тон тодӥд мон татӥ ортчо шуыса? – паймыса юа ватаман.

– Кыр луд туно вераз…

– Кудӥз Арчае нуись сюрес дурын улэ?

– Ӵапак со…

– Иське валамон… – йырзэ шонтэ Ӟумъя, со адӟиз ни вал, янычаръёс уйзэ Мамадышын кӧлыса, ӵукна ик татчы потӥллям шуыса. Угось Кузонысен татчыозь вуыны капчи ӧвӧл.

Эшмурзалэсь кошкемзэс адӟыса, мӧзмыт луэ Ӟумъялы. Горд тыл пыртӥ кошко янычаръёс. «Сюрессы ӝоген йылсаськоз…» – горд тыл пыртӥ малпаське со.

– Мар, бон, карод, созэ воштыны уг лу, кызьы гожтэмын, озьы ик быдэсмоз, котькудӥзлэн аслаз сюресэз… – нокыӵе кариськытэк шуэ Гульсиля. – Секыт тыныд, Ӟумъя, ваньзэ тае адӟыса улыны. Мон ноку ӧй малпа вал сокем тыныд секыт шуыса… – жаляса учке Ӟумъя шоры Гульсиля.

– Нокинлы капчи ӧвӧл, сопал дуннеын но озьы ик, котькуд лул эгыр кадь ӟырдаса улэ… – пальпотэ Ӟумъя. – Тынад но со али ке но пирсэкъя…

– Кылдэмез сыӵе бере, мар карод. Ярам, тау тыныд Ӟумъя, уг ӝегаты ни дырдэ…– мусо пальыштэ Гульсиля но ыше…

– Кошкиськом! – кеське Эшмурза. Янычаръёс шуак люкало арбериоссэс, дыртыса пуксьыло бурдо арыслан пусэз нуллӥсь куйязы. Тани соос позырскизы шур уллане… Эшмурза эшшо учкиз на нылыз шоры, кизэ шоназ. Нылыз но кӧня ке шур уллане бызиз но кизэ шонаса сылэ.

6-тӥ люкет. Узыбей – чечым нылаш

Камит шумпотэменыз уг тод ни вал кытчы пырыны. Ватка ачиз со доры вайиз Узыбеез. Солэсь атайзэ но Камит ӟеч тодэ. Тани али но со кырыжак гинэ учкиз Камит шоры, тодмаса учкиз, но таяз учыре шумпотӥз, нылызлэн эшез но татын шуыса. Камит нокыӵе ӧз кариськы, солэн ас сярысьтыз малпанъёсызлэсь. Угось азьвыл со шум уг поты вал, кышка вал, нылыз кыӵе ке гуртысь туно кие медам сюры шуыса. Со малпа вал, нылзэ Кузонэ, эксэй вӧзы интыяны. Тунолэн пиез нылзэ солэсь уг сылы, малпа вал Эшмурза. Со огпол но ӧз вераськы Камитэн. Ӧз ик адӟылы кадь. Табере адӟиз, шумпотӥз. Воштӥзы сое Кузонысь берло югдуръёс… Ма кемалась со воштӥськыны кулэ ни вал, сокем секыт улонэз адӟем нуны-янычар. Камит шуак адӟиз солэсь вань секыт улонзэ, пичи дырзэ, егит дырзэ, али дырзэ. Адӟиз, кызьы быдтӥзы солэсь кузпалзэ, Узыбейлэсь анайзэ… Малы озьы луиз, Камит соку ик валаз. Адӟиз озьы ик мугзэ, валаз, малы со одно ик озьы луоно вал. Выжызылы чылкытаны кулэ вылэм. Соин со озьы луэм. Тӥни малы туннэ нуналозь Камит адӟымтэ та луоно югдуръёсты. Тӥни малы ворсаллям солы та выжыез учкон «укнозэ». Камит эшшо мургес ке учкысал, валасал, кыӵе со выжы, малы со выжылы чылкытаны кулэ вал. Но Камит отчы ӧз учкы ни. Солэн йырвизьмыз шуак шедьтӥз аслаз вакчи юанэзлы вакчи валэктон: тӥни малы со Узыбеез куинь арлэсь кема ӧз адӟы. Анаезлэн кулэмез понна… Тӥни со азьвыл кадь ик чебер дӥсен, кам синучконлэн ворекъянэз вылэ, нылыз вӧзы выльысь кылдӥз, я Камит шоры мыняса учке, я нылыз шоры, я Камитлэн татаез шоры…

– Ярам, Узыбей…– ныл доры матэктӥз Ӟумъя, Гульсиля вӧзы султыса. – Шу табере монэ но «тата», пие кадь ик… Кошким, тодӥсько мон тонэ кытчы интыяны… Ми тонэ тапалан Маскара но Пичи Арча каръёс котыре интыяломы.

– Маскара элькышноос доры? – паранжазэ куштэ нылаш.

– Тынад тодмоосыд доры… – пальпотэ Ӟумъя, нылашлэсь чеберскемзэ синйылтыса. – Шонер, табере кулэ ӧвӧл ни тыныд та ымныр ӵоксанэд, тон табере аслад дорад…

– Шӧдске, ватаман пилы кышно-мунё… – мынектэ кин ке…

Камит кӧдэктӥз… Таӵезэ со ӧз возьма… Малпаназ ик солэн ӧй вал таиз ласянь. Кудласянь таӵе малпанлы султоно, пумит-а, соглаш-а луоно?.. Ма соглаш, бызьыса ик соглаш луоно, тон мар, Камит. Котькуд лулӟонэз, котькуд выросэз тонэ куалектытэ ук. Но со дыре ик мар ке шуак дугдытэ та малпанэз. Солэн уга сюресэз али гинэ кутскиз, шат нылаш понна сое быдтод?.. Та малпанэз чилектэм кадь ӵашйыса, со пыртӥ ортчиз… Кусо кадь турналтӥз со Камитлэсь ческыт пушйись малпанъёссэ. Ӟумъя но, Камит но шуак тодазы вайизы Алангасарлэсь нылмурт сярысь верамзэ…

– Тодматске… – пальпотыны тыршиз ватаман. – Нимыз та ныллэн – Узыбей… Пуктэ сое сандыкъёсыз доры…

Ошкуйчиос чалмизы, котькудӥз нылашлы инты усьтыса, азьпала сандыкъёсыз доры сое келя. Узыбей котькуд ошкуйчилы тау карыса, дыртытэк вамышъя. Солэн дуно дӥськутэз, эслымайёсыз, сайкыт пальпотыса учконэз, ассэ возён манерез котькуд ошкуйчилэн сюлэмаз гажан мылкыд пыӵатӥз. Оло ке шунды ныл соос доры васькиз, гань-гань луиз ошкуйчиослэн гадьёсазы. Вань вал та нылашлэн бордаз кыскись кужымез. Вань ошкуйчиослэн сюлмазы кыӵе ке данъяськон мылкыд пыӵаз кадь. Оло ке та ныллэн соослэн ошкуй вылазы султонэз кадырлыко кариз воргорон пыжзэс… Но кык туноос пыртӥ мукет тулкымъёс ортчизы, кыкназы ик зэрпаллэсь веранзэ куадыны тыршо…

– Узыбей… – ас понназ мӧзмыт шумпотэ Камит. Соин котьку мар ке луэ вал, Узыбей нимез кылыса. Туж пичи Узыбей шоры учкыса но. Узыбейлэн котьку вал кузон кар тодметэз. Туж зол висъяське вал со ватка нылашъёс пӧлын, огшоры шудонъёсын ке но соосын ӵош шудэ – ваньмыз солэн дас пол чебергес пӧрме вал. Нош гуртысь нылъёс сярысь ке верано, таосыз матаз ик лыктыны возьдаськизы. Мунё кадь потэ вал соослы Узыбей. Ма Камитлы но Узыбеен котькуд пумиськон шудбур вал. Узыбеез ошкуй пыдэсын пукись Камит вӧзыгес ик сандыкъёсыз вылэ пуктӥзы…

– Сююмбике но со азьын вужере кыле… – валэктонъёс утча аслыз Камит, мугорызлэсь юзырам-кезьырамзэ шӧдыса.

– Мусо Камитэ мынам, кӧня пол мон тонэ уйвӧтъёсам адӟи, кӧня мон та нуналэз возьмай! – кылэ Камит ныллэсь малпанъёссэ. Синъёсыз возьдасько ке но, кыӵе ке кужым учкытэ ныллэсь дӥськутъёссэ, шароварзэ, пыдъёссэ, ку сапегъёссэ, мур шокась гадьзэ, весьёссэ, угыоссэ, дуно кипотэсъёссэ, бигер такъя улысьтыз потӥсь чиль-чиль сьӧд йырсизэ…

Нылаш но учке Камит шоры, паймыса со чакла Камитлэсь ӧжытак воштӥськем ымнырзэ, мугорзэ, али гинэ бычырась мыйыксэ, тушсэ… Шунды пыртӥ ӵыжыт адӟиськись пельёссэ, кужмо пельпумъёссэ, ожчи дӥсьёссэ…

– Ӟечбур, Камит! – шыпыртэ Узыбей, Камит доры кыстӥськемезлэсь возьдаськытэк.

– Ӟечбур, Узыбей! – шыпыртэ Камит, вань ымнырыныз ӝуаса, угось шуак тодаз лыктӥз солы, кызьы соос пичи дыръязы кышноен карт луыса шудылӥзы. Нош берпуметӥ пумиськыкузы чупаськылӥзы.

Ошкуй туж ӝог кошке вулы пумит. Ву уллане нош ик васько кык карубъёс. Таосыз но сылалэн но мукет вузъёсын тырмытэмын. Бурлакъёс тани гозы тубатсэс кушто. Ватаман тубе, вераське, пусъёссэс эскере, выт басьтэ, пуссэ сётэ. Но Камит номыре уг кылы таяз учыре. Со кылзэ ныллэсь малпанъёссэ. Малы ке шуоно табере со сое кылэ. Усьтӥзы солы Узыбеез вылӥ кужымъёс. Ватаман кыкетӥ карубе тубе ни. Тани нош ик ваське. Но Камит номыр но уг кылы, ныллэсь шокамзэ сяна, нырыз тӧрназ ини ческыт зынъёссэ шӧдыса. «Но малы зэрпал озьы шуиз?» – уг кошкы солэн йырысьтыз. Но зэрпал гинэ озьы шуысал ке, ачиз но ук кылзэ вераз, со малпан огшоры ӧз вордскы ук, со зэмлыклэн кусоез кадь кылдӥз. Кызьы табере соин улоно, кудпалзэ сюресэз быръёно?..

«О, кыӵе тон чебер, кызынонэ мынам, – шуак тодаз со вайиз Библиысь Соломонлэсь кырӟанзэ, кудзэ со Узыбейлэсь мӧзмеменыз сэрен, ватка кылын лыдӟытэк но вераны тодэ ни вал. – Син шумпотэ тонэ адӟыса! Синъёсыд тынад, дыдыкъёс кадь, сьӧд бабляосыд улын; нош йырсиед тынад сьӧд кыр кеч уллё кадь ваське Ошторма гурезь бамалъёстӥ; нош пиньёсыд тынад – ӵышкем ыжъёс кадь тӧдьы пото тӧдьы-тӧдьы камысь, выньзылэн кык ыжпиоссы, ыжпитэмез ик ӧвӧл соос пӧлын; векчи льӧль тасмаос кадь ымдуръёсыд тынад, сокем мусоесь; кыклы люкем ӵыжыт яблокъёс кадь – бамъёсыд тынад йырсиосыд улын…» – мыняса учке Камит Узыбеез шоры, соиз но мыня, уг ке но тоды, мар сярысь Камит али малпаське…

Тани каруб «кичкаысь» васькизы ошкуйчиос, ошкуй нош ик азьлань кошкиз. Нош мышкын, шӧдтэк шорысь, кыӵе ке кырӟан кылӥськиз… Камит шуак берытскиз карубъёс пала но синъёсыз солэн бадӟымесь усьтӥськизы. Али гинэ татаезлэн васькем гозы тубаттӥз табере кыӵе ке шыр гольык нылашъёс «кичкае» тубо. Бурлакъёс пешкалэн огзы бере огзы ыбизы, нылашъёс шуак вуэ тэтчазы. Нош одӥгез ву пушкысь сыӵе вылэ тэтчиз, Камит адӟиз солэсь чорыг быжзэ…

Пешкал ыбемлэсь ваньзы куаляк усизы ке но, нокин ошкуез берлань берыктыны ӧз малпа.

7-тӥ люкет. Вунылъёс

– Ву нылъёс сылал доры лыкто! – ваньзы понна вераз ӟазырес куараё Ӟапык. – Шӧдске, кыкетӥ карублэн татазы сылал вӧсьсэ умой-умой ӧз кырӟа… Нош кам вылын ваньзэ чаклано ук… – нукыртэ со.

Ошкуйчиос гор гинэ серекъяло.

– Табере кемалы бордазы нориськозы! – шуэ Ӟапык ӟазыр-ӟазыр куараеныз.

– Нош малы соос озьы норисько? – паймыса юа егитгес ошкуйчи.

– Сылал доры сузяськыны лыкто, сылал, пе, соослэсь сьӧлыкъёссэс кыске… – валэктэ солы Ӟапык. – Сылал уго кужмо арбери, бадӟым ву нюртон бере, ваньзы сылал сиыны кутскизы. Азьвыл нокин сылал уг сиы вал.

– Нош малы табере сылал сииськомы? – юа егит ошкуйчи.

– Азьвыл омыр капчи вал, уг зӥбы вал мугорез, ву вылтӥ но бызьылыны луэ вал, быдэс дунне вылын толалтэ но уг луы вал, нош ву нюртэт бере ваньмыз воштӥськиз, табере лымы но усьылэ, шуръёс но кынмыло, но самой бадӟым мугез, омырлэн зӥбетэз секыт луиз, тужгес но секыт луиз зэрпалъёслы, соос табере туж ӝог кулэсмо дунне вылын, сылал сиытэк со зӥбетэз нокинлэн но вормемез уг луы ни… Соин ик сылал табере зарни луиз… Вунылъёс понна но озьы ик, шӧдске…

Бурлакъёс нош ик кык пол ыбо. Нош ик кир-пазь кошко вунылъёс.

– Ма номыр карыны уг луы шат соосты? – выльысь юа егит ошкуйчи.

–Тон ӧд-а синмаськы соослы? – вожез потэ Ӟапыклэн. – Эн учкы сопала, сьӧрад лыктозы, улондэ басьтозы. Ачид но вумурт луод. Вылаз ик кышномурт! Тэтчоз соос пӧлысь одӥгез, ӟыгыртоз но сьӧраз нуоз. Нонокъёсыд кышномуртлэн кадь пульдозы, нош пульдон интыяд пась кылдоз… Ме, сылал веръя, эн кылзы соослэсь кырӟанзэс. Вунэты соосты. Табере соос ялан ыбылозы, сотэк мозмиськемзы уз луы, сылал вӧсьсэс выльысен ӧз кырӟа ке татазы.

– Нош кытысь соос кылдо? – сылал веръяса юа егит ожгарчи.

Ошкуйчиос ваньзы серекъяло. Ӟумъя батыр но пальпотэ, пиез шоры учкылыса.

– Ме, эшшо си сылал, ярдуре потӥм ке, верало, мон сомында тыныд мадьёс верало, вань лулыд пыдтышкад кошкоз, нош али вунэты! – нукыртэ Ӟапык. – Ву вылын уг яра соос сярысь вераськыны, малпаськыны но уг яра.

Вунылъёс сярысь Камит умой тодэ. Ву вылын трос акиятъёс но кырӟанъёс ветло соос сярысь. Ма, трос адӟыло соосты калыкын, соин ик трос соос сярысь тодо. Узыбей но, шӧдске, ӟеч соосты тодэ. Камитэн ог-огзы шоры учкыса, соос но серекъяло егит пилэсь юалляськемзэ. Кытын ке пеймыт нюлэскын будэмын кадь пияш, тӧдьы куака мактал адӟиське та ошкуйчиос но ватка калык пӧлын…

– Бах, бах! – ыбо нош ик мискинь бурлакъёслэн пешкалъёссы.

Ошкуйчиос ваньзы серекъяло. Но серекъянзы сьӧрын ваньзылэн кыӵе ке но кышканзы вань…

– Умойтэм со, куке вунылъёс адӟисько… Инмар озьы пус сётэ… – бӧтьыртэ Ӟапык. – Ошкуйын но… нылмурт… умойлы ӧвӧл…

Ӟапыклэн та кылъёсызлэсь Камит ӧжытак сазьтӥськиз кадь. «Ошкуйын нылмурт умойлы ӧвӧл» шуонэз ваньзы тодо, вань сыӵе вераськонъёс… Но воръёс пӧлын сыӵе вераськон кемалась быремын ни кадь. Соос пӧлын кышномуртъёс ӵем пумиськыло, ватаманъёссы но куд-огезлэн кышномурт луэ. Тӥни калмезъёс но, Маскара гуртысь нылмуртъёс, асьсэос ветло пыжъёсын. Камъёс вылын кышномурт кемалась ни пыж вылэ султэмын. Соин ик Камит нокыӵе ӧз кариськы Ӟапыклэн «ошкуйын нылмурт» шуэмезлы. Но вунылъёс ласянь, соиз мукет ужпум…

«Ку пото вунылъёс? – шуак малпаське со. – Кулон матэктыку…»

– Асьмеос котьку кулон улын ветлӥськом, – кеське ошкуйчиослы татазы. – Мар татын вылез? Шумпотэ, Быдӟым Ошмы ачиз сакласькыны куре. Озьыен, со но асьмесын! Нош со ке асьмесын, малэсь кышканэз? Тӥни со пичи шур, паллян палан, адзӥськоды-а?.. Сое одно эскероно.

– Тодӥськом, ватаман! – кесько ватагайёс, мачкорзэс но тӧлпозэз васькытыса. – Отчы ик куйласьком ни…

«Чылкыт но ӝог ужало…» – синйылтэ Камит, ву вылэ мычиськем полысъёсты учкыса. Со ачиз но ӧз шӧды, кызьы малпанъёсыз Узыбей дорысь палэнскизы. Камитлы туж кельше «куйласькон» кыл. Пӧртэм солэн пуштросэз. Чупчи палась удмуртъёс куез «полыс» шуо. Маскара солы потэ «полыс, полысаны, полысаськыны». Мар со «ошполыс»?  Нош «ошкуй» кыӵе ӟеч но мур кылӥське! Ошкуез куйлан, ошкуй гуръёсты куйлан, куйёсты куйлан, мылкыдэз куйлан! Мае но куйланы уг луы та дуннеын! Нылмуртэз куйлан… Выльысь пальпотыса учке со Узыбей шоры. Соиз но пальпотэ, шӧдэ Камит. Но озьы ке но Камитлэн йырысьтыз уг кошко берпуметӥ луэм учыръёс, зэрпал но, вунылъёс но огшоры ӧз адӟиське, вала со пуш тодонэныз. Зэрпалэз пумитан – со кышкыт кужымен шуккиськон. Нош вунылэз адӟон – со вуоно кузпалэныд пумиськон. Но со дыре ик мар ке умойтэмзэ шӧдэ Камит, тани нош ик гогыез ньылон дораз вуыны кутскиз. Кин ке учкиз кадь со шоры бадӟыматӥсь пиялаен… «Бадӟыматӥсь пиялаен!» – зуркак луэ Камит.

8-тӥ люкет. Кулэм ки тяпаен ветлись храмчиен пумиськон. Узыбеез лушкан

Ӵапак со вискын ошкуй азьын бадӟым ву пезьдэт кылдӥз. Со сьӧры шуккиськиз ярдурысь пешкаллэн гудыртэмез.

– Кырыж сялӟизы! Кый кадь мынӥськомы! – кеське Камитлэн татаез.

Ярдурысен нош ыбизы, ву пазьгиськон ошкуйлэн паллян палаз кылдӥз.

– Кык пешкалзы! – кеське ватаман. – Шудпуйыос асьмеос! Кыкетӥзэ запалзэс уз вуттэ шуккыны…

– Уйпалась «сьӧд ошкуйчиос»? – кеське Ӟапык.

– Ӧвӧл, таосыз азвесь уг утчало! – соглаш уг луы ватаман. – Таосыз куакаосын ветлӥсь тодмоосмы! Ӵапак соосты асьмеос утчаськомы! – инмын бергась куака уллё шоры возьматэ Ӟумъя батыр.

Пересь ошкуйчиос соку ик валазы, кинъёс сярысь вераськон мынэ. Вал ни соослэн таӵе куака кузёосын Перма палан пумиськемзы… Соос куакаосын ӵош ужало. Куакаос ваньзэ соослы азьлопала ик иворто, сюрес возьмато…

– Вуимы! Ошкуез изъёс доры! – кылӥське ватаманлэн чурыт куараез.

Камит валаса но ӧз вутты, кыӵе куакаос сярысь вераськон мынэ, ошкуйчиос, пыжзэс ярдуре поттыса, Узыен Камитэн валче ярдур вылэ, изъёс доры вуттӥзы.

– Ӟапык, дася пешкалэз! – кеськиз ватаман. – Эн лэзь куйзэс та пичи шуртӥ кам вылэ потыны. Куакаоссэс но ыбылэ, тапала матэктӥзы ке! Камит возьма Узыбеез! Бадӟым изъёслы матэгес кариське! Мукетъёс кошким шур ярдуръёстӥ. Ӝоггес! Тӥни отысен ыбизы! Шыкмет, Кусни, Мардан, тӥ потэ шур сопала!

Ошкуйчиос син куспын, кӧйыкъёс кадь тэтчаса, писпуос сьӧры ышизы. Ӟапык пешкалзэ из сьӧры пуктӥз. Киосаз сялӟыса возьма… Тани со шыртылзэ поттӥз, ӟустаризэ дасяз…

Узыбей шуак ошкуйысь тэтчиз. Камитлэн вань сюлмыз потэ вал, та чебер тэтчонэз адӟыса. Нош ныл бордысь вӧлскез йырси зынъёсыз пыд йылысьтыз погырто вал, йыр липетсэ ик лӧпкытӥзы, оло. Кыӵе ческытэсь солэн ымдуръёсыз, кыӵе ненег шокало гадьёсыз. Камит Узыбейлы аслэсьтыз кыкетӥ пукыӵсэ сётӥз, кӧрыкен ньӧлъёссэ но ныллэн пельпумаз ошиз. Аслыз но кӧрык ошыса аслэсьтыз пукыӵсэ кырмиз. Кыӵе солэн потэ Узыбей борды ӟыгырскемез. Ма Узыбей но чидатэк возьма сыӵе учырез. Погыртысал со али Камитэз кыӵе ке турын сяськаос пӧлы, чупасал солэсь вань мугорзэ. Куясал вань та казак дӥськутсэ… Ассэ но усьтысал солы быдэсак… Узыбей Кузонын берпуметӥ аръёссэ туж умой валаз, улонын ваньзэ дырыз дыръя басьтоно. Улонын ваньмыз шуак воштӥське. Кӧня со бӧрдӥз анаез понна… Нош табере Камит понна со кышка. Уз, уз сёты со аслэсьтыз Камитсэ кинлы ке ишкалтыны. Шӧдтэк шорысь Узыбей Камит борды кечырскиз но шедьтӥз солэсь ӟырдыт ымдуръёссэ. Сӧсь кадь чупам вылысь чупа Камитсэ, нош соизлэн пыд йылаз сылэмез уг луы ни, йырыз поромиз, сюлэмыз сокем зол йыгаське… Кыӵе ческыт Узыбейлэн ӟыгыръямез, чупамез…

Ӵапак со дыре камлэн вылӥ паласьтыз изъёс сьӧрысь потӥзы куинь ожгарчиос. Номырлэсь кышкатэк соос матэкто. Одӥгез кутӥз кияз тӥр но туж зол сое ыстӥз соослы тыбыреныз кыллись Ӟапык пала… Узыбей но Камит шуак кыскизы пукыӵъёссэс.

– Тӥ мар? – кеськиз Ӟапык, Камитлэсь но Узылэсь ас палаз ыбись пукыӵсэс адзыса.

– Тэтчы палэнэ! – кеськыны вуиз солы Камит, но бер ни вал тэтчыны, Ӟапык пограз. Тыбыраз солэн кӧшкемыт тӥр бышкалскиз.

– Вжик! Вжик! – кошкизы пукыӵ ньӧлъёс кык тодмотэм ожчиосыз погыртыса.

– Вжик! Вжик! – выльысь кошкизы пукыӵ ньӧлъёс, но таяз учыре куинетӥез ожгарчи ньӧлъёсты котырес щитаз октӥз.

– Вжик! Вжик! – нош ик кошкизы ньӧлъёс.

– Вжик! Вжик! – нош ик бышкалскизы соос куаныса серекъясь ожчилэн щитаз.

Куинетӥ ползэ пукыӵъёссэс кыскизы Узыбей но Камит, но киоссы соослэн малы ке из кадь чурытэсь луизы… Пыдъёссы но музъем борды вырӟытонтэм лякиськизы. Выльысен адӟиськиз куака-кырныж уллё, исаса кадь туж улӥетӥ поръяло.

Куинетӥ ожчи матэктӥз но котырес щитысьтыз ньӧлъёссэ ческыт-ческыт зынъяса, одӥген-одӥген ишкалтӥз, вырыны быгатӥсьтэм егитъёслэн кӧрыказы тыриз. Лыктӥз ыбем ожчиос доры, ышкалтӥз ньӧлъёссэс, яра бервылазы мар ке кисьтӥз… Соосыз султӥзы. Одӥгез мынӥз Ӟапык доры, тыбырысьтыз тӥрзэ басьтӥз…

– О-о-о!!! – секыт лулӟиз Ӟапык, нориськем вирыз шукыяське солэн тыбыраз.

Куинетӥ ожчи матэктӥз Ӟапык доры, кисьтӥз солэн яраяз вузэ. Ӟапыклэн тыбырысьтыз вирыз но шукыосыз соку ик быризы. Ӟапык кызыны кутскиз. Усьтӥз синъёссэ. Зугыр куалекъя. Пыдъёсыз отчы-татчы ӵыжиськизы. Кӧтыз шӧтэм ургетэ. Куинетӥ ожчи Ӟапыклэсь пешкалзэ ошкуй шоры мертаз.

– Нош асьмелы кинкеослы-соослы мар ной-сой эскерон ортчытоно луоз, чебер дыдыке-сяськае… – Узыбей доры матэктэктыса, дыго-мого ватка кылын вераз куинетӥ ожчи, собере пичи сумкаысьтыз «кулэм ки тяпазэ» поттӥз.  – Шол-шолай, шактой ик мон тонэ, кече-пеле, утчай, Узыбей кызые… Первояк Чупчи палдур каръёсысь, собереяк Арчады палдурысь, собереяк вань Арсавыл шаерысь… Мон неноку ӧй малпасал, тон Кузонысь янычарлэн нылыз луод шуыса… Мон али но талы долкамын… Но тапал дунне тодӥсьёсын узыр туноосты ваньзэ тодо, соослы ваньмыз адӟиське. Одӥг ӟучо-мого туно-пеллёды мыным эке эзылыса ик усьтӥз, тон туннэ, гыдыке, татчы, пе, Маскара шур доры, ачид лыктод. Ӧз ӧрекча, курчангы басьтон, шонер вераз «кулэм кикыелы»… «Та ваньбур утчась ки» азьын тынад но, мусо нылоке, ӧрекчаськемед уз лу, котькызьы кыр кеч кадь пыкъяськид ке но… Вылаз ик мон тынэсьтыд уг юа, мон тынад вирыдлэсь гинэ юало. Вай ай мыным кикыдэ, бышкалтом бадӟымзэ чиньыдэ, кызьы ай сое тӥляд шуо, пӧлыкайдэ… Учком, зэмзэ ик-а Джучилэн но Бату ханлэн эксэй вирыз бызе тынад вирсэрад?..

Кӧшкемыт кужымъёс Камитлэсь сюлэмзэ мырӟыло. Вань быгытъёсыз солэн золтӥськизы. Ымнырыз но воштӥськиз – вань пичи вакытэз, кам кужымъёсты сӥлы каронэз, Кузон но Муско сярысь малпанъёсыз, бурлакъёс, буракъёс но ошкуйчиос сярысь пичиысен тодонъёсыз, озынъёс, вузъёс, дуно куос, кун, коньы, коньдон, куно, азвесь, зарни – ваньмыз со куалдэм кадь лӧптыса кыдёке-кыдёке пазьгиськиз… Нырысетӥ интые потӥз вожпотонэз – малы со номыр карыны уг быгаты?.. Ӧвӧл, малы уг быгаты, со быгатэ! Со тодэ, кызьы та «кынмон» улысь потыны, солэн йыраз ваньмыз вамышен-вамышен кылдӥз ни, нырысь ик йырвизь кужыменыз ишкалтоз сӥльсьӧраз бышкалтэм «кынтӥсь венез», собере кужмоятоз сюрлытӥз ветлӥсь инбам но музъем кужымъёсты, пельтоз-сэртоз кынтӥсь «вуколэсь» ӟыгыриоссэ, пертчоз тунгонась кылъёссэ, собере кылдытоз «тыл кымет», ыстоз «тылшарзэ», сӧсыртоз куиньназэс ик ожчиосты, нырысезлэсь йырзэ позыртоз, кыкетӥзэ из борды паньсалоз, нош тӥрен ветлӥсьсэ аслаз тӥреныз ик коралтоз. «Хруст, хруст, хруст!» –каризы ни адями мугоръёс солэн йырвизь выросъёсыз улын!

– Тон мар?! Дугды! Эн выры! Сыл, кызьы сылӥськод! – соку ик пазьгизы солэсь вань йырвизь вамышъёссэ вылӥ дышетӥсьёсыз. – Эн усьты астэ! Эскеры, сӥсъя сое! Тод, кытысь со вуэмын! Кыӵе кужымъёс со сьӧрын?! Мар со утча?! Герӟаськы нырысетӥ монэныз!

– Со Доминиклэн орденысьтыз монах… Вылаз ик Тот Гермесэз эскерись массонъёс пӧлысь… Алхимик… Сьӧд веднаськонэз тодэ… «Сьӧдъёсын» ужа… «Пуаны» быгатэ… Со кыктос… Ӧвӧл эшшо мугорыз вань на… Куака мугорыз… Куиньтос, иське… Ма, соос ваньзы «пуаны» быгато… Ваньзы куиньтосъёс… Юри солы дышетэмын… Куинь мугоръёсын ветло… Юри тапала лыктэмын… Шунды Мумез утчало… – шуак дышетӥсьёсызлы валэктэ Камит, ожчиосты сӥсъяса. – Мыным ке усьтӥськыны уг яра, оло, зэрпалэз соку ӧтёно?.. – эшшо но шузигес юан со доры лыктэ…

– Вунэты! Сыл интыяд! Кынмы! – шуак верало вылӥ дышетӥсьёсыз. – Вунэты Узыбейдэ! Номыр солы уз лу…

Возьыт но кезьыт луиз Камитлы. Улонын номыр огшоры уг луы уга. Со шуак валаз, тӥни малы сое куинь ар Узыбейлэсь люкыса возизы. Угось ӵапак та кузон ныл, Узыбей, луэ солэн ляб интыез… Тӥни малы зэрпал но туж сюлмаськыса, «нылмурт шедьтон» сярысь ӟубистӥз, кудӥз, пе, солэсь вань «визьзэ-куазьзэ» сэстоз шуыса… Шонер, сётсконо ӧвӧл, уг яра солы Узыбеез нырысетӥ радэ кыскыны, шат со понна сое дасязы вылӥ дышетӥсьёсыз. Нюромизы Камитлэн синъёсыз, но синвузэс ӧз быльыртэ… Сӥятӥз со ӟырданы кутскем визьзэ… Шуак тодаз ваиз азьвыл янгышъёссэ, мумы дуннелэсь чонариоссэ…

Куака-кырныжъёс туж улэ лэзиськизы, соин-а, мар-а Камитлы соос кырныжъёслэсь но бадӟымесь потӥзы… Оло валаса, оло валатэк туж сак учко Камит шоры… Нош куинетӥ ожчи Узыбейлэн пӧлыяз пичи пежъянэн бышкалтӥз но вир шапыксэ «кулэм ки тяпа» борды кисьтӥз. «Кулэм ки тяпа» шуак улӟиз… Чиньыссэ отчы-татчы выретэ…

– Зэм но эксэй ныл! – кеськиз одӥгез кырныж-куака, туж умой кылӥз солэсь малпанзэ Камит…

– Кар! – вазизы мукетъёсыз но кырныж-куакаос, шумпотэмзэс ватэмзы луытэк…

Ӟапык, Камит но Узыбей бакомыса учко. Уг лу соослэн выремзы но, ваземзы но, синъёссы гинэ адӟыны быгато, пельёссы гинэ кылзо.  Укыр кужмо та куинетӥ ожчи. Туно ужпумъёсты тодӥсь Ӟапыклэн но, Узыбейлэн но солэсь мозмиськемзы уг луы… «Кызьы – эксэй ныл? Кызьы со пушкын Чингисханлэн бадӟым пиезлэн Джучилэн, Бату ханлэн атаезлэн вирыз?..» – абдыра Камит… Та ивор сое воксё кужымтэк кельтӥз… Кырныж быдӟа куакаослэн куанонзы сюлэмзэ ик бышкалтӥзы, оло.

– Я, кудпала мынӥськом, кудпалан Зарни Мумлэн аватара-мусторез? – юа куинетӥ ожчи «кулэм ки тяпалэсь».

«Кулэм ки тяпа» чиньызэ кам выллане возьматэ.

– Оло уллань? – юа ожчи.

«Кулэм ки тяпа» отчы-татчы шонаське, нош ик кам выллане возьматэ.

– Оло тани та пичи шур пала? – юа ожчи.

«Кулэм ки тяпа» отчы-татчы шонаське, нош ик кам выллане возьматэ.

– Иське, тон зэм но эксэй ныл… Тани кызьы усьтӥське котькуд бубыли аслаз пуртэсысьтыз. Мар, тӥ но, ошкуйчиос, эксэй нылдэс уд тодӥське вал?.. Тодысалды ке, тӥ сое тазьы гинэ ӧй возьмасалды. Но ведь та эксэй нылды котькуд сэрегын мон эксэй ныл шуыса вера вал. Озьыен, мон янгышаськымтэ, шонер утчаськем. Соин ик, эксэй нылоке, табере асьмеос Зарни Мумлэн аватараез доры ӵошенак кошкомы… – пальпотэ ожчи, «кулэм ки тяпазэ» берен сумкаяз поныса но гадьысьтыз бадӟым азвесь кироссэ чупаса. Собере кизэ выллань ӝутэ но куиньпол мыжыксэ кырме…

Шур пыдсысь шуак потэ ошкуй. Олокытысь кылдэм ожчиос сое шуак вутто кам ярдуре. Нюлэскысь потто кык пешкалзэс, ожтӥрлыкъёссэс. Узы ачиз аслаз пыдъёсыныз ошкуе пуксе. Со сьӧры пуксё вань ожчиос. Ваньзы соос 33 кузя. Узыен ӵош табере 34.

– Я, Ӟапык, араты пешкалдэ! Ужа мынам инмар уроме понна! – кеське солы кулэм киен ветлӥсь ожчи, со азе ӟустариен боды куштыса.

Ӟапык вань кужмысьтыз пыкъяське, уг шуккылы тылпоттонзэ, огпала сое сэрпалтэ, но ӟустари шӧдтэк шорысь ачиз гомӟе, киез доры матэктэ, кыллись воргоронлэн киыз аслэсьтыз кылзытэк, ӝуась ӟустари борды кырмиське но аратэ пешкалзэ. Кӧшкемыт гудыртэ пешкал. Пазьгиське Ӟумъя таталэн ошкуез, вань шелепъёссэ ярдурысь ву вылэ пужныса… Нош куамын куинь ошкуйчиос ӝуто мачкорзэс, кытко асьсэлэсь тӧлзэс но сызэм кадь кошко кам вылланне, чебер но мусо Узыбеез сьӧразы нуыса… Кӧшкемыт куака уллё но соос сьӧры кам выллане лобӟе, каллен-каллен пичияса…

Мозмытске Камит музъем борды кынтӥсь кужымлэсь… Юнме ыбылэ со пукыӵеныз, урмем кадь соос сьӧры уйиськыса, мурт ожчиос кыдёкын ини, уг суто соосты ньӧлъёсыз… Кускозяз вуэ пырыса, ву вылэ чабкылэ Камит, нокызьы буйгамез уг лу. Синвуосыз туж пӧсь кошко, ымнырзэ ик суто, миське ке но ымнырзэ кам вуэн, номыр уг юртты солы бӧрдӥсь сюлэмзэ буйгатыны. Узыбей кыдёке кошкемъя, солы секыт но секыт луэ. Чутыр-чатыр позыръяське кӧтыз…

– Малы тон, Ваткае, озьы кариськод?.. – вузэ ошторма пилэн сюлэмыз.

Нош чалмыт пальккаське Ватка. Со тодэ, малы тазьы луэмзэ. «Камит ачиз но валалоз, – пальккасько ву тулкымъёс. – Будон сюресъёс пеймытын гинэ куисько… Нош «вуко бугор» котьку шонер нуэ…»

Малы одно ик Узыбеез соослы лушкано вал? Малы солэн вирыз «кулэм килы» Шунды Мумлэсь мусторзэ возьматэ? Кытысь эксэй вир солэн вирсэраз? Кыӵе кобы йыр сое отчы пыӵатӥз? Кыӵе гур суран та эгырез люказ Камитлэсь пыдлось шӧдонъёссэ ик сутон-ӵушкан понна? Камитэз ваньмыз вӧсь каре, ошкуйчиослэн бызьыса кошкемзы но, Ӟапыклэн тушмонъёслы тыбыреныз кыллемез но, Узыбейлэн аслаз пыдыныз соослэн пыжазы пуксемез но, аслаз вырыны быгатытэк сылэмез но… Тодэ, вала Камит, Узыбеез озьы ветлытӥз со ожчи-монахъёслэн татазы, но озьы ке но солэн йырыз сокем куректэ, вожпотонэз казанысь ву кадь быректэмын, камлэн ярдуре шуккиськись тулкымъёсыз кадь изъёс борды шукыяськыса пӧзе… Укыр со кужмо, куинетӥ ожчи. Туж троссэ тодэ. Сыӵе со серекъяса кошкиз, аслаз ужамезлы куаныса. Но вормоз сое Камит! Котькыӵе масонъёс пӧлысь ке но со лыктэмын! Со али но быгатысал сое вормыны… Но уг яра вал солы ассэ усьтыны. Узыбейзэ ке но солэсь лушказы… Со али но йыраз возе Субэдэйлэсь но Бату ханлэсь кылъёссэ: «Тонэ усьтӥськытон понна азяд уно нальыкъёс-сикыӵъёс пуктылозы, но тон ноку йырдэ ыштыны кулэ ӧвӧл! «Сьӧдъёс» котькуд туно выжыез чаклало! Нош тонэ, Камит, ми та дырозь быгатӥмы возьманы, нош быдэ вуэм берад тон ачид астэ возьманы кулэ! Эн вунэты тыныд уно югыт лулъёс оскиськизы…» 

Камит пушкын кык тыл кужымъёс ожмасько. Огез шуэ: «Тон вормид!» Нош мукетыз шуэ: «Малы Узыбеез сётӥд?» Но Камит азе огпол гинэ таӵе «карнан» ӧз пуктэ ни. Но Камит котьку ассэ «вукарнан» кадь тэгыз возиз на. Со одно ик берыктоз таӵе бышко но мусо легезьпу сяськазэ! Берыктоз но тӥни! Нокин солы та ласянь уз люкеты, юн сое шӧдэ ошторма туно пи…

Камитэн ӵош Ӟапык но мозмытскиз. Аслыз ачиз оскытэк бызьыса со мынӥз ошкуйзэ учкыны. Ярам ай сокем зол тӥяськымтэ, куинь пулэз лӧптэм. Узыбейлэсь сандыкъёссэ но пешкал йӧтымтэ… Но тужгес ӟечез ошкуй ныр азьысь Ошлэн йырыз сӧриськымтэ…

– Остэ, энгек бызара, кытчы мынод табере та ошкуен! – векчи-векчи кышномурт куараен бӧрдэ Ӟапык. Оло ке кубызлэсь туж векчи куараоссэ кин ке кыска…

– Я, я, буйга, ватагай… – татаез кадь ик вазе Камит. Ӟапык куаляк усе солэн зэмос воргоронлэн кадь боз-боз зӧкомем куараезлэсь. Кӧня ке дырлы ымзэ куака кадь усьтыса сылэ…

– Тон шумпоты, улэп кельтӥзы шуыса… – чурыт вера Камит сыӵе ик зэмос воргорон куараен. – Тынад тыбырад собыдӟа тӥр бышкалскемын вал… «Кулэм ки тяпаен» ветлӥсьсы милемын погрытэм ожчиоссэ но, тонэ но бурмытӥз, яраяд кыӵе ке вузэ кисьтыса…

– Малы улэп кылемелы шумпотом?.. Ошкуймес аслам киыным мон, нагалят сыскон, быдтӥ! – сокем кӧшкемыт векчи-векчи куаразэ поттыса шуэ Ӟапык. Та кык куараослэн кык пала воштӥськонзы сокем маскара адӟиське. Но Камит но, Ӟапык но уг серекъяло. Ӟапык пуксе из вылэ, пельпумъёссэ выретыса, векчи-векчи куараен бӧрдэ…

– Мар тынад куараеныд, мар кузь куко чибинь кадь нёриськод? – юа солэсь зӧкомем куараеныз Камит.

– Уг тодӥськы… Кышномурт ӧз каре-а?.. – аслаз векчи-векчи куараезлэсь кышкатскыса, шуак кутэ со аслэсьтыз гадьзэ но мукет воргорон тодметъёссэ…

– Мар? – лекомем куараеныз юа Камит.

– Инмарлы тау, асламез интыяз… – пальыштэ Ӟапык, нош векчи-векчи куараез чик но уг воштӥськы…

– Ярам, тау улӟытэмзылы, куараед тупалоз… – боз-боз вера Камит, меӵак Ӟапыклэн синмаз учкыса.  Собере огпол шонскеменыз ӵоге суй зӧкта бадьпуэз но вань кужмысьтыз сэрпалтэ сое каме…

– Тон мар? – юа солэсь Ӟапык.

– Тау карон ыстӥсько… Ваткалы… – ӟазыртэ Камит, аслэсьтыз туж пыдлось малпанъёссэ быдэстыса.

Ӟапык паймыса учке та ватаман пилэн воштӥськонэзлы. Ма со гинэ ӧвӧл, вань камдур пайме солэн шуак мӧйымонэзлы.

– Та пияш татаезлэсь но катар адями… – ас понназ малпаське Ӟапык. – Со камдэ но дугдытоз, гурезьёсты но ӵошкатоз! Кужымыз зэрпалэзлэн кадь…

– Ошкуймес ӝог тупатомы! Куинь пулэз гинэ пилиськем! Тӥни татын мар мында пужымъёс, воргоронъёс вуизы ке ать-два лэсьтомы! Тӥръёсмы-бычкимы вань! Сир но ӝог ӵыжатомы! – ошкуез эскерыса, ӝутскем куараеныз малы ке кесяськыса ик вераське Камит… Ымнырыз солэн яке лек луэ, яке пальыша, нош куараез нырпыртӥз вераськись Корнос зэрпаллэн кадь…

9-тӥ люкет. Зарни Мум, Кизили Пурт но Эксэй Вир сярысь валанъёс

Шокпотыса огзы бере огзы вуо ошкуйчиос. Ӟумъя батыр ваньзэ соку ик валаз. Лыктыса пизэ ӟыгыртӥз.

– Соос Узыбеез сьӧразы нуизы… – ӟазыртэ Камит, сабыр палашсэ тыпышерен зыраса. Ватаман куаляк усе пиезлэсь куаразэ кылыса, учке шораз но уг тодма сое. Зэрпал кадь, йыг-йыг сылэ пиез, малпанъёсыз но табере татаез доры уг вуо…

– Валай… – шуэ ватаман, пазьгиськем ошкуй шоры учкыса.

– Ӵог монэ, ватаман, та интыям! Аслам киыным ошкуймес быдтӥ! – пыдес вылаз усьыса векчи-векчи куараеныз викыштэ Ӟапык. – Адӟыса ӧм вуттэ, кызьы изъёс сьӧрысь потӥзы…

– Я, я, – ӟыгыртэ Ӟапыкез Ӟумъя батыр. – Тон-а татын янгыш?! Солы пумит номыр каремды ӧй луысал, Кереметлэн со адямиез… Инмарлы тау сӧл-таза кылемдылы…

– Мон уг тодӥськы, сӧл меда мон?.. – векчи-векчи куараеныз бӧтьыртэ Ӟапык.

– Сӧл! – шуэ ватаман, солэсь зарезьчи изьы дурзэ тупатыса. – Камит, нош тон малы юрттӥсьёстэ ӧд ӧтьы?.. – юа со пиезлэсь.

– Мон состы ачим но куаньгатъясал, усьтӥськыны ке ярасал! – чурыт ӟазыртэ Камит.

Номыр пумитаз уг шу ватаман, пальпотэ пиезлэсь воштӥськемзэ адӟыса. Камитлэн синъёсаз валаны луонтэм лыз-лыз тылъёс ӝуатскемын. Визьмыз дорозь но Ӟумъялэн табере вутскемез уг луы. Азьвыл со ваньзэ адӟе вал, вала вал пиезлэсь мар малпаськемзэ. Табере со татаезлэсь но сюлэмзэ шурдытыса сылэ. Ӟумъя ачиз но туно адӟонэныз ваньзэ адӟиз, валаз, кыӵе вирыз понна Узыбеез сьӧразы нуизы. Соослы экэй вир гинэ кулэ ӧвӧл, соослы ачиз эксэй ныл но кулэ… Угось сьӧлыктэм эксэй ныл гинэ Зурни Мум доры пыртӥсь аркаосты ортчыны быгатэ. Храмчиос, шӧдске, тодо сое. Соин ик уз исалэ Узыбеез, уз сапталэ солэсь чылкытлыкзэ… Но, инмарлы тау, ӧз адӟе на соос, кинэ кам дуре кельтӥзы… Табере Усман тата гинэ ӧвӧл, ачиз но Ӟумъя вала ни, Камитэн герӟаськись учыръёс чик но юнме шорысь уг кылдыло шуыса. Табере Камит, туно ожгарчи луыса, аслаз сюрес вылаз султэмын. Нокин сое та сюрес вылысьтыз уз потты. Ваньмыз та югдур со сярысь ивортэ. Узыбеез но, шӧдске, юри тани тазьы солы гинэ ӧвӧл, вань арсавыл калыклы усьтӥзы …

«Уг яра ке вал, валамон…» – Камитлэсь верам кылъёссэ малпаса, ас понназ шумпотэ Ӟумъя.

Ӟапыкен Камитэз кылзэмзы бере ошкуйчиос соку ик пыжзэс люканы кутскизы. Нокудзы Узыбейлэн вирыз сярысь куара но ӧз поттылэ на, чалмыт ужало, котькудӥз, ас понназ эксэй вир сярысь малпаса, аслэсьтыз ужзэ лэсьтэ. «Кулэм ки тяпа» сярысь кылӥзы ке но, нокудзылэн пигонзы но ӧз вырӟы. Угось, татазылэн «куака уллё» сярысь верамез бере ик соос валазы ини, кыӵе адямиос сярысь вераськон мынэ. Огпол гинэ ӧз пумиськылэ та храмчиосын асьме палан но, коми выжыосмы дорын но… Тодо соослэсь быгатонъёссэс. Отын но соос «кулэм киен» ветлӥзы. Отын но кӧшкемыт кырныж-куакаоссы трос яраос соослы кельтӥзы… Но ошкуйчиосты бугыртӥз мукетыз – со Узыбейлэн эксэй вирыз! Нош нокудзы та ласянь уг дӥсьто на ымзэс усьтыны, малпасько гинэ. Укыр шурдыт но кадырлыко усьтӥське соослы Инвожолэн нуналэз, Абалгы сяськалэн оген-оген усьтӥськись бурдъёсыз кадь, оло. Нырысь Вуж Мултан, собере Камитлэн зэрпалэз, собере янычаръёс паранжаен нылзэс усьто, собере вунылъёс пото, собере храмчиос ыбо, собере усьтӥське эксэй вир, тросэз малпало вал со воргорон луоз шуыса, нош со эксэй ныл вылэм… Ошкуйчиос ваньзы возьмало, кин нырысь та сярысь кыл вералоз, лушкемен учкыло татазы шоры: ку ни со таиз сярысь вералоз?.. Ваньзы оло ке номыр сярысь малпаськытэк, паймыса учко Ӟапыклэсь тыбырысьтыз льӧльмыт тэтчась яразэ…

– Мар, уг но висьы шат? –  юало солэсь.

– Туж зол лыдэ, кормалэ ай тыбырме… – сюлворе Ӟапык векчи-векчи куараеныз. Ошкуйчиос кормало, нош солы уг тырмы, вожез потыса кошке писпу борды но зырам вылысь зыра тыбырзэ. Ваньзы серекъяло. Лушкемен учкыло татазы шоры…

Юн куректэ Камит. Но со дыре ик со куректонэзлэсь кытын ке укыр кыдёкын, кытын ке мукет дуннеын. Со уг тодма ассэ. Солы валантэм таӵе кык полдурес шӧдон. Со уг тоды, мар карыны. Солы возьыт но, ӧвӧл но. Солы секыт но, ӧвӧл но. Солы капчи но, ӧвӧл но. Нокызьы со уг быгаты валаны, малы ошкуйчиос серекъяло. Малы татаез но серекъя. Шумпотэ ватаман, пизэ улэпен адӟыса. Ӟапыклэн улӟемезлы но шумпотэ. Векчи-векчи куараезлы но. Пиезлэн пилемъёс дорозь ик ӟазырес куараен тэтчемезлы но.

– Мар со ошкуй! – пальпотыса усьтӥське Ӟумъя. – Асьмеос улэпесь, соиз понна тау! Утизы Ватка но Быдӟым Ош! Нош дятъёс сярысь ке, кыдёке уз кошке! Табере асьсэлэн со ожчиослэн бадӟым сюлмаськонзы кылдӥз!

– Ӧй вала, кыӵе сюлмаськонзы? – сокем-сокем векчи куараеныз юа Ӟапык.

– Ачид шуиськод ук, умой ӧвӧл, куке кышномурт ошкуе пуксе – тӥни марлы со берыктӥз ошкуймес… Нылмуртмы табере дятъёслэн ошкуязы… Вылаз ик, вылаз ик со огшоры нылмурт вылымтэ… – валэктэ ватаман…

Каллен-каллен ваньзы кутско серекъяны. Ватаманлэн усьтӥськемез, Ӟапыклэн сокем-сокем векчи серекъямез – ваньмыз соосты серекъятэ. Кема серекъяло ошкуйчиос. Но уд ваты соослэсь шумпотон мугзэс – со тани таӵе аспӧртэм учырен усьтӥськем эксэй вир! Камит гинэ уг серекъя. Кытчы ке ас пушказ учкыса, из вылын пуке.

Серемез серемен, но югдур серекъяса гинэ уз тупа. Чалмыт учкиз ватаман камлэн бур пала котырсконаз ышись куй сьӧры, собере пиез шоры. Та Ваткалэн бадӟым кӧт лэсьтонэз Ӟумъялы котьку тодаз вайытэ пичи дырыз дыръя кылэм мадез – грек Одиссей батырлэсь Итака шормуӵсэ. Угось таиз но шормуӵ Маскара но Арчикар мувыръёсыныз, ваткаос верамъя – «Така Сюръёсыныз» кужмо мырдӥськыса, бызись камлы пумит сылэ, вань камлэсь ӧрзэ позыртыса. Азьвыл со камез мукет пала позыртэ вылэм, табере тани туала ӧр палаз, сое бадӟым кӧто карыса, кырыжтэ. Соин отӥ пыдлонгес, тэльын, кылемын Ваткалэн вашкала кожез. Отын табере бадӟым тыос пуко. Ӵапак со тыосын котьку лэсьтӥсько вал ошкуйёс но каруб пыжъёс. Али но соосты отын егит ошкуйчиосын ӵош та ужез ӟеч тодӥсь ӧнерчиос лэсьто, собере со ошкуйёсты ожмаськыны дышето. Каруб лэсьтӥсь ӧнерчиос вӧзын одно ик луо крезьчиос, кудъёсыз котькуд учыре кырӟало вашкала мадьёсты. Соин ик котькуд каруб вашкала мадьёс вылын сюриське-куйлаське. Нош котькудӥз егит ошкуйчи нырысетӥ карубъёссэ лэсьтыкуз ик тодэ но ас вылаз куйла вашкала грек инмаръёслэсь но геройёслэсь нимъёссэс, сямъёссэс, учыръёссэс. Быдӟым Троя котырысь котькуд ожмаськон, Одиссейлэн котькуд адӟонъёсыз сокем мур пыӵало соос пушкы вашкала мадьёс но сэбедъёс пыртӥ. Соос ожъёсын бырем эшъёссэс али ке но асьсэ сяменызы вато синъёсазы кык котырес манет поныса… Ошкуйчиос оско, соослы ваньзылы одно ик Стикс шурез куке но потыны кулэ луоз, Харонлы коньдон сётыса… Сотэк соос уз вуэ Быдӟым Кылдысинлэн эксэйлыказ. Малы ке шуоно ошкуйчи ву вылын вордӥське, ву вылтӥ ик кошке, ошкуйёс но карубъёс кадь ик, кудъёсыз дасясько та шормуӵын… Трос ошкуйёс отын дасямын ни, каме потон дырзэс гинэ возьмаса сыло… Нош бадӟым карубъёсты уйёсы дырын-дырын кытчы ке келяло… Кытчызэ, Быдӟым Кылдысин сяна, Усман тата но Ӟумъя гинэ тодо…

Одиссей Ӟумъялэн улоназ мусульманъёслэн Быдӟым Китабзы кадь кадыр луэмын. Ваньзэ со быдӟым ошкуйчиен ӵошатэ. Тани али но Ӟумъя паймыса учкиз пиез шоры, Камит солы азьвыл Одиссейлэн пиез кадь, Телемак кадь, потэ ке вал, табере со вала, со азьын ачиз Одиссей… Ма, пазьгиськем ошкуй но солы шуак Одиссеез тодаз вайытӥз, кӧня пол пазьгиськиз грек зарезьчилэн но койдола нимо куез… Нош со выльысь но выльысь султылӥз. Нош тужгес яратоно интыез Ӟумъя понна, озьы ик вань ошкуйчиос понна, Одиссейлэн берпуметӥ ветлонэз. Аслаз Итакаяз бертон азяз, Одиссей кулэмъёс доры, сопал дуннее, пыре, бадӟым тусьтыяз така вир кисьтыса. Вань кулэмъёс со доры урмыса лыкто курбон вирзэ юыны, анаез но, кудӥз сярысь Одиссей уг тоды на вал, кулэмын шуыса. Нош Одиссей ваньзэсты, анайзэ но, сирен зырам ӝуась чагтылыныз улля. Угось нырысь ик Тиресий гинэ солэсь вирзэ юыны кулэ, Одиссей юри Тиресий доры пыриз. Тиресий соку кулэмын ни вал, но со пичи дырысеныз ик синтэм кылемын, азьпалзэ адӟись луэмын. Тани Тиресий така вирзэ солэсь юиз но вераны кутскиз. Тон, пе, Итакаяд бертэм берад, выльысь кошкод шунды потон пала. Мынод кӧс музъемъёс вылтӥ, зарезьтэм интыостӥ вуод бадӟым кам доры. Тынад пельпум вылад луоз полысэд. Одӥгез воргорон дугдытоз тонэ но юалоз:

– Эй, кыӵе сыӵе куй тон нуиськод пельпум вылад?

Нош тон солы шуод:

– Та огшоры куй ӧвӧл, та койдолалэн полысан куез…

Со луоз нырысетӥез зарезьчи, кинэ тон тапал инкуазьлы тупась койдолаос но карубъёс лэсьтыны дышетыса, паськыт камъёс кузя, зарезьёсы потыны, вузаськыны но ожмаськыны дышетод…

Ӟумъя, вашкала ошкуйчиос кадь ик, юн оске, тани татын со луиз нырысетӥ «кой», нырысетӥ «койдола», нырысетӥ «ошкой» сярысь вераськон, нырысетӥ куйласькон. Ӵапак та палан али ке но «куй» шуо полысэз но лымы мичон куез но, камъёс вылтӥ ветлон пыжез но, крезьчиослэсь кырӟан куйзэс но… Туж-туж вашкала дырысен татын дышетско ошкуйчиос. Кам вылэ потало вунылъёс, вукузёос, су анасыос, бабасыръёс, обыдаос но уно мукет паймымон лулъёс но инмаръёс… Со дырысен Маскара но Пичи Арча каръёс сыло, ог-огенызы споръяськыса но, тупаса но, оло, куд-ог дыръя, ожмаськыса но… Одӥгез Пенелопа пала дур басьтыса, мукетыз Одиссей пала. Со дырысен татын Ватка бадӟым кӧт лэсьтыса шормуӵ кылдытэ… Нош Пенелопа, эксэй кышномурт, воргоронъёс азе адӟиськылэ, камъёс кузя ошкуен ветлӥсь Одиссейзэ возьмаса. Жаль потэ Ӟумъялы Пенелопа, аслаз Танзиля кузпалыз кадь ик. Вань улонзэ со Одиссеез возьмаса ортчытӥз. Угось Одиссейлэн аслаз сюресэз вал. Уг быгаты вал со ас сюрессэ кышномурт карен воштыны. Ӟумъя но уг быгаты. Камит но уз быгаты. Нош ик учкиз Ӟумъя пиез шоры, озьы ик пуке со аслаз паськыт зарезьёсын тулкымъяськись дуннеяз. Синъёсаз гинэ Одиссейлэн малпанъёсыз ӝуало. «Тани кин табере татын Одиссей! – чурыт валаз Ӟумъя батыр. – Ваньмыз та солэн дуннеез, ваньмыз со понна ужа!» Шумпотон но, кышкан но, инмаръёслы тау карон но усьтӥськиз Ӟумъя батырлэн али гинэ ӝуатскем малпанъёсаз.

Ӟумъя палэнэгес мыныса, вольыт из вылэ пыдесъяськиз, ас понназ вӧсь кылъёссэ вераны кутскиз. Инмартэк нокызьы уз лу, вылаз ик мар ке но валантэм ке. Нош туннэ солы куинез валантэм, нырысь ик малы со сокем дыртыса пешкалэн ыбисьёты кутыны кошкиз, кызьы сюриз сыӵе огшоры пӧетэ? Кыкетӥез малы со, нагалят сён, таяз учыре ошкуйчиосты улэп кельтӥз? Азьвыл вуылыкуз, асьме палан но уйпал ӵыжы-выжыосмы дорын но Зарни Аньлэн мусторез сьӧры бызьылыкуз, со нокинэ улэп уг кельты вал… Нош таяз учыре Камит но исамын ӧвӧл, Ӟапык но кулонысь утемын, улӟытэмын… Зарни Анен ӧз пӧрмы бере, оло, табере мукет сямен ужа? Оло «кӧс возён» аслыз каре – уг виылы?.. Сьӧлыко луэмез уг поты… Куинетӥ юанэз солэн вань ошкуйчиослэсь лушкем гыбдась юанэнызы герӟаське, вылды. Со Узыбейлэн эксэй вирыз. Кытысь со потӥз? Малы одно ик та шорын? Вань ошкуймес ик пазьгыса?..

– Узыбеез быдтоно луоз! Марысь мар ке… – шуак адӟиське Ӟумъя азе Усман таталэн бус пыр адӟиськись вужерыз.

– Малы?.. – паймыса юа Ӟумья, из вылэ султэм Усман таталэн вужерезлэсь.

– Зарни Мумлэн мусторез доры храмчиос вуыны кулэ ӧвӧл… – валэктэ Усман тата. – Нош эксэйныл азьын вань капкаос усьтӥсько…

– Но эксэй вирез вань кам вылъёс возьмазы…

– Мон ас кылме верай! – чурыт вераз Усман тата. – Табере тон Узыбей ласянь ас кылдэ вераны кулэ быръем туно пияшлы – Япанчалы. Нош Япанча ачиз быръёз мар карыны… Со киын куинетӥез кыл, солы лэсьтоно луоз та секыт ужез. Тубе Камитэн ӵош ӝоггес мон доры! – бусаське Усман тата…

Ӟумъя секыт лулӟе. Озьыен, тата ас кылзэ вераз. Табере Япанчалэсь но Ӟумъялэсь кылъёссэс возьма. Куинь туноослэсь кылзэс со аслаз улоназ шер кутылэ. Туж секыт учыръёсы гинэ, куке уг дӥсьты ваньзэ ас вылаз басьтыны, куке Кизили Пуртэз но солы уг вера кыӵе сюресэз бырйыны. Усман тата тодэ, Ӟумъя но, Япанча но асьсэлэсь бырйыны быгатозы шуыса. Соин ик со шуэ, быгатӥды ке эксэй нылыз соос киысь ишкалтыны, ишкалтэ. Ӧд ке быгатэ, соку мукет сюрес ӧвӧл… Уг яра соосты лэзьыны Зарни Мум доры, соиз кышкытгес эксэй вирез ыштонлэсь… Пияшез но со туж быгатӥсьсэ быръем. Япанча Кузонын гинэ ӧвӧл, вань Арсавылын тодмо ожгарчи, ногай бурдоосты энераны быгатӥсь ожчиос пӧлысь, со ичи но уз ӝега – ыжез кадь вандоз… Ӧвӧл, ыжез кадь уз ванды… Уг яра эксэй вирез кисьтыны… Соку кекатоз яке ӝокатоз…. Кин, кин, нош Япанча ӟеч тодэ сыӵе ужъёсты. Кӧнязэ ӟуч князьёсты со Муско вӧзысь ик Кузонэ вуттӥз ни. Эксэй вироосыз но соос пӧлын вал. Япанча номырлэсь уг кышка, Мусколэн музъем вылтӥз но аслаз музъемтӥз кадь ветлэ. Нокин сое дугдытыны ӧз на быгаты… Со, кион кадь, визьмо но кескич… Аслаз но Ӟумъялэн Япанчаен ӵош ветлэмез вань…

– Эн быдты нылме, ватаман! – куре Ӟумъяез Гульсилялэн шӧдтэк шорысь со вӧзын кылдэм лул-мугорыз.

– Эн быдты, эше! – шӧдтэк шорысь куре Эшмурзалэн но со вӧзын кылдэм лул-мугорыз.

– Эшмурза?.. – шуак луэ Ӟумъя, ӧжытак могӟыса но собере валаса.

– Озьы, эше, котькудӥныз огпол сыӵе учыр луэ уга… Тужгес но кам вылын… Эн паймы… Ӟучъёс потӥзы ми азе… Сизьым ладьяен… Куинь ладьязэс выйытӥм. Берпум вирмес кисьтытозь сылӥмы… Ӧй ву мон гожтэтме Крым ханлы нуыны…

– Мон уг паймиськы, мон но, Гульсиля но тодэ вал со луоно учырдэ… Гожтэтэт вуиз ке но, ӧз юрттысал… – буйгатэ сое Ӟумъя. – Крымъёсты Иоанн сыӵе зол пазьгоз, пыдтышъёссэс музъеме йӧттытэк, пегӟозы улэп кылемъёсыз… Озьы мон адӟисько…

– Созэ табере мон но адӟисько! Татысен ваньмыз адӟиське вылэм. Табере ачим но Иоаннлы дурбасьтӥсько. Соин гожтэт пумысь чик уг писыраськы, ханъёс сярысь но уг малпаськиськы, лулъёслэн дуннезы ваньзэ туж ӟеч возьматэ, кинэ кыӵе мерттэт татын возьма, нылылэн эксэй вирыз Кылдысинлы пумит ужамысь кайгырисько, – куректэ Эшмурза.

– Кытысь солэн эксэй вирыз? Малы тон, Гульсиля, ноку ӧд поттылы вирыд сярысь?..

– Мон песянае ӧвӧлтэмзэ вераське, малпай… Йырыз солэн кошкылэ ни вал… Узыбейлэн вирыз «ужамысь» гинэ шуэрски… – валэктэ Гульсиля.

– Кыӵе выжытӥ Джучилэн вирыз тӥ доры вуиз?..

– Эбгалэн пиез пыртӥ, Чибинь пыртӥ со ми доры вуэм… Песянае нылызлэн нылыз…

– Эбгаен Дондылэн одӥг гинэ пизы вал. Шонер, Чибинь Чупчи палась кошкиз… Солэн, шуо, ышемез потӥз. Нош Чибинь ышем бӧрсьы – эксэйёсмы но быризы… – шара малпаське Ӟумья. – Одӥгез гинэ тодмо ӧвӧл. Шудбур-а та, бӧрдон-а?

– Малы озьы тон малпаськод?.. – куалектэ Эшмурза.

– Мон уг тодӥськы! – лулӟе Ӟумъя. – Чибинь сьӧрын уно кайгу ветлэ… Юнме шат выжыезлэн вирыз туннэ но пумит ужа?..

– Ми юрттом… – шуак луэ Узыбейлэн анаез. – Эн быдты нылмес, ватаман…

– Кытысь храмчиос Узыбей сярысь тодӥзы?.. – пайме Ӟумъя.

– Утчад ке, ваньзэ тодыны луэ… Верам кылэз быдтыны уг лу ук. Нош Узыбей пичи дырысеныз ассэ эксэй ныл шуылэ вал, озьы ик со будӥз эксэй ныл луыса… Нош соос оскизы, шӧдске…

– Валамон… Асьмеос вӧзамы луыса но ӧм адӟе, возьмамы, ку Зарни Мум эксэй вир шоры возьматоз, нош соос, палэнысьёс, шонерен эксэй вир доры потӥзы… Зарни Мумлэсь мусторзэ шедьтыны…

– Вужерлэн котьку Югытлэсь кужмо луэмез потэ… Соос катъёс шоры уг учко ук…

– Нош асьмеос учкиськом, возьмаськом, ку инмар ачиз асьмелы усьтоз…

– Эше, эн вера быръем пияшлы Узыбеез быдтыны соглаш луэмдэ! – куре Эшмурза. – Эн вера на куарадэ, кельты быръем пияшлы аслыз малпаны…

– Япанча мон вератэк но ӝокатыны быгатоз… Усман таталэн кылыз верамын, Япанча но ке соин соглаш, кык куараос мынэсьтым куараме вормо ни…

– Тон ке ӧд вера, со возьмалоз на… Ми озьы адӟиськомы… Уз дӥсьты эксэй вирез быдтыны… – шуак верало Гульсиляен Эшмурза. – Со тонэ яратэ, со тонэ туж гажа…

– Япанча кылзэ ке вераз, со сое быдэстэ… Усман тата огшоры сое ӧз бырйы. Мон уг тодӥськы али дыре мар шуыны, но марысь мар ке, мон пиме но уг жаля, асьтэос валаськоды… Вӧсяське умоезлы, выжыосты но мед вӧсяськозы…

– Ми вӧсяськиськом… – шуэ Эшмурза. – Ми табере котьку вӧзад луом…

– Кытчы эксэй вир состы нуэ, Маскара карлудэ?.. – юа Ӟумъя.

– Отчы… – дыректэ Гульсиля. – Но отчы озьы гинэ пырыны уг лу ук… Отын сомында пӧетъёс… Вылаз ик котькытын аркаос сыло, нош арка ултӥ сьӧлыкоос уз ортче, соосты ӵашъёз!

– Озьыез озьы… – соос шоры учкыса куаретэ Ӟумъя. – Но Усман тата юнме шорысь уг кышка… Асьме дуннеысь аркаосты ортчыны луэ, жильы лэсьтыса…

– Кызьы со?..

– Монэ Усман тата котьку китӥм кутыса аслаз ӧс янак кусыптӥз пыртэ, озьы ик поттэ… Зэрпалъёс но озьы пырто асьсэ черказы… Соос но Узыбей борды кырмиськыса пырозы… Ӵапак аркатӥ ортчон понна храмчиос нокинэ уг виыло! Тӥни малы! Нош чылкыт адями музъем улысь Арчакаре но пырыны быгатэ…

– Но соос сыӵе сьӧлыко лулъёс, одӥг нуналзэ чылкыт луэменыд лулдэ уд чылкытаты! – оскемез уг поты Гульсилялэн. – Мон адӟисько, кызьы котькуд лулэз «ми пал дуннеысь Кенеш» ӧвӧлтэм сьӧлыкез понна но улӥ мертэтъёсы келя… Аркаез но, «Кенешез» кадь ик, пӧяны уг лу, со ваньзэ адӟе. Вылаз ик Зарни Мумлы кыл вераны тодоно на…

– Гульсиля, соос киын сьӧлыктэм эксэй ныл! Нош сьӧлыктэм эксэй ныл азьын ваньмыз усьтӥське, ваньмыз буйга! Солэн кужымыз пеймытъёсты но шобыртэ югытэныз. Соин ик соос Узыбеен ӵош мыно… – нош ик кышкатэ соосты Ӟумъя. – Капчигес эксэй нылтэк соосты кельтыны Зарни Мум доры лэзёнтэм понна…

– Ой… – куалекто Узыбейлэн анай-атаез…

– Но мон озьы уг малпаськы… Ми сое храмчиос киысь ишкалтыны тыршом… – буйгатэ Ӟумъя. – Быръем пияш но, оло, со дырозь чидалоз на…

Ватаман султэ из вылысьтыз. Кӧня ке учке кам бызён шоры, собере пиез шоры. «Камит ваньзэ кылэ, ваньзэ тодэ…» – пиезлэсь мӧзмыт шумпотэмзэ адӟыса вала ватаман.

– Дыртоно луоз… – капчи но секыт мылкыдын учке со ошкуйчиосыз шоры.

– Валаськом, ватаман, ӝоген вуттом! – ваньмыз понна кылзэ вера Шакай.

– Ваньды кылӥды, мае храмчи утча? – юа Ӟумья батыр ошкуйчиослэсь чидатэк возьмам юанзэс.

– Кылӥмы, ватаман… – вераськыны кутске Эпок. – Зарни Мумлэн мусторез но, эксэй ныл но табере одӥг дунъето луэмын – кыксы ик дунъяны луонтэмесь. Зарни Мумлэн мусторез сьӧрын – инмар эксэйлык, Узыбей сьӧрын – ватка эксэйлык.

– Озьыен кыкзэс ик утёно! – ватса Ӟаньчок.

– Тунсыко нунал та, ватаман, кыксы понна ик йырмес сёто! Вера, ватаман, мар карыны! – ошкуйчиослэсь огъя мылкыдзэс шӧдтэк шорысь шарая Кусни.

– Вера, ватаман! – гурак вазё ошкуйчиос, сюлэмъёссы ик соослэн, оло, ӵош жугиськыны кутскизы.

Ӟумъя батыр ачиз но шӧдтэк шорысь табере валаз: кыӵе мӧзмем ватка калык ыштэм Кузон эксэйлыксэ возьмаса. Кыӵе шумпотэмын Эпок, Пиногор, Мардан, Кусни, Гараньдиван… Егит ошкуйчиос но куанэмын… Кылзэс вератэк чалмыт ке но сыло…

Камит гинэ из вылын пукыса, кам шоры учке, аслэсьтыззэ малпаське. Кыӵе бадӟым вукырет табере усьтӥськиз Узыбей но со вискын! Вань сюлмыз ик бугыръяське Камитлэн, ожчиослэсь ӟырдыт вераськемзэс кылзыса. Но со нокинлы пушсэ уг возьматы, ымнырыз солэн сайкыт но гылыт, нокыӵе шугъяськонэз, вогъяськонэз отын ӧвӧл кадь… Угось таӵе вукыретъёс Узыбей но со вискын котьку вал. Ялан соос я бадӟымазы, яке пичиязы. Кыкназы ик соос таман выль выжъёс лэсьтыло вал ог-огзы доры… Нырысетӥез вукырет кылдэмын вал пияшлэн Ошторма палъёсыз но нылашлэн Кузон карез вискын. Узыбей йырысеныз пыдозяз кар нылпи луыса будӥз, нош Камит арсавыл сямъёс вылын. Секыт вал соослы ог-огзэс валаны. Угось пӧртэм сямен учкизы улон шоры. Мар Узыбей понна пеймыт но алама вал, Камит понна со вал югыт но кадыр. Камит дышетскиз ошкуйчи но туно луыны, нош Узыбеез дышетӥзы эксэй юрт котырысь югдуръёсты но сямъёсты валаны. Нош анай выжыез ласянь Маскара калмезъёс дорысь потӥсь герӟетъёсыз нылашез кыскизы кышномурт туно-пеллё ожгарчиослэн валанъёссы но тодонъёссы пала. Нош аслаз атаез Эшмурза, осман янычар, ялан пыӵатыны тыршиз солы осман мусульманъёслэсь оскон сямъёссэс. Соин ик Узыбейлэн ӧй вал на ас музъемез борды юн-юн герӟаськись выжыез. Пыдъёсыз солэн музъем вылын йыг-йыг уг сыло вал. Кызьы ке тэляса улэ вал со огласянь мусульман дунне пала, кыкетӥ ласянь кузон кышноослэн кильтырес тылсиоссы пала, куинетӥ ласянь маскара калмезъёслэн кышномурт дунне валанзы пала, нош ньылетӥ ласянь инкуазен сётэм аслаз нылмурт шӧдонъёсыз но валанъёсыз пала. Нош Камит пичиысен ик калыкмылэн вашкала осконэз борды думиськиз. Ӧй вал солэн нокыӵе тэлянэз. Соин ик со адӟе но вала вал Узыбейлэсь кыӵе омырен шокамзэ. Камит тодэ вал, малы котькуд вераськоназ, ӵошатоназ Узыбейлэн я Сююмбике, я Гаухаршат хатун я эшшо мукет эксэй кышноос пырылӥзы… Нырысь-валысь Камит сак кылзэ вал сое, нош туж ӝог ваньмыз та солы акыльтӥз. Пельёсыз асьсэос ик солэн ӵоксасько вал, йырыз воксё мукет малпанъёсы кошкылӥз. Куд-ог дыръя Камит валаса ик уг вуы вал, мар пумысен Узыбей та эксэй кышноос сярысь поттылӥз. Озьы ик Камитлы уг кельшы вал Узыбейлэн Маскара карысь калмез кышноослы но кышномурт дышетӥсьёсызлы синмаськыса улэмез. «Соос, эксэй хатунъёс, кышномурт дуннелэсь ожчи кужымзэ кутыса, кыӵе быгатыса кивалтӥзы Кузон эксэйлыкен!» – вань сюлмысьтыз данъя вал соосты Узыбей. Нош Камит яратэ вал Бату ханэз, Субэдэез, Чингисханэз, Тамерланэз, Македонскиез, Невскиез, Улуг Муххамедэз но уно мукет ожгарчиосты. Нош Сююмбике солы аслаз манеръёсыныз но вылтусыныз нырысь-валысь гинэ кельшылӥз. Кузон шоры учконэз паськытамъя, со ӝог валаз, кыӵе тулкымъёс вылэ ужазы та эксэй кышномуртъёс. Солы туж уг яра вал Гаухаршат хатунлэн но мукет кузон хатунъёслэн Сююмбикеез я одӥг эксэй улэ, я мукетыз улэ интыямзы. Туж уг кельшы вал Камитлы Сююмбикелэн кузон ханшаосын соглаш луэмез…

– Но сотэк солэн кивалтэмез ӧй луысал! – чутрак пумит луэ вал Камитлэн пыкъяськемезлы Узыбей. – Малы тон соосты сокем адӟемпотостэм кариськод? Соос туж сӥё-дано кышномуртъёс! – сылӥз со ас малпанъёсыз вылын.

– Нош мон озьы уг малпаськы! – огпол чутырак сое вандӥз Камит.

– Малы?.. – синвуаськыса ик юаз Узыбей.

– Малы ке шуоно Гаухаршат хатун но, Сююмбике но зэмос югдурез валатэк крымъёс пала ужазы, нош кулэ вал Муско пала ужаны. Кылсярысь, Ханша Норсолтан хатун музэн. Кин, кин, нош Норсолтан хатун вала вал, мар со Кузон Базар, мар со вузаськон сюрес. Со тодэ вал, мар со Муско но мар со Крым. Со вала вал, малы Крымъёс котьку ожмаськон утчазы, нош Мускоос тупаса улонэз… Соин ик со туж ӟеч кусыпъёс возе вал Муско эксэйлыкен… Соин асьмеос соку туж ӟеч улӥмы, Кузон кар но туж ӝог ӝужаз, кужмояз, узырмиз. Даныз солэн вань дуннее вӧлмиз…

– Кытысь тон та сярысь тодӥськод?.. – туж паймиз соку Камитлы Узыбей.

– Монэ ваткаослэн воргорон дышетӥсьёссы но воргорон тунооссы дышетӥзы… – пальпотӥз Камит. – Соос котьку ӟечгес тодӥзы зэмос кунлык ужрадъёсты… Нош тынад кузонысь я маскараысь кышномурт дышетӥсьёсыдлэн уггес сузьы йырвизьзы сыӵе валанъёс дорозь. Соос лулӟыло гинэ, ой, кыӵе чебер вал Сююмбике, ой, кыӵе визьмо вал Гаухаршат! Нош кӧня сюрссэ асьме палась нуныосты крым бигеръёс та эксэй кышноос сьӧрын османъёслы но мусульман арабъёслы вузазы, соослэн кылэмзы но ӧй вал. Мар каризы османъёс со нуныосын, созэ но соос ноку ӧз тодэ…

– Нош мар каро вал со нуныосын? – паймыса юаз Узыбей.

– Ваткаос пӧлын котькуд пичиез но тае тодэ… – серектӥз Камит. – Ныл нуныосты султанлэн яке солэн пиосызлэн гаремъёсазы дасяло, нош пи нуныосты, атайдэ кадь, янычар каро яке уар… – верамез потытэк валэктӥз Камит.

Кема учкиз Узыбей бадӟымесь синъёсыныз Камит шоры. Солэн оло вань мугорыз юзыр-кезьыр луиз. Тужгес но атаез сярысь кылыса.

– Соин-а, мынам атае, номыр уг вера ас анаез но атаез сярысь? – шуак, шӧдске, валаз соку Узыбей. – Со уг тоды вал, соин номыр соос сярысь вераны ӧз быгаты, уг тоды вал кытын вордскемзэ но, кыӵе аре, кыӵе толэзе, кыӵе нуналэ, кыӵе калыкысь та дунне кылдэмзэ но… Со туж кӧшкемыт ук…

– Озьы… Мар зэм со зэм… Нуныосты гинэ ӧвӧл, кӧня егит пияшъёсты, кӧня егит нылъёсты сюрсэн-сюрсэн уар карыса крымъёслэн ляльчиоссы отчы вузазы… Лыдпусъёссэс тодӥд ке, пунэм йырсиосыд пежырскозы… Уйёстэ кӧлэмед уз лу… – каллен гинэ ватсаз на Камит. – Кузонын со сярысь уг верасько… Нош ми палан верало озьы, кызьы вань…

– Мынам но потэ воргорон дышетӥсьёстэ кылзэме… – шӧдтэк шорысь чурыт вераз Узыбей. – Тодэме потэ Норсолтан хатун сярысь, крымъёс сярысь, нуныосты вузасьёс сярысь, кам сюресъёс сярысь, ваткаос сярысь, янычаръёс сярысь, мынам ваньмыз сярысь тодэме потэ!

– Но тон уд быгатӥськы шат Кузонысь Никонлэн несториан черказ ветлыны?..– паймыса юаз Камит. – Туж тросэз Кузонын со доры ветло, нылъёс но пӧлазы трос. Никонлэсь дышетскон юртъёссэ ваткаос но туж гажало. Со туж визьмо но ӟеч дышетӥсь. Со Византилэсь но, Римлэсь но вераськон кылъёссэ тодэ. Со вить чиньызэ кадь тодэ, кыӵе предметъёсты дышето мусульманэ выжем арабъёс, туркъёс, шунды пуксён палась орденъёслэн университетъёссы…

– Монэ Никон доры но, солэн несторианъёсыз доры но атае ноку уз лэзьы… – лулӟиз Узыбей.

– Соку тон Мамадыше лыкты, анаедлэн вордӥськем палъёсаз. Отчы, кытын мон али дышетскисько… – шуак кырмиз Узыбейлэсь мылкыдзэ Камит. – Мамадышын туж золэсь мактабъёс но кюттабъёс дышето. Оскы мыным, соос трослы ӟечесьгес кузонысь медресэлэсь но. Тон соку ик валалод, кыӵе соос висъясько кузонысь мусульманъёсты дышетон юртъёслэсь. Вылаз ик туэ Никон но отчы лыктэ несториан школазэ усьтыны. Тапаласен атаед уз адӟы со доры ветлэмдэ… – туж кескич пальыштӥз Камит. Угось та малпан со понна тужгес но ӟечез вал. Узыбей Мамадыше лыктӥз ке, соос ӵем пумиськылозы. Малы ке шуоно ачиз но Камит Никон доры ветлоз…

Камитлэн ыстэм пукыӵ ньӧлэз соку ик ас ужзэ лэсьтӥз. Узыбей со аре ик Мамадыше вуиз. Анай-атаез чик но талы ӧз пумитъяське, шум гинэ потӥзы. Угось анаез солэн вань вирсэръёсыныз герӟаськемын вал Мамадыш палась ватка улонэн. Нош Кузон эксэйлык котырын соку кышкытэсь югдуръёс кылдӥзы. Кузонэн кивалтыны турртись ханъёс вискын туж ӟырдыт ожмаськонъёс мынӥзы. Огъёсыз ханъёс Муско пала дурбасьтӥзы, мукетъёсыз Крым пала. Эшмурза ачиз но малпаське ни вал нылзэ Кузонлэсь палэнэгес ватыны. Кузонъёс та кышкытлыкез адӟытэк ӧз улэ, соин тросэз асьсэлэсь нылпиоссэс келязы ватка котырысь дышетскон юртъёсы. Тӥни озьы кык но ӝыны ар ӵоже Камитэн Узыбейлы ӵош дышетскыны шуд усиз. Мукет кузон нылпиос кадь ик, Мамадышын гинэ соос ӧз пуке, трос интыосы ветлӥзы дышетскыны. Туж мур пытьы кельтӥзы Узыбейлэн сюлмаз Мамадышысь но, Албугоысь но, Булгарысь но, Билярысь но, Пичи Арчаысь но, Маскараысь но дышетӥсьёс. Кузон нылаш туж ӝог валаз, кыӵе со ваткаослэн аспӧртэмлыксы, кыӵе узырлыкез возё кам сюресъёс, кыӵе тулкымъёс ӝуткало Кузон эксэйлык ужпумъёсты. Угось палэнысен ваньмыз туж ӟеч адӟиське. Татысен гинэ со валаз, малы Кузонысь дышетӥсьёс уг верало сое, мае ваткаос пичи дырысенызы ик тодо. Валамон ини, Узыбей туж ӝог воштӥськиз, солы вань дунне выль сямен усьтӥськиз. Никон дэмламъя Узыбей но Камит эшшо куд-ог кузон эшъёсынызы ӵош ветлыны кулэ вал огаз аре Быдӟым Новгородэ, Нукратэ, Владимире, Муское, Смоленске, Пскове, мукетаз аре Асьтарканэ, Крыме, Киеве, Византие… Собере вуылоно вал Бухарае, Самаркандэ… Дышетскисьёслы сыӵе сюресъёсты ортчыны луонлык кылдытэмын ни вал Бату хан вакытэ ик, оло солэсь но азьвыл. Котькуд кун яке кар шумпотыса пумита вал асьсэ доры кыдёкысь тодон-валан басьтыны лыктэм дышетскисьёсты. Угось мукет кунъёсын яке каръёсын выль кусыпъёс кылдытон, выль вузаськон сюресъёс усьтон, ог-огдэ тодон, ог-огеныд тупаса улонэз юнматон котькуд эксэйлык понна туж дуноез луэ. Соин кам сюресъёстӥ ӵемысь ветлӥзы дышетскисьёсты яке дышетӥсьёсты отчы яке татчы нуллӥсь пыжъёс. Котькытын сыӵе пыжъёсты гажаса пумитало вал. Нокин соосты ӧз иса, ӧз тала. Воръёс но кышкало вал сыӵе пыжъёсты дугдытыны. Угось соосты талан черкъёсты талан кадь йыртэман уж луэ вал. Сыӵеосты интыязы ик кесязы. Соин дышетскисьёслы котькытын сюрес усьтэмын вал. Нош кытын ву сюресъёс ӧвӧл, музъем вылтӥ дышетскисьёсты нуллӥзы юри таӵе учыръёслы дасям караванъёс.

Но Узыбей Кузоназ бертэмез бӧрсьы нокыӵе ивор вератэк, куинь арлы ышиз… Табере Камит тодэ, малы со ышиз. Но соку Узыбейлэн тодмотэме «озонаськонэз» сокем курадӟытӥз Камитэз. Али ке но со туж жаля, солы Никонэн суредам сюресъёсты Узыбеезтэк ортчоно луиз шуыса.

Нош табере тани – нош ик выль кырет кылдӥз, Узыбей – эксэй ныл… Озьы-а, тазьы-а, марзэ меда со Камит понна воштэ? Конечно, ватагайёс понна Узыбей кема-кема возьмам зэмос эксэй вир, кудӥз шудбур кадь ӝуатскиз соос азе, удмурт эксэйлыклэсь вань вашкала данзэ возьматыса. Уг, вир уг пӧя, ваньмыз син азьын луиз… Ваньзы табере чурыт тодо: Узыбейлэн вирсэраз зэмос эксэй вир бызе – нош со ошкуйчиос понна тужгес но дуноез. Угось ваньзы тодо вашкала туноослэсь верам кылъёссэс. Эксэй вирзэс ваткаослы куке-соку ачиз Зарни Мум возьматоз шуыса.

Ошкуйчиос котьку тодазы возизы та луоно учыр сярысь, соослэн ватэм азвесьёссы вылын котьку гожтэмын вал: «ватка эксэйлыклэн ваньбурез».

«Нош кытчы, кыӵе кар вӧзы тон со эксэйлыкез ӝутод? – малпаське Камит. – Кузонэз уд берыкты ни. Чупчи котырын но кыкетӥзэ уд кылдыты. Кыдёкын со вузчи сюресъёслэсь. Ватка кар но солы уз тупа. Со но кыдёкын. Со но ӝужаны уз вормы. Нош Кузон вӧзысь Арча укыр пичи, со Кузонлэн пекляез гинэ. Куд-огез уло ке но таӵе малпанэн, Арчаез уз лу ӝутыны, со Кузонэз гинэ возьманы кылдэмын. Камлэн ярдуръёсаз но сыӵе эксэйлыкез уд юнматы. Сопалан мукет калыкъёс кузёясько. Соку кык каръёс гинэ кылё, одӥгез Бату ханлэсь вужерзэ возись Булгар кар, мукетыз вашкала осконъёсын улӥсь кадыр Албуго…

Камитлы кыкетӥез кар трослы матынгес потэ. Но сётозы-а кузонъёс сыӵе эксэйлыкез та каръёс котыре ӝутыны, кызьы со шоры учкозы Крымысен, Асьтарханысен, Сибырысен, Мускоысен? Вот угось… Ӧвӧл нокыӵе чурыт оскон… Камит соглаш татаеныз, кыле возьманы Мусколэсь кужмо кизэ. Иоанн одно ик пазьгоз Крымез но, Асьтарханэз но, Кузонэз но, ӵапак соку оскон кылдэ пичи эксэйлыклэн ӝутсконэзлы… Укыр пичи ке но солэн гомӟыны ӧдъясь тылыз, но сое ӧвӧл шуыны но уг луы. «Мар карод, ӧвӧл на тынадэз эксэйлыкед, эксэй нылаше мынам, Ханша Узыбей хатынэ… – мӧзмыт пальыша Камит. – Вылаз ик табере тонэ лушказы… Но уз лу соос сямен, Камит одно шедьтоз, кызьы тонэ берыктыны…»

Ӟумъя батыр валаз пиезлэсь мар сярысь малпанъёссэ. Но солэсь саклыксэ мукетъёсыз но лулъёс кыскылӥзы. Гульсиляен Эшмурза сьӧрын но, адӟиз Ӟумъя батыр, вань арсавыл лулъёс учко та учыр шоры… Ваньзэсты та югдур бугыртӥз, Кылдысин дуннее кошкемъёссэ но…

– Эн быдттэ Узыбеез! Со берпуметӥ эксэй вирмы! – куро Ӟумъяез кулэмъёс.

– Зарни Мумлэсь улӟылон мугорзэ но эн сётэ! – куро Кылдысин эксэйлыке кошкем куалаос.

– Нош кытын со Зарни Мумлэн мустор мугорыз?.. Кытчы нуэ храмчиосты Узыбейлэн вирыз? – шӧдтэк шорысь ошкуйчиосты сайкатыса юа ваньзэ саклась Камит.

– Ачиз Зарни Мум кыдёкын, со доры нокинлэн вуэмез уз луы… – валэктэ Былай. – Мукетыз ужпум, со асьме дуннее пӧртэм мугоръёсы, мусторъёсы, улӟылыны быгатэ, кытчы со ӵемысь потылэ… Нош тапалан ӵемысьгес со потылэ калмезъёслэн Маскара кар шоразы… Отын, Маскара кар улын, Пичи Арчикар вӧзын, вань шуо солэн туж вашкала мусторез, зарнилэсь кисьтэм мугорыз…

– Со доры ик та 33 куртчангыос мыно… Нырысетӥ Ву соослы кулэ, Ву доры вуыны туртто… Ева доры… Адамлэсь нылпиоссэ сӧрыса вормон понна… – шӧдтэк шорысь векчи-векчи куараеныз шуэ Ӟапык.

– Малы тон озьы малпаськод? – юа Камит.

– Мон уг малпаськы. Мыным Ву вера… – векчи-векчи куараеныз валэктэ Ӟапык.

– Кыӵе Ву тыныд вера?.. – паймо ошкуйчиос.

– Ӵапак со Ву, кудӥз мынам вирам пыӵаз, тыбырысь вурыс шортӥм… – ваньзэсты паймытэ Ӟапык векчи-векчи куараеныз. – Ву котькытчы Вуэ, Ву котькытчы пыӵа, котькытчы Вуттэ. Ву гинэ та дуннеын ваньзэ тодэ. Ачиз Ву ик Вае, Ачиз Ву ик нуыса кошке, Вуоно дыр – Ву нуоноез, нош ортчемез дыр – Ву нуэмез – Вунэмез. Ву со ачиз дыр. Ву ик вае улонэз, ву ик сое ас сьӧраз нуэ… Ву куке-соку, вашкала дыръя, «Ва» нимаське вал, отысь кылдэ Вакыт, Вапум, Валан Валлян, Вашкала, Ваньлык, Ваньбур, Ева. Нош Ева – вашкалаез Зарни Мум, кудӥз Ваньзэ Вайыны быгатэ аслаз нырысетӥ Вуосысьтыз – Ваньзэ но, Вунэмзэ но, Вуонозэ но…

Кема учко Ӟапык шоры ошкуйчиос… Ватаманзы но чалмыт гинэ ас понназ малпаське. Оло ке быдэс дунне усьтӥськиз Ӟапыклэн верам кылъёсаз.

– Зарни Мумлэн зарнилэсь кисьтэм мугорыз доры храмчиос вуизы ке, мар луоз? – шӧдтэк шорысь юа солэсь Ӟумъя батыр.

– Зарни Мум киын нырысетӥ дунне Вулэн серметэз, Со возе ас мертэтъёсыныз Ву дуннеез, нош Ву дунне возе Кӧс дуннеез, нош Кӧс дунне возе калыкъёсты, нош калыкъёс возё инмаръёсты… Асьме вӧсясьёсмы утё гинэ Зарни Мумез, нош та храмчиос Зарни Мумез асьсэ вылэ ужатыны туртто… Соос ваньзэ тодо Зарни Мум сярысь… Ева сярысь, Венера сярысь, Исида сярысь, Афродита сярысь, Кама сярысь, Яра сярысь, Рая сярысь… Соосты ачиз Керемет дышетэ, – кӧшкемыт вера векчи-векчи куараеныз Ӟапык. – Нош Керемет, кемалась ини вань Ву кужымез басьтыны турттэ. Нош Ву кужымез ке со басьтӥз, соку со ваньзэсты ас палаз берыктоз! Дыр пушкы пыӵаны быгатоз. Инмаръёсты но зэрпалъёсты кужымтэк кельтоз! Дунне вылтусэз воштоз! Кезьыт тылэн куалекъясь дуннелы берыктоз, асьмелэсь шуныт сётӥсь чылкыт тылмес быдтыса но улон сётӥсь Евамес, Вамес, Вумес ас кияз кырмыса…

– Зарни Мум доры матэктыны уг лу, дыр, ук! – кышкатскыса шуэ кудӥз ке ошкуйчи. – Со матэктонтэм ватэмын!

– Трос амал вань со доры матэктыны… – нош ик векчи-векчи куараеныз валэктэ Ӟапык. – Мыным со сярысь Ву вера. Вылӥ Дуннеын улӥсь Зарни Мумлэн, асьме улон дуннемылэн карасаз васькон уно мугоръёсыз вань. Соосты асьмеос «оброс мугор» яке калмез кышноос сямен «мустор» яке ведаосты тодӥсьёс кадь «аватара» шуиськомы, соос асьме палан одӥг гинэ ӧвӧл… Зарни Мум со мугоръёсаз ваське но «улӟе», асьме азе кылдэ. Зарни Мумлэн мустор мугореныз асьме палан кышномуртъёс гинэ вераськыны быгато яке улошоос. Соин ик храмчиослэн эксэй нылтэк но вань на Зарни Мумлэн «мустор» азяз потон амалзы…

– Мар, соос – улошоос?.. – шуак луэ Ӟумъя.

– Улошо карыны астэ кема ӧвӧл… Мынам кылэме вань вашкалаослэсь Кибела инмар кышнозэс, кудӥзлэсь храмзэ улошо пиос гинэ чаклало вылэм… Шуо – егит пиос, асьсэды Кибелалы сӥзьыса, асьсэлэсь воргорон арбериоссэс вандыса яке ишкалтыса пуныослы зыргалто вылэм… – векчи-векчи куараеныз серекъя Ӟапык, собере шуак ватса. – Вань на мукетыз но арбери, кудӥныз Зарни Мумлэн «мусторез» доры туж капчи матэктыны луэ – со Усман таталэн Кизили Пуртэз… Нош туннэ Инвожо нуналысен, Кизили Вожлэн Ыбесэс усьтӥськемын… Соин Кизили Пуртлэн али кузёез ассэ Кизили Пуртлэсь мозмытон вӧсьсэ лыдӟиз ни, сое котькин табере басьтыны быгатэ… Со вӧсез лыдӟем бере, Пуртлэн лулыз, шуо, джин кадь луэ, кудӥз горшоке печатламын… Кин нырысь горшок бордаз зырӟиськиз, со ик кузёез луыны быгатэ… Нош тӥ ваньды тодӥськоды, Усман тата туннэ Кизили Пуртсэ выль туноослы сётыны турттэ, со та сярысь ялӥз ни вань удмурт туноос азьын… Озьы кылдытэмын сэбетэз, Пуртлы дэмлаське куинь егит туно, нош Пурт соос пӧлысь одӥгзэ аслыз быръе, мукетъёсыз Быръем Тунолэн юрттӥсьёсыз луо… Озьыен, та храмчиосты со Пурт доры но лэзьыны уг яра… Пуртмес асьме кие кельтыны турттӥськомы ке…

– Уз быгатэ, дыр, ук Кизили Пурт но, Зарни Мум но соос пала ужаны?.. – ваньзылэсь юанзэс юа егит ошкуйчи.

– Быгатозы! – ваньзэсты куалектытыса шуэ та дырозь чалмыт пукись Камит.

– Кызьы быгатозы?.. – бакомо ошкуйчиос.

– Пурт но, Зарни Мум но котькин пала ужаны быгато… – валэктэ Камит. – Зарни Мум сое гинэ быгатэ, мае быгатэ солэн та дуннеысь «мустор-аватараез». Нош со яратонэн герӟаськемын… Яратыны гинэ быгатэ… Нош ваньзылэн яратонэн герӟаськем инмаръёслэн «аватараоссы» яратыны гинэ кылдытэмын… Соин ик соос нокинэ уг люко, асьмеос кадь «сьӧлыкоослы» но «сьӧлыктэмъёслы»… Соос ярато сооссэ но таоссэ но. Яратытэк соос уг быгато… Озьы ик Пурт но со киын луоз, кин нырысь со борды йӧтскоз…

– Кытысь тон тодӥськод? – интысьтыз султэ Ӟапык.

– Варфаламея озьы мадиз… – валэктэ Камит.

– Кыӵе Варфаламея? – юа пиезлэсь Ӟумъя батыр.

– Варфаламея со «Хазар вакытысь» Зарни Мумлэн нимыз… Сое малы ке туж адӟемпотостэм каризы, хазар каганэз улляса, хазаръёсын кивалтыны кутскем «ӵуж чалмаос», котькуд вӧсяськон кушъёссэ, мусторъёссэ тӥязы-кесязы, соин ик «зарни аватаразэ» кинъёс ке асьме пала вуттӥллям, со дырысен со асьме дорын… – валэктэ Ӟапык. – Ваньзэ шонер вера Камит… Кылме ӵогыны сётӥсько! – векчи куараеныз азинтэ со. – Инмаръёслэн ваньмыз мукет сямен, чик но асьмелэн кадь ӧвӧл. Иллион понна ожмаськонын инмаръёс соосызлы но таосызлы но грекъёслы одӥг кадь юрттӥзы. Атай Инмар но котькудзэ пизэ яратэ, «сьӧдзэ» но, «югытзэ» но… Нош Керемет но Кылдысин – агаен вынъёс… Кыксы ик соос курыны быгато, нош котькудӥзлы курисьлы сётӥське… Юнме шат асьмеос соизлы но таизлы но одӥг кадь ыжпи вӧсяськомы?.. Озьы ик, Зарни Мум но уг быгаты сётытэк… Со ваньзэсты огкадь яратэ… Ваньзылы огкадь сётэ…  Сое асьмелы секыт валаны, но со озьы. Озьы ке ӧй луысал, сыӵе пыдло сое ӧй ватысалзы, ӧй лэсьтысалзы со азе ӵашйись ӧс-капкаос, тыл кыметъёс…

Ошкуйчиос чал-чал луизы. Оло ке вераськемзэс кин ке кылӥз. Оло ке кылӥзы соосыз но, кинъёслы та сярысь кылыны уг яра вал. Ваньзы ошкуйчиос куалектӥзы… Ӟапыклэн векчи-векчи куараез кытчы ке пыдлось шыкысъёсазы ик йӧттӥськиз кадь… Ӟумъя батыр но, оло, али гинэ троссэ аслыз усьтӥз Зарни Мум сярысь, али гинэ со валаз, малы аслыз но нылкышно нимез кушизы… Солы шуизы: нылкышно инмаръёслы но матэ луон понна. Воргорон, нылкышно нимез нуллэ ке, нылкышно инмаръёс со шоры мукет сямен учкыны кутско. Оло соин, Ӟумъя кӧня пол Ваткалы вазиськиз, Ватка котьку солы юрттӥз. «Ӧвӧл… – ас понназ малпаське ватаман. – Чик но юнме уг кышка Усман тата… Вань татын марлэсь кышканы…»

Шал-шал луиз ошкуйчиос пӧлын… Кам тулкымъёс но оло дугдӥзы ярдуръёс борды чабкылӥськемысь…

– Макем ӝоггес ми Камитэн Усман тата доры вуомы, сокем со асьме понна ӟечгес, шӧдске… Усман тата ӝегатэк милемды ас дораз тубыны косӥз, – шуак вераз Ӟумъя батыр.

«Малы ӟечгес?» – татазэ валаны турттэ Камит. Солы та вань сюрес, шӧдтэк шорысь, Исааклэсь татаеныз ӵош инмарлэн курбон изъёсыз доры мынон сюрессэс тодаз вайытӥз… Юзыр-кезьыр луиз солэн малы ке мугорыз…

– Азьпалан, Маскара нюлэслэсь кӧто ярдурзэ котыртыса, кам бадӟым позыр лэсьтэ! – луо вылэ суредаса, шуак валэктыны кутскиз ватаман. – Асьмеос татын сылӥськомы. Камлэн бур палаз. Соос та позырез кема ортчозы, малы ке шуоно туж кужмо ву бызён соосты камлэн паллян ярдураз зӥбоз… Нош отын нокыӵе тӧлъёс ӧвӧл, кызьы тодӥськоды, отын Ӟапыклэн тӧлэз но ужаны уг быгаты, нош ву туж зол кошке. Вань ӟигарзы быроз храмчиослэн полысъёсын ужаса. Нош тӥ тодӥськоды, кызьы со позырез бур пал ярдуртӥ капчи ортчыны…

– Тодӥськом ватаман! Ми ошкуймес бур палтӥз нуомы! Ӝог соосты уйёмы! – шуэ Шыкмет, ошкуйчиосын ӵош ватаманлэсь суредъёссэ учкыса.

– Храмчиосты, мон малпамъя, Узыбейлэн вирыз, тани татчы «Паньгам» нёжалэ вуттоз. Отын сылэ, мынам кылэмея, самой матысез Зарни Мумлэн вӧсяськон кушез, Зарни Мусторез. Со кушез сизьым ыбесъёс но вить кыметъёс возьмало. «Паньгам» но, шуо, тодӥсьёсын туж кужмо возьмась каремын… Нош пыжзэс соос тани татчы кельтозы… – азьланьтэ Ӟумъя. – Возьмасьёссэс но татӥ ик пуктозы. Нош тӥ ошкуйдэс татчы пыртэ. Нюлэс пушкы. Собере возьмасьёссэс думылэмды бере, пыдберзы кузя тубоды… Эн вунэтэ Паньгамтӥ ортчыкуды вӧсь кылъёстэс вераны…

– Валамон, ватаман… Иське думылоно гинэ?.. Соос эксэй вирез кисьтӥзы ук? – юа Былай.

– Виылоно ӧвӧл, виылӥды ке, уиськемдэс шӧдозы… Вылӥын поръясьёсыз… Ӟечгес луоз думылэм храмчиостэс сьӧрады басьтыса…

– Валамон, ватаман… – шуэ Кусни, тӥреныз ӟок пужым корез лусйыса.

Ваткаослы сокем валэктыны кулэ ӧвӧл, соос вань ужъёсты пичиысен тодо. Ваньзы шульк-шальк! гинэ тӥрен ужало. Пулё сирез ӵыжато. Ваньзы валазы, ватаман таяз учыре туж зол оскиське соослы. Ӟапык гинэ ялан учкылэ ватаман шоры, оло мар ке верамез потэ?..

– Озьыен, нырысь ик ишкалтоно соос киысь эксэй нылмес. Нош ку эксэй нылды кияды луоз, соку эн кельтэ эксэй вир кисьтӥсьёсты!

– Валамон, ватаман! – шуо ошкуйчиос.

– Эшшо одӥгзэ тодыны тӥ кулэ, эксэй нылэз ыбес дорозь мозмытоно… – азьланьтэ ватаман. – Ӧдӥг ыбесэз но со медаз усьты!

– Оскы, ватаман, ми сое мозмытом! Ошкуймы дась! Али ик потомы! – вазе Шыкмет. 

– Иське ми Камитэн Кикытэле, шонерен Усман тата доры…  Кизили Пуртэз но соослэсь утёно… – лад-лад вера Ӟумъя, тӥр пуртъёссэ эскерыса. – Ваньмыз-а валамон?

– Валамы, ватаман! – йырзэ шонто ошкуйчиос.

– Шыкмет, котьку сямен, мон интые кыле, – чурыт вера ватаман.

– Валамон! – шуо ошкуйчиос.

– Кошким, казак! – небытак  учке Ӟумъя пиез шоры.

Ӟапык чидатэк ветлэ, мар борды кутскыны уг вала ни… Соиз борды кутске, таиз борды…

– Уг басьты мон тонэ, Ӟапык, Усман тата доры. Эн ик малпа! – чурыт вера ватаман.

– Мынам туж тодэме потэ, мар Ву мыным кисьтӥзы? – сюлворыса учке Ӟапык ватаман шоры.

– Мынам но тодэме потэ! – чурыт вера Ӟумъя батыр. – Мон со сярысь одно юало татамылэсь. Нош со «Вуэд» кусып ке возе «кулэм ки» кузёен?.. Соку мар?.. Усман татамес солы сётод?!. Кизили Пуртэз?!.

– Вождэ эн вай, ватаман, шонер тон малпаськод… – куаляк усьыса кадь, пешкал вӧзысь из вылэ пуксе Ӟапык. – Соку дыръя тӥ дыртэ, ватаман, соос Кизили Пуртэз но шедьтозы… Кырныжъёссы сак лобало…

«Зэм но, кыӵе «Ву» соос сьӧразы нулло? Кытысь сое басьтӥзы? Малы со адямиез но улӟытэ? – Ӟапык шоры учкыса, аслэсьтыз ачиз юа Ӟумъя. – Малы «Ву Кылэз» тодӥсьёсты утчазы Вуж Мултанын? «Вуэн» вераськемзы потэ, нош «Ву» уг вераськы соосын?.. Нош Ӟапыкен вераське ук! Малы ваткаос «Вуэн» вераськыны быгато? – амалтэк пальпотэ ватаман. – Оло, зэм но ваньмыз со Зарни Мумен герӟаськемын, соин Зарни Мум котыртӥ бергало храмчиос?..»

Но Ӟумъя батырлэн дырыз ӧй вал ни малпаськыны. Камит вань малпанъёссэ солэсь кылӥз, соин сэрен ӧжытак паймиз, азьвыл со уг кылы вал солэсь малпанъёссэ. Мар сыӵе соин луиз, Камит ачиз но ӧз вала на. Огзэ гинэ юн со аслыз валаз, уз басьтэ соос Ӟапыкез… Зэмзэ но ук со пушкын валантэм Ву табере пуке… Нош кин со Усман тата, Камит уг тоды на, но табере вала, ӵапак со мар но со усьтыны кулэ солы… Соос, шӧдске, Маскара но Арча кар пала уз мынэ. Камит ӟеч тодэ та интыосты, со каръёсы шормуӵлэн вылӥ палтӥз пыроно. Нош соос тапаласен нюлэсъёсы тубозы

– Кошким! – кужмо киоссэ капчи гинэ пияшлэн пельпумаз понэ татаез. Солэн сьӧд-сьӧд тушыз одӥг но пурысьтамын ӧвӧл на, питыръяськыса ик азьпала урдӥськыса улэ. Синъёсыз кык бадӟым сутэръёс кадь кезьытэсь но лэчытэсь. Кышкало калыкъёс солэн синъёсаз учкыны. Учкид ке, соос шуак тонэ кырмо. Ӟумъя, шуо, котькуд адямилэсь вань улонзэ соку ик адӟе. Тросэз со азе пыдес вылазы усё но куалекъяса ик бӧрдыны кутско… Ӟумъя соосты кыӵе ке кылъёс вераса султытэ… Ма, адямиос гинэ ӧвӧл, валъёс но солэн матэктӥсь вамышъёсызлэсь куалекъяло…

Нош Камитлы нокыӵе ӧвӧл. Камит тодэ, та синъёс сое пумтэм ярато шуыса. Татаезлэн капчи вамышъёсыз но сое буйгато. Соос одно ик мозмытозы Узыбеез, юн оске Камит, соин ик мылкыдыз но, уно бубылиосын ӵош, тани та Бубы нимо гурезь бамалъёстӥ капчи тӧлъёс вылын поръя ни, нош бурдъёсыз куд-ог дыръя сокем бадӟымесь но кужмоесь луо, оло ке соос вань Арсавыл шаерез егит ошкуйчилэн яратонэныз шобырто.

10-тӥ люкет. Палэсмуртлэн веранэз. Кикытэль но кикыпиос. Усман тата но куинь эшъёс

Соос туж чырткем тубизы Бубы гурезь бамал вылэ. Пыризы тэле. Азьпалазы нокыӵе сюрес ӧвӧл ни. «Кытчы со ышиз? – пайме Камит отысь-татысь октоно кадь губиосты адӟыса. Ма, али гинэ вал ук, кызьы со озьы луыны быгатэ?.. Камит номыр уг юалляськы, со ӟеч вала, татаез нуэ бере, сюрес луоз. Кин тодэ, оло, юри озьы сюрессэс быдто, адямиос медаз адӟе шуыса. Нырысь соос мынӥзы нёжалтӥ, ӝужытэсь абалгы турынъёс пӧлтӥ, собере потӥзы луо вылын будӥсь пужым яге. Камит адӟиз, кызьы татаез вамышъя, одӥг турынэз но со уг тӥялты, одӥг улваез яке изэз но интыысьтыз уг вырӟыты. Нокыӵе пыдбер со сьӧры уг кыльы… Камит но дышетске солэсь, со сямен ик вамышъяны тырше. Кытын ке кыдёкын ик ӧвӧл дукъяос гурлало, коньыос писпуосысь писпуэ тэтчало, ӟичы артэ нежалтӥ зынъяськыса бызьылэ, пужейёс писпуос борды чыртыоссэс кормаса сыло. Кыкез – одӥгез ош, мукетыз мумы, пужейпизы но вань… Камит нокытчы уг учкы, со ватка пӧйшурась шӧдонэныз озьы тодэ, нош синъёсыз солэн пыд улзэ гинэ чакланы вуо, угось татаез, туж батыр мугоро ке но, укыр чырткем ветлэ. Камит уг ик тоды, кин эшшо тазьы ветлэ меда. Со шумпотэ, та ноку ветлымтэ сюрестӥ но татаезлэсь бере уг кыльы шуыса. Соослэн балян кулэсь сапегъёссы ньыль пойшуръёс кадь мыно турынъёс пӧлтӥ… Туж чебер адӟиське соослэн вамышъямзы, кыкназы ик шӧдо дор музъемзылэсь пыдъёстӥзы выллань тубись кужымзэ, нош писпус вискытӥ инбамысь уллань васькись кужым йыртӥзы пыӵаса музъеме кошке… Кык сӥньысъёс борды думем бирдыос кадь соос мыно капчи но шуныт тӧл тулкымъёс вылын. Тубо мувыре, васько гопъёсы, нош ик тубо, кык пыжъёс кадь зарезь тулкымъёс вылын… Оло ке, Авраам но Исаак инмарлы курбон сётон изъёс доры дырто…

«Эх, Узыбее мынам… – нош ик вань сюлмыз вӧсь луыса малпаське Камит кузон мунёезлэсь серекъямзэ.

Ӵапак та дыре Камит шуак адӟе буко кадь музъем дорозь някырскем кызьпуэз, кудӥз вылтӥ турынъёс вылэ кошкыса шиетыса ветло бышкылӥськись тылъёс… «Палэсмуртлэн Ӧсэз» шуо сыӵе пал пыд вылаз сылӥсь, тылъёсын шиетӥсь «капкаосты-аркаосты», сыӵе писпуос ултӥ уг яра потыны, шуо калыкын, нош някырскем кызьпу сьӧрын сылэ вал ачиз Палэсмурт…

– Быдӟым Агай, вождэ эн вай, номыр уродэз мынам ӧвӧл… – шуак чилектэ Камитлэн йыраз инмарлыко малпанэз.

Нюлэслэсь, вулэсь, тыллэсь, омырлэсь, вань дуннеослэсь межаоссэс утись кузё туж сак чакла. Солэн бадӟым гын шляпа улысьтыз одӥг гинэ вожалэс синмыз Камитлэсь вань пушсэ пельтӥськем тӧлпоез кадь кыскиз, вань малпанъёссэ адӟиз. Пияшлэн мугорыз кысыляк лябӟиз, пушказ чилектэм кадь яркыт тыл пыриз, дунне синмальдымон луыса пӧртэм сэрегъёслы пазьгиськиз, син азяз адӟиськиз бадӟым-бадӟым Бусы Ыбэс, кудӥз ыбе сое Быдӟым Арча Ыбес азе. Та чик но Кузон вӧзысь Арча ӧвӧл. Быдӟым Арча Ыбесысен ваньмыз ик Арчаос солы вӧлак усьтӥсько. Инбамысез но, музъем вылысьёсыз но, музъем улысьёсыз но… Камит туж сак учкыны кутске одӥгзэ музъем улэ ватэм Арча карез. Таиз солы тужгес но кельше. Музъем улысь, Кузон улысь, Быдӟым Арча каре куинь лушкем сюресъёс пыро. Зэрпалъёслы лэсьтэм туж ӝужытэсь капка ӧсъёс вылын кык ногайёслэн, арыслан мугоро быркытъёслэн, зарни вылтуссы юнматэмын. Котыр вӧлэм из чиля, котыр кизилиос кадь яркыт тылъёс югдо. Сокем чылкыт но чебер лэсьтэмын музъем улысь кар. Но тани тужгес паймытӥсез. Солэн шораз ик сылэ Зарни Мумлэн мусторез… Ӧвӧл, со чик но уг кельшы Камит доры потась Варфаламея нимо Зарни Мумлы. Со котырын зарни ву пуке, пичи гумыостӥ омыре пызгисько зарни вуос, зарни тыос вылэ пӧртэм чильтэръёс пазясько. Зарни Мум, кынмем мунё кадь, изьыса пальпотэ, оло уг пальпоты…

– Али со Пор Кышно… – вожалэс синмыныз вера Палэсмурт. – Со вир возьма…

– Малы вир возьма? – юаса ик уг вутты Камит, син куспын Зарни Мум воштӥське. Усьтэ лек синъёссэ. Зарниез вылысьтыз кошке. Туж ӝог ужало со пушкын уно сюрс питранъёс, зарни камалиосыз оло тылобурдо, оло чорыг тэнкеослы берытско, кӧт шораз усьтӥське ачиз кадь ик лек пиез, пиез сьӧрын пиезлэн нуныез, соос но зарни мугорзэс азвесь тэнкеослы берыкто.

– Малы со асьме калыкмес сиыны турттэ? – уг вала Камит.

– Озьы кулэ… – валэктэ Палэсмурт. – Макем трос вирзэ калык солы сётоз, сокем со кужмо но чылкыт луоз…

– Малы вирзэ сётыса кужмо но чылкыт луоз? – нош ик юа Камит.

– Та дуннеын номыр но огшоры уг сётӥськы, ваньмыз понна дун тыроно. Нош вир со тужгес но дуноез курбон… – валэктэ Палэсмурт.

Туж кӧшкемыт кесяське Пор Кышно. Тани со корт тылобурдо, ногай бурдо сямен, инбаме ӝутскыса, бурдъёссэ шона…

Камит но бурдъёс вылын кадь гылӟе удмурт лудъёс вылтӥ, зугыр куалекъя солэн мугорыз, синвуосыз бамъёссэ ик ӵушкало, ваньмыз ӝуа: гуртъёс, нюлэсъёс, возьёс… Пӧйшуръёс котыр пегӟо сутсконлэсь кышкаса. Вань шуръёс виресь луэмын, пудоосмес ӟазеген куреген суро ваньзэ муско ожчиос Кузон пала нуо, кышномуртъёс, нылпиос бӧрдо, соосты жалятэк жуго, шӧйёс кыллё гурт урамъёсын, уробоосын-уробоосын кошко няньёс, чечы, бакча сион, азвесь, зарни, дуно дӥськут, дуно куос, муско ожчиослэн ымныръёссы куанэмын сомында ваньбур шедьтэмзылы… Пуртъёссы, тӥръёссы вирлэсь парлано… Туж шимес та Курбон Ожлэн ымнырыз.

Шӧдтэк шорысь Камит адӟе нюлэс кушез. Татаез кыӵе ке ожчиосын, ӵапак со храмчиосын, ожмаське. Ватагайёс но ожмасько, но соос кыдёкын, татаез огназ, огзэ погыртэ, кыксэ, но соос эшшо вить кузя. Татаез куинь пужымъёс вискытӥ потэ, но солэн сьӧраз тӥр лобе… Ӵапак со ожчи сое ыстэ, кин Ӟапыкез со азьын погыртӥз… Кӧшкемыт вир пазяське татаезлэн тыбырысьтыз…

Камитлэн азяз ваньмыз пеймыта. Сое басьтэ куалекъян, тани солэн пиньёсыз ӟукыртыны кутско, вань мугорзэ зуркан-куалекъян басьтэ.

Ӟумъя шуак сое чылкыт турынъёс вылэ интыя, ымаз пурт кӧрыксэ донге, кылзэ медаз куртчы шуыса. Ӟумъялы та тодмо, пиез одӥг пол гинэ ӧз усьылы ни. Ачиз но усьылэ куд-ог дыръя… Татаез но, Камитлэн песятаез но сыӵегес ик… Выжыысь выжые азинске туно висёнзы…

Куалекъянъёсыз ортчем бере пиез мур-мур шока, синъёссэ усьтӥз…

– Та-та… та-та… – кышкатскыса ик мар ке вераны курадӟе со… Мыным Палэсмурт Агай возьматӥз… Эн поты куинь пужымъёс вискытӥ, отын тӥр возьма… Эн поты паллян палтӥз, бур палтӥз пот, тата…

– Я, я, пие, чида, эн дырты, бӧрысь вералод, уг пот куинь пужымъёс вискыты, бур палтӥз пото… – вешаса буйгатэ сое Ӟумъя.

Камит номыр уг вера ни, супыляк умме усе. Укыр секыт вал Камит понна та нунал, но со ӧз быры на, азьланяз но солы кужым кулэ луоз ай.

«Мед изёз на кӧня ке. Но дыр но уг возьма уга, соку дӧдьы лэсьтыса кысконо луоз…» – шуак ваньзэ малпаны вуэ Ӟумъя батыр. Тани со палашсэ кутыса шоналске но ньыль векчи нинез погыртэ. Соослэсь шуак гинэ кык кутэто нюж нуон дӧдьы лэсьтэ. Кӧлӥсь пизэ ненег куаро дӧдьыез вылэ интыя но дӧдьызэ кыскыса азьпала кошке. Капчи тылыез кадь со кыске пиеныз дӧдьызэ. Уг ик шӧды кадь секталазэ. Туж яратэ Ӟумъя аслэсьтыз пизэ. Нокытчы со сое ӧй нулдысал, шораз учкыса вешаса пукысал. Но улон нюжалэн аслаз куронэз, со ялан дыртытэ. Тани кема ик уг мыны, солэн азяз кык егит ожчиос пото.

– Кытчы? Куд пала мынӥськоды? Кинэ нуиськоды? – тэбинё со борды чик но шудыса вераськисьтэм пиос.

Ӟумъя адӟиз ини, вылӥын эшшо витез пуко. Пукыӵ ньӧлъёссы но дасесь. Туж ӝог куасалозы, чырткемесь. Дышетӥсьсэс но Ӟумъя тодэ.  Ачиз но куке-соку тапалан писпуос вылын лобаз… Аслаз но вань вал татӥ калгись адямиосты куасамез…

– Мон бурдокаре, кикыпиме нуисько… – валэктэ со татчы пырон кылъёсты вераса, киысьтыз куинь вурыссэ но сӧзыысьтыз ыргон пус-тодметсэ возьматыса…

Ожчи пиос шуак мукетэсь луо. Ож тӥрлыкъёссэс, пукыӵъёссэс вато. Вылӥысь но шуак, шуак, шуак писпуысь писпуэ тэтчаса, вить пиос васько.

– Валамы, ватагай… Нош мар кикыпилы луиз? – юало соос.

– Солэн усёнэз вань… Вуонэзэ ке адӟе, куд-ог дыръя усьылэ… – валэктэ ватаман, пальыштыса.

Писпуосысь васькем пияшъёс гурак серекъяло.

– Валамон, татын милям анай-атай киос ӧвӧл… – шуэ одӥгез, Камит шоры мискинь шокчыса.

– Я, я, чалме, чипыос! – нюлэскысь потэ ӧжытак мӧйыгес ожгарчи. – Ӵапак соосты асьмеос возьмамы… Та пияшез ай тӥ яратыса но ки вылады нуллоды! Ӟечбур, Ӟумъя батыре! Ӟечбур, ватаманэ мынам!

– Ӟечбур, Уча!

Ӟумъяен Уча ӟыгырско.

– Мар Камитэн? – юа Уча.

– Луылэ пиеным, тодӥськод ук… Палэсмуртэз адӟиз… – вакчик валэктӥз ватаман.

Пиос ваньзы ик пыдес вылазы усё, синъёссы соослэн паймыса чилекъя. Вань камъёсмы вылын гудыръясь нимо тодмо ватаманэз адӟон – пияшъёслы, тужгес но кикыпияшъёслы, сыӵе бадӟым шудбур.

– Вождэс эн вае, Быдӟым Ӟумъя батыр! – сюлворо соос.

– Султэ, пиос, ойдо ай кудды ке басьтэ дӧдьыез пельпумады… – пальпотэ Ӟумъя.

– Явуш, Япанча, тӥ басьтэ дӧдьыез, – шуак итӥське Уча.

– Ӟечбур, пиос… – шунытак пальыштэ ватаман.

– Ӟечбуресь, Ӟумъя батыр…– пальпото Явуш но Япанча. Соос кыксы ик кемалась тодо ошкуйчи ватаманэз. Кылдылӥз ни соослы пумиськылыны Кузонын но кам вылын но, кикы тэльын но.

– Нош тӥ, казакъёс, тубелэ берен писпу йылады. Чаклалэ ёросэз, воштӥсьёсты вуытозь… – шуак вера Уча ватаман шоры синъёссэс вошъятэк учкись пиослы.

Пиос туж чырткем бызьыса но тэтчаса писпуосы тубо но ышо.

– Куку! – вазе одӥгез.

– Куку! – вера мукетыз.

– Куку! – ивортэ куинетӥез.

– Куку! Куку! – кылӥське на эшшо но пыдлонгес.

Явушен Япанчаос туж капчи нуыса кошко Камитэз.

– Номыр уг воштӥськы Усман тата дорын… – пальпотэ Ӟумъя.

– Уг воштӥськы, Ӟумъя батыре. Ялан кикыос силё. Ма ачид но, син медаз усь, чик воштӥськымтэед…

– Воштӥськытэк ум улӥське, асьме удысын кырсёмонлэсь утиськыны секыт… – ӟазырес но небыт вера Ӟумъя.

– Тата шуэ, калыкмес утён со сьӧлык ӧвӧл…

– Соиз но вань. Я, кызьы ини Усман татамы?..

– Гордалэс тушсэ ӧжытак пужмер басьтӥз ни… Ма ачид ӝоген адӟод… Али ми кыдёкын ум сылӥське, Ваткалы матэгес пуксимы. Ческыт чорыг но сиеммы потэ ук. Вуоно толэзе сьӧд тыос доры, кузон но арча эльыйыръёслэн шутэтскон юртъёссы вӧзы, ошкуйёс дасяны кошкомы… Туж малы ке дыртытэ тата… Егитъёсмы трос ини. Кылемаз гужеме эшшо 300 егит казакъёс вуизы. Пӧлазы дас вить егит эльйыр пиос, соос пӧлын Кузонысь вуэмъёсыз тани та кык тодмо мурзаосмы – Япанча но Явуш… Соосты юри татчы ӧтиз ачиз Усман тата… Таоссэ тужгес но чакласа возе… Ялан Кузонысь ас дораз ӧтча… Нош туннэ тӥни, возьмасьёсмес эскерон амалэн, соосты но тӥледыз, шӧдске, пумитаны ыстӥз… Тодӥськод ни ук соосыз…

– Усман таталэн ваньмыз аьлопала малпамын… – пальпотэ Ӟумъя, инбамтӥ лобись кучыранэз учкыса. – Явуш, кызьы мон тодӥсько, Чури Явушлэн пиез вал кадь…

– Озьы, ӵапак Чури Кучыран выжысь ик со луэ… Явуш, татаез кадь ик, трос кыл тодэ, вань пичи дырзэ татаеныз ӵош кам сюресъёс вылын орчытэмын… Муско карын но тросэз тодо татазэ но ассэ но… Пияш вань сюресъёсты тодэ, кытын мар вузало, кытысь мар лыктэ, кытын кыӵе вуз ӟечгес вузаське… Сое али ик коть китайёс доры, коть персакъёс доры, коть арабъёс доры, коть византие, коть мускоос доры ысты… Котькытысь уяса потоз… Песятаезлэн но нимыз шуо Явуш вал, татаезлэн но Явуш, ачиз но соослэсь ик нимзэс нуллэ…

Шӧдтэк шорысь Ӟумъя, кучыран кадь, цоцкетэ но, уйсы кадь, «У-у-у!» кеське. Куаляк усе Уча. Кучыран но кыз вай вылэ пуксьыса цоцкетэ но соку ик «У-у-у!» вазе…

– Тон мар, ватаман?.. – пайме Уча.

– Малы ке укыр тодмо потэ та кучыран басьтон… Со но тодмаз кадь… – пальпотэ Ӟумъя, кучыранлы мыкырскыса. Кучыран но йырзэ мыкыръя…

– Зэм но… тодмоед, оло… – йырысьтыз казнаксэ куштыса, ватаманэз кадь ик мыкырске солы Уча. Но ӵапак со мыкырскыку, кучыран ыше, кызлэн ваез гинэ буш шонтӥське, секталазэ ыштыса…

– Ишан-а, мар-а?.. – шыпыртэ Уча.

– Малы одно ишан? Выжызылэн бурдозы… Явуш яратэ вал кучыранъёсты…

– Малпаськод, пизэ чакланы вуылӥз?..

– Уг тодӥськы, ӧз вера ук… Но кужымдэ ӧжытак пунэмаз кадь… – пальпотэ ватаман.

– Басьтӥз, шӧдске… Но солы сётыны жаль ӧвӧл… Кужымы мынам нюлэскын кылльыса, сюрсолэн пуш кӧез кадь люкаськиз ни, нокытчы карыны… Явуш трос лэсьтӥз калыкмы понна… Капчи солы медло лул дуннеяз… Пиез но трос лэсьтэ… – пальпотэ Уча. – Со табере, атаез кадь ик, радъя «Ош-Гондыр» сюанэз но, Ош толэзе Кузон Базарез усьтонэз но…

– Япанчалэн но выжыосыз трос «сьӧдъёсты» Арсавылысь сузязы. Кышкыт йӧтӥз со понна соослы «сьӧдъёслэсь»… Паймисько, кызьы Япанча улэп кылиз, кин сое, кытын будэтӥз… – Япанча шоры учкыса, вера Ӟумъя.

– Япанча туж ӟеч ожгарчи!

– Тодӥсько, мон трос пол адӟи сое ожмаськонын… Ми соин ӵош, Сююмбикеез Касим каре нуимы… Трос крымъёсты солы вандылоно луиз… Уг поты вал крымъёслэн Сююмбикеез Муско пала сётэмзы…

– Япанчаез котькытын гажало. Нимыз гудыръя! Ядыгар но сое бордаз кыскиз, вожъяське ке но данэзлы, чида… 

– Чидатэк амалыз ӧвӧл… Ассэ но Ядыгарез милемлы ик Япанчаен Асьтарханысь Кузонэ вайыны кылдӥз… Соиз но капчи уж ӧй вал… Япанча ке ӧй луысал, Ядыгарез чорыгъёс сиысалзы ни… Сое сюрес вылын куинь пол быдтыны туртто вал. Но озьы ке но, ханлы оскыны уг лу, укыр сьӧсь сямо, сиёз со Япанчаез… Уг ярато Кузон ханъёс укыр дано ожчиоссэс…

– Япанча налим кадь вольтчоз… Кытчы но сое Ядыгар ӧз ни келя, нош со котькытысь вормыса бертӥз… Оглом, кыксы ик пиос ӟечесь… Кыксы ик адӟо… – куаныса ик вера Уча.

– Ефимлэн кык шуккем коньдонъёсыз… Утисьёссы но кужмоесь… – пальпотэ Ӟумъя.

– Усман тата но озьы шуэ… – йырзэ шонтэ Уча, собере артэ жильыртӥсь ошмесъёс вӧзысь шуак вукарнанэз кырме но сое пӧртэм ласянь шунды тылсиос пыртӥ учке, пель дораз матэктытэ но мае ке валаны турттыса кылзэ. – Чик но югытсэ уг вера таиз но вукарнан… Кучыран басьтон сое мед сиёз… – серектэ со, берен омыре сое зыртыса. – Ватаман, мар луоз Кузонэн?..

– Мар луоз Кузонэн со тодмо… Кузонэз пазьгозы… Ачид тон сое басьтод… – меӵак вера Ӟумъя. – Ми тонэ ӝоген аслад дышетэм кикыпиосыныд, Чупчи палась ожчиосын, Муско эксэйлы юрттыны келяломы…

– Муско эксэй доры аслэсьтым Кузонме басьтыны?.. – пайме Уча. –  Мон вукарнан ӧвол ук кык тӧлъёс вискын сылыны…

– Умой луоз вукарнанъёслэсь адӟем карид ке… Ужмы асьмелэн сыӵе – тэгызлыкез чакланы… Тон мынод Муско эксэез возьманы… – пальпотэ Ӟумъя. – Нош Кузонэз тонтэк но быдтозы…

– Кинлэсь мыным Иоаннэз возьманы кулэ?.. – выжыятэ Уча.

– Ваньзылэсь, кин сое котыртэ: ваткаослэсь, бигеръёслэсь, поръёслэсь, чувашъёслэсь, ӟучъёслэсь, стрелецъёслэсь, немецъёслэсь, тужгес но воеводаосызлэсь но князьёсызлэсь… Солэн тушмонъёсыз – котькуд сэрегын… Валаськод, «Сьӧд Инмарлэн» ляльчиосыз уг изё… Нош Иоанн югыт кужымъёс палан… Со песятаез кадь ик, татаез кадь ик, анаез кадь ик Бату ханлэсь калыксэ яратэ, Несториан черкъёсты, вуж осконэн улӥсьёсты, ведаосты гажа… Со асьмелэн эксэймы…

– Ма, тросэз сое валало… Калык валатэк уг улы ук… Кузонъёс но юри солы черксы вӧзы бадӟым югыт корка дасяло шуыса кылӥ?..

– Корка соос дасязы ини… Со корка понна сомында ӵашетонъёс кылдэмын… Нош ачиз Ядыгар кузонъёсты со понна меӵак пыкылыны уг дӥсьты, кышка… Угось тросэз кузонъёс сое Иоаннэн кыл тупатыны косо. Бадӟым Базарез берен Кузонэ берыктэмзы потэ. Но крымъёс мырк такаос кадесь… Ялан вашкала вормонъёссэс кырӟало. Дугдытэк ожчиоссэс дасяло. Отысь татысь Кузонэ кыскало. Кузон котырысь калыкъёсты но кемалась кышкатӥзы ини: ӧд ке юрттэ Кузонэз утьыны, Токтамыш кадь вылтӥды ортчом шуизы… Мар карод, соосты но лыдэ басьтытэк уг лу… Соослэн но кужымзы вань, быгатозы лёгаса ортчыны…

– Крым бигеръёс но Ядыгар сярысь мыным ваньмыз валамон. Мыным табере Муско эксэез но ӟечгес тодоно. Зэм-а верало, Иоанн ас бордаз 500-лэсь трос ведӥнъёсты возе? Ӵемысь кылӥсько черкъёслэсь озьы вераськемзэс?..

– Мон соизлы уг паймиськы, со котырын со мында тушмонъёс, котькуд вамышсэ солы эскероно. Валамон, тодӥсьёстэк, адӟисьёстэк, туноостэк со уз улы… Но черкъёсы но со ӵем ветлэ…

– Черкъёсын якшаськытэк солэн амалыз ӧвӧл. Соос киын вань коньдон, вань барышо интыос… Соос кивалто каръёс котырысь улосъёсын. Малы со ас улаз уг ӟибы соосты?

– Иоанн тодэ, черкъёсты озьы гинэ уд паньгаты, соос тросэз пуксён палъёсын герӟаськемын… Узырлыксэс, музъемъёссэс, коньдон дурись черкъёссэс, базаръёссэс озьы гинэ уз сётэ… Вань калыкез пумит ӝутозы. Угось тросэз князьёс соосын герӟаськемын. Соин ик Иоанн соборзэ люкаса соослы «Судебник» юнматӥз… Иоанн понна со бадӟым вормон. Ку черкъёс оброк тыризы? Табере Иоаннлы Муско эксэйлыклы тыро…

– Ирий Аскар быремын ке ӧй луысал, солы капчигес луысал Тартаримес огазеяны. Гуртъёсысь калык яратэ сое, угось гурт калык аслаз осконэныз улэ, пуксён палъёслэн черкъёсазы уг ветлы. Нош черкъёс котырысь каръёсын капчи улонлы дышетыса ашкынытэм калык уз мыны со сьӧры, кучыран басьтон монэ мед сиёз, зэмзэ ке уг вераськы. Ӵап отын солэн тужгес но бадӟым кайгуэз, ляб интыез…

– Со югдурез ӵапак со пуксён палась черкъёс ик кылдытӥзы. Соослэн базаръёссы вӧзы кылдэм каръёсысь калыкез озьы гинэ уд вырӟыты. Нош Кузонэз басьтыны, кызьы малпаськод, соос вырӟозы-а?.. – шӧдтэк шорысь юа Ӟумъя.

– Эшшо кызьы вырӟозы! Угось капчи коньдонлы ик соос дышетэмын… Нош Кузонлэн узырлыкез сярысь вань дунне вераське! – аслаз верамезлы пайме Уча.

– Тӥни ӵапак соин ик Иоанн соосты Кузонлы пумит вае… Угось пуксён палъёсысь черк-базаръёс пыртӥ ашкынытэм, шузимытэм калык Иоаннлэн нырысетӥ тушмонэз… Ӵапак сыӵе калык пӧлын «сьӧдъёслэн» уно «вукооссы» юнматэмын… Соин ик татчы вуыса тросэз соос «лулъёслэн дуннеязы» ышозы, малы ке шуоно нырысь ик бырыны шедё сыӵеосыз, кинъёс узырмон понна лыктэмын…

– Нёжто Иоанн сыӵе визьмо?..

– Визьмо… Малы ке шуоно песятаез но, атаез но, анаез но озьы ик ужазы… Джучилэн вирыз, со Джучилэн вирыз. Иоанн ваньзэ адӟыса будӥз. Пуксён паласьёс сьӧд но кескич амалъёсын черк коньдонзы пыртӥ, выжы мадьёсмес пожаса, осконмес тӥяса калыкъёсмес кырмо, нош Иоанн чылкыт оскон пыртӥ, ог-огдэ гажан пыртӥ огазеяны турттэ… Уг сёты пуксён палъёслы калыксэ пожомытыны… Со пуксён палъёслэсь калыкез сектан «пабъёссэс» быдтӥз. «Уг сёты, – шуиз, – калыкме шузимытыны!» Пуксён палась черкъёс куро вал сопалан кадь ик «оскисьтэм адямиосты» тылсконын ӝуатыны, нош Иоанн шуиз: «Мон тӥледды таӵе куронды понна асьтэдыс колъёс вылэ пукто! Мон эксэй дыръя одӥг адями но «тылсконын» уз ӝуа!» Со троссэ вера Иоанн сярысь…

– Усман тата шуэ: Сулейман но, Иоанн но Кереметлы пумит ожмасько… Малы соку Сулейман Асьтарханэз но, Крымез но, Сибырез но, Ногай бигеръёсты но Муско эксэйлы пумит узатэ?.. Малы Кузонэз люкемзы уг лу?.. Малы ваньмыз Кузон борды дыгиськиз?

– Эше мынам, тон адӟид-а куке но «Сьӧд Инмарез»?

– Мон Кылдысинэз но ӧй адӟы… Кызьы «Сьӧдзэ», Кереметэз, адӟом?

– Туж шонер… Кин меда соосты куке адӟиз?.. Со кык кужымъёсыз, шӧдыны гинэ луэ… Нош Сулейман но, Иоанн но, оло ке, уг шӧдо… Соин табере Иоанн сьӧрын но, Сулейман сьӧрын но «Сьӧд Инмар» кужмоя, ӵапак солы кулэ та ожмаськон… Но кыксы ик эксэйёс, мон сямен, валало, та ожмаськон «Югыт Инмарлы» но туж кулэ шуыса… Сулейман но Иоанн туж югытэсь лулъёс… Кӧня ӟеч мадьёс ветло соос сярысь! Мон сямен, соос асьсэлэн тыбыр сьӧразы юри матэктытӥзы «Сьӧд Инмарез»… Сое соос асьсэ  пала ужато…

– Ӧй вала, ватаман… Кызьы «Сьӧд Инмарез» ачид пала ужатод?

– Удмурт мадьёсамы, «Югыт Инмар» трос пол «Шайтанэз» озьы ужатӥз… Озьыен, луэ… Тани Кузонлэн пӧртэм дыръёсыз вал… Асьмеос ӟеч дыръёссэ умой тодӥськомы, урод дыръёссэ но адӟиськомы, куке «Сьӧд Инмар» ужаны кутске. Собере валаськомы, ӵап озьы кулэ вал шуыса… Угось «Югыт Инмар» пальпотыса асьмелы валэктэ, малы со озьы кулэ вал… Угось ачиз «Сьӧдлэн» юрттэмезтэк со озьы ӧй быгатысал… Нош табере туннэез сярысь… Вера мыным, юлтоше, умой-а туннэ Кузонлэн ымнырыз?

– Мон умой ӧй шуысал…

– Малы?.. – выжыятэ Ӟумъя.

– Крымъёслэн кузёяськыны вуэмзы сэрен… Сямъёссы соослэн кырсесь… Соос уаръёсын вузасько… Туж трос ӟучъёсты полонын возё. Базаре но ӟучъёсты уг лэзё. Бадӟымесь оброкъёсын вузчиосыз ӝокатӥзы. Толыкез – Бадӟым Базар Кузонысь Нукратэ кошкиз… Мускоосын кусып возён интые крымъёсын, туркъёсын, арабъёсын кусып возьыны туртто… Оглом ваньмыз туннэ йырин-чукин…

– Тӥни тон ачид ик верад, малы Иоанн соосты ӝуатыны лыктэ… Нош Сулейманлэн узатэмезъя Кузон зарниен узырмон понна татчы Аждагалэн кыйёсыз кадь нюжтӥськозы самой сыӵеосыз ик ашкынэм асьтарханъёс, ногайёс, сибыръёс, крымъёс… Кузон со туннэ «Кый Кар Бам», кытчы вылӥ туноос кыйъёсты ӝуатыны тыл гомӟытӥзы. Нош вань дунне вылысь «кыйёс» асьсэос отчы ӝуаны лыктозы… Тодӥськод ук ведаосысь сыӵе учыръёсты… Соин ик Иоаннлы ачиз Инмар юрттоз соосты вормыны…

– Мон, ватаман, малпасько вал, тулыс шунскыны потэм кыйёсыз гинэ озьы ӝуатӥзы юри дасям куро пушкын… – пайме Уча.

– Малпаны пӧртэм сямен луэ. Калык дышемын акиат шоры кадь учкыны. Но улонын тани тазьы… Кузон ассэ ӝуатӥсь тылобурдо кадь, ӝуа но выльысь вордскылэ… Быдӟым Махабхарата юнме шорысь «кыйъёсыз» ӝуатон бордысен уг кутскы… Та книга верамъя, «кыйёсыз» озьы гинэ быдтыны уг лу, ваньзы соос уг ӝуало… Соин, шӧдске, ӵемысь сыӵе Курбон Тыл ӝуатыло. Кый Кар Бам сярысь мадьёс паськыт вӧлмемын…

– Со мадьёсын, ватаман, «кыйёс» адями мугоръёсын но ветло, вылаз ик «кыйёс» пӧлын ӟечъёсыз но луыло… Асьмеос но та ӝуатэм тылын уно калыкмес ыштомы… Уно калыкмес со ас пушказ кыскоз ук!

– Ыштомы, Уча… Утёмы сооссэ гинэ, кинъёсты утеммы луоз… Сотэк уз лу… Кык палан ик ожмаськоно луоз!

– Ярам, эн сюлмаськы, ватаман, мон Муско эксэез ӟеч возьмало! – оскытэ Уча. – Нош Арча палан кин луоз? Арчаез но исатэк уз кельтэ ук… Тросэз тодо, Кузонысь узырлык сопала ватэмын шуыса.

– Арча но быроз… – лулӟе Ӟумъя. – Арча паласен Кузонлы юрттыса тани та пиос ужалозы, Явуш но Япанча… Тон, Уча, Кузонысь но Арчаысь ӵыжыостэ ӝоггес тапала интыяськыты… Вузъёссэс медаз жалялэ, ӝоггес мед вырӟозы… Юн дасяськыса лыкто мускоос, синъёссы узырлык понна мальдэмын … Бӧрысь утиськыны бер луоз ни.

– Умой луысал тапала но соос ӧй ке вуысалзы…

– Тапала уз вуэ… – инбамысь «куакаос» шоры учкыса, буйгатэ ватаман.

– Озьы ке, марлы сокем дасяськиськомы? Малы сокем кышкамын Усман тата?.. – кемалась сюлэмшугъяськытӥсь юанзэ юа Уча.

– Усман тата кыдёке адӟе, соин ик дыртэ, ваньзэ ас дыраз дасяны… Веранзэ но ас дыраз вералоз… Тодӥськод ук тон…

– Нош сомында ошкуйёс, сомында бадӟым пыжъёс малы?..

– Нош маин нуомы калыкмес Чупчи но Калмез палъёсы, Тӧдьы кам но Танып палъёсы, маин ачид Муско эксэй доры мынод, солы Кузонэз басьтыны юрттон понна? – шунытак пальпотэ Ӟумъя.

– Ой, Ӟумъя батыр, коть шайтанэзлэн быж улаз шумпотыса мыно, Муско эксэй пала ке, Муско эксэй пала! – шумпотэмзэ уг ваты Уча. – Мон ошкуйчи данме уг сапта! Жади, ватаман, нюлэскын маймыл кадь пукыны. Тодӥсько на кызьы асьмеос Хазар-Каспарез котыръяськом вал, персакъёсты, грекъёсты, арабъёсты асьме пала тубытъямы, уйпала келяллямы… Эркын кам тӧлъёсын шокаме потэ ни! Шӧдэме потэ уйпал зарезь тулкымъёсты но! Азвесь но зарни жильдэмез кылэме потэ… Кыӵе кельшо мыным чудьяослэн вашкала коньдонъёссы… Кыӵе чебер суредъёс отын лэсьтэмын… Соосты кие кырмиськод ке, копаксэ выль дунне шӧдонъёс мугорын улӟо…

– Улӟо… Чудья коньдонъёс туж кужмоесь… Озьыен, соглаш Муско эксэй доры мыныны? – нош ик выжыятэ Ӟумъя батыр.

– Соглаш, ватаман. Мон валасько, мар понна со кулэ… Калыкъёсмес Калмез но Чупчи, Тӧдьы кам но Танып пала нуондылы но куанӥсько. Нош мон аслам ужъёсы пӧлын, номыр тодытэк-кылытэк улӥсько. Туж ӟеч малпан! Отчыозь та тылпу уз ни вуы, дыр…

– Отчыозь уз ву. Соин тросэз калыкъёс каллен кошко ни. Кышноос, нылпиос, пересьёс… Ми сое дырызлэсь вазь нокинлы ум вераське… Лушкем ужаськомы, уйёсы келяськомы, куара-ланга дырызлэсь вазь медаз поты… Пыжъёс ялан кошко но кошко… Уча, Быдӟым Ош ке юрттӥз, уй пала но, шуныт пала но ветломы на… Али асьмелы тросгес егит ошкуйчиос кулэ… Ачид валаськод, кин тон сяна дышетоз соосты? Кин тон мында адӟемын? Кин соослэсь йыръёссэс утьыны быгатоз, секыт ожлэсь палэнтыса?

– Быгатозы… Шакай но, Мардан но, Абызэй но, Шыкмет но, Былай но, Ӟапык но, Бедӟан но, Кусни но, Гырлака но, Эпок но, Гадӟи но… Тросэз асьмелэн ву ожъёсты, ву кожъёсты ортчылэмын, ӟеч ватагайёсмы тачак…

– Шонер, казак, вераськод… Но тон учкы ай, Шакайлэн ымаз котькуд кыл бере визьтэм кыл! Нош Марданлэсь мар верамзэ но уд вала… Ӟучен-суро бигерен жоб кылзэ сюре. Мукетъёсызлэн но чиданзы уг тырмы. Нош нылпиосын – нырысь ик чидан кулэ… Ӧвӧл мукетъёсыз, Уча, тон гинэ татын кикы кучыран…

– Кучыран басьтон кылдэ мед сиёз, ватаман! Укыр тон монэ вылэ ӝутӥськод… Дунне монтэк но паськыт но узыр…

– «Бакелё мед луомы!» тон шу, кабыл мед кароз инмармы! – пальыштэ Ӟумъя. – Медаз на си кучыран басьтонэд верам кылъёсме… Котькудӥзлы али инты сюроз, Усман тата ваньмы азе ождур эсэпъёсмес дася… Уж но лэсьтӥське, трос калыкмес келямы ни…

Та вакчи вераськон пичияк гинэ йӧттӥськыса кошкиз Быдӟым Арсавылысь ваткаослэсь берло дыре мытэм ужъёссэс. Оло ке ваёбыж шуак омыретӥ ӟечырскыса пуксьыны турттэ вал, но пуксьыны инты ӧз шедьты, озьы ик кошконо луиз берен инбаме зымыса. Яке, шуом, камкоӵо шуак чорыгез адӟыса някырскиз вал, нош чорыг тюак! ышиз бере, камкоӵо нош ик выллань ыбиськиз. Озьы малпаськизы уно адӟем ожгарчиос… Угось пыдлосьсэ поттыны уг яра на, поттӥд ке, сое мукетъёсыз но адӟыны кутско, кыксы ик сое ӟеч валало. Ожгарчи катъёс юн возисько ошкуйчиос пӧлын. Уча паймиз гинэ, унозэ тодытэк кылемезлы… Ма, озьы ик кулэ ужаны! Кельшиз солы Усман таталэн но Ӟумъя батырлэн ватка калыкез уйёсы лушкем келямзы…

Камитэз нуись Япанчаен Явуш чырткем вамышъяло. Мӧйыос но соос сьӧрысь уг кылё. Дырын-дырын шокамзы гинэ кылӥське. Азьпалан кыр инты адӟиськиз ни, юртъёс сыло, ӵынъёс пото, нокин ӧвӧл, оло, ваньмыз чус-чус, бус-бус, гань-гань…

– Номыр татын уг воштӥськы, бусъёс ноку, шӧдске, уг кошко, пегӟыны но ӟеч быгато казак пиосыд… – пальыштэ Ӟумъя.

– Соиз юан ӧвӧл… Тӥ но ук Усман татаен со быдӟа ужез нокинлы возьматытэк лэсьтӥськоды! – куанэмзэ уг ваты Уча, собере киоссэ ым азяз гумыяса коӵо кадь куаӵыртэ.

Писпуос сьӧрысь соку ик одӥген-кыкен пото ог витьтон адями… Писпуосысь но юрт вылысь но шуак-шуак тэтчаса васько пилеш йыро казак пиос. Палашъёссэс киязы бергатыса, кӧрыкъёсазы донгало, пукыӵъёссэс тыбыразы интыяло, пукыӵ ньӧлъёссэс пуйыосазы. Куш шорысь пичи юртысь потэ ачиз Усман тата. Дӧдьыез нуисьёс Камитэз со азе паськыт ӟус вылэ выдто. Усман таталы юрттӥсь казакпиос шуак ужзы борды кутско, кин кытчы пазьгиське. Нош ик кылӥсько тӥрен тюккетэм куараос, дурисьёслэн ожтӥрлык дуремзы, пукыӵ ньӧлъёслэн но шибодыослэн пулъёс вылэ мертчылэмзы. Кыӵе ке кикыпиос пужымъёс вискы куинь интые гу гудыны кутско. Нюлэс пумынгес ваче пумит сылӥсь пияшъёс ӟеч чаклась дышетӥсьёссы вӧзын ожтӥрлыкъёсын шонасько. Зэмос Кикыкуш, огкылын, зэмос казакъёс! Шыд пӧзьтӥсьёс шыдзэс пӧзьто. Ӝук пӧзьтӥсьёс ӝуксэс сурало. Нянь пыжисьёс няньзэс пыжо, табаняньзэс вӧяло. Ческытлэсь но ческыт зын волдӥське котьку но та Кикыкушын. Амалтэк пальпотэ Ӟумъя ватаман… Тодаз вае аслэсьтыз казак дырзэ. Но трос адӟем ватаманлэсь саклыксэ нош ик басьтэ кыдёкетӥ поръясь «куака-кырныж уллё»… «Иське, Явуш кучыран, соосты саклыны куриз…» – али гинэ валаз Ӟумъя батыр.

– Уча… – шуиз со каллен гинэ.

– Кылзӥсько, ватаман…

– Юнматы ай тон чакласьёстэ тросгес шур дуре, кам дуре, Усман тата котыре но пукты… Маскара гурт пала но чаклась борддор кылдыты…

– Ӧйгес вала, ватаман?.. –  шуак луэ Уча. – Мар ке луиз-а, мар-а?..

– Луиз… Тодонъёсмес утчась «храмчиос» нош ик асьме палан ветло… Куке ветлӥзы ни вал соос Арсавылтӥ, собере коми-гондыр выжыосмы пала кошкизы…

– «Кулэм киен» ветлӥсь орденъёс? – синъёсыз лек чилекто Учалэн.

– Соос… Ӵапак соос, кинъёс тонэ вӧсь каризы… Табере выльысь асьме тодӥсьёсмылэн йыразы копасько… Вӧсясьёслэсь, туноослэсь тодэмъёссэс поттыны туртто… Пӧлазы асьмелэсь кылмес но тодӥсьёссы вань… Огкылын, юри асьме доры вуэмын…

– Мар соослы нош ик Зарни Аньлэн мусторез кулэ?

– Табере соослы Зарни Мум кулэ…

– Зарни Мумлэн мусторез пыдло ватэмын. Кин отчы пыроз, со кулоз. «Паньгам» нёжалэз озьы гинэ уд ортчы…

– Соос киын вань асьме эксэй нылмы, солэсь вирозэ соос кулэм китяпазы вылэ киськало… Кулэм китяпа улӟе но возьматэ куд пала мыныны…

– «Эксэй нылмылэн вирыз?..» – тыпак дугдэ Уча.

– Эксэй нылмылэн вирыз! – серектэ Ӟумъя. – Со нылашлэн вирыз кулэм ки вылэ ке усе, кулэм ки улӟе но возьматэ кытын Шунды Мум…

– Мон малпасько вал вузчи сюресъёс вылын со огшоры вераськон…

– Оскы мыным, «кулэм ки» возьматэ… Соос киын асьмелэн «эксэй нылмы»…

– Кытысь сыӵе «эксэй нылмы»? – пайме Уча.

Нош куке ватаман ваньзэ лад-лад валэктэ, Учалэн кышкатскем синъёсыз шудбурен арало.

– Узыбей?.. Гульсилялэн но Эшмурзалэн нылзы – эксэй ныл?..  Табере асьмелэн эксэй каръёсмы Ош шур дурын, Чупчи дурын, Ватка дурын сылыны быгатозы! – чилекъяло синъёсыз Учалэн. – Ватаман…  Кучыран басьтон монэ мед сиёз, та учыр огшоры учыр ӧвӧл, та удмурт туноослэн верамзы асьме доры вуиз. Ачиз Зарни Мум эксэй нылмес вайиз!

– Соин ик, Уча, али мынам ошкуйчиосы «эксэй нылэз» лушкасьёс сьӧры уйисько. Нош асьмелы Кизили Пуртэз утёно… Валамон?

– Ма кызьы валамон уз лу, валамонлэсь но валамон!

Ӵапак со шорын Ӟумъялэн йыр йылазгес писпу борды пурт бышкалскиз.

– Япанча, тон мар? – шуак луиз Уча.

– Мон дурынчиез кортӵогай… – мынектӥз, пуртсэ ишкалтыса, Япанча, Тапалан соос укыр лекесь, лексьысал куддэс ке.

Ӟумъя пальыштыса учке Япанча шоры… Япанча возьма солэсь мар ке верамзэ. Нош Ӟумъя номыр уг вера…

– Но тон, Уча, умой тодӥськод, кин со сыӵе «кулэм киен» ветлӥсь… – азьланьтэ Ӟумъя батыр. – Тодӥськод, кызьы Зарни Анез соку утимы, табере соос асьме Капка-Ыбесъёсмы пыртӥ эксэй нылмылэн кужыменыз Зарни Мум доры пырыны туртто. Соин Усман тата туж чурыт вераз Узыбеез быдтон сярысь куаразэ… Уг оскы со, Узыбей, Зарни Мумез утьыса, ассэ быдтыны быгатоз шуыса…

– Кучыран басьтон монэ мед сиёз… – кӧсам куараен шыпыртэ Уча. – Нош кин быдтыны кулэ?..

– Япанча…

– Япанча? Но со татын ук, нош Зарни Мумлэн Ыбес-Капкаосыз «Паньгам» сьӧрын… Со дорозь солы кема мыноно луоз…

– Мон но, Усман тата но тодӥськомы – Япанчалы со понна нокытчы ветлыны кулэ ӧвӧл. Со татысен ик Узыбеез ӝокатыны быгатэ. Со Усман таталэн верамез бере ик чакласа улэ ни, куд пала со храмчиос вуизы…

– Кызьы со татысен ик ӝокатыны быгатэ? – паймемзэ уг ваты Уча.

– Быгатэ, солэн кияз Кизили Чача, кудӥз соку ик сое котькытчы вуттыны быгатэ, Индралэн Агни валэз кадь ик… Соин ик Усман тата сое бырйиз… Но со возьма на мынэсьтымзэ но куараме… Мон ӧй вера на солы… Но со мынам куараетэк но быгатэ та ужез быдэстыны. Кык туно куараос одӥгзэ туноез вормо… Зарни Мумез утён понна Усман тата эксэй нылэз но ӧз жаля, быдтыны косӥз нырысетӥ Ыбес-Капка азьын ик. Нош мон Япанчалы ӧй вера на куараме. Но мынам куарае Узыбеез утён понна ке но, Япанча ассэ уз небӟыты таӵе югдуре… Мон тодӥсько, со адӟе кызьы мынам ошкуйчиосы уйисько храмчиос сьӧры… Зарни Мумлы кышкытлык ке кылдыны кутскиз, со малпаськытэк ужзэ быдэстоз… Соин ик тазэ ачиз Инмар мед радъялоз ни… Асьмелы мукет пырон амалъёс сярысь сюлмаськоно…

– Зарни Мум доры Усман тата гинэ Кизили Пуртэныз пырыны быгатэ. Но со одӥг пол но со доры ӧз пыра… Пырыны быгато Мустор карысь туноос, но соос нокинэ Зарни Мум доры уз лэзе, ӝоггес асьсэды быдтозы…

– Вань на, Ӟапык верамъя, эшшо куд-ог амалъёс. Но мынам ошкуйчиосы уз сётэ соослы нокыӵе амалзэс уже кутыны. Кыле на Усман тата сямен пырон амал. Нош Кизили Пурт, Ӟапык верамъя, котькин кие туннэ сюрыны быгатэ…

– Шонер, туннэ «Инвожо» нуналэ Усман тата куинь быръем егитъёслы Кизили Пуртсэ сётыны турттэ… Кинъёс со егитъёс мон уг тодӥськы… Усман тата шуэ, дырыз дыръя тододы. Но шуо: дят адямиос но пуртэз басьтыны быгатозы, сэбедзэ шонер лэсьтӥзы ке… Усман тата верамъя, табере Пурт эрико луэмын, малы ке шуоно со Пуртэзлы кузёзэ воштыны косон вӧсьсэ лыдӟиз ни… – куалектэ Уча.

– Соос ваньзэ лыдъяса куинь уллёен лыктэмын. Эксэй ныл сярысь тодо ни ке, Кизили Пурт сярысь но вань сэбедъёссэ тодо, шӧдске. Учкы ай нырысь со «куака-кырныжъёсты»… Малы соос отӥ но татӥ но бергало? Уг кельшо соос мыным… Кут самой ӟечъёссэ кикыпиостэ…

– Одно ик, ватаман… Таӵегес ик «куакаос-кырныжъёс» лобазы Парма котырын но…

– Но ваньзэ дыртытэк… Соос тӥни «куака синъёсын» чакласа уло… Кикыкуш улон медаз воштӥськы… Оло ке, азьвыл сямен ик ужъёс лэсьтӥськоды… Медаз шӧдэ асьмелэсь соос сярысь тодэммес…

– Валай, ватаман… Озьы ик каромы…

Учаен Ӟумъя каллен гинэ кык пала кошкизы. Ӟумъя пиез пала, нош Уча казакъёс пала, азяз шедемъёслы мар ке лушкемен пеляз вераса.

Кузялэс йыро, зэрпалъёслэсь ӧжытак пичигес мугоро но ваньзылэсь кык поллы ӝужыт Усман тата аслэсьтыз вӧсь кылъёссэ чирдэмез бере, кузь чиньыоссэ Камитлэн кымесаз понӥз. Камитлэн пыдъёсыз тэтчизы, киосыз кузёк луизы, нош мугорыз, кызьы ке чоняса музэн, кӧня ке омыре ӝутӥськиз…

– Бур палтӥз потыны куриз-а? – юа Усман тата вӧзаз матэктэм Ӟумъялэсь.

– Озьы, тата… – пальпотэ Ӟумъя.

– Юнме мыняськод… Нош тон эн ик мыны со пужымъёс пала… – небыт но укыр чурыт вера Усман тата. – Палэсмурт юнме уг поты… Со трос дуннеосын герӟаськемын. Котькытчы пал мугорзэ пыртыны быгатэ. Тыл дуннее но, ву дуннее но, омыр дуннее но, музъем дуннее но. Тросэз туннэ мумыкор азе понэмын… Возьма астэ, эн пыры тылӝуэ…

– Утиськомы, тата, инмарен ке улӥмы…

– Тон, Ӟумъя, Кылдысин ӧвӧл, выльысь та дуннее кылдыны…

– Ярам, тата, валай мон, уг пота пужымъёс вискытӥ…

– Вот озьы ик кар, Обыда но тон ӧвӧл, пужымъёс вискытӥ тэтчаса ветлыны…

Усман тата пияшез киыныз эскерыса потӥз но берен ӟус вылаз лэзиз.

– Камитлэн ваньмыз умой. Алангасарлэн, озьы ик Палэсмуртлэн кужымыз пушказ пыӵамын… Туннэысен со тынад ӧвӧл ни, табере со Алангасарлэн но Палэсмуртлэн туноез. Нош ӝоген вань Арсавыллэн чакласез-утисез луоз, шӧдске. Нош тонэ ӟыгыртэме, яке бордад йӧтскеме уз луы на… – синъёссэ Камит бордысь басьтыса, Ӟумъя шоры учке Усман тата. – Тодӥсько, сузяськон дырыд ӧвӧл. Сьӧдлэн кыр дуннеез котьку сапта… Нош юрт, малпасько, чидалоз, Арча нылмылэн обросъёсыз утёзы, кошким пыром, уз ӵашйы ӧс янаке, янак сьӧры пырем берам, китӥд ке кутыса пыртӥ, вераськонмы асьмелэн трос люкаськемын… – шуэ со Ӟумъялы. – Нош тон, пие, эн султы на, кылльы мон потытозь… – каньылак вешаса вера синзэ усьтэм Камитлы.

Камит йырзэ шона. Со ӝыныё уйвӧтын кадь. Йырыз сазь-сазь, нош мугорыз омыр кадь номыр чурытсэ уг шӧды, гань-гань капчи солы… Зэмзэ ке, Палэсмуртэз адӟем бераз со уйвӧтэ быдэсак ӧз усьы. Со тазэ но дуннеез, созэ но огак ӵош адӟиз, Палэсмурт кадь ик.  Кикы пиос но солы кельшизы. Тужгес но писпуэ бурдоос кадь тубамзы. «Ку-ку!» – ас понназ шыпыртэ Камит, Кикыкуш шоры учкыса. Кельшиз солы, кызьы Явушен Япанчаос сое дӧдьыен нуизы. Атаезлэн но пизэ яратон кужымыз али ке но сюлэмзэ шунтэ. Нош Усман тата шунды кадь та Кикыкушез югдытӥз. Ноку уг малпа вал Камит, таӵе кужмо адямиос но вань шуыса.

– Паймымон ик та Усман тата, – малпаське пияш. – Солэн ки кужымыз, пӧсь мунчо изъёс вылэ ву кисьтыса кылдэм пӧсь омыр сямен, вань мугортӥз пӧсь тулкым ортчытӥзы. Нош лул кужымыз чылкыт ошмес кадь ортчиз вань лул мугор пыртӥз, кытысь ке мертчем я лякиськем кырсь шелепъёссэ лӧпкытыса. Адӟиське, со но югыт зэрпалъёс пӧлысь ваткаос пӧлы кемдытэмын.

Кӧня ке дырлы Камитлэсь саклыксэ басьто писпу йылъёстӥ тэтчаса кошкись адямиос.

– Таосыз но бурдоос кадь лобало! – серектэ со, вал ни солэн кылэмез камкикыос сярысь. Вань ни вал солэн лушкем малпанэз, куке но татчы шедёз шуыса. Пияшлэн куанонэз шудбур куара кадь ортче писпуостӥ, бурдо каръёстӥ, туала но вашкала тодонъёсыз возись крезьёс пыртӥ…

Камит сакгес луысал ке, одно адӟысал, кызьы Усман таталэн корка пырон азяз Япанча шоры туж сак учкиз солэн татаез. Япанча но солэн татаез шоры сокем сак учкыса сылӥз. Учкизы соос Узыбейлэсь азьпал улонзэ мертаса. Гирышонын кадь, кин вылэ боды пум кылёз. Нош Ӟумъя батыр аслэсьтыз йырзэ отчы-татчы шоназ. Тае адӟытэк ӧз кыльы Усман тата но. Ӟумъя батырез китӥз кырмыса, ас сьӧраз ӧс выжытӥ пыртэмез бере со Япанча пала учкыса, киоссэ кык пала шонтӥз, мусульманъёслэн вӧсьсэс быдтэмзы кадь…

Мар, пӧй, карод… Ӟумъя батыр мукет сямен малпаське… Табере аслад гинэ куараед кылиз… Япанча ваньзэ валаз, нош ик пуртсэ писпуэ зӥртӥз. Мар сярысь валамзэ нокыӵе пусъёс ӧз шараялэ, Япанча но нокинлы ӧз усьты. Но Усман тата но, Ӟумъя батыр но валазы, Япанча уз дырты на ужзэ лэсьтыны, возьмалоз Узыбейлэсь Ыбес-Капка доры вуэмзэ…

Камит эшшо но сакгес ке луысал, одно ик адӟысал на, кызьы Кикытэльысь казакъёс но аспӧртэм пусъёсты ог-огзылы возьматъяса, лушкемен мар ке ивор верало, кызьы куд-огъёсыз тэле бусъёс пӧлы ышо, кызьы Усман татазэс возьмась казак пиос но, кин кыӵе ужен, корка котырегес кариськизы, ож тӥрлыкъёссэс асьсэлы матэ ватылӥзы… 

Нош Камитлэн йырысьтыз уг кошкы Узыбеезлэн мусо ымнырыз, туж кышкыт солы Узыбей понна… Нош мукет ласянь кышкыт но ӧвӧл кадь. Камит шӧдэ, со одно ик мозмытоз сое.

Усман татаен Ӟумъя корка ӧс сьӧры ышемзы бере, олокытысь нош ик кылдӥз ачиз Уча, со Камитлы кырмыштӥз но сое вераськыны косытэк кияз сётӥз кык ыргон сульдэръёсты, Арча ныллэсь сусыпузэ но тӧдьы дукесэныз сылӥсь Арча нылэз. Камит ваньзэ ачиз сямен валаз, Арча ныл чудьяослэн туж кужмо кылчинзы, со куке но, чудьяос та дуннеын улон вакытэ, Инмар Пиез но солэсь Анайзэ сусыпу вайёсыныз шобыртыса, кышкыт адямиослэсь утем. Нош солэсь но азьвыл умой алпез, урод алплэсь утем, аслэсьтыз тӧдьы дукессэ умой алплы сётыса, нош солэсь сьӧд дукессэ ас вылаз дӥсяса. Озьы со ӝуам урод алплэн умой алплы чилектон кадь ыстэм тылызлэсь. Нош утись кужымыз сокем зол луэмен, Арчалэн ӝуась мугорыз сусыпулы берытскем. Кузонысь зэрпалъёслэн черкъёсазы вань солэн ческыт сусыпу зынъёсын лӧсъяськись обросэз. Учалэн сётэм пичи обросъёсысьтыз но сыӵе ик ческыт зын лӧсъяське… Вераны кулэ, Арча сярысь мадьёс туж уно калыкъёс пӧлы вӧлскемын, апокрифъёсын но со вань, черкъёсын кутымтэ еванглиосын но. Нимзэ солэсь котькудӥз калык пӧртэм сямен вера ке но, кылсярысь Ворса, Борса, Арса, Вортча, Бортӟа, солэн пуштросэз «сусыпу» но «утись-ворсась кужым» луыса кылемын…

Уча батырез но Камит ӟеч тодэ, со трос ветлӥз татаеныз кам сюресъёстӥ. Соин ик Учаез аслэсьтыз агайзэ кадь гажа.

– Тазэ дэрем пушкад чыртыяд ош, нош тазэ сюлэм дорад дэремедлэн пуш кӧкраказ пон… – шыпыртӥз Уча. – Явуш! Япанча! – кеськиз со, шундылэсь пегӟыса, лапас улын гозы керттыны кутскем пиос шоры.

– Ми кылӟиськом, ватагай… – лыктӥзы пияшъёс.

– Эн кельтэ ошкуйчиез огназэ… – шонтӥз йырзэ Камит шоры Уча. – Таталэсь но юртсэ эскере, нокин соос доры медаз пыры… Асьсэос потытозь… Тата тӥледды куиньнадэс ик татын возьманы косӥз.

– Валамы, быдӟым ватагай… – шумпото Япанчаен Явуш Камит доры матэктэмзылы. Соослэн кемалась со доры пуксемзы потэ вал ни. Соос кыксы ик тодо вал, кин со Камит.

Уча та кык пияшъёслы эшшо мар ке вераны турттэ на вал, пыриз ни вал кисыяз таосызлы но Арчалэсь ыргон обросъёссэ сётыны, но ӧз дӥсьты. Кизэ шонтӥз но кошкиз. Угось таосызлэн асьсэлэн инмаръёссы, озьы гинэ уд матэкты доразы. Котьма ке но ногай мурзаослэн выжыоссы…

Пиос ӧз ик адӟе ни, кызьы Уча, кикыпиосты басьтыса, бергась «куакаос» пала ышиз. Кызьы писпуостӥ лобась пиос но Уча сьӧры кам пала кошкизы… Ваньмыз со нуналысь нуналэ мынӥсь дышетскон кадь адӟиськиз…

– Ӟечбур, Камит! – шулдыр мылкыдын вазиз Япанча. – Мынам нимы…

– Япанча! – пальыштӥз Камит, йырзэ солы шонтыса…

– Тон кытысь тодӥськод? – шуак луиз ногай мурза.

– Тодӥсько… – вушйиз Камит. – Нош тон, Явуш! Иоаннлэн, Муско эксэйлэн эшез луиськод. Ӵапак со понна тонэ татчы вуттӥзы…

Явушен Япанчаос гуньдӥзы, мар вераны уг тодо. Учко Камит шоры ӟудыса. Собере ог-огзы шоры. Япанча Явушез ас палаз кыске.

– Буйгатскы, Явуш… Со но адӟись бабасыр, татаез вераз ук… – вань кужмысьтыз кырме со Явушез. Соиз туж чырткем мозмиське.

– Эн куты, Япанча, мон тон кадь жугиськись ӧвол ук! – кизэ Япанча азе пуктэ Явуш. – Мон ӧй вала, Камит, малы, тон шуид, монэ татчы вуттӥзы? – шыпыт гинэ юа Явуш.

Камит нокыӵе уг кариськы. Лулыз солэн вукарнан кадь интыысьтыз но уг выры…

– Мар кырныжъёс кадь тэтчаськоды? – ӟазыртэ со, пальпотыса. – Монэ дӧдьы вылын татчы вайыкуды ик мон тӥледыз тодмай. Тӥ но монэ тодмады. Мар юнме бӧтьыртон чильпаськоды?

Пиос куиньназы ик Усман таталэн корка шораз учкыны кутскизы. Та вадесэ куиньназы ик шуак шӧдӥзы, отысен но соосты адӟо, эскеро шуыса.

– Валамон… – аслыз ачиз шуиз Явуш.

– Мар валамон? – выжыятэ сое Япанча.

– Камит чалмыны, шып кариськыны куре… – серектэ Явуш. – Со шуэ, куиньнамы ик ог-огмес тодӥськомы… Малы тодымтэ улэ аналскиськомы? Ӟеч но буро дэмлан…

– Со шуэ кырныжъёс кадь тэтчаськоды! – Камит шоры учкыса куаретэ Япанча.

– Мон соглаш Камитэн… Тон ваньзэ кырныжлэн синмыныз мертаны турттӥськод.  Омырын лобаськод, оло… – йылпумъян лэсьтэ Явуш.

– Мон инбамысен учкисько! Нош тӥ – ву бабасырлэн синмыныз, тон но бабасыр, со но бабасыр… Укыр кескичесь кыкнады ик! – олокытысь ки вылаз васькем кырныжзэ пельпум вылаз пуктэ Япанча. Быркыт быдӟа сьӧд кырныж бадӟымесь синъёсыныз учкылэ Явушен Камит шоры.

– Кылдысинлэн даурез кадь пересь ни песятаедлэн кырныжез! – пальпотэ Камит.

– Быркыт кырныж 300 ар улэ, ай солэн сомында аръёсыз… – кырныжзэ веша Япанча.

– Трос-а адӟод 200 ар тырмем бурдолэн синъёсыныз… – уг сётскы Камит.

– Нош бабасырлэн синмыныз? – юа Япанча.

– Ву ваньзэ адӟе, ализэ но вуонозэ, ву нуэмзэ но… – дыртытэк вера Камит, Ӟапыклэсь Ву кылъёссэ тодаз вайыса. – Песятаед тынад чылкыт вал, нош вораськись татаед сярысь мон озьы ӧй шуысал…

– Тырмоз татае сярысь… – дугдытэ сое Япанча. – Тон со сярысь уд тодӥськы… Тон тани вера, мар Явуш сярысь тодӥськод, нош мон тодэмдэ эскеро.

– Мон уно пол адӟи Явушлэсь Муско эксэен вераськемзэ, кызьы соос ялан ӵош ветлӥзы… Явуш солы тужгес но секыт дыръяз юрттӥз… Ӵапак соин али но со Явушез тодаз вайылэ… Яратэ…

– Али но? – пайме Явуш.

– Али но тодаз вайылэ… – синъёссэ ворсаса вера Камит. – Тон солэн нырысетӥ эшез… Кышкасьтэм ватагай пи… Со котырын соку ляльчи пиналъёс сяна ӧй вал… Тыныд гинэ со вань висёнъёссэ усьтылӥз…

– Мар зэм, соиз зэм… – тодаз вайыса, малпаське Явуш. – Трос ми Ванькаен вераським… Нош табере со, бигерча моклок, аслаз ордаеныз Кузон вылэ лыктэ…

– Солэн ӧвӧл мукет амалыз… – серектэ Япанча. – Мон но со интыын Асьтархан но Крым пала учкись Кузонэз пазьгысал, Асьтарханэз но, Крымез но, Сибырез но, Ногайёсты но…

– Иоанн но озьы ик малпа… – ӟазыртэ Камит.

– Мон Иоаннлэн озьы малпамезлы уг паймиськы… Со визьмо эксэй! – азьланьтэ Япанча. – Нош Явушлы али но шаккатӥсько: кызьы со Муское вуыса муско эксэен эшъяськиз?.. Кызьы со тынад пӧрмиз, Явуш? Муско Кузон ӧвӧл ук?..

– Мынам татае, песятае кадь ик, муско вузчиосын ужа вал… Юри со монэ отчы нуллӥз, Мускоысь байаръёсын но Муско эльйырен тодматыны… Нош ӟуч кылэз мон пичиысен ик тодӥ, озьы ик латынез, перси кылэз, араб но ашкеназ кылъёсты, бигер кылъёсты. Пичи дырысен ик ву вылын бере, амал ӧй вал тодытэк… Пичиысен ик тодӥсько вал лыдъяны-чотаны, пӧртэм кыло гожтэтъёсыз чырдыны. Нош Муское вуыса татае тодматӥз уйпал шуръёстӥ вуэм вузчисын… Англичанъёсын, шведъёсын, прусакъёсын. Соослэсь но мон кылзэс ӝог дышетӥ… Иоанн ваньзэ немецъёс сярысь, тужгес но ляхъёс но шведъёс сярысь валаны турттӥз, юри монэ вераськытэ вал кунгож сьӧрысь вузчиосын… Ачиз но со ӝог кылъёсты дышетӥз… Книгаосыз уно вал, ми ӵош пуким чирдыса, мон солы кылысь кылэ берыктылӥ… Посадъёстӥ, приходъёстӥ, торжокъёстӥ трос ветлӥмы.  Озьы кылдӥз милям эшъяськонмы, вакчияк верано ке… Табере аслад черодэд, Япанча…

– Мынам? – пайме Япанча. – Мынам улонэ тӥляд кадь узыр ӧй вал. Мон вузчи но, ошкуйчи но ӧвӧл… Зэрпал но монэ ки вылаз ӧз ӝутъя, Су Анасы но, ву пыдсы пыртылыса, уно кыл тодон ӧз кузьма…

– Малы тынэсьтыд вань выжыдэ быдтӥзы?.. – меӵак юа Камит.

– Выжыме?.. Ӧй малпа вал, тае но тодӥськод шуыса… – пальыштэ Япанча.

– Сое Камит гинэ уг тоды… – итӥське Явуш.

– Ярам, усьто мон пичияк мурӝолме. Выжыме виры понна быдтӥзы… Мугзэ ӧз вералэ, уз но вералэ ни, дыр… – ас сяменыз валэктӥз Япанча. – Созэ Карна но Желя сузэръёслэсь юано… Яке Дэлето но Дэлеттэм, Доля но Недоля сузеръёслэсь. Песятае но татае кадь, кенӟалиос пыр тодоно, кык кенӟалиез куйласа, огезлэсь синзэ венен шортэн вурыса, нош мукетызлэсь – ымзэ, нокинлы медаз вера, малы сое Желя но Карна, Доля но Недоля доры ыстӥзы. Кенӟалиос укыр вераськисесь, ымзэс ворсаны уг быгато… Соку ик кин азязы пумиське, ваньзэ куадало. Соин тодыны ыстэм кенӟалилэсь ымзэ вуро. Нош кыкетӥезлэсь синзэ вуро, мултэссэ медаз адӟы шуыса, мед вералоз сое гинэ, мар солы ивортэ ымзэ вуремез…

– Кенӟалиосты куйлатэк но мон сое тодӥсько… Мугыз Кизили Чача понна, кудзэ татаед пуныйыръёслэсь лушказ… – шыпыртэ Камит. – Соин ик урод сьӧд вегин выжыос со Чачаез утчаса вань выжыдэ тынэсьтыд коразы… Тонэ но корасалзы, нош тонэ, пичи экеез, кинъёс ке ватыны быгатӥзы… Кырныжед но бордад лякиськиз… Малпаськод, ӧз кыле ни со Чачаез утчась сьӧд ведӥнъёс?

– Соос Чачаез утчамысь дугдӥзы… Малы ке шуоно син азям корам сузэръёсы-вынъёсы, татае-анае, вань ӵыжы-выжыосы понна, мон ачим соосты аслам Кырныже но Чачае пыртӥ шедьтылӥ… Соос туж кескичесь но жаляны быгатӥсьтэмесь вал. Чачаез кайпалтон понна пуныйыръёс доры юри кый нылъёсыз келязы. Нош пуныйыръёс кый нылъёслэсь поромыса, асьсэлэсь тунооссэс вандылыку, берпум тунозэс утиз мынам татае… Нош со секыт ранӟемын ни вал, соин Кизили Чачазэ утьыны косыса, выжы Кырныжмылы сётӥз… Шуиз, пуныйыръёс кый нылъёсын герӟаськемзы понна, Кизили Чачатэк асьсэос бырозы… Нош куке соос пӧлысь одӥгез гинэ кужмо пӧйшурасьсы кылёз, кин чылкыт тунолэн пиез луэмен, кый нылъёсын ӧз герӟаськы, со ачиз лыктоз Кизили Чачалы… Соку Кырныж солы Чачаез берыктоз…

– Тон малпаськод, пуныйыръёс пӧлысь кин ке кылиз на?.. Ӧз быдтэ шат соосты аримаспаос?..

– Палсинмо аримаспаос кыйнылъёсын герӟаськемъёссэ гинэ быдтӥзы… Малы ке шуоно соос асьсэлэн кыйкышнооссылы ялан аримаспаослэсь зарниоссэс лушказы. Пуныйыръёс тросэз тунозылэн каргам кылызлы луыса, асьсэос Кизили Чачазытэк быризы… – Кырныжзэ писпу вылэ лобӟытыса валэктэ Япанча.

– Мон малпасько вал палсинмоос но Чачазэс соослэсь утчало?..

– Аримаспаослы Чача кулэ ӧвӧл… Соос Чачатэк но адӟо…

– Япанча, мыным со кулэ, вай мыным кӧня ке дырлы Чачадэ… Мыным со али туж кулэ… – кыӵе ке пыдлось, кыйлэн кадь шиетӥсь куараеныз Япанчаез но Явушез куаляк уськытэ Камит.

Япанча шуак луэ, собере ас понназ малпаськыса пуртъёссэ кӧрыкъёсаз тыре. Явуш я созэ учке, я тазэ, я чалмыт шильыртыса ветлӥсь тӧл шоры.

– Ме… – шуэ Япанча, гадьысьтыз Чачазэ поттэ но омыре сое зыргалтэ. – Кут, кутэмед ке луиз… – серектэ со.

Чача кыдёке вылэ ӝутскыса берен усьыны кутске. Тани со усе ни вал Камитлэн кияз, но олокытысь вуэ Кырныж но ошетэныз ик валче басьтыса сое кошке.

– Ӧз удалты тыныд… – серектэ Япанча. – Ужпум со бордын, мон солэн кузёез ӧвӧл. Кырныж солэн кузёез. Сётэмез потӥз ке, сётоз. Солэсь кур…

Камитэн Япанча кыксы ик Кырныж шоры учкыса асьсэлэсьсэ малпасько. Шим-шим чалмыт луэ. Омырысь кузькукъёс но кытчы ке тюазы кадь.

– Асьмеос малы ке одӥг герӟетэн думылэмын… – умойтэм кыстӥськись чалмытлыкез сӧрыса кутске Явуш. – Куиньнамесыз ик дышетӥзы вылӥ дышетӥсьёс, вылӥ туноос… Уйвӧтъёсын но ӵош адскылӥмы. Ялан кыӵе ке кужымъёс асьмеды ог-огместы адӟытылӥзы. Кузон базарын но, Муско азбарын но, Несториан черкъёсын но, ож луд вылъёсын но. Асьмелы кырӟазы крезьчиос, хазаръёс, булгаръёс, арсавылъёс. Асьмеды нуллӥзы быдӟым туно кенешъёсы, быдӟым ожъёсы. Адӟытӥзы, кызьы «сьӧдъёс» дуннемес басьто, кызьы соос осконъёсты быдто, кызьы пожало калыкъёсты. Соин ик та улонын пумиськылэммы ке но ӧй вал, асьмеос ог-огмы сярысь уно тодӥськомы… – эскериськысагес учке Явуш эшъёсыз шоры. – Япанчалы ӧз удалты пичи дыръяз, одӥг Инмар тодэ, кызьы со улэп кылиз, Чачазэ басьтон понна, трос сьӧд ведӥнъёс сое утчазы. Но троссэ соос пӧлысь, пӧйшурасьёс сикыӵъёсысь но пӧетъёсысь шедьтылӥзы… Тынад но, Камит, бадӟым кайгуэд вань, кудӥз милемыз писыратэ… Мар тонэн луиз? Дырмы асьмелэн ӧжыт, соин ик ватытэк вера, малы тыныд Кизили Чача?

– Мозмытэме потэ одӥг адямиез… – ваньзэ уг усьты соослы Камит.

– Малы тыныд со бигер-удмурт ныл? – ӧжытак тодэмзэ усьтыса, выжыятэ солэсь Явуш. – Со ныл ке вӧзад луиз, тон, Камит, бырод, озьы мыным потэ…

– Мыным но озьы потэ, нокыӵе Чача тыныд уз юртты… – шуэ Япанча. – Нош тон пуныйыръёс сямен бырыны кулэ ӧвӧл… Тон вылэ вань Арсавыл пуктэмын, ми вылэ кадь ик…

– Мынэсьтым яратоно нылашме туннэ лушказы… Нош тӥ шудӥськоды… Кытын жалянды?.. – уре соосты Камит. – Тӥ со нылашез уд тодӥське ук! Со кыйнылаш ӧвӧл…

– Тодӥськом! – мынектэ Япанча.

– Сое татаез, кузонысь янычар, тӥляд ошкуяды кельтӥз, Пичи Арчикаре яке Маскарае интыяны… Озьы ук? – ватса Явуш. – Нимыз узы-борыен герӟаськемын…

– Узыбей нимыз… – серектэ Япанча. – Ми мар но со тодӥськомы, ойдо усьты мурӝолдэ…

– Иське, тӥ ваньзэ тодӥськоды… – лулӟе Камит.

– Ваньзэ ум тодӥське… – шуак вера Япанча. – Милям дырмы ӧй вал на, кенӟалиосыз куйласа, Карна, Желя, Доля, Недоля сузэръёс пыртӥ учкыны. Ми тонэ, кӧлӥсь нушыез, татчы вайимы ук. Вера ачид, дырмы асьмелэн ичи, кин со Узыбей, малы сое лушказы, малы со кышкытлык кылдытэ калыкмылы?..

– Лушказы Зарни Мумез утчась храмчиос… – валэктыны кутске Камит. – Юри соос Маскара шур азьын возьмаллям… Тодӥллям, Узыбей но милям ошкуямы луоз шуыса…

– Дугды… – куспетӥ каре сое Япанча. – Ми адӟимы, кызьы со вал. Кызьы ошкуйчиос першалэн ыбисьёсты утчаны пазьгиськизы. Кызьы тӥ куинь кузя ярдуре кылиды. Кызьы соос куинь кузя потӥзы… Кызьы Ӟапыкез погыртӥзы, кызьы эмъязы… Кызьы тӥ ваньды катыса сылӥды. Ми тодӥськом, малы тон астэ ӧд усьты, сётскид каттырон кужымзылы… Ми огзэ ум валаське, малы одно Узыбеез возьмазы?..

– Вирзэ эскерон понна…

– «Кулэм килэн» со вир шапыклэсь улӟемез, Зарни Мум пала возьматэмез, мае со сыӵезэ вера?.. – выжыятэ Япанча.

– Со «эксэй вир» сярысь вера, кудӥзлы мынам али но оскеме уг поты… – серектэ Камит. – Джучилэн улусаз Джучилэн эксэй вирыз гинэ кӧня ке дырлы улӟытыны быгатэ кулэм мугорез, Джучилэн вирыз гинэ тодэ, ваньзэ тапалась ватосъёсты, со гинэ тодэ, кытчы ватэмын Зарни Мум, кытын солэн Зарни Мусторез. Джучилэн вирыз гинэ аслаз улусаз вань утись кыметъёсты усьяны быгатэ, пырыны быгатэ Зарни Мум доры… Соин вашкала дырысен тодо, уг яра солэсь «эксэй вирзэ» музъем вылэ кисьтыны, нош кин со кадыр вирез кисьтыны дӥсьтэ, сое соку ик ӵого… Нош соос дӥсьто, Узыбеен ӵош пырыны туртто Зарни Мум доры…

– Тон шуыны турттӥськод, Узыбей – со асьмелэн «эксэй нылмы»?.. – пайме Япанча.

– Нош тон малпад, маскара нылъёс пӧлысь «калмез амазонка», кудӥзлы пичи дыръяз ик, Аскарысь Тунолы кадь, вань утись кыметъёсты усьтон понна, «вуко» юнматӥзы?..

– Шонер, озьыгес ик мон малпай… Мыным нокин ӧз вера, со «эксэй ныл» шуыса… Малы ми со сярысь ум тодӥське?

– Нокин туннэ нуналозь уг тоды вал… Ачиз Узыбей но туннэ гинэ тодӥз… Солэн вирыз Зарни Мум доры сюрес возьматэмысь… Нош храмчиос юри со доры лыктӥллям, эскерыны «эксэй вирзэ»…

– Кытысь со пушкы Джучилэн вирыз вуэмын? – паймыса юа Явуш.

– Эбгалэн Чибинь пиеныз валче ышем вирыз солэн мугораз бызе. Нош туннэ со ваткаос пӧлын огназ гинэ кылемын. Ӧвӧл солэн сузэр-вынъёсыз. Анаез но, татаез но табере Кылдысин дорын. Узыбей ке ышиз, ноку уз лу ни арсавыл калыклэн «эксэй вирыз»…

– Нош «храмчиос» кытысь тодӥллям Узыбей «эксэй ныл» шуыса? – паймыса юа Япанча.

– Ачиз Узыбей котькуд сэрегын пичи дырысеныз ик шудон манерен озьы вераськыса ветлэ вал… Ма, тросэз кузон нылъёс пичи дыръязы озьы верасько… Кылӥллям со сярысь «храмчиос»… Шӧдске котькудзэ эскериллям… Туноос пыртӥ учкиллям…

– «Эксэй вирез» соос утчазы Зарни Мум доры потон понна? Озьы-а? – кезьыт юа Япанча, али гинэ пумозяз валаса, ас вылаз пуктэм ужлэсь мугзэ.

– Озьы…

– Нош нырысь «эксэй ныл» ке шедьтэмын, соку сое Зарни Мум ӧз возьматы ук? Йырыныз чукинь луэмын туноослэн верамзы! Та учырын «эксэй ныл» Зарни Мум шоры возьматэ!

Кӧшкемыт тӧл кошке нюлэс куштӥ. Оло ке Зэрпалэн Палэсмурт огазе луыса вань пегӟем тӧлъёсты улляса лэзизы… Медаз, пӧй, кылзэ пиослэсь вераськемзэс.

– Малы одно ик Зарни Мум нырысь потыны кулэ? – шимес куараен ӟазыртэ Камит. – Тыныд уг тырмы «эксэй вирлэн» Зарни Мум шоры возьматэмез?..

– Мыным малы ке уг тырмы. Мон ӟеч шӧдӥсько, куке ваньмыз чылкыт. Нош тынад верамад «кулэм ки» возьматэ Зарни Мум шоры!

– Одӥг вылэ кык ватсад ке куинь луэ, кык вылэ одӥг ватсад ке но – озьы ик. Мар татын валантэмез? Бен, «сьӧдъёс» сое нырысь усьтӥзы, йырын чукин каризы, малы ке шуоно кескичесь. Но эксэй ныл Зарни Мум пыртӥ шедьтэмын! Малы тон визьтэм улсы аналскиськод?

– Малы ке шуоно монэ Узыбейдэ быдтыны косӥзы! – шӧдтэк шорысь лекомыса султэ Япанча.

Камитэн Явушъёс куаляк усё. Япанча мыдлань-азьлань ветлэ.

– Ку косӥзы? Кин косӥз? – интыысьтыз тэтче Камит.

– Косӥзы туннэ, тон татчы вуон азьын, ошкуйдэс пазьгемзы бере. Кадыр адями косӥз…

– Кин? – кӧсам куарен юа Камит.

– Ачиз Усман тата…

– Усман тата?.. – воксё абдраз Камит. – Ку со косӥз? Малы мон уг тодӥськы?..

– Со косыку, тон йырад шуккем кадь, мукет дуннее бездэмын вал. Ас пушкад выйыса из вылын пукид… Усман тата Ӟумъя батырен мон азьын ик вераськиз, со доры вужер мугореныз ветлыса. Шуиз: Узыбеез быдтоно луоз, мон, пе, аслэсьтым кылме верай. Табере, пе, тӥледлы Япанчаен ас кылдэс та пумысен верано. Соин ик мон, ужме быдэстон азьын Ӟумъя батырлэсь кылзэ юаны кулэ вал. Со ке мыным соглаш луэмзэ верасал, соку мыным малпаськоно ӧй ни луысал… Усман тата шуиз соосты Зарни Мум доры лэзёно ӧвӧл. Узыбей, пе, ачиз но уг вала «Ыбесъёсты» усьтыны быгатэмзэ. Соин ик нырысетӥзэ «Ыбесэз» усьтыны ке кутскиз, ӝокатоно. Мон адӟисько, кытчы Узыбейлэн вирыз соосты нуэ… Кизили Чача мыным ваньзэ матэктыса ик возьматэ… Мон кемалась сое чакласа улӥсько, Кырныже но чакла. Ваньзы сое чакласа уло. Усман тата но, Ӟумъя батыр но, Тон но, Явуш но, вань адӟисьёс, вань кулэмъёс учкыса уло, мар луоз со нылашен… Шурали эксэй но чакласа улэ, бичатыны, шӧдске, эксэй нылэз турттэ. Укыр бичатымон уга тынад эксэй нылыд, вань дунне со шоры учке. Мон гинэ возьмасько солэсь нырысетӥ Капка-Ыбес доры вуэмзэ. Ӝокатон понна возьмасько. Угось мынам гинэ луэ али сое Кизили Чача пыртӥ ӝокатэме. Мон али ик сое ӝокатыны быгатӥсько… Такшака кыйлэн куртчемезлэсь кадь со тӧрналоз но погралоз… Мон кие табере кельтэмын солэн улонэз…

– Тон кие гинэ ӧвӧл, куинь туноос кие… – соглаш уг луы Камит.

– Со номыре уг вошты, малы ке шуоно Усман тата ас кылзэ вераз ни…

– Нош мынам татае? – дугдытэ Япанчаез Камит.

– Со соглаш ӧз луы… Нош ик карнанэз тэгызтӥз…

Камит шумпотӥз татаез понна.

– Тон юнме шумпотӥськод, татаед пумит ке но, ми Усман татаен кык кузя, нош кык куара одӥгзэ ворме.

– Тон уд быдты сое! – вань быгытъёссэ юнматэ Камит.

– Быдто! – ӵогем кадь ялэ Япанча. – Мон лэсьто со ужез… Татаед ӧз косы ке но… Ӧй ке лэсьты, мынэсьтым лулме шакшы юбоос борды ошозы сопалаз но дуннеын… Вань выжые сизьым ёзнэтэныз ик ӵушиськоз…

– Тон уд лэсьты! – кеське Камит номыр мукетсэ вераны быгатытэк. – Со тынад Чача утчась ведӥн тушмонъёсыд ӧвӧл! Со «эксэй ныл»!

– Иське, тон валаськод, кыӵе дун монэн тыремын мынам кырныжелэн ваем Чачаез понна! Шӧдске, чик но со огшоры тыремын ӧвол. Ӵапак та учыр понна тыремын – ассэ Зарни Мумез утён понна! Соин ик мынам сётэм кылы чурыт, мон нимме уг сапта калык азьын! Котькин со медло, коть «амазонка», коть «эксэй ныл»! Тон адӟиськод ук, со кунян кадь соосын мынэ, уг пумитъяськы…

– Уг пумитъяськы, соосты пӧян понна… Ачиз утиськон амал утча, ваньзэ сакласа мынэ… – соглаш уг луы Камит. – Узыбей ӟеч тодэ Джучи вирлэсь Джучи улусысь вань ватосъёсты усьтыны быгатэмзэ, озьы ик со вала, мар со арсавыл калык понна Зарни Мум. Со уно пол пумиськылэмын калмез кышноос пӧлысь Зарни Мумез утись туноосын. Буйгалэ, со уз усьты Ыбесъёсты, со ӟеч тодэ «амазонкаослэсь» сямъёссэс. Марысь мар ке ас улонзэ но уз жаля… Чик но кулэ уз лу тыныд, Япанча, сое, сьӧд кый кадь, Такшака Аждага кадь куртчыса, ӝокатыны… Утёз со тонэ сьӧлыкедлэсь.

– Нош тон, Япанча, Узыбеез кадь ик, уд быгатӥськы шат храмчиосты ӝокатыны?.. – юа Явуш.

– Уг! – куаӵак вера Япанча, аслэсьтыз пуртсэ пул борды ыстыса. –Мыным но, Камитлы кадь ик, уг яра усьтӥськыны! Храмчиосты ке ӝокатӥ, «сьӧдъёс» соку ик Чачаез адӟозы, нош Чача пыртӥ асьмеды… Вань вылӥ дышетӥсьёсмылэн асьмеды лушкем дасям ужзы – коӵышлэн быж улаз кошкоз! Малпам ужзэс но асьме азе пуктыса уз вуттэ!

– Усман тата ваньзэ адӟе… Ваньзэ валаса, туноос кадь мертаса лэсьтэ… – серектэ Явуш. – Со тыныд но, Япанча, Узыбеез али ик быдтыны ӧз косы ук, нырысетӥ Ыбес дорозь возьманы косӥз… Озьы ук?

– Марзэ со воштэ? Мон сётэм кылме ӧй быдэсты ке, вань арсавыл калыкмы ӵушиськоз дунне вылысь… Озьы шуиз Усман тата…

– Уз ӵушиськы! – аслэсьтыз пуртзэ, Япанча кадь ик ыстэ Камит. – Мон адӟысал, озьы ке луиз.

– Мон соглаш Камитэн, мон но уродзэ уг адӟиськы, – Камитлы дурбасьтыса итӥське Явуш. – Узыбей чик но кышкамын ӧвӧл, мон адӟисько, со тодэ, «храмчиосты» Зарни Мум доры уз пырты шуыса. Ыбесъёс доры вуон азьын сомында пӧетъёсты ортчоно на, нош «Инвожо» нуналэ «Паньгам» нёжалын соос эшшо но тросгес луозы… Соин ик мон али нокыӵе кышкытсэ уг адӟиськы… Вылаз ик ошкучиос соос доры сусыпуос пыртӥ матэкто ни…

– Ваньзы та югдурез адӟо, ачиз Узыбей сяна… – итӥське Япанча. – Мыным потэ, «храмчиос» но адӟо…

– Уг, «храмчиос» та шормуӵын уг адӟо ни, «Иисуслэн писпуосыз», сусыпуос соослы люкето. «Сьӧд дуннеен» герӟаськемъёс сусыпуос пӧлы ке шедё, соослэн вань визьзы сураськыны кутске, мугорзы чидантэм лыдэ, сусыпу вайёс соосты ӝуатыса ик бышкало, лызэктыто, вожектыто, мугоръёсазы потосъёс пульдыто…

– Соин-а соос озьы кормаськыса но тэтчаса мыно? – серекъяны кутске Явуш.

– Лузьёс куртчыло… Соин тэтчало… – пальыштэ Япанча. – Иське, со умой, адӟыны ке уг быгато. Ошкуйчиослы капчигес луоз ужзэс лэсьтыны. Та шормуӵын котыр сусыпуос будо ук…

– Сусыпу вань сьӧлыкоосты лыдытэ… Нош Узыбеез лузьёс но уг исало… Эксэй ныл кадь вамышъя, ёросэз югдытыса… – куанэмзэ уг ваты Камит.

– Тӥледлы серем, тӥ вылын карнан уг ӟечыра… – серекъямысь дугдэ Япанча.

– Карнан, Япанча, ваньмы вылын ӟечыра… – пальыштэ Явуш. – Усман тата, мон валамъя, тон вылэ карнан пуктӥз та югдурлэсь кудпала позырскемзэ пумозяз возьман понна. Малы ке шуоно тон гинэ Чачаедлы луыса, марысь мар ке, кыдёкысен но Узыбеез ӝокатыны быгатӥськод, аслэсьтыд мугордэ нырысетӥ Ыбес дорозь нулдытэк… Зэмзэ ке Усман тата ачиз но умой йылпумъяськонэз возьма, умойзэ ӧй возьмасал ке, кемалась кыкыпиоссэ ыстысал Зарни Мум доры нуись сюресъёсты ӵоксаны… Узыбей но ӝокатэмын луысал… Усман тата мае ке асьмелы тодмотэмзэ возьма, со тодэ яке шӧдэ, яке адӟе, мае асьмеос ум тодӥське, ум шӧдӥське, ум адӟиське…

– Вай, Япанча, Чачадэ! – нош ик куре Камит. – Котьма мед возьмалоз Усман тата, нош мынам тэк пукеме уг поты. Яке, ойдо ӵош мыноме Узыбеез мозмытыны…

– Тютюпи кадь тон, Камит, вераськиськод… – лек мынектэ Япанча. – Сайка ни, мозмыты туно йырвизьдэ! Нырысь ик, асьмеды татын возьманы косӥзы! Кыкетӥез, отчы храмчиос дорозь пыдын ӝог уд вуы… Нош «озонаськыны» нокудмылы уг яра, «сьӧдъёс» адӟозы… Асьмелэн быдтэммы гинэ луэ Узыбеез… Соин ик Зарни Мумез утись «Кымет» доры ке со вуиз, мон сое ӝокато… Мукетыз амал ӧвӧл… Ӧвӧл, вань на, конечно, оскон ошкуйчиосмылы… Яке аслыз Узыбейлы…

– Камит, вера, марлы тыныд Чача кулэ? – тодэмез потэ Явушлэн.

– Дышетӥсьёс верамъя, Чача пыртӥ кыдёкысь адямиослэсь но мугорзэ басьтыны луэ, кылсярысь, ожмаськытыны яке умме уськытыны… Чача матэ карыны быгатэ… Мон Узыбей пушкы пырысал но валасал мар карыны… Али ӵапак дырыз соосты сусыпуос улэ мырӟытъяны…

– Ӟеч малпан… – серектэ Япанча. – Мон сьӧд вединъёсты но озьы сикыӵъёсы пыртылӥ. Но Узыбей вылын со уг ужа… Тон малпаськод, мон ӧй эскеры та амалэз?.. Мон ӧй дугды на эскеремысь. Соин пуртъёсме зыргатъясько… Чача матэктытэ ке но, Узыбейлэн мугораз пырыны уг луы, мон ӧй пумита на сыӵе кужмо мугоръёсты… Табере валасько, «эксэй вирыз» сое озьы уте шуыса… Мынам оскеме уг поты, мыным «эксэй нылмес» быдтоно луоз…

– Сялай мон ваньмыз вылэ! – аслэстыз ыстэм пуртсэ ишкалтыса, кӧрыказ интыя Камит. – Зарни Мум ачиз но со кык палдуро! Мон адӟи туннэ солэсь кыкетӥ палдурзэ, «палэсмуртлэн ӧсэз» усьтӥськыку. Палэсмурт юри мыным сое возьматӥз… Сое адӟем бере мон пограй… Собере тӥ татчы вайиды. Хы, кызьы мон сое соку ик ӧй вала…

– Мае ӧд вала? – юа Япанча.

– Узыбейлэн вирыз храмчиослы уз юртты, со быдтоз гинэ соосты… – шудо пальыштэ Камит.

– Малы уз юртты? Малы быдтоз? – юа Япанча.

– Малы? – туж сак кылзӥсько нюлэске ватӥськем пельёс.

– Малы ке шуоно… – котыр чаклаське Камит. – Ачиз Зарни Мум ышиз, солэсь инмар интызэ воштӥз солэн кыкетӥ палдурыз. – Пор Кышно, кудӥз туж трос вир возьма… Со кудӟытозяз, тордытозяз вир юоз… Нош тордэм бераз сайкатэк изёз, котьмар тон соин кар, коть йырзэ ишкалты, коть пыдзэ, коть вир юись нунызэ кӧтысьтыз. Кырсь кышномурт кадь со кыллёз вань ёросэз зынтыса… Ваньзылы усьтӥськемын со туннэ. Олокӧня интыын одӥг дыре со сылэ вир возьмаса. Палэсмурт агай мыным туннэ шуиз, солы туж трос вир кулэ Арсавыл Эксэйлыкез утён азьын… Тушмонъёслэсь вирзэ но со курбонэз кадь басьтоз «эксэй ныл» киысь… Храмчиос со азе потӥзы ке, со кӧшкемыт куараеныз кеськоз, синмысьтызы, пельысьтызы вир пызгыса лыктоз нуныезлэн пушказ. Нош «эксэй нылэз» со уз иса. Соин ик, Япанча, кулэ ӧвӧл мыным тынад сомында кулонэн герӟаськем Кизили Чачаед! Тынад но Узыбеез ӝокатэмед уз лу. Малы ке шуоно сое Зарни Мум утёз…

– Котькыӵе со Чача мед луоз, но мон чурыт тодӥсько, со тыныд кулэ ӧвӧл. Тынад вылӥ дуннеысь Зэрпалэд но, Палэсмуртэд но вань, улӥ дуннеысь Бабасыред но. Нош мынам Чачае но аслам ӧвӧл, Кырныже гинэ аслам… Явушлэн Иоанн эксэез вань, Ву анаез, Су анасыез – котькудӥзлэн аслаз кужымез луыны кулэ… – аслэсьтыз пуртсэ ишкалтыса кӧрыказ понэ Япанча. – Ӝоген татчы потоз Усман тата, собере Кизили Пуртэныз бышкалтыса, асьмеды коросъёсы тыроз, музъеме согоз, юри кузятыны дасям виртыремъёсты кадь… Тӥни со гуосы… Оло соку валаломы, мар бырйыны, кызьы бырйыны, кызьы Узыбеез мозмытыны…

Явушен Камитъёс чал-чал малпасько. Соос валало – туннэ нунал мае ке выльзэ соослы вайиз. Табере азьвыл кадь уз лу. Егитъёслэн син азязы аспӧртэм кужмыныз югдыны кутскиз вужере ышем Арсавыл Эксэйлык, кудӥз укыр бадӟым юанъёс кылдытэ Узыбей но Зарни Мум азьын… Кин татын шонер, созэ Кылдысин гинэ тодэ. Яке Быдӟым Ош… Яке Ватка Ныл… Яке ачиз Зарни Мум – Варфаламея…

– Мар луиз – луоз, мон уг кошкы… – шӧдтэк шорысь чурыт ялэ Явуш. – Малы ке шуоно мон мае ке туж кулэзэ валаны кулэ.

– Мон но уг кошкы… – ӟазыртэ Камит. – Мон табере уг валаськы, кызьы та югдуръёс доры матэктыны…

– Мон но уг кошкы… – пиос шоры учкыса мынектэ Япанча. – Мынам но тодэме потэ, малы Зарни Мум со Пор Кышно? Малы Узыбей калык быронэз вайись кышкытлык но со дыре ик кема возьмам эксэйлык?.. Мынам тодэме потэ, малы асьмеды дасязы вылӥ дышетӥсьёс?.. Таӵе пӧртэм палдуро лулъёсты?..

– Учкисько шорады но ялан золгес валасько, тӥ мынам агай-вынъёсы шуыса… – мыньпотэ Явуш. – Кин меда тазьы асьмеды герӟаз, малы герӟаз?..

– Малызэ улон возьматоз ни… – Япанча шоры учкыса, итӥське Камит.

Кикытэльын чус-чус луэ. Пипу куаръёс но уг шильырто. Оломарлы чалмизы кикыпиос но. Ваньмыз чалмиз кадь…

– Я иське, вера ни, Явуш, Ванька эксэед сярысь… – ӧз чида ни та кышкатӥсь чуслыкез Япанча. – Ӧжытак палэнскем потэ шурдыт малпанъёслэсь, ожтыл пушкы гумыльскон азьын…

– Мар бон, мон пумит ӧвӧл. Ванькалы соку 10 арес вал… – кутскиз мадьыны Явуш. – Секыт вал сирота пияшлы… Чингизит татаез кулыку солы ныль арес гинэ вылэм, нош чингизит анаез кулыку – тямыс.

– Мыным но трос ӧй вал, пеймыт нюлэскы огнам кыльыкум… – итӥське Япанча. – Но мыным ӝожтӥськыны уг яра, угось мынам вӧзам Су анасы кадь кужмо сюдӥсе-вордӥсе вал, со инмар кадь утиз монэ. Ярам, азьланьты Явуш…

– Ванька туж вожъяськылӥз татаеным ӵош ветлэмелы. Соос выныныз кыкназы шыръёс кадь куалекъяса улӥзы. Пуксён палъёсын герӟаськем байаръёс укыр мискинь соосты возизы… Мынам юрттэме потӥз Ванькалы, синъёсыз юрттэт куро вал… Татае но юрттыны куриз… Татае со дыре туж тодмо муско байаръёсын ужаз, кинъёс уг ярато вал пуксён палъёсты. Вал солэн тодмо байаръёсыз муско эльйыр котырын, ӵапак соосын ӵош со вузаськон ужъёссэ бергатӥз. Мускоос уг быгато вал асьсэ коже Хазар зарезе потыны, соосты уйпалан но ялан талало вал, нош мынамез татае но песятае ветло вал уйпала но, шуныт пала но… Ачиз Усман тата, Камитлэн татаез, но уно мукет татаосмы соосты возьмазы… Зэмзэ ке, асьме киын вал соку тросэз ву но дӧдьы сюресъёсмы. Асьмеос котькытчы ву вылтӥ вуылӥмы. Нош Мускоос уйпалан кужмояны кутскем бере, татае но, аслаз татаез кадь ик, кема улӥз Мускоын, ӵапак соку со монэ, Быдӟым муско эльырен тодматон понна, Сильвестр но Макарий священникъёс доры кельтӥз. Угось черкъёс тужгес но ярато вал татаме но, песятайме но, соослэсь шуныт палась вузъёссэс туж ӵем нулло вал соос… Нош ӟуч эксэй со вакытэ тросгес улӥз та черк кузёос дорын… Монэ Макарий вуэн пылатӥз, Сильвестр кирос татае луиз…

– О, аллах! – чапкиське Япанча. – Тон мар, вуэ пыртэмын? Тон чукындырем чукырча малай?

– Мон уг жаляськы чукындыремын шуыса, – пальпотэ Явуш. – Мон вузаськись ук. Бон, мон чукырча малай, песятае кадь ик, татае кадь ик, но мон Зарни Мумез но гажасько, Мария богородицаез но, Сиеде Мариамез но коранысьтыд… Мон музъем адями, юнме тон монэ ву адями шуиськод… Мон ӵемгес Му кылчинлы вӧсяськисько, вуэ медам выйы шуыса, ву вылэ потыкум, нырысь ик вулы музъем куштӥсько, мед берытском на ас музъем вылам шуыса…

– Ишан басьтон! Ну, тон быльдырид ке быльдырид! – интыысьтыз тэтче Япанча. – Мон тонэн эшшо ке эшъяськисько! Тон мусульман шуыса!

– Пыртэмын ке, пыртэмын ни, мае со воштэ, Япанча? Мусульманъёс чипыос кадь несториан черкъёсысь потӥзы. Ачид но, мусульман луэмдэ вунэтыса, черке пырод ай! Мон озьы адӟисько… – ӟазыртэ Камит, соос вискы тулъяськыса. – Тон но несториан черклы вӧсяськись христиан нылэз шедьтод…

– Нош тон, тунобыж, воксё чус кариськы, тон тыллы, вулы, писпуослы вӧсяськиськод, парсь сӥль сииськод! – вожез потэ Япанчалэн.

– Али ик чалме! – вазе Усман тата, шунды тылсиос азьын ворекъясь ез кульчоё ож диськутэныз ӧс азяз потыса. Йыраз солэн азвесь шлем. Со сьӧрын адӟиське ӧжытак кӧсэктэм Ӟумъя ватаман. Усман тата, кизэ кырмыса, поттэ ӧстӥз Ӟумъя батырез, кияз солэн чилектэ Кизили Пуртэз. – Чалелэ татчы. Ӝоггес султэ та ӝок сьӧры! – кеське тата.

Пиос туж зол кышкало ке но, ыжпиос кадь султо Усман таталэн возьматэм ӝужыт но куинь муртэн ӟыгыртыны луонтэм пуклё-жӧк сьӧраз…

– Понэ бур кидэс ӝӧк вылэ… – чурыт куриз быдӟым туно. Ӵапак со вакытэ олокытысь Усман таталэн пельпумъёсыз вылэ кык пыдысьтыз ик гижыоссэ мертчытыса туж зол шуккиськиз туж бадӟым куака-кырныж. Усман тата пиос вылтӥ кымалскыса ӝок сьӧры пезьдӥз. Кизили Пуртэз солэн ас азяз усиз. Кырныжъёс урмыса ик со Кизили Пурт доры лобӟизы. Ӟумъя батыр кыксэ палашеныз ӵогиз, одӥгзэ пуртэныз кортӵогаз, нош ньылетӥзэ, кудӥз Пурт доры вуэ ни вал, олокытысь из кадь васькем кучыран шуккыса пезьгытӥз. «Тау, Явуш!» – малпаны вуиз Ӟумъя батыр, витетӥзэ урмем кадь лыктӥсь куака-кырныжез кыклы люкыса. Со али гинэ ӟеч валаз, мае вераны турттэ вал солы кучыран эшез. Пиос интыысьтызы тэтчыса, юрттыны туртто ни вал, нош Усман шуак тэтчыса пуртсэ ас мугореныз ватӥз.

– Эн кошке интыысьтыды, тӥледлы уг яра сьӧдмаськыны! – кеськиз Усман тата, пиосты ӝӧксы сьӧры берыктыса. – Япанча, бур кидэ Камитлэн бур ки вылаз пон, нош тон, Явуш, табере Япанчалэн ки вылаз… Ӝоггес, ӝоггес выре, чипыос!

Пиос киоссэс поно ог-огзылэн киоссы вылэ. Кырныжъёс шӧтэм кесяськыса соос вылэ урдӥськыло. Кин тодэ, кызьы гинэ вуэ на соосты тарканы Ӟумъя батыр…

– Оло, али кулэ ӧвӧл на тата, оло, бӧрысьгес? – юа Ӟумъя батыр, кырныжъёсты кораса. Вань ымнырыз солэн виресь ни… Киосыз но дӥськутэз но.

– Али кулэ! – чурыт вера Усман тата, Кизили Пуртэныз пыд вылаз султыса. – Эн лэзьы, Ӟумъя, кырныжъёсты, соос ке Пурт борды йӧтскизы, Пурт соослэн луоз, соку номыр уз пӧрмы ни! «Остэ» шуэ! – чурыт вера Усман тата.

– Остэ! – ваньзы ӵош вазё пиос.

Ӵапак со вакытэ Усман таталэн пуртэз куиньназылэсь ик кикуръёссэс пуклё-ӝӧк борды кортӵогаз… Усман таталэсь пуртсэ ишкалтыны дыртӥсь кырныж шонерак бышкалскиз Ӟумъялэн палашаз. Пиос гинэ ӧвӧл, Усман таталэсь тазьы кортӵогамзэ ачиз Ӟумъя батыр но ӧз возьма вал…

– А-а-а! – кӧшкемыт чузъяськиз нюлэс кушын пиослэн кышкаса но вӧсь луыса огак ӵош черектэм куараоссы… Куака-кырныжъёс но соослэн Ӟумъяен вандылэм мугор люкетъёссы туж яркыт тыл кужымлэсь пӧртэм пала пазьгиськизы. Капчияк луиз вань Кикыкушын. Някырскем кызьпу улэ шуак потӥз Палэсмурт, инвис вӧзы кылдӥз Алангасар, нюлэс вӧзы султӥзы Тӧлпери, Вумурт, Тылмурт, Обыда, Корт чужморт, Мунчо йыр, Гудыри пуз, Кикы йыр, Ӵушъял, Луд кеч, Чиньымурт, Кузьмурт, Кыткем шыр, Йыртэм чунь но уно мукетъёсыз, вожзэс медаз поттэ соос, кинэ вератэк кельтӥ… Валамон ини, кучыран но татын ик вал, со но шумпотыса синзэ вошъятэк учкиз пиос шоры. Нош инбамтӥ бергаса-бергаса кошкизы несториан черкъёслэн омырысь тыл кужымез кыскись каланчаоссы, ву вылын пукись ладья кадь толэзьёссы, мечетьёслэн выйыны чатырскем пыж кадь толэзё каланчаоссы, тэраосыз возьмась кык пыдо теремъёс, вашкала пужыё дэремъёс, ӵушконъёс, кышетъёс, тӧр пуконъёс, ымъёс, пельёс, кылъёс, синъёс… Мар вал со, кыӵе суредъёс возьматскизы инбамын, адӟиз меда, валаз меда ар музъемлэн ас дэраез, ас тэраез, тыронэз-тэронэз, дэремез-теремез… Эй, терем-теремок, эбек, шыр, лудкеч, ӟичы уром, кион уром, гондыр уром?.. Вавилон каланча?.. Вералэ, кин милемды тазьы сураз-пожаз? Малы ми таӵе мискинесь? Кинъёс милемды ялан ляльчи карыны туртто? Кытысь ми потэмын, кытысь ми лыктэмын, ваткаос но калмезъёс, бесерманъёс, аръёс, отмортъёс? Кытын эксэйлыкмы милям? Малы берпуметӥ Чибинь эксэймы ышиз Чупчи дурысь, аслэсьтыз вирзэ калыке ватыса? Мар сьӧлыкъёсмы понна милемды Инмар курадӟытэ? Малы лушказы али гинэ усьтӥськем «эксэй нылмес», Узыбеймес?

Юанъёс со мында ӝутскизы, уг тэро ни вал соос та Кикыкуш тэрае. Ачиз Ватка но вань чарланъёссэ инбаме ӝутыса та кесяськонъёсты кылзӥськиз. Кельше вал солы Камит, кельше вал Явуш, кельше вал Япанча. Ваньзы та казакъёс асьсэ удыссэс кыткозы Арсавыл шаерзы понна. Усман тата шоры но, Ӟумъя шоры но, кикыпиос шоры но Ватка валаса учке. Котьку Ватка юрттэ вал Ӟумъя ватаманлы, солэн ватагайёсызлы! Кам вылысь татаослы. Угось Ваткаысен кутске вал соослэн ветлонъёссы. Ваньмыз герӟаське Ваткаен – кызьы Ватка уз адӟы, кызьы уз тоды, кызьы уз юртты, солэн вуосыз вань дуннеез гылъяло ук, ярдуръёсыз вань дуннеез котырто! Вань кулэмъёссэ но, вань улэпъёссэ но Ватка тодэ. Ваньзэсты герӟа. Ву нуонозэ но, Ву нуэмзэ но, ализэ но. Католикъёслэсь Ватиканысь Папазылэсь пуконзэ но со тодэ. Керемет юри отчы интыяз со пуконэз. Малы ке шуоно Ватиканус – со самой кадыр инты вал, со вӧзтӥ бызе вал Арча шур, отын вашкала дырысен ваткаослэн ӵыжы-выжыоссы этрусъёс, венедъёс вӧсяськизы. Ваткаос соосын котьку кусып возизы. Римъёс но со кадыр интыез ӧз исалэ, буре но сӥлы каро вал уно тодӥсь чылкыт калыклэсь воршуд бервылзэ. Нош Папа-Понтифик сое тяпалтӥз, угось Папа которын тросэз умойтэмез лэсьтӥське. Уг поты Ваткалэн со югдуръёсты тодаз ваемез, малпаськемез но со сярысь уг поты, малы ке шуоно со саптаськытэ Аждагалэн гурезь пушкысь гутёез кадь, Авдийлэн гидэз кадь, Ву но Тыл гинэ со гутёосты чылкытатыны быгатэ, юнме шат Кереметлэн азьвыл нимыз – Сьӧд. Со котьку Сьӧд вал, малы ке шуоно со «сьӧдъёслэн» асьме музъеммы вылысь эксэйзы…

Уг ярато католикъёс Инмар Атайлэсь шуныт но шунды потон палъёсын кылдэм зэмос черкъёссэ, кудъёсыз вань Тартария каръёсын вӧлмемын, уг ярато Несторлэсь но Арийлэсь дышетонъёссэс, уг ярато Андрей Первозванецлэсь киросам калыксэ, Вуж Заветысь вашкала осконэн улӥсь Мускоез, Кузонэз, Владимирез, Рязанез, Псковез но уно мукет каръёсты. Католикъёслэн котькытчы асьсэлэсь чакласьёссэс чуртнамзы потэ. Соос вань пуксён палась дуннеез басьтӥзы ни, табере асьме палъёсты кырмыны туртто. Тачак соослэн чакласьёссы, пӧртэм орденъёсысь монахъёссы – Сулейман котырын, Иоанн котырын. Угось Сулейман но, Иоанн но соослы кышкытлык ваё, озьы ик кызьы куке-соку Батый но Субэдей Джучилэсь улуссэ, чылкыт калыксэ, инкуазез гажась осконзэ утьыса соос пала вуизы но ваньзэс шаермылы пумит дасям ожчиоссэс пазьгизы…

Куинь пиос куинь пала кысыляк усизы. Усман тата куинь югыт вирлэсь югдытскем Кизили Пуртэныз пиосты котыртӥз, югдыса улӥсь котырес гож кылдытӥз. Ӵапак соку солэн киысьтыз Кизили Пурт пиос вылэ омыре ӝутскыса дугдӥз но, чиляк югектыса, синъёс азьысь ышиз, бусаськиз… Пиослэн вирӟектэм киоссы соку ик бурмыны кутскизы. Кӧня ке улыса соослэн киосазы льӧльмыт вурысъёс гинэ куалекъяло ни вал.

– Пӧрмиз, ӧз вуэ Кикыкуше католикъёслэн пӧйшурась монахъёссы. Куака-кырныжъёссы но Кизили Пурт борды йӧтскыны ӧз быгатэ… Ваньмыз ӟеч пӧрмиз! – вӧсяськон кылъёссэ кадь шуак вераз Усман тата. – Чабата! Ваёбыж! Пукрок! Асса! Гырлака! Ӧтэй! – вазиз со возьмась пиосызлы. Асьсэлэсь нимъёссэс кылыса, таталэн юрттӥсьёсыз шуак вуттӥзы куинь тусьты-коросъёсты. Коросъёсы каллен гинэ понӥзы пияшъёсты.

– Ӵоксалэ ӝоггес гудэм гуосады. Нырысь трос лысэн шобыртэ, собере вылтӥз кӧня ке сюен, шокан инты кельтэ, юри лэсьтэм гумыосты интыяса. Озьы кызьы верай. Поттоды шунды пуксён азе. Шунды тылъёс эктыны кутскыку. Созэ ачим верало…

Пиос шуак нуыса кошко коросъёсты. Ӟумъя Кизили Пурт кужымен «кырныж вирлэсь» чылкытам ымнырыныз, сюлэмыз куалектыса ик, учке Усман тата шоры, пиез шоры…

– Котькудӥзлэн аслаз сюресэз… – пальыштэ Усман тата. – Камитэдлэн тӥни сыӵе… Табере со Арсавыллэн туно пиез… Гогыез Арсавылэн герӟамын, нош тонэн вирыз гинэ герӟаське.

– Малы шайгуэ согиськоды? – юа Ӟумъя.

– Медаз адӟе мултэс синъёс. Кылдысин гинэ мед адӟоз. Ӟечез пеймытын будэ… Бабасыр кадь… Бубыли кадь… Кушман кадь… Сяртчы кадь… Кышномурт гырлыысь нуны кадь…

– Малы сыӵе куалекъяло? – нош ик сюлэмыз пирсэкъяса юа Ӟумъя.

– Соос дышетско дуннеез выль сямен адӟыны. Быдӟым дышетӥсьёс соосын ужало. Эн сюлмаськы, Ӟумъя. Табере Кылдысин отын сюлмаське…

11-тӥ люкет. Бабасырен тодматскон

Ӟумъя батырлэн сюлмаз шуак-дуак ӝожомытӥсь тулкымъёс лыктӥзы. Сыӵе яркыт со тодаз вайиз пиеныз пичи дыръяз луэм учырез.

Одӥг ӝытэ кутьы возьмаса бертӥсь пичи пизэ со капка азяз дугдытӥз. Кытчы, пе, ыштӥд одӥг ыждэ? Камит берен кошкиз ыжзэ утчаса. Ӟумъя батыр, ошкуйчиосыныз Каспар пыжъёсты но карубъёсты Кузон базаре нуллэмез бере, аслыз но ошкуйчиосызлы кык арня шутэтскон ялӥз вал. Соин ик гурт котырысь ужъёс шоры но ошкуйчи синъёсын учкылӥз. Ошкуйчилэн ваньмыз аслаз интыяз луыны кулэ ук. Нош татын кузпалыз, Танзиля, кутьыысь бертэм пудооссэ, скалзэ, валзэ, ветылъёссэ но ыжъёссэ азбараз пыртэмез бере анаезлэн ыжез ӧз берты шуыса картэз доры лыктӥз. Оштормаос ыжъёссэс туж ярато, тужгес но кышноос. Соос понна чебер ыжгоно ыж, вылаз ик, вылькенлы сюан лэсьтыкузы анай-атаезлэн кузьмам ыжзы, сокем дуно потэ. Танзилялэн анай-атайёсызлы аслэсьтыз кыдёкысь ваем ыжъёссэ Ӟумъя  но яратэ вал. Ма вань ошторма калык синмаське вал Ӟумъялэн кыдёкысь ваем ыжъёсызлы. Ыжпи ваемзэс возьмаса гинэ уло вал,  дун тырыса басьтыны. Нош татын ыжпи ваёно ыж ӧз берты. Ӟумъя ошкуйчи но вузчи синмыныз соку ик валаз, малы кышноезлэсь сокем сюлмаськемзэ. Соин ик чурыт со юаз пиезлэсь, кытчы, пӧй, пи ваёно «мероносмес» кельтӥд?

Ӝыт пал ини ыжзы бертӥз, нош Камит ӧз берты. Ӟумъя  кузпалэныз уйшоре гинэ валазы, пизы ӧвӧл шуыса. Нырысь малпазы, куатаськыса кытын ке изе. Но Камит ӵуказеяз но ӧз поты. Вань гуртэн сое нюлэсъёсысь нюкъёсысь, гопъёсысь утчазы. Ӧз шедьтэ.

Кузпалыз дугдытэк бӧрдэ. Кытчы, пе, карид пимес? Куинетӥ нуналыз чырым но кӧлытэк вуиз ини, нош пизы ӧвӧл. Куйыосысь но утчазы, ву кожъёсысь но.

Танзиля бӧрдэ но бӧрдэ.

– Ма тон адӟись ук,  кулэмен ке но шедьты… – кесяське со. – Коть кулэм синъёсаз кык манетме поно, вӧсь кылъёсме лыдӟо, мугорзэ миськыса…

– Уг лу адӟеме… – бӧрдэ  Ӟумъя.

– Гуын со кылле! Мур гуын! – кесяське Танзиля. – Мон адӟисько сое! – йыг шукке пыдъёссэ выж вылэ кышномурт, вань ӵыжы-выжыоссэ, вань пичиоссэ но бадӟымъёссэ но бӧрдытыса.

Воргоронъёс нош ик нюлэсъёсы кошкизы. Ӟумъя гозыос кутыса кошкиз. Сись пу но сьӧраз басьтӥз. Шунтӥсь вӧйёссэ но ӧз вунэты. Вань тодмо гуосты со ортчиз ни, котькудаз кесяськиз… Нош нокыӵе куара ӧз кылӥськы. Озьы ке но со котькудаз гуосы кышкаса пыраз, котькуд сэрегъёссэ утчаз, собере шумпотыса  берен отысь потылӥз, пиезлэсь шӧйзэ ӧз шедьты шуыса. Котькуд гуэз ортчемез бере, пушказ выльысен осконэз юнмалляз, пиез улэп на, дыр, шуыса. Эшшо одӥг гу кылиз, гурезь бамалын, мур кыретын со – тужгес но мурез ыргон поттон гу. Бабасыр гу сое шуо. Со туж кыдёкысез луэ. Чокморъёслэн бусы гожзы вӧзын. Оло, татысь со ыжез учкиз? Ӵапак татчы кинлэн ке ыжез зорлэсь пегӟыса нӧдэм вал ук…  Малы та гопез оштормаос ӧз ӵоксалэ та дырозь, Инмар гинэ тодэ ни. Кышкыт гоп та. Укыр кышкыт. Вылаз ик со туж кезьыт. Туж гылыт. Бабасыр, пе, отын улэ шуыса кышкато нылпиоссэс оштормаос. Тани со ог дас вамыш гутёе пыриз ни. Пыд ул тяпылес. Тани пичи гу меӵак уллань кошке. Отысь кезьыт нюр зын паке… Кызьы татын бабасыр улоз?.. Кин тодэ, оло, улэ но, дыр, соос шунытлэсь озьы пегӟо, шуо ук. Яке кезьыт гурезе, яке таӵе интыосы, кезьыт гурезь ке ӧвӧл.

– Пие! – кеськиз Ӟумъя, йырзэ гуэ донгыса…

– Тата! Тата! Тата! – кылӥськиз кыдёкысь гу пыдсысь.

Ӟумъялэн шоканэз ик быриз, синвуосыз ӟузыр вияло, куараез быриз. Викышъяса номыр каремез уг луы. Шоканэз ик пытсаськылэ, коскаса-коскаса бӧрдэмезлэсь. Тани, кытын лулыз солэн вукарнан кадь тэгыз сылыны кулэ. Но со уг быгаты, ышиз вань туно кужмыз, мугор кужмыз, лул кужмыз. Отчы пырыны уг луы ук, пасез туж пичи. Кызьы со сое отысь поттоз. Кызьы кельтоз отчы улэп пизэ…

– Пие! – кеськиз Ӟумъя, бӧрдонзэ дугдытыны вырыса.

– Тата! Тата!  Тата! – туж кыдёкысен кесяське пиез.

– Улэп на, остэ инмаре! – вӧсяське Ӟумъя, мар карыны малпаськыса. Та гу кемаласьгес ини куашказ, пыдлось усьтоез пичи кылемын, уг лу отчы бадӟым воргоронлэн тэремез. Со вольыт луэ зор бере. Нырысь  каллен улӥе кошке, собере меӵак  пыдло пыре. Ыжзэ утчакуз, зорлэсь пегӟыса вольтчиз, иське…

– Пие, мусокае, кылзы монэ, – бӧрдон викышъёссэ ньылыса кеське Ӟумъя. – Мон отчы уг тэриськы, мон тыныд гозы пумме лэзё, бадӟым из борды шырпу тылэн ӵош думыса, нош тон сое кускад ог вить котыр биняса тӧлпо гозыез кадь думод! Собере гозы борды кырмиськод! Валад-а монэ, пие? – кесяське со.

Кема гинэ ог-огзэс валаны тыршемзы бере, Ӟумъя гозы пумаз сисьпу шыртылзэ думиз, бадӟым из борды юнматыса, собере гозызэ гуэ каллен-каллен лэзиз. Мед гинэ гозыез сузьысал. Ӧз ке сузьы, нош ик гозылы ветлоно луоз…

– Адӟиськод-а, пие, югдӥсь шыртылэз? – юа Ӟумъя.

– Адӟисько! – бӧрдыса вазе Камит.

Тани со гозыез кыскиз. Бордаз биня, шӧдске.

– Думид-а, пие?

– Думи… – вазе пиез.

– Табере кырмиськы, мусокае, юн кырмиськы, туж юн кырмиськы, ява, мон каллен кыско, пие! – кеське Ӟумъя.

Ноку но таӵе секыт ныпьетэз ӧз кыска на Ӟумъя. Кӧня ке кыске, выльысен лэзе. Шугомытэ гозыез кыскыны горд сюй. Ёрме. Гозы гинэ медаз чигы вал. Тани капчияз кадь. Пиез пыдыныз юрттӥз-а? Тани нош ик капчияз. Оло берен пиез усиз-а? Ӟумъя дыртыса кыскиз гозызэ. Мар ке укыр капчи потэ кадь. Тани  поттӥз… Мар та? Мар горд сюй комок? Ӟумъя кышкатскиз, бабасыр-а, мар-а? Но тани горд сюй комок вырӟиз, горд сюй кӧня ке пазьгиськиз. Али гинэ тодмаз Ӟумъя горд сюен нориськем моклоксэ. Тодманы луонтэм наштаськемын ымнырыз. Камит ӟугыр куалекъя. Оло лызэктэмын, оло горд сюй сыӵе каре? Ӟумъя бӧрдыса ӝутӥз сое кияз, ачиз но ӟугыр куалекъя, дыртыса нуиз шур доры. Шуак миськемез, гылтэмез бере пульёсир вӧеныз, гондыр вӧеныз зыраса, аслаз дӥськутэныз бинялтӥз. Кызьы со пизэ дораз вайиз, Ӟумъя уг тоды ни. Синвуосыз дугдытэк вияло. Чупам вылысь со сое чупа. Пиез кызэ…

– Кызьы тон ӧд кынмы, мусое мынам? – юа солэсь Ӟумъя.

– Мыным бабасыр юрттӥз, со монэ шунтыса возиз… – ум пыртӥз валэктэ пиез.

– Тау тыныд, бабасыр! – йыбырттӥз Ӟумъя. Бабасыр но солы йыбырттӥз, валаз туно воргорон, шӧдӥсько, пе, шумпотондэ… Эшшо ватсаз на бабасыр, луэ, пе, вал солэн аслаз но поттэмез, соку, пе, ӧд дунъясал тон аслэсьтыд пидэ, бабасырез но ӧд тодысал…

Ӟумъя пайме, кызьы со пизэ ӧз адӟы, азьвыл со котьку адӟе вал ук, ӧй тэльмырысал пиез со мында.

– Со мур гуын вал, отчы тыллэн дуннеез уг сузьы, нош тон тыл адӟонэн адӟиськод ук… – валэктэ бабасыр. – Нош мон ву дуннеен герӟамын, пиед но – ву дуннеен. Соин ми ог-огместы адӟим. Камитлэн аслаз но адӟонэз паськыт, со ваньзэ адӟиз, кызьы тон утчад сое…

Дунолэсь дуно вал Ӟумъялы солэн кияз гань-гань изись нунокез. Аресызлэсь бадӟым визьмо комокез. Со сое капчи тылыез кадь вайиз… Танзиля ӧс выжые пограз… Пиез улэп ӧвӧл шуыса малпаз. Но со улэп пыс-пыс изе, ӧжытак кызэ ке но… Вань гурт калык Камитэз жаляса бӧрдӥз. Со дырысен Ӟумъя пизэ сокем зол яратэ, туж кышка сое ыштыны. Ма, Танзиля но…

12-тӥ люкет. Атай сюлэмлэн писыранэз

– Ку соос та мугоразы берытскозы? – сюлэмшугъяськонзэ усьтэ Ӟумъя.

– Ӝыт пал шунды пуксён азе соос сайкалозы, нош азьвыл кадь уз сайкалэ ни. Соос вуонозэ но, ортчемзэ но тодозы… – пальпотэ Усман тата.

– Тон но, тата, соос кадь ик  кыллид-а? –  юа Ӟумъя.

– Отын мугор гинэ кылле, нош луллы кылльыны уг сёто. Солы мукет мугор сёто. Мукет дуннее потто, кудӥз та дуннеен но герӟаськемын. Но со мугор котькуд дыр пушкы пыраны быгатэ.  Со тазьы ик ветлэ, тазьы ик шока, тазьы ик ожмаське. Отын секытэн валаськод, мугореныд мар ке но воштӥськиз шуыса. Таӵе ик мугорын ветлӥськод. Но со кулӥсьтэм туно мугор. Сое уг лу сӧсыртыны. Со трослы кужмогес, трослы шӧдӥсьгес, трослы чырткемгес. Киме пасямзы бере, мон но ваньзэ валаны тыршыса ветлӥ, ас синмыным вуонозэ адӟи, ортчемзэ, ализэ… Та пияшъёсты но адӟи,  мыным шуизы, со тынад воштӥсьёсыд. Кизили Пуртлы лыктӥсь «пӧйшурасьёсты» но адӟи…

– «Пӧйшурасьёсты» но?..

– Соосты но, «куака-кырныжъёссэс» но… Мон шӧдӥсько, ышо ни соос инбамысь… Озьы ук?

– Сылмыны кутско… Кизили Пурт-а соосты озьы пешкытӥз?

– Уча ожмаськыны кутскиз… Ма, тон но трослы шеромытӥд  уллёзэс…

– Уча?.. – куалектӥз Ӟумъя, ваньзэ выльысь тодаз вайыса. – Быдтозы ук соос кикы пиосты! Табере уз жалялэ!

– Пегӟо ни соос. Номыр соослы табере кикыкушын утчаны.  Кизили Пурт табере мукет дуннеын, пиос дорын… Бере кылизы соос… Ӧз вуэ… Дырыз дыръя тон Камитэз татчы вуттӥд…

– Трос-а соос?

– Учкы, Ӟумъя, ачид учкы! – пальыша Усман тата. – Тон но адӟиськод ук…

– Кык ошкуйёсын…  Иське 66 кузя луозы!

– Трос, Ӟумъя. Соос олокӧня но луыны быгато. Кыктосъёс соос, куиньтосъёс, «куакаоссэс» но лыдъяно ке. Асьсэлэн мугоръёссы соослэн кыдёкын… Соос зэмос «храмчиос» но ӧвӧл, манеръёссэс гинэ Папалэн орденъёсызлэсь басьто… Зэмос «храмчиос» мукетэсь, уг ярато соос сьӧд ведӥнъёслэсь тодонъёссэс…

– Нош кинъёс соку соос?

– «Сьӧдъёслэн» ляльчиоссы, соос ваньзы пӧртэм амалъёсын медъям адямиос.

– Соиз валамон… Нош «Вузы» кызьы адямиез улӟытэ? Кытысь «Ву» со? Мар луоз табере Ӟапыкен?

– Соос «Мултан Вуэн» ветло. Соин ик Ӟапыкен номыр уз лу. «Вуэн» гинэ ялан табере вераськоз.

– Мар, «Мултан Ву» улӟытыны быгатэ?.. – пайме Ӟумъя.

– Улӟытыны быгатэ шуыса уг тодӥськы, но бурмытыны быгатэ… Ӟапык кулэмын ӧй вал на ук… Мын, юртты кикыпиослы! – пальыша Усман тата. – Ваньмыз асьмелэн туж ӟеч пӧрмиз… Инмарлы тау! Уломы на озьыен, ваткаос… Вань на вылэм шудья шудъёсмы… 

13-тӥ люкет. Усман таталэн адӟонъёсыз

Пальышаса пуке Усман тата. Со адӟе, кызьы бызе Ӟумъя. Кызьы кыллё Кизили Пуртэн тодмостэм пиос. Кызьы соослэн лулъёссы кыкетӥ мугоръёссэс вылазы мертало. Кызьы Уча кикыпиосын ӵош ожмаське. Кызьы Узыбейлэн вирыз «пӧйшурасьёсты» пыртэ Маскара но Пичи Арча мувыръёс вискысь «Паньгам» нёжалэ… Усман тата тодэ, та нёжалын ваньмыз «паньга» яке «нажга»: вакыт но, инкуазь но, адӟон бугор но… Соин отчы нокин пырыны уг дӥсьты, пырид ке йыромод яке воксё ышод… Соин калмез ожгарчи нылъёс Маскара бамалзэс гинэ возьмало, нош кыкыпиос – Арча бамалзэс гинэ. Нош Узыбейлэн эксэй вирыз шонерак «Паньгаме» пыртэ… Усман тата ачиз но уг тоды, кызьы таяз учыре «Паньгам» ассэ возьматоз, «нажгатоз»-а со «эксэй нылэз», уз-а, паньгатоз-а со «храмчиосты», соос сьӧры уйиськись ошкуйчиосты?..

Усман тата, Арсавыллэн лулыз кадь ик, ваньзэ чакла. Ваньзэ син азяз возе. Тужгес но вуз сюресъёсыз. Улон озьы куре. сотэк уг лу возьыны Быдӟым Арсавылэз. Ар музъемъёсмы вылэ лушканы, таланы  вуылӥсьёслэн лыдзы чик но уг кулэсмы, соос улӥысен но, вылӥысен но, урдэсъёсысен но ялан тапала норисько. Ваньзылэн синъёсазы дунтэм ваньбур шедьтон ӝуа. «Кам ярдуръёсысь азвесь» сярысь мадьёс кыдёке вӧлмемын. Угось арсавыл калык азвесь шоры узырлык но байлык шоры кадь ноку ӧз учкылы. Со понна азвесь нырысь ик чылкытатӥсь арбери, соин ик соос азвесьлэсь пӧртэм тусьёс лэсьто, пудозылы но, асьсэлы но юон ву возьыны, сиськыны тусьты-пуньы лэсьто, мугорез таза карись пӧртэм кипотэсъёс, чеберманъёс, весьёс. Яке пудооссэс тазатон понна пудо тусьтызэс но азвесьлэсь кисьто. Соин ик палэнысьёс паймо, гидъёсысь но сомында азвесь шедьтыса.  Туж зол берыктӥзы «сьӧд дуннеос» калыкъёсты, мыдланес каризы. Ваньзы табере капчи зарни, капчи азвесь утчанэн висё. Соин ик Усман таталэн кикытэлез одӥг гинэ ӧвӧл, трос соос бадӟым шуръёс вӧзысь арсавыл нюлэсъёсын. Вакытэз сыӵе. Быдӟым Туноослэн кивалтон карзы, Ирий Асгардзы, кызь кык ар талэсь азьвыл куашкам бере, камъёс вылын туннэ аслыд гинэ осконо, нокыӵе оскон ӧз кыльы ни пилиськылэм тартар ордаослы. Ваньзэсты ошкуйчиосмы гинэ буйгатыны быгато на. Нош ошкуйчиосмы но вузчиосмы асьмелэн туж вашкала дырысен та камъёс вылын. Сизьым выжыосты герӟась Идель эксэйлык дыръя ик асьмелэн вузчиосмы котькуд бадӟым карын хазаръёсын но булгаръёсын ӵош ужъёссэс бергатӥзы. Нош булгаръёс понна тапалась нюлэсо калыкъёс кемаласен ӵыжы-выжыоссы луо. Соос котьку валче улӥзы. Ӵапак со булгаръёсын ӵош ваткаос кылдытӥзы Эске Кузонэз, Эске Базарез, собере вань дунне вузчиослы сое тодмо каризы. Нош Усман тата амалтэк пӧрмиз кенешлюклы. Со люка бадӟым кенешъёсты, пӧртэм калыкъёсын ӵош быдӟым вӧсьёс ортчытъя, ожмаськытэк, ог-огедлы юрттыса, тупаса улон сярысь вераське. Озьы ик вань ватка выжыослэсь ваньбурзэ но чакласа, утьыса возе. Оглом, шуыны сое луысал эксэй, яке Арсавыл Эксэйлыклэн казна возисез… Но Усман тата чакламъя, Арсавыл Эксэйлыклэн дырыз ӧз вуы на, ваньмыз вань ке но сое кылдытыны: ваньбур но, музъем но, кужым но, «эксэй вир» но… Укыр ӟырдыт сандалъёс вискы со сюроз, туннэ ке кылдӥз. Котырласянь сое нажгатозы Джучи улусысь пилиськылэм бигер эксэйлыкъёс, Муско но уз сёты солы ӝужаны. Кельше-а, уг-а, капчигес туннэ Кузон эксэйлыклэн калыкез луыса улыны. Отын Кузон сьӧры но, Муско сьӧры но ватӥськыны луэ… Озьы малпа, шунды кадь мыняса пукись Усман тата. Соин ик Усман таталы уг кельшы Зарни Мумлэн Узыбей шоры возьматонэз, кызьы валазы сое Ӟумъялэн ошкуйчиосыз. Усман тата малпа, со «сьӧдъёслэн» юри лэсьтэм ужзы. Мукет сямен вераса, Кереметлэн «храмчиосыз» дырез азьланьтыса пыризы отчы, кытчы пырыны кулэ ӧй вал на. Нокин ӧй тодысал – улысал Узыбей шыпыт гинэ пеймытын, озьы ик шыпыт гинэ аслэсьтыз нылпизэ пеймытэ кельтысал… Но Керемет котьку яратэ мае ке чигтыны, вӧсь карыны, сӧрыны, висьытыны… Муш кадь ас ужзэ ужась калыкез юнме шорысь урмытыны, тарканы, осконтэк кельтыны. Но уз сётскы Кереметлы Кузон эксэйлык сьӧры ватӥськыса улӥсь арсавыл калык, Усман тата уз лэзьы. Номыр тон сое уд кары, Керемет, угось со вань вуж катъёсты кадырласа, тыныд люкемзэ котьку тыныд сётэ, нош Кылдысинлы висъямзэ котьку Кылдысинлы… Вань на ваткаослэн туноос киысь туноос кие кылись Кизили Пуртсы. Соин ик уз сузе тынад киосыд Зарни Мум дорозь. Кызьы комакъёс уг чидало Зарни Мум вӧзысь музъем кужымез, озьы ик пегӟозы тынад но ожчиосыд… Ӵашъёз кырсь лулоосыз котькудӥз «Быдӟым Ыбес»… Узыбей нылаш ӧз усьты ке соосты…

Юзыр кезьыр луиз арсавыл тунолэн мугорыз – тани нош ик Усман тата адӟиз гозыосын думылэм Узыбеез, сое азьлань вамышъятӥсь «храмчиосты». Уг, нокыӵе уг кариськы арсавыл туно Узыбей шоры учкыса. Сюлэмыз жаля ке но, йырвизьмыз уг жаля… Со куштӥз гирышон бодызэ. Мед быръёз ачиз Зарни Мум, кин кие боды пумез кельтыны. Яке Япанча сое ӝокатоз, яке ошкучиос мозмытозы. Уг яра «храмчиосты» Зарни Мумлэн Капка-Ыбесэз пушкы пыртыны… Уг яра но тӥни! Угось ачиз но Усман тата, Кизили Пуртэз ке но вал, ноку ӧз пыра Зарни Мум доры… Ӧз дӥсьты… Угось трос янгышъёсыз вань Зарни Мум азьын… Кӧня жоб кылъёс со сярысь вераз, кӧня мусторъёссэ гурт кушъёсысь тӥяз… Нош огпол, куке сое вылӥысь ненег кышномурт куара «ӵуж чалмаосын» ӵошатӥз, Усман тата бакомиз… Нёжто сое но «ӵуж чалмаосын» одӥг радэ пуктыны луэ?.. Соосын, кинъёс Хазар каганэз улляса, асьсэос хазаръёсын кивалтыны кутскизы, кык но ӝыны даур пала асьме калыкъёсмес кесязы, улэпкын куоссэс ниизы, ымазы ӵыжатэм узвесь киськазы, вань вузаськон сюресъёсты кӧшкемыт оброкъёсын ӝокатӥзы, калыкъёсмес уарлы берыктыса арабъёслы вузазы, нош хазар ожгарчиосты асьсэ осконзы улэ пыртыса, «ӵуж чалмаосын» дӥсятӥзы… «Ӵуж чалмаослэсь» лыктэмзэс ик адӟыса, калыкъёслэн сюлэмъёссы путылэ вал! Соин сэрен тапалась калык али ке но аслаз возьвылъёсысьтыз ӵуж чалма сяськаосызлэсь кышка… Уг йӧтылы сое, кияз но уг кут! Остэ, «италмас» татчы потэм шуыса со сяська вӧзысь пегӟе. «Пуны но со сяськаез уз басьты!» берыктӥське «италмас» шуэм. Нош кыл вӧзы «пуны» ке лякемын, со ӟечсэ уг возьматы ни – пуны льӧм, пуны сутэр, пуны сюл, пуны весь – пельёслы ӟеч кылӥсько ке но, пушказы агу но кайгу возё… Кытын отын ӟечез? Куке вылыз чебер, нош пушкыз лек! Нош татын ассэ Усман татаез «ӵуж чалмаосын» ӵошатӥзы! Усман тата котьку Кылдысинлы ужаз. Со угось арсавыл калыкезлэсь чылкыт осконзэ гинэ утьыны тыршиз, ӧз лэзьы сое «пеймыт но тодмотэм инмарен» саптаськыны…

– Ма, «ӵуж чалмаос» но озьы ик, Атай инмарзылы юрттӥськом шуыса, кырсь ужъёссэс лэсьтӥзы, Зарни Мумез кесязы…  Со понна ик тон курадӟиськод, Усман… – валэктӥз солы вылӥ кышномурт куара. Усман тата вань мугорыныз ик шӧдӥз солэн зэмлыко кылъёсызлэсь пӧсьвуась кужымзэ. Угось котькуд сыӵе сьӧлыкез бере Зарни Мум паласен соку ик лыктэ вал солы берытскисез… Мар карод, сыӵе улон, озьы ужа Карналэн карнанэз. Янгышъёс вылын дышетсконо, мукетыз сюрес ӧвӧл. Макем  мургес тон валаськод аслэсьтыд янгышъёстэ, сокем матэгес тон луиськод ӟечез пала нуись сюреслы. Котькуд сыӵе Зарни Мумлы пумит ужъёсыз бере Усман тата шузимыса ик кылле вал ачиз вылэ вуэм висёнъёслэсь тэльмырыса, пайме вал, малы Кылдысин солы уг юртты, малы уг юртто Ош но мукет воргорон инмаръёс…

– Малы со кыӵе ке валантэм Зарни Мумлэсь сокем зол курадӟоно? – кесяське вал со, вӧсь луонэзлы чидатэк, коскаса кылльыкуз.

– Малы ке шуоно арсавыл калыктэ, Кылдысин кошкем дырысен, Зарни Мум гинэ утьыса возе… – олокӧня пол валэктӥз солы аслаз ик куараез.

Но ӧз кылзы ассэ  ваменэс сямо Усман тата, уно вал солэн Зарни Мумез адӟемпотостэм карон мугъёсыз… «Со кык палдуро кышномурт! Уг лу мынам солы оскеме! Огласянь Зарни Мум, мукет ласянь Пор Кышно, кудӥз вир юэ…» – укыр юн вал Усман таталэн пумитъяськонэз. Но огзэ умой тодэ вал Усман тата, Зарни Мум хазаръёс дорысь кошкем бере, хазаръёс куашказы, булгаръёс дорысь кошкем бере, булгаръёс быризы. Нош кӧня вераськонъёс ветло, Рим но сыӵе ик муген, Юнона кошкемен, зурказ шуыса… Вашкала туноос верамъя, ӵапак Римысь Юноналэсь мусторзэ  кинъёс ке тапала ваиллям но сое Зарни Мум кариллям… Котькыӵе нимъёсыз солэн мед луозы, Зарни Ань, Сорни Най, Калтась Эква, Варфаламея, Патима – Усман тата понна со валантэм но пеймыт инмар. «Со сьӧрын калык бырон ветлэ, нокинэ со доры уг яра лэзьыны, нокин солэсь мусторзэ медаз иса! – чурыт возе ас валанзэ Усман тата. – Маскараын улӥсь калмез кышномуртъёс гинэ мед соин вераськозы. Мед озьы ик со луоз… Соосты со уг иса ке…»

Нош Япанча ужзэ быдэстыны соглаш ӧз луы ке?.. Нош Узыбей ачиз но валатэк Ыбесъёсты усьтӥз ке? Соку мар?  Но табере номыре уд вошты ни. Табере инмар гинэ тодэ, кызьы луоз. Ваньмыз сыӵе ӝог ортчиз… «Кизили Пурт» пиослы сётэмын. Арсавыл дунне сярысь сюлмаськон но табере соос вылэ выжытэмын. Малы со сярысь писыраны кулэ на Усман таталы? Со аслэсьтыз ужзэ лэсьтӥз ни ук, ас дыраз лэсьтӥз, табере пиос киын Карнан. Озьы-а, тазьы-а лэсьтозы, кудзэ шонерен быръёзы – табере соос кыл куто. Ганяк луэмез потэ Усман таталэн, но уг кошкы на со дорысь Арсавыл Дунне, укыр кема солэн пельпум вылаз со пукиз. Арсавыллэсь быдӟым озонзэ – Кузонзэ ӝуатэмзы бӧрсьы, Улуг Мухаммед выльзэ Кузон Эксэйлыкез кылдытэм дырысен, ваньзэ чаклано вал солы, кызьы вузаськон ӧрез возьыны, кызьы Улуг Мухаммедэн но со бӧрсьы туж ӝог вошъяськись эксэйёсын кыл шедьтыны. Нош кыл шедьтон сьӧрын туж уно ужпумъёс сыло. Кызьы но кытын, кӧня ю-нянь будэтоно Кузонэз сюдон понна, калыктэ улэп кельтон понна, вузаськон понна. Кӧня сӥль эксэй юртэ вуттоно, кӧня чорыг, кӧня емыш, кӧня азвесь, кӧня парча. Тодоно, Арсавылэз утён понна кӧня адями ужаны кулэ хан котырын. Кызьы Муско улусэн кусып возёно, кызьы Сулейман сьӧры ватӥськись Крым палась эксэй выжыосыныз вераськоно. Ку кинэн эшъяськоно, ку кинэ ас палад берыктоно. Ялан чакласа улоно вал солы я Муско паласен, я Крым паласен Кузонэ кивалтыны лыктӥсь эксэй выжыосты. Учконо, лыдъяно вал, кӧня адямиосты со вуоно эксэйёс котырын возьыны. Кӧнязэ али Кузон эксэй вӧзын, кӧнязэ Муско эксэй котырын. Малы ке шуоно нокыӵе тӧлъёс Арсавыл шаерез музъем вылысь медаз лӧпкытэ, медаз лопыртэ. Нош со понна юн гозыосын кышъяно вал тӧл пыроно интыоссэ. Вылаз ик думетъёс одӥг пол думемен уг уло, сисьмо, пертчисько, выльысь но выльысь лопыръяськыны кутске Арсавыл. Я одӥг палтӥз со улэ тӧл пыре, я мукет палтӥз. Усман тата осконзэ кемаласьгес ини Муско вылэ пуктӥз. Тамплиеръёс Муское вуэм дырысен ик. Зэрпалъёс но озьы солы дэмлазы. Муско улус уг сётӥськы на пуксён палъёслы, асьме камъёсмы вылэ пыкиське, нош крымъёс ваньзэ соослы вузаны дась, кемалась ини соосын якшасько. Сулейман но шонаське, мусулман имамъёсыз сэрен. Кин тодэ, оло озьы со Усман таталы гинэ адӟиське. Сулейманэз но урод эксэй уд шу ук?.. Песятаез но татаез кадь ик, трос со ужа калыкъёссэ «сьӧдъёслэсь» чылкытатон понна. Турк османъёс Византиез ӧй ке пазьгысалзы, «сьӧдъёслэн» черкъёссы кемалась ини камъёсмы котыре басысалзы. Муско но соос улэ пачкасал, оло. Соин ик, османъёслы луыса, Византилэн тапала пазьгиськем черкъёсыз Муско улэ кылизы, нош соосын валче вань вузаськон интыос но, барыш поттӥсь монастыръёс но. Соин кузон бигеръёс но тросэз Муско пала берытско… Ачиз Усман тата но вань кужымзэ сётэ Муско эксэй борды думиськон ужрадъёслы. Али солэн тужгес но бадӟым осконэз та ласянь Явуш вылын. Ӝоген Явуш муско эксэй котырысь черкъёслы вузъёссэ нуоз. Со понна Иоанн эксэйлэн сюрес усьтӥсь кагазэз Явушлы вуэмын ни. Шӧдске, Иоанн туж возьма сое, аслэсьтыз пичи дырысь самой матысь эшсэ. Усман тата Иоаннлэсь но Явушлэсь пичиысен ик эшъяськемзы сярысь нокинлы уг шарая. Туж ӧжытэз та сярысь тодо. Озьы ик Усман таталэн Муско эксэй котырын мукет лушкем адямиосыз но вань. Соин Усман тата туж ӟеч тодэ Муско эксэй сярысь. Одӥг ласянь со туж инмарлыко адями, нош мукет ласянь со пушкын кыкетӥ уртэз но улэ, кудӥныз пумиськонлэсь, кызьы шуо, инмар мед утёз. Кыкетӥ уртэз солэн кылдэмын пичи дыръяз ик. Атайзэ быдтэмзы бӧрсьы, Иоанн ӵемысь анаеныз кӧлэ вылэм. Со ялан мае ке кышкытсэ шӧдыса улэм. Юнме кышкамтэ эксэй пияш, огпол уйин пуксён пал черкъёсын герӟаськем бояръёс соослэн кӧлон бӧлемазы пыриллям но Иоанн азьын ик анайзэ вийиллям. Малы ке шуоно эксэй пилы тронэ пуксён аресэз тырмытозь Мускоен кивалтысал солэн анаез Елена Глинская… Нош Елена, эксэй картэз кадь ик, ӧз кылзы пуксён палъёслэсь дэмланъёссэс, соин пуксён пал орденъёсын герӟаськем бояръёс асьсэ вылэ басьтӥзы кивалтон удысэз. Соос шумпотыса быдтысалзы ассэ Иоанэз но. Но со огназ вал, нокинэ вал со интые пуктыны. Мукет эксэй выжыослэн нылъёссы гинэ вордскылӥзы. Со дырысен Иоанн пушкын вордскиз кыкетӥ уртэз, кудӥз адӟемпотостэм каре вал ас котырысьтыз бояръёсты. Со ӟеч тодэ вал кинъёс анайзэ но атайзэ быдтӥзы. Соин ик паймоно ӧвӧл, мар луиз соосын Иоанн тронэ пуксем бере… Кыӵе кӧшкемыт адӟонэз адӟизы соос… Шуо ачиз Иоанн аслаз киосыныз соосты шӧтэм курадӟытыса йылсо ӵогъёсы пуктӥз… Соин ик, куд-ог дыръя Усман тата Явуш понна но кышка. Медаз со шедьысал Иоаннлэн кыкетӥ уртэз шоры. Та ласянь уно вераськиз со Явушен, тросгес кылзӥськы, ачид ӧжытгес вераськы шуиз. Но Явуш ачиз но визьтэм ӧвӧл, со котькытысь ӟазег кадь котмытэк потыны быгатэ. Соин Кузонын но Явушлэн нимыз тодмо луэмын, яратэ сое калык. Озьы ик Япанчаез но. Но Япанчалэн, Явушен ке ӵошатоно, трос вожъяськисьёсыз. Котырысьтыз ик адямиос сое урод карыса, саптало Ядыгар хан азьын. Ачиз Ядыгар хан но кык пӧртэм малпанэн учке со шоры, одӥг ласянь кельше солы Япанча кышкасьтэм но визьмо ожгарчи луэменыз, нош мукет ласянь вожъяське солэн Кузонысь данэзлы. Ядыгар ӟеч тодэ, ассэ сое  калык уг яраты шуыса. Алигес быдӟым вӧсь бере, лушкем кенеш ортчиз. Вал отын чувашъёс, поръёс, комиос, мордваос, бигеръёс, ӟучъёс – тросэз Ядыгар ханлы пумит вераськизы, мылкыдъёссы уноезлэн ӟуч эксэй палан. Но поръёс но чувашъёс пӧлын, пе, трос на Ядыгарлы дурбасьтӥсьёс. Соос валамон ини ӟучъёслы пумит ожмаськозы. «Асьмелы но ӟучъёслы пумит ожмаськытэк уз лу, Иоаннлы но юрттоно луоз!» – шуизы калыкъёс.

Чик но кулэ ӧй вал туннэ Усман таталы та кыӵе ке храмчи «пӧйшурасьёс» но, «эксэй нылаш» но. Зарни Мум сярысь сюлмаськон но солы чик но кулэ ӧй вал. Но соос кылдӥзы. Уг тоды табере мар карыны Усман тата. Соос дорозь уг сузьтӥськы солэн адӟонэз, пытсамын солы Зарни Мум но, Узыбейлэн «эксэй вирыз» но, куинь туно пиос но… Соин ик кышка со, ас адӟонэныз вормымтэзэ та дунне вылэ кельтыны… Озьы ик со уг тоды, мар усьтӥськоз та куинь пиослы, кудзэс соос пӧлысь быръёз «Кизили Пурт» но кыӵе дунне адӟонъёс соослы возьматоз. Усман таталы но «Кизили Пурт», Арсавыл Дунне ужпумъёсты сяна, нырысь ик та куинь пиосты возьматӥз. Кема солы та пиосты возьмано луиз, нош вордскемзы бере тата соосты пичи дырысен ик чакласа возиз. Арессы тырмытозь будэтӥз соосты палэнысен, бордазы йӧттӥськытэк, уг яра вал солы соослэсь адӟонзэс сӧрыны. Котькуд пияш вӧзын ӟеч дышетӥсьёс вал. Камит вӧзын песятаез, кудӥз Усман тата мында ик та дуннеын улэ ни. Явуш вӧзын татаез но песятаез. Япанча вӧзын кин вал на, татаез но песятаез сяна, уг тоды Усман тата. Но куиньназы ик соос пичи дырысен Арсавылэз ӟеч тодо. Созэ гинэ уг вала Усман тата, малы соос пӧртэм кӧкыосысь лыктӥзы? Уг вала, малы пичи дырысен ик ог-огзэс тодыса будӥзы, ноку ӧз пумиськылэ ке но… Вань вал татын бадӟым ватосэз, кудӥз доры Усман татаез ӧз лэзе, ӧз сузьытэ… Соин ик со вылласянь гинэ учкыса улӥз аслаз син азяз будӥсь воштӥсьёссэ, пушласянь соосты ӧз адӟы.

Камит доры пичи дырысеныз ик матэктӥз Зарни Мум. Малы солы  Камит кулэ луиз, Усман тата али ке но уг вала. Озьы ик уг вала Камитлэсь Узыбеен кусыпъёссэ. Камитэз ӟус вылын эскерыкуз но Усман тата валаны турттэ вал сое, но номыре ӧз адӟы, юн ватӥськемын Зарни Мум но, Узыбей но. Та кузонысь ныл пичи дырысеныз ик ассэ йӧспӧртэм возе вал. Кулэ вал, дыр, Усман таталы сакгес со шоры учкыны.

Нош Зарни Мум Камит доры нырысьсэ васькыкуз ик ассэ «Варфаламея» ниманы косӥз. Озьы ке со ассэ ӧй нимасал, Усман тата сокем ӧй куалектысал, со ӧй быгатысал вераны солэсь кытысь асьме пала вуэмзэ. Озьыен со асьме пала вуэмын хазаръёс но булгаръёс дорысь. Мар сярысь вера солэн ним пуштросэз Усман тата уг тоды. Хазаръёслэн, булгаръёслэн выжыоссы номыр вераны та ласянь уг быгато. Нош «Варфаламея» нимо Зарни Мумзы сярысь ваньзы кышкаса верасько. «Ӵуж чалмаен ветлӥсьёс» сое туж мыскыл каризы, шуо, вань куалаоссэ солэсь тарказы, кесязы. Нош «мусторзэ» солэсь калыкъёслэн ымазы ӵыжатэм узвесь кисьтаса ке но утчаллям, нокызьы шедьтӥллямтэ… «Варфаламеяез» чакласьёс нырысь сое вуттӥллям булгаръёс доры, нош булгаръёс дорын но утчаны кутскемзы бере – асьме пала… Нимзэ но солэсь «Зарни Мум» гинэ шуиллям, «ӵуж чалмаослэсь» утиськон понна. «Варфаламея» тапалан шуыса ке тодысалзы, сутысалзы соос вань калыкмес. Угось сотэк но ашкынэм ашкеназъёс тапалась улонмес йырин-чукин берыктӥзы. Кӧня вӧсь каризы калыкмес. Котькуд выжы арлы быдэ соослы сётыны кулэ вал егит нылзэ. Кӧня бӧрдон, кӧня кайгу соос тапала вайизы. Нокин «ӵуж чалмаосты» уг яраты, чалмаоссэс ик адӟемпотостэм каризы. Соин, шӧдске, ашкеназъёс табере «ӵуж чалмаоссэс» гоно изьыен вошто, яке сьӧд чалмаосты нуллыны кутско… Маин соослы сокем люкетӥз «Варфаламея» – таки ӧз тоды Усман тата. Кемалась со вал. Ма али но ваньзы утчало Зарни Мумез. Кин ке Зарни мугорыз понна, кин ке мае ке тодыны турттыса, кин ке эшшо марлы ке. Но уг яра со доры нокинэ лэзьыны – юн тодэ Усман тата. Тани аримаспаос но кемалась утчало Зарни Мум доры сюресэз… Малы таосыз но Зарни Мум доры пырон понна урмемын, тод соосты… Нош «Варфаламеялэн» нимыз тапалан чузъяськиз ке, со чик но ӟечсэ уз вайы…

Йырыз ик Усман таталэн секыт луыны кутскиз. Тани со пуконысьтыз каллен султӥз но корказ пырыны ӧссэ усьтӥз. Ӵапак соку со син урдэсэныз корка сьӧрысьтыз италмасэз адӟиз. «Уд вала, ку но кытысь ву пыдэсысь пыкыезлэн ӵогеныз бышкалтоз…» – ас понназ малпаськиз Усман тата, вал солэн та сяськаен герӟаськем мадьёсты кылзэмез… Мырдэм со куштӥз корт дэремзэ, сандык вылаз понӥз азвесь шлемзэ. Собере кылиськытэк ик со выдӥз валес вылаз. Нырысь йыраз, собере котыраз мар ке шильыртыны кутскиз, кытысь ке лыктӥзы тӧл куараос, пӧртэм гумыослэн шуламъёссы…

– Изь! – шуиз солы ненег кышномурт куара…

Усман тата нырысь куалектӥз, собере ганяк кариськиз, синъёсыз секытомизы ке но, со валаны турттэ на, кин со доры лыктӥз, кытысен со вераське…

–  Изь! – нош ик шуиз ненег кышномурт куара…

Усман тата пальышаса-пальышаса ум дуннеяз кошке, нош кошкемез уг поты, ӧз буйга на солэн сюлэмыз, йырвизьмыз ялан утчаське, копаське, нылкышно куаралэн дуннеяз пырыны турттыса.

–  Буйгатскы! Гань-гань кариськы… – шуиз ненег нылкышно куара.

Усман тата пыс-пыс изьыны кутскиз. Ымдуръёсыз озьы ик пальышало. Кыӵе кемалась со тазьы ӧз пальыша ни, кыӵе кемалась таӵе ческыт умме ӧз усьылы…

–  Кин тон, ненег куараё кышномурт?.. Кытысь тон Усман тата доры вуид, укыр тодмо ук тынад куараед? – юа солэн пыс-пыс изись мугорыз.

– Варфаламея… –  серекъя ненег куараё кышномурт. – Тынад малпам тушмонэд… Ялан тон монэ вӧсь карыны медӥськод… Хазаръёс но, булгаръёс но малы ке тон кадь ик тыршизы… Но мон ӧй быдты соосты, асьсэос асьсэды быдтӥзы… Мынам валамея, мон вар кышномурт, мон юрттыны гинэ быгатӥсько. Но тон монэ яратӥськод ук? – нош ик серекъя ненег куараё кышномурт…

–  Уг тодӥськы… – пальпотэ Усман тата.

– Яратӥськод, мон тодӥсько, яратӥськод шуыса… – кит-кит серекъя ненег куараё кышномурт.

– Малы тон аслэсьтыд нимдэ Камитлы но, мыным но «Варфаламея» шуиськод? – юа Усман тата аслэсьтыз кемалась дырысен вордӥськем юанзэ. – Тон «Зарни Мум» ук?..

– Мон Зарни Мум луисько ваньзы понна… Нош тӥ понна Варфаламея… Угось аслам «валамея» асме тӥледлы «вар» карисько, озьы гинэ быгатӥсько мон тӥ борды думиськыны, тӥледлы матэ луыны…

– Соин-а Камит тонэ пичи дырысеныз  ик сыӵе яратэ…

– Тон но яратӥськод мынам тиледлы «вар» луэм сюлэмы «валамея»… –  серекъя ненег куараё кышномурт. Нош Камит сярысь номыр солы уг усьты…

14-тӥ люкет. Арсавыллы выль тата сайлан-гирышон

– Я, мар, сайкад? – кылӥськиз кыӵе ке пыдлось валантэм пуш куара. Верасезлэн куараез сокем бозгыт ӧй вал ке но, гудыртэм кадь чузъяськиз со Камитлэн пель сьӧраз. Ӝомало югытын нырысь ик солы адскизы ас азьысьтыз пештырскем лыз-пурысь изнэсъёс но валлэн кадь чорк сылӥсь кык кузь пельёс, нош соос сьӧрын тулкымъяськись сусыпу нюлэс. Камит пуке вал кыӵе ке лыз пурысь пудо вылын…

–  Ишак-а, мар-а? – куараен ик юа со аслэсьтыз ачиз.

– Зэмзэ ке мон кион… – ымнырзэ берыктэ солы лыз пурысь живот. – Тыныд ишак кельше ке, мон али ик ишаклы пӧрмо?.. – дэмла со.

–  Ӧвӧл, эн пӧртмаськы, кион ке кион мед луод, мыным ишак уг кельшы… –  пумит луэ Камит.

– Но Ходжа Насреддин но ишакен ветлӥз… Ачиз Иисус но Иерусалиме ишак вылын пыриз… Ишак со туж чидась…

–  Мынам Иисус но, Ходжа  но луэме уг поты… – пальыштэ Камит. – Тон нырысь валэкты, малы мон тон вылын пукисько?..

– Тыныд кулэ валэктон, малы тон мон вылын пукиськод? – юа кион.

– Умой луысал, валэктӥд ке… – пальыштэ Камит, киосыныз алэсьтыз мугорзэ кутылыса. Собере синтэм мурт кадь кионэзлэсь но ымнырзэ, мугорзэ киосыныз эскере.

– Тонэ, кык туно эшъёсыныд ӵош, Кизили Пуртлэн Ыбесэз татчы поттӥз. Татчы потон капчиен уг сётӥськы, тросэзлэн та дуннеын йырзы уг чида, лӧптэ. Соин ик юри тӥледлы, нырысьсэ татчы потэм туноослы, висъяське «буръясь». Куиньнады ик тӥ кионъёс вылын сайкады. Ми, конечно, пӧртэм мугоро луыны быгатӥськомы, коть ишак, коть вал, коть нагаль бурдо, но милемлы кион мугор матынгес, малы ке шуоно милемды алпъёс кион мугоро кылдытӥзы, ми но, нагальёс кадь ик, лобасесь вал, но бурдъёсмес милесьтым куке-соку лушказы… Ма, тон ачид быгатӥськод адӟыны… Татын ваньмыз адӟиське…

Отӥзэ Камитлы валэктоно ӧй вал ни. Со ваньзэ валаз, яркыт-яркыт суредъёсын ӝуатскиз солэн тодонэз. Со алпъёс сярысь но адӟиз, лобась кионъёс сярысь но, кионъёслэн мар понна бурдъёстэк кылемзы сярысь но.  Но «лушкан» сярысь вераськон сое  шуак вуттӥз Узыбей доры. Со адӟиз, кытӥ со храмчиосты нуэ. Пырак бадӟым гопе, кык мувыръёс вискысь «Паньгам» нёжалэ. Ваньзы со «Паньгамлэсь» кышкало. Но Узыбей «йыр ке йыр, пыд ке пыд» шуыса кадь вамышъя… Чик уг кышка ӵушъял кадь пежырскем инкуазьлэсь. «Нёжто Кизили Пурт вань Арсавылэз аслаз дуннеяз кыскиз. Табере Узыбей но та дуннеын ик. Ӝыт шунды пуксьытозь вань Арсавыл калык туннэ адӟоз, шӧдске, та паймытӥсь, кышкатӥсь югдуръёсты. Уйшор бере гинэ та  аспӧртэмлыко дыр быроз. Камитлы Арсавыл вань аслэсьтыз пуштроссэ усьтӥз. Озьы ик пиослы но. Ваньзы соос адӟо, мар луиз Усман тата вакытэ Кузонэн но Идель дурын сылӥсь каръёсын, нош солэсь но азьвылгес хазаръёсын, булгаръёсын, Иднакарен, Дондыкарен, Донды пиослэн каръёсыныз. Ватка сусыпуос соослы усьтӥзы, малы соосты «Иисус пу» шуо. «Иисус» туж вашкала дырысен «возьмась, утись, ворсась, ватӥсь» кадырлыко пуштросъёсты возе, озьы ик со пуштросэз возё «сусыпулэн» попртхэм калыкъёс пӧлысь вашкала нимъёсыз «ворса, вортча, борса, бортча, арса, арча» но мукет. Арсавыл ачиз но «утись, возьмась, ворсась, ватӥсь» нимо воршуд шаер. Солэн Арча нимо кадыр нылыз но юнме шорысь уг нуллы та нимез. Со но алпез утиз, озьы ик сусыпулы берытскем бераз ватӥз шуо Иисусэз анаеныз, Ирод соосты утчаку. Арча каръёс но юнме озьы уг нимасько. Соос трос пазьгиськемын Арсавыл шаерын. Но тросэз соос музъем улын, бадӟым вулэсь но мукет дунне зурканъёслэсь калыкъёсты но соослэсь тужгес но дуно узырлыксэс, тодонзэс, утён понна. Отын вань узырлык ватэмын, вашкала тодон… Зэмзэ ке сыӵе утиськон каръёс быдэс дунне вылын вӧлмемын. «Тӥ троссэ соосты шедьтоды, – оскытӥзы пиосты сусыпуос. – Но тӥледлы одно ик нырысь шедьтоно Кузон улысьсэ Арчакарез…» – ватсазы на  котыр ласянь шонаськись сусыпуос.

– Тӥледлы ӝегатскытэк гирышонды борды кутконо, Кизили Пуртэз асьтэ кие ӧтёно… – сусыпуослэсь куараоссэс дугдытыса, асьсэ вылэ пуктэм куронэз ивортэ Явушлэн кионэз.

– Но Кизили Пурт тӥ пӧлысь одӥгдэс гинэ быръёз… – шуэ Япанчалэн кионэз.

– Нокудды вождэс поттыны кулэ ӧвӧл, тӥледды ӧз ке бырйы… – ватса Камитлэн кионэз. – Нырысь ик Кизили Пурт Явушлэсь кикурзэ бышкалтӥз. Соин ик нырысь Кизили Пуртэз ас дораз ӧте Явуш мурза.

Явуш кык кизэ азьлань карыса Кизили Пуртэз ас дораз ӧтьыны кутскиз. Явушлэн трос вал Арсавыл азьын лэсьтэм ужъёсыз. Со азе трос ужъёс пуктэмын. Котькудӥз Кузон эксэй сое аслыз матэ кариз, кудъёсыз трос вошъяськизы ни со азьын. Ядыгар эксэй но гажа сое. Муско эксэй Иоанн но яратэ. Малы ке оске вал Явуш, Кизили Пурт со доры лыктоз шуыса. Но Кизили Пурт ӧз лыкты, озьы ик соос азьын омырын ворекъя. Но йырыз кур ӧз лу Явушлэн. Сюлэмыз гинэ капчияз кадь. Со тодэ, Япанча но, Камит но бадӟым но кужмо туноос.

– Табере Япанчалэн черодэз… – ивортэ Камитлэн кионэз.

Япанча но аслэсьтыз бадӟымлыксэ валаса оскиз, Кизили Пурт со доры лыктоз шуыса. Сое угось вань кузон калык тодэ но гажа. Солэн трос ини ӟучъёсын ваче пумит вуылонэз, котькытысьтыз со вормыса потылӥз. Но Кизили Пурт со доры но ӧз матэкты. Япанча но ӧз возьматы аслэсьтыз ӝожомемзэ.

–  Табере Камитлэн черодэз… – шуиз Япанчалэн кионэз.

Камитлэн нокыӵе малпанэз ӧй вал Кизили Пурт ласянь. Со но малпа вал, Кизили Пурт Явушлэн яке Япанчалэн луоз шуыса. Ассэ со ноку соослэсь вылэгес ӧз пукты, кин со Камит та эшъёсыныз ӵошатонъя, солэн улонэз тросгес гурт котырын ортчиз. Со бадӟым аресо песятаез вӧзын бусы гыриз, нюлэс мерттылӥз, бӧрысь ӝуатон вылысь. Нюръёсты кӧсатылӥз, ӝуатэм нюлэс пень вылэ ю-нянь мерттӥз. Бӧрысь араз, культоос лэсьтӥз, кутсаз, макнязэ тӧлатӥз, таза кидыссэ пуйыосы тыриз, собере Кузонэ нуллӥз. Озьы ик со турын турнаны ветлӥз, пудо вордӥз, муш палэпъёсты утиз. Нош кысык дырзэ шедьыку соос эшъёсыныз бадӟым тыосы дырто вал ошкуйёсын ветлыны, ожмаськон удыслы дышетскыны. Номыр сыӵезэ Камит ӧз лэсьты. Но со кизэ но ӝутыны ӧз вуы, Кизили Пурт ачиз со доры лыктӥз, кӧрыксэ возись еэз но ачиз солэн кусказ керттӥськиз, нош Кизили Пурт ачиз ас кӧрыксэ шедьтӥз…

– Тон, Камит, табере Кизили Пуртлэн кузёез, тон табере Арсавыл Тата, нош мон тынад юрттӥсь агаед… – шумпотыса шуиз Япанча, кионэныз ӵош Камит доры матэктыса но сое ӟыгыртыса.

– Мон но табере тынад юрттӥсь агаед, Камит… – шумпотыса ӟыгыртӥз сое Явуш. – Мон туж куанӥсько, тон Арсавыл тата шуыса.

Уг тоды Камит мар вераны. Бакомиз. Кылзэ но выртэмез уг луы. Но каллен-каллен со небӟиз. Пиослэн ӧй вал нокыӵе вожъяськонзы, нокыӵе пӧяськонзы, вал куспазы агай-вынъёс пӧлын кадь бадӟым яратон.

– Мон уг малапаськы, та Кизили Пуртлэн кузёез но «Арсавыл тата» луон со кыӵе ке данъяськон шуыса… – аслэсьтыз малпанъёссэ усьтӥз Камит. – Мон озьы ик уг валаськы, малы сое мыным оскизы, но мыным Кизили Пурт вера, асьмелы Кузонэ ветлоно шуыса.

– Ош доры… –  ватса Явуш.

– Оштолэзе… – пальпотэ Япанча. – Базарез усьтон нуналэ.

– Шонер… – шумпотэ Камит. – Но отчы ортчем дыре потон азьын, нырысь Узыбеез мозмытоно…

–  Кошким, мозмытом! –  вакчияк шуэ Япанча.

– Кошким! – ӝутскем мылкыдын итӥське Явуш, кионэзлэсь серметсэ кыскыса. – Паньгатом со «Паньгам» нёжалэз. Табере со асьмелы кышкыт ӧвӧл!

–  Кошким! – шумпотыса серметсэ кыске Камит но.

Пиослэн кионъёссы шуак-шуак тэтчаса кошко, сусыпу вайёс гинэ соос сьӧры шонаськыса кылё. Мар, бон, куанэ Арсавыл аслаз выль туноосызлы оскиськыса… Ма Арсавыл гинэ ӧвӧл, ваньзы адӟисьёс куано, кулэмъёс но улэпъёс но. Тужгес но Узыбейлэн анаен-атаез…

15-тӥ люкет. Усман таталэн лушкем малпанъёсыз

Пыс-пыс кӧлэ  Усман тата. Яратыса учке со шоры Арсавыл.

– Оло сайкатоно? – шуак лыктэ Арсавыл доры музъемысь малпан…

– Ӧвӧл кулэ… – шыпырто омырлэсь кылдэм тӧлъёс. – Мед кӧлоз на. Умой кӧлэ ук, мед шутэтскоз…

– Сайкатыны вуомы… – ярдуре шуккисько кам тулкымъёс… Мед кӧлоз кадыр песятай.

– Ческыт умзэ тарканы кема ӧвӧл… – соглаш луэмзэ вера тулкымъёс вылысь тыл, Усман таталэн ненег пальышанэныз кисьтӥськыса.

Но Усман тата ачиз сайказ. Назильскиз но ческыт мыняса кылле.

– Иське, Камитэз ик быръиз Кизили Пурт… – чик но ӧз паймы та адӟонэзлы Усман тата. Вань вал солэн сыӵе шӧдонэз. Угось Япанчалэсь но, Явушлэсь но улон сюрессэс солы Кизили Пурт усьтӥз. Ватка ногай выжыысь Япанча мурза ваньзэ ас улоназ шонер ке но лэсьтӥз, со ӟечен уз быгаты йылпумъяны ас улонзэ… Ялан солы пыд пуктӥсьёс шедёзы. Выжызылэн ведӥнъёсын ожмаськонзы чылкыт малпанъёслэсь ке но вордӥськемын, вир кисьтон, виылон уж выжыез улэ уськытэ, карнанзэс зол гинэ паллян пала нюртэ… Но Япанча, вань шуг-секытъёсты чидаса, туж кадыр мыноз аслаз сюрестӥз, соин ик выжызэ но чылкытатоз, выльысен ӝутоз. Сыӵе солы луонлык сётӥз Карна апай. Кылёз на со бӧрсьы Арсавылэз югдытӥсь выжы. Малы ке шуоно юнме ӧз бырйы аслаз куинь туноосын гирышоназ сое Кизили Пурт. Туж чылкыт сюлэмо со, Япанча мурза, ошмес ву кадь чылкыт солэн лулыз. Юнме шат со омыр дуннеысь адями. Чылкыт омыр тӧлъёсты ваёзы солэн выжыосыз Арсавыл шаере.

Явуш но кадыр адями. Туж кема со улоз дунне вылын. Песятаез но татаез но солэн ӝог кошкизы, солэсь улонзэ кема-кемалы кузятыса. Песятаеныз татаез кадь ик, трос ӟечсэ лэсьтоз Арсавыл шаерлы Явуш. Выжыосыз но солэн трос кылёзы. Соос но трос ӟечсэ лэсьтозы та кадыр музъеммы понна.

Нош Камит пумысен номыр ӧз усьты Кизили Пурт. Соин ик Камит солы тём-тём пеймыт адями. Со али ке но пайме, кин тэтчытӥз Камитэз бабасырлэн мур гуаз? Ачиз-а со отчы, бабасырен эшъяськон понна, тэтчиз, оло бабасыр ачиз сое отчы кыскиз?.. Тодэ вал-а Камит, отысь со потоз шуыса? Яке юри-а тэтчиз татаез сое золгес мед яратоз, зарни комоксэ бӧрдыса мед утчалоз шуыса? Оло дышетыны малпаз татазэ но анайзэ? Кӧшкемытлэсь кӧшкемытэсь юанъёс кылдо та ласянь Усман таталэн йыраз. «О, аныкае!» – пичи гинэ урод кылъёсын со ассэ уг тышкаськы, таӵе юанъёсыз кылдэмен сэрен, но со дыре ик со оске но кадь сыӵеезлы но. Ваньмыз со зэм кадь солы потэ, но Камитлэн адӟон бугорезлы, оло со озьы ик кулэ, угось ӟечез пеймытын тугиське, черсиське, биниське, пеймытын будэ, тём-тём пеймытын…

Али ке но пайме Усман тата пичи Камитлэсь, кам вамен потыса, камлэн сопал ярдурысьтыз италмасъёсты ишкыса, берен аспал ярдураз ву пыдсытӥ берытскемез. Вылаз ик ичи но котмытэк, ӵуж чалмаоссэ Узыбейлы кузьмамез. Италмас сяськаез шур вамен поттӥсь егит пияш арсавыл мадьёсын, котьку кулэ. Нош Камит кочон кадь потэ. Усман тата али ке но уг вала, кин озьы Камитлы камез потаны юрттӥз? Оло ачиз ик Камит номыр сярысь малпатэк Узыбейлэсь куронзэ быдэстӥз? Со ӧз малпаськы, «ву» сое быдтоз шуыса, «ву» кужым сое нуыса кошкоз шуыса. Узыбей куриз но, Камит сопал ярдуре «ву» вылтӥ вамыштӥз. Потӥз шонерак сяськаос доры. Собере берлань сюрессэ «ву» пыдсытӥ – шонерак Узыбей доры. Нокыӵе «ву кужым» сое ӧз палэнты. Оло ке ӧй вал солы «ву кужымлэн» уллапала нуонэз. Оло ке ӧй вал солы «вулэн» шоканзэ ӵоктанэз. Оло ке ӧй вал солы «вулэн» синъёсты адӟисьтэм карись пеймытэз. Оло ке ӧй вал солэн «ву-дырез» шӧдонэз. Узыбей куриз но – со быдэстӥз. Кызьы со, пичи Камит, тапал ярдурысен сопал ярдурысь италмасъёсты адӟиз? Кызьы соосты нырысь адӟиз пичи Узыбей? Кытысь соизлэн но таизлэн но сыӵе малпанзы кылдӥз, курон но быдэстон кужымзы? Вань татын валантэм пеймытэз… Малы соос «италмас мадьёслы» пумит ужазы? Малы ӧз кырмиськы соос борды «италмаслэн» пеймыт палдурыз?

Ӧй паймысал, яке эшшо но золгес паймысал Усман тата, ӧжытак усьтӥськиз ке солы, кызьы пеймытын Зарни Мум дышетэмъя, Камит кам вӧзысь корка борддоре эгырен ошкуй суреда но со суредзэ зэмос ошкуйлы пӧрмытскытэ… Кызьы со ошкуй азе пичи кобыысь ву кисьтэ но, камлэсь тулкымъяськись вуоссэ ошкуй доры вае, собере тӧлъёсты кыткыса кошке ошкуен пӧртэм камъёс кузя… Кызьы Зарни Мумлэн шильыртэмез улсын со азе пото Бату хан но солэн бабаезлэн, Чингисханлэн, дано ожгарчиез Субэдэй батыр, кудӥз одӥг ожысь но вормытэк ӧз поты. Кызьы та кык быдӟым ожгарчиос, Камитэн шудыса, сокем шудо серекъяло… Дышето сое ожмаськон удысъёслы. Кызьы Бату хан кам вылэ шултэ но со доры одӥгез ярдуртӥ, мукетыз ву вылтӥ тапыртыса лыкто кык Зарни Валъёсыз. Одӥгез вылэ Субэдэй пуксе, мукетыз вылэ Батуханэн Камит. Усьтӥсько соослы вань дунне вылысь ожмаськонъёс, «сьӧдъёсын» кылдытэм мугъёссы со ожмаськонъёслэн. Камит аслаз синмыныз адӟе со ожмаськонъёсты. Собере солэсь юаллясько, куд шораз кин янгышаз, куд шораз кин шедьтӥз уноез пӧлысь одӥгзэ гинэ шонер вамышез, утиз ожчиоссэ, ишкалтӥз тушмон киысь вормонэз…

Но уг тоды вань со пеймытсэ Усман тата, со пайме малы Камит одӥг пол но ӧз малпаськы, Кизили Пурт со кие мед лыктоз шуыса. Камит алиеныз улэ – аслаз юанэзлы ик, шӧдтэк шорысь, валэктонзэ шедьтэ Усман тата. Камит вуонозэ адӟе ке но, уг сётскы солы. Со тодэ, вуоноез вошъяськись, пӧртэм учыръёслы сётӥськись. Одӥг учыре со тазьы адӟиське, нош мукет учыре мукет сямен. Соин ик Камит уг куя отчы, «ву нуонолэн» ӧраз,  бурлакъёс кадь, янкоръёссэ, уг кыскы отчы «ву нуонлы» пумит карубзэ. Со, вукарнан кадь, дырлэсь но тӧлъёслэсь кылзӥськытэк сылэ. Со ачиз но «ву нуонолэн» вошъяськемъёсызъя вошъяське. Толонэз Камит туннэез Камит ӧвӧл ни. Со уг улы «ву нуэменыз», со тодэ кыӵе учыръёс кошкизы «ву нуэмаз», ортчем дыре кошкем учыръёсысь со басьтэ  али дырлы  кулэ луись тодонзэ, собере али дырлэсь серметсэ ас кияз кырме. Сотэк кызьы валэктыны луоз пичи  Камитэн луэм куинетӥ учырез. Усман тата али ке но пайме со пичи Камитлы.

Одӥг пол Камитэз анаез, Танзиля, басьтэ ас сьӧраз Кузонэ. Отчы вутто соосты Ӟумъялэн ошкуйчиосыз, кудъёсыз ӵемысь отчы вуыло Кузон ужъёсъя. Кузонэ вуэмзы бере Танзиля Кабан ты дорысь «Зилантау» яке «Кыйкарбам» нимо гурезьысь несториан черке потэ. Та черк туж вашкала дырысен зэрпалъёсын пуктэмын. Татын шуо ачиз Чури батыр бадӟым лобась кыен Зилантэн ожмаськем. Верало, кытчы со кыйлэн йырыз усиз, кытчы Чури батырен кыклы люкем мугорыз, кыӵе интыын тылскон ӝуатэмын вал, кытын ваньзы кыйёс ӝуазы. Соос асьсэос ик, Чури батырлэн вӧсяськем кылъёсызъя, со тылэ нюжтӥськизы, шуо. Танзилялэн туж потэ вал Чури батырлы вӧсяськемез, угось картэз солэн, Ӟумъя ватаман, туж зол яраос басьтэмез бере кылле вал зэрпалъёслэн Кузон шорысь черказы. Секыт вал оскыны, Ӟумъя улэп кылёз шуыса. Зэрпалъёс меӵак со сярысь веразы, татын Чури батыр гинэ юрттыны быгатоз, пӧй. Соин Танзиля шонерен кошкиз Кабан тыос пала. Ошкуйчиослы но со та сярысь ӧз вера. Ивортысал ке, ошкуйчиос одно ик сое келясалзы. Но Танзиля, вань кышномуртъёс кадь, аслаз йыраз шуккемезъя лэсьтӥз, нокинлы вератэк, нокинэн кенешытэк. Нюлэсэз ортчыкузы Камитэн Танзиля азе потӥзы куинь воръёс. Соос соку ик соосты кырмизы. Танзилялэсь киоссэ думизы, кесяськид ке, виём, шуизы, астэ но, пидэ но. Тани одӥгез Камитэз Танзиля борды думыны турттыса пияш доры матэктӥз, серекъя, шумпотэ, «хороший татарчонок» шуэ. Кык мукетъёсыз Танзилялэн песьтэрысьтыз азвесьёссэ адӟыса лыдъяло, удалтӥз шуыса шумпото. Но соослы ӧз удалты… Камит ас дораз матэктэм ворлэн пуртэныз ик, со доры мыкырскем ворлэсь чыртызэ вандыса куштӥз. Собере пурт лобиз арбалетэн сылӥсь ворлэн чыртыяз. Таиз пыд йылысьтыз пограку, со арбалетсэ солэсь ишкалтыса куинетӥезлэн кык син висказ мертчытӥз арбалетлэсь корт шизэ. Собере нокыӵе кариськытэк матэктӥз коскаса кыллись вор доры но, чыртыысьтыз пуртсэ поттыса, туж ӝог вандылӥз думылэм анаезлэсь гозыоссэ, кутскиз асьсэлэсь арбериоссэ но Чури батырлы нуоно азвесьёссэ люканы. Асьсэлэсь азвесьсэз, узырлыксэс воръёслэн пуйыысьтызы басьтэмез бере, «кошким» шуиз со бакомем анаезлы, синъёсаз нокыӵе кышкан солэн ӧй вал. Ваньмыз со сыӵе ӝог ортчиз, анаез малпаны но ӧз ву, ваньзэ тае солэн пиез лэсьтӥз шуыса. Но Камитлэн одӥг вирсэрез но ӧз дыректы, одӥг пигонэз но ӧз вырӟы, шормуӵ кадь, вукарнан кадь, сылэ вал со «кошкись ву» шорын. Нокудзы воръёс ӧз валалэ мар луиз соосын, нош Камит, кошкон азяз, улӟытӥз куиньзэс ик воръёсты, быдтӥз соос пушкы каръяськем сьӧсь пӧйшур уртъёссэс… Уг яра вал солы аслаз вылӥ мертэтъёсысьтыз уллань усьыны, умой тодэ вал со сярысь пичи Камит. Кыӵе кужым со пушкын улэ, уг валало Ӟумъя но, Танзиля но, Усман тата но. Кин солы озьы юрттэ?..

Созэ Кизили Пурт ачиз тодэ ни, дыр, со нокинлы уг усьты уга аслэсьтыз вань тодонъёссэ. Котькуд туноезлы но со созэ гинэ усьтэ, мар солэсь со вакытэ куре. Усман таталы со ужпум пуктӥз Арсавылэз утьыны, ялан возьматӥз солы, кызьы но ку со понна мар карыны кулэ. Усман тата аслэсьтыз ужзэ быдэстӥз. Тау шуэ со Кизили Пуртлы солы та ужез оскемез понна, озьы куинь даурлэсь кузь улон сётэмез понна. Табере Камит азе Кизили Пурт лэсьтоно ужпумъёссэ пуктэ. Нокин уз тоды со ужпумъёсты, Камит сяна. Вылаз ик ачиз Камит но пумозяз ваньзэ уз адӟы. Ужпумъёс со азе кулэ дыръяз гинэ усьтӥськозы. Ӟеч тодэ сое Усман тата, Кизили Пурт усьтӥське со быдӟа гинэ, мар быдӟа кулэ, уродэз пала шонтӥськонтэм понна. Номырзэ медаз адӟе, валаса медаз вуттэ «сьӧд дуннеос». Соин, шӧдске, Камит ваньзэ ӝог лэсьтэ…

Ку Кизили Пурт ваткаос доры вуиз, нокин уг тоды, уз но тоды. Но со тӥни вань, со ужа, сое ваньзы ӟеч тодо. Соин ик арсавыл туноос асьсэлы сыӵегес ик пуртъёс лэсьто. Огзылэсь огзы соос чебересь. Туноос мар ке тодон яке веран понна нырысь ик шузимымон экто, бергало, тэтчало, пӧртэм валантэмесь выросъёсты лэсьто, Кизили Пуртлэсь вань паймытӥсь ужъёссэ вераса, собере, Кизили Пуртлы оскиськыса, асьсэлэсь пуртсэс веран валэктон пусъёс вылэ ысто. Озьы соос шонерзэ диворало. Татын но ужа Кизили Пурт. Шумпотэ Усман тата Кизили Пуртлэн мурдалаезлы, ӝуждалаезлы, сузьыны луонтэм пеймытысь югыт тодонэзлы. Кизили Пуртлэн кужымез быдэсак со дорысь ӧз на кошкы, соин ик Усман тата адӟе, мар солы адӟыны кылдэмын но сётэмын. Со пальышаса учке омыре, тыл кадь гомась шунды шоры, музъем шоры, ву шоры. Ваньзы соин ӟечбуръясько, верасько. Усман тата но ӟечбуръяське, вераське…

16-тӥ люкет. Узыбейлэн Паньгам гоптӥ ортчонэз

Узыбей, адӟонзэ валатэк, гозыям кунян кадь, мынэ, зэмзэ ке вала, но солэн уг поты валамез. Киоссэ солэсь ӵош карыса азьпаласен думизы, пырак кипотэс шортӥз. Гозы пумзэ ас кияз кутӥз «храмчиослэн» валтӥсьсы, дырын-дырын со дыртытыса Узыбеез ас сьӧраз кыска, нош «кулэм китяпаез» ялан возьматэ Маскара пала шонерак нуись сюрес вылэ, кудӥз соосты пыртӥз ни «Паньгам» гопе, кытчы нокин ветлыны уг дӥсьты. Маскараос асьсэлэн улон катъёссылы пумит луись кышнооссэс ӵапак та сюрес вылэ келяло вылэм. «Мын, «Паньгамтӥ» кам дуре потӥд ке, ул озьы, кызьы улэмед потэ…» – шуэ вылэм маскараослэн кенешсы. Валамон ини тросэз уг дӥсьто вылэм «Паньгамтӥ» потыны, нош дӥсьтӥсьёсыз котькулы «Паньгаме» ышыло. Но, шуо, вань сыӵеосыз, кудъёсыз «Паньгамез» потыса мӧзмем картъёссы но нылпиоссы доры берытскылӥзы… Ноку ӧз малпа Узыбей, солы но маскараослэн ваменэс кышномуртъёссылы кадь, «Паньгамтӥ» вамышъяно луоз шуыса. Песянаез но анаез лул дуннее кошкемзы бере, со уг ни поттылы вал  «принцесса» кылзэ. Нош табере кыӵе ке мурт адямиос сое «принцесса» шуо. Чик но серекъятэк, солэсь вирзэ кулэм ки вылэ шапыктыло, кулэм кизы улӟе, вырыны кутске. Нёжто песянаез зэмзэ солы вера вал «эксэй вирыз» ласянь? Зэмзэ шат со пушкын Джучилэн вирыз бызе? Узыбей угось шудыса гинэ озьы вераськылӥз. Песянаез медаз лекъяськы шуыса. Нош песянаез солэн укыр вал чурыт та ласянь, ваньзэ чакласа улӥз – кызьы солы вераськоно, кызьы мугорзэ возёно, кызьы ӝӧк сьӧрын пуконо, кыӵе луоно калык азьын, кызьы дӥсяськоно, кызьы вӧсяськоно но уно мукетсэ. Оглом со дышиз «принцесса» луыны. Нош табере со уг тоды, кызьы но куд пала сётскыны. «Храмчиос» Зарни Мум доры мыно ке, кызьы соос отчы пырозы? Со куше нокытӥ пырыны уг лу, ваньзы сое ӟеч тодо… Пудоосты но адскисьтэм борддоръёс ӵашъё. Угось Узыбейлэн малпаназ но ӧвӧл, ачиз ик со Капкаослы усьтон луэмез понна, Усман тата табере сое лул дуннее келяны турттэ шуыса. Узыбей ялан Камитэз сярысь гинэ малпаське, но со дыре ик паймыса мынэ котырысьтыз валантэм инкуазьлы. «Храмчиос» но долкамын. Соос уг паймо ни «кулэм килэн» улӟемезлы, соосты абдыратэ мукетыз. Таӵе зӧк, дас кузя ӟыгыртыны луонтэм кипарисъёсты, кышкам коӵышъёс кадь пештырскем сусыпуосты, сокем секытэсь но зӧкесь улвайёссэс вӧлъяса, инбамез ик ӵоктаса, жингырась кызъёсты соослэн ноку адӟемзы ӧй вал на. Бурдоос но татын укыр зӧкесь, марлэсь ке кышкаса кадь куачырто. Ӟозъёс но, ожтӥрлык шуккылӥськись куараосты тодэ вайытыса, мувыр бакаос кадь, тэтчало, оло ке бурдъёссы но мугоръёссы кортлэсь дуремын… Бадӟымесь  чонариос, горд синъёссэс писпу гырыкъёсысь поттыса, вотэсъёсазы кинлэсь ке сюремзэ возьмало. «Храмчиос «палашъёсынызы кырыло со вотэсъёсты, нош чонариос вотэс гырлыоссэс кылыса шуак соос вылэ тэтчало. Мырдэм утисько храмчиос соослэн ым дорысьтызы кык пала вайяськись кыскась кадь йылсо курикъёссылэсь. Нош кудӥз утиськыса ӧз вуы, со пограз ни, коскаса синъёссэ берыкъяса кылле, ымтӥз шукы потэ. Нокызьы сое бурмытыны ӧз быгаты валтӥсь ошкуйчи, вуэз но, даруэз но ӧз юртты. Бышкалтӥзы сое, медаз курадӟы шуыса. Узыбей нокызьы уг вала, мар татын луэ, оло осконо солы, оло ӧвӧл?.. Нош Арсавыл музъем солы пырак йырвизьмаз шыпыртэ: «Эн кышка, тонэ нокин уз иса…» Узыбейлэн сюлмыз ик путэ вал со куаралэсь… Анаез бырем бере бӧрдыса пукыкуз но тазьы ик шыпыртылӥз солы музъем: «Эн куректы, нылы, ваньзы куке но музъем вылысь кошко. Кин ке вазь кошке, кин ке бергес… Кин ке ассэ шӧтэм сьӧдмаса, нош кин ке ассэ туж чебер югдытыса. Анаед тынад зэмос эксэйныл кадь кошкиз. Соин вылӥ мертэтэ сюриз. Кулонэн улон уг быры. Инбамын но адями улэ, собере выльысь татчы берытске, аслыз выль тодон-валан басьтыны. Тон но ук эксэйныл, тон пушкын Быдӟым Чингисханлэн вирыз бызе, соин ик тон валаны кулэ, малы уг яра бӧрдыны. Бӧрдон «сьӧдъёслы» гинэ кужым сётэ, нош шумпотон Инмарлы… Анаедлы секыт гинэ луэ, тынэсьтыд бӧрдэмдэ адӟыса… Тынад бӧрдэмед сое улӥ мерттэтэ васькытэ…» Узыбей малпа вал, музъем анай но, пичи нылмуртэз сямен, мусояса гинэ озьы вераськиз. Нош табере со думылэмын, оломар ӝужда писпуос вӧзтӥ, музъем вылтӥ ке но мынэ, чик но солэн «принцесса» луэмез уг ни поты. Чонариос гинэ уг тырмо вал, тани музъем но соос улын вырыны, кисыръяськыны ӧдъяз ни кадь… Тыпак дугдӥзы храмчиос, мар карыны тодытэк сыло. Нош музъем тодэ ас ужзэ – куинь храмчиос улын, ым кадь, шуак усьтӥськиз нёжал но соосты ньылыса берен ворсаськиз… Собере, кӧня ке куасалляськемез бере, куиньзэс ик сялӟыса поттӥз. Кыдёке соос лобӟизы, но шуак лысъёссэ куштэм кызлэн улвайёсаз бышкалскизы… Соос быдэсак нажгатэмын вал, тяпылес но вожалэс мызен шобырскемын, тёп-тёп вия со мызь соослэн паньгам, нажгам мугоръёссы вылысь… Улвайёссэ гольыкатэм кыз выльысен лысъёсыныз шобырскиз, оло та кӧшкемыт суредэз юри ватыса,  оло ачиз но солэсь юрӟымаса… «Храмчиос» сьӧрлань шоналскизы…

– Кытчы?! – чурыт кеськиз валтӥсьсы. – Матэктэ ныл котыре! Берлань кошкиды ке, быроды!

Нош «храмчиос» дас вамыш но лэсьтыса ӧз вуттэ, нош ик куиньзэ бинялтыса ишкалтӥзы музъем улысь писпу выжыос… Собере музъем нош ик соосты, вожалэс мызеныз шобыртыса, чонари вотэсъёс вылэ сялӟиз…

– Азьлань, – нош кеськиз валтӥсь «храмчи», Узыбеез ас сьӧраз кыскыса. Нош ачиз ӝогак лыдӟыны кутскиз кыӵе ке валантэм кылъёссэ. Сое кылыса «храмчиос» но со сьӧры лыдӟыны кутскизы… Музъем шӧдтэк шорысь буйгатскиз кадь, воксё выремысь дугдӥз. «Храмчиос» дыртыса кошкизы азьлань. Узыбеез но бызьыто. Но тани нош ик музъем улысь тэтчыса позырскиз кыӵе ке тӧрнам кыпы, улвайёсызлэсь кылем йылсо ӵогъёсыз соку ик юн-юн кортӵогазы нош ик кыксэ храмчиосты…

«Укмыссэ басьтэ ке Паньгам, уг ни иса шуо… –  ассэ буйгатэ Узыбей. – Соин ик сое буйгатыны маскараос ваньзэ укмысэн сёто: укмыс курег, укмыс ӵӧж, укмыс ӟазег, укмыс ыжпи, укмы парсьпи.

– Кытчы тон милемды нуиськод? – кеське Узыбейлы валтӥсь «храмчи».

– Малы тон мынэсьтым юаськод, кулэм киедлэсь юа! – нокыӵе кариськытэк вазе солы Узыбей. – Уг яра вал татчы пырыны, Зарни Мум доры нокин татӥ уг ветлы!

– Нош кытӥ со доры ветло? – кеське валтӥсь «храмчи».

– Нокытӥ со доры уг ветло, котькытын кулон гинэ возьма! – кышкыт вера соослы Узыбей.

– Лыдӟелэ Гильгамешлэсь мантразэ! – кеське валтӥсь «храмчиосызлы». – Эн кылзэ та нылэз! Музъем уг выры ни, чусказ, номыр вашкалаослэн кырӟанзылы пумит султыны уг быгаты. Нош кыпы со кыпы, адямилэн лэсьтэмез. Адямиос татӥ ветло бере, асьмеос но ортчомы! Умой учке пыд улдэс, ӧд ке сьӧлтаське, нокыӵе кыпы уз тэтчы! Нокыӵе сикыӵ уз кыскы!

17-тӥ люкет. Ыж-така турынлэн историез

Мар шуыны ик уг вала Усман тата, сокем зӧк кызъёсты но сусыпуосты адӟыса. Тазэ зэрпал тыршиз, шӧдске. Ӧз быгаты шуныт палась дуннезэ поттылытэк. Но тани эшшо но паймытӥсез будос, кудӥз сярысь Геродот но, Бадӟымез Плиний но, Марк Полло но, эшшо уно мукетъёсыз дунне сярысь мадисьёс гожъязы ини. Соин сэрен кӧня адямиос тапала вуылӥзы, нош нокытысь ӧз шедьтэ та шаккатымон будосэз. Зэмзэ ке со турын кемалась ӧз адскы ни вал. «Ыж-така турын» шуо сое арсавылъёс, нош ӟучъёс – «арский баран», яке «татарский овен» яке «баранец». Бигеръёс но асьсэ сямен «арча ыж-така» шуо. Нош Усман тата мукетсэ но тодэ, быдӟым туно-пеллёос та турынэз герӟало Асклепий туно-пеллёен, грек инмарен, яке рим калыкъёслэн верамзыя Эскулап нимо эмчиен. Асклепий Апполонлэн но Коронидалэн пиез луэ. Анайзэ, Коронидаез, ачиз ик Апполон быдтӥз, огшоры кулӥсь адямиез яратэмез понна. Нош Асклепиез пичи дырысеныз ик, анайтэк кельтыса, сётӥзы Хирон кентаврлы, мукет инмар нылпиосты кадь ик, будэтыны, дышетыны. Асклепий Хирон дорын пеллёослэн яратоно Пелион гурезь бамалазы будӥз, эмъян удысын дышетӥсьсэ но ортчытӥз. Одӥг пол со аслэсьтыз анайзэ улӟытон сярысь малпаськыны кутскиз. Туж улӟытэмез потӥз Асклепийлэн аслэсьтыз анайзэ. Ӵапак со сярысь малпаськыса пукыкуз со доры турынъёс пӧлысь кый потӥз. Асклепий сое бодыеныз шуккиз но вийиз. Кӧня ке улыса, муктэтыз кый кыӵе ке турынэз куртчыса аслаз парез доры потӥз. Кулэм парез вылэ ымысьтыз турынзэ понӥз. Кема ик дыр ӧз ортчы, кулэм кый улӟиз. Асклепий со турынэз шуак нюр музъеме мерттӥз. Турын улӟиз но вань котырез югдытыса сяськаяськиз. Ӵапак сое, оло, арсавылъёс Абалгы турынлэн сяськаез шуо, яке одӥг пол гинэ дунне вылэ вордскись «Инвожо» сяська. Та сяськаез Асклепий ӧз ишкалты, туж потэ ке но вал анайзэ улӟытэмез. Со кидысъёссэ возьмаз. Кема гинэ возьмамез бере сяська кидысъёссэ сётӥз. Асклепий соосты туж кыдёке, пыдло пала, мерттыны малпаз, отчы, кытчыозь асэныз ӵош аргонавтъёс но ӧз вуылэ. Со кыткиз одӥгзэ атаезлэсь лобась грифонзэ, нош грифон сое асьме пала вайиз. Грифонъёсты со вакытэ котькудӥз вал интыын кадь возе, пе, вал.  Соин тросаз храм борддоръёсын али ке но адӟыны луэ гозыям-серметам грифонъёсты. Усман тата тодэмъя дуннелэн котькуд сэрегысь храмъёсазы соос вань. Со тусызъя туж кӧшкемыт ке но, сымызъя туж визьмо, мыло-кыдо но небыт вылэм. Ымнырыз-йырыз солэн эксэй ӧрӟилэсь, нош мугорыз эксэй арысланлэсь. Асьме палан соосты  нимало: наг,  нагай яке нагалят.

– Талэсь но ӟеч инты уд шедьты! – валэктӥз Асклепийлы грифон. – Вылаз ик тон сое мертты «Инвожо» нуналэ. Арезлы огпол гинэ мед усьтӥськоз со дунне вылын… Нош туннэ ӵапак «Инвожо» нунал…

Озьы кидысъёссэ Асклепий Арсавылэ мерттӥз, нокин та будосъёсты медаз адӟы шуыса. Угось Арсавыл сусыпуос кадь ӟеч утисез нокытын ӧвӧл. Арсавылын, адями синъёслэсь ватскыса, турын ӝог будӥз. Но сяськаосысьтыз табере кидысъёс ӧз ни кылдэ, потӥзы ыж-така йыръёс. Паймиз Асклепий бӧксыса сылӥсь будосъёслы, Арсавылысь Асклепий доры эмъяськыны лыктэм пересь кионъёс но абдразы. Асклепий одӥг такаез пуртэныз будос бордысь ишкалтӥз но кионъёс азе куштӥз, сиыса, пе, утчалэ, учком, мар воштӥськонъёс луозы тӥледын. Кионъёс соглаш луизы, ӧз кышкалэ, сиизы. Син куспын бурмизы соослэн тӥяськем пыдъёссы, кесяськем пельёссы, ымныръёссы, тӥяськем пиньёссы, вылаз ик соос егитомизы, тыбыр сьӧразы оло бурдъёс кылдӥзы, сокем зол соос тэтчазы Асклепий азьын, омыртӥ лобазы малпалод.

– Табере тӥ, бурдъёстэк кылем кионъёс, та турынэз возьмалоды, – шуиз соослы Асклепий. – Нокин соосты медаз сиы, нош асьтэос, кӧня мылды потэ сомында сие. Турынъёс уг куло, одӥг ыж-таказэс сииды ке, со интые соку ик мукетыз кылдэ…

Со дырысен арсавыл кионъёс кошкытэк кыллё та турынъёс вӧзын. Нош Асклепий кионъёсыз бурмытэм бераз та будослэсь ыжтака вирзэ лянэсъёсы люказ но грек музъемаз кошкиз. Со доры соку ик вуизы висисьёс. Угось сое грекъёс гинэ ӧвӧл, быдэс дуннеын тодо вал. Огпол со доры туж узыр адями вуиз, вань узырлыксэ Асклепий вылэ кельтыса, туж кема со сое сюлвориз бурмытыны курыса. Узыр адями мырдэм шока ни вал, тани-тани погралоз но кулоз. Нош со чик но ачиз сярысь ӧз малпаськы, пичи пиез но кузпалыз сотэк туж зол курадӟозы шуыса сюлмаськиз.

Асклепий котыръяса ӧз улы, меӵак солы вераз, мон, пе, тонэ уг бурмыты, укыр секыт луэмын висёнэд. Мон, пе, возьмало кулэмдэ, собере выльысен улӟыто, пӧрмиз ке. Нош тон улӟем берад вань узырлыктэ берен семьяедлы берыктод, нош ачид нокинлы уд вера, мон тонэ улӟытӥ шуыса.

Узыр адями Асклепийлы, инмар азьын кадь, кылзэ сётӥз, собере кема ик ӧз улы, кулӥз. Асклепий сое ыж-така виреныз зыраз. Узыр адями улӟиз. Улӟиз гинэ ӧвӧл, со выльысен егитомиз. Мар луиз отӥяз узыр адямиен нокин уг тоды, но ваньзы табере висись калыкъёс Асклепий доры уллёосын лыктыны кутскизы. Кин ке ассэ, кин ке нылпизэ, кин ке анайзэ, кин ке кузпалзэ, кин ке кулэм шойёсты но шайгуысь поттыса со доры ваё. Шӧй зын котыртӥз Асклепиез. Со зын инмаръёс дорозь но пыӵаз. Вожомизы инмаръёс Асклепий вылэ. Ачиз Зевс но кӧшкемыт вожомыса сое ӵашъёнэныз погыртӥз но туж пыдло тартаре ватӥз, ноку но та дунне вылэ поттонтэм вылысь. Кӧня адямиез улӟытыны вуиз Асклепий, созэ но табере нокин уг тоды, нош Асклепиез быдтэмзы бере ваньзы буйгазы, улон аслаз ӧраз берытскиз. Хирон кентавр гинэ ӧз буйга. Солэсь пыдзэ аслаз дышетскисез Геракл янгышен пукыӵ ньӧлэн раньӟытыны шедьтӥз. Геракллэн пукыӵ ньӧлэз гидралэн агуэныз зырамын вал. Соин ик нокызьы бурмытыны ӧз быгаты пыдзэ Хирон кентавр. Ачиз кулӥсьтэм ке но вал, чидантэм вӧсь вал солы. Озьы висись пыдыныз но коскаса-коскаса зубектӥсь мугореныз со Асклепиез утчаны потӥз. Кема сое утчаз. Шедьтӥз Арсавыллэн сопал дуннеысьтыз тартар музъемез вылысь. Мырдэм со  чутыса вамышъяз пыдес дорозяз ик будӥсь ӝуймем бусыостӥ. Гурезё бамалын ӝуё-ӝуё интыын кылле вал Асклепий. Нокин сое сайкатыны ӧй быгатысал. Аслэсьтыз пизэ кадь сое яратӥсь Быдӟым Хирон сяна. Визьмо Хирон валаз, мар карыны. Аслэсьтыз пумтэм улонэзлэсь ӝынызэ со Асклепийлы сётӥз, нош кыкетӥ ӝыны улонзэ аслаз агаезлы – Прометейлы, кудзэ инмаръёс, адямиослы тодон тыл сётэмез понна бадӟым гурезь изъёс борды жильыосын дуризы, нош муссэ бадӟым кырныжез кокчатӥзы. Вань Арсавыл пилемъёс вылысен бӧрдыса учкизы инмаръёс ыргон кадь вӧлэм вал мугорлэсь чутыса Тартарлэн ӧсэз пала вамышъямзэ.

– Кызьы табере Хиронтэк уломы? – котькытысен кылӥськизы викышъямъёс. Но адямиос но, инмаръёс но котькыӵе ыштонъёслы дышо. Мар воштӥськиз Зевслэн чылкыт сюлэмо титанъёсты быдтэмез бере? Номыр ӧз воштӥськы, ваньзы дышизы выль улонлы. Атлантэз Олимплэсь инбамзэ пельпум вылаз возьытӥзы, жильыосын кортнам Прометеез кырныж кокчаз. Чебер йырсиё Медузаез Посейдон, Афиналэн храмысьтыз шедьтыса, эриктэмаз, но вань ялаез Медуза вылэ усиз… Медузаез аслэстыз храмзэ саптамез понна Афина кӧшкемыт ымныро кый йырсиё кариз… Нош калык, инмарозь будэмез но, огшорыез но дышиз выль улонлы, выль сямъёслы. Кылдысинэз но калык вузаз, Керемет пала дур басьтыны кутскиз. Нокыӵе ӧз кариськы со, куке яратоно зэрпалъёссэс но Керемет мукет дуннее келяз, яке ляльчи карыса кыӵе ке музъем сэреге улляз…

Нош Хирон аслаз лэсьтэм ужезлы шумпотыса, висись мугорзэ чидаса, йӧн-йӧн вамышъяз Тартаре, уг поты вал солэн чылкытлэсь но чылкыт титанъёсты шонертэм карыса быдтӥсь инмаръёсын, та дуннеын улэмез… Со дырысен туж трос дыр ортчиз… Улӟытэм Асклепиез, Хирон кошкем бере, ачиз Зевс ас дораз инбаме басьтӥз. Нош Асклепийлэн выжыосыз ог дышем сяменызы солэсь ужзэ азьланьтӥзы. Ыж-така турынэз гинэ ваньзы вунэтӥзы, возьмась кионъёс сяна. Уг яра та турынэз нокинлы сиыны… Озьы косӥз Асклепий, бодыеныз йыг шуккыса. Ӵапак со шорын турынъёс пӧлысь кый потӥз но со боды борды бинялскыса из кадь катӥз. Табере кытчы гинэ кый бодызэ уг йӧтты Асклепий, соку ик отчы кыйбоды яркыт-горд сяськаеныз но шиё куаръёсыныз кылдэ. Сое адӟыса, шайтан моклокъёс пӧртэм пала пезьдо… Угось котькудӥз ши, бордаз ке вутскиз, сю ар улонзэс соослэсь ишкалтэ. Арсавыл музъем вылын уно сюресъёс дурын кыйбоды потылэ, озьыен вуылэ на Асклепий ыж-така вирзэ инмаръёс доры тубытылыны. Соин ик ыж-така турын но Инвожо нуналъёсы Арсавыл музъем вылэ потылэ. Нош туннэ Инвожо нунал, зэмзэ ке со котьку бадӟым шулдыръяськон нунал вал. Нош табере валантэм нунал, кышкало та нуналлэсь калыкъёс. Ыж-така будосъёсты пумитасез но, «остэ, остэ, остэ!» шуыса пегӟе, така уллёлы пыдтышъёсэ чилекъятыса…

Така ыж-а, така быж-а, тани соос лымшорзэ шутэскыны люкам ыжъёс кадь бӧксыса сыло… Зэмзэ ке, со ыжъёс пыд йылазы уг сыло, соослэн пыдъёссы но мугорзы но, йыръёссы но омырын. Соосты аспӧртэм куаро зӧк модосо турын-будосъёс озьы ӝутыса возё. Турынлэн одӥгез зӧк модосэз ыжъёслэн кӧт шоразы гогы кадь пырыса кошке, мукет модосъёсаз сяськаосыз али гинэ усьтӥсько, отысь туж мусо учкыса уло ыж синъёс, нош усьтӥськем сяськаосын чебер ыжпи йыръёс яке сюръёссэс поттыны кутскем такаос адӟисько. Со омыре ӝутӥськем «ыж-така уллё» котыр «бе-э-э! бе-э-э! бе-э-э!» бӧксыса  учке матэктӥсь адямиос шоры, оло ке ыжгонзэс, «зарни рунозэс» ӵышкыны косэ…

– Тышке, тышке, кырыж-мерыж бызись тышкем пырчыос! – ас понназ серекъя оло зэрпал, оло палэсмурт, оло арсавыл ватка лул…

18-тӥ люкет. Храмчиос, ыж-такаос но кионъёс

– Ка, казыр мон тӥледды тышко! – шоналске палашеныз «кулэм китяпазэ» нуллӥсь ожчи, азьпалысьтыз ыж-така модэсэз пыд йылысьтыз ӵогыса. Турын модос мугорысьтыз такаосыз кадь ик ӵыжаськыса погра… Ыж-такаос, шуак кышкатскыса, модосъёсынызы валче, вань уллёен палэнско-тулкымско. Пограм модослэн пызгись горд-горд вирыз, бадӟым вирсэрысь кадь, куалекъяса-куалекъяса возь вылэ бызгиське. Возь соку ик пушйыса будыны кутске. Огшоры бубылиос бадӟымесь бубылиослы пӧрмо, нумы кибыос но бадӟымаса котыр пала бызьыса кошко. Омырын сокем зол вир зын вӧлске. Со вир зынэз шӧдыса, ыж-така турынъёс вискысь тэтчаса пото толъем ошъёс быдӟа лыз-пурысь кионъёс. Син куспын хурс-хурс гинэ кесяса-сыскыса быдто пограм ыжъёсыз, одӥг турын куарез но уг кыльы, ваньзэ нюлыса супыляк быдто, зарни ыжгонзы гинэ отчы татчы пазьгиськыса тӧлъя-буръя кошке. Кельше, шӧдске, кионъёслы та сиён, озьы парсьёс кадь, супырыса сиё ке…

Шӧдтэк шорысь кионъёс вирӟектэм храмчиосты адӟо… Соосты ӧй адӟысалзы ке, эшшо кӧня ке така ыж турынэз соос погыртысалзы на. Ческыт сиёнзы вань кӧтсэс урмытӥз, оло, дыльдыоссы шыр вияло. Но татын соослэсь лушкем улонзэс адӟисьёс кылдӥзы. Мар, мар, нош таиз кионъёслы уг кельшы. Куанер ыжъёсты кесяны ярато ке но, соослэн уг поты сое мукет лулъёслы возьматэмзы… Котьма ке но возьыт ук мукетъёс азьын тазьы, хазар вакытысь ашкеназъёс кадь, ашкыныны… Кион ачиз шедьтыны кулэ сиён, пыдъёсыз сое мед сюдозы, сыӵе аспӧртэм вужкат ялан гыбда на соос пӧлын… Нош татын ваньмыз дась, утчано но ӧвӧл, ветлоно но ӧвӧл, сюлъёсыд тыбыр бордад лякиськытозь. Ваньмыз инмарен сётэмын, кам-зарезь дуръёсысь вашкала ашкеназъёслы кадь ик… Кузёяськы кӧня мылыд потэ… Ашкеназъёс Святослав соосты хазар кунысь пазьгем бере воксё ышизы ни вал, табере выльысен берытско. Ӟеч интыосты выльысен кайпалто ни… Калыкъёс валаса ик уг вутто, кызьы соос вылэ ужаны кутско. Инвожо кионъёс ӟеч тодо ашкеназ вузчиосты. Соин, лэся, уг поты асьсэды соосын ӵошатэмзы. Но ӵошатон мугъёс асьсэос шараясько, адӟо сое кионъёс. Кылсярысь, дунне вылысь огшоры кионъёс инвожо кионъёсты инмаръёсын кусып возись тунъёс каро. Нош ашкеназъёс но уга асьсэлэсь инмарен кусып возись тунооссэс «коэнъёс» шуо. Ааронлэсь выжыоссэ кион выжы каро. Кыкетӥез тодмет, та «ыж-така» будон интыосты котькытын Арсавыл шаерын «Кион кар» шуо. Ашкеназъёслэсь но тужгес но коньдоно вузаськон каръёссэс малы ке озьы ик – «Кион» нимало вал. Соин ик вал, мар сярысь малпаськыны, грек тодосчиос кадь, споръяськыны яратӥсь кионъёслы. Вашкала грекъёсты соос сокем яратӥзы, быдэс нуналэн соос кылзыны дась вашкала грекъёслэсь диалогъёссэс… Бадӟым такаоссылэн зарни сюръёссы вакчи дыр куспын быдэс гурезь люкаське, кионъёс амалтэк дышизы со сюръёсы така турынлэсь вирзэ кисьтыны. Мугоръёссы но ук соослэн адямилэсь мугор вылтырзэс басьтыны быгатэ. Куд-ог дыръя Египет храмъёсысь кион ымныро адямиос кадь соос ветло, вунэтыса кыӵе мугорен ветлэмзэс. Уен нуналэн угось тордо со шуак чырсась винаен кунояськыса но ческыт чеберлыко вераськонъёсын йырвизьёссэс куандырыса. Кинъёс, кинъёс, нош кионъёс ваньзэ тодо, ваньзэ адӟо, соос олокытчы но вуыло, соин ик тодо кызьы но мар вераны… Трос быгатонъёс соос басьтӥзы та капчиен сётӥськись така-ыжъёсты уен-нуналэн сыскыса… Кӧтсы тыр, ужано ӧвол, дырзы тачак, ул, кӧня мылыд потэ, унояськы, кӧня инкуазь чида. Сыӵе быгатыса соос грекъёслэсь трагедиоссэс шудо. Сыӵе куаныса асьсэос ик ыж-такапосын ӵош учко.

– Р-р-р! – чузъяське мушко быдӟа мычиськем йыръёслэн виро пиньёссы вискысь крезьгур. Бон, соос сямен со крезьгур. Отын нырысь ик кылӥське кионъёлэн асьсэлы ик йырзэз кур каронзы, угось ӵапак таӵе вирез юыса тордыса кӧлыкузы, соослэсь бурдъёссэс лушказы. Ваньмыз улонын кадь, кинлы ке крезьгур, кинлы ке бырон гур, нокин нокинэ уг пӧя. Котькудӥз ачиз сямен вала.

Модосъёссы бордысен учкись ыж-такаос пальышаны кутско… Оло ке, чик но та кионъёс соос азьын али гинэ ӧз сыске соослэсь ик агай-вынъёсэс но сузэр-апайёссэс. Ма вань ук сыӵе но яратон та ыжтака турын виразы. Кызьы со яратонлэсь мозмиськод, кельше соослы котьку кӧтсы сюмась кионъёсты яратыны. Ма, кинэ ке яратоно, дыр, мукетыз ке ӧвӧл. Яратон интыос мугорын гинэ ӧвӧл, йырвизьмын но вань уга, котькудӥз аслэсьтыз ческыт буйганзэ возьма. Нош соослэн йырвизь пыдсозязы ик вуэмын чурыт верам кыл: «Тон кион! Тон кион! Тон ачид но кион!»

– Али ик палэнске ми вӧзысь! – «кулэм ки тяпазэ» ӝутыса, кионъёслы кеське «храмчиослэн» валтӥсьсы.

Но кылъёсыз солэн Арсавыл омырын ву пульыос кадь бака гурен гинэ бӧтьырто, уг ужа, шӧдске, та мушко йыръёслы пумит солэн йырвизь кырмон кужымез. Кулэм «ки тяпазэ» но куалекъян басьтэ, чонари кадь, со вань чиньыосыныз ужаса, шуак пегӟе аслаз калтаказ. Одӥгез кион тани, син куспын, кыклы куасаса, кытчы ке кыдёке сэрпалтӥз азьын ик сылӥсь ожчиез. Мукет паласен, озьы ик куасаса, кыдёке сэрпалтӥзы эшшо кык ожчиосты. Ялан ӧжытгес но ӧжытгес кыле храмчиослэн уллёзы… Ыж-уллё дыректыса ик куанэ та кужмо кионъёсызлы. Угось, соос анайёс кадь луо кикы-кионъёслы. Инвожо кионъёс пичиысен ик сокем ярато ыж-така турынэз, пичиысен ик турынлэсь вирзэ ноныса будо, нош ыж-така турын пичиысен ик яратэ будӥсь кионъёссэ, пичиысен ик со адӟе, кызьы соос будо, кызьы айыно. Соин сэрен аспӧртэм яратон гомӟе соос вискын. Ӵап соин, оло, кыксы ик кужмоесь но бадӟымесь луо. Тани али гинэ ӵогемез турын но выльысен бычыраны кутскиз ини. Тани усьтӥське солэн такаё сяськаез… Куаныса мычисько выль лулъёс со выль кӧкы сяськаос пушкын. Майсыос соослы нуны кӧлон гур кырӟало ни. Бубылиос сяськаоссы вылэ пуксьыло. Яратонлэн кужмызтэк сыӵеез луоз шат? Яратон котькытын сяськаяське, котькытын адӟиське Яра инмар кышнолэн кужымыз. Кионъёс дыртытэк  матэкто… Тодо, нокытчы уз пегӟе соосты тазьы шудытыны лыктэм ожчиос. Коӵышъёс но ярато шыръёсын шудыны…

– Дугдэ! – кеське валтӥсь «храмчи», ас азяз Узыбеез кыскыса. – Тӥляд, иське, веръямды потэ «эксэй нылдылэсь вирзэ»? – ӟазыртэ со, Узыбейлэн чырты бордаз палашсэ матэктыса.

«Храмчи» атасъяське гинэ, кытчы со Узыбейлэн «эксэй вирызтэк» мыноз? Но кионъёс уг тодо ук огшоры атасъяськон сямъёсты. Соос вылӥлыко трагедиосты, вылӥлыко мадьёсты, кылбур чуръёсты кылзыса будэмын. Соос яратонэз гинэ туж вылӥ дунъяло. Одаос, поэмаос, балладаос, трагедиос, философской меморандумъёс яратон сярысь гожъяло, яке Платонлэсь но Аристотельлэсь диалогъёссэс лыдӟо, вир юыса кудӟемзы бере. Асьсэды вылӥлыко мертэтъёсын лыдъясь кионъёс таӵе югдуръёс азьын мар карыны уг валало – дугдо, одӥг-кык вамыш сьӧрлань чигналто, – туж вылӥ манеро асьсэды возё. Озьы ке но, Эсхиллэн трагедиысьтыз хор кадь, кышкыт ыргетыса сыло. Гогыоссы ик ожчиослэн куалекъяло та кӧшкемыт азинскись суредэз син азязы пуктыса.

– Вера соослы, мед кошкозы! – кеське Узыбейлы валтӥсь «храмчи». – Мыным номыр ыштыны, вылам тэтчизы ке мон вандо тонэ! – ӟазыртэ со.

Кинъёс, кинъёс, но инвожо кионъёс ӟеч валало трагедилэсь катъёссэ. Ма ыж-такаос но ӟеч тодо татын толэзь улын шудӥськись трагедиосты. Уд шуы соосты лул-чеберетэз тодӥсьтэм ыж-такаос. Малы ке шуоно, сюръёссы, ыж пельёссы, ыжгонзы, ыж йырзы ке но бабыльяськыса улэ, соос асьсэды кемалась ыж-така уг шуо ни, соос ваньзы асьсэды кионъёс кожало… Сыӵе татын метаморфоза ортчемын, кудзэ озьы гинэ адӟыны уг луы. Овидий аслаз дас вить книгаен гожтэм поэмаяз 250 метаморфоза сярысь гинэ маде. Нош татыназ, шӧдске, 251 учыр. Но зэмзэ ке, сыӵе учыръёс Арсавыл палан трос гинэ люкаськозы. Овидий ке соосты тодысал, солэн оло метаморфозаосыз 500-лэсь трос луысалзы. Но соиз сярысь берлогес… Али ваньзы учко Узыбейлэн «воштӥськонэз» шоры.

– Кошке… – аслыз но оскытэк, каллен гинэ вазе Узыбей… – солэн потэ на Камитсэ адӟемез. Уг поты тазьы тани шузи кошкемез. Укыр егит на ук, кытысь солэн бигер-ватка йыраз визь люкаськоз на?.. Мар со вала Арча, яке Ватка, яке Арсавыл кун шаер но Зарни Мум ужпумъёс сярысь… Зэмзэ ке, Узыбей ваньзэ вала… Но со ваменэс!  Со яратэ! Нош яратон ваньзэ ачиз вера! Яратон ваньмызлэсь кужмо та дуннеын! Яра инмар кадь ик! Угось ваньзы тодо, кыӵе со кужмо Яра инмар, Ярлэн, шунды инмарлэн кузпалыз!

Кионъёс туж ӝог ог-дас вамыш сьӧрлань лэсьто… Ыж-така уллё паймыса учке адямиос но кионъёс шоры, кызьы тае валано? Малы адямиос ог-огзэс вандыны туртто, малы кулонлэсь кышкало, малы соослы капчигес Зарни Мумез тушмонзылы усьтыны?.. Тани храмчи нош ик Узыбейлэсь эксэй чиньызэ венен бышкалтыса, вир шапыкъёссэ отысь пызьыртэ но кулэм ки тяпаез вылэ кисьтэ.

– Кытчы? – юа ки тяпаезлэсь валтӥсь храмчи. Кышкаса дырекъясь ки тяпа паллян пала возьматэ.

– Отчы! – ваньзылы шуэ «храмчи». Малы ке шуоно со ошкуйчи ӧвӧл, ошкуйчи со интыын ӧй дыртысал паллян пала… Ошкуйчи бур палдурез яратэ. Вань Арсавыл бур палдуро вӧсьёсты кырӟа. Паллян палэз соос шайтанлэн палдурыз каро.

Кионъёс нош мар карозы, кызьы веразы, озьы ик лэсьто, соослы сюрес усьтыса палэнско. Вань «храмчиос», палашъёссэс отчы-татчы урдылыса, каллен-каллен кион котыртэт улысь кошко. Берпуметӥ кошко Узыбей но валтӥсь. Чус-чус луэ ыж-така уллё пӧлын. Нокудзы уг бӧксо. Татын ворсаськыны кулэ вал катанчи. Кырӟаны кулэ вал хор. Но Эсхиллэн трагедияз но луыло прологъёс.

19-тӥ люкет. Шурали, Тулпар но Аждага

Шӧдтэк шорысь чулькак гинэ така йыръёс улысь мычиськиз ачиз лусьтро Шурали эксэй… Така турынэз вайясь кузь-кузь векчи гинэ чиньыосыз, оломар быдӟаесь синъёсыз, шабала кадь пельёсыз, кымес шорысьтыз одӥг гинэ сюрыз, кудӥз эксэй корона кадь йыр йылаз мычиськемын – ваньмыз вера со Шурали эксэй шуыса. Таӵегес ик сое котькытын суредало. Синъёсыз бадӟымесь но сакесь. Пельёсыз но сыӵеесь ик. Ваньзэ со кыдёкысен ик адӟе, кыдёкысен ик кылэ. Но йырыз тани солэн сюрыз пала сюбегаса мынэ. Соин ик кымесыз сокем пичи, йырвизьмыз одӥг пол тэшкыльтымон гинэ. Тёп-тёп шузи. Трос мадьёс со сярысь ветло. Со адямиосты ӵемысь бичатыса вие, малы ке шуоно уг вала озьы кулытозяз ик бичатэ шуыса, угось со яратыса озьы, нуныосын кадь, адямиосын шудэ… Со адямиосты яратэ ини инмаръёс соосты кылдытэм дырысен ик. Мар пумысен сокем яратэмзэ вуом на мадьыны. Али вералом, малы со татчы кылдӥз. Ужпум со бордын, Шурали эксэй кемалась чакла ини «эксэй нылэз» но со котырысь адямиосты. Угось ӵапак Шурали нырысь ик «сьӧдъёс» пӧлысь кылӥз «кулэм киен» ветлӥсь ожчиослэсь «эксэй нылэз» усьтэмзэс. Соин сэрен солэн шумпотонэз али ке но пельёсыз дорозь вуэмын. Со воксё куанэмын. Таӵе али гинэ усьтӥськем «эксэй нылэз» со Аждагалы лушкаса ваиз ке, Аждага солы одно ик ки улысьтыз куке-соку пегӟем Тулпарзэ берыктоз! Нош Тулпар Шуралилы туж кулэ! Тулпарзэ ке со берыктӥз, соку со одно быдэстоз аслэсьтыз малпам ужзэ. Нош ужзэ быдэстыны трос ик солы ӧз кыльы ни ук…

Угось Шурали туж зол адямиослы синмаськемын. Синмаськемын соослэн котькуд ужез мыло-кыдо ужаны быгатэмзылы. Соин солэн адями лулъёсты ас вылаз гинэ ужатэмез потэм. Со сюлворыса ик инмаръёслэсь куриськем, адямиосты солы мед сётозы шуыса. Нош инмаръёс Шуралилы шуиллям: «Дуннеез тямыс пол котыртӥд ке, вань адямиос тынад луозы…» Шурали соку ик Тулпарез вылэ пуксем но дуннеез котыръяны кутскем. Нош сизьым котыртэтсэ ортчем бераз сокем жадем, лобась валэз вылысь ӟигарыз бырыса пограм. Озьы солэн Тулпар валэз со киысь мозмиськыса кошкем но Аждага доры мынэм, Шуралилэсь ватыны курыса. Аждага соглаш луэм, Шуралилэсь Тулпарзэ аслаз кыӵе ке гурезь гутёяз ватэм. Соин ик Шурали  Аждагалы уар кадь ужа, туж потэ солэн, лобась Тулпарзэ берыктыса, тямысэтӥ котыртэтсэ лэсьтэмез. Соин со ялан лушка но лушка Аждагалы чебересь кышноосты, валъёсты, ветылъёсты. Нош Аждага со сыӵе кӧттырмостэм, со уг быгаты мумы мугоръёстэк, кӧня мумы валъёсты, скалъёсты, ветылъёсты, кӧня кышномуртъёсты со лушказ ни, лушказ гинэ ӧвӧл, али но лушка. Тырмыт шумпотэмез бӧрсьы, кышномуртъёссэ но, валъёссэ но, скалъёссэ но со выльёсыныз воштэ, нош вужъёссэ музъем вылэ сялӟыса ыстэ, Аждагалэн зынъёсыныз дуннеез мед аздырозы шуыса… Угось Аждага, мумы валъёссэ но, скалъёссэ но, кышномуртъёссэ но кӧт пушказ возе, нокытчы медаз пегӟе шуыса, кулэ дыръяз соосты гурӟытыса поттэ но нюлыса, нюлыса аслэсьтыз ужзэ лэсьтэ. Нош выльёссэ солы тӥни Шурали нуллэ, аслэсьтыз Тулпарзэ берыктон понна…

Но Шурали вань шуралиослы эксэй ке но, йырвизьмыз солэн укыр пичи уга. Со вераз ни Аждагалы «эксэй ныл» сярысь. Аждага кулыса ик улӟе вал, ачиз потыны турттэ ни вал пеймыт гутёысьтыз. Но солы уг яра потыны, соку со Юхалы берытскыны уз быгаты. Нош али гинэ усьтӥськем «эксэй ныл» солэсь вань йырвизьзэ пезьгытӥз.

– Мын, вай сое ӝоггес, лушка сое мыным! Тулпардэ ке берыктэмед потэ! – шуак кырӟаз со Шуралилы аслэсьтыз тодмо кырӟанзэ. Шурали котьку сямен куаныса кошкиз солэсь косэмзэ быдэстыны. Тани али но со шуак кошкиз ни така йыръёс пӧлтӥ…

Нош Аждага ноку уз берыкты солы Тулпарзэ. Угось солэн гутёысьтыз Тулпарзэ кемалась ини одӥгез батыр мозмытӥз. Табере Тулпар эрико, кытчы мынэмез потэ отчы мынэ. Со табере батыръёслэсь гинэ кылзӥське… Ӧтё ке батыръёс, со ӵашъем тыл кадь олокытысь соос азе потэ, пуктэ соосты тыбыр вылаз но нуллэ вань дунне вылтӥ, Зилант но Аждага кыйёслы пумит ӟеч ужъёссэс быдэсъяны юрттыса… Шурали валамон ини, номыр та сярысь уг тоды, Тулпар вылысь пограмез дырысен, синтэм кадь со Аждагалы ужа. Угось Аждагалы туж кельше Шуралиез ас вылаз ужатыны. Тужгес но али, ку солы нокытчы югытэ потытэк Юхалы берытскон дырзэ возьмано. Вакчияк вераса,  Аждага нырысь ик Зилант кый луыса 100-150 ар улэ, собере Аждагалы берытскыса 500 ар, нош Юхалы берытскемез бере 1000-2000 ар, собере кинлы берытске нокин уг тоды, но, шуо, со выльысен Зилант кыйлы берытске, озьы пумтэм берытскылэ, ас мугорзэ вошъяса. Шуо, солэн мугорыз но уг быры, котькуд мугор люкетыз кулытэк но сисьмытэк нимаз-нимаз улэ на. Тодӥсьёс солэн со мугор люкетъёсызлэсь оломар но лэсьто. Синъёсызлэсь – улэп укно, кудӥз туж кыдёкысен ваньзэ матэ карыса возьматыны быгатэ. Кин ке, шуо, йырзэ солэсь пыж азяз юнматэ. Кин ке быжзэ, ожмаськон урыс каре, но мукет. Ма, ачиз но Шурали эксэй кулӥсьтэм лулъёс пӧлысь луэ. Одӥг пол, пе, со, тужгес но кужмо вакытаз, музъем вылэ куасьмем писпу луыса кылдэм, вань ёросэз куасьтыны кутскем. Солэсь куасьтӥсь кужымзэ чускатыны турттыса вылӥ дуннеосысь алп со вылэ кык пол ӵашъем. Нош Шуралилэн одӥг пиньыз гинэ со ӵашъемлэсь усем. Нош со пиньызлэсь Аждага кылдэм. Вань сьӧд кужымыз но кескич визьмыз Аждагалы кошкем. Тӥни сыӵе соослэн вашкала ӵыжы-выжы кусыпъёссы. Асьсэос та сярысь уг ке но тодо, ог-огзытэк, шӧдске, улыны уг быгато. Мугор люкетъёссы ог-огзы борды кыске. Со дырысен Шурали визьтэм, нош Аждага вань кыйёслэн эксэйзы луэм. Олокинлы но со берытскыны быгатэ. Кулэ луиз ке, со чебер мугоро пияшлы берытске, кышномуртъёсты синмаськытон понна. Шуо, со карттэк кылем кышнос доры ӵемысь ветлэ. Тодыны, тодманы сое уг лу, азьпаласеныз со номырин уг висъяськы воргоронлэсь, но тыбыр паласеныз ке учкиськод, сое тодманы луэ, тыбыр сьӧраз одно ик кыле  така тодметъёсыз.  Аждага но Шурали сярысь мадьёс вань дуннее вӧлмемын. Шурали сярысь сокем ик трос ӧвӧл, но ӧжыт но шуыны уг луы. Кылсярысь, кыӵе куасьмем писпуэз кораны ветлэ Гильгамеш? Угось вань тодметъёсызъя со Шуралилэн асьме палась вань тэраез куасьтӥсь писпуэзлы ик укша. Нош кин со Таро картаысь «Шузи» яке «Шут» – валамон, Шурали… Нош Аждага сярысь мадьёс сокем трос, шедьтод меда сыӵе интыез, кытын со ӧвӧл. «Авеста» мадемъя, со, Ажи-Даха нимын ветлыкуз, быдтӥз Йима нимо эксэез, собере ачиз сюрс арлэсь кема кузёяськиз вань дуннее кырсьсэ, жобзэ, уродзэ вӧлмытыса. Нош «Махабхарата» мадемъя, со кӧшкемыт но лек кый, Такшака, аслаз кужыменыз данъяськыса, быдтӥз сокем чылкыт инмарлыко Кашьяпа эксэез, кудӥз вань ӟечсэ утьыса возе вал. Ӵапак соин сэрен Джанамеджая эксэй, аслэсьтыз атайзэ ӝуатэмез понна, Такшакаез быдтон понна, кыйёсты сутӥсь «курбон тыл» ӝуатэ. Нош кинэ гинэ Аждага ӧз быдты, ӧз курадӟыты Заххак, Зогак эксэй дыръяз. Оглом трос солэн кылемын кырсь ужъёсыз. Ма нимъёсыз но дунне вылэ сокем трос вӧлмемын: Ашака, Джака, Дага, Така, Шака, Аждага, Заххак, Зогак, Ажи-Дахака, Дахак, Дахака, Аждахак, Аждарха, Аждахар, Аждахо, Асьтаха,  Азьдага, Такшака… Одӥгез но соос пӧлын ӟечен уг вераськы, ваньзы соос лекзэ, уродзэ, жобзэ гинэ нулло. Аждага аслэсьтыз вань нимъёссэ тодэ, нырысетӥ кылдэм дырысеныз ик, вань улон сюрессэ син азяз возе. Соин ик со малпа дунне вылын со кадь визьмоез ӧвӧл шуыса. Серекъя со Шурализэ но, сокем визьтэм луэмзэ адӟыса. Кызьы аслэсьтыд чиньыдэ, нюлэс корасьлэсь кылзӥськыса, тулэн вайям пасе кельтод? Шурали гинэ быгатэ озьы аслэсьтыз чиньыоссэ паськатыны. Но со визьтэмгес ке но, ужаны со быгатэ, вылаз ик туж чырткем ужа, ноку уг жадьы. Соин Аждага сое ас палаз ужатэ. Но озьы ке но, Аждага солы быдэсак уг оскы, угось ӟеч тодэ, Шуралиез пӧяны но быгатозы. Уно сое пӧяло арсавыл калыкъёс. Но али гинэ италмас чалма кадь усьтӥськем «эксэй нылэз» солы одно ик кырмоно, татын сомында шумпотон-куанон со понна быльыртэ-пӧзе. Храмчиослы «эксэй ныл» кулэ ӧвӧл, соослы Зарни Мум кулэ. Нош малы соослы Зарни Мум, Аждагалэн малпамез но уг поты, Керемет созэ тодэ дыр, нош солы малы кыӵе ке валантэм Зарни Мум, солы Узыбей гинэ кулэ! Соин ик «эксэй нылэз» киултон понна, Зарни Мум доры нуись сюрес вылэ Аждага аслэсьтыз «Зарни Мумзэ» дасяз ни, кудӥз сярысь Шурали но уг тоды. Шурали верамъя «эксэй нылэз» нуись «храмчиос» сьӧры урмем кадь дырто ошкуйчиос. Мед дыртозы, храмчиос но ошкуйчиос но мед сюрозы солэн калтоназ, зарни чорыг вӧзы векчиосыз но яралозы… Дыльдыез ик вия ни Аждагалэн, Узыбей шоры учкыса… Тани со вамышъя – оло ке бӧдёно кырӟа, котькуд вамышез вылын: «Уть-тютю, уть-тютю, уть-тютю-тютю!»

Кыӵе визьмо «калтон пӧет» дасяз Аждага. Со аслыз ачиз ик пайме сокем чебер но визьмо ужамезлы. Мар солы кыӵе ке Керемет но солэн куронъёсыз. Со ачиз но трос полэс Керемет та дунне вылын. Кӧня пол со эксэй луэмын. Али но со вань кыйёслэн эксэйзы. Нош аслэсьтыз пӧетзэ лэсьтон понна со тодаз вайиз Такшака ним улын ветлон вакытсэ. Кин сое тодэ ни меда та ним улын, нош Такшака али но ваньзэ ӟеч тодэ. Куаныса ик Такшака син азяз пуктэ асэныз луэм учыръёсты. Кыӵе со кескич быдтӥз туж визьмо эксэез Кашьяпаез. Солэн дворецез нокин пыронтэм ворсаськемын вал. Нош со Кашьяпалэн ӝӧк вылаз вуиз яблок пӧлысь пичи зарни нумыр луыса! Конечно, солы луыса ассэ но сое пичи гинэ ӧз быдтэ кыйёсты ӝуатон тылын. Но Такшака ваньзэ тодаз уг возьы, аслыз кулэзэ гинэ отысь тодаз вае. Малы солы кулэ со визьмо брахманъёслэн, визьмо эксэйёслэн визьмояськонъёссы. Котьма ке но, Такшака соослэсь визьмогес, со али но улэ.

20-тӥ люкет. Аждагалэн Уттанка сярысь тодэ ваёнэз

Со вакытэ Веда нимо брахман дорын улӥз солэн дышетскисез, Уттанка нимо пияш. Одӥг пол брахманзэ солэсь ӧтизы кык кштариос курбон вӧсь ортчытыны.

«О Уттанка, мон али ас ужъёсыя кошкисько, – шуиз солы дышетӥсез. – Нош тон мон ӧвӧл дыръя, ваньзэ татын лэсьты озьы, ваньмыз та коркан, мар уг тырмы, мед тырмоз…»

Озьы косыса, брахман ас ужзэ быдэстыны кошкиз. Озьы Уттанка, дышетӥсезлэсь косэмзэ быдэсъяса, солэн семьяяз улыны кутскиз. Озьы улыкуз, коркан улӥсь кышномуртъёс, ӵош люкаськыса, сое асьсэ доры ӧтизы но солы тазьы шуизы: «Тынад дышетӥседлэн кузпалыз али кышномуртлэн толэзьлы быдэ сузяськон дыраз вуэмын, нош ачиз дышетӥсед кошкемын… Тыныд кулэ лэсьтыны озьы, солэн та дырыз огшоры буш медаз ортчы, угось та дырыз тыртэм ортчемен сэрен кышномурт туж зол ӝожомемын…» Тае кылыса, Уттанка тазьы вера кышномуртъёслы: «Мынам уз луы тӥлесьтыд курондэс быдэстэме, угось мынам дышетӥсе монэ ӧз косы лэсьтыны созэ, кудзэ уг яра лэсьтыны…»

Кӧня ке дыр ортчыса ачиз но брахман дораз бертӥз.  Со ваньмыз сярысь тодӥз но туж шумпотӥз. Собере дышетскисезлы шуэ: «О Уттанка, пие мынам, кыӵе ӟеч кылъёсме мон тыныд вераны кулэ на меда? Тон сыӵе вань лул-сюлмысьтыд чылкыт ужад мыным, соин сэрен мынам тонэ гажанэ эшшо но зол будӥз. Соин ик мон табере тонэ быгатӥсько лэзьыны. Трос удалтонъёс тон аслад сюрес вылад шедьтод!» 

Брахманлэн озьы верамез бере дышетскись пияш но солы тазьы шуиз: «Мар мыным, дышетӥсе, тыныд сыӵезэ лэсьтоно, тыныд но со шумпотон мед ваёз шуыса, угось верало тазьы: «Куке кин ке катъёсты быдэсъятэк вераське, катъёсты быдэсъятэк юа, соку соос куспын ожмаськон кутске но одӥгез соос пӧлысь быре». Тон дорысь кошкыкум, мынам потэ дышетӥселы тыронме тыреме».

Дышетскисьсэ кылзыса брахман пальпотӥз: «О Уттанка, пие мынам, кыль на, иське, соку дорам». Кӧня ке дыр ортчыса, Уттанка выльысь куриз дышетӥсьсэ: «Кос монэ, дышетӥсе, мар мон лэсьтыны кулэ, дышетӥселы тыронме быдэстон понна?». Дышетӥсез солы шуиз: «О Уттанка, пие мынам, тон уно пол дыртытӥськод ни монэ, мар тон тырыны кулэ шуыса.  Бен, мын, иське, пыр мынам кузпалы доры но кур солэсь, мар тон дышетскемед понна тырыны кулэ. Мае со куриз, сое ик ваёд». Дышетӥсезлэсь верамзэ кылзыса, Уттанка пыриз солэн кузпалыз доры но юаз: «О кузпалыз мынам дышетӥселэн, дышетӥсе монэ дорам бертыны лэзиз. Но мынам эрико кошкеме потэ,  дышетскеме понна тыронме тырыса. Соин ик мед вералоз, дышетӥселэн кузпалыз: мар мон вайыны кулэ дышетскеме понна?». Дышетӥсезлэн кузпалыз тазьы шуиз Уттанкалы: «Мын Паушья эксэй доры. Кур солэсь кык угызэ, кудзэ солэн кузпалыз нуллэ, но вай соосты мыным. Ньыль нуналскын луоз бадӟым праздник. Со угыосты пелям поныса, мон брахманъёс азе потыны турттӥсько. Быдэсты сое, со нуналэ мон угыосыным мед ворекъялом шуыса. Угось тае ке тон быдэстӥд, тон шудбуро луод!».

Дышетӥсезлэн кышноезлэсь верамзэ кылзыса, Уттанка сюрес вылэ потӥз. Пумитаз солы сюриз туж бадӟым Ош но со вылын пукись сыӵе ик шимес бадӟым воргорон. Ош вылысь адями вазиськиз Уттанкалы: «Эй, Уттанка, си кыедзэ та Ошлэсь!». Соиз тае кылыса ӧз дырты солэсь косэмзэ быдэстыны. Адями солы нош ик шуиз: «Си, о Уттанка, эн быдты дырдэ. Тынад дышетӥсед но азьвыл таӵе ик кыедэз сииз». Куке со озьы шуиз, Уттанка, «ярам» шуыса, сииз кыедзэ но юиз кызьзэ со Ошлэсь, собере кошкиз отчы, кытын эксэйяське вал кштарий Паушья.

Эксэй доры вуыса, Уттанка адӟиз сое эксэй пуконысьтыз. Солы мыкырскыса со чебер но бакелё, эксэйлэсь ӟеч ужъёссэ дунъясь кылъёссэ вераз но шуиз: «Мон тон доры курыны лыктэм мурт луисько». Эксэй соин ӟечъяськыса юаз: «Бон, мон со Паушья эксэй, вера мыным аслэсьтыд курондэ. Мар мон тыныд лэсьтыны кулэ?». Уттанка вераз: «Мон лыктӥ тынэсьтыд кык угыдэ курыны, кудзэ тынад кузпалыд нуллэ. Мон сое сётыны турттӥсько брахман дышетӥселэн кузпалэзлы, дышетскем дунме тырон вылысь. Кар монэ бакелё, сёт со угыосты, кудзэ кузпалыд тынад нуллэ». Паушья шуиз: «Пыр артысь юртам но кур эксэй кышноелэсь». Куке Уттанка, эксэйлэсь верамзэ кылзыса, пыриз артысь юртэ, со нокинэ отысь ӧз адӟы. Выльысен Паушья доры пырыса со  шуиз: «Умой ӧвӧл, быдӟым эксэй, тазьы пӧяськыны. Ӧвӧл отын тынад кузпалыд. Ӧй адӟы мон сое». Тае кылыса Паушья Уттанкалэсь юаз: «Чылкыт-а, бон, тон али, тодад вай ай? Угось эксэй кышноме чылкыттэм адями адӟыны уг быгаты, кин бордын кылемын на сием бервылъёсыз… Аслаз картэзлы чылкытлыко луыны тыршыса, со уг поты адӟиськыны чылкыттэм адямиос азе…» Уттанка соку ик тодаз вайиз, малы со чылкыттэм: «Озьы ик вань… – шуиз со. – Мон татчы лыктыкум сием берам, туж дыртыса мисьтаськи». Паушья солы шуиз: «Вот ӵапак со бордын ик ужпум! Уг яра гылтӥськон сямез пыд вылын сылыса яке вамышъякуд лэсьтыны!» Соку Уттанка, «ярам» шуыса, ымнырыныз шунды потон пала пуксиз. Собере киоссэ, пыдъёсэ но ымнырзэ миськыса пыриз куара сётисьтэм тыметэ, кудӥз солы гадь дорозяз вуэ вал. Собере со куинь пол юиз, кык пол ымнырзэ ӵушиз, но ву борды мугор усьтоосыныз йӧттӥськиз. Собере нош ик пыриз артысь юртэ но адӟиз экэй кышноез.

Нош соиз, кызьы гинэ адӟиз Уттанкаез, соку ик султӥз, ӟечбуръяськиз но шуиз: «О инмар адями! Вера, мар мон тыныд кулэ лэсьтыны?». Уттанка соку ик усьтӥз аслэсьтыз куронзэ: «Соглаш луэ вал сётыны мыным та угыостэ, мон курисько соосты дышетӥселы, дышетскеме понна сётыны». Эксэй кышномуртлы кельшиз солэн верамез но со малпаз: «Та адямилэн куронэз чылкыт, соин ик солэсь куронзэ уг яра мыным палэнтыны». Со куштӥз пельёсысьтыз угыоссэ но сётӥз соосты пияшлы, но вераз: «Та угыосты кемалась басьтыны турттэ ни кыйёслэн эксэйзы Такшака, соин ик туж эскериськыса тон соосты нуыны кулэ». Эксэй кышнолэсь верамзэ кылзыса, Уттанка шуиз: «О быдӟым сюлэмо эксэй кышномурт, эн сюлмаськы, – монэ уз быгаты вормыны кыйёслэн эксэйзы Такшака!».

Эксэй кышноен ӟеч кылъёсын люкиськыса, со нош ик вуиз Паушья доры. «О Паушья, мынам сюлэмы табере шумпотэмын! Тон туж умой эксэй. Ваньмыз тынад бакелё мед луоз. Бадӟым тау тыныд но, кузпалэдлы но. Ӟеч луэ! Котьку берекето мед луоды!».

Озьы ӟеч кылъёссэ вераса, Уттанка угыосыныз сюрес вылэ потӥз. Сюрес вылысен со адӟиз гольык мугоро кураськись монахез, кудӥз со доры я адӟиськыса, я адӟиськытэк матэктӥз. Ӵапак со вакытэ Уттанка, угыоссэ музъем вылэ поныса, ву доры мыкырскиз вал. Кураськись дыртыса  лыктӥз но, Уттанкалэсь угыоссэ басьтыса, бызьыса кошкиз. Уттанка сое сутӥз но кырмиз. Нош соиз, аслэсьтыз азьвыл вылтуссэ ыштыса, Такшакалы берытскиз но чулькак гинэ бадӟым усьтое тэтчиз, кудӥз со азьын усьтӥськиз. Отчы пырыса, со кошкиз аслаз кыйкар эксэйлыказ. Уттанка со пасе ик тэтчыса со сьӧры вамыштӥз. Кыйёс доры вуыса со соослэсь эксэйёссэс пӧртэм кылбуръёсын данъяса, кыйёслэсь ӟеч но батыр ужъёссэс пусйылӥз, батыр ожъёсын туж усто ожмаськылэмзэс кылзыса, кыйёс куаныса ик эзылӥзы ке но, угыоссэ солы ӧз берыктэ.

Соку Уттанка кык кышномуртъёсты адӟиз, кудъёсыз куиськон станок сьӧрын тӧдьы но сьӧд сӥньысъёслэсь дэраоссэс куо вал. Озьы ик со адӟиз бадӟым питранэз, кудзэ куать пиос бергато вал. Отысь ик со адӟиз воргоронэз, кудӥз шорысь синмез воштыны уг луы вал. Ваньзэс соосты кутскиз со кылбуръёсын ушъяны:

«Дуннелэн питыранэз бергамъя, отын адӟисько куинь сю куатьтон люкетъёсыз – со питыранлэн, кудзэ бергато куать пиос, вань 24 висъетъёсыз… Куиськон станок сьӧрысь кык кышномуртъёс дугдытэк куо дэразэс, тӧдьы но сьӧд сӥньысъёслэсь кылдытыса дуннеосты но лулъёсты. Сӥ но дан ӵашъись тыллэн кузёезлы, дуннемылэн утисезлы, Вритраез но Намучиез вормисьлы, кудӥз сьӧд дӥсен пилемаськемын, бадӟым но чылкыт луллы, кудӥз зэмлыкез люке зэмлыктэмлэсь, кин инмар уробояз пуксьытэк ветлэ валэз вылын борӟемен, кин луэ вулэн пиез но вашкала Агний инмарлэн ымнырыз! Йыбырттӥсько мон вань инсьӧръёслэн кивалтӥсезлы, куинь дуннеослэн ик кузёезлы – Пурандаралы!»

Соку синкуанымон воргорон шуиз солы: «Мон пачылми тынад ушъянъёсыдлэсь. Кыӵе курондэ мон тынэсьтыд быдэстыны кулэ?». Уттанка соку ик ас куронзэ усьтӥз: «Мед усёзы кыйёс мынам кие улэ! Мед луозы мынэсьтым кылзӥськисесь!». Нош воргорон солы нош ик шуиз: «Пельты мынам валэлэн берпал усьтояз!». Уттанка соку ик солэн валэзлэн берпалаз пельтыны кутскиз. Со пельтыку, валлэн вань пасьёсысьтыз кыйёсты ӝокатӥсь тылъёс но ӵынъёс потӥзы. Соку возьдаськиз Такшака. Котыр ӝокатӥсь тылъёслэсь кышкаса, со угыосыныз дыртыса потӥз эксэй висъетысьтыз но шуиз Уттанкалы: «Ме, басьты угыостэ!». Уттанка угыоссэ басьтӥз но малпаськыны кутскиз: «Туннэ уга кадыр праздникез мынам дышетӥселэн кузпалызлэн, но мон сыӵе кыдёкын. Кызьы мон вуо меда отчыкемозь соослы аслэсьтым мыкырскись мугорме возьматыны?». Нош воргорон солэсь малпанъёссэ кылыса шуиз солы: «О Уттанка, пуксьы мынам валэ вылэ. Со тонэ али ик вуттоз дышетӥседлэн коркаез доры».

Уттанка «ярам» шуыса вал вылэ пуксьыны гинэ вуттӥз, соку ик сылэ ни вал дышетӥсезлэн коркаез азьын.

Нош дышетӥсезлэн кузпалыз мисьтӥськем бераз йырсизэ сынаны пуксем ни вал, адӟыса Уттанкалэсь али но вуымтэзэ, со пияш сярысь урод малпаськыны кутскиз ини. Но тани Уттанка со доры пырыса ӟечбуръяськиз но угыоссэ солы сётӥз.

«О Уттанка, – шуиз солы кышномурт. – Умой, пие, умой! Дырыз дыръя тон вуид! Мон ичи гинэ тонэ ӧй карга! Шудбуред тынад вань вылэм! Со тонэ сюрес вылад утиз-возьмаз. Мед басьтод тон та улонысь вань удалтондэ!».

Собере Уттанка аслаз дышетӥсеныз ӟечбуръяськиз. «О Уттанка, пие мынам, умой, умой! – шумпотӥз дышетӥсез солы но юаз. – Малы ӝегатскид?». Уттанка валэктӥз: «О дышетӥсе мынам, Такшака, кыйёслэн эксэйзы, мыным люкетӥз. Соин сэрен мон пыроно луи соослэн музъем улысь кый каразы. Отысь мон адӟи кык куиськись кышномуртъёсты. Соослэн станоказы тӧдьы но сьӧд сӥньысъёс гинэ вал. Мар со? Отысь ик мон 12 тӧдьы черсо, 12 пеймыт черсо питыранэз адӟи, куать пиос сое бергато вал. Мар со? Мон адӟи воргоронэз, кудӥз юрттӥз мыным. Кин со? Солэн валэз сыӵе бадӟым но кужмо. Воргорон косэмъя мон солэн берпалаз пельтӥ, котькуд пасьёстӥз тылъёссэ поттыса. Кин луэ со вал? Нош куке мон сюрес вылтӥ угыослы мынӥсько вал, мон адӟи туж бадӟым Ошез, кудӥз вылын сыӵе ик бадӟым воргорон пуке вал. Со туж шуныт гинэ куриз монэ: «Эй, Уттанка, си кыедзэ та Ошелэсь, ю кизьзэ. Тынад дышетӥсед но сое азьвыл веръяз!». Соку мон солэн куремезъя сии солэсь кыедзэ, юи кизьзэ. Соин ик тодэме потэ: мар вал со ваньмыз?».

Дышетӥсез солы пальпотыса валэктӥз: «Со кык кышномуртъёс – Дхатри но Видхатри, Брахма но Праджапати, соос ӵемысь воргоронъёс но луыны быгато, одӥгез кылдытэ, мукетыз чурытомытэ. Нош сьӧд но тӧдьы сӥньысъёс, сьӧд но тӧдьы черсъёс – нуназе но уй. Нош куать пияшъёс, кудъёсыз дас кык тӧдьы черсо, дас кык сьӧд черсо питыранэз бергато – со арлэн куать вакытэз, вашкала нунал чотэз возьматонъя: 1) салкым вакыт – толсурлэн ӝыныысеныз кутскыса южтолэзьлэн шорозяз; 2) тулыс вакыт – южтолэзь шорысен куартолэзь шорозь; 3) гужем вакыт – куартолэзь шорысен пӧсь толэзь шорозь; 4) зоро вакыт – пӧсьтолэзь шорысен куарусён шорозь; 5) сӥзьыл вакыт – куарусён шорысен шуркынмон шорозь; 6) толалтэ вакыт – шуркынмон шорысен толсур шорозь. Нош питыран со быдэс ар, 12 черсэз дас кык толэзь. Синмаськымон воргорон – Парджанья, зор пилем пилемаськон но Индра гудыри. Валэз солэн – ачиз Агни тыл. Нош соиз Ош, кудзэ сюрес вылысьтыд адӟид, со Айравата, слонъёслэн эксэйзы, нош соиз кин со вылын пуке вал, ачиз вал – Индра. Нош Ошлэн кыедэз, кудзэ тон сиид, кызез кудзэ тон юид – амрита, кулӥсьтэм карись сиён. Ӵапак соин сэрен тон ӧд кулы, кыйёслэн каразы пырыса. Нош ачиз Индра, кудӥз кык пол тыныд адскиз, со мынам эше. Солэн мылкыдызъя но юрттэмезъя тон угыостэ басьтӥд но татчы вуид. Мын вамышты ук, мусое, мон тонэ дорад лэзисько. Тон одно ик шудбурдэ шедьтод!» Дышетӥсезлэсь келян кылзэ сюлмаз пыӵатыса, Уттанка шумпотыса мыкырскиз но кошкиз, но солэн йыркурыз ӧз быры Такшакалы, соин со вамыштӥз Хастинапур карысь эксэй пи доры, кудӥзлэсь атайзэ аслаз кужыменыз данъяськыса быдтӥз Такшака. Уттанка куроз со эксэй пияшез, атайзэ быдтэмез понна, ӧсьсэ берыктыны, Кыйёсты быдтӥсь курбон тыл ӝуатыны. Мед ӝуалоз отын Такшака…

Тани ӵапак та учырез пыр-поч тодаз вайыса, аслэсьтыз пӧечи калтонзэ дасяз Аждага… Солы, конечно, капчи ӧй вал сусыпуослэсь кужымзэс вормыны. Но со вормиз, шедьтӥз амал аслэсьтыз «сьӧд» кужымзэ отчы пыӵатыны. «Таӵезэ Керемет но ӧй быгатысал малпаны!» – куанэ Аждага.

21-тӥ люкет. Витетӥ палдурысен, Кырныж синмын учкон

Но котькуд дырлэн аслаз адӟытонъёсыз. Шурали экэйлэсь така будосъёс пӧлы ышем бервылзэ чускатыса но соин сэрен Такшакалэсь малпаськон тылъёссэ пальккыса, ӵапак со вакытэ олокытысь лобыса потэ оло тутыгыш быдӟа, оло нош удмурт атас-ӟазег быдӟа кырныж. Воксё тодмотэм кырныж. Чик но Япанчалэн кырныжез со ӧвӧл. Со татысь ик «Инвожо дуннее» йыромем кырныж, шӧдске. Со ӟеч тодэ та кионъёсты но така-ыжъёсты но.

– Шузиос! – эсэпсэ тодӥсьтэм сямзэ ваньзылы усьтыса кесяське со кионъёслы, бадӟым сусыпу вылэ пуксьыса. – Така йыръёс! Малы соосты ӧд йыръе, исьтакан сульдэръёс!

Кионъёслы та жоб кыло каргаськон чик уг кельшы ке но, соос йыръёссэс мыкыртыса синкаш ултӥзы гизьырланыса учко. Соос золгес ярато асьсэлэсь «кион-такаоссэс» йырйыны… Малы соослы мукет пӧртэм кык пыдо такаос? Ну, адӟизы соосты сыскиськон шоразы. Мар собере? Ма, ваньзы сыскисько ук, кин лушкемен, кин пичиен, кин бадӟымен. Ваньзэсты сыско, соосты но сыскисьёс шедёзы…

Кырныж сьӧры ик, «храмчиослэсь» пыдберъёссэс эскерыса но туж дыртыса «Паньгам» нёжалэ пото Ӟапык, Эпок, Шыкмет, Былай но мукет ошкуйчиос. Соос азьын кык думылэм храмчиос. «Паньгам» чал-чал сылэ. Ӵушъял кадь шымырскем, яке кышкам коӵыш кадь пештырскем сусыпуос ӧжытак куалекто кадь.

– Зӥ-зӥ-зӥнь! – пурӟизы чибинь уллёос. Ӟапык визьмо синъёсыныз соку ик адӟиз гырыкъёсысь чонари синъёсты, валаз мар татын луиз.

– Кылдысин кылэ, Кылдысин адӟе, Кылдысин уг лэзь! – шуиз со чонариослы, думылэм «храмчиоссэ» азьлань донгыса.

– Кылдысин кылэ, Кылдысин адӟе, Кылдысин уг лэзь! – шуиз со куасалляськыны кутскем музъемлы, усьтӥськыны дасяськись ымзэ дугдытыса. – Укмыссэ басьтӥд ни, тырмытэн басьтӥд! Эн луы сукыр! Кылдысин кылэ, Кылдысин адӟе, Кылдысин уг лэзь! – ӝог вера Ӟапык, выльысен «храмчиоссэ» азьлань донгыса.

– Адями вераз, адями сэраз, адями ортчоз! Кылдысин кылэ, Кылдысин адӟе, Кылдысин уг лэзь! – огзэ бере огзэ со буйгатэ дасяськем кыпыосты, сикыӵъёсты, шибодыосты, «кион-такаос» пала асьсэлы сюрес усьтыса.

Тани соос шуак пото «храмчиослэн» али гинэ сылэм интыязы, кионъёс шуак пештырскыса соос азе султо. Ыж-такаос нош ик шумпото батыр кионъёссы понна. Выльысь омырын соослэн кырыж малпаськонзы чилекъя. Нокызьы чидамез уг лу тае кырныжлэн.

– Така йыръёс! – сьӧд куараен кеське лудканы кутскем но кытын ке кыӵе ке буёлъёсын, горд буяськем кырныж. – Мар ыргетӥськоды асьме ошкуйчиосмы шоры!

– Паллян пала кошкиллям! – векчи-векчи куараеныз шуэ Ӟапык. –Шонер вера вераськись куака, ми шоры уг яра утыны. Ми Зарни Мумез но «эксэй нылэз» утисьёс! Ӝоген сутом соосты! – вераське Ӟапык, векчи куаразэ кионъёслэн но така-ыжъёслэн вийым пыдэсазы ик пыртыса.

Кионъёс, янгышсэс валаса кадь, тушмонъёсты шедьтыны кошко. Ошкуйчиос но шуак соос сьӧры ышо, ыж-така турынъёс борды мырӟиськылыса, омырын така сюръёс гинэ шонаськыса кылё. Кырныж но секыт кукъёссэ мырдэм-мырдэм ӝуткаса соос сьӧры лобӟыса кошке.

– Эксэйкун! Шузи эксэйкун! – кеське кырныжлэн кырыжамтэ йырвизьмыз.

Кырныж адӟе ни сооссэ но, таоссэ но. Ошкучиосты со тодма, тужгес но векчи-векчи куараё луэм Ӟапыкез. Ӵапак Ӟапык сое мозмытӥз вал быркытъёсты кутыны пуктэм сикыӵысь. Сюриз вал сыӵе сикыӵе шузи егит йырыныз.

– Малы ачид быркыт ке но ӧвӧл, быркытъёслэн сикыӵазы сюриськод? – йырвиымаз пыӵатозь ик пырак пеляз ӟазыртӥз солы Ӟапык, со вакытэ самой визьмоез со понна лул. Кырныж туж умой валаз, тон чорыг ӧвӧл ке, малы тон, эбек, чорыг калтонэ шедьыны кулэ? Но дуннеын – ӵем валаны уг лу, оло эбек сиид, оло чорыг, яке воксё эбек но, чорыг но ӧвӧл, мар сиид, уд валаськы. Кемалась ӧвӧл пель нянь со сииз Кузон базарысь – кубистаен индюклэсь… Не сӥльзэ, не кубистазэ ӧз шӧды, тьфу! сялӟиз ымаз понэмез бере ик.

Ма, тышкаськыса ке но сое Ӟапык сэрпалтӥз, со яратэ сое, сикыӵысь мозмытэмез но визнодамез понна!

Нош соосыз, думылэм «эксэй нылэз» кыскасьёс, кыдёкысь лыктэмъёс. Кык уллёен соос вуэмын, кык ошкуен. Куинетӥ уллёзы но соослэн вань – омыртӥ лобасез. Кырныж со сярысь али гинэ валаз. Нырысь-валысь со ачиз но уг тоды вал, мар уллё Кикыкуш котырын берга. Угось валтӥсьёссы куинез ик гожтэм кадь ог тусъемесь. Ожчиоссы но соос ик, оло нош агай-вынъёс. Зарезь вуосысь потэмъёс, оло. Егитэсь, сяртчы кадесь. Валтӥсьёссы куиньназы ик «ваньбур утчась кулэм киен» ветло, кырныжзылэн но вань сыӵе ик «кулэм кырныж тяпаез». Ог-огенызы туж кыдёкысен вераськыны быгато. Одӥг уллёзы Кизили Пурт доры мынэ вал, но ӧз вутске, Усман тата азьланьтӥз соосты, табере соос кикыпиосын ожмасько. Кыкетӥ уллёзы ыж-така уллё пӧлын тӥни али берга. Вань сыӵе йыромон вакытъёс, палэсмурт ке бергатэ, отын кулэм ки но уг юртты. Нош куиньметӥ уллёзы адскисьтэм луыны быгатэ, соос я куакаослы, я кырныжъёслы пӧрмыло, я бусъёслы, я писпуослы, я пилемъёслы, я турын зуродъёслы но мукет, оглом, обыдаос кадь олокин но луыны быгато. Но соос ӧжыт кылизы ни. Шератӥз уллёзэс Ӟумъя батыр, Усман таталэсь Кизили Пуртсэ ишкалтыны турттыкузы. Но ӧз на быре соос. Одӥг синмо аримаспаос кадь туж сак эскеро вань югдурез. Медаз ватэ шуыса лушкано арберизэс. Кырныж гинэ соосты адӟыны ворме, угось солэн вань куинетӥ синмыз… Кык йыр висказ со сылэ, куинь йыро луылыкуз – котькуд йырызлы быдэ одӥг син. Сыӵе быгатон солы кузьмаз Ӟапык ошкуйчи кымес шораз тэшкыльтыса. Таӵе дыръя кырныж куинь дуннеез ик адӟе. Со сыӵе вакыт, куке выжъёс улысь йыртэм чуньыос пото, йыртэм кунянъёс, йыртэм ыжпиос, йыртэм кионъёс. Ӵапак йыртэмъёс потыку та адӟиськисьтэм уллё адскыны кутске. Угось ваньзы та вакытэ йыртэм луо, уг вормо кӧмъёссы пушкын ватскисьсэ возьыны. Кӧня пол ыбизы ни соос кырныжлы, адӟемзэ тодыса, но куинь синмоез уг лу вормыны,  со азьло пала ик вала, кин ыбоз, мар лыктоз, кытчы вуоз. Ӵапак та уллё возе кык уллёлэсь улонзэ. Та уллё Кащейлэн курегпузын кыллись веньыз кадь. Кырныж тодэ, малы сыӵе маскараясько…  Туж кулэ соослы Зарни Мум. Со бордын вань ужпум. Соос тодо, зарни кисьтыны, зарни шуккыны быгатӥсь Зарни Мумлэн тужгес но кужмо мусторез кытын ке татын ватэмын шуыса. Шедьтӥзы соос арсавылъёслэсь Зарни Мум сярысь мадьёссэс, кытын верамын вал: Зарни Мум одӥг пол арсавылъёслы усьтоз «эксэй ныл вирзэс». Нош «храмчиос», дырез азьланьтыса, тодӥзы со «эксэй ныл вирлэсь» дунне вылын азинскемзэ. Озьы потӥзы Узыбей доры. Табере солэсь вирзэ ужато Зарни Мумез шедьтыны. Арсавыл кырныжлы та югдур чик но уг кельшы. «Зарни Мум со милям!» – ми нокинлы сое ум сётэ, шуэ солэн мӧйымем йырыз.

– Ӵушъяллы верано вал та сярысь! – малпаське кырныж. – Ӵушъял быгатысал та дят адямиослэсь сюресъёссэс кырыжатыны.

Кырныж тодаз возе ваньзэ вашкала луэмзэ. Одӥг пол бере кыльыса лыктӥсь ӵушъял ӧс выжытӥ пырыны ӧз быгаты, инмар корка люкаськем животъёс доры, ӵендыса усиз ӧс выжые но ваньзы сое серекъязы. Со учыр понна ӵушяллэн сыӵе вожез потӥз – вань дунне вылысь сюресъёсты со кырыжатӥз но нажгатӥз, ӧчсэ берыктыса. Нош ӵушъял туннэ чырсам яблокъёс вылын тэйёссэ вийылыса шутэтске. Уг яра сое таӵе вакытэ исаны… Пурӟоз! Нош ӵушъял выльысен ке пурӟиз, мар луоз, созэ нокин уг тоды…

– Оло, ӵушъялтэк но вормомы ай! – кронгетэ кырныж. – Кулэсмо ни соос, куинь уллёен ке но ветло. Я отын, я татын яке курик, яке палаш соосты кортӵога, яке музъем ым ньылыса сялӟе, я выжы ӝокатэ, я кыпы тыбыр шоразы бышкалске! Ма, тӥни ук куинетӥ ползэ такыр бамалэ таосыд дыгисько ини… Уг тодо таӵе дыръя мар карыны, Палэсмурт соосты нуллэ ук, катаоссэс воштыса кутчано но тӥни… – ас понназ визьмояськыса серекъя кырныж, Палэсмуртлы тау карыса йыбырттон вискытӥз.

Зэмзэ но куинетӥ ползэ одӥг интые пото ни «храмчиос». Така уллёос пӧлтӥ ветлыса, уг валало на соос кытчы сюремзэс. «Паньгамтӥ» котыръяса нуллӥсь сюрес соосты ялан та кырымпыдэс кадь пукись тубато-тубато бамалэ вуттэ, кудӥз котыр ласянь вылӥысен уллань ваське меӵак жужыт борддор кадь сылӥсь тӧдьы из гурезь борды. Со из гурезь азьын пичи гинэ ӵошкыт куш. Кырлуд сое шуыны луысал, турын ке со вылын ӧй будысал. Угось татын така будос но уг буды. Малы ке шуоно та ӵошкыт кырымпыдэсын шудӥсько трагедиос. Пересь кионъёс олокыӵе но мугоръёслы пӧрмыса сое шудо такаослы но кионъёслы. Соин ик «храмчиос» но соос сьӧры вуэм кионъёс крым пыдсын кадь али адӟисько. Вань така будосъёс но кионъёс соосты тубато-тубато бамалысен адӟо но, кыло но. Татын огшоры шыпыртэм куара но, лулӟем но туж кыдёке чузъяське. Умойгес ке учкысалзы, «храмчиос» адӟысалзы, кызьы вылӥысен пӧртэм паласен така сюръёс улэ ватӥськыса соос доры васько ни ошкуйчиос. Ӟапык соосын лушкем пусъёсын гинэ вераське. Ошкуйчиос но озьы ик вераськыса адӟиськытэк гинэ матэкто. Нош такаос Аргуслэн синъёсыз кадь котыр ласянь учко та югдурлэн азинсконэз шоры. Пельёссы но соослэн котькуд выросэз кыло.

– Кытчы тон милемды ялан нуллӥськод? – кеське «храмчи» кулэм ки тяпаезлы. Куараез солэн вань арсавылэ чузъяськыса, оло, гудыр-гудыр кошке.

22-тӥ люкет. Пичи гондыр тусъем вампад но Аждагалэн сӧриськем спектаклез

– Оло со шонер тӥледды мон доры потта? –  та ӵошкыт интые ӝужыт борддор кадь пичи кубик-шакаляослэсь сюрем гурезь вылысеныз юа пичи гондыр яке бадӟым комак шуод-а, мар-а сое…

«Кин со, кытысь со татчы потӥз, ку татчы каръяськем?» – пайме ачиз но Усман тата. Ма Усман тата гинэ ӧвӧл, ваньзы адӟисьёс паймо, кионъёс но, ыжъёс но, ошкуйчиос но…

– Мар со сыӵе? – ноку та дырозь  адӟымтэ гондыр тусъем пичи живот шоры паймыса учко ожтӥрлыкъёссэс нуллыса пӧсям но жуммем «храмчиос». Соослэн вистэм-вожтэм бӧксӥсь така сюръёс улэ шедьылыса, ымныразы сӧл интызы кылемын ӧвӧл ни, лёг вылын лёг адӟиське. Дӥськутсы ик кесяськемын, мугоръёссы нажгамын, вирӟектэмын та тубатъёстӥ усьылыса, вольтчылыса, тэтчылыса. Вылаз ик арыслан быдӟаесь кионъёс соос котырын котькуд паласен ыргетӥсь борддор кадь бызьыло…

Та паймымон пичи гондырлы укшась живот туж ас дыраз соос азе потӥз. Сокем ӝоказы ни вал «храмчиос», эшшо кӧня ке бызьысалзы ке, пограсалзы. Та одӥг адями вамыш кузьда оло арлан, оло гондыр туж чырткем васькиз кубик-шакляосызлэсь сюрем гурезьысьтыз. Тани со кубик-шакляосызлэсь лэсьтэм ӝӧк вылаз, дуно кунооссэ пумитаса кадь, быдэс тэркы шакаляоссэ пуктӥз. Артэ сылӥсь кувшинэ ӵажгетыса ик кизяз, тазэ но пуктӥз тэркыез вӧзы… Куанэ пеймыт гутёяз кыллись Аждага, ачиз ваньзэ тае малпаз ук – алэсьтыз пуктэм спектакльзэ кадь учке…

– Хи-хи-хи! – куанэ  шакаля гурезьёс сьӧрысь мумы куара, шӧдске, та пудолэн парез…

Ваньзы паймыса учко куара пала, нырпысыоссы шӧдыны кутско мумы мугорлэсь пӧсям зынъёссэ… Оломар соосын луэ, соосын гинэ ӧвӧл, такаосын но, кионъёсын но… Укыр ини аздырись солэн мумы кужымыз…

– Тани… – шуэ шудо мынекъясь живот… Мугорыз солэн ӧжытак шукыяськемын, оло нош пӧсямын…

– Мар, тани? – вожез потыса юа солэсь валтӥсь «храмчи». – Кин тон сыӵе?

– Отын, кытысь мон вуи, монэ «вомпад» шуо, нош тапалан кин ке арлан, кин ке бызара, кин ке гондыр-комак, нош мон пичи гондыр ук… – серекъя бадӟым парсь зӧкта пудо-живот. – Кунояське… – кескич дэмла со, кубик кадь шакаляосыз но кувшинэз шоры аслаз китяпа чиньыеныз возьматыса. Озьы ик возьматэ «кулэм ки тяпа» но.

– Мар со? – юа валтӥсь «храмчи», югдурлэсь ултӥясь шӧмо луэмзэ шӧдыса…

– Та шакаля-амброзия, кудӥз мынам таза берпалам дуриське… – валэктэ гондыр тусо арлан.

– Хи-хи-хи! – куаныса ик серекъя шакаля гурезьёс сьӧрысь мумы куара. Аждага но куанэ, сюлэмыз ик пытсаськылэ шумпотон тулкымъёсызлэсь.

– Со гинэ тӥледды Зарни Мумлэн зарни мусторез доры туж ӝог поттоз… – валэктэ гондыр тусо арлан. – Та «амброзиез» сиытэк тӥ ноку уд сюре отчы, ялан Палэсмурт тӥледды така сюръёс пӧлтӥ бергатоз. Котькуд кузь сюрес, шуо, сюръёс вылын сюриське. Нош мынам та кубик шакаляосы тани та гу пыртӥ пырак янгышатэк Зарни Мум доры вуттозы… Тӥ тодӥськоды ук, кызьы индус воргоронэз кый инмаръёс доры поттон понна, Ошлэсь табаняньзэ сиыны косӥзы… Со нокыӵе луытэк сииз. Озьы ик тодӥськоды, кызьы солы Ошлэсь кизьзэ юыны косӥзы… Со нокыӵе кариськытэк юиз. Собере кый инмаръёс доры пырыса улэп кыльыны быгатӥз. Нош тодӥсьёс валэктӥзы: Ошлэн табанез со инмаръёслэн «амаранта» няньзы вал, яке «амброзия» сиёнзы, кудзэ сием бере адямилэн дунне валанэз инмаръёслэн кадь ик паськыта, нош Ошлэн кизез со «амрита» яке «нектар» вал, кудӥз тонэ инмаръёсты кадь ик кулӥсьтэм каре. Сотэк уг лу потыны инмаръёс доры. Мон сое тиледлы верасько, ачиз Ош-гондыр…

– Мон тыныд уг оскиськы… – вожоме валтӥсь «храмчи». – Кызьы тынад берпалтӥд таӵе кубико шакаляос потозы? Соос яке кузялэс, яке котырес табань кадь, яке кизер луыны кулэ!

«Храмчиос» гурак серекъяло. Ӧжытак небӟизы, шӧдске, та Ош-гондыр пӧр шоры учкыса. Ыжъёс но мыняса учкыло, кионъёс но. Аждага но куанэ.

– Мынам берпалэ дурись куала кадь дуриське! – ӧжытак вожомыса валэктэ пурысь арлан. – Отын сандалэз но бадӟым ӵокисез но вань!

– Хи-хи-хи! – нош ик куаныса серекъя мумы куара. Такаослы но егит кионъёслы туж тунсыко потэ ни, кытысь со озьы серекъя.

– Кулэ луиз ке, мон тӥледды ваньдэсты берпалэным шуккылыса нажгато, мынам со динозаврлэн кадь! – лек вера арлан, гондыр тусбуйзэ возьматыса. – Учке, уд ке оскиське! – шуэ со ымаз арым тусъем будӥсь амброзия турын куштыса но берпалзэ соослы бекыртыса.

Вомпад-арланлэн пурысялэс гоно берпалыз зэмзэ но пӧртэм ласянь сандал но бадӟым чӧкись кадь ужаны кутске…

– Тук! Тук! Тук! Тук-тук! Тук-тук! Тук-тук! – кылӥське солэн берпал куалаысьтыз но тэтчыса потэ парланӥсь кубик-шакаляез. Ӧжыт улыса эшшо одӥгез. Ӧжыт улыса эшшо одӥгез…

– Хи-хи-хи! – шакаляосызлэсь сюрем борддорзэ уськытыса ик коскаса погра солэн мумы арланэз. Озьы ик коскаса со нош ик борддоръёс сьӧры ыше.

Ватка кылэз тодӥсьтэм «храмчиос» гурак серекъяны кутско. Ыж-такаос но мынь-мань учкыло. Кионъёслэн но синъёссы серем пыр чилектэ. Ӧйтӧд, кудзэ соос золгес серекъяло, оло мумы, оло айы вомпадэз, оло кыксэс ик?.. Ошкуйчиос но оло та учырлы луыса, оло югдурлэн юрттэмезлы луыса пальпотыса матэкто.

Валтӥсь «храмчи» гинэ серекъятэк учке та маскара пудо шоры. Озьы ик валатэк учке туж ӟеч ватӥськыса пукись Шурали эксэй но. «Кызьы та чылкыт Арсавылын таӵеез луыны быгатэ?» – зэмзэ но паймо соос. Но котькызьы паймизы ке но, югдур али кыксы пала ик уг ужа. Ыргетӥсь кионъёс, ӟукыртӥсь пинё борддор кадь сыло соосты котыртыса, азьпалан гурезь борддор, сьӧразы шокало ни уйиськись ошкуйчиос, уг ке но адӟо, умой кыло Шурали эксэй но, «храмчи» но соослэсь матэктэмзэс. Нокин уг сёты соослы дыр. Дырзы соослэн туж ӝог бызе. «Тэтчи ке, кутозы! – малпаське Шурали. – Соосыз но таосыз но бышкалтозы! Но Тулпар, Тулпар мыным кулэ ук!». Шурали гинэ ӧвӧл «храмчи» но ёрмемын мар карыны…Со но тунаськыса кадь сылэ…

– Тае сиид ке, тон но, мон кадь ик, тямыссэ айымумыяськон амалъёсты тодод… Ми вомпадъёс, туж быгатӥсесь та ласянь… – мынектэ зӧк арлан, тэркызэ «храмчи» азе матэктыса. – Тон но сыӵе ужъёсты яратӥськод ук, мон адӟисько тонэ… Уд ке оскиськы, учкы таро картаен, картаос тыныд котьку шонерзэ верало вал…

Арлан шуак вӧлдэ «ӝӧкез» вылэ картаоссэ. Храмчилэн «кулэм китяпаез» куалекъяса но дыртыса кыстӥське картаос доры, татын шуак ваньзылы адӟиське, кин вал «кулэм китяпалэн» кузёез. Тани со куалекъяса вуэ картаос доры но одӥг чиньыеныз зӥбе огаз карта вылэ. Арлан берыктэ.

– «Шака!» – паймо «храмчиос». Пайме арлан но, така-кионъёс но… Усман татаен Ӟапык кадь, матысен  адӟисьёс гинэ уг паймо, соос валазы ни, кыӵе сьӧд гутёысь та бызараос ыстэмын, кин соосты татчы ыстӥз, малы пичи гондыр тусъем кариз… Нош нокызьы уг валало Усман тата но, Ӟапык но, мукетъёсыз но, мар кулэ Аждагалы, мар со карыны турттэ Узыбей пыртӥ. Но малпаськыны но дыр татын ӧй вал ни. Оло Шурали нылашез лушкаса пегӟоз, оло та бызара кытчы ке утялтоз, оло «храмчи» мар ке выльзэ малпалоз.

– Иське, нырысь та шакаляез принцесса веръялоз… – чурыт косэ валтӥсь «храмчи», тэркыез со доры матэктытыса.

– Мон сое уг поны ымам! – огпала берытске Узыбей. Та куинь котырез ыж-така лудъёс пыртӥ ортчыса но, принцесса чик но саптаськымтэ – одӥг яраез но ӧвӧл. Паймыса учке со шоры «храмчиослэн» кузёзы. Та югдур сое эшшо но вожомытэ.

– Понод, эшшо кызьы понод! – кеське валтӥсь «храмчи».

– Умой кошкиз вераськон! – куанэ арлан, шумпотэменыз эктыны ик кутске.

Ӟапыклы оло пуртэн сюлэмаз бышкалтӥзы. Со шуак учкиз Шакай шоры, оло, пӧй, кутском, коралом соосты. Шакай йырзэ шоназ, ум вуэ, пе. Кыдёкынгес, пӧй, Узыбеез быдтыны вуозы. Со «храмчилэсь» ваньзэ возьманы луэ…

Ӵапак ошкуйчиослэн каллен матэктыса лушкем вераськонзы вакытэ, Шурали эксэй интыысьтыз тэтчиз но «храмчиез» шуккыса погыртӥз, собере Узыбеез олокызьы гинэ тыбыр вылаз куштыса шонерен така будосъёс пала пурӟытӥз! Сокем ӝог со ортчӥз, нокин номыр малпаны ик ӧз вуы. Туж чырткем Шурали эксэй, нокин дунне вылын  со кадь ӝог уг бызьылы. Кылык сое ӟеч тодэ. Шурали со шурлэсь курда, тон сое шур сопалась ке адзӥд, ноку эн вера солы шурэсь кудпаласен быземзэ, вера мыдлань. Угось со одно сыӵе юан сётоз. Зарезез солэн котыртэмез уз лу, нош шур кутсконэз соку ик котыртоз но тон доры вуоз.

– О-о-о! – кеськизы ыж-такаос, соос но ук тодо Шурали эксэйлэсь кызьы бызьылэмзэ.

Но ӵапак со вакытэ кунян быдӟа егит кионъёс вылтӥ соослэсь но бадӟым мӧйы кион Шурали эксэй азе тэтчиз, тыбыр вылаз пукись борӟемчи Шуралилы кистененыз васькытӥз. Туж вӧсь соизлы йӧтӥз, шӧдске.

– А-а-а! – вузыны кутскиз Шурали эксэй, Узыбеез киысьтыз мозмытыса. Нош борӟемчилы со гинэ кулэ вал кадь, со «эксэй нылашез», думылэм гозыеныз ӵош, тылыез кадь, ас азяз пуктӥз, собере шакшы арланлэн гурезё-гурезё шакаляосыз сьӧры тэтчыса бусаськиз… Ку  шуккыны вуиз, ку кырмыны вуиз, ку тэтчыса ышиз, созэ Шурали эксэй но валаса ӧз вутты, вӧсь луэмезлы чидатэк вузыса кошкиз со така сюръёс пӧлтӥ. Кытчы пегӟемзэ ачиз но ӧз вала ни. Тырмытӥз солы мӧля урдэсаз мырӟиськем кистень… Со урдэслань учконэныз гинэ адӟиз на, кызьы кык бадӟымесь кионъёс тыбыр вылазы лач-лач пукись борӟемчиосын Шурали эксэй вылтӥ тэтчаса, куинетӥез борӟемчи кадь ик, шакаля гурезьёс сьӧры лобыштӥзы. Таосыз но тӧлпери гинэ сьӧразы кельтӥзы…

– Япанча, дугды! Эн шузимы! – туж зол шуккиськиз вань ёросэ Камитлэн куараез.

– Дугды, Япанча! – шуккиськиз мукетыз куара, Явушлэнэз. Ошкуйчиослэн пельёссы сакесь. Угось куараосъя соос тодмало гинэ ӧвӧл, соос адӟо, кин мар карыны турттэ. Соин ик одӥг ласянь соос шумпотӥзы, Узыбеез ӵапак ас вакытаз Япанча ишкалтӥз шуыса, но мукет ласянь, марлы ке сюлэмъёсазы шуак пыриз Узыбей понна кышкан. Япанча мар ке умойтэмзэ малпаз – валатскизы уно адӟем ошкуйчиос.

– Ы-ы-ы! – кылӥськиз Узыбейлэн зэмзэ но кышкатскем куараез. Ошкуйчиослэн шӧдонъёссы пыртӥ мар ке умойтэмез ортчиз кадь. Ма соослэн гинэ ӧвӧл, Усман таталэн но, «храмчиослэн» но, мукет учкисьёслэн но ымъёссы куакаослэн кадь усьтӥськизы. Тужгес но бадӟым усьтӥськизы така-ыжъёслэн. Кельше соослы та кионъёслэн сюлэмзэс ик зуркатӥсь трагедиоссы. Угось соос дышемын асьсэды кионъёс кожаны, соин ик куаныса учко кионъёслэсь возьматонъёссэс. Но вераны кулэ, куке-соку ыж-такаос шӧтэм кышкаллязы, соосты кионъёс кесяку. Соку нокыӵе трагедиосты учкон сярысь малпанзы ик соослэн ӧй вал на. Котькудӥз ас синмыныз адӟе вал, мар соин ӝоген луоз. Соос будэмысь ик дугдӥзы, вирзы но, мугорзы но чырс луиз, сиыны ик луонтэм. Соин сэрен пересь кионъёс быдӟым кенеш ортчытӥзы. Одӥгез самой пересь кионзы соослы туж паймымон дэмлан вераз. Собере кионъёс но, ыж-такаос но воштӥськизы. Табере кионъёс пичи дыръязы ик котькуд ыж-такаен верасько. «Тон эн кышка милесьтым, ми тонэ яратӥськом! – шуо соос кудькуд ыж-такалы. – Малы ке шуоно тон ыж-така ӧвӧл, тон милям выжыысьтымы луиськод, тон зэмос кион пи, нокин тонэ уз сиы, ми тӥ пӧлысь ыж-такаосты гинэ сииськомы, малы ке шуоно соос урод сямоесь, номыр валасьтэмесь, дуннеез гинэ пожаны вордӥсько. Та вераськонъёс бере ыж-такаос тодмантэм воштӥськизы, сӥльзы но соослэн ческыт луиз, вирзы но туж бадӟым кужым сётӥсь, асьсэос но ыж-такаос бадӟымесь но тазаесь будыны кутскизы. Табере соос воксё уг кышкало ни кионъёслэсь. Соос тодо, асьсэос но кионъёс шуыса. Нош ыж-такаос, кинъёсты кионъёс сиё вал, соос понна луизы янгышен та дуннее вордскем лулъёс, кинъёсты соос уг ярато, адӟемпотостэм каро. Нош куке ыж-такаез ассэ сиизы, со ачиз но валаса ӧз вуы, сое сиизы шуыса. Соин ик котькудӥз ыж-така малпаз, урод ыж-такаез сиизы шуыса, соослы кельшиз кионъёслэн ыж-такаосты сиемзы. Угось соос вылӥ лулъёс, соослэн пушказы кион вир бызе! Соин ик соос зэмос кионъёс кадь ик трагедиосты учко!

Тани соос азе потӥзы Ӟумъя батырлэн ошкуйчиосыз. Ӟапык кизэ ӝутӥз дугдыны косыса. Соосты адӟыса ыж-така уллё нош ик шулдырскиз. Чидатэк со возьма, мар луоз азьпалан. Ыж-такаослэн сюлэмъёссы ик луп-луп тэтчало ини. Тани табере вир кисьтӥськоз! Табере та кык пыдо ыж-такаосты сиёзы! Нош кудъёсыз меда соос пӧлысь ыж-такаос? Мае, мае, нош ыж-такаосты кесянэз соос сокем ярато. Егит кионъёс но выльысен айынӥзы. Така сюлэмъёслэн куаныса ик ӝугиськемзы соослэсь мылкыдзэс ӝутэ, таӵе дыръя соос сокем ческытэсь луо.

– Р-р-р! Р-р-р! Р-р-р! – котыр кылӥське кионъёслэн ыргетэмзы. Тани ук ӵапак дырыз вуиз батырлыкез возьматыны.

Ӧз, таӵезэ ноку ӧз малпа вал «кулэм китяпаен» ветлӥсь «храмчи». Со трос дуннеез адӟиз, трос калыкъёс пӧлтӥ ортчиз, но нокытын сое тазьы ӧз ултӥялэ. Солэн йыраз уг тэро та серекъясь ыж-такаос, куанӥсь кионъёс, аслэсьтыз гоно берпалзэ возьматъяса, арабъёслэсь куанытӥсь нылмурт эктонъёссэ укыр возьыто выросъёсын эктӥсь живот. Кытын ке шакаля гурезьёс сьӧрысен  серекъясь мумы животлэн вань лулзэс поромытӥсь зынъёсыз. Кыӵе ке Шурали эксэйлэн сое одӥг киеныз нажгатэмез. Кыӵе ке кион вылын ворттылӥсь борӟемчиослэн сокем ӝог «эксэй нылэз» нуэмзы. Та чиданы луонтэм мыскыл карон! Ӧвӧл, уз лу со озьы, Зарни Мумтэк со уз кошкы! Улошо кароз ассэ, но со шедьтоз Зарни Мумез!

Нош ас эктонзэ дугдыны быгатӥсьтэм арланлэн ымныраз гондыр тусбуез кыльымтэ ни вал – со но таӵезэ нокызьы ӧз возьма… Ваньзэ со сыӵе зол малпаз ни вал, ужез быдэсмытозь одӥг вамыш гинэ кылиз… Но кытысь ке кызьы ке тӧлпери кадь вуэм Шурали эксэй но борӟемчи вань картаоссэ солэсь лобӟытӥзы. Кузёлы кулэ вал «эксэй ныл»! Со понна со ваньзэ тае малпаз. Кулэм ки но со понна ужаз… Нош эксэй нылэз со чиньы вискытӥз лэзиз, но кылизы на «храмчиос» но ошкуйчиос! Таоссэ коть со гутёе пыртӥз ке, кузёез оло мукетгес учкоз? Та осконэзлы луыса, арлан выльысен, оло, улӟиз. «Храмчиос» Зарни Мум доры гуэ тэтчизы ке, ошкуйчиос но соос сьӧры тэтчалозы! Нош мар карыны турттэ ошкуйчиосын кузё, соиз солэн ужез! Нокин ӧз кылы арланлэсь та малпанъёссэ, Япанча сьӧры Узыбейзэ мозмытыны уйиськись Камит сяна. Но Камитлэн табере мукет сюлмаськонэз кылдӥз: кытчы Узыбеез нуэ Япанча?..

– Ӝоггес вера, мар кароно! – кеське калленгес но калленгес эктӥсь арланлы «храмчи».

– Амаранта шакаляез ньылоно но амритаен гылтоно… Собере гуэ тэтчоно, тӥни со азяды кылдэмын… – ӧжытак пальыштэ пурысь арланлэн гондыр тус ымнырыз. Валаз Ӟапык, табере сиёзы «храмчиос» со шакаляосты, тэтчозы со гутёе. Нош соос сьӧры ошкуйчиослы но сиёно луоз, соосты сутон понна… Уг яра кельтыны «эксэй вирез» сантэмасьёсты!

23-тӥ люкет. Камитлэн выльысен  Ыж-така лудэ берытсконэз

Валтӥсь храмчи кык чиньыеныз кутӥз чырс зыно шакаляез… Тани со ымаз донгыны турттэ ни вал, но со азе шакаля гурезьёс сьӧрысь берен тэтчыса потӥз пересь кион. Арланлэн вань мугорыз катӥз. Кион вылын пуке вал лекомем тусо Камит. Солэн югыт ошкуйчи дӥськутэз вань шакаля кушез югдытӥз. Нош Кизили Пуртэз, чашъем тыл кадь гудыртыса, вань чырсам зынъёсты шуак тӧлӟытӥз. Ваньзы асьсэ интыосазы катӥзы… Оло Кизили Пуртлы, оло Камитлэн арсавыл туно кужымезлы луыса, номыр карыны уг быгаты валтӥсь «храмчи» но…

– Нёжто кадыр Доминиклэн орденэз таӵе улэ лэзиськиз?.. – кезьыт ӟазыртэ Камит. – Доминиклэн ожчиосыз пӧлын котьку атай инмарлэсь дунне валанзэ дышетон дунъяське вал… Соос туж вылӥе пукто вал Иисус Христослэсь но кадырлыксэ, солэсь чылкыт улонлы дышетэмзэ. Шат отын но табере сьӧд ведӥнъёс азӥзы? Одӥг кияд тынад «кулэм китяпа», мукетаз та «комак парсьлэн кыедэз»… Нёжто тон малпаськод, та шайтан моклок тонэ Зарни Мум доры вуттоз? Шайтан со нырысь гинэ юрттэ, бӧрысь пӧя. Та зынмем шакаля тонэ бызара гутӥз аслаз кузёез доры гинэ поттоз. Ма, кузёез доры но уз вутты, юрттӥсез доры, мустор исьтаканэз доры. Ачиз Аждага сьӧд гутёосысьтыз уг поты, 100 ар со улэ Зиланлы пӧрмон понна, 500 ар улэ Аждагалы пӧрмон понна, нош 1000 ар солы пеймытын улоно Юхалы пӧрмон понна. Тӥни со, Зарни Мумез солэн. Пот татчы сьӧд исьтукан! О Индра ош-гондыр, гудырты ай ас гудыридэ – Кизили Пуртэз борды кырмиськыса, куре Камит.

Югак луэ инбам, олокытысь мыӵиське Шунды. Туж бадӟым пилем ортче шакаля гурезьёс вылтӥ, сокем яркыт чилектэ. Собере вань дуннеез зуркатыса, шакаля гурезьёсты ик пазьгыса гудыртэ.

Бызара гутёысь, чонари кадь, ныль пыд вылаз потэ кӧшкемыт вир ӟустариосын биням ӟызырна. Куалекъяса учке со сьӧд синъёсыныз Камит шоры. Со бордысь кӧшкемыт Аждага зын вӧлдӥське…

– Тон малпаськод, мон тыныд Арсавыл музъемам та бызараостэ каръяськытыны лэзё? – лек ӟазыртэ арсавыл туно. – Потэ ӝоггес татчы,  тыл ӵашъемлэсь азьвыл! – кеське со шакаля гурезьёс пала.

Чырсам борддор сьӧрысь шуак кышкаса пото куинь мумы арланъёс.

– Али ик кошке отчы, кытысь лыктӥды! – чурыт вера Камит.

Гондыр тусъем арланъёс ваньзы дыртыса кошко бызара гуазы, соос сьӧры чонари кадь дыртыса кошке ӟызырназы, соос сьӧры шуак сэрттӥсько ӵырсам шакаля гурезьёс но шакаляен-шакаляен, жильы кадь, кошко гутёе. Берпуметӥез но шакаля храмчилэн чиньы вискысьтыз ышкалтӥськыса, соос сьӧры лобӟе, актыгак кошко бушам тэркыен горшокъёс но таро картаос, бызара гу гинэ мунчо берпал кадь адӟиськыса улэ…

– Табере, «храмчи», тынад черодэд, бырйы, яке отчы тэтчиськод, «Зарни Мумдэ» утчаны, яке кылиськод, ожгарчи кадь, кулыны… – меӵак «храмчи» шоры учкиз Камит. – Тон тодӥськод, котькудӥз, кин сапта  «эксэй вирез», со ми палан уг улы ни…

– Котьма монэн луиз ке но, мон со гуэ уг тэтчы… Уг поты мынам зын какыос пӧлы выеме… Мае утчай, сое ик мон шедьтӥ, шӧдске. Мон понна али югдуре кыкетӥез сюрес ӟечгес… – лабыртэ «храмчи».

– Умой со, куке валаны кутскиськод, кытын мар возьма, – жаляса учке со шоры Камит. – Иське, вӧсяськы, «храмчи», ӟечез пушкад ӵогиськыку… Улон та улонэн уг быры… Капчияты лулдэ сопал дуннее пырон азяд… Соку улӥ мертэтад но усьтӥськоз выллане кыскись югыт…

Нош ик чилектэ инбам, ӵашйыса тыл пазьгиське бызара гурезь бервылъёстӥ но шиетыса ик сузя гурезь улысь гутёез. Кисьтыса зорыны кутске, Шунды ке но инбамын тылсия. Вань зор ву ыж-така бамалъёсты миськыса, жильыртыса ик кошке гурезь улысь гутёе. Берпуметӥ кошкись тудвуэн гутё но ворсаське. Со чырсам гурезьёс интые котыр кылдо ческыт зыно арча-сусыпуос…

– Сусыпуос?.. – куалектэ валтӥсь «храмчи».

– Исуслэн пуосыз! – гудыртэм кадь вера Камит. – Кинлэн пельыз вань, со кылоз. Уте на милемды сусыпу шаермы. Арсавыл со сусыпу шаер. Арса но, Арча, Вортча но сусыпу шуэмез верало – утись пуштросэз возё, Иисус кадь ик.

– Мынам уг лу оскеме, Зарни Мумды тӥляд сыӵе шуыса… Со ӧй быгатысал таӵе бызара шакаляосын пумитаны… Мар вал со, кытын тӥляд ачиз Зарни Мумды? Малы солэн сюрес азяз таӵеез но луыны быгатэ?.. – аслыз валэктон утчаса юа «храмчи».

– Зарни Мум доры чылкыт малпанъёсын гинэ вуыны луэ… Нош тон вор кадь, кулэм киен лыктӥд. Кыӵе кужымъёсты тон тулкымъяськод, сыӵеез ик тон доры лыктэ… Сыӵеез ик усьтӥське… Сопалаз дуннеын но тонэ сыӵеез ик возьмалоз… Сьӧд со котьку сьӧд, нош югыт котьку югыт! – валэктэ Камит

– Лэзь монэ кошкыны… – куре «храмчи», аслэсьтыз пумзэ шӧдыса.

– Кытчы тон кошкод?.. – серектэ Камит. – Тыныд нокытчы кошкыны. Тӥляд Римысь папа-понтифик-императорды тӥлесьтыд орденъёстэс ас котырысьтыз палэнтӥз. Со табере тон кадь оккултизм вотэсэн герӟаськем рыцарьёссэ тылэн сутэ. Шӧдске, тон со сярысь уд тодӥськы?.. Табере пападэс иезуит ожгарчиос возьмало.

– Кыӵе иезуит ожгарчиос? – тунсыкъяське валтӥсь «храмчи»

– Игнатий Лойолалэн дышетскисьёсыз, кудъёсыз асьсэды «иезуитъёс», Иисуслэн ожгарчиосыз, шуо.

– Игнатий Лойолалэн? – кӧсам куараеныз юа «храмчи».

– Ӵапак тынад вормонтэм тушмонэдлэн, кудӥз ноку уз тупа тон кадь сьӧдэктэм лулъёсын. Чылкытатоз со табере пуксён палась орденъёстэс… Но ужзэ пумозяз лэсьтыны папа солы эрик уз сёты… Сое но ас улаз паньгатоз… Чылкыт малпанъёссэс вотэсъёсын ӝокатозы. «Сьӧдъёс» уз сётэ ӟечез пала вамыштыны… Соосты но «сьӧдъёс» пала ужатозы…

Та ивор ӵашъем кадь гудыртӥз валтӥсь «храмчилэн» йырвизь сэрегъёсаз. Уг вала со мар шуыны. Солэн азьвыл кужымыз быдэсак шальтраз. Визьнод курыса кадь со учке Лойолалэн вормонэз сярысь ивортӥсь Камит шоры.

– Но тон монэ утид ук со гуэ сюронлэсь… Быдтон понна утид шат? – мар карыны ёрмыса юа «храмчи».

– Тон малпаськод, мон тонэ утьыны берытски?… – паймыса учке Камит кӧсэктэм «храмчи» шоры. – Мон ути аслэсьтым ошкуйчиосме, кудъёсыз тӥ сьӧры отчы гуэ малпаськытэк тэтчысалзы. Нош Аждагалэн кыедэн тырмем гутё зыныз, милесьтым вашкала батырмес кадь ик, ваньзэсты ошкуйчиосмес погыртысал… Сиысалзы ке но соос та шакаляосты… Собере Аждага соосты сяласа улӟытысал но дуннемес аздырыны татчы поттысал.  Шумпоты, улонэд тынад Утись шаерын йылпумъяськиз шуыса. Бырйы ожчилэсь кулонзэ! Соку тынад сояз дуннеын пичи ке но осконэд кылёз вылӥ мерттэтэ ӝутскыны… Но со понна уно ӧпкелёно луоз на… Ярам, мед удалтоз ӝутӥськон сюресад!

Камит кыскиз серметсэ но кионэз солэн туж капчиен сусыпуос сьӧры тэтчиз. Гурезь вылын возьмаса улэ вал сое Явуш. Соос кыкназы ик туж дыртыса кошкизы Япанчалэн кошкем бертӥз…

Ӧз ик малпа вал таӵезэ Аждага… Но мар кароз со, кызьы луиз озьы луиз ни… Аждага ноку уг куректы, ӧвӧл солэн лул-сюлэмыз. Юхалы берытсконзэ ӧй возьмасал ке, ачиз со татын ваньзэ мукет сямен берыктысал… Но, котьма ке но, уг луы солэн нокызьы но югытъёслэсь амалъёссэс уже кутэмез, одно ик кытын ке маиз ке шальтра, тэшка… Нош Зарни Мум сярысь нокыӵе куректонэз солэн ӧвӧл. Солэн йырвиымаз одӥг кисыриез но ӧз вырӟы. Со Зарни Мум ласянь нокинэн ӧз вераськы. Ма, «эксэй ныл» вольтчыса кошкемлы но со сокем ӧз куректы ни. «Сьӧдъёс» уг тодо куректонэз, соослы со тэшкыли кадь гинэ йӧтэ… Алияз тэшкыли ке басьтӥз, мукетъят удалтоз! Нуллоз ай Шурали солы уно мумы мугоръёсты!

«Храмчи» валаз, мукетыз сюрес ӧз кыльы солы. Со куштӥз ож тирлыкъёссэ, усиз пыдес вылаз но, храмчиослэсь мозмытӥсь палашсэз возьмаса, йырзэ ошиз. Озьы ик, синвуаськыса, пыдес вылазы султӥзы мукетъёсыз но «храмчиос»… Асьсэ понна вӧсьёссэс лыдӟо…

Ошкуйчиос туж капчи быдэстӥзы ужёссэс. Вал марлэсь куаныны кион-такаослы. Ваньмыз ӝог ортчиз. Но ачиз Арсавыл но итӥськиз кадь та уж борды. «Храмчиослэн» шӧй мугоръёссы шӧдтэк шорысь ышизы… Озьыен, соос кыктосъёс вал, кудъёссэ, Усман тата верамъя, соос кылдыто «пеймытын кӧлӥсь анай сюйлэсь». Но кыктосъёсты быдтон, со сыӵе ик, зэмос ожлудын кадь ик, вормон. Угось кыктос кылдытонлы туж бадӟым кужым кошке… Нош куке кыктос мугор вӧсь луыны, я  ранӟыны, я бырыны шеде, соку зэмос мугор вылэ но со яраос «пуало».

Пересь ошкуйчиос чик но та югдурлы ӧз пайме. Соос таӵе учыръёсты уно адӟемын. Мар но син азьтӥзы ӧз ортчы. Вылаз ик соослэн ноку но паймыса сылон дырзы уг лу. Ошкуйчиослэн дырзы, кужмо тӧлэн ву вылтӥ ортчись ошкуйзы кадь, ӝог бызе, ваньмыз соос азьын ӝог вошъяське. Соин соос ноку но уг паймо, кыӵе дуннее сюремзэс, кыӵе дуннетӥ ортчемзэс, соослэн котьку асьсэлэн меретсы, бельгызы, соос одно быдэстыны кулэ азязы пуктэм ужпумзэс, кам сюресъёсты но арсавылэз чылкыт возёно, нокыӵе кырсь лулъёс соосты медаз сапталэ. Нош али ортчем учыр шоры учкыса, огзэ соос али юн валало, татазылэн пиез, Камит, соосты огпол гинэ уз паймыты на.

– Камит батыр табере Арсавыл туно! – кеське кырныж зӧк пужымез вылысен. – Сое бырйиз ачиз Кизили Пурт, со табере Арсавыл тата. Нош Япанчаен Явуш солэн Кизили Пурт агайёсыз. Нош тӥледлы Ӟумъя батырлы юртыны мыноно! Кылиз на «храмчиослэн» эшшо одӥг кык уллёзы! Сооссэ но быдтоно! Нокудзэс эксэй вирез кисьтӥсьёсты музъем вылэ кельтоно ӧвӧл!

– Кытын соос? Кытчы мыноно? – тодмо кырныжезлэсь ӟазырес куараеныз юа Ӟапык. Куараез солэн кужмо шуккиське. – Нёжто со мынам аслам куарае? – аслаз пельёсызлы уг оскы ошкуйчи.

– Ма, кинлэн-о собере? – пайме кырныж.– Иське, Камит тата тынэсьтыд но со векчиям куарадэ бурмытӥз?

Ошкуйчиоз серекъяло. Кион-такаос но пальышало. Кельшо соослы таӵе воштӥськонъёс.

– Кошким ӝоггес мон сьӧры! Бӧрысь серекъялоды! – дыртытэ кырныж. – Ӟумъя батыр огназ ожмаське!

Кырныж сусыпуос пала лобӟе. Со сьӧры дыртыса кошко ошкуйчиос.

24-тӥ люкет. Усман тата, ожгарчи нылъёс но Никон

Усман тата мур малпаськонэ усиз. Кызьы валано та пусъёсты? Адямиос туж пичиесь кылёзы, валъёс шыръёслы берытскозы шуыса, солэн кылэмез вань. Озьы верасько вал пересь туноос. Нош Быдӟым Ошез, Быдӟым Перунэз, таӵе бызара воштоз шуыса, со ноку ӧз малпаськы. Нёжто Арсавыллэн пумыз вуэ?.. Но ӧз лэзе Усман татаез пумозяз малпаськыны.

Усман таталэсь вань саклыксэ басьтыса, Камитлэн но ошкуйчислэн кошкем бертӥзы, сусыпуос вӧзтӥ потӥзы тӧдьы-тӧдьы валъёсын Маскара карысь ожгарчи нылъёс. Каллен соос ортчизы со интытӥ, кытын али гинэ ошкуйчиос «храмчиосты» радлазы. Ожгарчи нылъёс азьын ваньзылэсь висъяськыса мыно вал инмар тусбуё кышномуртъёс, мукет сямен вераны уг лу – зэмзэ но инбамысь васькемъёс кадь валъёссы вылын пуко, оло вал-адямиос соосты кожалод, сыӵе ӟеч пуко соос валъёссы вылын. Валъёссы но соослэн адымась валъёс, шӧдске кузон базарысь аримапаослэсь басьтӥзы. Урал котырын лыдъяны луонтэм зарни кладъёсты возьмась палсинмо аримапаос гинэ  асьме пала таӵе чебер валъёсты вутто. Соос гинэ тодо зэмос валъёсты будэтыны. Юнме шат Буту хан но ӵапак соосты ик куриз Зарни Валъёссэ зарнилэсь кисьтыны. Таӵеесь ик вал дыр Су анасылэн но кышномурт ожгарчиосыз, Урал батырмы соосын пумиськыку. Троссэ вунэтӥз ни Урал батырлэн калыкез. Ассэ Урал батырез но туннэ кин гинэ тодэ меда?.. Нош та калмез кышномуртъёс сярысь коть трос-а бон асьмеос тодӥськомы? Кытысь соослэн Эбга нылзы вордӥськиз? Калмезъёс Су анасылэн выжыосыз ке но луо, трос на отын пеймыт интыосыз. Кылсярысь, малы соос Су анасы дорысь кошкыса, калмез выжыез кылдытӥзы?.. Номыр соос та сярысь уг верало. Соослэн мадьёссы чингизит выжыысь ханлэн пиез бордысен гинэ кутске, кудӥз сокем зол яратӥз калмез нылэз. Нош калмез ныл ӧз кошкы со сьӧры, ачиз но хан пи кышказ сое ас сьӧраз басьтыны. Малы ке шуоно солэн хан атаез шӧдтэк шорысь кулӥз, сое мукетыз чингизит воштӥз. Соин сэрен хан пиез но курултае ӧтизы. Нош хан воштӥськыку, мукет выжыысь хан пиослы улэп кыльыны туж ӧжыт учыре гинэ удалтэ. Соосты сюмысэн ӝокато. Малы сюмысэн – чингизит вирзэс музъем вылэ кисьтонтэм понна… Озьы калмезъёс дорын атайтэк вордӥськиз Эбга, соослэн яратоно эксэй нылзы. Али ке но котькуд аре калмезъёс Чупчи дуре, Эбгакаре, ветло, сое буре вайыны. Туж бадӟым сьӧлыксы ваткаослэн Эбга азьын… Шуо, ваткаос Эбгаез юнме шорысь туж зол кырсёмытӥзы но меӵ ярдурысен Чупчи дурысь изъёс вылэ куштӥзы. Али но Эбга отын потылэ, пе. Изъёс вылэ пуксьыса йырсиоссэ сына, бӧрдэ ваткаосты жаляса. Нош адямиосты ке адӟе, шуак вуэ зыме… Усман тата ачиз но нокызьы уг быгаты та калмез ожгарчи нылъёсын кусыпсэ тупатыны. Зэмзэ ке кусыпъёссы соослэн вань, егит кикыпиослэн но егит калмез кикынылъёслэн… Но со кусыпъёс кема уг кыстӥсько, нылпи ке шеде, калмез нылъёс пыдзэс но уг лёго ни Кикынюлэскы. Вунэто кикыпизэс но… Нош кикыпиос, ваньзэ тае валаса но, ӵемысь буйганы уг быгато. Куд-огез соос доры кошке, Маскара кар вӧзазы сылӥсь Арчикаре, кытын калмезъёслэн воргоронъёссы  асьсэ коже уло. Сокем ик асьсэ коже, конечно, ӧвӧл, соос пи нылпиосты будэто. Куд-ог дыръя кышно шуонэнызы пумиськыло, соосыз куное ке вуыло. Ӵапак со пумиськонъёс понна ик ваньзэ чидаса  уло калмез воргоронъёс.

Та калмез ожгарчи кышноослэн Кикыкуш сьӧрысь Маскара карзы туж кемалась кылдэмын. Сыӵе «маскаръёс» ватка вылын одӥг гинэ ӧвӧл. Паськыт соос вӧлскемын арсавыл музъем вылын. Тужгес но трос соос Кильмезь но Чупчи котырын. Нош Маскара соослэн кивалтӥсь карзы. Татын возиське соослэн вань вужкатъёссы но дунне валанзы. Усман тата егитгес дыръя та карез но со котырысь музъемез ваткаос нырысь-валысь Мескар шуо вал. Трос споръяськонъёс вал ваткаос но калмез ожгарчи кышноос вискын. Ваткаос нокызьы но уг валало вал соослэсь улон сямъёссэс.

– Кызьы кышномуртъёс воргоронъёсын кивалтозы? – паймо вал ваткаос. – Нош воргоронъёс нуныосты будэто, сиён пӧрало, нуны штань мисько?..

Ма, ачиз но Усман тата паймылӥз, нокызьы со тае уг вала вал. Кикыпиос, кинъёс кышнооссылэсь мӧзмыса кошкизы Арчикаре, озьы ик Усман таталы номыр уг верало вал калмез кышноослэн улон-вылонзы сярысь.

– Но малы тон соос доры кошкид, астэ ляльчилы берыктӥд? – паймыса юалляськиз кышнооссы доры кошкем кикыпиослэсь Усман тата.

– Яратӥсько… – вакчияк шуо вал кикыпиос.

– Но ведь тынад кышноед Мескарын улэ, ачид нимаз Арчикарын нылпиосыныд гинэ. Кызьы озьы улыны луоз?

– Со понна солэн куд-ог дыръя мон доры куное лыктэмез вань дуннеме мынэсьтым югдытэ… Мон сыӵе дыре вылӥ дуннеез адӟисько… Нош пиосы, кудъёсыз солэсь ымныр тусъёссэс нулло, мыным кужым сёто ваньзэ чиданы, пумтэм яратыны! – куаныса ик усьтӥськиз солы одӥгез кыкыпи.

Номыр Усман таталы та вераськонъёс ӧз валэктэ. Сое валан понна, солы аслыз улоно вал сыӵе ик улонэн. Кикыпиос кадь гажан пыӵатоно вал нылкышно инмаръёслы, будэтоно вал нылпиосты, пуконо вал кӧкы вӧзын. Утялтоно вал коркадэ, пӧзьтоно вал сиён, шудоно вал нылпиосын, керттӥськоно, куиськоно, дӥськут дасяно…

Сокем ӧй вожомысал, дыр, Усман тата, та калмез ожгарчи кышноослы. Мед улысалзы озьы, кызьы мылзы потэ. Но соос асьсэ кие басьтыны кутскизы вузаськон сюресъёсты. Ӧйтӧд маин соос озьы вузчиосты асьсэ борды кыскизы? Валамон, воргоронъёс котьку кышномурт доры кыстӥсько, соиз инкуазьлэнэз, сойзэ уд вошты. Но татын мукет пӧртмась кужымъёс но, шӧдске, ужало. Озьы малпаськиз ас понназ Усман тата. Со, конечно, уг тоды вал, кызьы ужа нылкышно магия сое энераны быгатӥсьёс пӧлын. Со уг тоды вал, та кышномурт ожгарчилы кышномурт инмарен сётэм кужым калмез кышноос доры Су анасы дорысен ик лыктэмын шуыса. Ӵапак та ожгарчи кышномуртъёслэсь магизэс тодымтэеныз сэрен, сыӵе пеймыт дуннее кылеменыз, Усман тата нокызьы уг вала вал, малы кыдёкысь вузчиос шумпотыса ик нуо вал вузъёссэс кышноос доры. Озьы ик со пайме вал, малы куд-ог ваткаос но кусыпъёссэс тупатыны кутскизы калмез кышноосын. Вылаз ик Кузонын но соос Усман таталэсь ӟечгес ужазы. Усман таталэсь Кузонысь быдэс ар дасям адямиоссэс соос уй куспын асьсэ пала берыктыны быгато вал. Тужгес но Сююмбике но Гаухаршад ханбикаос Кузон эксэйлыкен кивалтон вакытэ, куке калмез ожгарчи нылъёс возьманы кутскизы та ханбикаосты… Усман тата вожомеменыз уг тоды ни вал кытчы пырыны. Ваньмыз солэн куашканы кутскиз. Ярам коть Муско но Крым котырысь адямиосыз солэн трос вал. Отчыозь ик ӧз вуэ на калмез кышноос. Но озьы ке но трос пыдъёс пуктылӥзы соос Усман таталы. Конечно, юри соос пыдъёссэс ӧз пуктылэ. Но пӧрмылӥз озьы, ялан соос ог вить-дас вамышлы азьпалан мынӥзы. Котькытын та кышноосты яратӥзы: кузон эксэйёс котырын, несториан черкъёсын, кузон базарын. Араб вузчиос берло дыре  кылэм но уг каро вал Усман татаез, шонерен мыно вал калмез ожгарчи кышноос доры…

– Соос веднаськыса озьы кыско… Мукетыз татын ӧвӧл… – огпол кема малпаськемез бере кырыж малпанзэ гомӟытӥз арсавыл туно.

Мар карыны ёрмыса, Усман тата ассэ интыысьтыз вырӟытӥз но мынӥз Кузонэ, тодмо зэрпалъёсыз доры. Пыриз несториан черказы. Вераз аслэсьтыз сюлэмшугъяськонзэ.

– Кыӵе веднаськон, тон мар? – серекъяз сое Никон зэрпал. – Бере тон кылемын, Усман тата… Пеймыт тэльын пукиськод, отысь ик тынад кайгуосыд…

– Валэкты… – куриз Усман тата.

– Тон тодӥськод-а, мар со метафизика, мар со логика, мар со политика, мар со математика, мар со ӟечлык, мар со шудбур? – пальпотыса юаз солэсь Никон.

– Нокудзы сярысь кылэме ӧвӧл… – Никонлэсь мар юамзэ ик ӧз вала Усман тата.

– Вот ӵапак со бордын ик тынад кайгуэд… – валэктӥз солы кузон зэрпал. – Нош калмез ожгарчи кышноосыд тынад вань несториан черкъёсты ортчизы, Аристотелез но Платонэз тодон понна. Соослэн нылъёссы, мон дорын сяна, дышетскизы Багдадын, Хорезмын, ветлӥзы Афинае, кытын улӥз Аристотель.

– Мон верамысьтыд номырзэ уг валаськы… – ӵыжектӥз Усман тата.

– Али уд валаськы… – пальыштӥз Никон зэрпал. – Нош мон доры ог кык ар ветлӥд ке, пукид ке мынам дышетскисьёсыным ӵош, ваньзэ валалод.

– Нош тон монэ дышетод-а, мар-а? – пайме Усман тата.

– Дышетон – со мынам яратоно уже… – пальпотэ Никон. – Только тон, кышноостэ вормемед ке потэ, астэ гинэ эн дышеты, вай мон доры ог витьтонзэ ке но визьмо пиостэ. Калмез кышноосыд пӧлын сыӵе дышетскемъёс куамынлэсь тросгес ни… 

– Соку мон сюзэ вутто! – чурыт вера Усман тата.

– Сюзэ ке, сюзэ… Сю ӟеч лыдпус… Дышетӥсьёсты шедьтомы… – пальпотэ Никон.

– Ипполита но тон дорын дышетскиз-а? – ӧжытак возьдаськыса юа Усман тата.

– Ипполита но, Зорина но, вань кивалтӥсь кышнооссы Аристотелез тодо, соин ик соос Кузон эксэйёс котырын, Сююмбике дорысь потатэк уло… – валэктэ Никон. – Соос кылдытъяло сиротаослы коркаос, усьто музейёс, дышетскон интыос, театръёс, пӧртэм наукаослы калыкъёсты дышето.

– Ку тон доры лыктоно? – дышетсконлэсь кулэзэ чурыт валаса юаз Усман тата.

– Выль толэзе лыктод ог вить дасо ке но пиосыныд… Сюзэ ке шедьтӥд, сюзэ ик вай. Нош нырысь тани та книгаосты араб кылысь ас кылад берыктод… Аслыд но, вань дышетскисьёсыдлы но… – книгаоссэ сётыса ас манереныз пальпотӥз Никон. – Дышето мон тонэ, кызьы ватка книгаостэ лэсьтыны…

Зэмзэ ке Никон кемалась возьма ни вал Усман татаен та пумысен вераськонэз. Нош тата ачиз лыктыны кулэ вал… Сотэк со дышетскыны ӧй кутскысал. Нош Ипполиталэн Кузон ужъёс борды пыриськемез Никонлы аслыз но уггес кельшы. Котькытын эсэпез луыны кулэ. Но кызьы луиз, озьы луиз, сотэк ӧй вуысал Усман тата. Никон кемалась адӟе, марлы кулэ дышетыны егитъёсты. Солы уг кельшы Крым палъёслэн Кузонэз пожамзы. Соос азьпала уг нуо, берлане, пень сюресэ кыско – пыдъёссы сьӧрлань вамышъя асьсэлэн вашкала сямъёссы пала. Нош Никон вань улонзэ егитъёсты дышетӥз, ӟеч ужъёсты лэсьтыса, атайёссылэсь азьпала кошкыны. Солэн дышетэмезъя Кузонын солэн дышетскисьёсыз усьтылӥзы суредаськон, скульптура вӧлон мастерскойёс, кырӟан кружокъёс, эктонэз валанъя школаос, дышетӥзы куанер нылпиосты лыдӟиськыны, гожъяськыны, выль кылъёсты тодыны. Поттылӥзы пӧртэм удысъёсъя дышетскон книгаос, географиез дышетон картаос, кылэз дышетон кыл бичетъёс но уно мукетыз. Никон аслаз эшъёсыныз, дышетскисьёсыныз вань дуннеез син азяз возиз. Соос тодо вал, кыӵе университетъёс ужазы шунды пуксён палась Доминиклэн орденъёсаз, марлы дышетӥзы Францисколэн орденъёсыз, кыӵе мурдалаем тодонъёс сётӥзы арабъёслэн медресэоссы, мектэбъёссы. Маин соос шунды пуксён палъёслэсь тодон ласянь висъяськизы. Кыӵе муген кылдӥзы несторианъёс, арианъёс, катаръёс, католикъёс, протестантъёс но выль иезуит орденъёс. Кызьы но кыӵе осконэн улэ Византия, кызьы но кыӵе осконэн улэ католикъёслэн кузё-императорзы Ватикан пуконысь Папа-понтифик, марлы дышето мусульман минаретъёсын, кытысь, кыӵе черкысь потӥзы мусульманъёс но уно мукет тодонъёсты. Кузонэ дугдытэк ветлӥзы перс, грек, араб тодосчиос… Шумпотыса кылзӥз соосты Никон. Угось соос одно ик вуылӥзы выль календарья ке учконо асьме вапумлэсь азьвыл V даурын улэм Аристотель но Платон сярысь вераськонэ. Зэмзэ ке солэн та ласянь паймонэз ӧй вал. Иракысь, Иранысь, Сириысь несториан черкъёсы асьме вапумлэн V даураз ик вуиз ни X даурлы вунэтэм Аристотель. Несторлэн черкъёсыз ӵемысь пыкъясько вал Аристотельлэн дышетонъёсыз вылэ. Со понна ик соосты Куинетӥ вселенской соборын, кудӥз ортчиз Христослэн анаезлэн берло аръёссэ улэм Эфес караз, ересь каризы. Но несторианъёс ӧз быре, Аристотелез но ӧз куштэ, ӵапак соос пыртӥ IX дауре вуиз со арабъёс доры, кудъёсыз Багдадын кылдытӥзы дышетскон юртъёс, кытын вань Аристотелез сирий кылысь берыктӥзы араб кылэ. Никонлэн Багдадын дышетскисьёсызлэн верамзыя Аристотелез но Платонэз лыдӟыса арабъёс туж зол воштӥськизы… Соин ик аслаз дышетскон юртъёсаз но Никон лыдӟыны кутскиз Аристотельлэсь но Платонлэсь ужъёссэс.  Тужгес но яратӥз со дышетыны арсавыл нылпиосты, малы ке шуоно, Крымомем кузон бигеръёсын ӵошатонъя, соос капчигес сётскизы Аристотельлэн малпанъёсызлы. Озьы Албугоын ужась несториан школае со доры сюриз Камит. Собере Камит дышетскыса потӥз Мамадышысь мектэбез, Маскараысь но Пичи Арчикарысь кюттабъёсты, Кузонысь медресэез, латин кылъёсты дышетӥсь юртэз но мукет. Нош кузон вузчиосты но ожгарчиосты дышетыкуз Никон доры вуизы Явуш но Япанча. Узыбей но, Ипполиталэн но Сююмбикелэн нылъёсыныз ӵош, куаныса ик кылзӥзы Никон зэрпалэз.

Усман тата куке кылӥз, Камит, Япанча, Явуш Никон дорын дышетскизы ни шуыса, со чик но ӧз паймы. Со тодэ вал, Кизили Пурт ачиз соосты эскере, ачиз дася. Но Усман тата ачиз но куаныса ик дышетскиз. Со паймыса кылзӥз, ачиз Аристотель эмъясь Асклепий инмарлэн выжыысьтыз вордскемын шуыса. Нош Александр Македонский Аристотельлэн дышетскисез вал шуыса тодон но сое воксё абдыратӥз… Табере со аслэсьтыз кикыпиоссэ шумпотыса дышетэ, кызьы валаны государствоез, политикаез, шудбурез, пайдаез, инмарез но уно мукет тодон-валанъёсты.

Соин ик со вань сюлэмыныз шумпотыса учке борӟемен вал вылын пукись, дуно изъёсын чебермам дӥськутэн дӥсяськем калмез кышноосты. Эксэй кышноос кадь мыно соос вож-вож ненег жуй вылтӥ.

– Юнме, ӵужапай, асьмеос со Усман татаез кикыпиосыныз ӵош татчы Маскара кармы вӧзы лэзимы… – шуэ мӧйыгес нылмурт. – Саптазы вань нюлэсмес…

– Ӧйтод, Зорина. Сое ӧм лэзьысалмы ке, кинъёс утьысалзы Зарни Мумез утчасьёслэсь?.. Трос  табере тапала лыкто… Трос юрттӥз ни асьмелы Усман тата… – валэктэ солы Ипполита ӵужапаез.

– Тон, ӵужапай, малпанме мынэсьтым уд вошты… – ӧжытак небытгес луыны турттыса вера Зорина. – Зарни Мум ачиз ассэ уте, нокыӵе воргоронъёс со понна кулэ ӧвӧл. Асьмелы нырысь ик Зарни Мумез кыдёкегес ватоно! Оло уйпала сое нуоно? Шуом, Кильмезь пала. Мед кылёзы воргоронъёс Кузонзы, Крымзы но Мускозы вӧзы…

– Оло Уйпала, оло Шундыпотон пала… Созэ ачиз Зарни Мум вералоз… Тон-а сое татчы ваид? Тон-а сое утиськод-возиськод? Эн басьты ас вылад сое, мае ачид но уд валаськы… Кошким Усман доры, тодом, мар адямиос тапала вуизы? Кызьы соос «Паньгамтӥ» пырыны быгатӥзы?..

– Со доры ветлэмлэсь ноку умоез ӧй вал на. Кӧня мон тодӥсько, нылъёсмес гинэ ыштӥськомы. Я огез синмаське кикыпилы, я мукетыз. Собере кӧто луо. Нылпи ваё.

– Эх, Зорина! Нылпи но вайыны кулэ кышномуртлы. Сотэк со тон кадь лек луэ. Инкуазь со инкуазь, солэн нылкышнолы нуны вордыны сётэм кужымез асьмеды воргоронлэсь кык пол шузигес каре, шӧдонъёсмес но мылкыдмес азьпала поттэ. Энераны кулэ со кужымез аслэсьтыд валдэ кадь ик. Ваньмылэн асьмелэн карнан лыосмы вань, со та  мугорлы гинэ уг ужа, лул мугормес но мертаса возе. Малпанъёсмы соку ик Карна апаймы доры вуэ. Жаляно медаз лу солэн кулэм бере вордӥськон жильыосты чаклась Желя сузэрез азьын, кушты ни со быждэ кенжали сямен, выльзэ будэты. Озьы дышетэ вал асьмеды вылӥ дуннеосысь Тара. Бызем кышномуртлы та пумысен капчигес, со выль кен дыръяз ик, кеносэ пырыса, кенжали кадь, вуж быжзэ куштэ, выль быж будэтэ. Нош асьмелы, Тара верамъя, троссэ воргоронлэсь дышетскыны кулэ, со капчигес ӝутске вылӥ дуннеосы. Соинтэк-а кышномуртлы карнан сётӥзы?.. Котьку карнанэз тодэ возён понна. Воргоронлы сое ӧз сётэ ук…

– Тон нош ик Ведаос доры вуттӥськод…

– Монэ озьы дышетӥзы апайёсмы… Пичи дырысеным ик Ведаосысь выжыкылъёсты мадьыса но сэрттыса.

– Ныл ке вайизы, мон номыр ӧй шуысал. Нош соос ялан пи ваё ук. Пи нунызылэсь люкиськод ке, кошко нунызэс утчаны… Та гужем сизьымез кошкизы ни… «Паньгам» нёжалтӥ но кошкыны ӧз кышкалэ… «Паньгам» но соосты ӧз иса… Номыр луытэк вуизы картъёссы доры…

– «Паньгам» соосты ӧз иса кужмо яратэмзы понна. Зэмос яратон котькинэ уте. Номыр луытэк картъёссы доры бертӥзы ке, со урод-а, мар-а?

– Соослы умой, нош асьмелы мар умоез? Мукет нылъёслэн но озьы ик кошкемзы потоз…

– Кошкисез мед кошкоз. Кужмысь нокинэ уд куты. Шумпоты, сизьымез ик «кенжалилы пӧрмизы» шуыса, азьвыл быжзэс капчиен куштыса, выль быжъёссэс будэтӥзы. Нош асьме доры мукетъёсыз лыктозы, асьмелэнъёсыз нылъёсмы будозы…

– Тонэ, ӵужапай, уг лу таныны. Ярам. Ойдо ай нырысь тодом чаклась нылъёсмылэсь.

Кышномуртъёс валъёссэс нылмурт ожгарчиос пала берыктӥзы. Зэмзэ ке кышномуртъёс шуыны ым уг пыры таосты, ымныръёссы егит адӟисько, мугоръёссы но кужмоесь. Зэмос ожгарчиос. Пукыӵъёссы, палашъёссы, арбалетъёссы, шибодыоссы чик чеберманъёслы уг кельшо. Синъёссы но пельёссы сакесь! Ныл но нылмурт ласянь нокыӵе юанъёс уг кылдо. Ныл, нылмурт ожгарчи – кыӵе татын юан кылдоз? Асьме палан соос трос. Нош кышномурт ке шуоно, уно юан кылдэ. Кышномуртъёс гуртъёсын уло, картъёсын, нош таосыз уг валало, мар со гурт, мар со карт, мар со воргорон, соослэн визьзы но мукет. Кыр улон но гурт улон туж зол висъя кышномуртэз. Кин со кышномурт? Кышно?  Мар со «кыш»? «Кышномурт – валантэм мар ке…» – валэктэ удмурт визь. Туж валантэм мар ке. Егит нылмуртэз валалод, малы ке шуоно со егит. Со дуннеез тодыны тырше на. Нош кышномурт тодэ ни аслэсьтыззэ, кытчы нокыӵе визь уг сузьы…

Егит ожгарчи-чаклачи нылъёс веразы, кытысь «храмчиос» вуизы. Кызьы Узыбеез соос нуизы. Кызьы собере Узыбеез «храмчиос» киысь Япанча ишкалтыса кошкиз. Собере мар татын луиз, Камит вуэм бере, ыж-такаос но мадизы, кионъёс но. Оглом Ипполиталы уно малпаськоно луиз мае ке валан понна. Но со огзэ ӟеч валаз. Узыбеез татчы вайиз «кулэм ки», солэн «эксэй вирызлэсь» улӟыса. Кыӵе сыӵе «эксэй вирызлэсь»? Кытысь Узыбейлэн пушказ чингизит вир бызе, Эбгалэн кадь ик Джучилэн вирыз?.. Нош эшшо но кышкатӥз Ипполитаез кионъёслэн усьтэм иворзы. Усман тата куремъя, Узыбеез, пе, быдтыны туртто, сыӵе ужез, пе, быдэстыны Япанчалы косэмын. Нош Узыбеез, пе, ӵапак Япанча лушкаса кошкиз…

– Кошким ӝоггес Усман тата доры! – вакчияк шуиз Зорина.

– Кошким! – шуиз Ипполита но, ужпумлэсь кытчы кошкемзэ валаса.

Кышномуртъёс кытысь потӥзы, сопала ик кошкизы. Туж дыртыса кошкизы.

Усман тата валаз, табере соослэсь номыр ватыны уз лу. Ваньзэ верано луоз. Нош Усман таталэн табере номыр каремез уг лу дырез берыктон ласянь… Табере со, оло, Узыбей пумысен ас кылзэ мукет сямен верасал. Но кыл верамын. Со вакытэ со шонер верамын вал. Табере Инмар гинэ тодэ, кызьы луоз. Тодэ вал Усман тата, Япанча соку ик та уж борды басьтӥськоз шуыса. Япанча котьку верам кылзэ быдэстэ. Но кызьы кошкиз, озьы кошкиз ни, Кизили Пурт ачиз тодэ, мар кырыны, кыӵе дыр пушкы зымыны. Табере номыр пиослы пумит уд лэсьты, соос асьсэос  кулӥсьтэмъёс луизы, асьсэос адӟо, мар карыны, нош Усман таталы шӧрласа-шӧрласа учкыны гинэ кыле. Солы уга укыр трос ужано луиз Кизили Пуртсэ та егитъёслы бышкалтытозь, нош аслаз Кизили Пуртэн тодмостэм кык агай-вынъёсыз солэн кемалась вылӥ дуннеын шутэтско ни. Усман таталэн дуннеез соослэсь бадӟым вал, гумырыз но кузь, ваньзэ чаклано вал. Ма али но быттыннай ӧз на кошкы со, али но чакла, медаз вал янгышалэ, пиос. Мар меда малпаз та Япанча ногай?.. Кытчы со ышиз? Кызьы озьы быгатӥз адӟисьёслэсь но ышыны. Вылаз ик табере Камитэн Явуш но Япанча сьӧры уйиськыса кытчы ке ышизы… Нокинлэн соосты адӟемез уг луы. Кыӵе ке валантэм бус пӧлы ышизы. Кулэмъёс но уг адӟо, ваньзы соос нырысь шумпотӥзы вал, табере ваньзы кышкало… Усман тата валамъя, та нылпиосты табере вылӥ дуннеос гинэ чаклало…

25-тӥ люкет. Мур гопе усён, яке Япанчалэн пӧетэз

Кионъёс туж зол вортто. Дыр кусып соослы уг люкеты. Укыр кужмоесь соос. Ыж-така турын трос кужым сётэ. Нош Инвожо дыр уно дыре выжон сюресъёсты усьтэ. Япанча Узыбеез куинь пол киысьтыз воштӥз ни. Соиз кышкаса учке, мар карыны уг вала. Со уг но кесяськы. Пал киыныз кырмиськиз кионлэн изнэсэз борды. Син азьтӥз писпуос гинэ чульк-чальк ортчыло, номырзэ адӟемез уг лу, вылаз ик ваньзэ мыдлань со адӟе. Писпуос инбамысь уллань васько кадь. Япанча ялан сое улвайёслэсь уте. Нош мар улӥын лобӟе Узыбей учкыны ик кышка. Кема соос ворттӥзы ини. Тани Япанча гозы кульчозэ зӧк писпуэ зыргалтӥз. Мукет палзэ мукет писпуэ думиз но кионзэ писпу сьӧры ватскытӥз. Собере Узыбейлэн ымаз кышетсэ донгиз. Чалмыт, пе, ул, одӥг куараед но медаз поты. Мар возьмало, Узыбей нокызьы уг вала. Уг вала со, кин сое лушказ, кытчы нуэ, умой-а со адями яке урод-а? Но «храмчиос» киысь сое лушказ Шурали эксэй, нош берпуметӥез  киысь сое ишкалтӥз ожгарчи воргорон кыӵе ке лусьтро кион вылын. Тани ымнырзэ сьӧд кышетэн ватэм воргорон мае ке кылӥз кадь, кионзэ бадӟым писпу сьӧры ӝиптӥськытӥз. Кема ик дыр ӧз ортчы, кык кионъёс сьӧлтаськыса борӟемчиосынызы ӵош бадӟым тыэ пезьдӥзы… Туж бадӟым гопе соос лобӟизы. Туж кема улыса гинэ ву вылэз пазьгись куараоссы кылӥськизы. Ӵапак та шорын ваньмыз уриськиз. Япанча Узыбеез изён вирсэраз нюртыса умме уськытӥз. Ымысьтыз ӟустаризэ поттӥз но сое ас азяз пуктӥз. «Лобась сьӧд тыллэн» гопез вал со. Япанча та гопез умой тодэ, со Чудьяослэн музъем улэ ышылон котыразы пыре. Япанча пичи дырысеныз тодэ, та гоп дорысен со вань адӟисьёслы но ыше шуыса. Угось тапалась котькуд мувыръёс вылын та ёросын чудьяослэн пусъёссы кельтэмын, со пусъёс синучкон кадь вылӥ уй инбамез, инмысь кизилиосты, суредало. Мар соос возьмато, кызьы ужало, Япанча ачиз но троссэ уг вала. Но со ӟеч тодэ, пиослэн тапала тубемзы уз лу. Соослы та сьӧд тыысь потыны одӥг инты гинэ вань, со гоплэн мукет палдураз. Отӥ мукет палдуртӥз гинэ та бадӟым гопысь ярдуре тубыны луоз, тапал дуртӥз уд тубы. Нокызьы соос уз шедьтэ та усем интызэс но. Угось та инты сыӵе юн ватӥськись. Япанча ачиз но нырысь-валысь туж трос татчы йыромылӥз. Йыромытӥсь интыос татын котькуд вамышын, котькызьы мынӥд ке но, ялан гоплэн лазег палаз потод. Та инты юри калыкъёсты но пойшуръёсты улля гоплэн лазег палаз, та интыысь кошкыны косыса но кошкон сюрес возьматыса. Ты вылысен но со озьы ик, отысен тапал ярдуре тубон интыез ӧвӧл, котыр ласянь со меӵ но гылыт. Вылаз ик вуэз но мур. Макем со мур, Япанча ачиз но уг тоды. Кема вырозы Явушен Камит татысь потыны, Япанчалэсь нокыӵе пытьызэ уз ни шедьтэ. Пытьыос татын ӝог быро. Та интыысь инкуазь озьы ужа. Соин Япанча шонерен татчы ӧз лыкты, котыръёс лэсьтылыса, пытьызэ кельтыны тыршыса, пиосты возьмаса, дыртытэк лыктӥз. Солэн пыдберыз гоп доры вуытозь ышыны кулэ ӧй вал, пиос солэн пыдбертӥз мед уйиськозы шуыса. Ӵапак та шорын кемалась дырысен Япанчалэн пӧртэм ватосъёсыз, ож-тӥрлыкъёсыз, сикыӵъёсыз, гозыосыз трос интыосын кыллё. Тани со писпу гыркысь кыӵе ке песьтэрзэ поттӥз, сое усьтыса, пыдбер сьӧраз кӧня ке пызь кадь изэм турын пызьназ. Табере кулэ ӧвӧл ни пыдберзэ возьматыны. Уж лэсьтэмын, пиос гопысь тыын чапыллясько. Со понна ик юри соосты татчы вайиз Япанча, соосты татчы кельтыса, аслэсьтыз ужзэ гань-гань быдэстыны. Сьӧлтам гозызэ берен ас интыяз мукетаз гырке ватыса, со гоп пала пальпотыса учкиз но Кионэзлэсь серметсэ кыскиз… Таза ош быдӟа кион ваньзэ Япанчалэсь малпанъёссэ вала, солы кыл но кулэ ӧвӧл поттыны, со тодэ куд пала кошкыны косэ Япанча, шонер, кошконо отчы пыдло пала, кытын нокыӵе адӟисьёс уг адӟо, кытчы нокин Япанча сяна пырыны уз быгаты. Нош Кузонэ кошкон сюрес гоплэн нялмыт палаз луэ, отысь ярдурысен адӟисьёс ваньзэ адӟыны быгато, нош асьсэды соосты нокин уг адӟы, инты уг лэзьы ассэ адӟытыны. Соин ик Япанча уйиськись эшъёсызлэсь тапала лыктыкуз, гоплэн лазег палтӥз дыртытэк мынӥз, учкиз куд шоры вуизы ни со сьӧры уйиськись пиос. Озьы ик со шумпотыса учкиз, мар Камит дауртӥз, така бусые берытскыса. Кельшиз солы Камитлэн ужамез.  Но озьы ке но со ӟеч тодэ, Узыбей Камит кие вуиз ке, «сьӧдъёс» ӝог кырмалтозы соосты. Зарни Мумлэсь мусторзэ кемалась соос утчало, соос гинэ ӧвӧл, тросэз утчало. Камит уг тоды на со «сьӧдъёслэсь» ведӥн ожчиоссэс, соос туж пӧртэмесь, огъёсыз кышкытэсь, мукетъёсыз кескичесь, пӧртэм мугорлы пӧрмыны быгатӥсесь. Нош Япанча пичи дырысеныз соосын ожмаськыны дышемын. Тани та гоп дорын гинэ кӧнязэ со  Кизили Чачазэ утчасьёсты быдтӥз ни. Соин ик та интыын, кытын нокин нокинэ адӟыны уг быгаты, Япанча ассэ ӟеч шӧдэ, со татын аслаз яратоно дуннеяз. Татчы сое вуттӥз солэн кыкетӥ анаез, кудзэ чудьяос будэтӥзы… Со вань чудья пусъёсты лыдӟыны быгатэ, тодэ кызьы но ку чудьяослэсь быгатонзэс уже кутыны. Соин таӵе интыосты Япанча эшшо кыксэ тодэ на. Соосыз но Чудьёслэн кошкем интыоссы. Маин но кызьы соос кошкиллям, оло инсьӧр ӧсъёстӥ, оло эшшо кытӥ ке, яке эшшо кызьы ке, Япанча уг тоды. Созэ ӧз усьты кыкетӥ анаез. «Тодытэк капчигес улод…» – шуиз. Но Япанча тодэ, чудьёслэсь со кошкон интыоссэс нокинлэн адӟемез уг луы. Озьы ик со интые пырыса, ачид но тон адӟисьтэм но адӟиськисьтэм луиськод. Ӵапак, оло, сое валаса, асьсэлы ветлон син кельтыса, чудьёс юри тамгаос ошылӥллям. Котькуд тамга инмысь кизили шоры возьматэ, оло со ик тамга та интыез адӟиськисьтэм но каре, кин созэ тодэ, чудьяос укыр мудронэсь вылӥллям. Соин ик Япанча нокыӵе тамгаез уг иса, лыдӟе гинэ соосты аслыз та интыостӥ сюрес шедьтон понна, нош лыдӟе со тамгаосты кизили инбамъя… Нош кизили инбам шоры учкон понна, валамон ини уйин капчигес, нуназе соосты уд адӟы. Нош тамгаосты ӟечгес адӟон понна нуназе кулэ, уйин тон соосты уд адӟы. Соин та интыостӥ ортчон понна, тынад уй инбам картаед йырад яке кияд луыны кулэ, вылаз ик тамгаосты но лыдӟыны быгатоно, соку гинэ тон та адскисьтэм интыостӥ нуназе ветлыны быгатод. Нош уйин эн ик пыры та интыосы, уд ке адӟы синмыд тамгаосты. Япанча пичи дырысеныз уйин но нуназе татӥ капчиен ортчыны быгатэ…

Япанча та адскисьтэм интыезлэсь котькуд гурезьзэ, котькуд нюксэ, котькуд нёжзэ тодэ. Со вала ни, ку но кызьы соос кылдэмын. Ӵапак со гопысь, кытчы со кельтӥз эшъёссэ, куке соку «лобась ты» лобӟыса кошкем… Трос вылэм чудьёслэн сыӵе «лобась тыоссы», кин тодэ, оло вайтманъёссы, оло вайтмаръёссы. Но чудьёс малы ке со лобась карубъёссэс ты пыдэсъёсын возиллям… Оло вутэк соослы секыт вылэм, кин тодэ малызэ… Япанча пыдлогес но пыдлогес пыре, зэмзэ ке та туж шимес инты. Кӧня сьӧд ведӥнъёс татчы быризы. Я нюре нӧдыса, я меӵ ярысь усьыса. Адямиос но, пудоос но та интыосы пырыны кышкало. Япанча ачиз но кышка вал, но котькуд тамгалэн аслаз вӧсь кылэз вань, соосты ке тодӥськод, тон астэ татын ӟеч шӧдӥськод. Табере Япанчаез нокин уз адӟы, нокин солы ужзэ быдэстыны уз люкеты, чудьяослэн ышон интызы туж ӟеч уте… Узыбей изе, вирсэр шукетъёссэ ик солэсь Япанча шӧдэ. Соиз умойтэм, вирзэ солэсь та музъем вылэ кисьтыны уг яра… Чингисханлэн Ясаказ со ласянь туж чурыт гожтэмын… Нош Япача Карнаез гажа, юнме шат Усман тата солы оскиз та ужез, со чылкыт быдэстоз аслэсьтыз ужзэ… Куанэ Япанча, удалтӥз солы, табере нокин уг адӟы, уз но адӟы…

26-тӥ люкет. Мур гоплэн валантэм апспӧртэмлыкез

Камитэн Явуш мур гоп пыдсысь тыэ усемзы бере кема отысь потыны курадӟизы. Кионъёссэс но лыдэ басьтоно ке, ньыльназы ик котыр уяса ветлӥзы. Мырдэм шедьтӥзы мур тылэсь лазег ярдуро интызэ, нокытын сыӵе инты ӧй вал ни. Потэмзы бере, суч-суч котмем мугоренызы кионъёссы вылын гоп котыртӥ кык пол йыромыса-йыромыса котырскизы, нош нокызьы ӧз шедьтэ со интызэс, куд шорысен Япанча соосты мур гопе лобӟытӥз. Угось, котыр ласянь тӧдьы изо пиньёссэ галятыса, туж бадӟым зэрпаллэн тушо ымдурыз кадь, мыньпотыса учкиз соос шоры тодмотэм нюлэс. Котькуд паласен со одӥг тусо вал – нюко-гопо, пуштыр-пуштыр но ӝуё-ӝуё. Кионъёс но, туж зол утчазы ке но, нокыӵе пыдберъёсты ӧз шедьтэ. Сокем шӧдӥсь ныро пӧйшуръёс но ӧз быгатэ ни ке, кызьы пиос шедьтозы? Котькытын, музъем вылын но, писпуос вылын но, чебер-чебер ӝуй ӝужа. Нокыӵе пыдберъёс уг адӟисько. Жадьыса, соос дугдӥзы асьсэлэн ик гопысь потэм пытьызы доры… Япанчаез уйён мылкыдзы ӧз кысы ке но, пиослэн ымныръёсазы шулӟектэм бервылзы ӧз кыльы ни кадь. Угось огшоры адями но, ассэ курадӟытонтэм понна, котькуд кельшисьтэм учырысь но ӟеч палдурзэ адӟыны тырше. Нош пичи дырысенызы ик туно валанъёсты чамаласа будэм пиос юри дышетэмын таӵе югдуръёсысь капчиен потыны. Мар карод, лушказ Япанча Узыбеез но ышиз… Котькыӵе туно луид ке но, тон югудурез уд вошты… Вылаз ик кыкназылэн ик адӟыны быгатонзы соослэн малы ке ӵушиськиз. Уг валало пиос, мар соосын луиз.

Озьы ке но, самой кышкытэз югдур табере вормемын. Зарни Мум ганяк кариськиз, луоз. Табере уз возьматы ни нокыӵе кулэм ки Зарни Мум шоры. Ӧжытак буйгазы, дыр, учкыса улӥсь калыкъёс но. Узыбей «храмчиос» киысь ишкалтэмын. Аждага но эксэй нылтэк кылиз. Ошкуйчиос но со кие ӧз сюре. Али дыр понна со самой ӟечез. «Храмчиос» но чингизит вирез кисьтэмзы понна, быдтэмын… Котькыӵе кыктосъёс соос мед луозы, нырысетӥ мугоръёссы дорозь но шуккиськытэк уз кыльы ас кыктооссэс ыштон… Озьыен кужымзы кыкполлы пичияз… Вылаз ик соосын но воштӥськонъёс ортчизы, ӧз тэтче соос зынмем гутёе. Нош Камитэн вераськемзы бере воксё йыръёсэс ошыса пыдесъяськизы… чылкытан сюрессы азе…

Япанча гинэ витьымтэ шорысь таӵе тамаша югдур кылдытӥз. Ваньзы адӟизы, кызьы «храмчиос» киысь Шурали эксэй, нош Шурали эксэй киысь Япанча Узыбеез ишкалтӥз но сьӧраз уйиськись пиослэсь пегӟиз. Пиослэсь гинэ ӧвӧл, ваньзылэсь пегӟиз, нокинлэн табере сое адӟемез уг луы. Ваньзы адӟисьёс сюлмаськыны кутскизы Узыбей понна. Кин тодэ, мар со Япанчалэн йыраз, адӟизы ук, мар солы Усман тата вераз… Соин югдурез чакласьёслэн ваньзылэн табере тодэмзы потэ, кытчы ышиз Япанча, кытчы пыризы со сьӧры уйиськись пиос?.. Нокин уг вала, малы адӟисьёслэн но адӟемзы соосты уг лу. Ваньзы тэльмыро, оломар но малпасько. Тужгес но кулэмъёс, угось соос ваньзы та дуннеез адӟо. Нош татын воксё валантэм югдур, ӧвӧлак луизы ныльназы ик егитъёс. Кытчы соос пыризы, кыӵе тодмотэм гу соосты ньылӥз, нокудзы уг валало. Кулэмъёсты паймытӥз кыкетӥез но югдур, соослы котькуд адямиослэн улон сюресэз усьтӥське, нош та ньыль егитъёслэсь улон сюрессэс но соослэн нокызьы адӟемзы уг луы. Адӟизы ке, ваньзы буйгасалзы, нош татын кулэмъёслы но валантэм югдур замантӥськемын. Вылӥегес тубатъёсы тубем лулъёс гинэ валазы мар бордын ужпум: «Иське, та егитъёс огшоры лулъёс ӧвӧл… Соослэн улон сюресъёссы туж но туж вылӥ лулъёсын лэсьтэмын, нокинлы адӟыны луонтэм ватэмын…»

27-тӥ люкет. Сопал дуннеослэн сюлмаськонзы

Ӵапак таин сэрен Гульсиля но Эшмурза доры шуак васькизы кык вылӥ лулъёс… Соослэн эксэй дӥськутъёссы вылын вуюись буёло тылъёс ворекъяло. Ымныръёссы кыкназылэн ик сайкытэсь, синъёссы югытэсь, туж бадӟым лул кужым бордысьтызы пальккаське…

– Остэ Инмаре, ми мар ке уродзэ лэсьтыны вуимы? – кышкатскиз Гульсиля. Нош Эшмурза таӵе кужмо тылъёслэсь воксё шулӟектӥз, лулыз ик ӝоканы кутскиз…

– Буйгатскы, Эшмурза, чида кӧня ке, номыр тонэн уз лу, ми вылӥ мертэтъёсысь васькимы… – валэктӥз батыр мугоро воргорон. – Тынад улӥ дуннеосысь герӟетъёсыд озьы кекало, малы ке шуоно тон дышемын ӧвӧл на вылӥ мертэтъёсын пумиськыны, тон алигес гинэ лул дуннее вуэмын. Нош Гульсиляез ми пумитамы ни…

– Ӟечбуресь, Быдӟым Вактка Тӧро, дано мед луоды Быдӟым Донды батыр! Ӟечбуресь, Эбга… Мон нош ик мырдэм тӥледды тодмай… – куалектыса йыбырттэ Гульсиля.

– Ми тодӥськом, малы тон сыӵе кышкатскемын… – шунытак вера Эбга. – Тӥ юнме, Гульсиля, курадӟиськоды. Тӥляд кайгыремдылэсь номыр  уз воштӥськы… Вождэ эн вай, уг яра вал милемлы усьтыны, тон милям выжымы луиськод шуыса. Но табере тон ваньзэ ачид тодӥськод ни, малы уг яра вал, созэ но валаськод…

– Нош кытчы ышизы соос? Мар  табере луоз нылыным? – шуак юа Гульсиля.

– Созэ ми но ум тодӥське, туж вылӥ лулъёс гинэ тодо… – каньылак вера Эбга. – Карна апай ваньзэ чакласа улэ, эн кышкалэ…

– Тӥляд каль тазьы кайгыремды со, пыктос кадь, тӥледды гинэ ӧвӧл, вань выжыписпумес висьытэ… Соин тӥ доры васькимы… Югдур эшшо но уродгес медаз луы шуыса… – валатыны тырше Донды батыр. – Каль тӥляд курадӟемды Узыбей дорозь но шуккиське, сое но со писыратэ, улон сюрессэ  шугомытэ…

– Асьме эксэй выжымылы сотэк но капчи ӧвӧл… – валэктэ Эбга. – Ми но Дондыен туж кема улӥмы шоретӥ но нырысетӥ мертэтын. Угось усьыны туж капчи, нош ӝутскыны сокем бадӟым кужым кулэ, ваньмыз понна кема дыр ӧпкельыны кулэ… Узыбей асьмелэн кужмо выжы пушъетмы… Со вылын бадӟым осконэз выжымылэн… Соин шугомытыны уг яра югдурмес… Куректон со туж зол выжыписпу кужыммес сюпсе… Угось «сьӧдъёс» кайгырон кужымез гинэ кыскыны быгато, буйгамзэ соос басьтыны уг вормо… Ми сое асьмеос но улӥ мертэтъёсын улыса гинэ валамы…

– Но тӥ кыкнады ик туж дано лулъёс ук, тӥледды котькытын ӟечен гинэ тодазы ваё, кызьы тӥ улӥ мертэтъёсы сюриды? – пайме Гульсиля.

– Нокин, Гульсиля, сьӧлыкатэк уг улы… – валэктэ Эбга. – Кадыр адямиос но янгышъёссы вылын дышетско… Кылдэмез улонлэн сыӵе… Нош тодмо адямиослэн кыл кутонзы эшшо но бадӟым, соос сьӧрын выжызы гинэ ӧвӧл, вань калыкмылэн азьлань улонэз… Ӟеч ужез лэсьтыку но ваньзэ адӟыны уг луы. Одно кинэ ке вӧсь кариськод, кыӵе ке гожлэн сьӧраз ортчиськод…

– Тодысалыд ке кытчы усёндэ, быдэс ӟуг миндэр вӧлдысалыд… –пальпотэ Донды батыр. – Котькуд вамышъёстэ сакласа мынысалыд. Но озьы уг лу. Янгышъёстэк нокин азьлань уг мыны. Нош котькуд янгышъёсмы выжымес кылятэ. Угось выжыписпу со ваньмыныз герӟаськемын, вань мертэтъёсын, вань дуннеосын, тон но, Гульсиля, уно ӟеч ужъёс лэсьтыса, выжымес юнматӥд… Нош куд-ог шорын кылятӥд, янгышъёсыдлы луыса… Анаед но тынад уно ӟечсэ лэсьтӥз, песянаед но трос калыкъёсты эмъяз, выжымес кужмоятӥз… Вал соослэн но янгышъёссы… Мар карод, Карна апай ваньзэ адӟе… Нош Желя сузэрез ӟечсэ но уродзэ мертаса выль сюресъёс вылэ жильыя…

– Ваньзы нырысь шоретӥ но нырысетӥ мертэтъёсы вуо. Янгышъёссэс валаса гинэ, собере ӝутскыны быгато. Тӥ но милемлы юрттӥды вылӥ мертэтъёсы ӝутскыны… – пальпотэ Эбга. – Ватка калыкмы но юрттӥз, умой кылъёсын буре вайылыса. Чибиньмы но пичиысен ик кадыр адями луиз, нылпиоссэ но со вылӥ лулъёс куремъя гинэ та дуннее кельтӥз, соин сэрен со табере милесьтым но вылӥ мертэтъёсы ӝутӥськемын. Со туж зол бурмытӥз но будэтӥз асьмелэсь со вакытэ кылям выжыписпумес…

– Ми но кема тэльмырим пимы понна, тужгес но мон курадӟи, солы сыӵе ним  лякеме понна… – азинтэ Донды батыр. – Улӥ мертэтын улыса гинэ мон валай, ваньзэ сое «сьӧдъёс» озьы малпаллям шуыса, юри милемды озьы курадӟытыса, калык кужыммес кыскон понна..

– Иське, Узыбей сяна но вань на эксэй выжымы?.. – паймыса юа Гульсиля.

– Ми но ум тодӥське… – валэктэ Донды батыр. – Инмарлэн, Гульсиля, сюресъёсыз туж уно ке но, соос ваньзылы уг усьтӥсько… Атай-Бубы бугормес асьмеос му мугормес ыштэммы бере гинэ валаськомы. Мугормес ыштыса но озьы гинэ бугормес валаны уг луы на. Эбгалэсь «эксэй вирзэ» туж пыдло ватыса возё. Милемлы Чибиньлэн но берло улонэз ворсамын вал… Али но сое милемлы усьтӥськыны уг лэзё… Ми ум тодӥське, кӧня солэн нылпиосыз кылизы… Табере Узыбеез но тӥни пеймыттӥ вамышъято… Уг яра каль тӥледлы кайгыронлэсь тулкымъёссэ солэн сюрес вылаз пазяны… Кайгырон со тонэ гинэ уг суты, ваньместы сутэ… Кужыммес «сьӧдъёслы»  сётэ…

– Вераны капчи, чиданы секыт… – тулкымъяське Гульсиля. – Мон валасько, тӥ мукетэсь, но тӥ но ук  мажесъёс вылэ лёгылӥды…

– Лёгылӥмы… Соин ик тодӥськомы, кызьы каль тӥ юрттыны быгатоды выжымылы… – валэктэ Донды батыр.

– Тӥляд буйгамды гинэ ӟечгес солы кароз, оске милемлы! – дыртыса  вера Эбга но. Солэн но, Дондылэн но дӥськутъёссы кужмогес тылъёсын ӝуатскыло ни.

– Милемлы асьмелэн мертэтъёсамы кошконо луоз… – нош ик ватса Эбга. – Сотэк Эшмурза эшшо но секытгес ӝокалоз. Солы туж секыт вылӥ тылъёсты чиданы. Угось милемлы но ялан тылмес кужмоятоно луэ, улӥ кужымъёслэсь утиськон понна. Оглом, дугдэ Узыбей понна кайгыремысь, малпаське лулъёстэс ӝутон сярысь… – йылпумъяз Эбга, Дондыезлэсь кизэ кырмыса.

Ӵапак со дыре ик соосты бергась тыл басьтӥз, омыре бус гинэ кылиз  соослэсь вылӥ дуннеосысь тылъёссэс тулкымъяса.

Но туж егитэсь на ук Эшмурзалэн но, Гульсилялэн но лулъёссы, кыкетӥ ползэ гинэ ай соос дуннее улыны вордскылӥзы. Дондыен Эбгалэн та югдурез капчиятыны тыршемзы нокуд ласянь, оло ке, соос пушкы ӧз пыӵа. Дондыен Эбга ышем бере ик соос выльысен утчаны кутскизы Узыбейзэс. Адӟысалзы ке, кыӵе кышкыт кужым тулкымъёс урмыса ик кошко соослэн курадӟись лулъёссы бордысь яратоно нылзы доры, кызьы соос ӵогъялто асьсэлэсь ик бадӟым выжписпузэс, соос тазьы ӧй куректысалзы, соку ик, оло, дугдысалзы. Нош адӟысалзы ке, кызьы азьланьске нылзылэн вылӥ лулъёсын котькуд синлэсь ватэм азьпал улон бугорез, соос, оло, воксё ӧй но тельмырысалзы. Но со уг адӟиськы, уз но адӟиськы, тӥни мар бордын вылӥ дунне пӧрлэн зыметэз. Узыбейлэсь сюрессэ адӟон понна соослы туж вылӥ мертэтъёсы, пырак соос дорозь ик вуоно, кинъёс улон сюрессэс нылзылэсь но та куинь пияшъёслэсь дасязы. Нош соос кыксы ик улӥ мертэтъёсын. Гульсиля кыкетӥ но куинетӥ мертэт вискын, нош Эшмурза шоретӥ но нырысетӥ мертэтъёс куспын. Угось вылӥ мертэтъёсы вуон понна туж кадыро луыны кулэ, туж ӧжыт кыльыны кулэ тынад «сьӧд кужымед», яке воксё со мед быроз… Угось кулэм бераз котькудӥз лул, ньыльдон уй ортчыса, «Кенеше» вуэ, кытын мертало но лыдъяло луллэсь таяз дуннеын люкам «сьӧд» яке «югыт» кужымъёссэ. Эшмурза кадь ожбусыын кулэм батырлыко лулъёс гинэ «Кенеше» черодтэк шедё. Малы ке шуоно соос асьсэлэсь адӟонзэс ӧз сӧре, кызьы луоно вал, озьы ик ваньмыз луиз. Соин «Кенеш» но соосты 40 уй уг возьматы, кулэмзы бере ик интыя асьсэ мертэтазы. Макем «югытэз» уно, сокем вылӥегес мертэтъёсы ӝутӥське лул. Нош «сьӧдэз» ке уно, сокем улӥе со лэзиське. Туж но туж сьӧлыко лулъёс нырысетӥ мертэтлэсь но улӥ дуннеосы усё. Туж кышкыт соос отын курадӟо. Кудӥз ке лул туж кема аръёс ӵоже улӥ мертэтъёсын улэ. Сьӧлыкъёссэс валаса гинэ, ӧпкельыса гинэ, вылӥ лулъёслэсь юрттэт курыса гинэ, соос выльысен нырысетӥ мертэтэ яке солэсь но вылӥегес ӝутскыны быгато, вылаз ик та дуннеын улӥсь адямиослэн, тужгес но асьсэ выжыоссылэн, ӟеч малпанъёссы соос дорозь лыктӥзы ке. Нош нокудласянь соос сярысь ӟечен-бурен тодэ ваёнъёс ӧвӧл ке, куд-огезлы ӝутскон понна туж трос аръёс кулэ. Нош куд-огез кема ик уг курадӟы, выжыосыз ке ӟеч малпанъёсын но ӟеч ужъёсын уло, со сокем зол ӝутӥське. Шедьыло сокем жобъёсыз но лулъёс, кудъёссэ улӥ дуннеос но чиданы уг вормо, кудъёсыз сярысь асьме дуннеын но урод гинэ верасько. Сыӵеоссэ лулъёсты «сьӧдъёс» но уг чидало – ӵыжато, ӵушо, уг ни кельто выльысен вордӥськыны… Со лулъёслэсь выль лулъёсты кылдыто выль адӟон бугор соослы черсыса. Яке со лулъёслэн вань на ке кулэлыксы «Кенешын пукисьёсыз сьӧдъёс» котькулы соосты сьӧд дуннелэн ляльчиосыз каро… Нош вылӥ мертэтъёсы шедён понна, югыт кужымъёсты люкан понна, одно ик асьме дуннее выльысен вордӥськоно, нош вордӥськем берад выль улон сюрэстэ туж ӟеч ортчоно, Карналэсь вань куронъёссэ лыдэ басьтыса… Нош выльысен вордӥськон понна туж бадӟым черодэз возьмано, макем улӥысяз тон мертэтэ шедемын, сокем бадӟым отын черодэз но.

Соин ик Дондыен Эбгаос соослэн мертэтъёссы дорозь чик но огшоры ӧз ваське. Тэльмырон, кайгырон, бӧрдон, лекъяськон, вожпотон, вожан, вожъяськон, ӧч карон туж уно кужымез кыске, аслэсьтыд гинэ ӧвӧл, вань котыредлэсь но. Соин ик «сьӧдъёс» куано лулъёсты тэльмырытыны. Угось ӵапак соослы сиён сётэ лулъёслэн тэльмыронъёссы. Узыбейлэн анаез, Гульсиля, кулыса но сое ӧз вала на, шӧдске. Дондыен Эбгалэн вылӥ дуннеосысь соос доры васькемзы, буйгатскыны куронзы эшшо но зол сое пурӟытӥз гинэ. Шӧдске, Гульсилялэн улэп дуннеен кусыпъёсыз зол герӟаськемын на вал…

– Буйгатскы шуо… Кызьы татын буйгатскод! – шӧдтэк шорысь вожомиз кышномурт, таӵе вожомемзэ солэсь Эшмурза но ӧз адӟылы. Угось Гульсилялэн ваньмыз пӧсьтӥз. Картэзлэн ялан эксэй ужъёсын бергамез, сое ӵемысь огназэ кельтылэмез. Аслаз улонысь вазь кошкемезлы кӧтӝожез, яратоно нылзэ сыӵе вазь огназэ кельтэмез, нылызлэн соин сэрен куинь ар ӵоже дугдытэк бӧрдэмез – ваньмыз солэн нош ик син азяз лыктӥз…

– Соослы капчи буйгатскы шуыны, соос табере вылӥ дуннеын! – кесяське со Дондыен Эбгалэн омыре ышемзы пала. – Одӥгез аслаз пиезлы, юри сое серем карыса, Чибинь ним понӥз. Мукетыз нуныез сярысь сюлмаськытэк, сое та дуннее огназэ кельтыса, ватка калыклэн лэчыт изъёсыз улэ ачиз кошкиз! Кадыр адямиос, кызьы кадыресь уз луэ соос! Табере ачиз но Эбга кадыр, Донды но кадыр, Чибинь но пичиысен ик кадыр луиз, шуо! Кызьы со кадыр уз луы, сыӵе нимен ветлыса, пичиысен ик анайтэк-атайтэк будыса? Кӧня серекъян пыртӥ со ортчиз! – урмыса ик кесяське Гульсилялэн ватка кышномурт лулыз.

Валаз меда со али, кин вылэ, кинъёс вылэ озьы кесяськемзэ? Угось котькуд кылъёсыз солэн ӵашъем тылъёс кадь выжыписпуэз вылэ мертчылӥзы. Мукет сямен вераса, кӧшкемыт тӥрен со кораз аслэсьтыз ик пукон писпу вайзэ. Юнме сое дугдытыны, буйгатыны выриз Эшмурза, кудӥз ачиз но сомында куректонэз веръяз дунне вылын, пичиысен ик анайзэ но, атайзэ но тодытэк. Но дугдытод шат ӟырдам ватка яке калмез кышномуртэз, котькытын со мед луоз, коть тапалаз, коть сопалаз дуннеын. Нош кытыназ, куд шораз тон дуннелэн уд луы, котькытын туж ӝог ужа Карналэн карнанэз. Котькуд кеськонэз Гульсилялэн аслаз ик лул вылаз сьӧлыклэн «сьӧд» кужыменыз секытаса ошиськиз. Тани солэн лулыз Эшмурзалэнэз кадь ик шоретӥ но нырысетӥ мертэтъёс шорын веттаськыны кутскиз ни… Соку гинэ мае ке шӧдыса, валаса, лэся, Гульсиля чалмиз, картсэ ӟыгыртыса бӧрдыны кутскиз…

Карнан нокыӵе сьӧлыкез уг чида, котькин тон мед луод, валаса-а тон кесяськид, валатэк-а. Тон саптад чылкытлыкез, урод кылъёс верад, нош кыл со уг быры, со кыле, соин ик басьты табере Карналэсь дунъетсэ. Ярам ай Гульсиля кыкетӥ но куинетӥ мертэт вискысьтыз шоретӥ но нырысетӥ мертэт вискозь, картэз дорозь гинэ усиз. Нош куд-ог лулъёс эшшо но вылӥысен усьыло. Сыӵе учыръёс сярысь трос верало арсавыл туноос.

28-тӥ люкет. Тапал дуннеослэн сюлмаськонзы

Озьы вал со кулэмъёслэн дуннеязы, нош улэп дуннеын но та югдурез адӟисьёс пӧлын ачиз сямен со азьланьскиз. Тани адӟыны быгатӥсь улэпъёс пӧлысь Ӟапык но сюлмаськыны кутскиз ни, шокпотыса бызе ке но ватаманэзлы юрттыны. Нош ачиз Ӟумъя батыр, куакаос шоры учкыса бызьыкуз, писпу борды дыгиськиз… «Мар луиз? – малпаське со. – Кытчы ышизы Узыбеен Япанча? Быдтыны-а, мар-а малпаз, нагалят басьтон? Нош пиос, Камитэн Явуш, кытчы пыризы? Мар соосын кариз Япанча?..» Ӟумъя шуак учкиз кулэмъёс пӧлысь, одӥгзэс но отысь ӧз шедьты. Куалектэм Эшмурзаез но Гульсияез гинэ отысь адӟиз. Улэпъёс пӧлысь но Ӟумъя ньыльназэс ик ӧз адӟы, но солы дыртоно вал кикыпиослы юрттыны. Сомында дышетэм ожчиосты тани тазьы ыштэмез солэн уг поты, «храмчиос» табере, дурынчиос кадь, вожомемын, кыктосъёссы быремен сэрен, соос нокинэ уз жалялэ ни… Котькудӥзлэн уга дунне вылын аслаз ужез, котькудӥзлы нырысь ик сое быдэстоно… Соин Ӟумъя нош ик азьлань бызе.

Усман тата гинэ, пальышаса ик кышноосыз шоры учкылэ. Ой, кыӵе вожомемын ук солэн чебер апайёсыз! Угось троссэ адӟытэк кылизы… Саклыксы соослэн мукет ужпумъёсын герӟаськемын вал. Соос берло дыре нылмуртъёссэс Улӥ Новгородэ, Чускуалае, кошкем базар борды интыяны тыршо вал. Соин ик йыръёссы соослэн муш уморто кадь гужла вал Чускуала котырын. Нош табере бер ке но, соос тодӥзы, мар татын луиз, малы Япанча Узыбеез лушказ но ышиз…

Нош Явушен Камитлы, оло ке, нокыӵе ӧвол. Угось соос нокинэ табере уг адӟо. «Малы кулэмъёсты но, улэпъёсты но адӟемзы уг луы?» – паймо кыкназы ик туно пиос. Озьы ик соос паймо, та мугорзы но вӧсь луонэз шӧдэ шуыса, укыр бадӟым гуэ соос, улвайёсты ик тӥяса, лобӟизы. Кыкназылэн ик шуккылӥськем, мырӟиськылэм интыоссы висё. Нош изъёс вылэ ке усьысалзы, кин тодэ мар соосын луысал?.. Ярам, вуэ гинэ усизы, нош дӥськутсы куасьмоз, егит мугор ӟырдыт шунтэ. Зэмзэ ке, выль мугоръёссы ласянь кыксы ик соос дырын-дырын малпаськыло. Аватара мугорзы туж кельше азьвыл мугорзылы, кудъёсыз Усман таталэн гуосаз кӧло. Со мугорзы доры соос бордысь векчи гинэ пиштӥсь нюжа кошке. Та мугоразы котькуд учыре пӧртэм буёлъёсын югекъясь тылъёссы озьы ик ӧжытак чалмытгес тылсияло кыллись мугоразы. Кык мугоръёссы ик ог-огзэс кыктосъёс кадь шӧдо. Одӥг кадь шумпото, одӥг кадь кайгыро. Но со дыре ик таиз мугорзы трослы чырткемгес, чидасьгес но кужмогес. Шӧдонъёссы но соослэн туж кужмо луэмын. Ӵапак таӵезэ мугорез тодӥсьёс но, туноос но «тыл мугор» шуо. Со кулӥсьтэм мугор. Сое тыл но уг басьты, пурт но уг ванды. Синъёссы соослэн кыдёке адӟо, зынъёсты но соос зол шӧдо, пельёссы но зол кыло, соин ик пиос туж паймемын, кызьы озьы но соос уг шедьто Япанчалэсь но, асьсэлэсь но Такатурын нёжалысен та бадӟым гу доры матэктэм пытьыоссэс. Япанча сьӧры уйиськыкузы, кионъёс туж ӟеч шӧдо вал Япанчалэсь Узыбеез лушкаса кошкем берзэ. Соин кыксы ик кионъёс туж дыртыса ворттӥзы, угось тодо вал Камит аслаз берытсконэныз соосты трослы ӝегатӥз шуыса. Но дыртонлэсь кылдон ортче, кионъёс валаса ик ӧз вуттэ, кызьы канжаськыса мур гуэ пезьдӥзы… Сокем мудронэсь кионъёслы туж возьыт луиз таӵе югдуре шедемзы понна…

Кытысен Япанча та интыосты сокем умой тодэ? Пиос валамъя, со нокытчы дыртымтэ, адӟем Камитлэсь берытскыса така лудын мар ужамзэ. Соин юри татын соосты возьмам, мур гу пыдэсэ лобӟытон понна… Ку солэн йыраз таӵе малпанэз лыктэм? Ку со та интыосты эскерем, ку валам, кызьы та интыосын адӟисьёслэсь но ватӥськыны луэ шуыса? Мар инты та? Марлы кионъёс но табере асьсэлэсь уйиськем пыдберъёссэс уг шедьто? Оло инкуазез-а татын сыӵе? Оло мукет дуннеосы поттӥсь ӧсэз ни вань та котырын? Соин Япанча чиптэм-чаптэм ышиз, Узыбеез ас сьӧраз нуыса.  Мар малпаз со? Мар кариз Узыбеен? Со ӟеч тодэ, «чингизит вирез» музъеме кисьтыны уг яра, соин яке ӝокатӥз, яке ошиз?.. Камитлэн йыраз туж трос юанъёс гужлало. Нокуд юанэзлы Камит валэктон сётыны уг быгаты… Таӵеез соин ӧй вал на. Котькуд юанэз узатэ гинэ. Камит вала, ӧвӧл солы озьы малпаськоно. Солы валаны кулэ, кызьы Япанча киысь Узыбейзэ шедьтыны. Куинетӥ ползэ гопез котыртыны соослэн дырзы ӧвӧл ни, толыкез но уз лу, шӧдске. Та учырысь мукет сямен потоно. Нош кызьы? Кызьы со мукет амалэз шедьтоно? Япанчаез но ке лыдэ басьтоно, куиньназылы ик соослы ортчем дырысь Кузонэ дыртоно, оштолэзе ортчем Кузон Базар нуналэ. Сыӵе соос азе курон пуктӥз Кизили Пурт. Но уг лу вал шат Узыбеез но сьӧразы Кузонэ басьтыны? Озьы малпаське Камит. Оло ини, зэмзэ но уг лу вал?.. Япанча но ас ужзэ малпаськытэк ӧз лэсьты, дыр?.. «Сьӧдъёс» но Зарни Мумез утчало, соин Узыбей шоры табере котькытысен учко. «Сьӧдъёс» но учко, кызьы сотэк… Аждага но Шурали но сое адӟизы ни ке…

– Камит, кызьы тон валад выльысь отчы така будосъёс доры берытскыны? – ошторма пияшез малпанъёсыз пушкысь поттыны турттыса яке зэмзэ но тодэмез потыса юаз Явуш.

– Уг тодӥськы, кызьы ке валай, дыр… – ас дуннеысьтыз потыны дыртытэк шокчиз Камит.

– Тон шӧдӥд, отын мар ке умойтэм шуыса? – выжыятӥз Явуш.

– Шӧдон со, Явуш, номыр уг вера, валан гинэ уж борды кутскытэ… – мылыз потытэк вераз Камит.

– Озьы. Ӵапак со бордын ик ужпум. Мон но шӧдӥ, Япанча но шӧдӥз. Но тон гинэ, Камит, валад но лэсьтӥд! – азьланьтӥз Явуш. – Мон ваньзэ адӟи, Узыбейдэ но тон, со югдурез тупатон понна, вунэтӥд…

– Ӧй, Узыбеез мон ӧй вунэты… – соглаш ӧз луы Камит. – Озьы карнан ӟечырскиз… Яке Узыбей, яке Аждага шуиз… Кудӥз, пе, кышкытгес… Узыбейлэн кошконэз, яке Аждагалэн Арсавылмес зынтонэз, аздыронэз… Мыным гирышоно ӧз луы…

– Юнме ӧз бырйы тонэ Кизили Пурт… – гажаса учкиз эшез шоры Явуш. – Тон зэмос Быдӟым туно! Мынам кылы ӧвӧл ваньзэ сое вераны…

– Мон, Явуш, уг тодӥськы, кыӵе мон туно, мар сётэ мыным Кизили Пурт… Но мон туннэ кыкетӥ ползэ Узыбейлэсь улонзэ кыкетӥ радэ пуктӥ. Кызьы тон малпаськод, сётоз-а Карна куинетӥ ползэ  карнаны?..

– Кин меда вала, кызьы Карна эскере, но мон малы ке куинь лыдпуслы оскисько, соин малпасько, сётоз, дыр, шуыса. Озьы мыным потэ. Карна ваньзэ лад-лад чакла ук… – пӧяськытэк вераз Явуш.

– Мынам но малы ке сыӵе осконэ пеньскем эгыр вылам гомӟылэ на… – мӧзмыт лулӟиз Камит. – Узыбей кулэмын ке но, мон сое выльысен улӟыто! – куашак вераз со вань Арсавыл Дуннелы. Но Камит шӧдӥз, верамзэ солэсь, Явуш сяна, нокин ӧз кылы, куараез солэн кыӵе ке ланга сётӥсьтэм бушлыке кадь кошкиз. Камит гинэ ӧвӧл, Явуш но сое шӧдӥз. Угось котькуд адями шӧдэ, куара ке бушлыке кошке. «Та интыысен нокин уг кылы… Мар бордын ужпум?..» – кыксы ик малпасько егит туноос. Ӵап соку гинэ Явуш адӟиз Камитлэн песьтэрысьтыз куасам така-турынзэ…

– Тон мар, Узыбеез улӟытон понна Асклепийлэсь така-турынзэ юри ишкалтӥд? Уд кышкаськы-а сое уже кутыны? – шыпыт куарен юаз Явуш, аслыз ачиз паймыса Асклепийлэн така-турынэз сярысь тодонэзлы.

– Мон куто сое… – чурыт вераз Камит.

– Но со понна тон тодӥськод-а, мар тыныд луоз?.. Нокинлы лэземын ӧвӧл така турынэз уже кутыны… Асклепиез но со понна  грекъёслэн Зевссы умме уськытӥз…

– Котьма мед карозы монэ вылӥ лулъёс! – котыр чакласькыса вераз Камит. – Пеймыт Япанча сьӧсь кадь ас ужзэ лэсьтӥз… Татын карнан ик куасалляське. Солы яра ке, мыным малы уг яра мусо лулэз выльысь та дуннее берыктыны? Мыным гинэ мусо лулэз ӧвӧл, вань арсавыл кылыклы, кулэмъёслы но, улэпъёслы но мусо лулэз, «чингизит вирез»? Со мынам быръёнэ, Явуш. Куинетӥ быръёнэ… Ваньзэ дырыз дыръя лэсьтоно. Мугор со туннэ вань, ӵуказе ӧвӧл. Нош лул кужым ноку уг быры, со мынэсьтым та мугорылэсь но вань пушсэ сюпсьыса, улэпен-а, кулэмен-а шедьтыны куре Узыбеез. Тон валаськод-а, мон сое одно ик шедьто! Нош тон, Явуш, Карна улэ сюронтэм понна, али ик аслад Кузонад, Базардэ ортчытон нуналад, огнад кошкод! Тынад бугорыд озьы косэ!

Явуш номыр солы пумитаз ӧз вера, чалмыт ас понназ малпаськиз. Тани соос нялмыт ярдурлэн мувыро интыяз ӝутскизы. Татысен котыр ёрос адӟиське. Огпалаз ӝуё-ӝуё нюлэс, мукет палаз сусыпуо мувыръёс. Татысен но тӧдьы изо ярдуро гоп соос шоры серекъяса кадь учке, оло…

– Мон нокытчы тонтэк уг кошкы! – шуак вераз Явуш, та кык пӧртэм инкуазь шоры учкыса. – Уг лу мынам тонэ таӵе учыре огнадэ кельтэме!

– Узыбей со мынам адӟонэ, тыныд аслэсьтыдзэ адӟондэ быдэстоно… – озьы ик та кык пумо инкуазь шоры учкыса, небытак гинэ вераз эшезлы Камит. – Соин ик кылзы, тон Кузонэ вуид ке, калыкъёс кадь Быдӟым Ош азьын шертовать карыны эн дырты. Мон валамъя, тон таяз учыре шедьтыны кулэ атаедлэсь кулэм бераз кылем сандыксэ. Сое, кызьы тодӥськод, тыныд ваёзы вогул пиос. Ортчемаз Ош Сайкан Базарын тон ӧд быгаты соосын пумиськыны, но таяз учыре нырысь ик соосын пумиськы, нош ик, бубыли кадь, эн нориськы «сьӧдъёслэн» чильпам вотэсъёсаз… Оскы мыным, атаедлэн сандыказ тынад азьпал сюресэд, азьпал улонэд. Кудӥз мукет сямен собере азинскоз. Тон понна но, вань Арсавыл понна но. Тыныд туннэ юри сётӥське нош ик со «ву нуэм» нунал, кудзэ тон таяз учыре янгышатэк ортчыны кулэ… Аслэсьтыд бугордэ кылзыса…

– Тон малпаськод, таиз шай пыдэсысь «пуамез» мугор быгатоз сое тупатыны?.. –  витьымтэ шорысь юаз Явуш.

– Со понна ик со сётэмын… – серемез потӥз та дырозь кунэрес ветлӥсь Камитлэн. – Малы тон сое «шай пыдэсысь пуамез» шуиськод?

– Нош кытысь соку?.. Отын кыллё ук асьмелэн мугоръёсмы, нош таиз мон уг тодӥськы кыӵе дуннелэн мугорыз. Кытысь со кылдэмын?.. Усман тата-а сое кылдытӥз? Кизили Пурт-а? Вылӥысь лулъёс-а?.. Яке асьмеос-а? – серемез потытэк серектӥз Явуш.

– Сокем ик тодыны кулэ шат асьмелы, кин сое кылдытӥз?.. Со кылдэмын но тӥни. Сыӵе мугоръёссы кылдо Инмарлэн но, со котырысь лулъёслэн но, «пеймытъёс» но соосты кылдытъяны быгато. «Храмчиос» но сыӵе мугоръёсын Зарни Мум доры лыктӥзы… Со кызьы ке кылдэ, ужа, шӧдэ, кылэ, адӟе, ветлэ, куронъёсмес быдэсъя… Маиз тыныд уг тырмы на?.. – пайме Камит.

– Нош кудӥз малпаське? Соиз, гуын кыллисез, яке таиз?.. – уг буйга Явуш.

– Таиз но соиз но уг малпаськы… Лул малпаське. Котькуд мугор луллэсь куронъёссэ гинэ  быдэсъя…

– Ӧвӧл, Камит, мугор мукет лулъёслэсь но кылзӥськыны быгатэ… Кылсярысь, мукет лулъёс соос пушкы пыро ке, яке «вуко бугор» юнмато ке со мугор пушкы… Тодӥськод ук Аскарысь тунолы но пичы дыръяз ик «вуко» юнматӥллям, собере со Аскарез, ачиз но валатэк, джунгаръёслы, ойратъёслы усьтӥз…

– Буйга, Явуш. Мукет лулъёс яке «вуко бугоръёс» нуны мугоре гинэ пырыны быгато… Яке мугор лул сьӧлыкъёсын ке тэльмыре… Ачиз лул мугореныз кусыпъёссэ ке тэшкатэ… Яке сӧро ке со мугорез… Нош сӧрыны быгато, куке мугор но лул вискын кусыпъёс лябӟо, куке соос вискын ог-огзэс гажан быре. Лул яратыны кулэ аслэсьтыз мугорзэ, соку мугор но лулэз яратэ. Нош асьме учырын сыӵеез ӧвӧл, озьы ук?..

– Ярам… Соку вера мыным,  малы кулэ асьмелы кыкетӥез мугор? – чик но серекъятэк юа Явуш.

– Лул азе пуктэм ужез быдэстыны… – валэктэ Камит.

– Нош соиз сюйын кыллисез мугор шат уг быгаты вал пуктэм ужез быдэстыны?

– Быгатэ. Но таиз, кызьы мон валасько, вылӥ мугор, вить мертэто дуннеысь «тыл мугор», кудӥз одӥг дырысь мукет дыре но потаны быгатэ, кудӥз уг кулы, кудзэ уг быгато быдтыны… Нош созэ мугормес юри ватӥзы…

– Малы?

– «Сьӧдъёслэсь» возьман понна… Яке эшшо малы ке… Сэбедэзъя озьы кулэ, дыр… Малы тон сыӵе юанъёс сёткаськод? – паймыса юа Камит.

– Мыным кулэ сое тодыны… Сотэк мыным секыт луоз Кузонэ ветлыны… Вылаз ик ортчем дыре потыны… – чик но уг серекъя Явуш. – Кызьы тон малпаськод, марлэсь-о та мугор кылдэмын? – нош ик юа со.

– «Мугор» кылдэмын сюйлэсь… Сюй вылтӥ ветлон понна… «Му»-лэсь но «гор»-лэсь… – пальпотэ, эшез шоры учкыса, Камит.

– «Му» со «Сюй» ӧвӧл. «Му» со Мумы Дунне, кудзэ шуиськомы Музъем яке Митгард… – соглаш уг луы Явуш. – «Сюй» мар ке мукетсэ вера…

– Тон, Явуш, чик но ваткаослы уд кельшиськы. Таӵе юанъёсты пичиос но уг сёткало…

– Мон тӥ палан ӧй буды. Монэ песянае но, песятае но, тонэ кадь, дышетыса ӧз вуттэ, мон нокудзэс выжыосме – анайме но, сузэр-вынъёсме но, син азям пуктыны уг быгатӥськы… Ваньзэсты мон вазь ыштӥ… Анае монэ эстымтэ гуре ватыса кельтэм ваньбур таланы лыктэм сьӧсьёслэсь… Быдэс гуртмес вандылӥллям… Нюлэскы пегӟемъёс гинэ монэ гурысь шедьтӥллям… Соин атае монэ пичи дырысеным ас сьӧраз нуллӥз… Огнам гинэ мон солэн кыли…

– Вождэ эн вай, Явуш… Мон сокем пыдло ӧй учкы, уг тодӥськы вал озьы будэмдэ…

– Соин ик мон тодыны турттӥсько созэ, мае пичи дыръям ӧй басьты…

– Бон, ваньмыз озьы… Шонер тон валаськод, мургес ке учконо, «му» со «сюй» ӧвӧл. «Мугор» – возьматэ кык пало луэмзэ. «Му» мумы дуннеен, музъемен, герӟа. «Гор» – инмарлэн «гуреныз», югыт но шуныт тылыныз но инбам лулыныз. Нош ачиз «Му» яке «Музъем» кылдэмын «Сюйлэсь». «Сюй» люкиське «Сю» но «Уй» кылъёслы. «Сю» вера быдэслык сярысь, нош «Уй» пеймытлык сярысь. «Сюй» со Сюлыко (быдэслыко) Пеймыт Мумы Арбери (материя), кудӥз нокинэн исамын ӧвӧл, кудӥз чус-чус кӧлэ аслаз адӟиськисьтэм пеймыт дуннеяз. Соин ик солэсь ваньзэ кылдытыны луэ… Вожо дыре со тросэзлы усьтӥське… Нош мукет дыръя со ватскемын. Нокин сое адӟыны уг быгаты, асьмеос та дуннеысь дасмоссэ гинэ адӟиськомы, нош мукетыз 90 люкетэз адӟиськисьтэм пеймытын улэ. «Сюй» со адскисез но адскисьтэмез но куке ӵош луэ… – валэктэ Камит.

– Соку малы та Музъемез кылдытон понна со «Сюез» поттыны Инмар «Ву» пыдсы, отчы «Пеймыт Дыр» пыдсы, ачиз ӧз зымы, малы Шайтанэз ыстӥз? – нош ик юа Явуш.

– Инмар «Шайтанэз» ӧз ысты, со аслэсьтыз «Вынзэ» ыстӥз, кудӥз соку  «Шайтан» ӧй вал на, соку со Пеймыт Паллэн Кузёез гинэ вал. Нош Инмар – Югыт Паллэн… Соин ик Инмар ачиз ке со «Сюйлы» кошкиз, «Сюй» Сюлыко ӧй луысал ни, малы ке шуоно Югыт Пеймытэз быдтэ… Но Выныз, валамон, аслаз дуннеяз ветлӥз, «Сюйзэ» но со пеймыт лянэсэ поныса поттӥз, дыр…

– Но со ымаз но поттӥз, Инмарлэсь ватыса…

– Шонер. Со понна ик сое нимазы Шайтан. Нырысь ик со аслаз ым пушказ шайялтыса «Сюйлэсь» Сюлыксэ сьӧдмаз, собере Инмарлэн косэмезъя «Сюй» Музъемлы пӧрмыса будыку, ымаз ватэм «Сюез» но будыны кутскемен сэрен, со «Сьӧдмам Сюйзэ» музъем вылэ сялӟоно луиз… Мувыръёс, нюкъёс, гопъёс, нюръёс кылдытыса…

– Озьыен, «Му» Шайтанэн сӧремын луэ? Отын ӧвол ни «Мумы-Анай Сюйлэн Сюлыко быдэслыкез»? – нош ик юа Явуш.

– Тон шонер малпаськиськод, – пальпотэ Камит. – Но тон ваньзэ лыдэ уд басьтӥськы… Соин янгышаськод… Аристотелез тодад уд возиськы…

– Кытыназ мынам янгыше? – уг вала сое Явуш.

– «Му» сӧремын ӧй вал. «Му» али но чылкыт. «Му» со «Чечы» кадь. Нокин сое ӧз сӧры. Угось ӧй вал  Шайтанлэн сыӵе «сӧрон» малпанэз. Валамон, со ватӥз кӧня ке «Сюйзэ» аслаз ым пушказ, но солэн сӧрон малпанэз ӧй вал. Солэн уго аслаз но Инмар кадь мар ке кылдытэмез потэ вал. Солэн туж тодэмез потэ вал, мар со «Сюйлэсь» лэсьтыны луоно… Ымысьтыз «Сюйзэ» со «Сюй» будэмен гинэ  сялӟоно луиз… – пальпотыса валэктэ Камит.

– Соку пӧрме «Му» сӧремын ӧвӧл? Со «Сюй» кадь ик Сюлыко?

– Шуом озьы. Но «Му» вылын Шайтанлэн сялӟем бервылъёсыз но кылемын. Соосты шуыны луоз «чылкыттэм интыос». Отчы югыт уг пыры, уг быгаты пырыны… Соин ик, шӧдске, нокин соосты адӟыны уг быгаты…

– Тон малпаськод, асьмеос али ӵапак сыӵе интыын?..

– Мынам мукетыз валэктонэ ӧвӧл… – лулӟе Камит.

– Ярам. Та инты сярысь вуом на малпаськыны. Берытском «мугор» доры. «Муэз» валэктӥмы. Нош мар соку «гор»?

– «Гор» бадӟым пуштросэз возе… – пальпотэ Камит. – Котькуд луллы та дуннеын улыны сётӥське «мугор». Котькуд «мугорлэн» вань аслаз «гурез», со будэ, мӧйыме, пересьме, со быгатэ шӧдыны, адӟыны, кылыны, вырыны, ветлыны, ужаны, валаны но уно мукетсэ… Нош луллы та дуннеын огшоры улон сяна кулэ на «будыны», визь люканы, «бубы» дуннеысь васькемез бере ас азяз пуктэм ужзэ быдэстыны. Со понна солы сётӥське «адӟон бугор», кудӥз каллен сэраськыса, лулэз та дуннетӥ ужатыса, дышетыса, будэтыса нуэ. «Бугорез» сэраса бырем бере лул выльысен инбаме берытске. Яке выль «бугор» но выль «мугор» аслыз бырйыны, яке вылӥ мертэтъёсы ӝутскыны. Озьыен, «мумы» дуннеен герӟаськем «мугор» сётӥське музъем вылэ васькыны – «улыны», нош «бубы» дуннеен герӟаськем «бугор» сётӥське вылӥ мертэтъёсы тубыны – «вылыны». Соин «бубы» борды кыстӥськись кылъёс ваньзы инбаме ӝутско – «бубыли», «будон», «бурд», «бурдо», «бугыри», «бугро», «бугырскон» но уно мукетъёсыз… «Мугор» сюйлэсь ке кылдэ, «бугор» биниське кыллэсь, соин сое асьмеос «кылбугор» шуиськомы. Ӟучъёс но сое «бубы» доры ӝутӥськись кылэн герӟало – «клубок» – «клубиться»… Аслэсьтыз «кылбугорзэ» луллы одно ик кылыны но валаны кулэ. Малы ке шуоно со аспӧртэм «каламбур» кадь, лабиринт кадь, луллы ӵемысь уг усьтӥськы. Котькуд лул аслаз «бубыезлэн» дуннеяз вылыкуз ваньзэ валаса, ачиз ик быръе музъем вылын адӟон «кылбугорзэ», нош «мумы» дуннелэн «мугораз» пыремез бере ӵемысь вань тодэмзэ со вунэтэ. Соин со уг тоды, уг вала, мае быдэстыны та дунне вылэ вордӥськиз. «Кылбугор» солы пӧртэм сямен азьпал сюресъёссэ возьматэ, нош адями лул куд-ог дыръя валаса, куд-ог дыръя валатэк, ачиз быръе, кыӵе сюрестӥ «будыны». Луылэ озьы, янгыш сюресъёстӥ мыныса, со улӥе но лэзиське. Нош куд-ог дыръя «бугорзэ» солэсь «сьӧдъёс» тугаськыто яке чигто, соин, будон сюрессэ йылпумъятэк, лул выльысь «бубы» дуннеяз, инмарлэн «гурезяз» берытске… Озьыен, «мугор» но, «бугор» но, «мумы-бубы» герӟетсэс возьматон сяна, пушказы нулло «гор» пуштросэз. Мар со «гор»? Тужгес но матысь валэктон «горшок» доры вуттэ. «Горшок» со тыртэм мар ке. Соин ик «мугор» но, «бугор» но тыртэмесь луо, соос пушкы «инмар тыл, инмар кыл» уг ке пыры. Мукет сямен вераса «инмар лул» югдытэм бере гинэ соос тыроесь луо…

– Инмар адямиез аслаз кабызъя кылдытӥз ке, озьыен со аслыз но нырысь «мугор» но «бугор» пӧраз, собере гинэ ачиз отчы интыяськиз?..

– Тон, Явуш, Библиысь кылъёсыныд монэ жадьытӥд ни. Уг лу инмарез адямиен ӵошатыны. Инмарлэн «мугоръёсыз» трос, угось со одӥг дыре котькытын ассэ возьматэ. Ваньмыз, мае тон адӟиськод, со инмарлэн мугоръёсыз, асьмеос но, пудоос но, писпуос но, турын-куар но. «Бугорез» но солэн уно кылшортъёслэсь биниське. «Ин» яке, комиос сямен, «Ен» инмармы нырысь ик «гурезь» яке мукет сямен «гур» кылдытэм, собере со «гуре» тыл ӝуатэм. Собере сое нимам «инбам» шуыса. Вераны кулэ, «гур» яке «гурезь» асьме валанъёсмылэсь паськытгес валанъёс доры тубыто: «гур, гурезь, гурланы, гуретыны, гыр, гырлы, гырыны, кыр, кырыны, кырӟаны, гер, геры…» но уно мукетыз… Туноослэн валэктэмзыя, ваньзы та кылъёс Инмарлэн дунне кылдытонэз доры нуо. «Гур» пушкын вань дунне кужымъёс возисько – тыл но, ву но, омыр но, музъем но, крезьгур но, куара но, лул но. «Гурез» яке «гурезез» шуыны луэ одӥг дыре ик  «чурыт», одӥг дыре ик «небыт», одӥг дыре ик «гурезь, выр, мыр, бам, кымес, йыр», но со дыре ик та валанъёслэн мукет палзы «гу, кыр, кырет, гыр, гыркес, буш, куш» но мукет. Тани ИН-БАМ огдыре ик со чурыт, огдыре ик небыт, огпаласен учкыку гурезь, мукет паласен учкыку «гу, кыр, буш инты, омыр». Дунне но одӥг паласен сьӧд, мукет палэсен югыт…

– Нош кытчы, тон малпаськод, со «гурез» инмар кылдытӥз? – нош ик юа Явуш.

– Библиын шуэмын: «Нырысь пеймыт вал, инмарлэн лулыз гинэ лобаз «Ву» вылын». Нош «Ву», кызьы асьмеос валаськом, со дыр. Собере инмар со Ву-Дыр шоры кылдытэ «Чурыт», ӟуч сямен «Твердь». Ним но солы сётэ, ӟучъёс сямен – «Небо», «небытсэ» возьматыса. Нош асьме сямен «Ин» яке «Ен» яке «Инбам» – «Инлэсь гурезь пуштроссэ пусйыса, – пальпотэ Камит. – Ӵапак сое ик асьмеос шуиськомы «гурезь», яке «гур», яке «гор»…

– Озьыен, инмар со «Ву» шоры кылдытэм «Чурытлы» ним сётӥз огдыре ик «ИН-БАМ» огдыре ик «ИН-МАР» кудъёсыз дуэ кадь тыбыр вылазы кык гурезез нулло – «Инмез» но «Бамез», «Инмез» но «Марез». Озьы-а сое валано? – выльысь выжыятэ Явуш.

– Ен яке Ин инмармы туж аспӧртэм гурезь кылдытӥз, вань «вуосты» котыр ласянь кыклы люкыса. Собере гинэ отчы, кылдытэм мугоре, «гуре» кадь ик, тыл гомӟытӥз… Лул шокчиз шуод-а, мар-а… Нимаз сое аслаз нимыныз: Ин, Ен, Инмар, Инбам, Небо, Бог…

– Нош «Ву» со «Дыр» ке… – аслэсьтыззэ азинтэ Явуш. – Соку пӧрме инмар «Дырез» люкиз «ву нуоно» но «ву нуэм» дыръёслы – «Вуэз-Дырез», герыен кадь, «гырыса-кырыса», «Дыр» шоры «геры бер», «чур» кылдытыса, кудзэ «Твердь» яке «Чурыт» шуиськомы… Тӥни со «Чурыт» инбаммы асьме азьын, котыр ласянь «Чур» кылдытэ, кудзэ шуиськомы «инвис», «ингож», «горизонт»…

– «Чур» ассэ «Чурытэз» кылдытэ?.. – шӧдтэк шорысь ачиз но пайме Камит.

– Озьы мон валасько, «Инвис» (Горизонт) «Чур» ке ӧй луысал, инбам но «Чурыт» ӧй луысал, соин асьмеос «Чур монэ» шуиськомы… – валэктэ Явуш. – Угось инмар со вуосты висъясь «Чурытэз, Кыретэз, Гурезез» нимано луиз. Малы ке шуоно адскисьтэм дыр шоры, ву шоры, «Чур, Чурыт» кылдытыса ассэ ачиз со адӟиськись кариз. Угось «ву нуоно» дырын, яке «ву нуэмаз» дырын асьмеос сое ум адӟиське. Дуннеез но ум шӧдӥське. Нош али дырын тани со, ваньмыз мае адӟиськомы. Со кыр кадь кырӟа, гур кадь гурла, гуретэ, гыр кадь гырдалля, геры кадь гыре, гырлы кадь гырла, гор кадь горе…

– «Инбам» со огдыре ик «чурыт но небыт гурезь», но со дыре ик «гыр» яке «гырлы», кудӥз асьмелэн мугормы кадь ик гурла но гырла аслаз «гураз» ӝуась тылызлы! – вань сюлмыныз шумпотӥз Камит.

– Инмар котьку мылкыдэз ӝутэ… – эшсэ гажаса пальпотӥз Явуш, собере шуак вераськонэз мукет ӧре воштӥз. – Нош отын, Кузон Базарын, мон уг пумиськы-а выльысь кык Явушен? Тани мар монэ тужгес но кышкатэ…  Мынам ӧй вал на ортчем дыре ветлэме… Малы ке умой ӧвӧл мыным…

Камит Базаре ветлон пумысен номыр ӧз малпаськы на вал. Солэн вань йырвизьмыз Узыбей котырын гинэ бугыръяськиз. Со малпа вал,  Явуш юри сое Узыбей бордысь мозмытыны тыршыса «мугор» но «дунне кылдон» сярысь юалляськиз. Но Явушлэн али юанэз бере солэн вань мугортӥз кыӵе ке тылъёс ортчизы. Со вань пушкыныз куалектӥз, мае ке туж тодмозэ тодаз вайыса. Йыркуосыз ик кынмизы, ву вылтӥ бызьылӥсь чонариос ортчизы кадь тыбыртӥз, кезьытэсь-кезьытэсь пытьыос кельтыса. Солэн, угось, ортчем дыре потылэмез вань ни вал… Бату хан сое трос пол сопала поттылӥз… Нош али Камит валаз мукетсэ… Со ноку ӧз малпалля, вуоно дыре но вуылӥз шуыса… Но али ваньмыз солы тодаз усиз. Та гырдаллясь нюлэс но, сусыпуос но, кионъёс но… Явушлэн та кылъёсыз бере со шӧдтэк шорысь валаз, мар со али Явушлы вералоз… Солэн мугорыз, оло ке, кыклы люкиськиз… Камит вань пушкыныз шӧдӥз аслэсьтыз ик ас мугорысьтыз тэтчыса потэмзэ… Ӧвӧл, чик но та уйвӧт ӧвӧл, со зэмзэ но мукет мугорен палэнысен Явушен вераськись мугорыз шоры учкыса сылэ… Кышкыт луиз Камитлы, но со вормиз ас кышканзэ. Азьвыл со малпа вал, уйвӧт адӟиз шуыса. Малы ке шуоно кыӵе ке бадӟым кион вылын пукыса, сыӵе ик бадӟым кион вылын пукись Явушен вераськон – нокыӵе зэмос дуннеез соку солы ӧз возьматы… Нош али, выльысен та учырез адӟыса, солы югдур  тунсыко потыны ӧдъяз. «Уг яра али со мугорлы люкетыны, кудӥз Явушен вераське, тодӥськод ке но, кыӵе али отын вераськон но малпаськон луоз. Сыл тэгыз!» – куриз со  ассэ ачиз.

– Мукет мугормы асьмелэн Кикы тэльысь гуын кылле ук… – оло ке палэнысен но со дыре ик ас пушкысеныз кылӥз со аслэсьтыз ик Явушлы верамзэ. – Асьмеос ужъёсмес лэсьтэммы бере выльысь отчы берытскомы… Соин ик оскы ас лулыдлы, тон отын кык уртэн уд ветлӥськы ук…

– Али уг ветлӥськы… – соглаш ӧз луы Явуш. – Нош отчы, ортчем дыре вуыса, мынам ӧвӧл сюлыко осконэ, мон ас мугоръёсыным уг пумиськы шуыса… Со Базарын тон но ӧй вал, Япанча но ӧй вал, тӥледлы капчи озьы вераськыны. Тӥ уд пумиське кыкетӥ мугореныды. Нош мон одно ик отын асэным  пумисько. Мон отын котькуд сэрегаз вал, мон ачим радъяй со Базарез, ваньзэ чакласа ветлӥ… Мынам шокчон дыры ӧй вал. Соин ик… Соин ик… Оло ке… Оло нош… Оло нош сомында мугоръёсын мон отын бызьылӥ… – валэктӥз аслэсьтыз марлэсь кышканзэ Явуш.

Камит азе шуак усьтӥськиз Кузон Базартӥ ветлӥсь Явуш. Одӥг гинэ Явуш ке отын луысал, Камит нокыӵе ӧй луысал. Но Явушъёс отын котькуд сэрегаз бызьыло вал… Камит выльысь но выльысь учкылӥз, но суред ӧз вошъяськылы – Явуш отын чик но огназ гинэ ӧй вал…

– Тон мар, «пуаны» быгатӥськод?.. – куаляк уськытӥз Явушез Камит. – Иське, тон отын котькуд сэрегын «пуаса» ветлӥсь мугоръёсыдлэсь кышкаськод?..

– Шонер, ӵапак солэсь мон кышкасько! Кызьы тон сое валад? – паймиз Явуш.

– Адӟи… – вакчияк валэктӥз Камит. – Кин тонэ озьы «пуаны» дышетӥз? – пальышаса учкиз со Явуш шоры.

– Нокин ӧз дышеты… – усьтӥськиз эшезлы Явуш. – Мон ачим но уг валаськы… Кызьы ке со ачиз озьы пӧрмылэ… Нырысь малпасько вал, аслам мугорыным отчы ветлытэк, мон туно синъёсыным гинэ озьы адӟисько. Нош адямиослэсь верамъёссэс кылзыса, мон валай, соос но монэ адӟиллям… Соос шуо, асьмеос ӵош пуким ук… Ӵош кенешим, соглаш луон кагаз кутӥм… Зэм но вань кагазъёсы мынам вань… Мон нокызьы ӧй быгатысал одӥг нуналскын сомында кагазъёсын ужаны… Соку гинэ мон валай, «пуаны» кутскиськем шуыса… Мон ӧй быгатысал со вакчи дыр куспын сомында ужез быдэстыны.

– Базарын тон зэм но сизьым-дас мугорен ветлӥськод… – эшсэ гажаса пальпотӥз Камит.

– Уг тодӥськы, мон ӧй лыдъя, оло сизьым, оло тросгес. Кужымы мынам соку зол быриз. Соин ик сандыкме но ӧй шедьты…

Камит пальышаса учке эшез шоры. «Пуась» адямиосты Камитлэн пумитамез ӧй вал на, аслэсьтыз песятайзэ сяна. Ма, песятаез но со азьын ӧз «пуалля». Со валэктӥз гинэ, «пуан» кужымез бугыртон понна, тунолы сыӵе югдуре шедёно, ку солы одӥг дыре отчыяз но татчыяз но вуоно. Ӵапак соку, пе, со ачиз но валаса уг ву, кызьы солэн трос мугоръёсыз кылдо. Нош Явуш, Базарез радъякуз, ӵапак сыӵе югдуре шедемын, солы отчыяз но татчыяз но огак вуоно вал. Тӥни малы солэн туно мугорыз уно лыдо луиз… Песятаез верамъя, самой секытэз ваньзэс со мугоръёсты сак возьыны. Малы ке шуоно со вакытэ тон Инмар кадь туж трос синмо, уно пелё, уно кыло но уно мугоро луиськод. Ӧд ке йыромы, аслэсьтыд лэсьтоно ужъёстэ ӧд ке вунэты, со мугоръёс ваньзэ озьы лэсьтозы, кызьы тон со ужъёсты быдэстыны малпад. Татын соослы люкетоно гинэ ӧвӧл, угось соос кылдэмын ӵапак созэ яке тазэ сюлэмшугъяськытӥсь ужпумдэ быдэстыны. Нош люкетыны ке шедьтӥд, соку кӧшкемыт арбериос луыны быгатозы. Радлык сӧриськоз. «Пуась» адями вылэ сыӵе ӵашйылонъёс лыктозы, анай эн куректы… Ӵапак солэсь кышка Явуш… Камит али кык мугореныз ик туж ӟеч валаз сое. Угось солы вылӥ дышетӥсьёсыз но трос веразы «пуан» сярысь. Кызьы Иисус Христос «пуаса» ветлӥз,  кызьы «пуаса» ветлӥзы солэн дышетскисьёсыз но… Кызьы туж тросэз вылӥ лулъёс одӥг дыре отын но татын но адӟиськылӥзы…  Камитлы озьы ик веразы, кызьы куд-ог тодӥсьёс, Христос кадь ик, одӥг чорыглэсь уно чорыг кылдыто, кызьы одӥг няньлэсь уно нянь, кызьы, одӥг ожчилэсь уно ожчи… «Сьӧдъёс» но та амалэн трос ужало, кылсярысь, чёртъёс туж уно чёртъёслы пӧрмытскыса уй куспын туж бадӟым черк ӝуто… Оглом, сыӵе «пуан» но «пуатон» амалъёс туж трос пумиськыло дунне вылын. Нош Камит ас вылаз огзэс но соосты ӧз утча на вал… Нош табере тани со ачиз но кык мугоро… Вылӥ дышетӥсьёсыз, шӧдске, солы юри таӵе учырез кылдытӥсь «вуко бугор» юнматӥзы. Дышетӥсьёсыз шуизы: кулэ дыръяз та быгатон ачиз лыктоз. Инмар асьмеды аслаз мугорызъя кылдытӥз. Нош Инмар одӥг дыре ик котькытын улэ. Соин ик адями но «пуаны» быгатэ, Инмар кадь ик. Ми тонэ дышетӥськом, пе, солы дась луыны, валаны, кызьы сыӵе мугоръёс кылдо, кытысь кылдо, кыӵе соослэн пайдазы, кыӵе ляб интыоссы, кызьы но ку соосын ужаны быгатоно…

– Мон малпасько вал, трос мугорен капчигес сандыктэ шедьтыны… – нош ик эшезлы паймыса пальыштӥз Камитлэн Явушен вераськись мугорыз.

– Уно мугорез секытгес серметаны… – луэм учыръёссэ тодаз вайыса лулӟиз Явуш. – Котькуд мугоры мынам кылдэ кыӵе ке одӥг гинэ ужез быдэстыны. Ужзэ быдэстэмез бӧрсьы со майтал шукы кадь пӧсьтэ но ыше…

– Но тынад уг луы шат сандыктэ утчась мугордэ кылдытэмед?.. – пальпотӥз Камитлэн мугорыз.

– Ӵапак со бордын ик ужпум. Мынам аслам уг лу соосты кылдытэме… – пирсэкъяса ик валэктӥз Явуш. – Табере мон кышкасько, со мугоръёсын пумиськыса соос пушкы «пуало» но, кытчы ке майтал шукы кадь пӧсьто шуыса… Яке, инмар мед утёз, ӵашъён тылъёс улэ шедё, кудӥз бӧрсьы лысьӧмъёсы гинэ ӵындыса кылёзы…

– Нош тынад уг луы шат астэ со мугоръёс пушкысь шедьтэмед… Валамед, кудаз тон ачид ветлӥськод? – паймыса юаз Камитлэн мугорыз.

– Мон уг тодӥськы, ку кыӵе мугорын луэмме… – нош ик секыт лулӟиз Явуш. – Мон та мугорылэсь но кышкасько… Куд-ог дыръя со мыным кинлы ке ужась «вуко» кадь потэ… Тон валаськод-а, мар сярысь мон?..

Явушлэн ӝуаса учкись синъёсыз пырак Камитлэн синмаз мертчизы. Камит шӧдӥз соослэсь вань кайгырытӥсь малпанъёссэ, кышканзэ…

– Мон валасько, мар сярысь верамдэ… – шунытак вазиз Камит. Мыным но со куд-ог дыре «вуко» кадь потэ… – пальпотӥз со пыдэстэм Инбам шоры учкыса. – Но тон эн кышка, тон соосын уд пумиськы, малы ке шуоно «пуась» мугоръёс ог-огзы доры потыны уг быгато, соосты дырлэн чурез висъя. Соос тынад ваньзы аьсэлэн дырзы пӧлын бызьыло…

– Тон озьы-а малпаськод?.. – пайме Явуш.

– Соос уг быгато одӥг дыр шоры кылдыны… Соос кылдо отчы, кытчы тон ачид уд вуиськы. Кылдо дырез вормон понна. Ваньзэсты соосты дыр висъя.

– Тон, Камит, буйгатӥд монэ… – каньылак шокчиз Явуш. – Тон зэм вераськод, мон соосты ачим но пӧртэм дыръёсысь адӟисько, нош соос ог-огзэс уг адӟо…

Явушлэсь та тунсыко учыръёссэ пальышаса кылзэмез бӧрсьы, Камитлэн мугорыз мур-мур учкиз Явушлэсь дуннеен герӟась кусыпъёссэ. Явушлэн дунне герӟетэз кыклы вайяськемын вал. Одӥгез инбамозь ик кошке, мукетыз отчы вуытозь уг тубы, бездэ… Выжыез но солэн озьы ик, пыдлось тубисез табере лябӟемын, кылямын, нош бӧрысьгес кылдэмез кужмо ке но луэмын, со зэмос выжы кадь музъемен уг герӟаськы… Озьыен, соиз но кужым уг басьты…

– Тынад сефирот писпуэд кыклы вайяськемын… Отысь ик кылдо тынад кышканъёсыд… – усьтӥз ас адӟемзэ Камит. – Сефирот писпуэд тынад  табере христиан дуннеен кусып возе, нош христиан дуннеед уг быгаты тонэ ас выжыеныд герӟаны…

– Нош тон быгатод-а монэ выжыеным герӟаны?.. – шуак улӟиз Явуш.

– Но со понна нырысь тонэ христиан герӟетэд бордысь люконо луоз… – валэктэ Камит.

– Люк монэ али ик со эгрегор бордысь! Дум ас выжые борды! – ӝог соглаш кариськиз Явуш, оло ке со кемалась ини та юанэз возьма вал. – Мынам уг поты кулэтэм шорын но «пуаса» ветлэме… – воксё сюлворыса ик куриз ни со…

Одӥг эгрегорысь мукет эгрегоре поттон со огшоры уж ӧвӧл. Со понна туж зол йӧтто эгрегор кузёос, кудъёсызлэн кужымзы мертантэм. Шуккет соку ик вуэ… Вылаз ик Камитлы одно ик кыл кутоно луоз на «Сопалаз Кенешын». Отын уг учко курись лул шоры, кыл кутэ «лэсьтӥсез». Но озьы ке но, Камит ӧз пумитъяськы эшезлэн куронэзлы. Со нош ик учкиз Явушлэн герӟетъёсыз шоры. Отӥзэ ини со ачиз но ӧз вала, кызьы ужамзэ. Оло ке мугорыз ачиз ваньзэ лэсьтӥз. Явушлэн мугорыз, визнан пукы кадь, кион вылысьтыз омыре ӝутскиз, собере каллен гинэ музъем вылэ васькиз… Пыдъёсыз музъем борды выртонтэм лякиськизы… Музъемлэсь озьы «чуп каронзэ» куд огез мырдэм чидало. Нош Явуш шумпотыса сылӥз, вӧсь карись тулкымъёс ке но солэн пыдъёстӥз ветлӥзы… Тани кӧня ке дыр ортчыса со быгатӥз ни пыдъёссэ музъем бордысь вырӟытыны.

– Тау, Камит… – катэм мугорызлэсь мозмиськыса вераськыны кутскиз Явуш. – Тон монэ выльысен думид Желялэн жильы бордаз… Озьы ук? – шумпотыса учкиз со Камит шоры.

– Мон тонэ люки христианъёс бордысь, герӟай атыкай выжыеныд. – пальпотӥз Камит. – Табере асладэныз гинэ мугореныд Базартӥ ветлод…

– Мон шедьто-а табере сандыкме? – юаз Явуш.

– Табере, мон малпасько, унояськиз тынад со доры матэктонэд. Табере ас выжыдэ шӧдонэд но юнмалоз… Тон ӟечгес адӟыны кутскод. Угось асьме выжыосмылэн осконзы христианъёслэсь трослы вазьгес кылдэмын… – валэктӥз Камит, христиан эгрегор кузёослэсь  утчаськемзэс шӧдыса. Берпумез Камитэз туж зол паймытӥз. Со возьма ни вал христианъёслэсь шуккетзэс, но соос малы ке сое но Явушез но уг адӟо, уг лу валамзы, кытысен вотэссы сӧриськиз… Та Япанчалэн шедьтэм тэраез, иське, озьы каре… Уродэз ӟечезтэк уг луы… Озьыен, уз на вуы шуккетсы… Нош ачиз со малы, иське, соослэсь утчамзэс адӟе?.. Та Камит понна, зэмзэ но туж валантэм на вал…

– Кыӵе кемалась мынам пыдъёсы музъемез таӵе ӟеч ӧз шӧдэ ни…  Табере синмы но ваньзэ яркыт адӟе… – малпанъёссэ солэсь уриз Явуш, пыдъёссэ курка сямен музъем вылэ пуктылыса ветлонъяз. – Тау тыныд, Камит, мон туж шумпотӥсько, та нунал вуиз шуыса. Зэмзэ ке, мон кемалась та нуналэз возьмай. Тани таӵеен мон асме котьку шӧдӥсько вал, пичи дыръям бусыостӥ ветлыкум. Ас атае вӧзын, анае вӧзын, калыке пӧлын… Но Муское вуыса черкын пылатэмзы бере, мон вань та шӧдонъёсме ыштӥ… Но туннэ мон валай, со одно ик быдэсмоз шуыса…

– Малы тон озьы валад? – тунсыкъяськиз Камит, Кизили Пуртсэ кӧрыказ интыяса. – Мар? – шуак паймиз со Кизили Пуртсэ киысьтыз адӟыса. – Ку со мынам киям кырмиськиз?..

– Али кырмиськиз… – пальпотӥз Явуш. – Азьвыл ӵапак та возьвылын пумиськыкумы Кизили Пуртэд тынад ӧй вал на ук… Учкы ай мыштэ… Со мугорыдлэн со ӧвӧл…

Камит шуак берытскиз но мар шуыны абдыраз… Со мышкын огзы бӧрсьы огзы сыло вал аслаз ик кыкетӥ мугорыз, со сьӧрын Явушлэн, нош Явуш сьӧрын Япанчалэн… Сыло гинэ ӧвӧл, соос бездыса сылмо ни вал… Ву тылкымъёс вылын вырись мугор вужеръёс кадь соос вакчи дыр куспын ышизы… Омыре пӧсьтылӥзы… Оло ке ваньмыз та син азяз гинэ Камитлы адӟиськиз…

Камитлэн мугортӥз нош ик кыӵе ке тылъёс ортчизы. Собере йыркуосыз кынмизы, тыбыртӥз сапылес пытьы кельтӥсь кезьыт кошкиз.

– Иське, тон монэн вераськыкуд со мугоръёсмес но адӟыса сылӥд?.. – паймиз Камит.

– Озьы… Но мон ӧй возьматы, соосты адӟисько шуыса… Тон но соосты ке адӟид, номыр ӧй пӧрмысал, тон соку ӧд герӟасал ни монэ Желялэн жильы бордаз… – пальпотыса валэктӥз Явуш.

– Тон но Япанчаез адӟид-а?.. – паймыса юа Камит.

– Адӟи. Мон сое азьвылаз учыре ик адӟи… – куаныса ик пальпотӥз Явуш.

– Иське, со но «пуаны» быгатэ?.. – серектӥз Камит.

– Иське, быгатэ… Малы тон солы паймиськод, асьмеды куиньнамес ик вылӥ дышетӥсьёс дышетӥзы… Нош та учыр, табере мон валасько, «вуко» кадь соосын ваньмы борды юнматэмын вал… «Пуаны» быгатэммес эскерон понна… Озьы ук? – одӥг дыре валэктэ но со дыре ик юа Явуш.

Камит соглаш луэ Явушлэн валэктонэныз. Солэн йыраз выльысен яркыт суредъёсын кошкизы аслаз ик Явушлы алигес гинэ верам кылъёсыз. «Котькуд адями та дуннее аслаз «вукоеныз» вордӥське. Кудӥз ке со «кылбугорезлэсь» 100 люкетсэ ик быдэстэ. Кудӥз ке ӝынызэ но быдэстыны уг вормы. Нош кудӥз ке туж ичизэ гинэ быдэстыны вутске. Мугъёсыз солэн пӧртэм. Котькуд лул та дуннее вордӥськыкуз, вунэтэ аслэсьтыз «вукозэ-кылбугорзэ». Сое тодэ солэн «нырысетӥ монэз» гинэ, кудӥз вылӥ дуннеын аслаз самой вылӥ мертэтаз улэ. Пиосты куиньназэс ик туж трос дышетӥзы асьсэлэсь «нырысетӥ монзэс» кылзӥськыны… Со чик но капчиен уг сётӥськы, со понна оло вань улондэ дышетсконо. Камитлы но со капчи уг йӧты. Быгатысал ке со али аслаз «сопалась монэныз» герӟаськыны, солы сокем ӝожмыт ӧй луысал… Но малы ай со ӝожомыт луыны кулэ?.. Учкы но шумпоты, кыӵе зол ваньзэ малпаллям вылӥ дышетӥсьёс… Соос куиньназы ик «пуаны» быгатонзэс адӟизы… Куиньназэс ик соосты нокин адӟыны быгатӥсьтэм интые пыртӥзы… Малпаськытӥзы дунне кылдон сярысь, адями но дунне мугор, адями но дунне бугор сярысь… Таӵе валанъёсты кытысь басьтысалыд на?.. Но та но Камитэз уг ни паймыты. Самой паймымонэз мукетыз бордын, угось ваньмыз та, мар соосын али луэ, мае соос котыр адӟо, со йырвизьлэн уйвӧтэз. Ваньмыз та йырвизь пушкын мынэ – вань улон, вань дуннелэн, вань инсьӧрлэн, Ӟазег Сюреслэн, Свароглэн Кругезлэн паськытанэз, берганэз, ваньмыз, мар туннэ соосын луиз но луоз – ваньмыз со тынад йыр пушкад гинэ мынэ. Нош кыре сое  бадӟыматыса выжытэ, «чурытомытэ» вань дуннеысь, инмысь но, инсьӧрысь но йырвизьёс пыртӥ ортчись «чур». Ваньзылэн йыр пушказы мынэ со адӟон. Ваньзы сое пӧртэм сямен адӟо. Кин ке улӥысен, нымы-кибыослэн, турын-куаръёслэн синъёссы пыртӥ, кин ке вылӥысен вылӥ лулъёслэн учконэнызы, кин ке вылласянь, кин ке пушласянь, котырласянь ваньзы асьсэ сямен адӟо та улонэз, ваньзы сое кыре выжыто, аьсэ пыртӥ ортчись «чур» борды «чурытомытыса». Озьы кылдэ чурыт дунне, кудӥз пӧлын асьмеос улӥськомы, адӟонмес ортчиськомы. Вылаз ик котькудӥзлэн сое луэ «тупатэмез», кинлэн ке урод пала, кинлэн ке умой пала… Тани тазьы ик, кызьы Камит али тупатӥз Явушлэсь вайяськем Сефирот писпузэ… Шурдыт но кышкыт, кышкыт но чебер та ваньмылэн ӵош кылдытэм чурыт адӟон дуннемы! Брахмалэн уйвӧтэз!

– Кылзы ай, малы тон шуиськод асьмеос куинь кузя гинэ? – аслаз йыраз лыктэм малпанъёсызлэсь кышкаса кадь, шуак юаз Камит пыд кужымъёссэ эскерыса ветлӥсь Явушлэсь.

– Тон мар сярысь? – шуак ӧз вала сое Явуш.

– Тон, кылсярысь, «Тыл» дуннеен герӟаськемын… – ас юанзэ ик валэктыны кутскиз Камит. – Мон «Ву» дуннеен. Япанча «Тӧл-Омыр» дуннеен. Нош луыны кулэ на ньылетӥез «Музъем» дуннеен герӟаськем лулмы…

– Тон малпаськод со ньылетӥез – Узыбей? – шуак шедьтӥз Явуш.

– Мон мукетсэ нокинэ уг адӟиськы… – аслаз шӧдтэк шорысь вуэм валанэзлы дурыстэм шумпотӥз Камит. – Нош со озьы ке, мон табере валасько, малы мон сое утчасько…

– Тыл но Тӧл, Ву но Музъем… Тон сямен асьмеос ньыль луыны кулэ?.. – малпаськонэ усиз Явуш но. – Вузчи, ожчи, туно но эксэй.  Озьы ик, шӧдске, со луыны кулэ… Тароысь арканъёсын кадь ик… Иське, Узыбей но асьмеос пӧлысь?.. 

– Мукетыз ӧвӧл ук со сяна… Вылаз ик Узыбей музъем дуннеен герӟаськемын. Кин, кин, нош мон тодӥсько со сярысь… – шумпотэмзэ ватытэк шудо воректӥз Камит.

– Кылзы ай, нош Япанчалы мар отын Кузон Базарын утчано, Узыбеез тазьы утялтэм бӧрсяз?.. – кионэз вылэ выльысен пуксьыса, шӧдтэк шорысь юаз Явуш…

– Япанчалы но вань отын мар басьтыны… – Япанчалэсь улон сюрес нюжаоссэ адӟыса вераз Камит.

– Тон сое али но уд адӟиськы?.. – малы ке ӧжытак пальпотыса, аслэсьтыззэ  азьлантӥз Явуш.

– Уг. Сюрессэ адӟисько. Нош ачиз Бус пӧлы кадь зымиз… – ялан ай ас пушказ мукетсэ малпаса вераз Камит. – Узыбей но соин ӵош бусаськиз… Туж кышкамын Узыбейлэн анаен-атаез, мукет кулэмъёс но сюлмасько. Асламез татае но кышкамын, Усман тата но тулкымъяське. Ӟапык но, соосын ӵош татаелы юрттыны бызись ошкуйчиос но сюлэмшугъясько. Нош соос, асьсэос, нокинэ уг адӟо, асьмеды но кемалась ыштӥзы… Али но уг адӟо…

– Ма, тон но адӟемысь дугдӥд вал ук?.. – пайме Явуш.

– Озьы…

– Нош али, та шорын, выльысь адӟыны кутскид?.. – туж шудо серекъяны кутскиз Явуш.

– Секытэнгес ке но, адӟисько… Япанчаез но Узыбеез сяна ваньзэсты адӟисько… – Явушлэн шуак воштӥськемезлы паймыса вераз Камит. – Мае тон мыным усьтыны турттӥськод?.. – меӵак юаз ни со Явушлэсь, соизлэсь мар ке ӟубистыны турттэмзэ валаса.

– Табере мон тодӥсько, малы асьмеды но, ассэ но, Узыбеез но Япанча татчы ваиз… Со юри асьме борды юнматэм «вуколэн бугорез», –  шузи кадь шудо мынекъя Явуш.

– Малы со асьмеды татчы кыскиз?

– Ужпум та тэра бордын, кудӥз  асьмелы «Шузилэсь Арканзэ» усьтэ…

– Валэкты…

– «Шузилэн Арканысьтыз» ачиз «Шузи» номыр сярысь малпаськытэк, инбаме учкыса, дыртыса вамышъя. Солэн азяз муньылонлэн ярдурез, одӥг вамыш лэсьтӥз ке, со отчы усёз ни… Нош со уз кулы, муньылон кадь ярдур улын зарезь ву тулкымъяське. Со вуэ усёз. Пельпум вылаз солэн боды, кудӥз борды ошемын туноослэсь тодонъёссэс суредась кышетэн керттэм «калтосэз». Вӧзаз вамышъясь пуныез мар ке вераны солы турттэ, нош со уг кылы… Асьмелы но кионъёсмы мар ке вераны туртто вал, асьмеос соосты ӧм кылэ… Асьмеос но нокинэ ум кылӥське, нокинэ ум адӟиське… Асьмеды но та гоп вӧзысь нокин уг адӟы, нокин уг кылы… Тон валаськод-а, мар мон верасько?..

– Валасько… «Шузи» со тужгес но кужмоез Аркан. Со нырысетӥез, «ноль» лыдпусэз нуэ…

– Но та гопысь потонмы шорын мукет адӟисьёс уг ке но адӟо, тон секытэн ке но адӟиськод… Озьы ук?

– Озьы…Табере адӟисько… Собере мар?..

– Озьыен, ӵап татӥ кошке та адӟиськисьтэм интылэн адӟиськисьтэм кенер гожез, нош та шорын солэн ыбесэз… Соин тон татысен секытэн ке но, адӟиськод. Нош мукет лулъёс асьмеды уг адӟо, малы ке шуоно ыбес сьӧры асьмеос ӧм потэ на. Нош сопала Кузон пала пыдлогес ке кошкимы, тон умойгес адӟыны кутскод… Асьмеды но соку адӟозы… Соин ик та гоп асьмеды ялан татчы Кузон пала поттэ… Ялан татчы улля… Нош сопалаз, кытын номыр уг адӟиськы, кытын пытьы но ӵушиське, со асьмеды пырыны уг лэзьы… Ӵап соин Япанча асьмеды сопал дурысен гопе пезьгытӥз, кытысен нокинлэн, кулэмъёслэн но, кужмо адӟисьёслэн но, тынад но мынам но адӟеммы уг луы…

– Асьмеос медам адӟе, медам валалэ шуыса… – Явушлэсь малпанзэ азьланьтыса шара малпаське Камит. – Нош асьмеды пезьгытэмез бере кошкиз отчы пыдло, кытын нокинлы номыр уг адӟиськы…

– Озьы… – серектэ Явуш. – Вылаз ик, шӧдске, со таӵе амалъёссэ огпол гинэ уже ӧз кутылы ини… Укыр провор ужаз… Со, шӧдске, ачиз но валатэк, кемалась ини «Шузилэн Арканаз» улэ…

– Тон малпаськод сьӧд ведӥнъёссэ но тазьы йыромытылӥз?..

– Озьы…

– Тынад, Явуш, кытысь ке кылэмед вань-а таӵе интыос сярысь? – юа Камит.

– Кылэме вань, соос дунне вылын трос пумиськыло, музъем вылын гинэ ӧвӧл, зарезьёсын но, камъёсын но… Тодӥськод-а, кытчы изьытӥз, пельдураз шуккыса, Асклепиез Зевс? Нокин адӟисьтэм интые. Ӝуё-жуё бусые. Сое отысь Хирон кентавр гинэ туж кема утчамез бере шедьтыны быгатӥз. Собере улӟытӥз сое, аслэсьтыз кысӥсьтэм ӝыны улонзэ сётыса… Тон тодӥськод ук… Учкы, татын но нокинлы адӟиськисьтэм ӝуё-ӝуё инты…

– Хирон Асклепиез шедьтӥз бере, мон но Узыбейме шедьто. Котькытчы мед сое ватоз Япанча, но мон сое шедьтытэк, выльысен сое улӟытытэк Кузонэ уг вырӟы. Кык мугорыным ик, кылме тыныд сётӥсько! Тау, тыныд, Явуш! Тон ачид но, оло, али уд валаськы, мае тон асьмелы усьтӥд та Быдӟым Ярдурысь «Шузилэсь Арканзэ» адӟыса. Нокудмы, ньыльнамы пӧлысь, аьмеос сое ӧм валалэ на. Ваньмы татчы Аркан сярысь валатэк вуимы. Япанча аслэсьтыз ужзэ ужаса та Ярдуре лыктӥз, асьмеос кыкнамы – со сьӧры уйиськыса, Узыбеез Япанча ваиз. Но одӥгез шонер но зэм, та Арканэз асьмелы дасязы вылӥ дышетӥсьёсмы. «Шузилэн Арканэз» асьмелы шуэ: «Табере тӥляд выль улонды кутскиз, вужез быриз! Табере тӥ тодмотэмтӥз мыноды, «Шузи Арканлэн» дуннетӥз, асьтэлэн лулдылы гинэ оскыса!»

– Но отын верамын ӧвӧл ук вуэ усён сярысь… – пальпотэ Явуш.

– Отын вуэ усён сярысь верамын ӧвӧл, верамын усён сярысь малпаськытэк мыныны, нокинлэсь кылзӥськытэк аслэсьтыдзэ лэсьтыса вамышъяны косэмын… Оглом аслэсьтыд «кылбугордэ», «лабиринттэ» усьтыса…

– Нош асьмеды  вуэ уськытӥзы… – серекъя Явуш.

– Асьмеды «тыэ» гинэ уськытӥзы «Шузилэсь Арканзэ» валан понна…  Мон сямен, Узыбей но, Япанча но со сярысь уг валало ай… Нош асьмеос валамы ни… Соин ик тыныд, Явуш, Кузонэ дыртоно… Япанча но, мон сямен, Узыбеймес кытчы ке думыса яке ӝокатыса, отчы мынэ ни аслаз адӟиськисьтэм интыостӥз асьмелы адӟиськисьтэм валэныз…

– Кыӵе валэныз? «Киёнэныз» шу? – шонертэ сое Явуш.

– Киёнэн асьмеос ветлӥмы «Шузилэсь Арканзэ» валан понна. Нош Аркан шуэ: «пуны-кионъёслэсь», эшъёсыд ке но соос луизы, утемзы потыса ке но утӥзы, кылзӥськоно ӧвӧл. Лэсьтоно озьы, кызьы ачид адӟиськод-валаськод!». Тынад кадь ик валэныз Япанча мынэ ни… – серектэ Камит. – Кион вылын со Кузонэ уз ветлы, ачид валаськод.

Ӵапак со вакытэ Явушлэн кионэз сьӧд-сьӧд чилясь таза ужпилы берытскиз.

– Мар та? Тон-а сое озьы пӧрмытӥд? – пайме Явуш.

– Асьмелэн кионъёсмы олокинлы но пӧрмытскыны быгато… Арканын но со озьы ик… – валэктэ Камит. – Соос но мугорысь мугоре «пуало», Оштормаысь Матрон апай кадь, кудӥз ӟазеглы, коӵышлы, куакалы, коӵолы, яке карнанлы, сапеглы, бодылы берытскылыны быгатэ, яке нош тыл луыса мунчо гыркытӥз потэ, яке вуэ тэтчыса соку ик Кузонысь шурысь мычиське. Огкылын мӧзмыт уз луы тыныд сюрес вылын. Кион валэд вераськыны но быгатэ…

– Быгатӥськом… – оскытэ Явушлэн валэз. – Кызьы монэ нималоды? – аслэсьтыз выль мугорзэ эскерыса кадь, мугорзэ ӧжытак сэзъялтыса гырдалтэ со. – Кион мугорылэсь мозмыса, быдэсак вал кадь ужан понна, монэ одно ик «чурытомытоно», мыным ним кулэ, нималэ монэ, Инмар но ук ассэ  нимаз, ассэ кылдытэмез бере… Котькудӥзлы ним кулэ, «чурыт» луон понна.

– Сабыр ним яралоз-а? – юа Явуш. – Мыным сабыр вал кулэ, доласькисьсэ мон уг яратӥськы, мултэс вераськисьсэ но, валад?..

– Соку дыръя нимы Сабыркион медло… Кион нимме но, бурдъёсме кадь, ыштэмэ уг поты… – вазе кион-вал.

– Ярам Сабыркион ке, Сабыркион… – соглаш луэ Явуш. – Камит, нош Япанча асьмеды адӟе-а?..

– Уг, дыр… Отысен, пыдлосен, ачид вераськод ук, нокин уг адӟы… Но со куаныса мынэ, асьмелэсь та интыын сылэммес «пуам» мугореныз адӟемез бере… Юн оске, Узыбеез нокызьы ум шедьтэ шуыса. Мон шӧдӥсько, со та интыын но сылӥз, асьмелэсь пытьы бертӥз лыктэммес учкыса. Собере сопал ярдуре кошкиз, та гопаз ӵендытон понна…

– Нош мон малы та шорысен тӥ кадь ик уг адӟиськы?.. – юа Явуш.

– Со понна выжы герӟетдэ юнматоно. Япанча выжыосыныз туж юн герӟаськемын. Мынам но выжы кусыпъёсы юнэсь. Ма, тон но ӝоген адӟыны кутскод, атаедлэсь сандыксэ берыктӥд ке, эшшо но золгес адӟод… Атаед ӧз вуы тонэ выжыеныд герӟаны, «сьӧдъёсын» малпам шудтэм учыре сюрыса, вогул туноез утьыса быриз…

– Мар сётоз мыным сандык, атаелэсь берпум гожтэтъёссэ сяна?.. – ӧжытак ӝожгес мылкыдын юа Явуш.

– Ӵапак озьы малпаськемысьтыд ик тон ортчемаз Базарын пумиськыны ӧд вуы вогулъёсын… Соин ик ӧз кылды тынад сандыктэ утчась «пуась» мугорыд. Нош вогулъёсын пумиськыны вуысалыд ке, соку тынэсьтыд но выжы кусыпъёстэ атаедлэн сандыкез юн герӟетъёсын радъясал… Мон али но адӟисько: со сандыкын тынад атаедлэн «мардлаез», кылле. Тон тодӥськод ук атаедлэсь со кристалл шарзэ… Вань тынад сое кутылэмед?..

Явушлэн синвуосыз ик быльырскизы. Вань сюлмыныз христиан черклэн улонэныз герӟаськеменыз сэрен, та дырозь со уг вала вал, мае утчамзэ. Христианъёс пӧлы сюрыса со унозэ аслэсьтыззэ вунэтӥз. Зэмос туно учкысал ни, мар атаезлэн сандыказ кылле. Зэмос туно валасал ни, мае солы нырысь атаез кельтыны турттоз. Нош Явушлэн малы ке йыраз нырысь ик лыктӥзы атаезлэн кельтэм гожтэтъёсыз… Со лыдӟыны но соосты кышка вал, уг поты вал бӧрдэмез. Соин ик ӧз учкылы сандык пушкы… Ялан кыкетӥ радэ кельтӥз атаезлэсь гожтэтъёссэ… Табере со  валаз, «мардла», тӥни мар солы уг тырмы вылэм аслаз тыл дуннеяз. Со тодаз вайиз, кызьы атаез сое «мардлаен» ужаны дышетӥз. Кызьы солэсь юаны, кызьы со пыртӥ лулъёсын вераськыны, кызьы адӟыны выжыостэ, адямиослэсь дуннеоссэс, валаны, кыӵе Таро карталэн Аркан пушказ соос уло. Кызьы «мардла» тыла но бура, кызьы солэн тыл пушказ пыроно. Кызьы Явуш со сярысь вунэтӥз? Со малпа вал «сьӧдъёс» сое атаез киысь басьтӥзы, быдтэмзы бӧрсьы… Явушлы шуизы, вогулъёс солы атаезлэсь пичи сандыксэ сётыны туртто, нош мар со сандыкын, нокин уг тоды вал…

– Со сандыкын «мардла»?… – синвуосыз ӟузыр вияло Явушлэн.

– «Мардла»… – пальпотэ Камит. – Кудӥз тыл дуннеысь адямиосты гинэ «мардланы» быгатэ, кудӥз тонэ шӧдэ, ялан тон доры матэктыны турттэ, со тодэ тӥлесьтыд вирдэс, тӥляд выжы вирдылэсь гинэ со ужа…

– Камит, оло зэм, оло ӧвӧл, мон но табере сое адӟисько… Адӟыны кутски…

– Тон христиан тыл дуннеедлэсь палэнскыса, «мардладэ» тодад вайид, дурӟытӥд сое, табере со ужаны кутскиз… Соин сэрен мон, шӧдске, бадӟым янгыш лэсьтӥ… Уг яра вал мыным со сярысь али тыныд  вераны…

– Малы уг яра вал?.. – пайме Явуш.

– Табере сое «сьӧдъёс» но адӟозы… Тон дырызлэсь вазь дурӟытӥд сое. Кузон Базаре матэктэмъяд, со эшшо золгес ужалоз. Табере тыныд дыртыны кулэ, уз поты «сьӧдъёслэн» сое тон кие сётэмзы… Оломар но малпалозы, «мардлаед» тонэ медаз «мардла» шуыса…

– Уг сёты мон сое нокинлы, эн кышка, «мардла» мынэсьтым гинэ кылзӥське… Со ваньзэ адӟе но вала… Со азьло ик ивортоз мыным… Ми валалом мар карыны… – Явуш валзэ Камит доры матэктытӥз но вань сюлмысьтыз эшсэ ӟыгыртӥз. Камит но озьы ик со борды ӟыгырскиз. Малы ке ӝож вал соослы люкиськыны. Кыксы ик соос шӧдӥзы, таяз учыре дунне соосты люке шуыса.

– Табере мон ӟеч валасько, малы мон дыртыны кулэ… – ӝожмыт лулӟе Явуш. – Табере ваньмыз выль сямен луоз…

– Мын, Явуш, мыным но дыртоно… – нюромем синъёссэ ватытэк Явушез ӟыгыртэм киоссэ мозмытэ Камит.

Нокин уг яраты люкиськонэз. Угось, оло берпумзэ соос тазьы ӵош одӥг сюрес вылтӥ мынӥзы. Сюресъёс куке-соку одно ик люкисько. Камит но, Явуш но сое валало.

– Тон ачид вуод-а Кузонэ? – берпум юанзэ сётэ Явуш.

– Кызьы сотэк… – пальыштэ Камит. – Куиньнамы ик асьмеос асьме сюресъёсмы вылтӥ отчы вуыны кулэ…

– Ярам, иське, пумиськытозь… – лулӟе Явуш.

– Мед озьы луоз… – Камит но лулӟе, ӝож мылкыдзэ пыдло кырмыса…

– Оло, тыныд али кулэ ӧвӧл Узыбеез утчаны?.. – нош ик уг чида юатэк Явуш.

– Узыбей со мынам адӟонэ – Макошен, Быдӟым Кобылэн анаеныз гожтэм сюресэ…

– Мон оскисько тыныд… – пальпотыны тырше Явуш.

– Мон но оскисько тыныд… – пальпотыны тырше Камит.

– Иське, ӟеч сюрес кыкнамылы ик!

– Иське, ӟеч сюрес кыкнамылы ик!

Явуш кошкиз. Вал-кионэз сое туж ӝог нуэ. Тани ӝоген бусъёс сьӧры ышоз ни. Собере чилектэм кадь Кузон азьын кылдоз. Мар табере Камитлы кароно, со ачиз но уг тоды. Но со одно ик тодоз, кызьы Япанчалэсь пытьызэ шедьтыны та ӝуё-жуё нюлэсысь…

Хирон кентавр, валамон, Быдӟым туно-пеллё вал. Ачиз Апполон, ачиз Артемида сое дышетӥзы. Юнме шат со Пелеон гурезьын улӥз, аслэсьтыз пеллё луэмзэ вань дуннелы усьтыса. Юнме шат со доры асьсэос инмаръёс но быдӟым геройёс но дышетскыны ветлӥзы. Со дышетӥз Ясонэз, Диоскуръёсты, Ахиллэз, Орфеез, Асклепиез, Патроклэз но уно мукетъёссэ… Но со но огназ кошкиз Асклепиез утчаны. Камит но огназ шедьтоз, уз куры со понна Зэрпалэз но, Палэсмуртэз но… Солы аслыз шедьтоно, аслаз кужымыныз. Озьы малпаськиз Камит но кионзэ гоплэн мукет палаз нуыны косӥз. Юнме со Явушлы «мардла» сярысь усьтӥз, шӧдске, табере капчи уз луы солы сандыкез доры вуыны. Но мукет ласянь, кужмоятӥз сое «мардла», выжыосыныз герӟаз… Соиз но умой!

Камит нош ик учкиз кулэмъёслэн дуннезы шоры, ӧй вал на отын Узыбей. Озьыен улэп на солэн мусоез, ӧз на виы сое сьӧсь Япанча. Но Камит шӧдэ, солы дыртоно. Табере шӧдонэз  гинэ сое азьлань нуоз. Кӧня ке пыдло кошкиз ке, нокинэ со уз ни адӟы. Кышкатӥсь шимес нюлэс гинэ со азе кылёз, аслаз мырдэсо но вукылэс сямыныз.

– Кошким… – шуэ Камит кионэзлы.

– Мар ке мынам уг поты сопала мынэме… – вазе кионэз.–  Мынам пыдъёсы сопалан коскало, кӧты чутыръяны кутске. Отысь котькуд писпу, котькуд ӝуй куар берлань берытскыны косэ… Но тон мынам кузёе бере, мон кылзӥськыны кулэ. Пыроно ке ни, пыром, мар карод тонэн…

– Тон кулӥсьтэм лул ук, малы кышкаськод?.. –  серекъя Камит.

– Мон така турын вӧзын гинэ  кулӥсьтэм, нош татын котькуд ши боды, котькуд агу вень монэ быдтыны быгатэ… Зэмзэ ке, Явуш сьӧры кошкыса ӟечгес луысал… Озьы косӥз Кизили Пуртэд… – ялан аслэсьтыззэ мырдэ кион.

– Мон ачим тодӥсько, мар мыным карыны… – уре сое Камит. – Ворса ымдэ но кошким. Лу ошкуйчи кадь. Вань лулыныд ёросэз кылзӥськись.

Кион соку ик чалме. Зэмзэ ке, Камит татын кузё ук, ачиз Арсавыл туно, нош со огшоры кион гинэ, шузи кучапи «Шузилэн Арканысьтыз», кудӥзлы така турын сиыны шуд усиз. Со туннэ юри Камитлы сётэмын Соин ик чалмы, лу ошкуй. Озьы малпаськиз кион но, шӧрласа ке но, кошкиз азьлань.

Соос каллен пыдлогес но пыдлогес гоплэн сопал дураз пыризы. Кысӥз кадь дунне, нокинэ уг адӟы ни Камит. Музъем ассэ валантэм возе. Тани али гинэ азьпалан ӵошкыт вал, табере отын мур нюк кылдӥз, котырсконо луоз.

– Пӧртмаське… – шуэ кион.

– Мед пӧртмаськоз… – шуэ солы Камит. – Мон табере «Шузи», номыр шоры учкытэк аслэсьтымзэ лэсьтыны мынӥсько.

Ӵапак со дыре бадӟым писпуысь Камитлэн йыр вылаз оломар быдӟа  ӝуй комок усиз… Кион соку ик палэнэ тэтчиз, кыкназы ик шӧрлазы…

– Ӝуй усиз… – валэктэ Камит, бордаз кырмиськем ӝуез ас вылысьтыз кыскаса. Но та кутсконэз гинэ вылэм на, писпу сьӧры потэмзы бере соос азе шонтӥськиз оло ке кыӵе ке туж секыт зырэн палгытэм йыро лысьӧм, солэн гадь шораз ик лыоссэ вайяса улэ сисьмыны кутскем ӵог…

– Чебер пумитало асьмеды… – кышканзэ ватыса серектэ кион.

– Чебер! Мар карод, дунне уг воштӥськы, урод вединъёсты озьы быдто… – валэктэ солы Камит… – Асьмеос уродэсь ӧвӧл, дыр, ук?.. – буйгатэ со.

– Котьма ке но, мон таӵезэ вань улытозям ӧй адӟы… – лысьӧмез огпала кельтыса, палэнтӥгес азьлань кошке кион. Ӵап со вакытэ соос вӧзы кӧшкемыт вужер матэктӥз. Кыкназы ик соос куалектӥзы…

– Прохор?.. Тон кытысь вуид? – пайме Камит аслэстыз тодмо бабасырзэ адӟыса.

– Мон валай, тыныд али юрттэт кулэ… – пальпотэ Прохор. – Кин эшшо быгатоз калыклэн ноку ветлымтэ ӝуйёсыз вылтӥ тыныд сюрес возьматыны?.. Шузи малпан со, астэ Хирон кентаврен ӵошатыса, кион вылын тодмотэм ӝуйёс вылэ потыны. Хирон со Кронослэн пиез, Зевслэн агаез, кулӥсьтэм инмар вал…

– Тон зэм ик-а возьматод? – шумпотэ Камит.

– Кошким! – вакчияк шуэ Прохор но, гонӟем сӥйыс кукъёсыныз ӝуйёс борды ӵендылыса, шуак азьлань вамыштэ. Ӝуйёс ялан куасъёс кадь люкасько солэн пыдъёсыз борды, Прохор соосты дырын-дырын ӵыжыса кельтэ…

– Тани татысен тӥ гуэ пезьдӥллямды… – валэктэ Прохор, кык ӝуймем писпуос котыртӥ бергаса. – Тани Япанчалэн гозы беръёсыз, татысен со сёлтам кионъёстэс… Ачиз татчы пегӟыса сылэм, тӥледды витьыкуз.

«Кызьы со сыӵе векчи тодметъёсты но адӟе», – пайме Камит. Нош Прохор азьлань бызе ни, кытысь ке тӥялскем куарез, чигем ӝуез кияз кутылыса но зынъяса.

– Шедьтӥм… – кылӥське солэн куараез. – Азьлань, эшъёс… Кытын адями калык йыроме, отын бабасыр уг йыромы…

Каньылак луэ Камитлэн гадяз, бабасыр ас сяменыз мар ке вераськыса, сое-тае чакласа туж шаплы азьлань бызе. Соос куиньназы ик нокыӵе уг карисько ни, вылазы писпуосысь ӝуй комокъёс усьыло ке но. Кыкетӥез лысьӧм но соосты нырысетӥез кадь ӧз куалектытыты. Таиз писпу борды ӵогамын вал, быдэсак ӝуен шобырскемын… Парсь пельёс кадь куасьмем пельёсаз зарни кульчоос адӟисько… Но туж зол кышкатӥз йыр вылтӥзы лобӟыса кошкись бадӟым кучыран. Со кесям пӧйшурезлэсь кылем бервылзэ нуыса кошкиз. Быдэсак виресь вал. Кӧня ке шапыкез Камитлэн ымныр вылаз усиз…

– Оло вал ни карод монэ но? – тыпак дугдӥз Камитлэн кионэз.

– Малы? – уг вала Камит.

– Мар татын кионлэсь толыкез, кион алэсьтыз ужзэ ужаз ни, Прохор бабасыред трослы табере шаплыгес… – валэктэ  куалекъясь мугорзэ ватыны тыршыса кион, шӧдске, со ӵап али малпаз, валлэн мугорыз кужмогес шуыса.

– Луид ке лу, озьы ке капчигес тыныд… – соглаш луэ Камит, пеймыт нюлэс шорысь вайёсын йыруллань ошиськем лобась шыръёсты адӟыса… Котькытын соос озьы ошылӥськемын… Оло изё, уло учкыса уло…

– Нимы Кышкасьтэмкион мед луоз! – шыпыртэ дырекъясь кион, бадӟым сьӧд валлы берытскыса но Камитэз эшшо но вылэгес ӝутыса… Камит мырдэм палэнскыны вуэ бадӟым улвай борды ошиськыса ӟечырась бадӟым дурынчи карлэсь. Зэмзэ ке Камит, шӧдске, сое янгышен ӟечыртӥз, Кышкасьтэмкионлэн вал мугорыз  нокызьы куалекъянзэ быдтыны уг вормы, кӧтыз  дугдытэк чутыръя…

Озьы соос кошко бабасыр сьӧры. Нош ачиз бабасыр уг ик учкы шоразы. Куиньназы ик чал-чал мыно. Соос улысь ӝуйы чик но шум уг поты витьымтэ куноосызлы, бадӟым мувыр бакаос кадь тэтчало пыд бордазы биниськыса ӵыжиськем моклокъёс. Ялан вожгес но вожгес луэ, оло ини, шимес вожоме кӧшкемыт улвайёсын позыръяськыса ӝуймем нюлэс. Нош писпу вайёсысь мучолоос кадь ошиськыса улӥсь ӝуй комокъёс олокыӵе но шимес сьӧсь пӧйшуръёслы укшало… Вылаз ик, тӧл ӧвӧл ке но, куд-ог дыръя соос выро, вылазы тэтчало. Озьы потӥз Камитлы но Кышкасьтэмкионлы. Нюртӥ потэмзы бере тани бабасыр но йыромылыны кутскиз. Я сопала бызьыса, утчаське, я тапала бызьыса. Собере мар карыны ёрмыса кадь тып дугдӥз… Азязы ик соослэн туж уно лысьӧмъёс кыллё вал. Оло та лысём шай, оло нош курбон сётон инты…

– Уг валаськы… – шуэ Прохор мӧзмыт мылкыдын.

– Мар? –  юало Кышкасьтэмкион но Камит.

– Та нюлэслэн, оло ке, чик но уг поты асьмеды пыдлогес пыртэмез… – кышкам куарен шуэ бабасыр, собере коӵыш кадь писпу вылысь писпу вылэ тэтчаса кытчы ке ышэ. – Мыным али ик бабасыръёсын вераськоно. Тӥ отын, интыяды сылэ… – кылӥське писпуос сьӧрысен солэн куараез.

Чал-чал шып луиз… Нош ик соос азе омырысь мучоло кадь ошиськем ӝуй люк усиз…

– У-у-у-у! – чузъяськиз бадӟым сьӧд писпу гыркысь. Ӵапак со шорын ик нюр сьӧрын кылӥськизы оло шурали, оло обыда куараос. Вистэм-вожтэм потӥзы куртчылӥськись кутъёс, чибиньёс, кузькукъёс. Кыдёкын ик ӧвӧл кырӟаны ӧдъязы эбекъёс. Кыйёс пыд ултӥ ик ветлыны кутскизы. Одӥгез Кышкасьтэмкионлэн пыд бордаз биниськыны турттэ, оло. Тани со нюжтӥське солэн чутыръясь кӧт дораз.

– Чус сыл, эн выры… – куре сое Камит. Кышкасьтэмкионлэн лулыз ик пыдтышказ кошкиз ни кадь…

– Тон мар йырйиськод?.. – паймыса юа солэсь Камит. – Со мынам така турынэ кадь ук?..

– Вождэ эн вай, нерваосы эктыны кутско… Уг яратӥськы мон кыйёсты, мон скал ӧвӧл ук йӧлме соослы нонытыны… – порс-порс сыске Кышкасьтэмкион, ым дурысьтыз берпум вир шапыкъёссэ но кылыныз нюлыса.

– Мар тон карид, тодӥськод-а?.. – юа  Камит, мар шуыны ик абдыраса, но ачиз малы ке вожзэ уг потты.

– Шонер, Камит, тон Карна ӧвӧл ук кинлэсь ке сьӧлыксэ мертаны… – шуэ солэн йыраз кыӵе ке куара…

– Мон чик но дышемын ӧвӧл сыръясь нюр вылтӥ ветлыны… – валэктэ Кышкасьтэмкион, кук бордаз биняськись кыез писпу борды ӵыжыса… – Кошконо татысь ӝоггес, кӧс интые потоно, нокыӵе вал-кион таӵе интыостӥ уз ветлы, оскы мыным…

– Иське, берен кион лу, кӧтыд ке чутыръяны кутске! – мар шуыны уг вала Камит…

– Уг! Выжон шорын валъёсты уг вошъяло! – чурыт сылэ вал-кион.

– Шонер вера валэд… – писпуос сьӧрысь потэ Прохор. – Йыромытӥзы асьмеды нюлэс кузёос, кӧс инты утчано. Бабасыръёс уг быгато веднаськись нюлэсэз сайяны. Нош татын котькуд писпуын чудьёслэн тамгаоссы…

– Мар тон вераськиськод?.. – пайме Камит, йыр азьысьтыз ик тамга пусэз адӟыса. – Собере мар кароно?

– Кӧня ке возьмано луоз, ӝоген бабасыръёс вералозы, мар карыны… Соос али куспазы малпасько, кенешо… Чудьяослэсь вӧсь кылъёссэс утчало… Соос шуизы, чудьяос, пе, Перунлэн сантиосызъя улӥзы… Перунлэсь пуссэ возьматӥсь тамгаос котырын, пе, возиське. Перунлэн руна пусэзлэсь вань сьӧд лулъёс кышкало, пе… Дивъёс но, обыдаос но, шуралиос но, кыйёс но… – бабасыр бадӟым сись зырез кутӥз но асьсэ азе куштӥз. Соку ик со зырез гозы кышъетъёс  омыре вайёс вылэ ӝутӥзы…

– Ай-я-я, акакак ака! – кесясько обыдаос, мае ке кырмизы шуыса малпасько, оло… Тани соос дасо кузя бызьыса потӥзы…

– Татчы… – шыпыт гинэ  кыз вайёс улэ ӧтиз соосты Прохор. – Тани та чудьёслэн утись пуссы, шӧдске. Нокин татын асьмеды уз иса. Нокин уз адӟы…

– Шонер… Кызьы мон сое азьвыл ӧй вала… – шара малпаське Кышкасьтэмкион. – Ӵапак со ик луэ Перунлэн руна пусэз. Асьмеос йыромеммылэсь азьвыл ӵапак таӵе пусъёс вӧзтӥ лыктӥмы… Тамгалэн огпалаз Ыбес Капка, мукет палаз Секир Башка.

– Секира-тӥр, кудӥныз Перун Шундыез ньылӥсь Кыйлэсь йырзэ ӵогиз, выльысь дунне вылэ югытэз поттыса… – пальыштэ Камит, тамга шоры учкыса. – Нош сояз тамга вылын мар суредамын вал? – юа со Прохорлэсь.

– Курег пыд… – серектэ Прохор. – Мар меда курег пыд вера, мыным секыт валаны…

– Курег пыд – сопал дуннее сюрес… – серектэ Кышкасьтэмкион. – Нош мукет палдураз мар суредамын вал? – нош ик юа со Прохорлэсь.

– Кыӵе ке куать йыро кый, оло… Мон ой вала… – валэктэ бабасыр.

– Куать йыро кый? – пайме Камит.

– Горыныч-а куать йыроез? – серктэ вал-кион.

– Горынычлэн куинь йырыз… – уре сое Камит. – Нош таизлэн куать. Со шундыез ньылӥсь Кый…

– Кудзэ Перун секир башка кариз? – серектэ валкион.

– Юнме серкъяськод, эшшо кӧня ке вамыш отчы пырысалмы ке, асьмелы но секир башка луысал… Ярам ай Прохор дугдытӥз, зыр куштыса эскериз… – лулӟе Камит.

– Бабасыръёс но озьы шуо… – шуак вера Прохор. – Соос кышканы косо Курег пыдо но куать йыро кыез возьматӥсь пусъёслэсь… Мыныны косо Перунлэн пусъёсыз вӧзтӥ.

– Кытысь соосты шедьтод, Перунлэсь пусъёссэ? – итӥське вал-кион. – Татын сомында тамгаос, кудькудӥзлэн кыӵе ке пусэз вань…

– Соосыз тамгаос, бабасыр кенеш верамъя, уй инбамез, пе, суредало, – валэктэ Прохор. – Асьмелэсь куд шорын луэммес тодыто. Нош асьмеос ум тодӥське, кыӵе кизили пала кошкиз Япанча. Соин ик Перунлэн пусъёсыз вӧзтӥ ветлоно луоз. Вылаз ик Перунлэн но тамгаосыз лабиринт кадь пӧртэм сюресъёсы нуо. Кудӥз асьмеды со лабиринтэ пыртэ, кудӥз отысь поттэ, кудӥз юри йыромытэ, асьмеос созэ но ум тодӥське. Оглом синтэм мыноно луоз. Кыклы, куиньлы вайяськись сюресъёсты пусйыса. Йыромимы ке, берен отчы берытскыса, мукетаз сюресэ кожон понна.

– Озьы туж кема мыноно луоз… – серектэ вал-кион. – Нош Камитлы Кузонэ дыртоно… Оло, берытскомы, Камит, Явушен люкиськонмы пала? Табере тодӥськомы, кызьы отчы берытскыны. Мыномы Перунлэн пусъёсыз возтӥ.

– Мон уг берытскы! – чурыт вера Камит.

– Мон соглаш Камитэн… – итӥське Прохор. – Асьмелы одно ик ортчоно та уй инбам лабиринтэз…

– Кызьы тӥ сое ортчыны малпаськоды? – серектэ вал-кион.

– Каллен-каллен Перунлэн пусэз дорысен Перунлэн пусэз дорозь, дыртытэк дыртыса… – шуэ Прохор.

– Тӥ коть валаськоды-а, кӧня дыр солы кулэ луоз?.. – ялан аслазэз вылын сылэ Кышкасьтэмкион. – Кызьы асьмеос та Перунлэн пусэз дорысен мукетсэ шонер нуисьсэ Перунлэсь пуссэ шедьтомы? Куке котькытын татын Куать йыро кыен Курег пыдъёс ошылэмын…

– Шонер вера вал-кион, ваньмыз озьы, со чик но уг будэты… – шара малпаське Камит. – Дырмы ӧвӧл сомында мыдлань-азьлань ветлыны. Мар меда соку кароно, кызьы капчиятоно ортчон сюресэз?

– Тон ик сое, Камит, капчиятод… – шӧдтэк шорысь кескич шуэ Прохор.

– Кызьы мон сое капчиято?.. – пайме Камит, Прохорлэсь ӝутскем мылкыдзэ шӧдыса.

Ӵапак со дыре ик писпуос борды шимес куараен дыгиськылыса шуак васькиз кӧшкемыт бурдо-изьвер. Быдӟалаезъя со кык ошлэсь но бадӟым, дыр… Ымнырыз оло адямилэн, оло шайтанлэн. Вазер пиньёсыз сюръёс кадь урдӥськыса уло, йыраз но солэн скаллэн кадь сюръёсыз, но солэн ог-дас пала. Изнэсэз йыр бордысеныз кутскыса пырак быж дорозяз вуэ. Тани со шуак кудзэ ке обыдаез кырмиз но порсгетыса ик сие. Обыдаос катэм кадь султӥзы. Нокытчы кошкемзы уг луы. Шӧдске та изьвер сыӵе кышкан кылдытэ, нокин со дорысь пегӟыны уг быгаты. Тани со вань лыосыныз ӵош шатыр карыса обыдаез сыскиз но быдэсэн, оло, ньылӥз. Кырмиз кыкетӥзэ  обыдаез но инбаме лобӟиз, кыдёкысь ик ӧвӧл писпу вылэ пуксиз. Отын со кар аслыз лэсьтэм, шӧдске…

– Мар со сыӵе? Кин со сыӵе? – паймо Камит но Кышкасьтэмкион.

– Див со… – шыпыт гинэ валэктэ Прохор. – Арсавыл ожгарчиос соосты виылыны кутскем бӧрсьы соос Муско пала пегӟизы. Нош Мускоысь Иоанн эксэйлэн соосты быдтыны кылдытэм походъёсыз бере, соос кытчы ке ышизы… Нош татын, шӧдске, кылиллям на. Малы ке шуоно та интыез нокин уг тоды. Дивъёс туж кышкыт изьверъёс. Али солэн кӧтыз тыриз. Табере со изёз. Но мукетъёсыз но луыны быгатозы. Соос ваньзэ улэпсэ сыско. Номыр соослэсь уг мыльы. Монэ но сыскоз, тонэ но, валдэ но. Синъёссы соослэн кучыранлэсь но сакесь. Нырзы но туж кыдёкысен шӧдӥсь. Кошким ӝоггес отчы, кытын тӧл мукет пала пельтэ! – шуак шуэ бабасыр лыктэм сюрессы пала возьматыса. – Татын азьпала мыныны сюрес пытсаськиз. Озьыен, вуоно отчы, кытын Перунлэн пусъёсыз кык пала кошко…

Бабасыр шыпытак гинэ лыктэм сюрессы пала кошке. Туж ӝог вырӟе со сьӧры Кышкасьтэмкион но. Кема ик ортчытэк соос вуо куинь пала кошкись Перун пусъёс доры. Та интыын кыйёс ӧвӧл ке но, татын но сыӵе ик ӝуй, татысен но кылӥське обыдаослэн «ака-как ака!» кесяськемзы, шуралиослэн «там-таля!»  кырӟамзы…

«Кӧня пол тазьы берытскылоно луоз на? – ас понназ малпаське Камит. – Укыр кӧшкемыт та Япанчалэн тодмотэм палыз…»

Уноез туннэ Камитэн соглаш луысалзы. Мусульман ик меда со, мусульманлэсь вамышъёссэ азьлопала ик адӟыны луэ, нош Япанчалэсь номырзэ азьлопала уд адӟы. Солэн ноку калык радъя уг луы, солэн Япанча радъя луэ, тани тазьы…  Кытысь тодэ со та шимес интыез? Котьма ке но, Япанча кужмо туно! Юнме шат вань кузон ожчиос сое адӟыса улӟо! Ваньзэсты ас бордаз кыскон кужымыз солэн бадӟым. Кытысь со кужым кылдӥз, кин сое будэтӥз-дышетӥз – соиз солэн та инты кадь ик валантэм но пеймыт… Кытчы со ватӥз Узыбеез, одӥг аллах табере тодэ… Ма, Камит сярысь но табере нокин уз тоды, шӧдске –  ваньмыз ӵогем кадь уриськиз. «Амба!» – воръёс сямен ке верано. Но Камитлэн чик но урод каремез сое уг поты, кельше солы Япанча.

– От ведь, ногай мурза, урдэм пис, ӵашъем писпу, нагалят сён! – ас понназ серекъя Камит.

– Зэм вераськод! Со асьмелэн арсавыл данмы! Солэн чудьяосын но герӟетъёсыз вань… – шуэ Камитлэн Япанчаез яратӥсь визьмыз.

Малы ке Камит нош тодаз ваиз ыргон поттон гуэ усемзэ. Пичи ке но вал, со ӧз кышка, кезьыт ке но вал, со ӧз кынмы, пеймыт ке но вал, со оскиз татаез сое шедьтоз но поттоз шуыса. Мукетыз кынмысал со кезьытын, нош со бабасырез ӧтиз ассэ шунтон понна. Кыӵе вал солэн тусыз, со уг тоды вал, но шуныт вал солэн мугор гоныз, сюлэмыз но шуныт. Бабасыр сое гадь бордаз ӝиптӥз, Камит соку ик умме усиз. Со дырысен Камит тодэ, котьку юрттоз солы бабасырез, кудӥз ассэ Прохор шуыны косӥз, ассэ чурытомытон понна.

– Эн кышка, шедьтом Узыбейдэ! – оскытэ бабасыр.

Но Камит выльысь Япанча сярысь малпаське. Ногайёс котьку пеймытэсь вал Камит понна. Выжыоссы соослэн быдӟым эксэйлыкъёсты возьмась шудья но чудья ожчиос бордысь лыктэ, шуо. Тросэз малпало, удмурт ногайёс со Идыгейлэн ногай выжыосыз. Но со озьы ӧвӧл. Удмурт ногай князьёс арыслан мугоро, быркыт бурдо, быркыт ымныро ногай-нагалят-грифон бордысен выжы нимзэс потто… Ногай арыслан-бурдо – соослэн пеймыт выжы пуссы… Ожгарчи пуссы. Соос тужгес но усто ожгарчиос луо. Соос быгато, пе, кулэ ке луиз Ногай бурдоез но ӧтьыны но серметаны. «Эх, Япанча, Япанча, яратӥсько ук мон тонэ, нош тон малы монэ тазьы шимес интые кельтӥд ай? Мон тонэ эшме кадь адӟисько, вылаз ик тон мынам табере агае ук!» – киысьтыз Кизили Пурт бервылзэ учкыса малпаське Камит.

– Ярам, тырмоз сюлмаськыны, шедьтом Узыбейдэ, Прохор оскытэ бере… – буйгатыны турттэ сое вал-кионэз, солэн така турын сием бӧрсяз кышканэз но ӧжытак тӧлӟиз, шӧдске. Яке со кудӟиз-а така турынэзлэсь?..

– Шедьтӥм ке, кызьы табере улӟытом?.. – мӧзмыт юа солэсь Камит. Кышкасьтэмкион чал-чал кариське…

Бабасыр кион-вал шоры учкыса мынекъяны кутске…

– Малы тыныд со куарез сиёно вал, артист?! – пальпотэ бабасыр.

– Бон, мон артист, мон уно трагедиосын шудӥ. Соин ик мынам шӧдонъёсы укыр кужмоесь… Сыӵе мон кышканлы сётскисько, уг валаськы соку мар каремме…

– Артист! – нош ик серекъя бабасыр.

Камит гинэ ялан малпаське, мар карыны тодытэк… Малы ке солэн уг поты серекъямез…

– Кылзы табере монэ, Камит… – кутске бабасыр, кион-валэз серекъямзэ басылдырыса. – Адӟиськод-а, тани куинь Перун пусъёс. Огез паллянэ нуэ, мукетыз бур пала. Нош шоретӥ палаз асьмеос ветлӥмы ини…

– Собере мар, кудпалаз кошкомы? – юа Камит.

– Ӵапак созэ табере тон вералод… – пальпотэ Прохор бабасыр.

– Кызьы мон верало?.. – уг вала сое Камит.

– Табере тунаськытэк кошкомы. Тон милемды нуод. Нырысь тон кошкод та кык сюресъёстӥ потон сюрес утчаса. Собере берен берытскод но нуод сюрес возьматыса… Озьы гинэ ӝоггес вуомы Узыбеед доры…

– Мон номырзэ уг валаськы, кызьы мон шедьто, кызьы сыӵе ӝог ветло? – воксё абдыраз Камит. – Мон тылобурдо но ӧвӧл, нагаляд бурдоез но мон серметаны уг быгатӥськы…

– Тынад мукетыз вань… – пальпотэ Прохор. – Тон гинэ ми пӧлысь «пуаны» быгатӥськод… Кык луыны, куинь луыны, кулэ ке сизьым тямыс, укмыс, дас… Тон огак вань сюресъёстӥ кошкод. Собере берен ми доры «озонаськод»… Уно луэмдэ но «озонаськемдэ» но нокин татысен уз адӟы… Озьыен, ваньмыз табере тон киын. Макем ӝоггес тон кутскод, сокем ӝоггес та лабиринтэз ортчомы…

– Прохор! Вай мон тонэ чупало! – шумпотэ вал-кион, Прохор пала берытскыса.

– Я, я, дугды, валлы гинэ уг тырмы вал монэ чупаны! – шуак палэнске бабасыр.

– Мон куанӥсько тынад йырыдлы. Прохор! – гырдалтэ Кышкасьтэмкион. – Кыӵе зол али тон малпад!

– Тӥ мар, зэм ик озьы малпаськоды? – пайме Камит. – Мынам уг лу озьы огак люкиськылэме…

– Луоз, Узыбедэ ке шедьтэмед потӥз… – шуэ Прохор.

– Туж шонер вераськод, Прохор! – гырдалтэ вал-кион. – Быгатоз, Узыбейзэ ке шедьтэмез потӥз… Куать но дас но луоз… Огак вань сюресъёстӥ кошкоз, собере асьме доры «озонаськоз»! Мыным туж кельше!

Камит кӧня ке малпаськыса улэ но шонерак бызьыса кошке бадӟым кыз шоры. Зол гинэ со кыз шоры шуккиське…

– Эшшо кулэ луоз! – шуэ солы Прохор.

Камит выльысен бызьыса кошке, нош ик кыз борды шуккиське…

– Эшшо кулэ луоз! – шуэ солы Прохор.

– Со тазьы кызэз гинэ шӧдске погыртоз?.. – жаляса учке вал-кион.

– Погыртӥз ке погыртоз! Мукетыз амалмы ӧвӧл, ваньзэ куке но лэсьтоно! Пот ни ньыль мертэто дуннее, малы куинь мертэтояз шуккылӥськиськод? – чурыт вера Прохор. – Пот «Шузилэн Арканаз», эн адӟы со писпуэз!

Камит нош ик бызьыса кошке, но таяз учыре со писпуэз кык палтӥз ортчыса кошке…

Вань сюлмысьтызы серекъяло бабасырен вал-кион…

* * *

Котькыӵе дырлэн тодметэз одӥг, со кошке. Япанча котьку дыртэ ваньзэ дырыз дыръя вутскыны… Со ворттэ, ас ужзэ лэсьтыны, собере Кузонэ дырыз дыръя вуыны. Ӟеч вала Япанча, Камитэн Явуш но дырез шӧдо, соос но дыртозы Базаре. Озьы косӥз Кизили Пурт. Шузиесь ӧвӧл ук соос та шимес интые пырыны… Ӝоген соос Кузонэ кошкозы. Япанча валаз ини, киысьтыз Кизили Пуртлэн бервылэз соос матэктыку ӟырданы кутске, нош соос ке кыдёке кылё, со буйга. Соин ик Япанча шӧдэ соос кыдёкын шуыса. Та инты нокинэ пыдло ас пушказ уг лэзьы, со ваньзэсты улля яке быдтэ… Уз, пиосты со уз быдты, соос али куиньназы ик бырисьтэм мугор пӧлын ветло. Нош уллянзэ уллялоз, уз лэзьы пыдло пырыны. Соин ик Япанча ваньзэ быдэстӥз озьы, кызьы кулэ вал. Та инты котыр ласянь ӟеч возьмаське, соос шӧдыны сое кулэ…

Нюлэс пумен пеймытгес но пеймытгес луиз ни. Писпуос сокем зӧкесь. Тани со тужгес но шимес инты доры матэктэ… Нокыӵе тылобурдо татын уг чирды. Шал-шал сылэ нюлэс. Вукылэс учкон гинэ котыр ласянь шӧдӥське. Чудья тамгаослы вӧсяськытэк татӥ нокин уз ортчы. Соин ик Япанча котькуд тамгалы вӧсь кылъёссэ вераса ортче. Юнме ӧз изьыты со Узыбеез, нылашлэн кышкаса кесяськемез сюресэз гинэ секытатоз. Со «див» шуонъёс, «ракшасъёс» ке сайказы, номыр ӟечсэ соослэсь эн возьма – кулӥсьтэм мугордэ но кесялозы… Сыӵе шимес интыостӥ али Япанча ортчиз, кинъёс гинэ со азе ӧз поталэ. Кытысь соос пото, ачиз Япанча но уг тоды. Но чудьяослэн вӧсьёссы ваньзэ буйгатэ. Эшшо кӧня ке ворттэмез бере, Япанча аслаз яратоно интыяз потӥз. Тани со кионзэ дугдытӥз но Узыбеез музъем вылэ султытӥз. Ачиз но тэтчиз мамык кадь ӝуймем музъем вылэ.

– Кин тон? Мар тыныд мынэсьтым кулэ? – шуак сайкаса юа Узыбей.

– Мынам нимы Япанча, мон ногай мурзалэн пиез. Мон тонэ тушмонъёсыдлэсь утисько.

– Тон ӵапак со Япанча мурза, Кузонысь Ядыгарлэн ожгарчиез?..

– Ӵапак со… – ымныр кышетсэ куштэ ожгарчи. – Соин ик, кылзы монэ, Узыбей, табере ваньзы тодо, тон «эксэй ныл» шуыса. Ваньзы тонэ утчало, кудъёсыз ке асьсэ вылэ ужатон понна, кудкеосыз мар ке шедьтон понна, кудӥз ке маин ке воштон понна, нош кудӥз ке быдтон понна…

– Малы мон соослы кулэ, мае мынам сыӵеез вань? – паймыса юа Узыбей.

– Тынад вань «эксэй вирыд», кудӥз арсавылысь вань ватосъёсты, вашкаллаоссэ но, алиоссэ но усьтэ. Озьы ик со усьтэ Зарни Мумлэсь вань Капка-Ыбесъёссэ, адӟиськисьтэм кыметъёссэ… Ӵапак Зарни Мум доры пырон  понна ик тонэ «храмчиос» шедьтӥзы…

– Нош Зарни Мум соослы малы кулэ?.. – нош ик юа Узыбей.

– Созэ секыт вераны… Керемет гинэ тодэ, дыр. Мон сямен, кинъёс ке Зарни Мумлы пумит «15-тӥ Арканэн», «Сюро Инмарен» – «Бафометэн» ужало. Соин ик соосты Зарни Мум доры лэзьыны уг яра… «Зарни Мум доры ке соос сюризы, вань арсавыл калыкмы дунне вылысь ӵушиськоз…» – шуиз Усман тата. Но табере соос Зарни Мум доры уз сюре ни…

– Уз сюре тон монэ лушкамен сэрен?.. – выжыятэ Узыбей.

– Озьы. Но со одӥгез гинэ мугез…

– Вань на кыкетӥез?

– Вань. Соиз тонэ ӝокатон…– меӵак вера Япанча.

– Мар?.. – кышкатске Узыбей.

– Но соиз но вариант кошкиз ни кадь… – серектэ Япанча. – Малы ке шуоно тон табере «храмчиос» киын ӧвӧл… «Храмчиосты» но, «Джучилэсь эксэй вирзэ» кисьтэмзы понна, ошкуйчиос коразы… Но буйганы озьы ке но вазь на, соос, кинъёс 15-тӥ Арканысь «Сюро Инмарлы» ужало, мукет «храмчиосты» но ыстыны быгатозы… Валад-а, кыӵе югдур тон вылын кылдэмын?.

– «Сюро Бафометлэн» Арканэныз ужасьёс со Папа-Понтифик котырысь орденъёслэн лушкем массонъёссы? Тот Гермесэз, Меркурий Тримегистэз, солэсь алхимизэ лушкем дышетӥсьёссы? Озьы-а? –  юа Узыбей.

– Мон уг малпаськы вал тон но «Таро» сярысь тодӥськод шуыса… – пайме Япанча.

– Арканъёсты ваткаос гинэ уг тодо, маскараос но ӟеч тодо, монэ песянае дышетӥз… Иське, Папа котырысь лушкем массонъёс «Сюролы» ужало?..

– Мынам но сыӵегес вал нырысь малпанъёсы, но таосыз, мон малпасько, туж лушкем ужась массонъёс, кудъёссэ Папа но, оло, уг тоды, кудъёсыз «Сюро Инмарез» гинэ данъяло… Мукет сямен вераса аслыз Кереметлы, Кылдысинлэн, Осирислэн, «Сьӧд Агаезлы», Сетлы ужало…

– Нош юрӟым пичи гондыр кытчы пыртыны турттэ вал, шакалязэ сюдыса? – юа Узыбей. – Соиз но Зарни Мум доры нуись сюреслэн пӧетэз-а, мар-а?

– Соиз вал тужгес но серемез… –  серекъя Япанча. – Таиз, конечно, «храмчиосты» но тасыратӥз. «Сьӧдъёслэн» но «вукооссы» куд-ог дыръя чылкыт уг ужало, шӧдске. Татын, ачиз но валатэк, Аждага соослы «сылатыса» вуттӥз, картаоссэс сураз… Та учыр возьматэ «сьӧдъёслэсь» но асьсэ пушказы «могӟылэмзэс»… Аждага ачиз ке потӥз, со тонэ аслаз «гаремаз» ньылысал ни. Угось «гаремзэ» со кӧтаз возе, кулэ дыръяз гурӟытыса поттон понна… Нош али, шуо, Аждага пеймыт гутёысьтыз югытэ потытэк улэ, Юхалы берытсконзэ возьма… Мон малпасько, Аждагалы тон сярысь Шурали эксэй усьтӥз, малы ке шуоно со но адӟиз, кызьы тонэ «храмчиос» ӟубистӥзы…

– Нош малы соку ачиз но со монэ лушканы турттэ вал?.. – нокызьы уг вала на асэныз ортчем югдурез Узыбей.

– Ужпум со бордын… –  серекъя Япанча. – Аждагалы Юхалы берытскон вакытаз скалъёсты, коблаосты но кышноосты лушкаса нуллэ Шурали эксэй, аслэсьтыз Тулпарзэ берыктон понна. Нош Аждага таяз учыре сокем ӟырдаз, шӧдске, тонэ, эксэй нылэз, гаремаз кайпалтон понна. Со Шурали эксэйлы но тонэ лушканы косӥз, озьы ик Шурали эксэйлэсь визьтэмгес ужамзэ тодыса, эшшо, шӧдске, кӧня ке амал малпаз на, тонэ одно ик кырмон вылысь… Угось Аждагалэн мугоръёсыз трос, но соос ваньзы али Юхалы берытско, нош мугоръёсыз трос бере, напсӥез но бадӟым, соин ик со малпа визьмыз но солэн бадӟым шуыса. Пичи гондырен малпам ужез солэн тӧдьы сӥньысъёсын кышъямын, со сое Такшака вакытысьтыз луэм учыръёссэ тодаз вайыса лэсьтэм. Со учырез ваньзы тодо Махабхаратысь кыйёсты ӝуатон сярысь мадьысь. Отын одӥг брахманлэсь дышетскисьсэ Индралэн Ошезлэн кыедэныз сюдо, Такшака  доры пырон понна, кыёслэн сое виемзы медаз луы шуыса…

– Укыр юрӟым мадьёсты тон вераськод! Тьфу! – сялӟе Узыбей.

– Но тон сое тодыны кулэ… – серектэ Япанча. – Угось та интыысь ке тон кошкид, яке Шурали эксэй, яке ачиз Аждага тонэ аслаз гыжкалъёсыз пыртӥ кырмоз… Ма, Шурали эксэй но, мон солы кистенен ӧй ке шуккысал, тонэ сокем зол нуыса кошкысал, нокин сое ӧй ни сутысал. Озьыен, мон тонэ куинь ки кырметъёс улысь ишкалтӥ… Соин ик буйга но кылзӥськы мынэсьтым. Ваньзэ лэсьты озьы, кызьы мон курисько. Тон та интыысь нокытчы кошкыны кулэ ӧвӧл!

– Кыӵе интые тон монэ вуттӥд? – юа Узыбей.

– Та интыез нокин уг тоды… Нокыӵе Аждага, нокыӵе Шурали, нокыӵе адӟисьёс, нокыӵе кулэмъёс та интыез уг адӟо… – дыртытэк валэктэ Япанча. – «Мырда кымес» нимасько мон та интыез. Отын азьпалан туж ӝужыт гурезь бамал. Кымес кадь со отысен мырдӥськемын ӵошкыт интыос пала, кыдёкысен адӟиське. Та батыр тыпы вылысен ваньмыз усьтӥське, нош тонэ нокин уг адӟы. Тыпы вылын туж чебер корка лэсьтэмын… Сое но адӟыны уг луы, со туж умой ватӥськемын. Со мынам будэм коркае… Тани улвай, сое ӝутӥськод выллань но отысь тубат ваське… – улвай шоры возьматэ Япанча.

Узыбей улваез ӝутэ гинэ но туж вылӥысь, вайяськем тыпы улвайёс сьӧрысь, соку ик каллен гинэ ваське туж чебер тубат. Тубат ӧжытак меӵгес ке но солэн вань ки кутэтъёсыз – чебересь сюрыосыз. Пулъёслэсь лэсьтэм тубатъёс вылтӥ соос тубизы корка пушкы. Ӧсэз ворсазы гинэ тубат ачиз ӝутӥськиз… 

– Корка пушкын ваньмыз вань… – возьматъя Япанча. – Гурез но, пуэз но, вуэз но, нянез но, валесэз но, педло пала ветлонэз но, кудӥз гумыос пыртӥ шурен герӟамын… – валэктэ Япанча. – Вылын люкаське зор ву. Кыскиськод та калэз – ву ваньзэ гылтэ, гумыостӥ шуре нуэ. Татын луэ мисьтаськыны, тусьты-пуньы миськыны. Ваньмыз кошке шуре. Ошмес ву но ошмесысь татчы гумытӥ лыктэ. Кулэ луиз ке, пуктӥськод татчы азвесь чанэз, собере бергатӥськод тани та бадӟым питыранэз. – Япанча ву лыктытозь бергатэ. – Соин ик нокин уз тоды, татын кин ке улэ шуыса… – йылпумъя со.

Корка пушкын котыр югытэсь укноос лэсьтэмын. Котькытын чудьяослэн вашкала сульдэръёслэсь коньдон пусъёссы, тамгаоссы ошылэмын.

– Та пусъёсты исаны уг яра, соос юри тыремын улэп лулъёсты татысь медаз шӧдэ, медаз адӟе шуыса. Мырда кымес педло паласен но утемын, со шунды берганлэн шорыз луэ. Тӥни отын Шунытошмес бамал… – возьматэ Япанча. – Со шунды потон пал, собере Кыйкарбам усьтӥське аслаз вӧсяськон пужым тэленыз, мон отын вӧсяськисько вал пичи дыръям, куке ай мон ӧй вал мусульман, угось ӵапак со сьӧрысен огазе луись Каньсар но Уча шуръёс бызё, Кыйкарбам шундылэн уробоез луэ нош Каньсар но Уча шуръёс шундылэн пар валъёсызлы пӧрмыса шундыез выллань ӝутыны кутско. Отыназ тӥни Лымшор, Шундылэн, шунды сынлэн, шунды уроболэн тужгес вылӥе тубон шорыз. Ӵапак со адскисьтэм инбам гурезь йылысь асьме пала ваське.  Кӧснюк, нырысь со кӧс кыстӥське, собере пумаз гинэ асьмелы матэ вуыкуз ошмессэ поттыны кутске. Отыназ огазе луись Кабакул но Ягул шуръёс, Татысен, Мурза кымес азьысен, вань шуръёс но ошмесъёс огазеясько, нош Кабакул но Ягул шуръёс тӧдьы юсьёслы берытскыса, шундылэсь уробо-тарантассэ дӧдьылы пӧрмыто, шундыез уллань васькытон понна. Отыназ Мырда кымес мышкын – Кезьыт ошмес но Кур куян нюк, отчы шунды пуксе, пар юсьёсыныз но дӧдьы сынэныз валче… Нош Кезьытошмес но Шунытошмес вискын Шундыизён, кудзэ асьмеос пуксён пал яке уйпал шуиськомы, – валэктэ Япанча.

– Малы тон мыным ваньзэ тае мадиськод? – меӵак юа Узыбей Япанчалэсь верамезлэсь номырзэ валатэк.

– Татын тон туннэысен табере улод… – озьы ик меӵак вера Япанча.

– Огнам? – юа Узыбей.

– Огнад, но сокем ик огнад уд лу…

– Тон но татын луод? – выжыятэ эксэй ныл.

– Мон татын уг лу, татын та интые йыромем шуралиос луозы… Татысь потӥд ке бичатыса виёзы… – валэктэ Япанча. – Но шуралиос татчы уг тубо, соос та интылэсь тыллэсь кадь кышкало. Соос отын, улӥын калго, юмшало. Тужгес но яратоно интызы Уча шур палан, Кӧс нюк палан. Нош сопалаз но, тапалаз но кыйёс, Кыйкарбам но Кыйкарбамнюлэс со интыосты шуо. Татысь кошкид ке, кыдёке уд пегӟы. Яке шуралиос кутозы, яке кыйёс лекалозы, яке «дивъёс» кесялозы…

– «Дивъёс»?..

– Озьы, «дивъёс» яке мукет сямен «ракшасъёс». Тапалан соос ветло на. Мон соосты быдтӥ малпасько вал, нош соос кылиллям на, шӧдске… Татчы лыктыкумы адӟи кыксэ… Ошлэсь но бадӟымесь. Ярато адямиосты, шуралиосты, обыдаосты но пӧртэм пойшуръёсты сыскыны… Соосты, шуо, юри «сьӧдъёс» кылдытӥзы, адямиосты курадӟытон понна. Тужгес но соосты трос кылдытӥллям Муско котырын. Иоанн эксэй соосты быдтыны юри походъёс лэсьтылӥз, ӵап соку куд-огез тапала пегӟизы. Тон соосты одно ик адӟод… Та укноос котькуд пала учко, вылаз ик соос матэ карыны быгато. Тон ваньзэс адӟыны быгатод та укноос пыртӥ: шуралиосты но, «дивъёсты» но, кыйёсты но… Малы ке шуоно соос огшоры укноос ӧвӧл – со бечораослэн лэсьтэм укнооссы, соос, пе, Аждагалэн, Юхалы берытскыкуз куштэм мугорызлэсь, синъёсызлэсь лэсьтэмын. Нош Аждагалэн куштэм мугорыз но кулонэз, сисьмонэз уг тоды. Соин ик та укноос кучыран синъёс кадь ваньзэ адӟо но матэ карыны быгато. Со нагалят кесянъёс, асьсэос кыдёкын луозы, нош тон туж матын соосты адӟод. Вылаз ик уйин но та укноос вань котырез нуназеез кадь возьмато… Укноос адӟо, нош укноосты нокин уг адӟы… – Узыбей шоры туж сак учкыса вера Япанча. – Оглом, мӧзмыт тыныд уз лу. Тон мукет улонэз, мукет дуннеосты но адӟод та тыпы вылысен…

– Малы тон, Япанча, монэ сыӵе кышкатӥськод, мар малпаса монэ  татчы кельтӥськод? – юа Узыбей, нырысьсэ солэсь нимзэ вераса. Узыбей вань Кузонлы тодмо Япанчаез кемалась тодэ вал, соин ик ӧжытак буйгаз ни вал. Нош Япанчалэсь берло кылъёссэ кылыса солэн кышканэз эшшо но бадӟымаз.

– Мынам со понна кык муге вань… – меӵак эксэй ныл шоры учке Япанча. – Монэ тонэ быдтыны косӥзы, Шунды Мумез утён понна… Быдтыны косӥз ачиз Усман тата, Арсавыл Туно. Но мыным, зэмзэ ке, мыным гинэ ӧвӧл, вань ошкуйчиослы, вань удмурт кикыпиослы «удмурт эксэйлык» но туж кулэ. Соин ик мон тонэ, «эксэй ныл», нокинлэсь юатэк лушкай. Сотэк нокин тонэ утьыны ӧй быгатысал. Тонэ доминикан «тамплиеръёс» оло номыр но ӧй карысалзы, нош бызаралэсь шакалязэ сиысалыд ке, тон Аждага кие сюрысалыд ни. Шурали но тонэ со доры ик нуысал. Но татын, оскы мыным, нокин тонэ уз иса. Малы ке шуоно нокин уг тоды, нокин уг адӟы та интыез, пырыны но нокин татчы уз быгаты, нош кыйёс, шуралиос, «дивъёс» юри татчы пыртэмын возьман понна…

– Кыӵе сыӵе инты та? Малы нокин сое уг адӟы? – юа Узыбей.

– Созэ чудьяос гинэ тодо, асьмелы тодыны кылдэмын ӧвӧл… – пӧятэк вера Япанча. – Кадыр интызы та чудьяослэн…

– Япанча, вера мыным пӧятэк, мон адӟи, тон сьӧры кык пиос уйиськизы. Одӥгез соос пӧлысь Камит вал, мукетыз Явуш. Мон кылӥ соослэсь дугды шуыса тыныд кесяськемзэс. Собере адӟи, шӧдтэк шорысь соос  малы ке берен така бусые берытскизы, тон соосты, юри возьмад. Мон малпасько вал, тон монэ Камитлы берыктод, но тон соосты мур гопе лобӟытӥд… Малы тон соосын озьы карид? – пырак Явушлэн синмаз учкыса юа Узыбей.

– Буйгатскы. Соос кыксы ик улэпесь. Соос тыэ гинэ усизы. Номыр соосын ӧз лу.

– Мон тынэсьтыд юай, малы озьы дауртӥд шуыса? – синъёссэ уг вошъя со шорысь Узыбей.

– Тон трос юанъёс сётӥськод… Но мон пӧятэк верало, тон мыным мед оскод шуыса… Тонэ доминикъёс лушкам бере, Кикы нюлэскысь Арсавыл Туно, Усман тата, Кизили Пуртсэ милемлы сётӥз. Со понна кулэ вылэм милесьтым кырымпыдэсмес ог-огзы вылэ поныса бадӟым ӝӧк пуклёе Кизили Пуртэн кортӵоганы. Тани мынам со пурт бервылэ, –  возьматэ «эксэй ныллы» Япанча, собере нош ик азьланьтэ. – Туноослэн тодэм-валамзыя, Кизили Пурт ачиз бырйыны кулэ вылэм куинь егит туноос пӧлысь, Явуш, Камит но мон пӧлысь, одӥгзэ Валтӥсь Туноез. Кизили Пурт, милемды агаяса, киосамы бышкалскемез бере, бырйиз Камитэз… Табере Камит Арсавыллэн Быдӟым Туноез… Нош ми Явушен солэн юрттӥсьёсыз, «картъёсыз». Соин Камитлэн Така бусыысен асьмеды сутэмез ӧз луы, со берытсконо луиз со юрӟым югдурез тупатыны… Малы ке шуоно солы уг яра вал со бызара парсез отчы кельтыны…

– Нош тыныд, солэн юрттӥсезлы ,яра вал?..

– Мыным яра вал… Малы ке шуоно нокинлэн ӧй вал таӵе интыез, кытчы ваньзылэсь тонэ ватыны луэ… Табере ваньзы малпало, мон Усман таталы сётэм кылме быдэстӥ шуыса…

– Тон вералод-а Камитлы монэ татчы кельтэмед сярысь?

– Уг, уг вера… Туннэ тонэ та интыысь шуралиос, кыйёс но «дивъёс» сяна нокин возьманы уз быгаты. Камитэз пумитай ке но, мон солы шуо, быдтӥ тонэ…

– Малы? – уг вала Узыбей.

– Нокин та инты сярысь тодыны кулэ ӧвӧл, тужгес но Камит. Оглом, тон та интыысь ӧд ке поты, ваньмыз умой луоз, потӥд ке, тонэ быдтозы яке лушкалозы… Ачид киын тынад улонэд, Узыбей «эксэй ныл»… Валад? Нош Камит, зэмзэ ке верано, туннэ тынад тужгес но ляб интыед. Со бабасырен кусып возе. Нош бабасыръёс одӥг синмоосын герӟаськемын – аримаспаосын. Нош аримаспаос кемалась ини, «храмчиос» кадь ик, Шунды Мумез утчало, Бату ханлэсь Зарни Валъёссэ шедьтон понна…

– Кыӵе Зарни Валъёссэ? – юа Узыбей.

– Кудъёсыз солэн Сараез азьын сыло вал… Зарни Валъёсты ваньзы утчало… Бигеръёс но, ӟучъёс но… Кин Зарни Валъёслэн кузёез луэ, сое нокин вормыны уг быгаты. Соос дас пол кужмоято со интыез, кытын соос сыло. Соин ик утчало. Нош аримаспаослы со Валъёс тужгес но кулэ. Угось аримаспаослэн кужымзы пыӵамын со Валъёс пушкы… Сое ӵапак аримаспаослэн песятайёссы валляна дыре Батыйлы лэсьтӥзы-кисьтӥзы. Нош Батыйлэн беклербекез ваньзэсты со Зарни Вал лэсьтӥсьёсты быдтэм, нокинлы таӵе Валъёс медаз ни лэсьтэ шуыса. Валъёс али но аримаспаослэсь кужымзэс кыско, куке но туж кужмо аримаспаос табере туж ӧжыт кылизы. Берыктыны туртто аримаспаос асьсэлэсь Вал бордын возиськись кужымзэс…

Табере соос но тон сярысь тодо… Соос но тонэ утчало… Соин ик вунэты Камитэз. Эн ик малпаськы со сярысь… Вунэты кӧня ке дырлы «Императрица» Аркандэ. Тыныд али пыроно «Висельниклэн яке Ошиськемлэн» Арканаз. Табере ӵапак дырыз, тон писпу йылэ «ошиськемын», озьы ик «Кулэмлэн» арканэз но табре тон вылэ ужа. Тыныд юри, шӧдске, сётэмын та кык Аркан Дуннеосты валаны… – небытгес вераны тырше Япанча.

– Тон монэ сокем зол кышкатӥд ни… Кызьы мон татын огнам улом, со одӥг синмо кышкыт аримаспаос но монэ табере утчало ке? – юа Узыбей.

– Тон огнад уд ул. Ӝоген тон доры ведӥн кышно лыктоз…

– Мар? – куалектэ эксэй ныл.

– Эн кышка, со умой ведӥн, нимыз Чачок апай…Со ачиз но Чудья выжыысь. Со лэсьтӥз та коркаез. Кыӵе ке кулэм ӧнерчиосты сайкатыса.

– Кулэм муртъёсты сайкатыса?

– Кулэм мугор нокинлы вераны уг быгаты, мукет лул ке соос пушкы пыртӥськод. Мынэсьтым пуныйыръёс вань выжыме быдтӥзы, монэ но пуныйыръёс быдтысалзы, сюдӥсе монэ, пичи пияшез, татчы  ӧз вайысал ке. Со монэ татын будэтӥз, со монэ улыны дышетӥз, кыкетӥ анае мынам. Кышкыт ведӥнъёс но монэ пуныйыръёсын ӵош утчазы, но ӧз шедьтэ, мон соосты ваньзэс ачим шедьтӥ… Тани та укноос пыртӥ… Тон эн кышка, оскы мыным, та корка туж зол ужатэ «Кулэм» но «Ошиськем» Арканъёсты… Соос туж трос кужым сёто, лулэз но, мугорез но эмъяло…

– Валамон, одӥг синмоос – аримаспаос, зарни вал утчасьёс… Нош кинъёс пуныйыръёс?..

– Йыръёссы, ымнырзы соослэн пуныослэн кадь…

– Созэ мон валасько… Нош кытысь, кудпалась соос, мар понна выжыдэ быдтӥзы?..

– Аримаспаос кадь ик соос Урал Из сьӧрысь лыктыло вал. Нош мар понна выжыме быдтӥзы, созэ Кырныж гинэ тодэ…

– Кыӵе кырныж?

– Вань одӥг сыӵе Кырныж, ачид но адӟод ай.

– Урал из сьӧрысь тапала лыктӥзы асьме выжыосмы. Озьыен соос но асьме выжыосмы…

– Ӧвӧл, тон мар? Асьме выжыосмы Урал батыр бордысен потэмын. Соос кемалась тапала вуизы. Нош пуны йыръёс бӧрысь лыктэмъёс…

– Нош анае шуэ вал соос Ибыр весез возьмасьёс…

– Ибыр весез? – Япанча ӧжытак кӧсэктӥз.

– Христианъёслэн вань святойзы – Христофор сое шуо. Со но пуны йыро вылэм… Тани солэн иконаез, анае мынам чыртыям ошиз, куштыны ӧз косы… Соин мон юай. Угось мон тонэ, Япанча, тодӥсько. Вань Кузон тонэ тодэ. Кема-а мыным татын улоно? – юа Узыбей.

– Мон уг тодӥськы, мар тыныд шуыны… – котыръятэк вера Япанча. – Учком, мар луоз Шунды Мум котырын… Кызьы «храмчиослэсь» мукет кыктосъёссэс вормозы Ӟумъялэн ошкуйчиосыз. Вождэ эн вай, мынам дыры ӧвӧл… Выд, шутэтскы. Тӥни йӧл, тӥни нянь, кулэ ке, си, ю. Сое котькуд ӵукна татчы ваё, мон ӧй ке но лу татын, ваньмыз выльдӥське…

Япанча бус кадь кошке. Со сьӧры тубат выльысен ӝутӥске, ӧс ворсаське. Узы шурдыса учке уллань, собере небыт валес вылэ выдэ. Выльысь султэ но лянэсысь йӧл чукыре лэзьыса алигес гинэ пыжем нянь сие. Сокем ческыт потэ солы та гурт сиён. Нянь но Кылдысинлэн, шӧдске, нянез. «Кӧчыш быжлэсь» яке «Атас ӟускилэсь» пыжемын…

– Нош кытын меда гурт? Кытын улэ ачиз ведин кышно? – малпаське нылаш, сиёнзэ кушаса. Мылкыдыз солэн каллен-каллен ӝутӥське, гань-гань луэ пушкыз. Со кылэ, кызьы кионэныз вераське Япанча, но ворттыса кошке. Чал-чал кыле котырын. Но тани кыӵе ке бурдо тыпы вае пуксе. Укно вӧзы матэктэ. Корка пушкез учкыны со турттэ. Шып луиз Узыбей. Вырытэк кылле. Бадӟым тылобурдо ялан укноос котыртӥ вайысь вае лоба… Мае со утча, кинэ утча, мар карыны турттэ? Тани со липет вылэ пуксиз но чалмиз. Мае возьма? Узыбей адӟиз борддорысь пукыӵез, пукыӵ кӧрыкысь ньӧлъёсты.  Сабыр палаш но, тӥр но, пуртъёс но татын ик кыллё, шибодыос но, кистень но вань, пыӵал но тӥни…

Узыбейлэн ымныраз ӧжытак шумпотон но кылдӥз кадь… Кельше солы Япанчалэн лушкем корка котырез. Сюлмаськемез но быдӟым ожчилэн кельше… Тани со адӟиз Япанчалэсь ӝӧксэ. Отын кыллё усьтэм но усьтымтэ книгаос. Аристотель. Платон. Плутарх, Святой Августинлэн «Град божий» книгаез, Библия, Коран, татын ик «Таро» картаос, «Торалэн» витез ик люкетыз, «Кабала», Тот-Гермес, «Судебник 1550 ар» – ма, та Иоаннлэн кутэм катъёсыз ук!  Ма, та Япанча ваньзэ тодэ вылэм! Ваньзэ эскере, ваньзэ учкыса улэ! Узыбей тодаз вайиз Никон зэрпалэз, аслэсьтыз дунолэсь но дуно дышетӥсьсэ. Аристотельлэсь трактатъёссэ. Шуак со мынӥз укно пала, учкиз укное, зэм но укно солэн синмызлы пӧрме, ваньзэ матэ каре… Но огзэ вунэтӥз вераны Япанча, та укноос одӥг сямен возьмато ке воргоронлы, кышномуртлы – воксё мукет сямен. Угось кышномурт синъёс воргоронлэсь тросгес адӟыны быгато та укноостӥ. Соин Узыбейлэн син азяз нуназе шорын шуак потӥз толэзь… Зарезь вылысь пыж кадь со югдэ. Нош толэзь улын адскизы шуралиос, соос кинлэсь ке кышкаса туж ӝог пегӟизы. Потӥзы кыӵе ке зарни пырыем чебер валъёс, ваньзы соос туж чебер адымаса вамышъяло. Соос вылын сизьым кузя борӟеменъёс… Кымес шоразы, коӵыш син кадь, тыл ӝуа… Мар тамаша пӧртмаськон со? Укно туж матэ возьматӥз валтӥсь борӟеменэз… Узыбейлэн куаляк усеменыз тыбырыз ик кынмиз… Со одӥг синмо аримаспа ӧвӧл-а? Бен, ӵапак аримаспа ик вань, соос ук адымась валъёсты вордо, арлы быдэ Кузон Базаре адымась валъёссэс вузаны ветло. Ваньмыз тупа, кымес шорысьтызы одӥг синзы но. Аримаспа валзэ дугдытӥз но, мае ке шӧдыса кадь, кема учкиз одӥг гинэ синмыныз укно пала… Со вӧзы матэктӥз мукетыз борӟемтэк ветлӥсь, таиз малы ке кык синмо, вылаз ик гоно, но шуралилы уг кельшы, сюрыз ӧвӧл, гоныз но тӧдьы куӵо…

– Гоно бабасыр… – шӧдтэк шорысь валаз Узыбей.  Бабасыр сое ӧз кылы кадь, туж дыртыса мар ке вераз пеймыт дукесъёсын дӥсяськем одӥг синмо аримаспаослы.

Аримаспаос шуак азьлань вырӟизы, Узыбей пала… Кӧшкемыт синъёссы шонерак учко укно шоры… Узыбей вань мугорыныз катӥз… Сюлмыз ик пыдтышказ вуиз… Тани соос ваньзы нюлэс пушкы ышизы…

Узыбей кышкаменыз, укно дурысь палэнскыса, мар карыны валатэк, бигеръёс сямен тангыралы вӧсяськыны кутскиз… Солэн вӧсяськемезлэсь кышкатскизы кадь чудья пусъёс но сульдэръёс… Тырс! Тарс! вазьыло соос котькуд сэрегысь… Кин тодэ, кызьы татын Япанча вӧсяське? Мар кароно? Кытчы пегӟоно? Но вань меда ёросын талэсь но ӟеч инты? Оло уз адӟе сое та тыпы вылысь?..

Узыбей гадьысьтыз поттӥз святой Христофорзэ но пересь нэнэезлэсь, песянаезлэн анаезлэсь дышетэм  вӧсьёсыз вылэ выжиз, чудья пусъёс соку ик югытаны кутскизы… Узыбей куалекъяса бӧрдэ… Нош ик вӧсяське, Кылдысинлы, Кылдысин мумылы, Зарни Мумлы, Карналы, Желялы, Долялы, Недолялы, Таралы, Макошьлы, Ваткалы, Быдӟым Гондыр-Ошлы… Кинэ со эшшо вунэтӥз на? Таралэсь агайзэ Перунлэсь пизэ – Тархез, солэсь кузпалзэ Дживаез… Узыбей син куспын  юнманы кутскиз, коркаез но удмурт вӧсьёс  югдытӥзы кадь… Корка пушкын ганяк луиз, нош липет вылысь бурдо кӧня ке лёгаськиз но шуак кытчы ке вырӟиз… Чус-чус кылиз коркан… Капчи тӧл гинэ тыпы куаръёсты выретэ… Узыбей нош ик пересь нэнэзэ тодаз вайиз. Кулон азяз со солы пеляз шуиз: «Тон принцесса, нылы, тынад вырсэрад эксэй вир бызе. Ноку эн вунэты, тон принцесса, огпол тон сое валалод…» Пересь нэнэез солэн Маскара кар вӧзы ватэмын, зэмзэ ке ӝуатэмын, со ассэ ӝуатыны косӥз, нош пеньзэ Маскара карез котыре пазьгыны…

Узыбейлэн сюлмыз лурк-лурк куалекъя ке но, нош ик со укно доры матэктӥз… Аримаспаос уг адӟисько на, но соослэн али гинэ сылэм интыязы куӵо вал вылын мукетыз кыӵе ке кырыж-мерыж борӟемен адями сылэ… Тани укно сое матэктытӥз… Борӟемен адями аримаспаослэсь пыдберъёссэ зынъяз но йырзэ толэзь пыж шоры урдыса вузыны кутскиз… Кызьы ке куаратэк вузэ кадь со, ёзвиоссэ гинэ лябӟытыса… Ачиз ялан котырзэ чакла…

– Остэ, кион-а, мар-а? – пайме Узыбей. – Берсекъёс сярысь со тодэ. Соос кионъёслы но гондыръёслы берытскылӥсь ожчиос. Нош татын нокыӵе ож уг мыны ук? Берсекъёс ож дыръя гинэ кион-гондырлы берытскыло… Нош та борӟеменлэн ымнырыз кион но кион, чик но пуны калыкъёслы со уг кельшы… Вожомыса учкиз кион ымныр куакъёс шоры… Ньылонысьтыз дыльдызэ ньылыса лэзиз… Кӧтыз сюма-а, мар-а? Куакъёс улысен лушкем гинэ чакласькыса пукись одӥг сюро шурали шӧдӥз солэсь учкемзэ, туж дыртыса пегӟе… Берсек шибодызэ ыстӥз со сьӧры. Шурали пограз. Кион йыро адями, дыртытэк со доры матэктӥз но куалекъяса кыллись шуралилэсь йырзэ позыртӥз… Кызьы ке оло вузэмзэ, оло шумпотэмзэ, оло нош тау шуэмзэ со толэзьлы возьматӥз…

– Мар татын мынэ? Кин кинэ утча? – калтра Узыбей. Со али гинэ валаны кутскиз, кышканэз кытчы ке ышиз шуыса, со пушкын табере улӟиз мукетыз дарт – котырысь югдурен тунсыкъяськон, сотэк кызьы утиськод, улонэд ас йырыдлы, ас киосыдлы ке табере кельтэмын…

Кион ымныро адями дыртытэк пуксиз куӵо вал вылаз но шурализэ тыбыр сьӧраз интыяз. Валэз нокыӵе ӧз кариськы, дышемын ни шӧдске таӵе учыръёслы… Кионйыр каллен гинэ гонӟыртӥз нюлэскы ышем аримаспаос сьӧры… Нош аримаспаос тани нош ик адӟиськизы, табере ини нюлэс кушын. Тани шедьтӥзы зӧк тыпы вай борды ошем ыргон пусэз. Бабасыр мар ке маде пус шоры возьматыса, нош аримаспаос, асьсэлэсьсэ малпаса, мылзы потытэк сое кылзӥсько…

Аримаспаос мар ке мур лулӟыса учко Учашур пала, Мурза кымес вӧзтӥ кошкись Кабакул но Ягул шуръёс пала… Оло мисьтӥськемзы, гылтӥськемзы потэ? Яке ни соослэн кылэмзы ик уг поты бабасырлэн верам пусъёсыз сярысь? Тани соос тыл арато. Кытысь ке кутэм кыр ӟазегъёссэс ишкыны кутско, бышкало соосты бодыосы, пырсатыны дасяло…

– Таосыз коть ӟазегъёсты пырсато… – малпаське Узыбей. – Нош соиз шуралиез, шӧдске, кесялоз… Тӥни со но тыл жуатӥз ни нюлэслэн сопал дураз… Шӧдске умой шӧдэ аримаспаосты но бабасырез… Уг матэкты  доразы…

Узыбейлы ваньмыз адске. Ӧз пӧя Япанча. Вань ёрос кырым пыдэсын кадь. Тӥни шуралиос но Учашур дурын юмшало ни, ог-огзэс чупало, ӟыгыръяло, тыбырзэс кормало. Оломар но выро, лешакъёс. Узыбей нош ик аримаспаос шоры учке.

– Ошмес утчаллям, шӧдске… – валаз  нылаш, соослэсь ошмес вуэн казанысь ву юэмзэс адӟыса… Тани соос кыкетӥ казанзэс шумпотыса тыл вылэ пуктӥзы…

– Ваньзы асьсэлэсь мугор куронъёсэс кышъяло… – малпа нылаш, валесаз выдыса но кужмо гадьёссэ кык киыныз ик кырмалтыса… Малы ай солэн гадьёсыз висё? Япанчалэн кионэз вылын, культоез кадь, нуллэмез бере-а, мар-а? Мугорыз сӧсырмемын ӧвӧл, соиз ортчоз. Нош сюлэмзэ кызьы солы буйгатоно? Мар кароно? Кин со сыӵе Япанча? Кузонлэн тужгес но тодмо ожгарчиез сяна? Мар со малпаз? Луэ-а солы оскыны? Ӧз кельты меда Япанча сое юри татчы быдтыны? Шуралиослы, «дивъёслы», кыйёслы но та одӥг синмоослы, соос сьӧры ветлӥсь кионмуртлы….

Кузонъёс та ногай-удмурт князьлы синтэм-пельтэм оско. Ачиз Ядыгар эксэй но. Нош Узыбей уггес на вала та эльйыр ожгарчиез, аслаз улонэз но табере соин герӟамын ке но. Малы ке Узыбейлы пеймыт потэ солэн пуныйыръёс сярысь верамез. Пуныйыръёсты туж вылӥ дунъяло вал вашкалаос, чудьяослэн умой, пе, вал соосын кусыпъёссы… Нош мар пӧрмиз Япанчалэн выжыез но соос вискын?.. Узыбей азе трос пеймыт интыос берло дыре Таро Арканъёс кадь усьтӥськылыса пото. Кузонын но Узыбейлы секыт вал ни, вань бигер ханъёс бордаз нориськылӥзы, анаез борды кадь ик. «Эксэй вир» озьы кыске-а, мар-а? Кузон уга дугдытэк пӧзись пурты кадь бульыртэ, отын валаны уг лу, ку мар луоз, кин мар со пуртые куштоз, кинэ яке мае со пурты поттоз, ваньмыз туж ӝог воштӥське. Кин малпа вал, анаезтэк со кылёз шуыса? Но со туж ӝог луиз. Кин малпа вал сое атаез ошкуйчиос доры кельтоз но ышоз шуыса? Таиз но ӝог луиз. Нош «храмчиослэсь» сое лушкаса, солэсь «чингизит вирзэ» усьтозы шуыса, Узыбей куке малпаз шат? Ыж-така турын луд выл сярысь но со мадьёсысь гинэ кылылӥз вал, табере со турын вӧзын будӥсь кионъёссы вылын но ворттылӥз… Кин малпа вал, сое Аждага но кырмыны турттоз, Шурали эксэй но тыбыр сьӧраз пуйыез кадь ӝутыса нуоз шуыса? Йыраз но солы ӧй лыктысал, со сьӧрын сомында пӧйшурасьёс ветлозы шуыса… Кин малпа вал со зэмзэ ик эксэй ныл шуыса? Но солы туж ӝог  валэктӥзы! Кин малпа вал сое кык пол, куинь пол лушкалозы  шуыса? Но тани ук табере со куака карын кадь пуке… Куинь пол но табере лушкам эксэй ныл… Табере кыӵе ке аримаспаос но, пе, сое утчало… Мар кароно Узыбейлы? Вань сюресъёс ворсаськемын ке со азьын? Выёно «Кулэмлэн» но «Ошиськемлэн» Арканъёсазы?

Узыбей шуак берытскиз ӝӧк сьӧры, сураз Япанчалэсь «Тарозэ», поттӥз шорысьтыз ик огзэ Арканэз – солы усьтӥськиз «Писпу борды одӥг пыдыныз ошем мурт». Узыбей кыскиз кыкетӥзэ – потӥз «Адями лы-сьӧм». Узыбей нош ик кыскиз куинетӥзэ – потӥз «Шузи»…

Оло, зэм но, Япанча юри сое татчы кельтӥз аримаспаослы?.. Мед, пӧй, соос быдтозы… Нош Япанча аслэсьтыз кизэ сьӧлыко уз кары?.. Ӧвӧл, озьы ке но луиз, Узыбей озьы гинэ уз сётскы. Со ӟеч тодэ нылкышно ожчиосты. Калмез нылъёс, пересь нэнэезлэн сузэръёссы, сое тросэзлы дышетӥзы. Жалялозы тушмонъёс эксэй ныл борды урдӥськемзэс. Котькин соос мед луозы, коть аримаспаос, коть пуны яке кион йыръёс, коть бабасыръёс… Нылаш азинтыны кулэ тушмонъёссэ. Солэн ожтӥлыкъёсыз устоосыз пӧлысь устоосыз гинэ… Учкоз ай со, кин кинэ татын вормоз!

Со нош ик укноос доры мынӥз. Кытын табере Камит? Малы со табере тушмон? Кытысен но малы бабасырен со герӟаськемын? Уг пӧя Япанча, бабасыръёс но аримаспаос вискысь герӟетъёс пумысь. Озьы шуылэ вал Узыбейлэн но песятаез. Соос, пе, ӵош лыктэмын та музъем вылэ… Бабасыръёс аримаспаослэн пунызы кадь луо. Соин ик асьме пуныосмы таоссэ но, сооссэ но уг ярато. Камит, котьма ке но, огшоры пияш ӧвӧл. Со камез но ву пыдсытӥ вамен потыны быгатэ, кызьы со озьы потэ, бабасыр юрттытэк? Озьы пайме вал Узыбейлэн песятаез но… «Эх, Камит, Камит, малы тон Узыбей азе кылдӥд?.. Мусое мынам…» – выльысен тодаз вайиз со ваньзэ Камитэн пумиськылонъёссэс. Кызьы со сокем шудо дыръёсты куштоз, ӵушоз?..

* * *

Ӵапак та вакытэ ачиз Япанча кыйёслы пумит кылъёссэ вераса Уча шурез ортчиз. Туж капчиен тубиз кыйкарбаме. Выль сюрестӥ со кошкиз Кузон пала. Сюлэмыз солэн чик но уг куалекты, со тодэ Узыбеез вазьмасьёс туж но туж оскымонэсь. Кельше солы кионэз но, чик но жадьытэк ворттэ со нюлэсъёс пыртӥ, пичи нюкъёсыз но гопъёсыз лобӟыса потэ, паськыт нюкез но ярдурысен ярдуре тэтчыса потӥз. Япанча котыр сюрестӥ мынэ уг поты солэн аслэсьтыз будэм интызэ нокинлы усьтэмез.

– Оло тон мынам валэ луод ни? Ойдо тонэ валлы берыктомы? – юа со кионэзлэсь.

– Нош ним кыӵе понод? – юа кион.

– Кионвал, – шуэ Япанча.

– Ойдо Валкион… – шуэ кион, валлы берытскыса. – Но мон, батыр кузёе мынам, одӥг-ог ыж-така турын доры но кужым люканы ветло!

– Ветлӥд ке ветлод! – лулӟе Япанча. – Нош нырысь асьмелы туж ӝог Кузонэ вуоно, Ядыгар эксэй доры. Оло кион луыса ик тыныд капчигес?

– Мыным ужпи луыса капчигес! – шуак вера Валкион. – Выль мугор со, котьма ке но выль мугор! Выль мугор со выль вуко кадь! Арчае пыралод-а? – пальыштыса юа со кузёезлэсь.

– Отчы ум ветлэ. Шонерен Кузонэ кошком! – мукет сюрэсэ берыктэ сое Япанча.

Кузонын туж дано луэм ожгарчи, Япанча, ноку ӧз яраты Арчаез. Солы Кузон ик дуногес. Кузонын уно вал солэн гажано адямиосыз. Нош Арча Япанча понна котьку вал кузон кышномуртъёслэн мунчооссы, лавкаоссы, узырлыкенызы ушъяськон интызы, юсьёслэн кадь, нылпиоссэс будэтон тыоссы. Оглом, мурза семъяослэн Кузонысь пегӟон интызы – озьы соослэн йыразы кылдэмын, оло ке пегӟыны отчы луэ, оло ке Арча Кузонлэн тушмонъёслы сузьтӥськонтэм инты. Но со озьы ӧвӧл. Кузон дорысен Арча дорозь кык вамыш. Нош таяз учыре мускоос одно Арчае вуозы, угось Арчалэн кильтырес шукыяськись узырлыкез сярысь туж паськыт вӧлмемын вераськон… Соин ик мускоосты татчы ыстозы ӵапак соос, кинъёс кемалась ини узаса уло капчи узырмыны – вакытъёсын люкам байлыкез таланы, кудъёсыз уг дӥсьто асьсэ коже тапала пыраны, нош табере соос чидатэк возьмало муско ожчиосты, асьсэлэсь кема возьмам малпанъёссэс быдэстыны… Япанча соослы уг паймы, угось тодэ – тросэз соос пӧлысь асьсэос ик ваткаос, кудъёсыз пуксён палъёслэн осконъёссылы луыса капчи улон утчазы, ватка выжызы бордысь люкиськизы но табере сокем вожъясько юн осконэн, чылкыт ужъёсын кужмоям зэмос арсавыл шаерчиоссылы. Соин ик соос нырысетӥ радын кыйёс кадь нюжтӥськозы вань лушкем сюресъёсты возьматъяса. Нырысь лыктозы Арчае, возьматозы, кызьы сое капчи басьтыны луэ. Вералозы, кыӵе лавкаос отын вань, кыӵе кунокуаос, кыӵе юртын кыӵе узыр кышноос уло, кыӵе сандыкъёссы соослэн, кытчы соос ватылэмын. Арчаез чылкытатэм беразы соос дыртыса кошкозы Арча котырысь гуртъёсы, таосыз но угось Арча улонлы вожъяськыса, кызыныса ялан Арча пала гуртъёссэс пуктылӥзы, соос кадь ик узырмыны тыршизы… Ма, вань ватка гуртъёсты соос тодо, соослэсь узыр муртъёссэс но, вузчиоссэс но… Кытчыозь ӟуч ожчиос пырыны чидалозы, отчыозь ик нуозы соосты арсавыл шаерзэс вузась кыйёс…

Соин ик Арча – со синмез пӧясь дӥськутэн дӥсяськемын. Ӵапак со эксэй кадь, кудӥзлы ӧрекчи вуриськисьёс омырлэсь дӥськут вуро, нош со ачиз гольык сылэ. Нокызьы уг валало сое арсавылъёс гинэ ӧвӧл, кузонъёс но. Пегӟоно ке, кыдёкегес пегӟоно. Кам сьӧръёсы. Арча туж кыдёкысен адӟиське, со кемалась гочатэ капчи узырлык утчасьёсты. Со ке ӧй луысал ноку удмурт гуртъёс дорозь ожчиос ӧй потысалзы… Вылаз ик Кузон эксэй, Ядыгар, Япанчаез ик Арча паласен Кузонэз утьыны косэ. Сыӵе ужпум пуктэмын Япанча азе. Нош Арча паласен утён – шаермес таланы дасяськисьёслы со юрттӥсь тӧл! Соин ик ӝожмыт Япанчалы. «Нырысь Арчаез басьтоно, собере со сьӧрысь музъемъёсты утялтоно!» – шуозы кыйёс муско воеводаослы… Туж пумит вал Мускоен ожмаськонлы Япанча. Но валэктод шат сое Ядыгарлы, куке солэн гогыез Крымен но осман имамъёсын, генуэй но  мусульман вузчиосын герӟаськемын. Уз пуксьы со Муско эксэен одӥг ӝӧк сьӧры вераськыны. Со бордын Ядыгарлэн янгышез но Япанчалэн бадӟым куректонэз…

– Кузон, конечно, со умой инты… – малпанъёсызлэсь люке сое Валкион. – Кудаз Кузонэ тон нырысь мынод?.. Ортчем дырысяз яке вуоно дырысяз?

– Али дырысь Кузонэ… Кул Шариф доры… – кемалась быдэстыны турттон малпанзэ вера Япанча. Солэн Кикытэле лыктон азяз ик потэ ни вал Кузон ужпумъёсын герӟаськем имамен вераськемез. Ядыгар хан нокинэ уг кылзӥськы, сое сяна…

– Кул Шариф тыныд уз юртты… – серектэ Валкион. – Со мукет малпанъёсын улэ…

– Кыӵе мукет малпанъёсын? – юа Япанча.

– Быдӟым ордаез турк османъёс борды думон малпанъёсын, соин ик Ядыгарен соос тупало. Соиз но таиз но осман туркъёс борды думиськонэн шузимемын, кудзэ соослы «сьӧдъёс» пыӵатӥзы.

– Тон малпаськод Кали-Югаысь кощейёс соос доры но вуизы ни?..

– Ӟеч тулкымъёс ветло мугортӥ, куке валась муртэн вераськиськод… Ӵапак Крым паласен, Крым сьӧрысен Византиысен но Римысен кутскизы асьсэлэсь ужъёссэс «сьӧдъёс». Лыдъя ачид, Свароглэн Уез 1008 ар ӵоже кыстӥське. Солэн, шуом, 500 арез ортчиз ни, озьыен со мында ик кылемын ортчоноез. Свароглэн Уез борды асьмелэн Мидгард музъеммы Христослэн вордскем дырысеныз 988 аре дыгиськиз ке, мозмиськоз со 1995-1996 аръёсы гинэ. Эшшо но шонергес ке верано, сьӧд кощейёс асьме доры вазьгес вуизы ини, музъеммы соос пала матэктыку ик. Угось ӵапак соосын ожмаськыны, соослэсь иудейёсты утьыны лыктӥз Иисус Христос.

– Но Иисус, шӧдске, ӧз быгаты утьыны, соин Магомед выль оскон кылдытӥз?.. – юа Япанча.

– Мон озьы ӧй шуысал, Иисус утиз соосты, кинэ утьыны луэ на вал…

– Но сое быдтӥзы!

– Быдтӥзы ке но, Иисус оскон кельтӥз, возьматӥз, кызьы утиськыны кулэ. Угось кулонэн улон уг быры. Карна доры карнан кадь шонер, тэгыз пыроно, улӥ мертэтъёсы усёнтэм понна. Карнан кадь тэгыз мынӥсь лулэз «сьӧдъёслэн» сюпсемзы уг лу, малы ке шуоно карнан Карна кадь эрик сётэ. Нош эрико лулэз уг луы вормыны, со ноку уарлы уз берытскы. Соин «сьӧдъёс» сокем уг ярато карнанэз. Соин соос Исусэз Тэгыз Карнан борды кортӵогазы. Но Иисус ваньзылы возьматӥз, кызьы Тэгыз возиськись Карнан тонэ реинкарнация пыртӥ вылӥ мертэтэ поттэ, выльысь вордӥськытэ…

– Иисуслэн Киросэз со Карнан?.. – пайме Япанча.

– Нош мар соку?..

– Кирос со вожвыл… Ваньзы озьы шуо…

– Нош мар вера вожвыл? Вожвыл со сюреслэн пумыз, мукет сюресэ выжон. Со «сьӧдъёслэн», лул сиисьёслэн адӟонзы… Нош карнан – реинкарнация пыртӥ кулонэз тодытэк азинскытэ… Со понна ик сокем адӟемпотостэм каро сое «сьӧдъёс». Соин Иисуслэсь «реинкарнация» кылзэ ньыль еванглиысь ик ӵушизы, со интые пыртӥзы «рай» но «ад» кылъёсты. Но инмарлы тау, «реинкарнация» сярысь валан мукет евангелиосын кылемын.

– Но адями ӟечсэ гинэ лэсьтӥз ке, соку ӟечез секыталоз, соку уродэз выллань ӝутӥськоз. Озьы ужа ук карнан?..

– Вот ӵапак соин ик Христос шуэ карнан кадь мыноно тэгыз. Созэ но тазэ но валаса. Ӟечсэ но эскерыса лэсьтоно. Куд-ог дыръя ӟеч уж уродзэ ӝутэ. Анай, шуом, нылпизэ мусояса гинэ, ортчытыса, эркияса ке будэтэ, кыӵе нылпи солэсь пӧрме? Яке адямиез ӟеч карыса дурыстэм ке ушъяло, мар луэ со адямиен?..

– Тон паймытӥськод монэ… – мур шокыштэ Япанча.

– Мон мында улӥд ке, тон но озьы ик куадалод… – серектэ Валкион. – Зэмзэ ке ваньмыз со Ведаосын гожтэмын. Таиз Уй луэ ни Ньылетӥез Уй. Со лыктэмлэсь азьвыл ик Перун аслаз калыкезлы 9 Саньтийоссэ кельтӥз, кытын ваньмыз тупен-тупен мадемын. Ку лыктӥзы Нырысетӥ, Кыкетӥ, Куинетӥ Уйёс… Кызьы мынӥзы со Пекель дуннеен ожмаськонъёс, кызьы быризы соин валче асьмелэн куинь толэзьёсмы пӧлысь Леля но Фата толэзьёсмы. Кызьы асьме музъеммы соин сэрен ву нюртэт улэ шедиз, кызьы куашказы вылӥ тодонъёсмы, вераны луонтэм вылӥ азинскем каръёсмы, вылӥ мертэто музъемъёсысь выжыосын кусып возёнъёсмы. Туж ӟеч отын верамын, кызьы лыктоз таиз но Ньылетӥ Уй, кызьы таяз учыре соосты но соослэсь кузёоссэс вылӥ дуннеосысь югыт кужымъёс вормозы. Малы ке шуоно таяз учыре но «сьӧдъёс» дышем сямзыя ужалозы, нош югыт кужымъёс та вакытлы кыдёке азинскем выль амалъёссэс кутозы… Уз сётэ ни соослы мукет дуннеосысь талам «фаш» снарядъёссэс уже кутыны.

– Мон троссэ отысь ӧй вала, али но уг валаськы… – лулӟе Япанча.

– Мон уг паймиськы, мон но нырысь троссэ ӧй вала. Перун одӥг дыре ик огшоры калыклы валамон кылын вера. Но со дыре ик солэн котькуд кыл сьӧраз туж вылӥ дуннеосысь пуштрос ватэмын, кудӥз берлогес усьтӥське…

– Кинъёс со «сьӧдъёс», кызьы соосты тодманы луэ?

– Таиз но ведаосын верамын… Шуэмын, нырысь ик «сьӧдъёс» калыкъёсты «циранэн» ӵушкалозы, калыкъёслэсь вань вашкала тодонъёссэс, малпаськыны быгатонзэс быдтыса. Оглом вашкала осконзэс куашкатозы, собере огшоры сӥль мугорлы берыктэм адямиос пушкы пыӵалозы, кивалтыны кутскозы соослэн йыръёсынызы… Соин ик соосты секыт адӟыны. Соослэн ӧвӧл адямилэн кадь югыт  кужым люкась мугорзы, соос мукет мугоръёсы гинэ пырыны дышемын, лул кужымзэс сюпсьыса улон понна. Оглом соос лул сиисьёс. Озьы соос быдто музъемъёсты, асьсэос но соосын ӵош бырыса. Ведаосын гожъямын кыӵе музъемъёсты соос быдтӥзы ини, кызьы соос лултэм кельто со музъемъёсты.  Малы ке шуоно соос дышемын лул кужымез гинэ кыскыны, со понна соос узато калыкъёсты ог-огзы вылэ, пыӵато соос пушкы вожъяськон, лекъяськон, узырлыклы синмаськон. Калыкъёслэсь аспӧртэмлыксэс, осконъёссэс ваче пумит карыса, кылдыто жугиськонъёс. Курадӟон, висён, бӧрдон, религиослэн калыкъёсты уаръёслы берыктонъёссы – соослы куандырись кужым гинэ сётэ… Соос мукетэсь, соос уг тодо, мар со урод, мар со ӟеч.

– Кызьы соос соку адями дуннеосты вормо, асьсэс сыӵе шузиесь ке?..

– Соослэн нокыӵе инмар катъёссы ӧвӧл, нош асьмеос ум дӥсьтӥське соос сямен кырсь амалъёсын ужаны. Со бордын ужпум, соос дӥсьто, нош асьмеос ум дӥсьтӥське.

– Нош кызьы тон валэктод мыным, ачид но тон соос пӧлысь ӧвӧл шуыса? – шӧдтэк шорысь юа Япанча.

– Умой юан… – пальпотэ Валкион. – Озьыен, нырысетӥез тодмет таӵе: тани мон тыныд куаныса ик мадисько Ведаосмы сярысь, кудзэ соос туж но туж уг ярато. Кыкетӥез: соос уг тодо яратонэз, нош мон тодӥсько. Мон яратӥсько ваньзэ ӟеч книгаосты, ӟеч но югыт адямиосты. Куинетӥез: мынам сюлэмы вань, нош соослэн ӧвӧл. Угось мон сюлэмыным шӧдӥсько, нош соос уг быгато шӧдыны, соос малпаськыса, азьвыл ортчем сюресъёссэс тодазы вайыса тодыны туртто. Куинетӥз: соос уг тодо жалянэз, соослы котькуд адями лул огшоры сиён. Вылаз ик соосты но, кинъёсты соос асьсэ вылэ ужато соос сиё. Нош мон, кызьы адӟиськод, жалянэз но тодӥсько. Мынам сюлэмы вӧсь луэ Кузон понна, Арча понна, ватка но мукет калыкъёс понна. Ньылетӥез: соослэн синъёссы бызьыло, малы ке шуоно соос ялан выль сиён утчаны дышемын. Нош мынам синъёсы уг бызьыло. Витетӥез: соос бордысь кезьыт лыктэ, котыразы кӧш зын ветлэ, кудӥз возьматэ соослэсь «сьӧд» дуннеосын герӟетсэс, улӥ мертэтъёсысь кужымзэс. Нош мынам мугоры кезьыт ӧвӧл, сьӧрам мон уг нулдӥськы кӧш зын. Куатетӥез: соос адямиосты кытко. Нош мон тонэ ӧй кыткы, тон монэ кыткид…

– Мон тонэ ӧй кыткы, тон ачид кыткиськид ук… – пальыштэ Япанча.

– Кельше мыным тынад пальпотыны быгатэмед. Ярам, тау тыныд, ӟеч вераськонмы понна.

– Аслыд бадӟым тау, синъёсме усьтэмед понна. Иське, шуиськод имам Кул Шариф уз юртты?

– Уз. Дырдэ гинэ быдтод, вылаз ик, соку ик со вань вераськемдэс Ядыгарлы усьтоз. Со юн оске, османъёс мускоослэсь кужмоесьгес шуыса. Нош зэмос суред мукетсэ вера. Османъёслэн асьсэлэн кайгуоссы тырме исламез азинтон дуннеязы, соос кемалась уг валало тапалась кальёсты. Угось быдӟым ордаез табере выльысен огазеяны уз лу ни. Малы ке шуоно трос люкаськизы чингизит пиос, кудъёсызлы атайъёссы даурысь дауре, Чингисханлэн катъёсызъя, музъемъёссэс висъяса кельтӥзы, табере соос ваньзы асьсэлэсь ӧвӧлтэм ордазэс ӝутыны туртто, котькудӥз ассэ гинэ адӟыны турттэ быдӟым кузёен. Нош соос сыӵе векчиесь, огшоры шелепъёс кадь та вакытлэн тулкымъёсыз шорын. Уно векчи пилетъёслы пазьгиськемын орда… Кул Шариф но, Ядыгар но туж векчи кузьылиос… Соин ик соос «сьӧдъёслы» сётскемын… Нош Иоанн сое ваньзэ мукет сямен адӟе.

Япанча чалмыт малпаське. Зэмзэ вера Валкион, Кул-Шариф ноку аслэсьтыз малпанъёссэ солы ӧз усьтылы. Солэн котькуд кылыз Коранэз адӟытэк веран кадь лусъемын вал. Нош ачиз мукет сямен малпаськиз. Япанча солэсь малпанъёссэ кылӥз ке но, аслыз уг оскы вал. Со малпа вал, аслаз йыраз солэн урод лул пуке шуыса, со пӧй, Кул Шарифез ӧзьы сьӧдма… Нош Валкион сое ик вераз, мар сярысь кышкасагес малпаськиз Япанча.

– Кул Шарифлэн тужгес но ляб интыез мукетыз бордын… – нош ик кутске Валкион. – Со Коранэз вылласянь гинэ тодэ, соин ик ас сяменыз сое лусъе, уг яраты та быдӟым книгалэсь муфассиръёссэ, кудъёсыз валэкто, кызьы но малы лыктӥз таиз яке соиз аят, уг тоды пророк Мухаммад сярысь суннаосты, кудъёсыз верамын вал солэн матысь эшъёсыныз. Ма Аристотелез но, быдӟым арабъёс сямен, ӧз пыӵаты со ас пушказ. Ӧз лыдӟы Аль-Киндилэсь, Аль-Фарабилэсь, Ибн Синалэсь, Ибн Рушдлэсь Аристотельлэн ужъёсызлы валэктон сётэмъёссэс. Аристотельлэсь  «логиказэ», «ӟечлык» сярысь валанзэ, «политиказэ», «государствозэ» со валасал ке, ноку со ӧй герӟаськысал Ядыгарен, кудӥзлэн чингизит вирыз но ӧвӧл. Аристотель шуэ вал «политика» уг сётӥськы «уаръёслы», со сётӥське «эрико» адямиослы.

– Тон шуиськод Кул Шариф «уар»?

– Кул Шариф котьку «ужаз» Крым палась османъёс пала. Нош кинлы ке ужан, Аристотель верамъя, со «уар» луон. Нош имам со калыкез бордаз кыскыны кулэ аллах азьын но, адямиос азьын но чылкыт луэменыз. Нокыӵе малпанлы со ужаны кулэ ӧвӧл. Со луыны кулэ эрико. Зэмос яратон соку гинэ кылдэ, ку тынад йырад уг лу нокыӵе малпан – озьы шуэ Аристотель.

– Тон мынэсьтым секыт изме сюлэмысь куштӥд…

– Мон ӧй кушты, Аристотель куштӥз, – серектэ Валкион.

– Аристотель сюлэме котьку югыт пыртэ… – пальпотэ Япанча.

– Аристотель эрико каре, куштэ бордад думиськем малпанъёсты, соин ик пилемъёсты сайке но югытэз тон доры лэзе. Со Дорез югытатэ. Нош тодӥськод-а, кытын тынад «Доред»?

– Тон шаер сярысь-а? – уг вала сое Япанча.

– Мон юасько «Доред» сярысь… – нош ик валэктэ Валкион. – Нош шаер со тэра, кыӵе ке музъем люкет, кытын тон вордӥськид, яке анайдэ-атайдэ ватӥд. Ватка кыллэн валэктэмезъя, «шаер» шай бордысь потэ. Кытчы тон мае ке кулэмзэ, берыктыны луымтэзэ берыктонтэм вылысь ватӥськод. Нош Дор со Дор, кытчы адямилэн ялан бертэмез потэ, кытын котьку солы югыт но умой.

– Но шаер но лул понна дуно ук? – соглаш уг луы Япанча.

– Шаер дуно луэ соку, ку со тынад Дореныд герӟаськемын, ДэмДор кадь дэмӟемын тон борды.

– Нош Дор соку со мынам коркае-а, мар-а?.. – нош ик выжыятэ Япанча.

– Кудӥз коркаед? Писпуысь коркаед, кытчы Узыбеез кельтӥд? Яке Кузонысез коркаед, яке Усман тата дорысез, Кикыпинюлэскысь? – юа Валкион. – Оло со Арчикарысь мактабед, кытын тон нырысьсэ араб букваосты гожъяны яке Коранэз адӟытэк вераны дышетскид, оло кют-табед, кытын тон фарси, осман но латин кылъёсты дышетӥд, яке Кузонысь медресэед, кытын тон Аристотельлэсь 9 дауре араб кылэ берыктэм трактатъёссэ аслыд усьтӥд, собере сое мургес тодон понна Несториан черкын Никон зэрпал дорын дышетскид, но валад, Несториан черкъёс Аристотелез 5 даурысен тодо ни вал шуыса, соин Аристотелен Платонэз дышетонзы но муресьгес. Никон тыныд валэктӥз, кызьы арабъёсты 9-10 дауръёсы воштӥз Аристотель. Кызьы со бӧрысь 13 дауръёсы воштӥз пуксён палась Доминиклэсь но Францисколэсь орденъёссэ, выльысь улӟытӥз университетъёссэс. Кызьы сопалан Аристотелез тодӥсь арабъёслэсь адӟем карыса кылдӥзы наукаос, кызьы воштӥськизы государствоос, кызьы кылдӥзы студентъёс, школяръёс, профессоръёс, аристократъёс но мукет.

– Но соос мыным ваньзы дуно, мон яратӥсько ваньзэс кытын мыным югыт сётӥзы, кин монэ яратӥз но оскиз мыным. Мон яратӥсько мактабъёсты, медресэосты, черкъёсты, монастыръёсты, эмъяськись юртъёсты, югыт но чылкыт адямиосты, чебер но чылкыт ульчаосты, калыкъёсты, кудъёсыз Хан Джами котырын вӧсясько, мыным вӧсяськись христианъёс но кельшо. Мыным ваньмыз кельше, мар мыным югыт пыртэ… Мусульман осконэ но… Арсавылъёслэн но ведаослы осконзы…

– Вот самой со ик тынад Доред… – пальпотэ Валкион. – Со ваньмыз тон пушкын. Со тынад выжыосыд, кытысь тон сиён басьтӥськод астэ юнматон понна. Макем трос тынад югытэ кыстӥськись выжыосыд, сокем паськыт тынад модосэд, ӝуждалаед но пуштырес улвайёсыд…

– Тон мыным мар ке выльзэ вераськод…

– Мон уг, сое ваньзэ Аристотель вера, аслэсьтыз дышетӥсьсэ Платонэз полэстыса. Дор со паськыт но мур валан. Котьмалэн но котькинлэн вань аслаз Дорез. Адямилэн но, калыклэн но, пудо-животлэн но, мынам но, тынад но, солэн но, куакалэн но, писпулэн но, тӧллэн но, шурлэн но, ӝӧклэн но, пуконлэн но… Ватка кыл сое, Аристотель кадь ик, умой вала. Со шуэ, писпу доры мынӥсько, куака доры, шур доры, корка доры, гурезь доры, ӝӧк доры, Аристотель доры. Ватка кыл Дорлэсь пуштроссэ паськыт но мур адӟе. Со вашкала куалалэн «борддорез» дорын но «бӧрдэ». Дор сьӧрын вань сомында югытэз, кудӥз сярысь асьмеос ӵемысь ум малпаськиське.

– Иське, асьмеос кошком ортчем дыре, Ошлэн толэзяз, кытын ватка калык Ош-Гондырез данъя, мынам адӟеме потэ ватка калыкелэсь зэмос шулдыръяськемзэ, зэмос Дорзэ… Мыным ноку сое адӟыны ӧз кылды, мон ялан кыӵе ке мукет интыосын луылӥ.

– Туж ӟеч малпан, табере тон быгатод ваньзэ выль сямен адӟыны. Зэмос дордэ яратыны…

– Выль сямен гинэ ӧвӧл, мон табере зэмзэ ик пушкысеныз сое адӟо. Туэ но ваньзы Ошлы шертовать карыку мон чувашъёс но поръёс доры ветлӥ… Соин нош ик та шулдыръяськонэз адӟытэк кыли… – пальпотэ Япанча. – Нош со мыным туж кулэ та быдӟым ожмаськон азьын…

– Мон валасько тонэ… – шумпотэ валкион.

– Тау! Мынам эшшо одӥг юанэ йырвизьме бичатэ, кызьы тон малпаськод, малы мон аслэсьтым тушмонме, Иоаннэз, гажаны кутскисько?

– Тон юаськод, умой-а со, урод-а тушмон эксэез гажан?

– Шонер. Ӵапак сое мон юасько.

– Мон соин ик тыныд сётэмын. Валкионлы валэктонъёс сётон со шумпотыса эктон кадь. Соин ик кыдёкысен кутскомы. Кызьы тодӥськод, Бату хан аслаз Сараезлэн капка азяз кык зарни валъёсты пуктӥз. Соослэн, Шундылэн пар валъёсызлэн кадь ик, нимъёссы вал  огезлэн – Азь, мукетызлэн – Бер. Со возьматӥз Батуханлэсь аслэсьтыз ортчемзэ но, вуонозэ но учкыса мынэмзэ. Иоанн но озьы ик нуэ аслэсьтыз эксэйлыксэ… Со люканы турттэ Чингисханлэсь империзэ, малы ке шуоно ачиз но чингизит. Нош Быдӟым ордалэн пазьгиськем шелепъёсыз вуонозэ но ортчемзэ но уг чаклало, али дырез гинэ адӟо. Соос уг валало малы Быдӟым чингизитъёс котькытчы несториан черкъёс пукто вал, малы соос черкъёсты оброклэсь утизы, малы котькуд юрт-улослэсь 10 люкет барышсэ гинэ басьтӥзы. Малы соос капчиятӥзы вузаськон ужъёсты, малы котькуд вузаськон сюресэз таласьёслэсь возьмазы, малы кылдытӥзы гожтэт нуллон сюресъёсты, малы ярато вал араб кунъёсысь тодосчиосты? Малы одӥг дыре ик пуктыло вал черкъёсты но, мечетьёсты но? Малы со инмар юртъёсын нылпиосты лыдӟыны гожъяськыны дышето вал? Иоанн но озьы ик лыктэ. Солэн трос егитъёсыз дышетско пуксён палась орденъёслэн университетъёсазы, озьы ик арабъёслэн медресеосазы – Багдадын, Бухараын, Басраын, Куфаын… Куинетӥ Эфес соборлы пумит луись черкъёсын но солэн пиосыз сирий но фарзи кылъёсын дышетско. Иоанн сюлмаське вуоноез понна…

– Мон валай тонэ…

– Иоаннэз гажан со умой, но тон ожмаськоно луод Ядыгар палан, соиз но ваткаос понна кулэ ужпум…

– Мон валасько, со нимаське кык лудкечез кутон… – серектэ Япанча.

– Мар карод, кулэ кыксэ ик кутыны… Сотэк ӟеч уз сылы Арсавыл…

– Иське, тон шуиськод Бату ханлэн кык валэз кадь мыноно? Одинлэн тямыс пыдо Слейпнирез кадь…

– Мукет сямен вераса мон кадь, Валкион кадь, вал мынэ ортчемтӥз, бурдо кион вуонотӥз… – пальпотэ Валкион. – Азё-беро Шунды уробо кадь, вашкала пуштросэныз…

* * *

Усман таталэн мӧзмыт ымнырыз нош ик пальпотыны кутскиз, тани со выльысен табере ини вал вылын ворттӥсь Япанчаез адӟиз. Со валаса ик ӧз вуы, кытысь марысь со озьы чулькак гинэ потӥз, Ин Ыбесысь, оло ке, усиз… Кытчы со ышылӥз? Кызьы со озьы быгатӥз? Пайме Усман тата. Со малпа вал, Япанчаез туж умой тодэ шуыса. Нош али со мукетсэ валаз. Но со урод ӧвӧл, дыр… Котькинлэн луыны кулэ ватӥськон амалэз. Иське, вань солэн утисез, Усман таталэсь но ватӥськыны быгатэ бере. Котьма ке но, Япанча чылкыт сюлэмо, со берпум шапык вирзэ но Арсавыл понна сётоз. Усман тата сое туж юн гажа. Юнме шат со Япанчалы гинэ та ужез оскиз… Кытчы со Узыбеез «утялтӥз» – созэ нокин уз тоды. Япанча уз вера. Сыӵе сямыз. Соин ик Усман тата буйгаз, малы юнме ассэ малпаськытоз? Со вераз  аслэсьтыз кылзэ. Усман тата чик но уг жаля со сярысь. Зарни Мум «сьӧдъёс» кие шедьыны кулэ ӧвӧл. Малы соослы Зарни Мум кулэ, Усман тата ачиз но пумозяз уг вала. Озьы ик, кызьы табере вала Усман тата, Аждага кие но Узыбей ошкуйчиосын ӵош сюрыны кулэ ӧй вал. Табере котькыӵе Зарни Мум доры Узыбей пыртӥ нуись сюресъёс ворсамын. Со самой умоез туннэ понна. Но вань умойтэмез но. Усман тата туннэ шонер ӧз вала Палэсмуртлэсь Камитлы мар верамзэ. Табере со вала, Палэсмуртлы уг яра вал шонерак вераны, малы ке шуоно солы азьланяз но ай со дуннеосы пырано луоз, соин ик котыръяса со вераз, Зарни Мум пор кышнолы берытскиз шуыса. Но быгатэ меда Зарни Мум зэмзэ но Пор кышнолы берытскыны? Ваткаос та сярысь умой-умой уг тодо ке но, верасько, быгатэ шуыса. Соин ик Усман тата Палэсмуртлэсь Камитлы верам кылзэ ваткаос сямен валаз. Но Зарни Мум интыын «сьӧдъёслэн» но кылдытэм «Зарни Мумзы» луыны быгатэ, кудӥз калыклэсь вирзэ-лулзэ сюпсе. Усман тата табере малпаське, зэмзэ ик-а со умой лэсьтӥз, Узыбеез «утялтыны» косыса?

Соин сэрен Узыбей но табере жаль потэ ни кадь Усман таталы. Тӥни малы солэн пальпотонэз сьӧрын куректонэз но адӟиське. Но со озьы ке но,  шонер лэсьтӥз шуыса малпа.

Нош выль «эксэй вирзэс» ватка инмаръёс, кулэ луиз ке, выльысь шедьтозы. Мар со понна куректонэз. Удмурт эксэйлыклэн дырыз ӧз на вуы. Дырыз вуиз ке, соиз сярысь вань ини кинъёслы малпаськыны. Укыр паймымонэсь вал инсьӧрысен та дуннеез чакласа улӥсь кулэмъёслы но озьы ик дунне вылын кема-кема улӥсь лулъёслы Усман таталэн малпанъёсыз. «Ку тон сыӵе Зарни Мумез яратӥсь луид? – асьсэ понна гинэ юало соос. – Тон ноку ӧд яраты Мустор котырысь нылкышно инмаръёсты. Эбгалэсь но выжызэ, калмезъёсты, тон ноку ӧд яраты. Малы ай тон воштӥськид сыӵе? Оло шӧдтэк шорысь дунъяны кутскид кышномурт дуннеез, васькид воргорон инбамысьтыд, музъем вылэ султӥд?»

Пальпотэ Усман тата, кулэмъёслэсь со сярысь малпанъёссэс кылыса.

–  Нош Узыбей Аждага кие сюрысал ке, мар соку луысал? – юа Усман тата пыкылӥсь лулъёслэсь.

Соосыз чалмыт карисько. Угось соку «пеймытъёс» кулэм ки пыртӥ гинэ ӧй ужасалзы, соку вань усьтонъёс Зарни Мум доры «сьӧдъёслы» усьтӥськысалзы.

«Тырмоз ни тыныд Зарни Мум сярысь бызгетыны. Тон ноку ӧд яраты кышномуртъёсты, соин ик Узыбеез но быдтӥд! Вылаз ик Камит но табере ышемын!» – шуо солы пыкылӥсьёс.

Зэм но Узыбей но, Камит но нокытын уг адӟисько. Кулэмъёс пӧлын соос ӧвӧл, улэпъёс пӧлын но… Озьы луылэ, куке лулъёс витьымтэ шорысь куло. Уг валало Карна но Желя доры тубыны… Мар луиз соосын, Усман тата гинэ уг паймы. Ваньзэс тэльмырытэ та юан… Явушез адӟизы ни, валазы, мар понна со Кузонэ дыртэ. Дурӟем «Мардлаез» уг лу ватыны, ваньзылы со адӟиське, турттэ ке но Явуш сое чускатыны. Кереметлэн сьӧд ожчиосыз васькизы ни со ортчем дыре, кутӥзы ни вал вогулъёсты. Но югытъёс но ӟеч дасяськиллям, шуак мозмытӥзы вогул пиосты. Вогулъёс валаса но ӧз вуттэ, мар соос котырын пӧртмаськиз. Явуш гинэ ӟеч табере вала, кыӵе югдуре шедемзэ. Соин уллям вылысь улля кион-валзэ. Япанчаез но табере адӟизы… Кин ке гажа сое, кин ке тышкаське. Огзэ гинэ нокин уг вала, кытчы со ватыны быгатӥз Узыбеез. Вылаз ик Камит но табере ышиз, учкисьёслэн сюлмаськонзы кык поллы будӥз. Шӧдске, Камит Узыбеез утчаса ветлэ, улӟытыны сое турттэ… Камит  быгатоз малпанъёссэ быдэстыны, ӟеч тодэ Усман тата, со сьӧрын трос быдӟым кужымъёс сыло: Бату хан, Субэдэй, Зарни Мум, Палэсмурт, Зэрпал…

Уг вала, мар малпаськыны Усман тата, учкисьёс но уг валало. Бон, шонер, со али кышномуртъёссэ пумитаны дасяськыны кулэ. Кемалась соос ӧз пумиське ни. Но таяз учыре вераськон ӟырдыт луоз. Узыбей эксэй ныллэсь соос, Усман тата кадь, капчиен уз люкиське. Усман тата тодэ, кызьы лангаез шуккиськоз со вылэ. Кышномуртъёс пушкын улӟем «вожпотон» со шимес кужым. Со ваньзэ йырчукин карыны быгатоз. Татын со Кузонэн Муско котырысь ужрадъёсты но уже кутоз… Ваньзэ таркалоз, берпум герӟетъёсты тӥятозь… Ӧсьсэс берыктытэк уз басылы. «Вожпотон» кышкыт инмар, сое нокин дугдытыны уг быгаты, инмаръёс но со азьын кужымтэмесь. Со сярысь вера Гомерлэн Иллион сярысь кырӟанэз но. Юнме-а Гомер кырӟанзэ со бордысен кутске: «Вожпотонзэ, уром, тон кырӟа Ахилеслэсь, Пелей пилэсь!». Угось, «Вожпотон» но, «Кӧтӝож» но отын нимаз вормонтэм кужымъёс кадь пусйисько. Кызьы мукет сямен валэктыны луоз Ахилеслэсь «кӧтӝозэ» но «вожпотонзэ», куке со «кыказ ик учыре» вань шуръёсты вирен пачылтыса грекъёсты быдтэ… Но мар карод, «уж» лэсьтэмын, кык пол одӥг шуре уд тэтчы ук… «Вожпотон» кышномуртъёс пушкы пыриз ини. Табере чида, Усман тата…

Котьма ке но, ӝӧк дасяно, чебер ӝӧк кышет вӧлдоно. Ӝӧк вылэ ваньзэ ческытсэ пуктоно. Кузьымъёс но соослы дасяно. Сайкыт ымнырен пумитано…

Потӥз Усман тата коркасьтыз, ӧтиз пиоссэ но дасяны косӥз ваньзэ ческытсэ. Пиослэн ымныръёсазы соку ик шумпотон вӧлмиз. Соос тодо, таӵеез шер луылэ, озьыен «Мескарысь» кышномуртъёс вуозы. Но соос уг тодо на ук, кыӵе мылкыдо кышномуртъёс таяз учыре вуозы…

Усман тата кышномуртъёс сярысь кыл но ӧз потты ке но, ымныраз солэн кыӵе ке мӧзмыталэс пальпотонэн аспӧртэм веранэз гожтӥськиз: «Шонер, пиосы, одно ик вуозы, кытчы соослэсь тобере пырод…» Усман таталэн соку ик син азьтӥз шуак ортчизы та чебер кенакъёсын герӟаськем берло дыръёсы ортчем Кузонысь яркыт ужпумъёс. Зэмзэ ке вань Кузонлэн улонэз солэн син азьтӥз ортчиз. Ваньмыз каллен-каллен, одӥг жильы кульчо бордысь мукет жильы кульчоосты кыскыса ӝутӥськиз кадь мур куйыысь «Ву».

* * *

Усман тата умой тодэ вал Кузонлэсь ку кылдэмзэ, кызьы азинскемзэ. Нош Кузонлэсь улэм-вылэмзэ чакла вал со Чингисхан дорысен ик. «Быдӟым императорлэсь выжы модоссэ лыдэ басьтытэк Кузонэз валаны уг лу…» – шуэ вал котькудӥзлы Усман тата. Нош вераське вал со уно адямиосын. Сое тодо вал арабъёс но, Эфесын ортчем куинетӥ собор бере палэнтэм несториан черкъёс но, Самаркандысь, Китайысь, Иранысь, Персиысь, Индиысь тодосчиос но. Усман тата доры кин гинэ ӧз вуылы, Кузон Базар-Торжоке трос тунсыко адямиос ветлӥзы, вуо вал трос книгаос но, кудъёссэ Усман тата куноосызлэсь курылӥз. Усман тата куаныса ик лыдӟе вал соосты. Тужгес но кельше вал солы араб но перси тодосчиослэн Чингисханлэн выжыосыз шоры учкемзы, мадемзы. Кылсярысь, Раши́д ад-Динлэн перси кылын чингизитъёс сярысь гожтэм книгаез «Джами ат-таварих». Нош Генуаысь но Венециысь вузчиосын герӟаськем тодосчиосты, кудъёсыз Кофа котырын Крымын уло вал, Усман тата ӧз яраты. Озьы ик со ӧз оскы Византиен, Римен герӟаськем книгаослы. Уйпалась Ганза вузчиос пыртӥ  лыктӥсь «протестантъёслэн» книгаоссы но солы ӧз яралэ. Усман тата соку ик  адӟе вал соослэсь калыкъёсты пӧяны тыршемзэс. Угось Усман тата, Никон эшез юрттэмъя, Платонлэсь но Аристотельлэсь дышетэмзэс туж мур ас пушказ пыӵатӥз. Та быдӟым дышетӥсьёслэсь улон шоры учкемзэс лыдэ ке басьтоно, малпанэз нырысь-валысь ӟеч-ӟеч эскероно, уно-уно юанъёс со азе пуктылоно, соку гинэ тон тодыны быгатод, пӧяськись малпан-а со, яке зэмлыкез нуись малпан-а. Платон верамъя, малпан дунне туж трос пӧяськись малпанъёсты возе. Тужгес но со малпанъёс сьӧрын политика ватскемын ке. Кинъёс со книгаосты дасязы Усман тата нырысь уг вала вал, но солэсь синъёссэ та ласянь туж ӟеч усьтӥз солэн кадыро Никон эшез, кудӥз Кузон котырысь несториан черкъёсты возиз.

–  Со книгаос Римысь Папаен лэсьтӥсько… – вакчияк вераз со. –  Папа юри со понна кылдытӥз «иезуитъёсты», кудъёсыз асьсэды герӟало «Иисуслэн котыреныз». Ӵапак соос калыкъёслэсь историиоссэс вошъяло, выль сямен, асьсэлы тупась карыса лэсьто.

– Марлы соос озьы выро? – нырысь-валысь ӧзгес вала Усман тата.

– Тыныд сое секытгес валаны, угось тон вань историез чингизитъёс пыртӥ гинэ чакласькод… –  серектӥз Никон. – Тон, конечно, адӟиськод, кызьы йырин-чукин пукто со историез соослэн книгаоссы. Чингисханэз монгол каро, пиоссэ монголо-татаръёс, Бату ханэз но Субэдэез ӟуч княжествоосты но каръёсты ӝуатӥсь, пуксён палась кунъёсты таркась но мукет…

–  Нош малы соос озьы сьӧдмало?

– Сьӧдмало «сьӧдъёс», мукетсэ соос уг быгато ук, нош югытъёс югдытыло. Ӵап соин ик висъясько «сьӧдъёс» югытъёслэсь. Котькызьы тон «сьӧдъёсты» шу, котькызьы нима соослэсь инмарзэс, Кощей, Керемет, Шайтан, Дьявол, Сатана, «Сюро Инмар» тодметсы соослэн одӥг. Соос «сьӧд» ужало.

–  Маин люкетэ соослы история? – пайме Усман тата.

– Мон шуысал соослы «история» уг люкеты, со юрттэ. Угось «история» кыл воштэ асьмелэсь вашкала адӟонъёсмес, сямъёсмес, тодонъёсмес. Асьмелы ваньзэ югыт адӟиськомы вал Ведаос, Выжы кылъёсмы, Улэм-вылэммы, Былинаосмы пыртӥ. Табере адӟыны выриськомы пеймыт «история» пыртӥ.

– Тон монэ копак сурад, валэкты, югдыты монэ, пересез… –  абдраменыз киоссэ ик вайя Усман тата.

Никон пальпотыса учке эшез шоры, ымнырыз солэн котьку кадь тулкымъяськытэк гань-гань возиське. Угось со дышемын ваньзэ дыртытэк лад-лад валэктыны. Но солэн но ымнырыз ӵапак та шорын кӧня ке тулкымскиз, оло.

– Асьмеос кыкмы ик «история» кылэз ӟеч тодӥськомы, – нош ик азьланьтэ со веранзэ. –  Нош со асьме доры грек кылысь  Византиысь лыктӥз, ӵап соос дорысь, кинъёс Папаен валче вашкала осконъёсмес выльдытыны басьтӥськизы, вань калыкъёсты уаръёссылы берыктон понна. «История» ӟуч кылын луэ «Из Торы я».

– Со Тора борды герӟамын? – пайме Усман тата. – Малы, иське, сое ӟуч кылысь поттӥзы?..

– Малы ке шуоно та дуннеын, озьы ик вылӥ дуннеосын но, вань калыкъёс ӟуч кылын верасько вал. Тора но ӟуч кылысь, Веткий Завет но. Отын гожтэмын ук, вань калыкъёс одӥг кылын вераськизы шуыса, соос ӵош лэсьтӥллям вылӥ инбамъёсы ӝутскон тубат, асьсэды инмарлэсь но кужмо карыса. Но со кельшымтэ, пӧй, Инмарлы, соин сэрен со калыкъёсты пӧртэм кылъёсын вераськись карем. Ведаосын но озьы ик гожтэмын. Нош Инмар сярысь отын пал кыл но ӧвӧл гожтэмын. Отын шуэмын, «сьӧдъёс» калыкъёсты ог-огзылэсь люкозы, ог-огзэс валасьтэм карозы…

– Тон малпаськод, Веткий Завет но, Тора но со выльдытэм но лусъем Ведаос?..

– Ыктымак озьы, пересь визьлюке мынам… –  пальпотэ Никон. – Табере вера мыным, Арсавыл Туное, Веткий Заветын нырысетӥ пророкъёссы кинъёсын верасько вал?

–  Кулэмъёсын… Асьмеос кадь ик… –  шуак вера Усман тата.

– Вот ведь быгатӥллямтэ ваньзэ ӵушыны «сьӧдъёс»… Мургес ке усьтоно, соос вераськизы, Ведаосын кадь ик, песятайёсын но песянайёсын, кудъёсыз Карна песянаймы пыртӥ, реИНКАРНАция пыртӥ Желя песянаймылэн Жильыез борды думиськыса, выльысен вордӥськыса, вылӥ дуннеосы ӝутскизы. Нош Моисей бӧрсьы пророкъёс ваньзы, ачиз Моисей кадь ик, адӟиськисьтэм Инмарен вераськыны кутскизы, кудӥз «куак улвай» кадь гинэ ӝуатскылӥз…

– Тон шуиськод… Эн ай, дугды ай… – йырсиосыз ик пуштырскизы Усман таталэн. – Тон шуиськод, отысен кутскизы Ведаосмес лусйыны?..

– Отысен… – пальпотэ Никон. – Табере ӟуч кыл ласянь. Кызьы нимало вал иудейёслэсь нырысетӥзэ кулэмъёсын вераськись кышномуртзэс?

–  Дибора, Дебора, Дивора… Кызьы ке озьы…

– Адӟиськод-а, со Дивор вера – ватка кылын дивора… –  пальпотэ Никон. – Дебора кыл ачиз но озьы ик дивора, усьтэ асьмелы Быдӟым Тӧдьы Из вылысь Быдӟым Книгалэсь кытчы ышемзэ, мар соин луэмзэ. Малы меда сое «Горд Скал» нимо тыл сииз? Моисейлэн калыкезлэн кылдытэм Зарни Скалэз но, асьмелэн Горд Скалмы но – кыксы ик Быдӟым Книгаен герӟаськемын… Озьыен, Аристотельлэсь дышетэмзэ ке лыдэ басьтоно, со дивора Быдӟым Веда Книгаез Моисей аслаз «инмареныз» лусйиз шуыса.

–  Паймод но бырод тонэныд, Никон. Тон несториан черкъёслэн дышетӥсьсы, кызьы быгатӥськод озьы вераськыны?.. – шыпыт юа Усман тата. – Тон черкын ужась ук?..

Никонлэн одӥг пигоныз но уг вырӟы. Яратыса со учке аслаз туно эшез шоры.

– Ми, несторианъёс, кемалась тодӥськомы Аристотельлэсь «логиказэ». Вылаз ик несториан черкъёс, староверъёс кадь ик, уг кошко палэнэ Ведаослэсь. Ма ачиз Ветхий Завет но сокем кыдёке ӧз кошкы на, соин табере лусъё сое Папалэн «иезуитъёсыз», вуж инмаръёссэс выльёсыныз воштыса, Иисусэз выль инмар карыса.

–  Но со озьы ӧвӧл шат? Иисусэз инмарлэн пиез шуо ук, анайзэ Инмар анай, – нош ик пайме Усман тата.

– Ми, несторианъёс, Иисусэз нырысь ик адями шуиськомы, кудӥз адямилэсь вордӥськиз, но со вылӥ дуннеосын кусып возьыны быгатэ вал, нош анайзэ «Иисус нимо адямиез вордӥсь» шуэ вал кадыр Нестормы,  Инмар анай шуонлы со пумит вал. Малызэ мон валэктӥ тыныд, Ведаосысь инмаръёс – соос вылӥ дуннеосы, вылӥ мертэтъёсы Желя кенаклэн жыльыетӥз, Сансара питыранысь мозмиськыса ӝутскем адямиос, асьмелэн песятайёсмы но песянайёсмы. Ӵапак со понна Нестор кадь малпаськись черкъёсты палэнтӥзы Эфесын ортчем куинетӥ соборын. Соослы кулэ вал «Иисус» нимо выль инмар, калыкъёсты асьсэ улэ пыньыртон, уаръёслы берыктон понна. Но несториан черкъёс Веда катъёсты чылкыт утизы, соин ик вань Китайын но, Индиын но, Персиын но, Иранын но, вань Чингисханлэн империяз, вань Джучилэн улусаз Псков дорозь ик несториан черкъёс пуксьылӥзы. Соосты ачиз Батый но Джучи улусаз ӝутылӥз. Арианъёс но сыӵе ик осконэн уло вал, но соослэсь черкъёссэс католикъёс асэстӥзы, собере быдэсак асьсэлы тупась каризы вуж инмаръёссэс, кылсярысь, Эммануилэз воштылӥзы выль Исусэн. Нош Иисуслэсь верамъёссэ асьсэ сямен тупатъязы, куязы отысь Карнаез но, реИНКАРНАция сярысь вераськонэз но. Соос шуизы адями выльысен уг вордскы, Иисус гинэ быгатэ выльысен вордскыны, нош  адямиос кулэм беразы яке Рае Иисус доры, яке Адэ гинэ шедё, нош Рае сюрон понна инмардэ Господин кароно, нош астэ солэн рабез-уарез… Угось соослы кулэ ӧй вал тодытыны, малы улон уг быры, малы котькуд адями Карна но Желя пыртӥ мукет дуннеосы потэ… Соку нокин но ассэ уар ӧй карысал, котькуд адями эрико луысал, Рае шедён понна Папалэн черкъёсызлы коньдон ӧй тырысал.

Ваньзэ тае Усман таталы кин ке мукетыз верасал ке, со султысал но кошкысал, оло. Но Никонэз Усман тата инмаръёсты кадь ик гажа вал, со тодэ вал Никон вань черкъёсын кусыпъёс возе, озьы ик мусульман мечетьёсын, медресэосын, китабъёсын. Со кадь черк книгаосты но ведаосты тодӥсьсэ Усман тата нокинэ ӧз адӟы на. Соин Усман тата, ӧжытак ӵыжектӥз ке но, номыр пумитсэ солы ӧз вера. Нош Никонлэн верам малпанэз солэн йырысьтыз вань «вавилон каланчазэ» пазьгиз, оло ке со азе «Таролэн» 16-тӥ Арканэз «Башня» (Каланча) потӥз.

Усман тата Ведаосты ӟеч тодэ ке но вал, со дуннеысь осконъёс шоры Никон кадь ноку ӧз учкы. Со пичи мурт кадь малпа вал, «Инмар» кыл котырын ваньмыз чылкыт шуыса. Нош Никонэн вераськон бере со ӵушъял кадь пештырскиз, ас пушказ выйиз.

Никон солы яркыт возьматӥз: тодон со тодон гинэ, нош валан со воксё мукетыз.

–  Нош Коран? Мусульман оскон мар бордысь поттэмын?.. – мӧзмыт лулӟыса юаз Усман тата.

– Мусульманъёс но несториан черкъёс пушкысь пушйизы, Коран но озьы ик лусйыса кылдытэмын… –  пальпотэ Никон. – Но тон, Усман, эн писыра, «сьӧдъёс» ваньзэ сьӧдманы уг быгато, соос но валало, мар со Карнан. Мултэссэ ке сьӧдмазы, кин оскоз? Соин ик соос шуо, аллах понна кулэм ожгарчи соку ик Рае шеде, кытын сое 72 исамтэ нылъёс пумитало…

–  Но со пӧян ук?

–  Малпаськод, христианъёслэн Райзы маин ке висъяське?..

– Но христианъёслэн 72 «сазьсинмо гурийёссы» ӧвӧл ук, кудъёсыз кышно луыса но ныл данзэс уг быдто?..

– Ӧвӧл… – пальпотэ Никон. – Мусульман оскон берлогес кылдэмын, «сьӧдъёс», кызьы тон валаськод, татыназ ини выль эскеронъёс лэсьто… Соос кышномуртъёсты отын уар каризы, паранжа йыразы ошизы, воргоронъёсты трос кышноосын улыны лэзизы, озьы ик Райзэс но кышномуртъёсын чебертӥзы…

– Нош Ведаосын та ласянь кызьы?.. – аслэсьтыз тужгес но пыдлон гыбдась юанзэ усьтэ Усман тата.

– Ведаосын, мынам эше, мукет. Отын кышномуртъёс воргоронъёс кадь ик эрикоесь. Вылаз ик кышномуртъёс туж адӟиськись интыосын. Карна  карнанэз эскере, Желя реинкарнацилэсь жильызэ но сансара питыранзэ, Доля – дэлето улонэз, Недоля – секыт улонэз, Тара ваньзылы юрттэ, Макощь котькудӥзлы адӟонзэ куэ. Джива но Яра яратонэз чаклало.

– Малы сопал дуннеосы потонэз кышномуртъёс чаклало? – нош ик юа Усман тата.

– Малы ке шуоно, кышномуртъёслэн лул шӧдонзы воргоронъёслэсь кык пол кужмогес. Соослы сыӵе шӧдон инкуазен кузьмамын нуны вордон понна. Нош воргорон улэ йырвизьмыныз, тодонэныз-валанэныз… Тӥни соин ик «ву карнанэз», но «ву жильыез» кышномуртъёс ӟечгес чаклало.

– Мон вань улонме, озьыен, шонертэм улӥ? – паймыса шокыштэ Усман тата.

– Ӧд, сокем ик шонертэм тон ӧд улы… Тынад трос ӟеч ужъёсыд… –  пальпотэ Никон. – Но тон ожгарчилэн синмыныз улӥд. Нош ожгарчи-кучыранлы Ясный Соколлы сайкан понна синмаз но гадь вылаз кышномуртлэн синвуэз усьыны кулэ, соку гинэ Финист чертогысь Ясный Сокол сайка…

– Тон но ук вань улондэ кышномурттэк улӥд кадь?.. – шӧдтэк шорысь юаз Усман тата.

–  Вал мынам кузпалэ, тата, но сое «сьӧдъёс» быдтӥзы, соин ик солэн сивуосыз монэ сайкатӥзы…

Никонэн люкиськем бераз но кема малпаськиз Усман тата аслаз улонэз сярысь. Зэм но, со улӥз ожгарчилэн синмыныз, кышномурт сямен учкылыны солэн дырыз ӧй вал…

Тани али но, Никонэз тодаз вайыса, со шӧдтэк шорысь сазь-сазь валаз: Ведаослэн вылӥ Инмарзы со котьку одӥг гинэ – Югыт, «Белобог» шуо сое арийёс, нош солы пумит сылӥсьсэ сьӧд инмарез – «Чернобог» шуо. Усман тата ас сяменыз Кылдысин но Керемет соосты шуэ. Нош Кылдысин со асьмесын улэмын ук, озьыен со вылӥ дуннеысь песятаймы луэ. Нош Керемет кин луэ, Усман тата ноку ӧз малпаськы, али но со та малпанлэсь куштӥськиз. Котькин мед луоз, «сьӧд» ке со «сьӧд» ини. «Сьӧд Дуннелэн» сурамезтэк-пожамезтэк Кузон ноку ӧз улы, шӧдске… Озьы валаны кутскиз Усман тата Никонэн вераськемез бӧрсьы. Малы меда «Сьӧд Дунне» сокем зол кырмиськиз Кузон борды? Та юанлы валэктон туж каллен ке но, сазьтӥськыны ӧдъяз Усман таталэн йыраз. Солэн таркаськем «Вавилон Каланчаез» табере мукет сямен, ваньзэ югдуръёсты эсэпласа выльысен ӝутӥськыны кутскиз.

Чингисхан шуэ вал: мон быгатӥсько самой чебер, исамтэ нылмыртэз быдэс кувшин азвесен ачим дорысен шунды пуксён палась Джучи улусэ огназэ келяны, сое нокин сюрес вылын уз иса. Нош табере ортчоз-а нылмурт та сюресъёстӥ? Вот угось, куашказ империя. Нош нырысь ик отын куашказ вашкала оскон. Никон верамъя чингизитъёс пӧлын Ведаосты гажась несториан черкъёс кадыр Ван-хан бордысен кутскизы. Со вал Тимуджин-Чингисханлэн атаезлэн выныз. Ӵапак со юрттӥз Чингисханлы ӝутскыны, Бортэ кышнозэ полонысь мозмытыны. Ван-хан несториан осконэз ас пушказ туж юн пыӵатэм, Чингисханлэн кышноез Бортэ но несториан черкын вӧсяськем. Бортэлэсь вордскиллям ньыль пиосыз: Джучи, Чагатай, Угедэй, Толуй. Чингисхан туж яратэ вылэм Джучи пизэ. Малы ке шуоно Джучи юн гажа вылэм Ведаосты но, несториан черкез но. Джучиез котырысьтыз тодмотэм калыкъёс но туж юн гажаллям. Со сокем чылкыт вылэм, со борды калыкъёс асьсэос итӥськылӥлям. Соин Джучи чик но ожмаськытэк уно нюлэс калыкъёсты ас бордаз огазеям. Чингисхан яратоно пиезлы вань асьме палась музъемъёсты сётэ. Джучи улусэ, вань Шунды пуксён пал кунъёс но, Кавказ но, Ураллэн кык пал дурысьтыз ик вань музъемъёс пыро. Джучилы вожъяськыса ик сое вынъёсыз быдтӥзы, шӧдске. Соин ик Чингисхан шуэм: Джучилэн выжыосыз гинэ табере эксэйёс но ханъёс луозы. Отысен кылемын чингизит эксэй вир сярысь валан. Соин сэрен Чингисханлэн пиосыз вискын лушкем ожмаськонъёс кутскиллям, валамон ини «сьӧдъёс» чуртнаськытэк со озьы ӧй луысал.

Соин ик Джучилы асьме пала, аслаз улусаз, вуыны ӧз кылды. Шуо висьыса кулӥз, но шӧдске быдтӥзы. Но асьме пала вуиз солэн, ачиз кадь ик югыт Батый пиез, кудӥзлы туж кельшизы тапалась интыос но калыкъёс. Соин сэрен Арсавыл калык гань-гань шокыштӥз. Выльысен юнмазы вузчи сюресъёс, кудъёсыз хазаръёслэн иудей кивалтӥсьёссы вакытэ воксё ӝокатэмын ни вал. Усман тата ваньзэ сое ӟеч тодэ, трос книгаосыз вань солэн хазар вакытысь улон сярысь. Но Батый шунды кадь лыктӥз аслаз кык Зарни Валъёсыныз. Сокем яратэ сое Арсавыл калык. Угось Батый Кузонлэсь кыдёкын ик ӧз улы. Нырысь со Булгар каре интыяськиз, Бӧрысь аслэсьтыз Сарай карзэ ӝутӥз. Батый асьме калыкъёсты гинэ ӧз мозмыты, со вань Джучи улусэз католикъёс киысь мозмытӥз. Никон верамъя, католикъёс вань Джучи улусэз басьтыны туртто ни вал. Но Батый ӧз сёты католикъёслы асьсэлэсь малпанъёссэс быдэстыны. Джучи улусэз мозмытэмез бере шунды потон палась кунъёсазы вуыса ик соосты пазьгиз.

Но «сьӧдъёс» но котькытысен Батый доры матэктӥзы. Ӵапак шундыпуксён палан ожмаськыкуз Батыйлы ивор вуиз, Угедэй хан кулӥз но со интые солэсь тушмонзэ Гуюкез каган каризы шуыса. Батый йылпумъямтэ ужъёссэ дугдытыса аслаз Сараяз берытсконо луиз. Гуюклэсь со вылэ лыктэмзэ тодыса, со асьме палась калыкез солы пумит ожмаськыны дасяз. Но Батыез яратӥсьёс котькытын вань вал, Гуюк Самарканд доры вуыкуз шуак улонысь кошкиз. Соку Батый Гуюк интые аслэсьтыз матысь адямизэ Мункеез пуктӥз. Озьы Мунке луиз ньылетӥез но берпуметӥез Быдӟым хан. Ачиз Бату ака луиз – Чингисхан выжыысь арлыдызъя самой бадӟымез. Но Батыйлы но кема улыны ӧз кылды. Со улонысь кошкем бере солэсь интызэ солэн выныз Берке басьтӥз. Усман тата Беркеез ӧзгес яраты, угось со вал нырысетӥез чингизит, кин исламе потӥз. Никон верамъя Берке юри исламе выжиз, озьы со бордаз кыскыны турттӥз Булгар котырысь но Азиысь арабъёс пыртӥ дышетскем мусульманъёсты но соослэсь вузчиоссэс. Берке дыръя Батый дыръя кадь ик, трос каръёс лэсьтӥськизы, ачиз со улӥз Булгарын, отын ик коньдон шуккылӥз, солэн косэмезъя котькытын ӝутӥськылӥзы мечетьёс. Нош несториан черкъёсты тужгес но Самарканд котырысь супырак быдтӥзы. Соин ик несториан черкъёс Беркез «сарацин» шуизы. Никон верамъя Берке асьме пала уродзэ гинэ вайиз. Нырысь ик со вань Батыйлэсь выжызэ быдтӥз, нош соос ваньзы несторианъёс вал, Батыйлэсь кышнозэ но Боракчин-хатунэз казнить кариз. Котькуд каре мечетьёсты пуктылӥз. Соин ик мусульман вузчиослы тапалан «рай» кылдӥз. Со «райхана» гуръёслэсь Кузон но усыкмиз. Берке бере Идыгей, Мамай, Токтамыш, Тимир, Тимирлэн но Токтамышлэн пиосыз, но уно мукет пичи ханъёс пыдъёссэс ӵыжаса асьме палтӥ ветлӥзы, ваньзы соос огзы бӧрсьы огзы Кузонэз но тапалась мукет каръёсты сульккизы, сутылӥзы, калыкъёсты быдтылӥзы. Угось котькудӥз Батый сямен, Берке сямен, асьсэ выжыоссылы вань Джучи улусэз люкылыса музъемъёс удылӥз. Кытчы гинэ эн учкы, котькытын, Сибырын, Азиын, Кавказын, Крымын, Литваын, кытчыозь гинэ соослэн киоссы сузе вал, котькытын чингизит выжыысь пичи ханъёс кылдылӥзы. Сарай но, Идыгей беклярбек кулэм бӧрсьы, ордалэн шоркарыз луыса, ялан киысь кие вошъяськылӥз. Берпуметӥез Сарае пуксем хан Улуг Мухаммед вал, Токтамыш выжыысь чингизит. Ӵапак Улуг Мухаммедлы куашканы кутскем Ордалэн шоркарез понна трос ожмаськоно луиз аслаз ик кыкетӥ, куинетӥ агайёсыныз. 1419 аре Крым ожгарчиосын со вуиз Волгалэн но Камлэн усёнэз палась булгаръёслэн музъемъёсазы, басьтӥз Хаджитарханэз но ассэ Сарайлэн ханэз карыса ялӥз. Но сое ӝог отысь лӧпкытӥзы. Угось тукатимуридъёс но, Джучилэн 13 выжыосыз, асьсэды Сарае пуктыны туртто вал. Озьы Барак хан, лыз ордаысь вылӥ выжыослэн ӝутэмзылы луыса, озьы ик Улугбеклэн но Мансурлэн сопала дурбасьтэмзылы луыса 1423-1426, 1427-1428 аръёсы Сараез ас вылаз басьтӥз. Озьы, курултай Барак ханэз выльысь но выльысь быръемысь Улуг Мухаммед кошкиз Крыме, отчы кылдытӥз выль эксэйлык, нош Беркелэн кылдытэм Сараез со кошкем бере ӧз ӝутскы ни, быриз Ордалэн шоркарыз, Улуг Мухаммедлэсь но ӟечгес хан со аслыз ӧз ни шедьты уга. Улуг Мухаммед котыр ласянь кужмо вал, со пичи дырысеныз ожмаськыса будӥз Идыгей батыр вӧзын. Ожмаськон удысэз тодон сяна со дипломатия кусыпъёсты но радъяны быгатылӥз. Но озьы ке но ас котырыныз со тупаны малы ке ӧз быгаты. Крымысь но кошконо луиз, ӧз тупа Дэвлет-Бердиен. 3000 ожгарчиосыныз ӵош со кошкиз аслыз шуд утчаны. Сое аслыз матэ кариз Литваысь быдӟым князь Витовт. Литва князь юрттэмъя со нош ик кӧня ке дырлы берыктӥз Сарайзэ, но ӝог валаз даныз бырем Берке-Сарайлэсь табере тросэз уг кылзӥсько ни шуыса. Озьы, кыкетӥ-куинетӥ агай вынъёсыз ог-огенызы шор карзы понна нюръяськон вакытэ, со малпаз ни аслыз выль эксэйлык кылдытыны, утчаз инты, кытчы сое пуктыны. Уно интыостӥ ветлыса, со актыгак вуиз Муско вӧзы но куриз Василий Тёмныйлэсь кӧня ке музъемзэ, Литва но Муско кусыпе аслыз эксэйлык кылдытыны. Нош Василий Тёмный аслаз нимызъя ик пеймыт вал, со Улуг Мухаммед пумитэ 40 000 ожгарчиоссэ ыстӥз, кудъёссэ Улуг Мухаммед аслаз 3000 ожгарчиосын кӧшкемыт тыл шуккет кадь пазьгиз. Озьы сӥё-дано луэм Улуг Мухаммед 1438 аре вуиз Кузон котыре. Кузонын солы шум гинэ потӥзы. Куризы сое татчы эксэйлык кылдытыны. Угось кузонъёслы азьвыл кузёзылэсь – Гийас ад-Дин ханлэсь нокыӵе толыкез ӧй вал. Со огпол гинэ висъяськиз аслаз вакчи улоназ, лябӟем Берке-Сараез ожгарчиосыныз басьтыса, кызь нунал сое утьыса возиз. Но сое туж ӝог вормизы, отын ик со кулӥз. Нош Кузонэз ялан пӧртэм ласянь сэстӥзы, ханзы вань дыръя но, ханзы ӧвӧл дыръя но, тужгес но ӟучъёс. Улуг-Мухаммед кузонъёсты кылзэмез бере, шӧдтэк шорысь, соглаш луиз. Солэн бадӟым данэзлы луыса ӝоген Кузон вылысен ваньзылы гочан интылы пӧрмиз. Угось со выль Зарни ордалэн кылдонэз кадь адӟиськиз мукет ханъёслы. Кузон эксэйлык син куспын кужмояны шӧтаз. Ваньзы капчи узырлык утчась ожгарчиос  пӧртэм интыосысь Улуг Мухаммед доры кыстӥськизы. Ма, соос гинэ ӧвӧл, дышетӥсьёс но, тодосчиос но, кар котырын ужасьёс но, вузчиос но – ваньзы Кузонэ лыктыса, огсыр улонэз шулдыртыны кутскизы. Ма Улуг Мухаммед но интыяз ӧз пукы. Ялан Мусколэсь каръёссэ оген-оген сэстылӥз, Муско котырез но кык пол таласа-таркаса ортчиз. Туж жаляз, дыр, Василий Тёмный Улуг Мухаммедлы кулэ дыръяз ӧз юртты шуыса. Умойтэм лэсьтӥз Василий Тёмный, угось Улуг Мухаммед солы огпол гинэ ӧз юртты ни вал. Кызьы шуо умоез умоен берыктӥське, нош уродэз дас пол уродэн. Улуг Мухаммедлэн пиосыз одӥгаз ожын ассэ Василий Тёмныез но полонэ басьтӥзы. Ӵап та шорын Василий Тёмный гырпумзэ куртчылӥз луоз. Ассэ мозмытон понна, со туж уно каръёссэ Улуг Мухаммедлы дань тырыны косӥз. Вылаз ик таяз ини учыре Муско вӧзы ик Улуг Мухаммед аслэстыз выль эксэйлыксэ кылдытӥз. Отчы Касим пизэ пуктӥз. Табере со «Касимлэн эксэйлыкез» шуыса нимаське. Но та эксэйлык, котьма ке но, Мусколы но Кузонлы но ӟечлыко гинэ луиз. Ачиз Улуг Мухаммед та ужъёссэ быдэстэмез бере 40 аресаз вуыса кулӥз. Кузонэн кивалтыны кутскизы солэн пиосыз. Муско но Кузон вискын «Касимов эксэйлык» пыртӥ кужмо эшъяськон кылдӥз.

Но Крым палъёслы та эшъяськон чик но уг кельшы вал. Соос табере Берке Сарайзэс вунэтыса ялан асьсэлэсь хан пиоссэс Кузонэ пуктылыны тыршизы. Озьы Крымысь Сафа Гирей куинь пол Кузон эксэй луиз. Муско но тэк ӧз пукы, «Касимлэн эксэйлыкез» пыртӥ тыршиз аслэсьтыз эксэйёссэ Кузонэ интыяны. Озьы кутскиз Крым но Муско вискын Кузон понна ожмаськон, кудӥз али но ӧз на буйга, ялан ӟырда но ӟырда гинэ… Усман тата котькуд Кузон эксэйлэсь кызьы но кудпаласен пуксемзэ тодэ, соос туж ӝог вошъяськизы ке но, угось ачиз но со та понна трос ужаз. Но тужгес но солэн син азяз кылизы Гаухаршад ханбикелэн но Сююмбикелэн кивалтон вакытсы. Гаухаршад ханбике Улуг Мухаммедлэн выжыысьтыз вал, со туж ӟеч тодэ вал Кузонысь вузаськон ужпумъёсты, соин ик туж уг яраты вал Крымысь лыктэмъёсты но соослэсь Кузон ужпумъёсы кырсь киосынызы пыриськемзэс. Сююмбике но Гаухаршад кадь ик учке вал Кузон улон шоры. Ӵапак та кышномуртъёс Кузонэн кивалтыку, Мескарысь кышномуртъёслы луыса, кинъёс туж ӟеч кусыпъёс тупатӥзы та Кузонысь ханбикеосын, Усман тата туж зол пурысьтаз но трос йырсиоссэ йырысьтыз ыштӥз. Али ваньзэ та Кузон ужъёсты тодаз вайыса, со табере юн тодэ, кыӵе валэктонъёс вералоз со куное лыктӥсь кышномуртъёсызлы. Усман тата уродзэ гинэ ӧвӧл, умойзэ но отысь адӟе. Угось ӵапак кышномуртъёслэн кузон ужъёсы пыриськемзылы луыса со мургес но мургес тодматскиз Никон эшеныз… Ма сое гинэ шат, мар мында тодон валан со басьтӥз Никон пыртӥ, кӧня ватка пиосты дышетӥз, кӧнязэ Кузонэ ужаны интыяз, ма, Кузонэ гинэ ӧвӧл, Муское но, мукет каръёсы но… Усман тата мыняса учкиз ужась пиосыз шоры.

– Дасяське, дасяське… – шуиз со ас понназ.

* * *

Ӟумъя батырлы валантэмгес потӥз Усман таталэн, сое келякуз, Кикытэль вылэ куштэм шумпотонэз. Ноку со сое сыӵеен ӧз адӟылы. Со кыӵе ке уно карасо намер кадь адӟиськиз. Котькуд намер карасысь быгыльскем шумпотонэз Ӟумъялы мар ке выльзэ вераз. Вал отын осконэз но, кышканэз но, жадёнэз но, буйганэз но, шудэз но, кайгуэз но, инмаръёслы, кыкпалдурысьёсызлы ик, тау каронэз но. Нокызьы но со уно карасо шумпотон ватаманлэн син азьысьтыз уг кошкы. Вылаз ик соин люкиськем бераз та вакчи дыр куспын кӧня пол со сое нош но нош адӟылӥз, нош Усман таталэн ымнырыз ӧз воштӥськылы. Уно пумо шумпотонэз нокызьы ӧз тӧлӟы. «Вормонлэн-а со тусбуез, яке сётсконлэн-а? Оло кыӵе ке шоретӥез мар ке? Кызьы валано сое?» – кикыпиосын ӵош быземъяз, дугдытэк малпаське Ӟумъя. Кыӵе но малпан солэн йыраз уг чилекъя – нош огез но нокыӵе валэктонъёс уг сёты, ялан соос чилекъяло но гудыръяло гинэ. Озьы лыктэ кужмо зор, вань писпуосты някыръяса, тӧласькыса, гудыръяса, чилекъяса, йӧӟектэм кӧльыосын ыбылыса, вань инбамез пилемъёсын басьтыса, тудӟем вуосын вань музъемез миськыса, собере шуак кошке инбаме пӧртэм буёло вуюисьсэ кельтыса… Номыр но вератэк, номыр но валэктытэк. Тон солы огшоры гинэ валэктон шедьтӥськод – эх чилекъяз ук, шуиськод, вань музъемез куалекъятыса гудыръяз, зориз ке зориз! Кытчы бызе Ӟумъя, кин сьӧры, мар сьӧры уйиське, оло, кинлэсь ке, марлэсь ке пегӟе, ачиз но со валамысь дугдӥз… Кыӵе ке пеймыт сое ас пушказ кынтӥз кадь. Нош син азяз, уно карасо намер кадь, Усман тата интые табере пуксьылэ пиез… Солэн кияз Кизили Пурт, нош тыбыр сьӧраз вань Арсавыл Инкуазь, со борды кырмиськыса, выжыяськемын. Табере со Камитэз сюпсе, Камитлэн шоканэныз шока, Камитлэн шумпотонэныз пальыша, Камитлэн кышканэныз шымырске, Камитлэн синъёсыныз учке, Камитлэн йырыныз малпаське… Нош кытын табере ачиз Камит, кытын Ӟумъялэн ас пизэ пумтэм яратӥсь тата луонэз? Ваньмыз со кытчы ке ышиз. Выльысь уно карасо намер кадь усьтӥсько Усман таталэн но Камитлэн огвыллемесь пальпотонъёссы, соос борды итӥсько сыӵеесь ик мукет ымныро Кизили Пурт татаослэн пальпотонъёссы. Ваньзы одӥг кадь пальпотонэн уно карасысен соос учко Ӟумъя шоры. Шӧдтэк шорысь Ӟумъялэн бур кияз ӝутӥське чилекъясь Кизили Пурт, котыраз усьтӥське кырлуд, тылскон котырысь курбон изъёс, кык культоен ваем шальы, татаез азе пыдесъяськыса мыкырскем пиез… «Эн!» – шуэ дунне куара, Ӟумъяез синвуаськытыса. Кӧшкемыт чилектэ, кӧшкемыт гудыртэ. Вань лулзэ сутӥсь, бӧрдытӥсь, капчиятӥсь но шумпоттытӥсь тулкымъёс Ӟумъя пыртӥ ортчо. Ӟумъялэн лулыз тыл кадь лобе пеймыт инбаме но шуак берытске Иллионысь Ахилес доры уйин лыктэм Приамлы. Тани со пересь уйлэн пеймыт шобыретэз ултӥ вуиз Ахилес доры, пиезлэсь ож бусыын кесям мугорзэ курыны… Юзыр кезьыр луэ Ӟумъя… Нокызьы валэмез уг луы, малы со али Приям эксэй? Малы вань лулыз солэн бӧрдэ, кайгыре?

–  Вай, Ахилес, пиелэсь мугорзэ мыным миськыны но сое, мусоме мынэсьтым, сӥё-дано ватыны, синъёсаз солы коньдон поныны, мед луоз солэн коньдонэз шур сьӧры поттӥсьлы сётыны… Мон яратӥ сое со дырысен, ку со нырысь синъёссэ мыным усьтӥз, яратӥ со дырозь, ку тон солэсь дунне шоры учкись синъёссэ ворсад… – шуэ Ӟумъялэн лулыз бӧрдӥсь Приамлэн ымдурыныз… Кӧшкемыт бӧрдон куйёс вузо Ӟумъялэн пушказ. Бӧрдон, бӧрдон, бӧрдон, пумыз йылыз солэн ӧвӧл… Оло ӵапак тае валаса, Ахилеслэн пумтэм вожпотонэз кысӥз.

– Ярам, пересь, возьма, берыкто мон тыныд пиедлэсь мугорзэ… – шуиз Ахилес пеймытэ ышыса…

Нош ик лулыз Ӟумъялэн ыбиськиз пеймытэ, вуиз со пырак толэзь дорозь, со дортӥ ик уллёен-уллёен, каллен гинэ асьсэ понна бергаса, кошкизы ожчи-слонъёслэн кынмем мугоръёссы. «Нёжто со Бхима батырлэн Куравъёсын ожмаськон бусыын шӧтэм вожомыса зыргатъям слонъёсыз?» – пайме Ӟумъялэн тыл лулыз, слонъёс бордысь индус тусъёсты-пусъёсты адӟыса. – Бон, макем кужмо луыны кулэ солэн вожпотонэз, татчыозь ик со соосты ке зыргытъяз, кытысен ачиз музъем но туж бадӟым толэзь кадь лызпыръем гинэ адӟиське…

Уг вала Ӟумъя, малы со сыӵе мур тулкымъяське, малы лулыз кыӵе ке сандалъёс вискын куасалляське, яке инсьӧрозь ик отчы-татчы ыбылӥське? Малы адӟиськисьтэм зорлэн йӧ кӧльыосыз вистэм-вожтэм со вылэ вияло, вань лулзэ нажгатъяло? Писпуос ик тэтчало солэсь вань дуннезэ зуркатӥсь гудыриослэсь. Пилиськылэ инбам олокӧня пумо чилектонъёслэсь. Вань дунне, оло нош, мыдлань берытске. «Усман тата но Камит тани тазьы шуак-дуак ӵушиськизы ни ке, кыӵе со табере ватаман, кыӵе тата?.. – малпаське Ӟумъя. – Кин со табере, кыӵе радэ султоно солы пизэ яратӥсь таталы? Камъёс вылысь ваньзэсты кышкатӥсь ватаманлы?» Уг вала Ӟумъя, мар солэсь лулзэ сокем йыръе, кыӵе акар со пушкы пыриз? Малы со инты аслыз уг шедьты та быдӟа дуннеын но? Кытчыозь со тазьы ассэ гожмасал, кытчыозь ас лулзэ ыбылӥськытысал, ӧз ке сайкаты сое Усман тата?..

– Ӟумъя… – кылӥськиз ватаманлэн инсьӧрлыко луэм пель сьӧраз Усман таталэн туж шуныт куараез.

– Кылзӥсько, тата… – шуак сайказ Ӟумъя батыр.

– Эн вунэты куинь пужымъёстэ…

– Уг вунэты тата… –  оскытӥз сое Ӟумъя батыр.

– Ярам, возьма астэ, мар ке уг вуно мыным куинь пужымъёс… Сюлмаськисько мон тон понна…

– Валай, возьмало асме, тата, эн кышка… – табере ачиз но пальыштӥз ни Ӟумъя.

Уно шат кулэ адямилы? Куд-ог дыръя куинь кыл но тырме. Но сое дырыз дыръя верано. Соку яратонлэн тылыз нош ик улӟытэ адямиез. Поттэ сое пеймытысь. Нош пеймыт кужым ялан кискач кадь кырмыны турттэ, кырмиз ке кортна, лулзэ отчы-татчы ыбылӥськытэ. Соин ик югыт луллы котьку ас дыраз лыктэм кыллэн югытэз кулэ. Соку со кужмоя. Ӟумъя туж унозэ шӧдӥз Усман таталэн сое сайкатонысьтыз. Нырысь ик солэсь пумтэм яратӥсь кужымзэ, кудиз сьӧрын вал солэн чылкыт дэмланэз. «Эн жаля… – шуиз кадь со Ӟумъялы. –  Сёт жалятэк, эн секытаты пиедлэсь сюрессэ… Табере со Кереметлэн гутёяз усем ыжпи ӧвӧл, табере со югытлэн ожгарчиез…»

Дырыз дыръя верам кыллэн шунытэз туж кужмо эмъюм кадь. Соин  табере Ӟумъя  ачиз но пальпотыса бызе кикыпиосын ӵош, нош солэн ошкуйчиосыз, Ӟапыклэн кырныжезлы луыса, шонерак потӥзы ни кылем «храмчиослэн» уллёзы шоры. Ӵапак отчы, кытысен соослэсь пыжзэс пазьгизы но Узыбеез лушказы. Табере шур вамен татын писпуос погыръямын. Уг лу храмчиослэн ошкуйзэс поттэмзы. Соин ик пуромемын ожмаськон. Укыр ӝог кошке дыр, Инвожо нуналэ котькытын, оло, ас сямыныз ке но со бызе. Нырысьсэ Ӟумъя батыр со мында воштӥськонъёсты, со мында югдуръёсты адӟиз кыӵе ке вакчи дыр куспын. Тани со кикыпиосын ӵош ошкуй лэсьтон ты доры вуиз ини. Ӟеч лэсьтӥллям ошкуй лэсьтӥсь ватагайёс, шур вамен быдэсак писпуос погыртэмын. Нокинлэн огзэ но ошкуез кам вылэ поттэмез уз луы. Соин ик пурӟемын «храмчиос», соослы кошкыны куй кулэ ук – погыръям писпуос вылын но ожмасько.

– Юрттэлэ эшъёстылы! – кеське Ӟумъя кикыпиослы. Соосыз бурдо уллё кадь шуак ож гур пӧлы ышо. Ачиз Ӟумъя утча кулэм ки нуллӥсь пӧйшурасез. «Со уз ожмаськы, кошкыны турттоз. Нош кытӥ меда кошкоз? – малпаське Ӟумъя. – Пужымъёс дортӥ! Бен, отӥ, ӵапак отӥ, куинь пужымъёс дортӥ… Шӧдске, одӥг ранӟем уллёзы гинэ кылиз ни… Одӥгзэ така лудын быдтӥзы. Куакаоссэс но ачиз со унозэ погыръяз… Уча но троссэ соосты быдтӥз. Нош со кыктосъёслы но мертче, радлыксэс сӧре. Соин, оло, берпуметӥ уллёзы кыклы люкиськыса ожмаське! – вань кужмысьтыз Ӟумъя дыртэ. – Медаз гинэ кошке ни вал! Ноку лыктэмзы тапала медаз ни поты! Нош бадӟым мувырысь куинь пужымъёс сьӧры ке потӥзы кошкозы, отын но шур вань, отын но сыло ошкуйёс… Мед валасал та сярысь Уча… – малпаське ватаман.

Тани со шур вылэ ӝыныя пограм пипу вылтӥ бызьыса шур сопала тэтчиз, бызьыса тубӥз меӵ яр вылэ.

«Тӥни соос, ог кызь кузя пужымъёс пала дыртыса туж кызыр вамышъяло, малпало, кошкизы! – пальпотэ Ӟумъя. – Но мон отчы азьлогес вуо!»

Ӟумъя кык палашсэ ик бергатыса бызе. Тани со нош ик някырскем писпуэз шедьтӥз, бызьыса тубиз со вылэ но пырак пӧйшурасьёс вылэ инбамысен тэтчиз. Шӧдтэк шорысь тэтчон лэсьтӥз ужзэ, витез пойшурасьёс ноку уз султэ ни…

«Дас вить кузя кылизы! – шумпотэ Ӟумъя, сюлэмыз лурт-лорт тэтча. Пӧсям вуосыз ымныраз потӥзы. Тани эшшо кыксэ погыртӥз.

Пӧйшурасьёс валатскизы, Ӟумъя огназ шуыса. Кутскизы сое пужымъёс пала улляны. Нош огзэ погыртӥз Ӟумъя. Тэтчиз куинь пужымъёс пала. Сётскиз бур палась пужымъёс вискы, кык вамыш лэсьтэм бӧрсяз шуак тэтчиз паллян палаз. Тӥр бышкалскиз куинь пужымъёс сьӧрысь пужыме. Ӟумъя шуак ышкалтӥз сое но берен ыстӥз сьӧраз бызись уллёе. Нош ик огез пограз.

«Но тушмонъёс трос на… Бызи ке, йӧттозы!» – малпаськиз Ӟумъя но, ӧз бызь ини, дугдӥз, сылэ  палашъёссэ бергатыса. Чыртытӥз вир вия, пӧсям вуэз синмаз пыре. Пельпумаз тӥялскем пукыӵ ньӧл адӟиське… – Табере нокудзы кырыж уз ыбе…» – учке со тушмонъёсызлэсь арбалетъёссэс но тӥръёссэс эскерыса…

– Мар? Йылпумъялом вашкала дыръя мытэм ужмес, кызьы тонэ шуо тапалан, Дзюмъя тата… – бур кизэ выллань ӝутыса, коми кыллы матэ луись валлян кылын вазе храмчиослэн валтӥсьсы.

– Тон-а со, кулэм ки-тяпа нуллӥсь? – юа Ӟумъя.

– Мон со, мон… Соин ик тыныд кӧня ке дырлы улон сётӥсько… Но тон, сыӵе шудбур понна, мыным дыртытэк гинэ валэктыны кулэ Ыбес сярысь. Кызьы со ыбе, кызьы ыбылэ тӥляд мукет дуннеосы ыбылӥсь ӧсты?..

– Трос тон чирдӥд шӧдске арсавыл но коми мадьёсты?.. – пальыштэ Ӟумъя, солэн юанэзлы паймыса.

– Вань сыӵе сьӧлыке мынам, уг ватӥськы, уг ватскиськы мон ваткаос  сямен… Тӥлесьтыд  но книгадэс мон чирдылӥ…

– Шӧдске, тон соосты урод чирдӥд. «Ыбес» огшоры «бусы капка», кудӥз черсъёсын ворсамын. «Ыб» коми кылын «бусы» ук… – пальыша Ӟумъя… – Ватка кылын но «убо» кыл кылемын…

– Ӧвӧл со луыны быгатэ шонер… –  соглаш уг луы храмчи. – «Убо» со «грядка», ӝутэм сюй, отын главноез пуштросэз «ӝутэм» луэ… «Бусы» – «бус» кылысь потэмын. Сое «пар, паровое поле» шуо джучиос… Нош «Ыб», кызьы мон валасько, коми кылын «выл» шуэмлы матынгес… «Капка» но «ӧс» ӧвӧл.  «Капка» – «капкан» кылысь, пӧйшуръёсты кутон бордысь кылдэмын. Ойдо, ватытэк вера, ватка, кызьы тиляд Ыбесты ыбе… Уг яратӥськы мон, ку мынэсьтым вато…

– Тодӥсько ватэммес уд яратӥськы шуыса, соин Мултан пересьёслэн йыразы копаськид…

– Ӧвӧл шонер,  Мултанэ мон ӧй ветлы, отчы мукет уллё ветлӥз… Вера, Ӟумъя, усьты ватостэ… Зарни Мум доры ми ӧм сюре, Кизили Пуртты доры ӧм вуэ, коть ватостэ усьтыса буйгаты, мыным кельше тӥляд кылды, отын сомында ватосэз… Ноку ӧй малпа вал, сыӵе пичи калык кылын сомында зарниез пучыяськыны турттэ шуыса…

– Мон номыр уг ватӥськы, «бус» ӟуч кылын «пар» ӧвӧл, ӟуч кылын со «туман» луэ ук, «тумен» кадь, «тымон» кадь, «думон» кадь… – пальыша Ӟумъя ватаман, кылъёсын шудыса…

– Ӧй вала мон, валэкты мыным, маин соос висъясько? Яке тон юри йыромытӥськод? – шуак луэ «храмчи»…

– Уг тодӥськы… мынам йырам но со ик бус кылдэ ни кадь… – шуэ Ӟумъя пыд йылысьтыз пограны кутскыса… Но со пограса уг вуы, «храмчи» сое кияз кутэ но му вылэ понэ. Учке яраоссэ. Ишкалтэ Ӟумъялэн пельпумысьтыз тӥялскем пукыӵ ньӧлзэ. Яраяз пазьге кыӵе ке тӧдьы дарызэ, тыл зырӟытыса ӝуатэ сое…

– А-а-а! – шымырске Ӟумъя.

– Вот табере мон буйгай, уз ни кошкы вирыд. Вождэ эн вай, мукетыз мынам ӧвӧл, Мултан вуды Зарни Мум утчась уллёлэн гинэ вал. Сое ке кисьтысал, ваньмыз тынад бурмысал ни. Аьмеос вань вераськонмес ӧм быдтэ на, адском на Дзьумъя… Мон кемалы уг ышиськы… –  шуэ «храмчи», эшъёссэ азьлань кошкыны косыса.

Ӵапак та дыре  инбамысь писпуос вылысь тэтчыса ваське  Уча.

– О-о-о, таиз но тодмо ватка! Ачиз Уча, кикыпиосты дышетӥсь – пальпотэ «храмчи»… – Тон ӵапак дыраз, ну ай тон ӝоггес ватамандэ Усман татаед доры. Табере со гинэ быгатоз сое бурмытыны. Бере ке кылид, со кулыны но быгатоз…

– Мар тон сое карид? – юа Уча.

– Мон солы юрттӥ гинэ, вирзэ дугдытӥ, дары ӝуатыса… Табере тон киын солэн улонэз… Атаед, анаед, сузэред понна, вождэ эн вай, соос асьсэос янгыш… Мон соосты чус пукыны косӥ вал, ӧз кылзэ… ожтӥрлык борды кутскизы… Тон, малпасько, соос кадь ӧвӧл, уть ватамандэ… Нош ми, Уча, кошкомы, милям мукет ужъёсмы табере вань… Тау шуэлэ Камитлы мынам нимылэсь, кузёосмы но орденъёсмы котырысь югдуръёсты шараямез понна… Аждагалэсь утемез понна… Ми татысен гинэ валамы Зарни Мум, милемлы, кырсь лулоослы, сузёнтэм шуыса. Озьы ик, шӧдске, Кизили Пуртты но дятъёслы уз сётӥськы… Тӥляд эксэй вирды но паймымон арбери… Мынам йыры пачылмемын тӥ пушкысь сомында югытсэ адӟыса. Мыным ай кема со сярысь малпаськоно луоз. Соин ик мон сюлмысьтым гажанме тӥляд калыктылы верасько, Дзьумъя батыр. Мынам вань пушкы берытскиз тӥлесьтыд югыт оскондэс адӟыса… Монэ сьӧд кузёосмы улэп кельтӥзы ке, мон одно табере эш луыса лыкто, тау тӥледлы югыт кужымез шӧдытэмды понна… Утиське, возьмаське Шунды пуксён палъёслэсь, соос ми кадьёсты уно ай тӥ пала келялозы… Ӟеч луэ!

«Храмчиос» шуак-шуак кошко. Уча ватаманзэ кияз ӝутэ но дыртыса мукет пала кошке.

– Ватаман, чида, чида, Ӟумъя батыр, эн кошкы, эн кельты милемды… – шыпыртэ со вамышъёссэ кужмоятыса. Шур доры матэктэмъяз кытысь ке пото бусъёс… Тани соос быдэс шурез ӵоктазы ини, ожмаськисьёс но каллен чалмизы… Уча, ватаманзэ турын вылэ поныса куаӵы кадь куачыртӥз. Соку ик дораз кикыпиос потӥзы. Пӧлазы раньӟемъёссы но вань…

– Мар луиз, кытын ваньзы? – юа Уча.

– Бус лыктӥз… Номыр уг адӟиськы… – шуо кикыпиос.

– Кошкизы со ожчиос… Музъем улэ кадь ышизы… – шуо мукетъёсыз.

– Кулэмъёссы но ышизы… – паймо кикыпиос…

– Ярам, лэсьтэ ӝоггес сюры, ӝоггес нуэ ватаманэз Усман тата доры. Нош вить мурт мон сьӧры. Байгыш, Чарлан, Тотой, Чабата, Ӧтэй, кошким ӝоггес.

Юнме Уча мынӥз «храмчиос» сьӧры. Ӧй вал ни соос кыкетӥ шур дорын. Ватэм ошкуй но ӧй вал… Уча соослэн одӥг кылзылы но ӧз оскы. Уг пот вал солэн соосты лэземез…

– Визьмоесь… – малы ке чик но вожзэ поттытэк серектӥз Уча. – Визьмо ужало, чёртъёс… Ваньмыз соослэн малпамын, ваньзэ соос адӟо… Вань кинлэсь адӟем карыны…

Паймыса бертӥзы соос, Ӟумъя батырлэсь погыртэм «храмчиоссэс» но ӧз адӟе ни… Бус но ышиз, куакаос но… Оло ке воксё ожмаськон ӧй вал…

Но бадӟым шумпотон вал кикыкушын. Нырысьсэ казакъёс ожмаськизы. Кулэмъёссы но ӧй вал. Серекъяло, ож сярысь мадё, ранӟем эшъёссэс пӧртэм турын вуосын коттыло, дарыен сутыло… Оглом ваньзэсты бугыртӥз, ваньзэсты выль сямен дунне шоры учкытӥз та храмчиосын пумиськон. Ӟумъя но, Уча но, Усман тата но выль сямен табере малпасько, чал-чал учко ог-огзы шоры, югыт синъёсын, яратыса учко…

* * *

Узыбей ӧз ни чида, ури-бери дасяськиз но, тӧл кадь, кошкиз Мырдакымес гурезьбам уллане. Писпу вылысь коркалэн укноостӥз со ваньзэ-ваньзэ сак эскериз. Табере котькуд изэз, вамен кыллись писпуэз, мувырез-гопез тодэ. Сюрес но со аслыз та нюлэсъёсын шобырскем музъем вылэ ваньзэ санэ басьтыса пусйиз – котькуд гопез, вужерез, писпуэз, куд палдуртӥз ортчыны малпаса. Чаклаз, куд палан шуралиос, куд палан гондыр пиосыныз ветлэ. Нош кыйёслэсь эксэй ныл уг кышка, пичи дырысеныз соосты кынтыны тодэ. Тани дӥськутэз гинэ солэн укыр югыт, туж кыдёке адске толэзь улын. Соин ик Узыбей писпутэм кырало интыосы уг поты. Тыбыраз солэн ӝыкытак ошемын пукыӵез, кырыж сабыр палашез, пукыӵ ньӧл кӧрыкез, кусказ пуртэз вань, кияз арбалетэз. Тани со шуак васькиз Мырдакымес бамалэз, потӥз пичи шур сьӧры. Нош ик сое писпуос шобыртӥзы. Нюлэс вылтӥ шуныт омыр вылын бадӟым бурдъёсыныз возиськыса каллен гинэ кошкиз валантэм бурдо.

– Шузи… –  кылӥськиз Узыбейлэн пель сьӧраз.

– Шузи ке, шузи ни, дыр! – ас понназ кылбышкиз солы Узыбей. Отын пукыса визьмогес шат? Отын но ваньмыз алама… Нош татын тон ачид аслэсьтыд кылзӥськод… Юнме ӧз поты ук куинетӥ полаз «Шузилэн» Арканэз. Юрттозы солы «Кулэм» но, «Ошиськем» но, озьы  ик, кызьы соос усьтӥськизы…

Тани со нарды кадь шуак тубиз вайяськыса-вайяськыса туж ӝужыт будэм бадьпу вылэ. Пересь бадьпу шумпотӥз кадь ныллы юрттыны быгатэмезлы. Узыбейлы йыраз лыктӥз, кызьы со котьку яратэ вал таӵе веськрес но ӝужыт будӥсь бадьпуосты. Со котьку шӧдэ вал бадьпуослэсь лулзэс, кызьы ке калмез сюлэмыныз вала вал, соос калмезъёсты ярато шуыса.

– Озьы, нылы… Котьку шонер малпаськод вал… – вазиз солы писпулэн пыдлось куараез. – Пересь бадьмуртлэн синъёсыз котьку тодмало вал Калтасин Мумы Мыстормылэсь Арсавыл шаере пазьгиськем выжыоссэ… 

Узыбей ӧжытак куалектӥз ке но, кызьы ке ӝог ассэ кырмиз. Угось со ӟеч тодэ, «Шузи» Аркан кышканы уг косы. Солэн азяз ик адӟиськиз писпулэн ымнырыз. Кузонын будэм нылашлэн сюлэмыз кышкан интые шумпотонэн пачылмиз. Со котьку тодэ вал писпуос улэпесь шуыса. Пальпотыса учкиз со мудрон песятай шоры.

– Ми туж мур адӟиськом, милесьтым нокыӵе мурдалалэн номырзэ ватэмез уг луы. Калмез выжы инбамысь васькемын… Быдӟым Ош-гондырмы кадь ик… Тау тыныд, эксэй ныл, мынэсьтым юрттэтме куремед понна. Тӥни отын соос, одӥг синмо аримаспаос, Кабакуллэн но Ягуллэн шуръёссы вискы дугдӥзы. Валъёссы укыр чебересь. Тодо соос валъёсты бырйыны. Мон туж кемалась сыӵе адымась валъёсты ӧй адӟы. Урал из сьӧрысь вайизы, шӧдске. Тон, эксэй ныл, туб на мынам суйпосъёсы вылӥегес. Адӟод соосты.

Узы нарды кадь нош ик тэтчиз зӧк вай вылэ, отысен кыкетӥез, куинетӥез вылэ. Пересь бадьмурт куанэ солэн чырткем тэтчамезлы. Пальыша, мае ке аслэсьтыззэ тодаз вайыса. Яратэ вал пересь чебер ожгарчи нылъёсты. Чудьяос тапалан улон вакытэ трос ветло вал соос тапалан. Нош тулыс вуыку Мырдакымес бамалын юмшало вал. Учкы ай, кыӵе чебересь Узыбейлэн но макесъёсыз, гадьёсыз. Быгатэ Инмар синмальдымон кышномурт мугоръёсты кылдытыны…

Узыбей адӟиз, мар солы кулэ вал. Коркалэн укноосыз укыр матын возьматӥзы солы аримаспаосты, но чик но соос матын вылымтэ.

– Кема потоно луоз та нюлэс пыртӥ… – малпаськонэ усиз Узыбей. Оло юнме потӥз ни со Япанчалэн писпу вылысь коркасьтыз?.. Нюлэсэз ортчыны капчи ӧвӧл, ӟеч тодэ сое Ватка котырын будэм нылаш.

– Сокем ик кема уд поты, юрттозы тыныд писпуос… – пальыштэ солы пересь бадьмурт.

– Ачиз Мырдакымес но тӥледын тазьы уг вераськы-а? – юа солэсь  Узыбей нош ик солэн ымныр азяз васькем бӧрсяз.

– Со но вераське… – пальпотэ бадьмурт. – Ваньмы вераськиськомы, Ягул но, Кабакул но, Кӧснюк но, шур дурысь шашыос но… Мӧзмыт кылиз милемлы чудьяос кошкем бере…

– Нош со ведӥн кышномурт, кызьы ай сое, Чак-чак апай тӥледын вераське-а? – шӧдтэк шорысь юа Узыбей.

– Чачок апай?.. – пальыштэ бадьмурт… – Чачок апай нокинэн уг вераськы, ымнырзэ но ми солэсь ум адӟиське…

– Кызьы уд адӟиське?

– Чачок апай со пеймыт уй кадь, вужер кадь, тӧл кадь, кызьы вуэ озьы ик ыше… Ноку дырыз уг луы мон доры дугдыны… Ялан пеймытэ ватске… Со ук та интылэн туннэ кузёез…

– Нош кытын со улэ?

– Созэ нокин уг тоды… Мырдакымесысь Бакатур Тыпы сяна…

– Кызьы уг тоды, солэн скалэз но вань ук? Кытын ке со скалзэ возе ук?..

– Со Вукузёлэсь скалзэ кыске… – пальпотэ бадьмурт.

– Тон серекъяськод-а?..

– Мон уг серекъяськы… Тон юид ук солэсь йӧлзэ, кельше-а со гурт скалъёслэн йӧлзылы?..

Узыбей нош ик тодаз ваиз вань дунне кужымез сётӥсь йӧлэз.

– Му-у-у! – шуиз солы Вукузёлэн бадӟым вераё тӧдьы скалэз. Вож-вож турынэз со куаныса ик сыске. Котыраз кык векчи вумуртъёс ветло…

– Соосыз нош мар скал котырын шонасько? – шуак юаны турттэ вал Узыбей, но бадьмурт юанзэ возьматэк  валэктыны кутскиз.

– Лузьёсты, кутъёсты, чибиньёсты парсь суртонлэсь лэсьтэм карнакъёсын скалзы котырысь улляса ветло…

Эксэй ныллэн синъёсыз куаныса ик чиляло. Кельше солы бадьмуртэн вераськыны. Вань сюлмыз куанэ. Мар но со уг вера. Кытысь тодэ меда  парсь суртон сярысь но?..

– Нош няньзэ, сокем ческыт няньзэ кытын со пыже?.. – нош ик юа Узыбей.

– Вумуртъёс пыжо… –  пальыштэ бадьмурт.

– Вумуртъёс?..

– Вумуртъёс… – мусо пальпотэ бадьмурт. – Мырдакымес йылысь тыпы вайёс вискысь корка пушкы но соос ик ошмес ву кыскизы, ву кошконзэ но соос ик лэсьтӥзы… Гумыоссэс музъеме ватыса… Ма, корказэ но соос ик йӧндыризы… Чачок апай кулэмъёсты но сайкатъяны быгатэ… Кулэмъёс но трос отын ужазы…

– Мыным номыр уз луы-а тамында тодэме понна? – шӧдтэк шорысь юа Узыбей.

– Мар со понна луоз на? – пайме Бадьмурт. – Тодон со подон но, кыл лӧдон но ӧвол. Тодон со тодон. Япанча тонэ огшоры татчы ӧз вайы ук. Ваньзэ ачиз Зарни Мум малпаз. Вукузёлэсь скал йӧлзэ ӧд ке юы, вукузёослэсь няньзэс ӧд ке сиы, тон монэн ӧд вераськысалыд… Ваньмыз кемалась чакламын…

– Ма нёжто ву пыдсын ваньмыз вань? – паймыса юа Узыбей.

– Ву пыдсын ӧвӧл… – пальыша Бадьмурт. – Ву сьӧрын шуид ке, зэмгес луоз. Отчы Чачок апай кадь вуыны кулэ. Тодыны кулэ вулэсь ӧссэ. Та дуннеын нырысь ик ву вал, нош вуын вумуртъёс. Шуо, отын но кӧс инты вань. Таӵе ик лудъёс, шуръёс гурезьёс, тэльёс. Собере Инмар ву вылэ но кӧс инты кылдытӥз. Собере кытысь ке со лешакъёс – зарни утчась ванъёс, ваннапалась йӧмуртъёс вуизы. Тросэз борды соос йӧттӥськизы. Дуннеез пожазы-саптазы. Соин сэрен куд-ог адямиослы табере йӧтунъёслэн йӧтонзы йӧтылэ. Вумуртъёс талэсь кышкаса ворсаськизы… Адями калыкъёс но туж чылкытъёсыз ӧз чидалэ… Кошкизы…

– Чудьяос музъем пыдсы кошкизы, шуо… Кызьы соос отчы кошкизы? – паймыса юа Узыбей.

– Нош ик музъем пыдсы шуиськод… Соослэн ваньмыз ужа, котькытын пусъёссы кылемын… Ӵапак со пусъёс пыртӥ татчы аримаспаос бабасырен ӵош вуизы… Нош тонэ шудьяослэн тодонъёссылы луыса «храмчиос» шедьтӥзы… Музъем пыдсы ке кошкысалзы, озьы ӧй луысал. Пыдэс со пыдлэн ӧсэз. Нош пыд со пыд ӧвӧл, кудӥзлэн пыд тяпаосыз но макесъёсыз вань.  Пыд со пыдло пал. Пыдэс со сыӵе ик ӧс, Инӧс кадь, Ыбес кадь, Пыдес кадь… Та дуннелэн туж трос ӧсъёсыз… Мон но соосты ваньзэ уг тодӥськы. Тод, пе, тодэ вал. Тодон тыпы но тодэ. Тани, кылсярысь, таиз Вашкала Пус – Нылкышно-вал яке Вал-нылкышно нимаське… – Бадьмурт вай вылаз ошиськем пус шоры возьматӥз…

Узыбей одӥгзэ ӟеч валаз, табере со понна валантэмез кутскиз. Тани Бадьпулэн киосыз шуак солэн чыртыяз ошизы чудьяослэсь бадьпу вае ошем Вал-нылкышно Пуссэс. Ныллэн азяз дунне берыктӥськиз кадь, Бадьмурт ышиз, нош солэн киосыз, вайёслы берытскон азязы, сое вал вылэ пуктӥзы.

Туж ӝог кошкиз нылаш нюлэс пыртӥ, нырысь со малпаз омыретӥ лобе шуыса, собере валаз – вал вылын ворттэ, но огез сое паймытӥз, туж ӝог ворттэ ке но, валлэн пыд куараосыз уг кылӥсько. «Котыр буй-буй ӝуй будэ, оло соин уг кылӥсько?» – малпаське Узыбей. Шӧдтэк шорысь со адӟе, валлэн азьыз валлэн кадь ӧвӧл… Гадьыз, чыртыез, йырыз, пельпумъёсыз, киосыз адямилэн, нош пыдъёсыз но мугорыз валлэн…

– Пук интыяд! – ӧжытак чурытгес вера солы кышномурт куара. – Бен,  мон вал ӧвӧл, мон валмурт, вылаз ик кышномурт… – валэктэ со.

Узыбейлы шурдыт луэ. Синъёсыз ик пеймытаса кошко. Но малы меда сокем шурдэ на со, адями валъёс сярысь пичи дырысеныз кылэмын ни ук, малы татын паймонэз? Но одӥгез кылон, мукетыз ачиз вылын ворттон. Юн-юн пельпумо кышномурт тани ӧжытак со пала берытскиз – нылкышно гадьёссэ солэсь азвесь коньдонлэсь керттэм чигвесь шобыртэ, чыртыяз ибырвесь чилекъя, йыр вылысьтыз такъязэ но марӟанэн ӵош вурем вашкала азвесь коньдон чеберма. Пельёсаз кык зарни Шунды Мумыос. Киосаз – зарни кипотэсъёс кыйёсты тодэ вайыто… Но кыйёслэн йыръёссы адямиослэн кадь…

– Юнгес кырмиськы энерчак борды, пыдъёстэ лёгет гырыке интыя… Чакла вайёсты, ӵем будӥсь нюлэс пуштӥ потӥськомы… – нылкышно гадь куараеныз шулдырак вазе адямивал. – Мынам нимы Эркынай, соин дыр эрикез яратӥсько.  Ваньмылы асьмелы, Узыбей, эрик кулэ, озьы ук? Тани мынам картэ, Полкан, монэ ас бордаз думыса возьысал. Кошкиз парма калыкъёс пала, ӵыжыосыз доры. Мон ӧй мыны. Эрикеным кӧня ке шокаме потӥз. Мыным татын, ас шаерам,  туж но туж кельше… Мон кимпаруша ӧвӧл ук картэ борды гинэ ӝиптӥськыса улыны. Мон эриклэсь тросгес кудзӥсько. Мон валасько, малы тон со палсинмоос доры потӥськод… Тон но эрикез яратӥсь сямо, но кимпарушаослэн сямзы но пушкад гыбда. Тынад но сюлэмыд укыр кужмо яратэ. Но кипарушалы тон уд пӧрмы. Тон пачканы уд яратӥськы. Четлыкын пукыны секыт, озьы ук, вылаз ик возьманы тон вылэ погырась югдуръёсты. Тон ӵемысь ачид аслыд югдуръёсты кылдытъяськод, соку тон вал вылын луиськод…

– Кимпарушаосты мон но пичи дырысеным яратӥсько… – пальыштэ Узыбей. – Анае мыным трос мадьылӥз соос сярысь. Бон, вань, дыр, мынам но сямам кимпарушаослэсь лыктэмез. Сюлэмы мынам туж зол яратэ. Соин ик мар ке мон табере уг валаськы ни, шонер-а мон лэсьтӥсько, оло нош кырыж-а?

–  Мон ӧйгес вала, мар пумысен кырыж лэсьтӥськод? – юаз солэсь валкышномурт.

– Мон уг валаськы, малы мон ожтӥрлык сьӧрам басьтӥ, малы та арбалетэз нуллӥсько?.. Мынам уг поты нокинэ ыбылэме… Мынам тодэме потэ, малы мон соослы кулэ луи, со аримаспаослы?

– Тон ваньзэ шонер лэсьтӥськод, – валэктэ Эркынай. – Ожтӥрлык тонэ чебертэ гинэ, гажан мылкыд пыӵатытэ. Тон «эксэй ныл», соин ик тон чилектыны кулэ ваньмыныз! Тӥни соос отын нюлэс кушын эстӥсько, тылзы кыдёке югдэ,  кӧлыны дасясько, оло… Мар, тазьы ик ӝог потӥськомы? Яке ворттонмес калленатомы-а?

– Потӥськомы тазьы ик, кызьы мынӥськомы! – вазе эксэй ныл.

– Ох, таиз мыным туж кельше! – черектэ Эркынай, со арыслан кадь тэтчаса потэ нюлэс куше, ньыль пыд гижыосыныз ик ӝуйёс вылтӥ нюж мыныса тыпак дугдэ.

– Я, мар, палсин сюресчиос, каньсырады, тырмоз кӧлыны! – кеське Эркынай. – Тӥ лыктӥды милям Арсавыл шаерамы, милям эксэй нылмылэн тодэмез потэ, кыӵе тӥляд мугды? Мар тӥледлы милесьтым кулэ?..

Куд-ог дыръя чалмыт луыны кулэ, дыр, Узыбей сое кемалась вала, тани али но номыр вазьытэк чалмыт учке со одӥг синмо аримаспаосты. Солэн сак синъёсыз ваньзэ чаклало. Кык нылкышноослэн тазьы шуак-дуак потэмзы палсинмоослэсь вань йырвизьзэс лӧпкытӥз кадь. Соос шуак тэтчазы ке но, пыд йылазы султыса ӧз на вуэ,  ваньзы югдурез эскеро. Ог-огзы шоры учкыло, мар карыны уг валало. Тани валтӥсьсы шуак мар ке вераз, аримаспаос султӥзы, мыкырскизы…

– Вождэс эн вае, эксэй ныл, тазьы сюрестэм интыостӥ тӥ доры лыктэммы понна… – вераны кутскиз валтӥсьсы. – Ми туномылэсь кылзыса тазьы лыктӥмы. Та аспӧртэм пусъёсты чакласа гинэ ми арсавыл эксэй ныл доры вуомы, шуиз со. Тӥ эксэй ныл ке, озьыен туномы милям туж шонер адӟиз. Мыкырскиськом ми тӥ азьын, эксэй ныл…

Эркынай кӧня ке куш котыртӥ ортчиз, чебер валъёс солы гырдалтӥзы, ӟечбуръяськизы, шӧдске, паймымон валэн…

– Нош малы тӥледлы «эксэй ныл» кулэ луиз? – юа Узыбей.

– Музъем куараос туж трос верасько тӥ сярысь… – кутскиз вераны валтӥсьсы.

– Котькуд вераськонлы оскыны луэ шат? – дугдытӥз сое эксэй ныл.

– Вераськон сюлэмез бӧрдытӥсь ужпум сярысь ке луэ, соку осконтэмезлы но оскиськод… Ми но кылӥмы, Зарни Мум доры «эксэй ныл» пыртӥ гинэ вуыны луоз шуыса… – валэктэ аримаспаослэн валтӥсьсы.

– Нош Зарни Мум малы тӥледлы кулэ? Зарни Валэз шедьтон понна?..

– Озьы… – шуак луо аримаспаос, синъёссы сюлворыса учко «эксэй ныл» шоры. Оло «эксэй ныл» мар ке тодэ Зарни Валъёс сярысь…

«Эксэй ныл» жаляса учке аримаспаос шоры, Эркынайлы но тунсыко, мар шуоз Узыбей. Ваньзы возьмало. «Эксэй ныл» нош ик синъёссэ аримаспаос шоры мертчытэ. Мар со вералоз Зарни Вал сярысь? Со уг тоды ук, кытын со ватэмын. «Мар соослы верано?,,» – малпаське эксэй ныл. Шӧдтэк шорысь со вала, уг тырмы соос пӧлын бабасыр но эшшо одӥг аримаспа. Кытын соос? «Эксэй ныл» бергес валаз янгышамзэ. Ӵапак со вакытэ нылкышновал вылэ, Узыбей сьӧры пуксе тырмисьтэмез аримаспа. Солэн кырыж пуртэз Узыбейлэн чырты бордаз лякиське. Аримаспа син куспын Узыбеез думылэ но  маймылэзлы-бабасырезлы сэрпалтэ. Бабасыр мамыкез кадь кутэ нылмуртэз, лӥял вылэ пуктэ.

– Ӟечбур, Эркынай… – нылкышно валлэн мусо ымнырыз борды бамзэ лякыса куанэмзэ возьматэ аримаспа туно… – Тон ӧд на вунэты, кызьы ми тонэ бабасырен ӵош Парма палась нюрысь поттӥмы… Тынад пунэмед кылемын, тодӥськод на, мар мон тыныд соку шуи?..

– Тодӥсько! – бордаз ляпаськем аримаспаез ас ымныр бордысьтыз палэнтэ Эркынай… – Вера курондэ. Но со бадӟымгес луыны кулэ ӧвӧл монэ нюрысь поттэмедлэсь… «Эксэй ныллэсь» улонзэ мынам улонэным эн ик выры ӵошатыны. Гожез сьӧры ке ортчид, мон нокыӵе кыл вератэк тынэсьтыд азгынэм лул мугордэ та нюлэс куш шоры кельто…

– Быдӟым туно, уг-а луы эксэй нылэн ӧжытак небытгес вераськемды… – чурыт юа аримаспаослэн валтӥсьсы. – Эксэй ныл сотэк но соглаш Зарни Вал сярысь вераны…

– «Эксэй ныл» номыр со сярысь уг тоды! – куаӵак дугдытэ алэсьтыз валтӥсьсэ аримаспаослэн тунозы. – Солэн вирыз гинэ Зарни Мум доры сюресэз тодэ… Со понна асьмеос татчы лыктӥмы…

Тунозылэн аслаз валтӥсеныз тазьы чурыт вераськемез нокинэ палсинмоос пӧлысь ӧз паймыты. Шӧдске, дышемын соос таӵе вераськонлы. Но со умой ӧвол ук. Озьы малпаське Узыбей ӝуймем лӥял вылысен.

Аримаспаослэн тунозы небытак гинэ тэтче нылкышновал вылысь. Бабасыр солы буртчин бинялтэт сётэ. Туно шуак сое сэрттэ но кулэм ки поттэ. Ваньзы куалекто… Эркынай но сьӧрлань чигна… Узыбей гинэ серемзэ кутыны быгатытэк котканы кутске…

– Пичияк вирыд мыным кулэ, «эксэй ныл», мон чиньыяд гинэ пор венен бышкалто, ог-куинь шапык вирдэ та кулэм ки вылэ палькко, собере та ки мыным сюрес возьматоз Зарни Мум доры… Бабасыр, вай ай ко пор веньме…

Узыбей уг вала мар та шузи тунолы вераны. Но кыӵе ке пыдлось кужымыныз со вала, али мар ке но мукетыз луоз. Соин-а, мар-а серекъяса учке бабасыр но аримаспа туно шоры.

Бабасыр дыртыса туноез доры вамыштэ, нош ачиз куинь вамыш но лэсьтыса уг вутты, кыӵе ке кужым сое ыбем кадь омыре ӝутэ. Тани со пыдъёстӥз ошемын ни тыпылэн самой вылӥ вай вылаз… Собере шарт карыса мар ке пуштэ. Вань ёросэз ӵын басьтэ. Нокин валаса уг вутты, кызьы думылӥзы аримаспаослэсь тунозэс но Узыбей пала сэрпалтӥзы. Чагыр ӵын пӧлын кылдэ сьӧд-сьӧд чилясь дӥськутэн оло воргорон, оло кышномурт. Со лек ортче Узыбей вӧзтӥ, уг ик малпа сое сэрттыны-пертчыны. Ымнырыз но солэн сьӧд кышет сьӧры ватэмын, сутэр кадь синъёсыз гинэ адӟисько, тыл азьын лек воректылыса.

– О-о! Ачиз Чачок апай уй пушкысьтыз мычиськиз… – серектэ аримаспаослэн тунозы. – Кемалась мон тонэ ӧй адӟы, тӧлперилэсь сузэрзэ! Но тон юнме, дыр, татчы потӥд, тонэ но татын мукетыз пӧйшур пӧйшура… Кемалась со ми сьӧрын ветлэ куӵо валэныз…

Омырын нош ик ӵын пуштэ. Ваньзы куалекто. Ӵын тӧлӟем куш шоры кык сьӧд дӥськутэн адямиос пото. Бызьыса потэ куӵо вал. Сьӧд дӥськутэн воргорон со вылэ тэтче. Зорина нылкышно-валэз энера. Валъёс кык сьӧр пыд вылазы султо. Тани соос ог-огзылы пумит вортто ни, чин-чан вазьыло палашъёс. Тани соос нош ик берытско, нош ик ог-огзылы пумит вортто, чин-чан вазьыло палашъёс. Ӵапак та вакытэ куш шоры потэ сьӧд-сьӧд чилясь вал… Туж лек со султэ сьӧр пыдъёсыз вылэ… Соос вӧзы олокытысь кылдэ бабасыр…

* * *

Та нюлэс куше «Кышкасьтэм» нимо кион-валэз вылын потыкуз, Камитлэн ымнырыз сокем куанэмын вал. Угось со табере песятаез кадь ик «пуаны» быгатэ. Куинь мугоръёсыз солэн али гинэ мукет сюресъёсыз эскерыса ваньзэ Камитлы ивортӥзы. Шонерзэ ке верано, Камит ачиз со сюресъёслэсь кытчы нуэмзэс адӟиз. Нош али куш шоры потэмез бере, солэсь саклыксэ нош Кырныж кыскиз. Бадӟым писпу вылысен туж сак учкыса, со пуке… Камит сое куинетӥзэ синйылтӥз ни, ялан котыразы берга бере, озьыен со юнме шорысь ӧвӧл.

– Мар вераны турттӥськод, вера ни верамед ке потэ? – малпанэныз гинэ юаз солэсь Камит.

– Чачаез кузёезлы берыктоно… Со кемалась ини Чачазэ утча… Табере со татын, тӥни куӵо валэз вылын, Чачок апаез коралтыны дасяське… – кылӥз Камит Кырныжлэсь малпанъёссэ. – Дугдыты ог-огзэс корамзылэсь азьвыл, ысты Кизили Пурттэ кудаз ке писпу борды…

Камит али гинэ адӟиз куше люкаськем кыӵе ке калыкез…

– Озьы, Кизили Пурттэк секыт луоз югдурез валаны… – малпаны гинэ вуиз Камит, нош Пурт ачиз ини пукыӵ ньӧл кадь ыбиськиз кушлэн дураз огназ сылӥсь ӝужыт тыпылэн пыктос кадь урдӥськем лёг шораз. Ӵапак та тыпылэн вылӥысь зӧк вай бордаз малы ке пыдтӥз ошемын бабасыр… Камит номырзэ валаса ӧз вутты на. Кыӵе калык та? Аримаспаос?.. Пуны адями?.. Соосыз кинъёс? Адями вал?.. Адями вал вылын кин?.. Мар соос татын каро? Марлы таосыз ог-огзы вылэ палашен урдӥськыны дасяськизы? Со мында юанъёслы шуак валэктон, конечно, уд шедьты…

– Валалод на, дырыд табере вань… – шуэ солы азвесь кадь чиляса югекъясь Кизили Пуртэз. Вань ёрос вылэ сабырлык ваське, толэзьлэн лызалэс тусыз кадь бусъёс лэзисько. «Кабакул но Ягул вискы» – шуысал та интыосты ӟеч тодӥсь адями лул. Но Камитлы ваньмыз одӥг, со татчы Узыбейзэ утчаны вуиз ук…

– Дугдэ! Ваньды кынме интыяды! Вырӟиды ке, нокуддэс Кизили Пурт уз жаля… – ӟазырес куараеныз кеськиз со ваньзылы, кинэ адӟе.

Вань тэра вылтӥ, лызалэс бусъёсын лӧсъяськыса, азвесь дэра кадь, аспӧртэм чильтэръёссэ возьматыса, Камит азе лэзиськиз толэзь сюрес… Со сюрес Камит дорысен шонерак кошкиз думылэм Узыбей доры но ваньзылы югдытӥз сое…

– Узыбей?.. – юзыр-кезьыр луиз Камит… – Улэп!!! – куанӥз солэн вань пушкыз.

– Улэп! – шумпотэ валкион.

– Улэп! – тылсия Прохор бабасырез.

Камит шуак тэтче вал вылысьтыз шонерен Узыбеез доры кошке. Дыртыса вамышъянъяз со сак учкылэ аримаспаосты, Пурысь вал вылысь пуны адямиез, тыпые ошем бабасырез, думылэм аримаспаез, адямивалэз, со вылысь Чачок апаез, со шоры меӵак учкись Кырныжез.

– Камит! – ӟузыр синвуаське Узыбей. Солэн ымныраз ваньмыз, шумпотонэз, кышканэз, возьдаськонэз, бӧрдонэз, кӧтӝожез.

Камит уг малпа вал ини сое улэпен адӟыны, соин ик дыртыса сое пертчылэ. Кин сое думылӥз? Малы Япанча татчы сое кельтӥз? Номырзэ уг вала Камит. Дырыз но ӧвӧл солэн йырзэ бергатыны, мозмытоно Узыбеез, ӟыгыртоно сое ас бордаз! Аслэсьтыз сокем дуно адямизэ! Кудӥз понна со сокем кӧшкемыт интыостӥ татчы вуоно луиз! Тани со пертчиз берпуметӥ герӟетсэ, мамыкез кадь ӝутӥз Узыбейзэ, кужмо киосыныз ас бордаз сое ӝиптӥз. Узыбей но соку ик пунысюл кадь Камитэз борды ӟыгырскиз, чупам вылысь сое чупа. Камит но аслэсьтыз мусо дыдыксэ со кадь ик чупа. Кытчы но соослэн ымдуръёсы уг йӧтскыло. Ог-огзылэсь синъёссэс но, пельёссэс но, бамъёссэс но, чыртыоссэс но, ангесъёссэс но чупало. Узыбей кылзэ ик Камитлэсь ньылэ ни вал, шоканзэ ик солэсь пытсаз. Камит мырдэм мозмиськиз солэн кужмо но ӟырдыт ымдурезлэсь. Мар карод, секыт нылмуртэз таӵе югдуре буйгатыны… Вылаз ик куке котыр ласянь соос шоры учко…

– Тон монэ шедьтӥд, мусокае мынам… – шыпыртэ Узыбей Камитлэн пеляз.

– Шедьтӥ… Нокинлы табере мон тонэ уг сёты… – шыпыртэ Камит бӧрдӥсь Узыбеезлы. Юнме, шӧдске, со вераз та берпуметӥ кылъёссэ. Шуо ук, эн сёты кылдэ. Иисус но куре, кылдэс юнме эн сёткалэ шуыса. Малы ке шуоно асьмеос ум тодӥське, мар асьмеды азьланяз возьма. Нош кылзэ сётӥсьёсты котькытын возьмало пӧйшурасьёс. Кельше соослы кылсётӥсьёсты кырмыны…

– Ярам, мусое, табере кысык ужъёсмес лэсьтыны кулэ… Сотэк ӝоген йыръёз монэ Япанчалэн Кырныжез аслаз синъёсыныз… – шыпыртэ Узыбейлы Камит.

– Лэсьты, мусое, мар тыныд кулэ, мон табере вӧзысьтыд уг кошкы… Мон учко тынэсьтыд ужамдэ… – синвуоссэ ӵушылэ Узыбей.

Нош соос котырын ваньзы чал-чал сыло. Куаныса учко егитъёс шоры.

Зэмос воргоронлы берытскем Камит Узыбейлэн йыр вылтӥз учке нюлэс кушез.

– Я, кин нырысь вералоз, мар ми татын кариськомы?.. – юа Камит.

Ваньзы чалмыт сыло. Узыбей сокем зол ӝиптӥськиз Камитэзлэн мӧля бордаз, нокызьы ассэ со бордысь люкемез уг луы. Камитлэн кужмо сюлэмыз табере, буйгаса ини, каллен гинэ жугиське.

– Мон зэм но кимпаруша… – малпаське Узыбей, Камитэзлэсь шокамзэ но сюлэмзэ кылзыса. – Со ке татын, мыным номыр кулэ ӧвӧл… Со ваньзэ радъялоз… – юн-юн оске эксэй нылаш.

–  Валамон… – серектэ Камит. – Пуны адями утча Кизили Чачазэ.  Мон малпасько вал, ӧз кыле ни пуны адямиос святой Христофор сяна… Монэ озьы оскытӥз вал Япанча… – пальыштэ Камит, Узыбейзэ вешаса.

–  Кылизы на, кызьы адӟиськод… – ӟазыртэ пуны адями.

– Ӧвӧл, мон чик но пумит ӧвӧл. Мыным кельше тынад та куше потэмед… – серектэ Камит. – Но мыным каршыны турттэмед уг кельшы…

– Мон турттӥсько небытгес вераны, –  шуэ пуны адями. – Инмар адӟе, уг пӧяськы.

– Буйга, Нырганда, мон но адӟисько, сюлэмыд вӧсь луэмын шуыса. Соин ик бурмытом тынэсьтыд сое туннэ. Эй, Кырныж…

Писпуос вылтӥ бадӟым вужеръёс кельтыса Камитлэн пельпум вылаз пуксе Кырныж, гадь вылаз солэн Чача ошиськыса шонаське.

– Басьты Чачадэ, пуны адями. Вождэ эн потты Япанчалэн выжыезлы. Кырныж басьтӥз тӥлесьтыд Чачадэс, тодытэк солэсь кужымзэ, тодытэк кыӵе сьӧд кужымъёс пуромозы Япанчалэн выжыез вылэ, со Чачаез утчаса. Кырныж сое урод адямиослэсь утиз, тӥляд туноды куремъя… Кырныж ке ӧй басьтысал, Чачады урод адямиос киын луысал. Умой чакла Чачадэ, урод адямиос али но сое утчало.

Кырныж йырзэ мыкыртэ, пуны адями куалекъяса ик Чачазэ Кырныжлэн чыртыысьтыз басьтэ… Со вылтӥ югдылӥсь кужымъёс ортчо. Инбамын но тылъёс ӟаректо.

–  Тау тыныд, арсавыл туно… –  йыбырттэ пуны адями.

– Мыным ӧвӧл, Кырныжлы тау шу, Чачок апайлы, Япанчалы, Япанчалэн выжыосыслы, кудъёсыз со понна быризы… – изьызэ куштыса вера Камит. Нырганда шуак усе пыдес вылаз, йырзэ музъемозь мыкыртэ.

– Тау тӥледлы Кырныж, Чачок апай, Япанча, Япанчалэн выжыосыз… Вождэс эн вае мынам калыкелы… Урод ведӥнъёс соос вылэ кый нылъёсты келязы… – зугыр куалекъяса бӧрдэ пуны адями.

– Султы, Нырганда, тае ваньзэ буйгатон понна, та кылъёс гинэ уз тырме, калыкъёсмылэн азьлань тупаса улонзы понна асьмелы туннэ та кык шуръёс вискын Быдӟым вӧсь лэсьтоно луоз… –  лад-лад вера Камит. – Вӧсьмес толэзь шорын лэсьтомы, ӝыт но ӵукна вискын, мед лыктыны быгатозы лул дуннеосысь быдӟым лулъёс.

– Мон соглаш, Арсавыл туно… – синвуоссэ ӵуше Нырганда.

– Нош аримаспаос Зарни Валзэс утчало, кызьы мон валасько… – вазиське Камит палсинмоос пала берытскыса.

Аримаспаос ваньзы куалекто, чидатэк возьмало Камитлэсь мар ке усьтэмзэ. Думылэм тунозы но йырзэ выллань ӝутыса ӝуштэ.

– Ми соосты кемалась утчаськом… Со понна ик юри сизьым кузя потаськомы пӧртэм палдуръёсы… – шуак вера аримаспаослэн валтӥсьсы.

– Но тӥляд туноды соосты, гажано эшъёс, ноку уз шедьты… – вазе Камит аримаспаос шоры учкыса. Собере Чачок апай пала берытскыса шуак ватса. – Чачок апай, пертчы тунозэс, солэсь мусо бабасырзэ но музъеме лэзь. Тау тыныд, мусо бабасыр, мынам бабасырелы татчы вуыны кызьы пусъёсты лыдӟыны валэктэмед понна. Пертчы, Чачок апай, нокин уродзэ уз лэсьты Кизили Пурт но эксэй ныл азьын… – буйгатэ сое Камит. Чачок апай шуак перче думылэм туноез. Бабасырзэ но музвылэ лэзьыса мозмытэ. Бабасыр шуак кошке кушлэн мукет палаз Камитлэн бабасырез доры. Кык бабасыръёс, туж кемалась тодмоос кадь, шумпотыса ӟыгырско, асьсэ куспазы дыртыса вераськыны кутско.

–  Малы мон Зарни Валъёсты уг шедьты? – юа аримаспаослэн тунозы.

– Малы ке шуоно сюлэмдэ тынэсьтыд нумыр портэ, соин ик  «храмчиос» кадь кулэм ки вылэ чӧлскыны турттӥськод. Ми Узыбеен со кулэм киен шудонъёсты адӟимы ни… Зарни Мум кулэм ки азе уг поты. Кулэм ки азе Аждагалэн ӟызырнаез гинэ потэ. Тон, туно, тодӥськод ук, кызьы со ӟызырна Уйпалан кесяське вир курыса… Мон уг малпаськы, аримаспаослы вирдэс юись ӧлексы кельшоз шуыса… – йылпумъя Камит.

Палсинмо тунолэн кулэм киыз, чонари кадь, бызьыса кошке. Нюлэс сое аслаз пеймыт гырказ ньылэ. Ӵапак та вие потэ тӧл, шиетыса со кошке куш вылъёстӥ. Ваньзы куалекто. Собере шӧдтэк шорысь нюлэс шоры ӝутӥське зэрпаллэн вань инбамез ӵоктась мугорыз. Пельысьтыз кык угыосыз вань нюлэсэз ӟарекъятыса толэзь улын ворекъяло.

– Иське, тырмиз милям азвесьмы кыкетӥ ыгыдэ лэсьтыны? – юа солэсь польпотыса Камит. Зэрпалэз адӟыса ваньзы люкенак люкасько. Узыбеен Чачок апай но, Эркынай но Камит борды матэкто. Бабасыръёс но бызьыса лыкто кузёоссы доры. Валъёс но адямиос пала карисько.

– Шактоен ик со мыным тырмытлык, Камитэ, мусо тунобыже мынам. Тани тамаша зундэслы но кылиз экна сётэм азвесьчаед… – возьматэ со сыӵе ик ворекъясь зундэссэ. – Мынам туж инича синдуртэме потэ вал палсинмо аримаспа калыкчаостэ. Вашкала сурымча грек эрекчаос укыр пӧртэм суредало сӥнисоосты асьсэлэн гожтэт конгырчо бичетъёсазы. Геродот шуэ иньда соос палсинча калыкпормаос. Бадӟым Плиний ялэ выжызы, пе, сӥнисоослэн Уралысь циклопчаос дорысь азланьтӥське. Нош Покчи Плиний соосты бытынча адями сиись Полифен борды думе иньдэ. Мынам аслам тодонъёс копыръяме потэ. Матынысен синисоос шоры учкемся карыса. Мед куалак султозы кырымелэн пыдэсаз… – кикурзэ куш шоры пуктэ Алангасар.

Палсинмоос кӧдэктӥзы. Тунозы бордысь пӧзись пуртыысь кадь бус вӧлскыны кутскиз.

– Султэ кикура пытсаз… – пальыштэ Камит. – Эн кышкалэ, Зарни Валэз ке шедьтэмды потэ…

Нырысь ик кӧдэктыса бадӟым кикуре интыяське аримаспаослэн валтӥсьсы. Со сьӧры кыстӥсько мукетъёсыз. Берпуметӥ пыре тунозы, тарабан кадь тэтчало пыдъёсыз но киосыз солэн, оло нош тапалась чабатаез экто…

– Тон но султын иньдэ, пуны чокрок… – вазе Зэрпал.

– Султы, Нырганда, куре бере… – пальыштэ Камит.

Нырганда дыртытэк султэ зэрпаллэн бадӟым кикураз.

– Куӵо валдэ но султыча кар ас урдэсад… – куре Алангасарлэн йырыз. – Уралча Из сьӧрысь адымась валъёстэс но мынам зынъям кареме потэ, сӥньсоосты но пыртэ… – ватса на со. – Ваньды иньда интыяське. Эркынай нунок, Чачок, бабасыръёс, ачид но Камит, мусо эксэй нылаштэ Узыбей нунокмес но бордад кунылты, Валкиондэ но иньда султыча кары, Кырныж но мед пуксёз кытчы ке… Сотэк уз луы мынам тӥледды вӧсяськон луд вылэ, вӧсясь Сяськабейлэн кушаз, кык шуръёслэн герӟаськонзы вискы ӝутэме…

Кырныж но Камитлэн пельпум вылаз пуксем бере вань инбам ӟарекъяны кутскиз. Камит паймыса учкиз инбаме. Узыбей воксё бакомемын, шӧрламеныз Камитэз борды юн-юн кунылскыса сылэ.

– Малы ю-бусылы кадь ӟарекъя? – котыр чакласькыса пельпум вылысьтыз Кырныжезлэсь юа Камит. Соиз номыр вератэк паймыса учкылэ.

–  Крон! – шуэ со абдыраса.

–  Крон! – чузъяське нюлэс куш котыртӥ ланга.

–  Кытын тынад Кизили Пуртэд? – шыпытак юа визьмо Валкион.

– Остэ, Быдӟым зэрпал, мыным Кизили Пуртме тыпы бордысь басьтыны кулэ… –  чапкиське Камит.

– Хе-хе-хе! – серектэ зэрпал. – Ӧть Ас Пурттэ ас кияд иньда, со ачизча лыктоз… Тон уд тодӥськы шатсэ Кизили Арберилэсь манерчазэ?..

– Мон озьы ӧй утча… – ӧжытак возьдаськыса валэктэ Камит, собере кизэ Кизили Пуртэз пала урдэ. Кизили Пуртэз соку ик ки бордаз лякиське. Камит сое, шумпотыса, кӧрыказ донге.

– Пуртэд бордад ке но инбамед ӟарекъя… –  шуэ Валкион.

– Ӟарекъя… – соглаш луэ Камит.

– Кылдысинлэн юнянь бусыезлы иньда ӟарекча… – кикурзэ ымнырезлы матэ карыса вера зэрпал. Нырпелесъёсыз тӧл поттыса ик зынъясько… – Табреча ваньдэсты ӟеч адӟи. Зынъёстэс но кыдёкысен табреча тодмало иньдэ. Таӵеез дунне вылынча огшоры уг луы. Зарни Мум огазеяз бере иньдэ, табре унопол пумиськылом иньдэ… Узыбей, эксэй нуноке мынам, эн кышка, котьку ми утёмы тонэ, ваньмыз ӟеч луоз…

Озьы вераськемез бере зэрпал нош ик соосты каллен гинэ васькытӥз… Солы со каллен гинэ, нош кикурын пукисьёслэн лулъёссы ик пыдтышказы потэ вал шурдыса.

– Тон кытчы милемды васькытӥд, зэрпал? – пайме Камит.

– Отча ик васькытӥ иньдэ… Со ик Ягулча но Кабакулча шуръёс вискы… Но таиз вылӥ инбамысь вӧсяськон куш… Азьтаркандэс воштӥнь кариз Зарни Мум… Татынча котьку вал Кылдысинлэн дяратоно бусыез. Тӥни ю-нянез котырча катар будэ… Зол иньдэ Кылдысин инмар булдыре…

– Кыӵе ю-нянез? Татын туж ӝужыт сяська гинэ будэ… – паймыса юа зэрпаллэсь Камит.

– Со тыныд гинэ озьы потэ иньдэ. Со ик вань Кылдысинлэн зарнича нянез… – пальпотэ зэрпал. – Амаранта… Кулонэз вормись будос… Амрита сур-мусур солэсь лэсьто вал туно-пеллёос… Сое сиыса-юыса 300 арлэсь трос уло та дуннеча вылын. Ваткаёс но Арсавылын солэсь нянь лэсьто ук… Яке уг-а ни лэсьто?..

– Кулонэз вормись будос?  Ачиз коӵыш быж-а, мар-а? Курег тяпа, ӟазег пыд, атас ӟуски?.. – оскытэк юа Камит. – Сыӵе шат со ӝужыт будэ?

– Ыктамад шонерзэ ымыд вера… – серектэ зэрпал. – Тӥни иньда гордалэс шепъёсыз музъемозь ик коӵыш быж кадь ошиськемын… Нош модосчаез кор зӧкта, курегча пыд кадь, пал пыд йылаз сылэ. Куаръёсыз ӟазег пыдъёс кадь инбамчае  пуштырско… Нош котькуд будослэн сонямында иньда гордо-ӵужо быжъёс кадь шепъёсыз – атасча ӟускилы кельшо угось… Музъемозь ик ошиськыса шонасько…

– Мон малпасько вал Кылдысинлэн бусыяз ӟеглэн я чабейлэн шепъёссы музъемысен ик тубо, нош соос «Рамадана» будосысь, коӵыш быжъёс кадь, музъемозь васько?

–  Ыктымад шонерча ымдуръяськод… Ӵапак озьы «Рамадана» индусъёс сямен лыдӟиське «Рама инмар кузьмаз» шуыса… – серекъя зэрпал. – Нош тӥ малы ке уд шуиське: «Кылдысин кузьмаз»… Мон аслэсьтымзэ ужбергатонме табере лэсьтӥ иньда… Табере тӥни шудья-чудья-калмезча вӧсясьлэсь, туно-пеллёлэсь кылзоды… – зэрпал кызьы потӥз, озьы ик ышиз, тӧл гинэ кык адями ӝужда амарантаосты тулкымъяса, сьӧраз ӵашетыса кошкиз. Камитлэн пырак сюлмаз пыӵаз зэрпаллэн берпуметӥ кылыз, но со сярысь малпаськыны солэн дырыз ӧй вал ни та вие…

– Малы «Кылдысин кузьмаз» ум шуиське?.. – пайме Камит. Нош али юаны зэм но дырыз ӧй вал ни.

– Камит, мар та ваньмыз таӵе? Кытын асьмеос? – юа мусокаезлэн ки бордаз юн-юн кырмиськем Узыбей.

– Та асьмелэн Ватка эксэйлыкмы, Ватка узырлыкмы, тынад, мусокае, эксэйлыкед… – пальпотэ Камит.

Зэрпаллэн кикурысьтыз васькемъёс ваньзы адӟизы югыт-югыт синмо тӧдьы йырсиё кышномуртэз. Солэн дӥсяськон манерез Эркынайлэн дӥськутэзлы тупа шуыны луоз. Сыӵе ик пельёсаз Шундымумы угыос, Ибыр весь чыртыяз, кипотэсъёсаз адями ымныро кыйёс… Йырвылаз, гадьвылаз пӧртэм инмаръёсты возьматӥсь азвесь, йырсияз пар валъёсыныз инбамез сынась шунды уроболэн зарни сынэз… Со азьын куинь пыдо, кык пелё казан, отысь бус потэ, улаз пичияк тыл ӝуа. Кышномурт сьӧрын вӧсяськон куала, куалалэн ӧсаз гондырлэн йырыз вӧлэмын. Куала азьын озьы ик гондыр ымныро ӟырдам гур сылэ, гур азьын ӝӧк, ӝӧк вылын гондыр тяпа нимо туж трос нянь бусаське. Вӧсясь кышномурт киоссэ инбам шоры кикуртыса, выллань ӝутэ но ненег чылкыт куараен бӧрдыса кадь чирдыны кутске. Сое кылыса ваньзы чалмо.

– Мынам нимы Сяськабей, мон та инбам кушлэн вӧсясез, кузёез каремын… Султэлэ мон сьӧры радэн-радэн… – вакчияк валэктэ чагыр синмо, югыт йырсиё кышномурт.

Ваньзы асьсэлэсь киоссэс Сяськабей кадь ик инбаме ӝуто. Валъёс ымнырзэс мыкырто, бабасыръёс пыдес вылазы усё, Кырныж ыбес вылэ пуксе.

– Остэ югыт Инмаре, югыт Мустор Калтачин анаймы, Кылдысин атаймы, тӥляд батыр гондыр пиды, милям кышномуртъёсмы бордысен арсавыл калыкъёсмес кылдытӥсь Быдӟым Гондыр-Ошмы, сётэлэ милемлы бакельлыко тупаса улон. Ми тӥлесьтыд сётэм няньдэс тӥледлы удӥськом, тӥлесьтыд сётэм куардэс та коӵыш быж тысьёслэсь поттэм вӧен сураськом, та кузь шепъёслэсь пӧсьтэм сурмес тӥледлы пуктӥськом. Асьмеос но ваньзэ тае веръяськом, дунне вылын висьытэк, бӧрдытэк кема-кема тӥледын ӵош улыны дасяськиськом. Остэ шуиськом, Остэ, Остэ, Остэ! Сётэ милемлы тупаса но выжыосмес гажаса улон!

Кышномурт ваньзылы, валъёслы но, бабасыръёслы но, Кырныжлы но кобыен, казанысь гумыльтыса, сур сётэ, ӟазегпыд куаръёссэ удэ, амаранта няненыз сюдэ.

Валантэм кужым ветлэ ю-бусыос вылтӥ, капчи тӧл кадь ортчылэ со шепъёс вылтӥ, вӧсь ортчытӥсьёс пӧлтӥ, ваньзы со кужымез шӧдыса чал-чал сыло. Валъёс но мае ке шӧдыса ю-бусы пала учкыло. Ӵапак со вие ю-бусы вылын куинь пол ӟаректӥз…

– Инмаръёсмы асьмеды кылӥзы! – шумпотыса вераз югыт-югыт лыз синмо кышномурт.

–  Мар соос шуизы? – юаз солэсь аримаспаослэн тунозы.

– Соос кылӥмы шуизы… – вакчияк валэктӥз вӧсясь кышномурт, чагыр синъёсыныз чилектыса, собере ватсаз на. – Эшшо мар ке ивортонзы ке вань, ӝоген адӟоды, оло эшшо мар ке возьматозы…

Кышномуртлэн верам бераз ик бусы пумын адӟиськиз тӧдьы-тӧдьы кучыран, тани со бусылэн шораз вуыса тӧдьы югыт дӥськуто адямилы пӧрмиз. Дыртытэк со вамышъя радэн будӥсь амарантаос вискытӥ. Музъемозь ик коӵыш быж кадь ошиськем шепъёсты вылӥегес карыса юнматэ. Чагыр-чагыр синмо кышномурт пыдес вылаз султӥз, со сьӧры ваньзы озьы султӥзы, бабасыръёс но, валъёс но азь пыдъёссэс пыдесъяськытӥзы, йырзэс мыкыртӥзы, Кырныж но йырзэ мыкыртӥз.

– Султэ, султэ… – кезьыт пальпотӥз юг тӧдьы дӥськутэн дӥсяськем воргорон. – Эн малпалэ, мон Кылдысин шуыса, мон кылчин гинэ, дивор вераны ыстэм мурт…

Чагыр-чагыр синмо воргорон секыт ке но учке, солэн йыр котыраз йырызлэсь куинь пол бадӟым югыт бус возиське. Тазьы йыр котыразы югытэн ветлӥсьёсты яке «кадыр адями», яке «инмар адями», яке «кылчин адями» шуо. Камитлы солэн егит ымнырыз малы ке туж тодмо потӥз…

– Явуш! – шуак тодмаса вазиз вал Камит. Собере со валаз, та адями Явушез гинэ тодэ вайытэ шуыса. – Вождэс эн вае… Эше кожаса, шорад озьы вази… – ӧжытак возьдаськыса валэктӥз со.

– Бон, шонер, Камит. Мынам нимы Явуш… – секыт пальпотӥз чагыр синмо воргорон. – Ми ваньмы Явуш нимез нуллӥськомы… Песятаез мон тынад юлтошедлэн…

– Песятаез?.. –  пайме Камит.

– Мон тушо мугореным ке лыктӥ, тӥ монэ ӧд адӟысалды, мынам тыл мугоры тӥледды ӵушкасал… Соин мон егитгес мугорме бырйи… Милям Чудья выжыосмы, диворчи карыса, юри монэ татчы ыстӥзы. Мон тӥледлы троссэ вераны кулэ… Аримаспаосты но, пуны адямиез но, тонэ но ми асьмеос ик Чудьяослэн интыязы Чачок апайлэн музъемаз лэзимы… Сотэк Чудьяослэн интыязы, Чачок апайлэн музъемаз, нокинлэн пыремез ӧй луысал. Узыбеез Япанча Мырдакымесэ ваем бере ми валамы, тӥ ваньды та интыын пумиськоды шуыса… Нош Чудьяослэн вашкала вӧсяськон кушазы, кудзэ туннэ чакла но уте милям чылкыт Сяськабей сузэрмы, зэрпал гинэ быгатэ тубытыны… Со ик тӥледыз татчы тубытӥз…

Шӧдтэк шорысь пуны адями но аримаспаос пограло, валъёс но, Кырныж но, бабасыръёс но, валадями Эркынай но, Чачок апай но, вӧсясь кышномурт но, Узыбей но – ваньзы ӝуй вылэ погыльскыса умме усё. Камитлы аслыз но туж секыт луэ. Мырдэм со сылэ умме усёнлы пумит ожмаськыса. Кый кадь позыръяськыса, чонариос кадь чильтэръёс пуныса, ву берган кадь ас пушказ кыскыса, тӧлпери кадь кытчы ке кыдёке нуыса, котырласянь погыртыны турттэ сое умме усьытӥсь секыт кужым. Но Камит сылэ, пумит возиськыны олокытыськыз солэн ялан кужымыз потэ. Кытысь ке пыдлось тодонэныз Камит вала, сое Кизили Пурт уте шуыса… Но Кизили Пуртлэн озьы шуэмез уг поты…

– Адӟиськод, Камит… –  вазе солы секыт синмо Явуш песятай. – Ваньзы погразы, нош тон сылӥськод, озьыен тон бордын возиське Арсавылэз утьыны быгатӥсь кужым, шонер малпало шудья-чудьяос… Нокин ӧз чида мынэсьтым синъёсме, быдӟым аримаспаос но погразы, пуныадями но, вӧсясь кышномурт но, бабасыръёс но, нылкышновал но, эксэй ныл но, Кырныж но, ваньзэ тодӥсь Чачок но умме усизы… Нош тон пыд йылад сылӥськод…

– Монэ Кизили Пурт возьма?.. – ымдуръёссэ мырдэм усьтыса диворчилэсь юа егит туно.

– Ӧвӧл, Камит… Ымдурыд но Кизили Пуртэд но пумитъясько та кылъёсыдлы… – куаретэ диворчи. – Кизили Пурт аслэсьтыдзэ гинэ будэтэ, юнматэ. Аслад выжы кужымыд гинэ та дуннеын тонэ уте, нош Кизили Пурт со шудья-чудьяослэсь тӥ доры кылем-кӧчем арбери гинэ… Со кельтэмын, шудья-чудьяосын кусыпды медаз быры шуыса… Со усьтон кадь ужа дуннеос вискысь ӧсъёсты яке Арканъёсты усьяны. Арбериос но лул-бугор кужымзэс ӝог ышто, калык соосын выжы кусыпсэ быдтэ ке. Кыдёке ветлоно ӧвӧл, тӥни нырысь ик умме усиз пуныадямиед, Кизили Чачаез ке но гадь вылаз ворекъя, ачид тодӥськод, кыӵе со Чачалэн кужымыз вал, Кырныж сое шедьтыку… Табере со огшоры ворекъясь арбери, кузёез Чачаеныз ӵош соргетэ… Малы малпаськод со пограз?..

– Со трос уйёссэ ӧз кӧлы, жадиз, дыр. Нош Чачазэ шедьтэмез бере гань-гань буйгаз… – валэктэ Камит.

– Со адями валэктон… – соглаш уг луы секыт диворчи. – Пуныадями пограз Арбериен огазеясь выжы кусыпсэ ыштэменыз сэрен. Табере солы кема ужано луоз выжы кусыпъёссэ берыктон, юнматон пумысен, соку гинэ Чачаез ужаны кутскоз… Нош одӥгсинмоос Зарни Вал доры вуизы ке, малпаськод, мар ке соосын луоз? Кужмогес луозы? Выжы кусыпъёссы бурмоз? Уз, Камит, жаляса верано, ноку соос уз воштӥське, асьсэды ӧз воштэ ке…

– Аримаспаос кемалась Зарни Валэз утчало… Мон малпасько, соос тодо мар карыны Зарни Валэн, тодо кызьы асьсэды эмъяны, юнматыны…

– Бен тодонзы соослэн вань. Нош мар соослы Зарни Вал сётоз?.. –  чурыт юа кадыр диворчи, собере шуак валэктэ. –  Соос уга матысен но ог-огзэсты уг кыло ни… Ӧвӧл ни соослэн вашкала выжы кужымзы… Тросэзлы табере дунне вылын ог-огзэс кылзыны бабасыръёслэсь дышетсконо луоз. Бабасыръёс али но туж кыдёкысен ог-огзэсты кыло. Соослэн чылкыт кылонзылы луыса, ачид но тон татчы вуид. Бабасыръёс ӧз ке кылысалзы ог-огзэсты, соос сокем сакесь но валасесь ӧй ке луысалзы, нокин татчы ӧй вуысал. Палсинмоос но, пуны йыр но, Узыбей но… Ма, Чачокез но пичи Япанчаен, Эркынайез но, Кырныжез но бабасыр вайиз. Соин ик бабасыръёс туннэ вӧсь луд вылын нырысь ик тӥледын ӵош Кылдысинлэсь няньзэ веръязы… Нокин соосты татчы Кылдысинлэн бусыяз ӧй лэзьысал, арсавылъёслы но соослэсь адӟем кароно ӧй ке луысал… Кин тонэ мур гутёысь поттӥз?

– Тата поттӥз… Нош бабасыр кулонлэсь утиз… Кынмыны ӧз лэзьы…

–  Ӧвӧл, Камит… Бабасыр тонэ кыдёкысен ӧй кылысал ке, нокин тонэ отысь ӧй поттысал ни… Соин ик адями но, бабасыр кадь, ас дыраз кылыны кулэ мукет адямиез… Кыдёкысен но, матысен но, котькытысен… Нош аримаспаослэн тунозы уг кылзы валтӥсьсылэсь. Нош валтӥсьсы уг кылзы выжыоссэ. Кызьы аслыд, аслад выжыедлы оскытэк, мукетъёсын валтод? Огзы но соос уг оско выжызылы, соин ик ӧвӧл мынам соослы осконэ. Шуом, поттомы соос доры Вало шуре ватэм Зарни Валэз, нош Валое ватэм Зарни Вал ӧтёз Мамайлэн курганаз ватэм парзэ. Лэсьтозы соос вӧсь йылпумъянзэс, вашкала тодонзыя. Нош вашкалаоссылэн кадь ик оскон манерзытэк номыр соосын уз воштӥськы…

– Но асьмеос соослы оскон сётыны кулэ, дыр, ук, мед ортчытозы лэсьтымтэ сэбедзэс. Озьы шуо мынам выжыосы… Куро Зарни Валъёсты соос азе поттыны…

– Тон быгатод-а Валъёсты поттыны? – чурыт юа диворчи.

– Малпасько, быгато шуыса… Мон со валъёсын пичиысен ик тодмо…

– Ярам, соку утём, пӧрмиз ке, пӧрмоз, уз ке, уз… Сайкалэ… – чурыт вазе секыт синмо диворчи.

Умме усемъёс ваньзы сайкало.

– Табере султэ – Камит вӧзы Узыбей, соос сьӧры, нырысь ик палсинмоос, соос сьӧры, пуныадями но Кырныж, та кушлэн вӧсясез Сяськабей кышномурт, Чачок апай но Эркынай, аримаспаослэн сизьым адымась валъёссы, соос вӧзы Куӵовал, Кионвал, бабасыръёс… – чурыт вера диворчи.

Ваньзы Камит сьӧры султо.

– Ужа, Камит… – косэ диворчи.

– Но асьмелы ӵош ужано луоз… Нырысь ик тыныд шедьтыны кулэ луоз Вало шурлэсь лул бугорзэ… – шуэ Камит.

– Мон шедьтӥ… – ӧжыт улыса ивортэ диворчи.

– Огазеяськы соин. Мон тон пыртӥ Валоен герӟаськыса вераськыны кулэ.

– Мон огазеяськи, дась тонэ кылзыны Валолэн бугорез, вера курондэ… – косэ диворчи.

– Быдӟым Вало шурмы милям, тонэ юнме уг данъя калыкмы, мон тодӥсько тон котырысь тэльёсты, лудъёсты, возьёсты, мон тодӥсько акынъёсын данъяськись ярдуръёстэ, кыӵе чебересь кырӟанъёс соос кырӟало тынад нылъёсыд сярысь, возьвыл сяськаосыд сярысь! Тон бадӟымлэсь но бадӟым, Вало шурмы милям, тынэсьтыд нимдэ юнме шорысь ӧз герӟалэ валэн, угось тыныд гинэ оскизы Быдӟым Валэз ватыны. Милям данолэсь но дано Быдӟым Вало шурмы, тынад вуосыд герӟаськемын Чупчиен, Ваткаен, Быдӟым Камен, Иделен, вань дунне зарезьёсын, вань Инбам зарезьлэн вуосыныз, курисько тонэ, Быдӟым Вало шурмы, усьты милемлы 77 тунгондэ ик, потты ми азе ватосъёсад ватэм Зарни Валдэ…

– Тунгонъёсты уг яра усьтыны, мугзэ тодытэк… – шуэ диворчи Вало шурлэсь кылъёссэ.

– Мон валасько тонэ, Быдӟым Вало, соин ик валэктӥсько мугзэ, мон сьӧрын сыло аримаспаос, кинъёс лэсьтӥзы, зарнилэсь кисьтӥзы,  вӧлӥзы Зарни Валъёслэсь мугорзэ но бугорзэ. Но соос ӧз вуэ сэбетсэс пумаз вуытозь лэсьтыны. Малы ке шуоно Бутуханлэн беклярбекез валатэк-а, валаса-а, валъёсты кылдытӥсь аримаоспаосты витьымтэ шорысь быдтӥз, таӵе ик Валъёсты нокин медаз кылдыты ни шуыса… Йылпумъямтэ сэбедлы луыса, Валъёс аримаспаослэсь кужымзэс али ке но кыско, соин сэрен калыксы соослэн быре…

– Тӥ йылпумъяны турттӥськоды Зарни Валъёслэсь кылдытон сэбедзэс?..

– Озьы, Быдӟым Вало…

– Но со понна кыксэс ик Валъёсты ӧтёно. Мынам ватосам одӥгез гинэ Зарни Вал ватэмын… – ивортэ Валолэсь верамзэ диворчи.

– Кыкетӥез вал ватэмын Мамайлэн курганаз… Нырысетӥез ачиз ӧтёз аслэсьтыз парзэ.

– Шонер… Тӥ вераны кулэ кык Валъёслэсь ик нимъёссэс… Сотэк уз усьтӥськы Капка-Ыбес…

– Валоын ватэм Валлэн нимыз – Азь,  курганэ ватэмезлэн – Бер.

– Шонер, соосты калыкын «Азь но Бер» шуо. Но тӥ вераны кулэ нырысетӥ нимъёссэс…

– Валоын ватэм Валлэн нимыз – Улон, курганэ ватэмезлэн – Кулон…

– Шонер. Но кенерез усьтон понна кулэ валъёслэн кузёзы… Со Зарни валъёс вискы султыны кулэ, кыксэс ик серметтӥз кутыса. Вашкала сэбетъёсын кадь ик…

– О Быдӟым Бату хан, вераськыны луоз-а тонэн? – нош ик вазиське Камит.

– Мон герӟаськи соин, огазеяськи лулэныз… – вазе диворчи, юа юандэ, Камит.

– Тон зэм ик-а Быдӟым Бату хан? Луоз-а тонэн вераськыны? – нош ик юа Камит.

– Мон Бату хан. Кылзӥсько тӥледыз. Мар муген тӥ мон доры лыктӥды? Мар тодэмды яке куремды потэ?

– О Быдӟым Бату хан, дышетӥсе мынам, мон Камит, вождэ эн вайы ужъёсыдлэсь люкеммылэсь… Милемлы кулэ тынад Зарни Валъёсыд, Тон соос вискы серметсэс кутыса султыны кулэ, вашкала Вал сэбедъёсты ортчытонын кадь ик. Ми аримаспаослэсь сэбедзэс йылпумъяны турттӥськомы, кудзэ йылпумъяса ӧз вуттэ Зарни Валъёстэ лэсьтӥсь сизьым аримаспаос. Угось оло тодытэк, оло тодыса, тынад беклярбекед сизьымзэс ик аримаспаосты быдтӥз, нокин таӵе Валъёсты медаз ни лэсьты шуыса…

– Ӟечбур, Камит, мусо ожгарчие мынам! Мынам беклярбеке ас ужзэ шонер  лэсьтӥз… Со быдэстӥз мынэсьтым косонме. Та валъёсты ми кылдытӥмы асьме калыкъёсмес но музъемъёсмес «сьӧдъёслэсь» утён понна. Соин Шундылэн валъёсызлы кадь ик нимъёс соослы понӥмы. Аримаспаос тужгес но матынэсь луо Шунды инмарлы. Малы ке шуоно соос Ярлэн но Яралэн одӥг синмо калыксы. Аримаспаос тодо вал, соосты ужзэс лэсьтэм беразы быдтозы шуыса. Вылӥ ужъёсты лэсьтыку, сыӵе сэбетэз одно ик быдэстыны кулэ. Сотэк ӧй пӧрмысалзы Зарни Валъёс. Озьы ке но, сизьым аримаспаос соглаш луизы та Валъёсты лэсьтыны.  Сэбед но юнме шорысь йылпумъямтэ ӧй вал. Озьы кулэ вал. Сизьым аримаспаослэн гинэ кужымзы та валъёсты кылдытыны ӧй тырмысал. Соослы кулэ вал вань аримаспаослэсь кужымзэс туннэ нуналозь кыскыны… Соин ик, аримаспаос, табере тӥ быгатӥськоды Валъёсты кылдытон сэбеддэс йылпумъяны… Нош нырысь ик тӥ кылзыны кулэ арсавыл тунолэсь куронзэ…

– Аримаспаос, кылзэ монэ сак, номыр но уз пӧрмы, тӥ сизьымды ик асьтэлэсь сизьым выжыосдэс та сэбедэн ӧд герӟалэ ке. Герӟаське, выжы герӟет нимъёстэс шара вераса. Кутскиськомы эксэйды бордысен.

– Мон аримаспаослэн эксэйзы, мынам нимы Абузяр, атаелэн нимыз Авхади, песятаелэн нимыз Агиш, солэн атаезлэн нимыз Аглям, солэн атаезлэн нимыз Адигам, солэн атаезлэн нимыз Азамат, солэн атаезлэн нимыз Азат, солэн татаезлэн нимыз Азгер. Ас азьысьтым мон сизьым выжы нимъёсме ик верай. Выжыосы мынам, герӟаське монэным, Зарни Валъёс азе мыкырскыны! – пыдес вылаз усе  аримаспаослэн эксэйзы.

– Мон аримаспаослэн тунозы, мынам нимы Асгар, атаелэн нимыз Бадиян, песятаелэн Бадар, солэн атаезлэн Альтаф, солэн атезлэн Анвар, солэн атаезлэн Гилемдар, солэн атаезлэн Бурангул, солэн атаезлэз Аюхан. Ас азьысьтым мон сизьым выжы нимъёсме ик верай. Выжыосы мынам, герӟаське милемын Зарни Валъёс азе мыкырскыны.

Аримаспаос огзы бере огзы та выжы герӟет нимъёсэс ялэмзы бӧрсьы нош ик диворчи пыртӥ вераськыны кутскиз Бату хан.

– Мон Бату хан, Зарни Валъёслэн кузёзы. Табере вералэ мыным, вань-а тӥ пӧлын куинь кузё кышноос? Узыбей эксэй ныл?

– Мон  татын, арсавыл эксэй ныл.

– Чачок апай, чудьяослэн кельтэм интызылэн али кузёез?

– Мон татын.

– Сяськабей, та вӧсь лудлэн чакласез?

– Мон татын, та вӧсь кушлэн кузёез.

– Вань-а тӥ пӧлын вал адями?

– Вань, мынам нимы Эркынай.

– Туж умой. Вань-а тынад Ибыр весед?

– Вань.

– Туж умой. Вань-а тӥ пӧлын пуны адями?

– Вань, мынам нимы Нырганда.

– Вань-а тыныд Кизили Чачаед?

– Вань. Со мынам гадь вылам.

– Туж умой. Тодӥськод-а тон ас азьпаласьтыд сизьымзэ ик выжы герӟетъёстэ?

– Тодӥсько. Атаелэн нимыз Ванхо, песятаелэн – Елдан, солэн атаезлэн – Качеда, солэн атаезлэн – Себеда, солэн атаезлэн – Пынжа, солэн атаезлэн – Ахтамак, солэн атаезлэн – Килим.

– Герӟаськы соосын.

– Мон герӟаськи…

– Туж умой. Вань-а тӥ пӧлын, адӟисьды, дивор нуллӥсь бурдоды?

– Вань, мон Кронлэн Кырныжез.

– Туж умой. Вань-а тӥ полын сизьым адымась валъёс?

– Вань.

– Дась-а тӥ кужымдэс сётыны Зарни Валъёслы, сизьымдон сизьым шур сьӧры потаны?

– Дась.

– Вань-а тӥ пӧлын куӵо вал?

– Вань.

– Дась-а тон Зарни Валъёслы выжъёс вылтӥ потыны кышкасьтэм кужымдэ сётыны?

– Дась.

– Туж умой. Вань-а тӥ пӧлын кулӥсьтэм лул?

– Вань. Мон бурдо кионъёс пӧлысь…

– Дась-а тон Зарни Валъёсты кулӥсьтэм алпъёсын герӟаны?

– Дась.

– Туж умой. Озьыен ваньмыз вань? Луэ-а, Камит, сэбедэз ортчытыны?

– Луэ, Быдӟым Бату хан…

Вӧсяськисьёс азе пото тыл кадь зарниясь кык валъёс но соос вискын соослэсь серметъёссэ кутӥсь Бату хан. Тылсиясь валъёслэн буёлъёссы Бату ханэз но зарни мугоро каро.

– Ми потӥмы. Лэсьтэ, аримаспаос, лэсьтымтэ сэбеддэс! – чурыт куре Бату хан.

Аримаспаос султо киоссэс кык пала выллань вайяса.

– О, Зарни Валъёс! – вазиське аримаспаослэн тунозы. – Тӥ табере сокем кужмоесь, тӥ басьтӥды ваньзэ, мае гинэ басьтэмды луэ вал. Табере мед тӥледды шокатоз атай кужымо, эрико Тӧл-Омыр, мед тӥледды котькытын сюдоз Музъем Анай, мед тӥледды котькытын  секталоз Ву Анасы, Ву Ош, мед тӥледлы котьку кужымзэ сётоз ачиз Шунды Мумы но Шунды Атай Тыл. Тӥ табере эрикоесь, тӥ табере кужмоесь. Тӥ ньыль пала ик мыкырскыны быгатӥськоды! Табере асьмеос герӟетъёсмес люкиськомы! Мед тӥледды утёз Инмармы. Луэлэ Бату ханлэн Зарни Валъёсыз, эн лэзе ми доры «сьӧдъёсыз», утелэ анай музъеммес! Аминь. Аминь. Аминь.

– Вутӥды-а сэбеддэс? – юа Буту хан.

– Вуттӥмы, Бату хан… – шумпотэ аримаспаослэн тунозы.

– Ярам, табере, Камит, ӧть Зарни Мумез, табере сётомы Зарни Валъёсты солы, кинлы соос кылдытэмын… – куре Бату хан.

– О гажано Зарни Мум, гажано Варфаламея, кин монэ туж уно дышетӥз, табере мон тыныд мар ке ӟечсэ лэсьтыны быгатӥсько. Ӧтиськом тонэ юри тыныд кылдытэм Зарни Валъёстэ басьтыны. Табере соос вуэмын. Табере соос вӧсямын. Табере соос Арсавыл музъемъёсмес утьыны юнматэмын…

Котыр ёросын шильыртыны кутско векчи чингыли гырлыос, кыӵе ке корт куараосты поттыло гумыос. Со куараослэсь ваньзы калтырало. Валъёс вылтӥ но векчи куалекъян ветлэ. Зарни валъёсты но сыӵе ик куалекъян басьтэ. Омыре пазьгисько зарни буёлъёс, кудъёсызлэсь люкаськыса, Валъёс азе кылдэ Зарни Мум. Со быдэсак уг адӟиськы. Мугорыз я адӟиське, я уг. Бату хан со азе мыкырске.

– Берекет медло тӥляд ми азе кылдэмедлы, гажано Варфаламея, тани юри тыныд кылдытэм Зарни Валъёсмы. Мед луоз асьмелэн но вашкала сарматъёслэн кадь, скифъёслэн кадь, Зарни Валъёсмылэн кышномурт кузёзы! – вань сюлмысьтыз шумпотыса вера Бату хан, валъёсызлэсь серметъёссэ Зарни Мумлы сётыса.

Зарни Мум серметъёсты кияз кутэ но туж яркыт пиштӥсь но ӟеч адӟиськись луэ, со ачиз кадь ик тылсиясь Зарни Валъёслэсь кымесъёссэс чупа.

– Тау тӥледлы, Камит но Бату хан! Тау юрттӥсьёстылы! Табере соос зэм но кужмоесь луэмын! Берекет медло! Мед луом мон но, иське, вашкала сэбедъёсын кадь ик кык дунне валъёслэн шоразы сылӥсь кузё кышномурт! – ваньзылы мыкырске Зарни Мум. Мыкырске солэн кӧтысьтыз нуныез но, нуныезлэн кӧтысьтыз нуныез но. Быдэс Арсавылтӥ кыдыраса кадь кошко гумы но пичи гырлы куараос… – Куриське, вазиське, котькудды доры вуозы мынам юрттӥсь киосы но Зарни Валъёсы… – пальпотэ со Зарни Валъёссэ вешаса. – Ярам, мусо нуныосы мынам, милемлы уг яра ӟардонлы адӟиськыны. Мыным но, Бату ханлы но, Зарни Валъёслы но чалякгес ышыны кулэ. Озьыен ӟеч луэ, выль пумиськытозь, мусоосы мынам…

Зарни Мум но, Валъёс но, Бату хан но ышо, зарни буёлъёссы сослэн кема возиське на сылэм котырзэс зарнияса.

– Камит, ворса ваньзэ ӧсъёсты, ми кошкиськомы… – косэ диворчи Бату ханлэн куараеныз. – Ваньзэ ворса озьы, кызьы усьтылӥд.

Камит озьы ик диворчи пыр Валоез вань ыбесъёссэ ворсатэ. Ӟеч кылъёс вераса Валоен люкиське.

– Туж ӟеч ужад, Камит, мон малпасько ваньмыз пӧрмиз… – пуксем интыысьтыз султыса нырысьсэ куаныса пальпотӥз Явуш диворчи.

– Тау тыныд, арсавыл туно, Зарни Валъёсты поттэмед понна, берпум сэбедмес ортчытыны юрттэмед понна! – вазиське аримаспаослэн эксэйзы. – Берекето улонмы медло тӥ но, ми но куиньнамы ик куспын!

– Ойдо, озьы медло! – пальпотэ Камит.

Ӵапак со дыре Зарни Валъёслэн али ышемзы палан кылдэ палэсмуртлэн ӧсэз – буко кадь някырскем кызьпу. Со азе потэ Палэсмурт.

– Соослы уг яра ӟардонэз адӟыны, нош мыным котькуд дыре потыны яра, малы ке шуоно мон палэс мугоро… – пальпотыса йыбырттэ со ваньзылы. – Мон уго котьку эрико вал, мон ачим бырйисько, ку кытчы потыны, ку кыӵе ужме быдэстыны. Али но, малпасько, ӵап дыраз потӥ. Кулэ сэбедэз тӥ ортчытӥды, яратоно Камитэ мынам, кучыран выжысь Дявуше, аримаспаос, адымась валъёс, пуныадями, валадями, куӵо вал, валкион, Кырныж, мусо бабасыръёс, Сяськабей нуноке, Чачоке, Узыбей нылоке! Табере мон буйгамын Арсавыл музъеммы понна. Тау тӥледлы ваньдылы! Тӥ котькудды татын бадӟым уж лэсьтӥды, одӥгды но татчы янгышен ӧд сюре, ваньдэсты адӟон бугорды вайиз. Угось номыр но та дуннеын огшоры уг лэсьтӥськы. Озьыен, ваньды тӥ Арсавыл музъемен герӟамын. Табере тӥ умме усёды, нош мон отӥяз, тӥляд Палэсмурт агайды, ваньдэсты асьтэ дуннеосады потто. Сотэк татысь потэмды уз лу. Кылдэмез та вӧсяськон кушлэн сыӵе. Со огдыре ик татын, огдыре ик мукетаз вылӥ дуннеын. Татчы кылиды ке, ваньды палэсмуртъёс луоды, Сяськабей нунокмы но Явуш диворчимы сяна… Малы ке шуоно соос кыксы ик вылӥ мертэтъёсысь кылчинъёс ни… Валъёслэн но уг поты, дыр, йыртэм чуньыослы пӧрмемзы, бабасыръёслэн но – йыртэм бабасыръёслы, кионлэн но – йыртэм кионлы, кырныжлэн но – йыртэм кырныжлы… – вань сюлмысьтыз серекъя Палэсмурт. – Озьыен, кутскомы табере мынэсьтымзэ сэбедме. Тон, Кырныж, ваньзэ чаклась лул, соин ачид но мукет дуннеосы потыны быгатӥськод, мын, лобӟы, вера ӟеч иворъёсмес ӟеч калыкмылы…

– Крон! – шуэ Кырныж, оло ке Крон инмарезлы тау карыса, собере секытак вырӟе но кошке…

Палэсмурт пальпотыса учке солэн лобемез шоры, мае ке вашкалазэ тодаз вайыса, оло. Но со дыре ик, пал синмыныз ке но, со адӟыны вуэ, кызьы каллен-каллен умме усьылыны туртто ни вӧсь ортчытӥсьёс. Кытысь ке нюлэсъёс сьӧрысен тэтчаса-тэтчаса лыктэ коркалэсь но бадӟым туп.

– Сизьым адымась валъёс, – азьланьтэ палэсмурт. – Тӥ вань кужымдэс сётӥды Зарни Валъёслы сизьымдон сизьым шуръёсты потаны, куӵо вал но вань выжъёсты потаны дӥсьтон кужымзэ сётӥз, аримаспаос но, пуны адями но юрттӥзы выжыоссылэн тыл кужымъёссы пыртӥ сэбедэз ортчытыны, бабасыръёс но дуннеосмес огазеязы, соин ик нырысь тӥледды мынам тупе ас бордаз лякыса нуоз…

Валъёс пограло, аримаспаос но соос вӧзы ик, куӵо вал но пуны адями но, бабасыръёс но. Туп тэтчаса-тэтчаса ортче Кылдысин бусыез, ваньзэ ас бордаз басьтылыса, тани тэтчиз пограмъёс вылэ, питырскиз соос вылтӥ, кыскиз ваньзэс ас пушказ, вотэсъёс кадь ветлӥсь тылъёсыныз чатыртэ, шиетэ…

– Мар-о, гынӟем тупе мынам, утялтӥд-а, мае утялтыны кури? – пальпотэ Палэсмурт, собере туж чырткем позырскыса тупезлэн кӧтурдэсаз ӵыже. Туп, зир бергаса, инбаме кошконъяз, пичияса тубон интые, бадӟымаса-бадӟымаса, толэзез ик ӵокса, кизилиосты ик ӵокса, вань инсьӧрез ик ӵокса. Тём-тём пеймыт луэ. Собере мар ке пуштэ, воректэ, нош ик каллен чагыраны кутске пеймыт уй инбам…

– Со мынам тупе озьы ужа, – пальпотэ Палэсмурт. – Инмаръёс дорысен кылем гын тупе мынам. Инмаръёс кадь ик яратӥсько мон соин шудыны, ужаны, ӵыжаны сое небыт кӧт урдэсаз… Мед октоз со вань кылем-мылемзэ, тӥлесьтыд пертчылӥськем бугор шортъёстэс, сӥньысъёстэс, кесяськем ӟустариостэс, вань кулэтэмзэ, мае тӥ та дунне вылэ кельтӥськоды… Сотэк дунне туж ӝог кырсёмоз, соин ик котькуд дуннеосын монэ Сузясь шуыса тодо. Нокин уг пумитъяськы мынам соослэн дуннеязы но пал пыд вылам тэтчамелы. Мон сузясько, сыӵе мынам удысэ. Уг яра жуг-жагез вӧлмытыны, нокинлы со уг кельшы, «сьӧдъёслы» но «югытъёслы» но.

Паймыса, ымзэ ик усьтыса, учке Палэсмурт шоры Узыбей, Камит но пальыша. Явуш диворчи но, лыз синмо Сяськабей но пальышало. Кион вал гинэ уг вала на мар карыны… Со малпа ни вал, грек инмаръёс кадь, дунне валанъёс сярысь Палэсмуртэн вераськон чӧлтыны, но Палэсмурт ачиз сое азьланьтӥз.

– Тыныд но, валкион, вань мынам кузьыме, мынам тупе тэтчаса-тэтчаса кошкиз така лудъёсыд вылтӥ, кӧтты тырымон туйназ ас пушказ така турынъёстэ, вера эшъёсыдлы, кытын гинэ тӥ уд луэ, кӧтты ке сюмаз, вазиське Палэсмурт агайдылы, мынам тупе соку ик куштоз тӥледлы така будосъёстэс… Пыр, валкион, тон но мынам гынӟем тупе пушкы, со тон вылэ кальзэ усе ини…

Кышкасьтэмкион йырзэ но ӝутыны ӧз вуы, олокытысь тэтчаса-тэтчаса вуэм туп сое ас пушказ кортӵогаз но палэсмуртлэн ӧсэз кадь ик чатыртӥсь тылъёсыныз шиетыны кутскиз…

– Нуныосы мынам, – вазиськиз Палэсмурт Камит но Узыбей шоры. – Тӥляд но ӟустариосты та туп пӧлы кемалась люкаськизы ини, люкаськозы но ай, улонды тӥляд кузь, сюресты тугасьгем ыжгон кадь, кема сэстоз но тугоз ай тӥледды адӟон бугоръёсты. Палэсмурт ваньзэ тодэ тӥ сярысь. Туп тӥледды нош ик кесялоз на, кыктэс ик кык пала сэрпалтоз. Кема утчано луоды тӥ ог-огдэс, адӟон сюресъёсты вылын, соос тӥляд укыр ӟуго-мого. Но Палэсмуртлэн тӥледлы но одӥг кузьымез вань. Асьтэос быръе, кудды сое басьтоды. Тӥледлы со туж зол юрттоз. Тани со зундэс. Сое бур ки чиньыяд ке понӥд, тон адскисьтэм луиськод, нош позыртӥд ке каӵеныз уллань, соку ик тӥ ог-огды доры вуоды… Кызьы созэ малпалоз зундэслэн кузёез, яке ачиз эшез доры вуоз, яке эшсэ ачиз доры вуттоз. Я, кудды басьтоды зундэсме? Мынам со одӥг гинэ, палэсмуртлэн кыкез луыны уг быгаты. Но со одӥг гинэ ке но, тӥледды котькытысен быгатэ огазеяны. Я, кудды сое кырмоды?

– Мон! Мон сое басьто! – шуиз Узыбей, Камитэз утчаса, вань курадӟемъёссэ тодаз вайыса.

– Мон но озьы малпасько, кече-пеле мынам! – шуак соглаш луиз Палэсмурт, зундэссэ Узыбейлэн паллян ки чиньыяз бышкалтыса. – Нуллы сое паллян кияд, тазьы со огшоры зундэс, нош бур кияд озьы ужалоз, кызьы верай…

– Тау, Палэсмурт агай! – шунды кадь пальпотэ Узыбей Камитэз шоры учкыса…

– Ӟардон но кулэ ӧвӧл, тон ке пальышаськод… – пальпотэ Палэсмурт. – Нош куректӥськод ке, кунэрес толэзь но толэзь… Ярам, пырелэ изьытӥсь тупе пушкы…

Палэсмурт озьы гинэ шуиз, туп кыксэс ик соосты ньылӥз, ӧз но гурӟыты. Палэсмурт юла кадь позырскиз но вань кужмысьтыз ӵыжиз. Туп юла кадь шуласа но бергаса омыре ыбыштӥз. Тани со бадӟымаса ӵоктаз ни толэзез, кизилиосты, вань чагырскыны кутскем инбамез. Нош ик тём-тём пеймыт луиз. Пуштӥз, ӟаректӥз…

– Дасяське тӥ но, Чачок сузэре мынам, Эркынай вал адямие мынам… Ӝоген туп берытскоз но тӥледды но асьтэлэн дуннеяды поттоз. Сыӵе мынам уже, мар карод, котькудӥз та дуннеын аслэсьтыззэ лэсьтэ.

Палэсмурт Сяськабейлэн ӝӧк вылысьтыз зӧк-зӧк бинялтэм тамаксэ басьтэ. Кенжытэ. Куаӵ-куаӵ кыскалтэ но куинь ӵын кульчоос поттэ.

– Тау, Сяськабей, ческыт ик та амаранта тамакед тынад… – кызыса-кызыса пал синмыныз синвуаськыса ик пальпотэ Палэсмурт.

– Ӧжытгес тон кыскыны кулэ, Палэсмурт агай… – серекъя Явуш. – Ӝыны мугорыд куасьмиз ни ук…

– Пыра вал ай тон но «сьӧдъёслэн» дуннеязы, валасалыд, кызьы отын йырвизь ик йыркобы борды куасьме. Сяськабейлэн тамакез выльысен монэ небӟытэ. Озьы ук, Чачок сэзэре? Озьы ук, Эркынай кызые?

– Озьы, Палэсмурт агай… – серекъя Чачок апай…

– Нош мон Явуш палан… – серекъя Эркынай. – Уг яра тыныд кыскыны, Палэсмурт агай. Эсьма, вукузёослэсь скал йӧлзэс со интые ю вал. Со но ӟеч небӟытэ…

Палэсмурт кызыса-кызыса серекъяны кутске. Ваньзы гор серекъяло.

– Ярам, вуом на йӧл но юыны. Ӝоген вань шакшыосты Чачок апайлэн музъемысьтыз улляломы. Кузон палась Узыбейлэсь но Камитлэсь чылкыт калыкъёссэс тынад ватскем музъемад ватоно луоз… Тынадаз гинэ ӧвӧл, мукетъёсаз но Чудьяослэн бервылъёсазы. Чудьяослэн пусъёссы ужаку, нокин соосты уз шедьты таӵе музъемъёсысь… – пальпотыса аслэсьтыззэ малпаське Палэсмурт.

– Озьы ке, озьы ни, ярам, ӟеч калыкъёсмес ӧм уте ке, эшшо но секыт асьмелы йӧтоз… Кыйёсты ӝуатыку ваньзылы секыт йӧтэ… – ӝожмыт вера Чачок апай…

– Мар шонер, со шонер…– тамаксэ кыскалтэ Палэсмурт… – Зэрпал, тырмоз отын кылльыны, лушкем кылзӥськыны, васькыты пилемдэ, ойдо кыскалтом ӵошен.

Нюлэс вылэ пилемъёсыныз ӵош ваське, пилемъёс вылын кыллись зэрпал.

– Мар тынад верамед потэ? – вазе зэрпал Палэсмуртлы гинэ валамон кылыныз.

– О-о, тон зэрпалъёслэн кылынызы вераськыны малпад? Малы? Мукетъёс медаз валалэ шуыса?

– Лушкем вераськем потэ…

– Ярам. Озьы ке, озьы медло. Соку кылзы, кемалась тыныд вераны турттӥсько вал. Нош ноку дыр таӵеез ӧз кылды. Тон мыным йырдэ кур эн кары, мыным косӥзы, мон лэсьтӥ… Мон тонэ косэмзылэсь матэгес сэрпалтӥ… Табере тон выль тодонъёсын улӥськод… – ӝожмыт вера Палэсмурт.

– Вал мынам нырысь-валысь тыныд йыркуре… Табере ӧвӧл ни… Мар карод тонэн, тон соосызлы но таосызлы но ужаськод… Сыӵе тон кылдытэмын… Кык пала ик ужаны… Мыным капчигес вал кык зарезьёс вискын, аланъёс но хазаръёс дорын вузаськон сюресэз чакланы… Малпасько, Атлантлы но Прометэйлы трослы секытгес, озьы ик мукетъёсызлы зэрпалъёсмылы…

– Мар, кыскалтом иське? – юа Палэсмурт.

– Вай, иське, оскалтом… – кизэ мыче зэрпал.

Палэсмурт сётэ солы кенжытэм тамаксэ. Соиз кыскалтэ, туж бадӟым кульчо ӵын поттэ.

– Я мар, кыӵе тамакез Сяськабей кызылэн? – юа Палэсмурт.

– Ческыт! Амаранта со Амаранта… Но тон мыным тани вера ай, сюлэмы шӧдэ, тон Узыбеез умой интые ӧд ысты ук, кащейёслы сётӥд, шӧдске?.. Озьы?..

– Кытчы ыстӥ, отчы ыстӥ, мар ёрмид? Кинъёслы сётоно вал, соослы ик сётӥ, соиз ини мынам уже…

– Мон, Палэсмурт, номыр уг шуиськы, уг пыкылӥськы, мон валасько, соиз тынад ужед. Нёжто тынад совестед ӧвӧл? Номыр тонэ уг ӧпкельыты шат?..

– Туж-а тодэмед потэ?

– Потэ…

– Иське кылзы, мынам совесте ӧвӧл, ваткаослэн кадь ик, ми сое сюлэм шуиськомы? Валад? Оло тон вунэтӥд аланъёс но хазаръёс палан улыса?

– Ӧй, мон ӧй вунэты, но тон валад ук, мар сярысь юамме…

– Ӧвӧл мынам сюлэмы, со мынам ӝыныё. Одӥг палдурыз сопалан, паллян палан, мукетыз тапалан, бур палан… Ку со кытын луэ, созэ одӥг Инмар тодэ…

– Озьыен тон урод интые Узыбеез келяд?..

– Мон сое урод интые ӧй келя… Но кощейёслы но верай, кытчы келямме, быдэстӥ, шуом, соослэсь куремзэс… Нош отыназ мар луоз, соиз мынам уже ӧвӧл,..

– Кызьы тынад ужед ӧвӧл?

– Ӧвӧл отын мынам уже. Отын мукетъёсыз ни ужало.

– Кинъёс отын ужало?

– Созэ Инмар гинэ тодэ, нош мон Инмар ӧвӧл. Мон туж пичи люкетыз, со бадӟым но туго-туго бугорлэн…

– Ярам, валай. Бон, тон кык полэс агент, валамон тонэн… Нош сопала потылыкуд тон отысь Пуныез адӟылӥськод-а?

– Анубисэз? Упуаутэз?

– Бон, соос но Пунылэн ик нимъёсыз… Соос но ялан чыртыязы Пуны кадь ик шайтанлэсь кузэ-пасьсэ нулло, сопала но, тапала но ветлон понна.

– Собере мар?..

– Мынам тодэме потэ, Пуны кощейёслэн дуннеязы пась пыртӥ ветлыкуз, со тон кадь ик-а асьмелы но, соослы но ужа?

Палэсмурт серекъя.

– Нёжто тон, зэрпал, сыӵе мырк?..

– Мынам тынэсьтыд кылэме потэ…

– Пунылэн амалыз ӧвӧл, соосызлы но таосызлы но ужатэк… Котькудӥз чаклась озьы ужа ук…

– Нош малы сое соку чидало… Малы уг быдто?

– Малы ке шуоно ачиз Шайтан солы кузэ-пасьсэ сётӥз, нош Пуны со понна Шайтанэз адями доры матэктыны лэзиз…

– Иське, Пуны тодэ вал, Шайтан адями вылэ сялӟоз шуыса?

– Созэ Пуны гинэ ӧвӧл, Инмар но тодэ вал… Инмарлы кулэ вал Шайтанлэн сялӟемез.

– Валамон, иське, Инмар аслаз чаклачи Пуныез пыртӥ юри Шайтанэз пӧяз, пунылы солэсь Ыбес-Пасьсэ усьтон понна?

– Тон, зэрпал, палдурес гинэ малпаськиськод.

– Мон Палэсмурт ӧвӧл ук кык палаз ик вуылыны.

– Инмар ӧз пӧя, со кылдытӥз сыӵе югдур, куддыръя кыкпалъёс ик асьсэлэсьсэ басьто… Шайтан но шумпотыса кошкиз, со сялӟиз, кельтӥз адями пӧлы аслэсьтыззэ. Инмарен Пуны но шумпотӥзы, малы ке шуоно Шайтанлэн дуннеяз потан Пась усьтӥськиз… Нош Пасьтэк улыны секыт, сопал дуръёслы но, тапал дуръёслы но. Соин ик кылдыто милемды, сопала но тапала но ужаны…

Зэрпал кема мыньпотэ. Шӧдске, туж мӧзмемын вал со таӵе вераськонъёстэк.

– Тон тодӥськод-а, кин со Кылдысин, кин со Керемет? Соос сярысь ваткаос пӧлын туж ӧжыт веранъёс кылемын… – нош ик пальпотыса юа зэрпал.

– Кылдысин со Осирис. Нош Сьӧд Керемет – Осирислэн агаез, Сет.

– Малы тон озьы малпаськод?

– Зэрпал, сое валан понна, трос мадьёс кылемын… Египетын но, Арсавылын но. Ӵошатыны гинэ кулэ. Мынам дыры ӧвӧл сое ваньзэ валэктыны. Тон юад, мон верай. Кылемзэ ачид малпаськы… Вай тамакме, кысӥз ни со тынад… Жадьытӥд тон монэ…

* * *

Камит сайказ тулысо-тулысо нюлэскын, аслаз кионвалэз вылын… Валэзлэн кык пельёсыз вискысен солы паймымон суред адӟиськиз. Оло ке со кык бадӟымесь пельёс аслаз ик тулыс нюлэслэн «йыр» бордысьтыз кылдэмын… Камит туж ӟеч адӟиз со тулыс нюлэс мугорлэсь чыртызэ но, йырзэ но, пельёссэ но… Нош валлэн мугорыз, кудӥз вылын Камит пуке – солэн бадӟым нырыз, нош нырпысы вылысьтыз вал быж, отчы-татчы шонскыса, кыӵе ке валантэм оло тамак ӵынэз, оло вал зынэз улляны тырше… Нош ачиз Камит со ныр вылын, ошкуйлэн ныр вылаз кадь ик, мыдлань пуке…

«Маскара экто нылъёс!» – аслаз юмоко визьмыныз али адӟонзэ валаны тырше Камит. Но одно ик валано меда, шуак-дуак лыктэм мыдлань суредэз? «Валано!» – шуэ солэн туно визьмыз. Сое пичиысен дышетӥзы валантэмысьтыз но ваньзэ валаны. Туно сямен ке учконо, котькыӵе «вал» вылын пукон со «кошкемез» яке «кошкисез» вылын пукемез вера. Туноос куд-ог дыръя юри «Акаша Валзы» вылэ пуксьыло, ортчемзэ Валан понна. Калыкын ӵемысь сое «Акашка Вал» яке «Акашка Баскич» шуыло. Но калык уг вала та кылъёслэсь висъяськемзэс… «Ак» со геры, нош «Яшка» – сиён. Нырысетӥ Геры Берез тодмостон – «Гербер». Нош «Геры Бер» возьматэ (возьматэ гинэ!) куинь дырез: ализэ, ортчемзэ но вуонозэ.  Нош «Акаша Вал» соку ик тонэ ортчемаз но, алияз но, вуонояз но вуттыны быгатэ, со тонэ нуллэ котькуд сюресъёстӥ, кудзэ тон тодыны турттӥськод. «Акаша Вал» та дуннеысь вань ортчемзэ тодэ, ваньзэ Йыр Баскичъёсаз гожтэ. Угось ваньмыз ортче «Акаша Валлэн»  пыдъёсыз вылын. Соин ик ортчемзэ но асьмеос «Акашалэсь» нимзэ вератэк «Вал» шуиськомы. Угось тынад ортчемзэ яке ортчисьсэ шӧдонэд кошке отчы, аслад тыбыр улад, «Акаша Валлэн» тыбыр пыртӥз, «Валлэн» кӧт улаз, «Валлэн» пыдъёсыз улэ… Тон шӧдӥськод, кызьы «Вал Пыдъёс» вортто, кызьы выллань тубо, кызьы уллань васько, кызьы гопез, нюкез тэтчо. Ӵапак «Вал» вылысен тон «Валаны» кутскиськод аслэсьтыд кус улысьтыд шӧдондэ. Чебертэм кылъёсын сое нималля калык. Но котькызьы калык сое мед нималоз, котькызьы сое мед серекъялоз, со Вань, со Улоз но, Луоз но. «Берпал со берпал, берпал котьку ӟечгес шӧдэ!» – куке-огпол тон ачид ик «Валаны» кутскиськод «Акашаез» тодэ вайтӥсь «Валанэз». Пуны но ук, кион но, сыӵе шӧдонзылы луыса, быжзэс гогы улазы позыртыса, берпалзэс музъем борды лякыса ик пегӟо. Котьма ке но, уг лу ватыны со шӧдонэз. Со вань, со адӟиське. Ӵапак «берпал» котырын люкаське ортчемзэ но, ализэ но, вуонозэ но шӧдон. Котькызьы мед малпаськоз йырвизьмыд, котьмае мед адӟозы синъёсыд, котьмае мед кылозы пельёсыд, котьмае мед шӧдоз мугорыд, но «берпаллэн» аслаз синъёсыз, аслаз пельёсыз, аслаз шӧдонэз, аслаз визьмыз. Вот татын соос люкисько. «Тон ул асладэныз, нош мон уло асламеныз!» – шуэ аслаз мугорызлы ик пуксьыны яке бекырскыны кылдытэм палдурыз. Нош «валлэн берпалыз» кадь вань меда дуннеез ӟечгес шӧдӥсез, тодӥсез? Кин меда со кадь ӟеч шӧдӥз инмар нунылэсь ас гидаз вордӥськонзэ? Ма, инмар нуны но нырысь ик солэсь вань гидэ вӧлскем шунытсэ, куандырись ненег зынзэ шӧдӥз. Шуо, куаныса ик со учкиз солэсь ненег кӧжыез ненег кот ымдуреныз кыскылыса сиемзэ… «Вал» но озьы ик куаныса учкылӥз Вож Нуны шоры. «Вал но Нуны», «Нуны но Вал» – вань соослэн висказы мар ке но ненегез, инмарлэнэз, сэбед выллемез: туноос верамъя, та дунне вылын «Нунылы» сётӥське «Вал», нош «Валлы» – «Нуны»…

– Кема-а мон изи, кионвал берпал?.. – юаз Камит валэзлэсь сьӧрзэ учкыса. Оло ке сопаласен кионвалэз солы вазёз, вералоз…

– Нош ачид кызьы малпаськод? – така турынзэ сыскыса азьпаласеныз, аслаз ымнырыныз серектӥз кионвал…

Камит воксё таӵезэ ӧз возьма кадь… Со мукет палызлэсь юаз вал ук?.. Но йырвизь шуак тупатэ аслэсьтыз «янгышсэ», Камит выльысен сайказ…

– Мон, валамон, ӧй изьы, нош тон укыр кема, шӧдске, изид… – така турынзэ сысконъяз куаныса-куаныса шуэ солы кионвалэз.

Камит сотэк но валаз ни, ку но малы умме усемзэ. «Нош Узыбеез солэн кытын?» – аслыз туж но туж кулэзэ утчаса, туно синъёсыныз ортчиз со нюлэс кушез, али гинэ бычырась писпу куаръёсты, ненег возез, куд-ог интыысь лымы люкъёсты, яркыт шундыен тылсиясь тулыс тыосты, эксэйнылызлэсь ческыт зынъёссэ шӧдыны турттыса, вань нырыныз гадь тыраз кыскиз юзмыт тулыс омырез, кудӥз валлэн кыед зыныныз сураськыса со пушкы пыриз но, соку ик адӟытӥз мувыр сьӧрысь уно-уно кыткем но ӟускем валъёсты, тодмо но тодмотэм уробоосты, тарантасъёсты, ухаллаосты, пудоосты, бурдоосты, вузаны ошылэм ӵынатэм чорыгъёсты, вузаськон лавкаосты, сиён пӧзьтӥсь пуртыосты, пырсатӥсь, пыжись гуръёсты, паськыт Идель камысь уно-уно вузчи карубъёсты, уно-уно калыкез, пичи дырысеныз ик солы тодмо карез, солэсь тӧдьы излэсь ӝутэм борддоръёссэ, бадӟымесь юртъёссэ, каланчаоссэ, несториан черкъёссэ, Кузонлэсь шулдыръяськись ульчаоссэ но кытысь ке пыдлось-пыдлось вашкала сямъёссэс, валанъёссэс… Ваньмыз вал та тулыс омырын, нош ӧй вал та паськыт вӧлдӥськем инкуазь пӧлын солы кулэез лул… Соку гинэ Камит тодаз ваиз Палэсмуртлэсь верамзэ. «Кыкнадылэн ик тӥляд асьтэлэн сюресты…» – шуиз кык дуннетӥ ик поръясь агай.

Камит оло аслаз, оло валэзлэн берпалэныз шӧдӥз, Палэсмурт сое ассэ но татчы, та интые, юнме ӧз сэрпалты шуыса. Угось, со валамъя, кыдёкын ик ӧвӧл интыяськемын Кузон базар, кытчы со ӵапак та нуналлы вуыны кулэ вал. Бен, ӵапак туннэ та Эске Кузон базарез ачиз Ош-Гондыр усьтэ. Соин ваньзы Ошлы «шертовать» карозы… Калык базарез усьтыны вуэм «куноосыныз» ӵош вить нунал шулдыръяськоз, эктоз, кырӟалоз, «вить луло» айы гондырез данъяса… Нош Камит, кӧняетӥ ползэ нош ик аслэсьтыз «ньыль луло» нылмуртсэ, Узыбейзэ, утчано луоз…

Камит лулӟыса но ӧз вуы на, шӧдтэк шорысь «нюлэслэн нырыз» кӧшкемыт кизьнӥз но сое «Акаша Вал» вылэ лобӟытӥз… Нош «Акаша Вал» соку ик вуттӥз сэбед ортчытон интыяз, чудьяослэн вӧсь лудзы вылэ, кытысен Кизили Пурт сое лэсьтытӥз ноку но малпамтэ ужрадъёсты. Камит али гинэ валаз, малы со озьы луиз. Угось со вие со ужрад ассэ нырысетӥ интые поттӥз, ваньзэ Камитлэсьсэ кыкетӥ радэ палэнтыса. Камитлэн малпаськемез ик соку ӧз лу, малы сое аримаспаос но пуны адями доры поттӥзы, кинъёс отчы Узыбеез вуттӥзы, малы со думылэмын вал, кин со Чачок апай, кин со Эркынай, аримаспа туно, кыкетӥ бабасыр?.. Малы ваньмыз аслаз луоно радызъя кошкиз. Камит ачиз но ӧз вала, кызьы мозмытӥз думылэм Узыбейзэ, собере мукетъёссэ… Солы соку ик адӟиськиз Кырныж аслаз Кизили Чачаеныз, адӟиськиз пуны адями… Камитлы шуизы, берыкты солы Чачазэ. Камит берыктӥз. Собере потӥз зэрпал… Но ваньмыз озьы кошкиз, кызьы со кошкиз… Нош Узыбей сярысь Камит малпаны ик ӧз ву ни… Кытысь но кызьы со отчы вуиз? Кин сое отчы ваиз? Кытчы, кудшоры сое кельтӥз Япанча? Кытысь но кин луэ Чачок но Эркынай? Юанъёс укыр трос вал. Соин ик Камит ортчемзэ мыдлань бергатыса «Акаша Валэз» вылын кошкиз Узыбейлэн ортчем пытьытӥз. Вӧсь луд вылысь ваньзэ, мар луиз Узыбеен, пальпотыса адӟемез бере Камитэз «Акаша Валэз» кышномуртвал сьӧры нуиз. Узыбей туж чырткем кечырскиз Эркынай валэз вылэ, нош ачиз Эркынай ворттыны кутскиз мыдлань. Камит азьын адӟиське вал солэн мыдлань тэтчась берыз но шонаськись быжыз. Тани соос вуизы Бадьмурт доры. Адӟиськиз вумуртъёслэн скалзы, кудӥз вӧзын, парсь суртонэн лузьёсты улляса, ветло вал кык вумуртъёс. Собере Камитэз «Акаша Валэз» нуиз Мырда кымес гурезе мыдлань тубись Узыбей сьӧры. Озьы соос пыризы тыпы вылысь Япанчалэн корка пушказ. Аждагалэн синъёсызлэсь лэсьтэм укнотӥ адӟизы аримаспаосты, пуны адямиез, шуралиосты но ваньзэ мукетсэ. Камит адӟиз Япанчалэсь книгаоссэ, валаз, малы солэн сюдӥсез-вордисез, Чачок апай, татчы сое ваиз, малы пичи дырзэ Япанча татын ортчытӥз. Камит воксё выль сямен адӟиз Япанчаез, валаз, малы Узыбеез со татчы кельтӥз… Капчияк луиз Камитлы, нырысь ик Япанча эшез понна, собере Узыбеез понна. Ваньзэ тае выль сямен адӟыса ачиз но Камит тулыс шунды кадь тылсияны кутскиз… «Акаша Вал» ваньзэ шонер усьтэ. «Акаша Хроникалэн» кристалъёсыз тодо, марлы тон лыктӥд, соку ик ваньзэ усьто. Камит Бату ханэн но Субэдэен трос пол ини «Акашалэн Дуннеяз» вуылӥз, ваньзы ӵош выльысен соос учкылӥзы ортчем ожъёсты, дышетӥсьёсыз солы валэктӥзы, малы тазьы луиз, малы мукет сямен ӧз лу…

– Камит, тон кылӥськод-а монэ? – паймыса юаз кионвал, Камитлэсь ас дуннеяз выемзэ шӧдыса.

– Кӧня иземме мон уггес валаськы… – ческыт назильскыса пальыштӥз Камит кионвалэзлы. – Асьмеос кемалась ӧвӧл гужем шорын вал, табере котырын тулыс шукыяське…

– Оштолэзь со Оштолэзь, сое мукет толэзьёсын уд сура… Котькытын Ош возьматэ аслэсьтыз сайкамзэ… Тынэсьтыд «кемалась ӧвӧлдэ» дыр мертэтъёсъя лыдъяно ке, секыт луоз валаны, кӧня тон изид. Угось Инвожоысен Оштолэзе вакчи кусыпез шедьтон понна, ваньзэ берласянь лыдъяно, нош кыӵе шузиез озьы лыдъялоз? Нош азьлань лыдъяно ке, укмыс толэзь, асьме сямен быдэс ар луысал Инвожо но Оштолэзь вискысь кусыпед… – серекъятэк вераське кионвал, така турынлэсь виро-виро луэм ымдурзэ нюлыштыса… – Но тулыс шунды шорын така турын но та быдӟа уг буды, ачид валаськод, со бычыра гинэ, озьыен, мыдлань малпаськоно луэ…

– Нош тон кытысь со вир турындэ шедьтӥд? – юа Камит.

– Палэсмуртлэн тупез бордысь усиз… – валэктэ кионвал. – Тынад мертэтъёсыныд учконо ке, укмыс толэзь, быдэс ар сиисько луэ, – синъёссэ маскара кыньыртылэ кионвал. – Укмыс толэзь со кадырлэсь кадыр быдэсо лыд. Ваньмыз Укмыс вылын возиське. Ваньмыз Укмыс толэзь будэ!

Камит мыняса учке шунам лымылэсь кылдэм ты вылысь вераськись валэзлэсь ымныр выросъёссэ. Мар карод сое, кылбикей но тӥни, кудъёсыз Оштолэзь базарын калыкез серекъято. Егит туно кемалась валаз ни, та кионвалэз солы огшоры ӧз сётэ шуыса, мӧзмыт луысал солы огназ «Ыбесъёсын» герӟаськем сюрессэ ортчыны…

– Тон но Палэсмурт азьын, мукетъёс кадь ик, поград, дыр, ук, кызьы адӟыны вутскид «Ыбесъёс» вылтӥ тэтчонмес? – пайме Камит.

– Мон «Ыбесъёслы» дышем лул. Мон, тӥ кадь, умме уг усьылӥськы, мон ачим кортӵогаськи Палэсмуртлэн Туп пушказ, ваньзэ адӟыны вуи пал синмыным… – шуак валэктэ  кионвал.

– Провор ик тон, Кышкасьтэм кионвал… – пальпотэ егит туно. – Оло, кион мугорын луысалыд ке, тон но «Ыбесэз» ӧд вормысал?.. Нош валлэн йырыныз ваньзэ адӟид?..

– Мон ӧй шуысал, кионлэн шӧдонъёсыз лябесьгес… Соинтэк-а, тросэз ожгарчиос ож луд вылын юри «кионъёслы» яке «гондыр берсекъёслы» берытскыло? Но вал мугор ласянь соглаш, со туж кужмо – табере мон валасько удмурт туноосты, малы соос валлэсь нулдэм арбериоссэ калыксэс эмъякузы уже куто – мон вань пушкыным шӧдӥ, кызьы вал мугоры аслэсьтыз кузёзэ ас вылаз кыскиз…

– Тау тыныд со понна! Мон но валай, «Ыбесэз» нырысьсэ вал вылын ортчи шуыса… – серектэ Камит. – Нош малы тон вал мугореныд Узыбеез но ӧд кыскы ас вылад?.. Малы со татын ӧвӧл?..

– Мон ӧй быгаты сое кыскыны… – синъёссэ палэнтэ кионвал.

– Малы ӧд быгаты?

– Малы ке шуоно Узыбейлэн табере аслаз «Валэз» вань… Со аслаз «Валэныз» кошкиз…

– Кыӵе «Валэныз»? – воксё пайме Камит.

– Кудзэ солы ачиз Палэсмурт кузьмаз… –  валэктэ кионвал.

– Палэсмурт солы  зундэс гинэ сётӥз ук?

– Ма, со зундэс ик вань солэн «Валэз»… Понӥз со зундэссэ паллян киысьтыз бур ки чиньыаз, позыртӥз, соку ик кытчы вуэмез потэ, отчы вуиз…

– Но Палэсмурт шуиз, со зундэс милемды гинэ Узыбеен герӟа?..

– Палэсмурт тӥледлы озьы шуиз, ог-огдэс ӝог шедьтон понна, нош Палэсмуртлэн «Зундэс-Валэз» дуннелэн котькуд сэргаз вуттыны быгатэ, вылаз ик одӥг муртэ гинэ уг, уно муртэ. Со но Палэсмуртлэн Тупез кадь ик ужа…

– Нош Узыбей, иське, «Валэз» луыса но, малы уг дырты асьме доры?..

– Дыртонлэсь кылдон ортче… Дырыз вуиз ке лыктоз. Табере ваньмыз солэн кияз. Солы но ас «бугорзэ» пумозяз ортчоно, тыныд но. Куд шорын тӥляд «бугоръёсты» герӟасько, созэ Инмар гинэ тодэ… – аслаз малпаськон манереныз валэктэ кионвал. – Марзэ тон со нылашлэсь шедьтӥд, малы сотэк чик улэмед уг луы? – шӧдтэк шорысь юаз со.

– Мон уг валаськы, марзэ мон солэсь шедьтӥ… Но со мыным кулэ… – лулӟе Камит. – Озьы ик уг валаськы, малы мон сое шедьтӥсько ке, одно ик сое мынэсьтым люко?.. Малы Палэсмурт сое татчы, асьме вӧзы, ӧз кельты?..

– Мон тон интыын быдэсак ӧй оскысал Палэсмуртлы… – серектӥз кионвал.

– Малы? – ӧзгес вала сое Камит.

– Малы ке шуоно, со кык пала ик ужа… Со юрттэ но, куштэ но… Соосызлы но, таосызлы но ужа. Мон малпасько, со Узыбейдэ юри «сьӧдъёслы» куштӥз…

– Мар?..

– Эн паймы… – серектэ кионвал. – Со Палэсмурт ук. Соосызлы но таосызлы но со ӧй ке ужасал, со Палэсмурт ӧй луысал… Сыӵе солэн Инмарен пуктэм ужез. Сыӵе солэн «Бугорез»…

– Мон солы оскисько вал…

– Оскон со урод ӧвӧл. Ӟечезлы одно ик кулэ оскыны. Югдур мукет пала берытскыку но оскондэ быдтоно ӧвӧл. Инмар ваньзэ валаса лэсьтэ, куд-ог дыръя юри со «сьӧдъёс» пӧлы куштэ, озьыен, ортчыны кулэ сыӵезэ но сюресъёсты… Табере тон Арсавыл Туно, нош со Арсавыл Эксэй Ныл. Котькудды азьын нырысетӥ интыын лэсьтоно ужъёсты… Соос огшоры адямилэн кадь, писпу мерттонэн, корка лэсьтонэн, нылпи будэтонэн гинэ уг йылпумъясько. Тӥ вылын бадӟым ужпумъёс пуктэмын. Тон, кылсярысь, быгатод-а «эксэй нылэз» сьӧрад басьтыны, «сьӧдъёслэн» дуннеязы, шуом, «архонтъёссы» доры. яке «вылӥ массонъёссы» пӧлы, яке адями мугоръёсын ветлӥсь «кый-кенӟалиоссы» доры тонэ келязы ке?.. Яке, Узыбей, кудӥз ас синъёсыныз адӟиз, кыӵе сэбедэз тон, Арсавыл Туно, ортчытӥд Зарни Валъёсын, Бату ханэн, Зарни Мумен, быгатоз-а тонэ «сьӧдъёслы» усьтыны?..

–  Мон валай тонэ… – лулӟиз Камит.

– Тӥни ачид ик ас юанэдлы валэктон сётӥд… Кин тодэ, кыӵе уллёос пӧлы тон туннэ шедёд?.. Соин ик кулэ меда али тон вӧзын луыны тынад ляб палдурыд?.. Угось табере, Палэсмуртлэн ӧсэз сьӧры потӥд ке, ваньзылы тон усьтӥськод…

Камит али гинэ адӟиз, Палэсмуртлэн тупезлэсь ужам бервылзэ, котыр татын някырскем кызьпуос, букоос кадь, чатыртӥсь тылъёсын воректыло. Соос, шӧдске, зэмзэ но шонерскыны уг дырто на, возьмало та интыез мукетъёслы медаз адӟиськы шуыса.

– Узыбей но ваньзылы адӟиськоз, Палэсмуртлэн ӧсэз сьӧры ке потӥз… – азьланьтэ кионвал. – Нош али со ватэмын, Палэсмуртлэн Валэз, ас кузёезлэсь кылзӥськыса, сое кошкытӥз отчы, кытчы кулэ… Палэсмурт валатэк номырзэ уз лэсьты… Озьы ук?..

– Уг луы мынам Узыбеез вунэтэме… – ӝожмыт лулӟе Камит.

– Озьы уга, уд быгатӥськы на тон Сансара питыранэд сьӧры потаны… Ярам, кӧтыз сюмасез уз вала кӧтыз тыремзэ… – пальыштэ кионвал. – Палэсмуртлэн ваньмыз чакламын, мыным со така турын куштӥз, нош тыныд тӥни чигем улвай бордын кышет керттэт сэзъяське, отын амаранталэсь пыжем «гондыр пыд» нянед, кӧмечед, табанянед, амаранта суред но, эшшо мар но со мукетыз.

– Ой, бадӟым тау Палэсмурт Агайлы! – йыбырттэ Камит, собере керттэт борды сузьтӥськыса, нырысь ик лянэсысь сур юэ, собере мукетъёсыз борды кутске. – Тыныд но тау, мусо валэ мынам… – посыр-посыр сиыса сурзэ оскалтон вискытӥз кионвалзэ но пыдыныз вешаны вуэ на со.

Кионвал но шумпотыса быжзэ шона…

– Ческыт мед кошкоз… – куанэ кионвал. – Пыдыныд ке но вешаськод, мыным умой. Но котьма ке но, тыныд удалтӥз, табере тынад вань вераськись валэд, кудӥз дунне вылын одӥг гинэ…

– Вань… – дыртыса сиськон вискытӥз пальпотэ Камит. – Но та дунне вылын тон кадь валъёс трос на ук?..

– Тон мынам эшъёсы сярысь?.. – пальыштэ кион вал. – Соос уга мукет Сансара питыранъёс борды думемын. Нош мон тон борды.

– Кионвалъёс сяна но трос сыӵе валъёс. Кылсярысь, уйпалась бадӟым пелё но пичи мугоро губырес валъёс…

– Горбунокъёс? Бен, губырес валъёс батыр но кужмо туноос, соослэн одӥг пельтӥз пырыса мукет пельтӥз ке потӥськод, тон ас адӟондэ но воштыны быгатӥськод… – пальпотэ кионвал. – Ми но куке-соку адӟонмес воштыны турттӥськомы вал соос пыртӥ, но кион кенешмы соглаш ӧз лу адӟонмес воштыны… Губырес валъёс уйпал инсьӧрын уло ук, соосты шедьтыны Бадӟым но Пичи кобыос дорозь тубоно…

– Вань на адями валъёс… – сиськон куспытӥз вера Камит.

– Грекъёслэн Хирон кентаврзы, персъёслэн Мирамассы, асьмелэн Эркынаймы но Полканмы, мукетъёсыз вал-адямиосмы, кудъёсыз асьсэлэн  инкуазьзы пӧлын гинэ ужало…

– Соос сяна но вань… – сурзэ гучыктыса пальыштэ Камит. – Вань на вукузё валъёс, ву валъёс, зарезь валъёс, лобась тулпарёс… Ваньзы та аспӧртэм валъёс вераськыны быгато… Озьыен туж кужмо туно-пеллёос луо. Но самой кужмоез соос пӧлысь – «одӥг сюро вал», яке сое ик «одӥг сюро ош» но шуыло. Но со Узыбей кадь чылкыт нылмурт доры гинэ потэ…

– Нош асьмеос – айыос… Озьыен асьме доры ноку уз поты «одӥг сюро вал»… – пальыштэ кионвал. – Нош тынад вань аслад вераськись валэд, кудӥз котьку тон вӧзын… Кудзэ утчано ӧвӧл мукет эгрегоръёсысь…

– Вань… Но солэн ассэ ушъянэз шалтырма кадь буйгасьтэм… Ушъяськон со сьӧлык! Нош сьӧлык вылын – сюрес но гылыт… Тодад возь пегӟем «Колӟолэсь» кырӟанъёссэ, сое но ушъяськонэз быдтӥз! Тупаты со сямдэ! – аслэсьтыззэ азьланьтэ Арсавыл Туно, вурысо кикурзэ мукет киыныз кормаса.

– Мон сое тупатысал, ужпум валлэн пельёсыз бордын ӧй луысал ке… – кырыж пальпотэ кионвал.

– Ӧйгес вала пельёсыд пумысен?

– Валлэн пельёсыз нылмуртлэн пельёсыз кадесь – укыр ненегесь, соин, вылды, ненег кылъёсты ярато… – валэктэ кионвал, пельёссэ султытъяса.

– Серекъянэд мыным кельше… – пальыштэ Камит.

– Мон серекъятэк верасько… – азьланьтэ кионвал. – Мон ачим но пайми, укыр ненегесь валлэн пельёсыз, ялан ушъямез, данъямез возьмало… Соин, дыр, арсавылъёс котьку валъёссылы кырӟало… Ялан чебересь кылъёс верало… Кырӟаса сюдо, кырӟаса люктало, кырӟаса кытко, кырӟаса юско…

– Нош чурытэныз ке салё, валзы пурӟе, долаське яке ворттыны кутске? – нош ик корма вурысо кикурзэ Камит.

– Соиз но зэм. Нош кышномурт но сыӵе ӧвӧл шат?.. Узыбей, кылсярысь… – серектэ кионвал.

– Узыбей?.. – кырыжак учке валэз шоры Камит.

– Вот угось… Жаль потӥз мыным Узыбей, тон солы нокыӵе ненег кылъёс ӧд вера, ӧд но ушъя, нош «эксэй ныл» сомында кышкытсэ ортчиз… Со сыӵе шумпотӥз вал тонэ пумитаса, нош тон соку ик сэбедъёсты ортчытон борды кутскид, оло ке воксё Узыбеедлы ӧд но шумпоты…

– Мон шумпотӥ…

– Ӧй адӟы мон… Сюлэм тылыд ӧз адӟиськы… Узыбейлы гинэ ӧвӧл, мыным но ӧз адӟиськы… Нош Узыбеез утчакуд со тынад вал… Со тылыдлы луыса ик тон сое шедьтӥд…

– Мон ваньзэ вераны ӧй вутскы, кулэ кылъёсме ӧй шедьты… Ваньмыз сураськиз, пуны адями, Кырныж, аримаспаос, зэрпал, сэбед ортчытон… Собере Палэсмурт ваньместы шуак-дуак келяз…

– Ӧвӧл, котьмалы дыр шедьтыны луэ, Камит… Сэбед со сэбедэн, нош адями мукетсэ возьма, сюлэм шуныттэ… Кӧня ке кыл вераны котькытын дыр шедёз. Но сое дырыз дыръя верано. Мон адӟи, кызьы Узыбей сылӥз, ваньмыныз вунэтэмын… Огназ… Мар вал солэн йыраз, мар вал сюлэмаз мон уг тодӥськы, но валасько мар ке но вал шуыса… Оло соин ик со табере татын ӧвӧл… Учконо, Камит, матысь адямиостэ… Тон но ук сомында кужымдэ понӥд Узыбейдэ шедьтыны, нош шедьтӥд но – сэбед пала шоналскид… Мыным со валантэм вал… Уг яра озьы матысь адямиедлы, кин понна тон улондэ аслэсьтыд сётыны дась, кулэ шораз саклык висъятэк кельтыны…

– Мар карод табере, озьы пӧрмиз бере… Тон ке но сюлэмме эн гожма ни… Сотэк но мон тэльмырисько…

– Вождэ эн вай… Мынам али но син азям, кызьы монэ аслам паре утиз, нош ачиз кышкыт сюръёс улэ шедиз. Мон адӟи солэсь кулон азяз синъёссэ, отын шумпотон гома вал, со монэ утиз шуыса. Нош ачиз кошкиз… Соку ӧй вал на «така турын», мон ваньзэ сётысал сое улэп кельтыны, мон сомында ӟеч кылъёс солы верасал… Нош уг лу ни… Нош тынад луэ вал… Солы али сокем секыт… Угось Узыбей борды тросэзлэн сюресъёссы дыгисько, тросэзлы табере Ромул кион пилэн кылдытэм карысьтыз лушкам Юнона кулэ луиз – «храмчиослы» но, сасанидъёслы но, пӧртэм гыжкалъёслы-воръёслы но. Туноос пӧлын иворъёс ӝог вӧлдӥсько. Нош тунооссы паськыт камъёсмы вылын «сьӧдъёслэн» но трос… Котькуд пыж сьӧрын туно-ватаманъёс пуко… Юнме шат Усман тата Узыбеез быдтыны косӥз… Юнона но Узыбей табере люконтэмесь…

– Малы тон Зарни Мумез  шуиськод «Юнона»?.. – паймиз Камит.

– Малы ке шуоно Зарни Мум ӵапак со Быдӟым Римез кылдытӥсь Юнона ик вань, Быдӟым Рим империя куашкам бере сое отысь ассассинъёслэсь лушкаса, тапала хазаръёс доры ваизы, нош Юнона нимзэ Варфаламея нимен шобыртӥзы, нимзэ ватон понна… Со ик вань Зарни Мум, Зарни Ань, Сорни Най, Калтась-эква…

– Тон зэмзэ ик-а озьы малпаськод?..

– Мон уг малпаськы. Мон тодӥсько. Мынам йыры ӟеч ужа. Кылзы мар мон тыныд верало, нош тон малпаськы, учкы, кызьы ваньмыз огез вылэ огез пыкиськыса мынэ.  Рим император, Быдӟым Константин, 315 арын, нырысь ик  христианъёсты уллямысь дугдытӥз. Со вал хритианъёслэн бадӟым вормонзы. Ӵапак соку гинэ христианъёс, мукет оскисьёс кадь ик, Рим империын но эрикоесь луизы. Собере, кема ик ортчытэк, озьы ик Быдӟым Константин кивалтэм улсын, 325 арын, Никей карын, христианъёслэн нырысетӥ Дунне Соборзы ортчиз, кытын соос «арианъёсты», асьмеос кадь ик, ведаосын кусып возись, нырысетӥ чылкыт христианъёсты «православилэсь» палэнтӥзы… Кыкетӥ Соборзы соослэн ортчиз 381 арын, кытын «православие» «арианствоез» быдэсак вормиз ни, ӵапак татын Иисус Христос пророкез Инмар каризы. Нош Иисуслэсь улэп дыръяз «бамкышетэ кылем кот тусбуйзэ», кудзэ ачиз Иисус Авгарь эксэйлы бурмон понна солэн суредасезлы сётӥз – «Киен сэредамтэ Спассэ» иконалы образ каризы. Нош Куинетӥ Дунне Соборзы соослэн Иисуслэн анаезлэн берло аръёссэ улэм караз, Эфесын, 431 арын ортчиз. Татын уллязы ведаосты гажась «Несториан черкъёсты», кинъёс Марияез огшоры адямиез гинэ вордӥсь каро вал. Та соборын Марияез Инмарез вордӥсь каризы. Соин ик куашканы кутскем Рим империлы кулэ ӧз лу ни Юнона, азьпал радэ со поттӥз Инмар Анаез но Иисус Христос инмарез. Рим империя, кудӥз хритианъёслэн дунне соборзы бере, мукет оскисьёслэсь храмъёссэс таркаса, ӝуатыса ветлӥз, кема ик улытэк, 476 арын куашказ… Ӵапак со вакытэз ас синъёсыныз туж умой адӟиз Блаженной Августин. Со гожтэ: Рим вылэ Ачиз Быдӟым Инмар варваръёсты ыстӥз. Августин верамъя варваръёслэн осконзы трослы чылкыт вал Рим христианъёслэсь. Соос одӥг храмез но, Рим христианъёс кадь ӧз таркалэ, калыкъёсты но, кудъёсыз черкъёсы пытсаськылӥзы соос храмъёсын ӵош ӧз ӝуатэ, ӧз виылэ, соос нокинэ ӧз исалэ. Нош музъемъёсты, кудъёсыз кырлудъёслы берыктэмын вал, варваръёс соку ик гырыны, кизьыны, утялтыны кутскизы. Соос ӧз яратэ рим христианъёслэсь циркъёссэс, гладиатор ожмаськонъёссэс, кытчы кесяськем сюлъёсты, пуртъёс улын кулӥсь гладиаторъёсты учкыны римысь кӧто кышноос но шумпотон басьтыны ветло вал.

Хазар каганат но, варваръёс кадь ик, Инмарен, Инкуазен улӥсь калыкъёслэсь кылдӥз, кудъёсыз юн возё вал вашкала сямъёссэс, тодо вал ведаосты. Хазар каганат кылдӥз но улӥз 650 – 969 аръёсы. Зэмзэ ке, со трослы вазьгес кылдӥз ни, ӵапак Рим империя куашкаку, ӵапак соку, куке аслаз храмысьтыз, коньдон шуккон куалаысьтыз поттыса сэрпалтэм Юнонаез тапала вуттӥзы Хазар каганатэз, Рим империез кадь ик, быдӟым карыны турттӥсьёс… Хазар каганъёс ӧз дыртэ асьсэды христианствоен герӟаны, малы ке шуоно шӧдӥзы, адӟизы отысь калыкъёсты керетытӥсь тӧлъёсты, кудзэ туж ӟеч возьматӥз  Блаженной Августин, нош  инмарлы вӧсяськон черкъёссэс, кудъёсыз соку коньдон поттонэн, вузаськонэн гинэ герӟаськемын вал, асьсэлэн каръёсазы пуктылыны пумит ӧз кариське, озьы ик уг дырто вал соос ислам пӧлы но пырыны, отысь но соос адӟытэк ӧз улэ куспазы керӟегъяськемъёссэс. Но соослэсь но мечетьёссэс хазар каръёсы пуктылыны лэзизы, угось таосыз но нырысь ик араб вузчиосын герӟаськемын вал. Хазар кивалтӥсьёс мудронэсь вал, малы ке шуоно гажазы, асьмеос кадь ик, ведаослы но инкуазьлы оскись калыкъёсты, нош Юнона, «Зарни Мум но Варфаламея» нимъёс улын юнматэ гинэ вал соослэсь осконзэс. Юноналы луыса Хазар каганат туж ӟеч ӝутскысал. Со зэмзэ но быдэс даур пала туж ӟеч азьланьскиз. Котькытысь вузчиос отчы дыртӥзы. Котькытын Хазар каганат сярысь вераськизы. Нош 730-740 аръёсы отчы чуртнаськизы Пуксён палась уллям «ӵуж чалмаос», иудей ашкеназъёс. Кинъёс-кинъёс, нош таосыз ӝог вуо вал отчы, кытын коньдон дурыны луэ. Со вакытэ хазаръёслэн кык эксэйзы вал, одӥгез Семендэрын пукиз ужась но вузаськись кылыкен кивалтыса, нош мукетыз вал – ожгарчи эксэй, кудӥз тушмонъёслэсь утиз-возьмаз. Ожгарчи эксэй Буланлэн анаез ашкеназ выжыысь вал. Соин, шӧдске, аслаз анаезлэсь кылзӥськыса, нош анаез сьӧрын валамон ини кинъёс сылӥзы, Булан выжиз иудей осконэ. Нош куке ожгарчиослэн валтӥсьсы кыӵе ке осконэ выже, соку вань ожчиос но со ик осконэ выжо. Озьы Хазар каганатлэн вань ожчиоссы йыразы «ӵуж чалмаос» дӥсязы. Нош Буланлэн выжыысьтыз Обадийлы аслаз ожчиосыныз кылиз на Семандрысь каганэз гинэ улляны но ассэ «эксэй-бек» карыны. Озьы иудейёс каръяськизы хазар каганатэн кузёяськыны, соку ик асьсэ кие кырмизы вань вузаськон сюресъёсты, вань вузаськон катъёсты тӥяса, асьсэлы коньдон дурыны кутскизы. Валамон, соослы туж уг кельшо вал Инкуазен, Инмарен улӥсь, асьсэ выжыоссылы оскись калыкъёс, соосты соос кема ик улытэк уаръёслы берыктӥзы. Озьы кутскиз Юнона-Варфаламеяез ултӥян, уллян, вӧсяськон интыоссэ солэсь таркан. Учконо ке Римысь христианъёслэн мукет христианъёслэсь храмъёссэс тӥянъёссы, ӝуатонъёссы но хазар ашкеназъёслэн тапалась калык осконъёсты тӥямзы номырин ог-огзылэсь ӧз висъяське. Нош со «сьӧдъёс» сярысь, «кащейёс» сярысь малпаськытэ… Татысен кутскизы ашкеназъёслы пумит султэм калыкъёсты, ымазы ӵыжатэм узвесь киськаса «буйгатонъёс» но мукет кӧшкемыт ужъёс. Варфаламеяез соослэсь утьыса шуак нуизы тапала булгаръёс доры, собере Арсавылэ. Но Инмар но ваньзэ адӟе, быдэс даур пала тапалась калыкъёсты курадӟытыса возизь ашкеназъёс вылэ со келяз Киевысь Святославез, кудӥз «инмар тыл» кадь ӵушказ соосты, ваньзы соос, берпалзы ӝуаса, кин кытчы пегӟизы… Но тросэз булгаръёс доры вуизы, нош булгаръёс дорысен кузонысь бигеръёс пӧлы пыӵазы, нылъёссэс бигер пиосын, пиоссэс бигер нылъёсын герӟаса. Ӵапак соин табере бигеръёс ваткаос шоры кырыж учкыны кутскизы, соин туж ярато ведаосын улӥсь югыт калыкъёсты уар карыса, арабъёслы, крымъёслы османъёслы-туркъёслы вузаны… Угось урод вир ӟечсэ малы ке ворме… Юнме шат ашкеназъёсты уллям бераз, Хазар каганат, аслаз бырон азяз, нош ик ӝутскыны кутскиз, нош Юнонатэк ӝутскемез солэн ӧз луы ни. Юнона вӧзын ӝутскиз Идель но Ватка вӧзысь Булгар кун. Табере тон ачид валаськод, малы утчало Зарни Мумез, малы солы Бату хан, кык Зарни Валъёс лэсьтыса кузьмаз…

– Малы Бату хан солы Зарни Валъёсты кузьмаз? – алэсьтыз валамтэзэ тодэмез потӥз Камитлэн.

– Малы ке шуоно Мумы Инмарлэн котьку вал кык валэз. Асьме палась адямиос, сарматъёс, скифъёс ӟеч тодо вал кык вало Инмар Кышнозэс. Нош Бубы Инмаръёс вуэмен, Мумы Инмаръёс улӥе уськытэмын вал. Табере Шунды Бубы Инмарлэн – кык Валъёсыз, нош Зарни Мумлэн ӧй вал нокыӵе валэз. Соин ик Бату хан тупатӥз инбам тылмес, эгрегормес…

Камит воксё вунэтӥз кадь сиёнзэ. Ымыз куакалэн кадь усьтӥськиз. Зарни Мумез «Юнона» шуон гудыртэм кадь со пыртӥ ортчиз, Юнона Монета со коньдон люкась, коньдон шуккись инмар кышно. Солэсь азвесь яке зарни коньдонзэ котькуд вузчи нуллэ вал вузаськон сюресъёс вылын. Ма, али но, генуэя вузчиос кадь ик, тросэз тапалась вузчиос гадязы ошыса нулло Юноналэсь коньдонзэ… Нош Варфаламея ачиз Юнона ке, соку валамон малы сое «Зарни Мум» шуо, малы сое сокем урмыса ик утчало «сьӧдъёс»… Со сьӧрын собыдӟа улон-вылон, сомында вузаськон сюресъёс пыртӥ лыктэм но люкаськем дунне узырлык… Вылаз ик со та асьме Арсавыл Музъемен гинэ герӟаськемын ӧвӧл, со вань инсьӧр дуннеосысь вузаськонэн, югытъёслы кужым люканэн герӟаськемын. Озьыен, сокем кужмо тушмонъёс сое утчало… Нош со озьы ке, Узыбей кӧшкемыт югдуре шедемын. «Бон, монэ трос вӧсь каризы…» – шуиз вал Камитлы Варфаламея… Озьыен ваньмыз та шонер… Кионваллэн верамысьтыз ваньмыз сэраське-бураське…

– Крон! Крон! – вазиз  писпуос вылтӥ секыт лобись кырныж.

Камит куаляк усиз. Номыр кырныжлы ӧз шу. Со валаз, кионвал юнме ӧз ӝут та вераськонэз.

– Но Узыбеез Кузонэ нокытчы ватыны уз луы ук, котькыӵе пеймыт сэрегзэ но со югдытоз Зарни Мум борды мозмонтэм лякиськеменыз… Малы ке шуоно Кузон со пияла кадь, котькуд тунолы пыр адӟиськись… – шара малпаськыса юаз Камит кионваллэсь.

– Югдытоз… – соглаш луиз кионвал. – Тон малпаськод, Узыбей но Кузонын?..

– Мон малпасько,  со одно ик татын луыны кулэ!

– Малы? – выжыятэ кионвал.

– Вот сое ик асьмелы тодоно, малы со татын… Малы Палэсмурт но Кизили Пурт но та интыез бырйизы?..

– Тон монэ йыромытӥськод…

– Ӵапак со йыромон бордын ик ужпум. Асьмеос табере пугырлы бодыен ветлӥсь синтэм сюресчиослы пӧрмытэмын… Узыбей уг адӟиськы, мынам сое нокызьы адӟеме уг луы… Акаша но мыным ӧз усьты сое… Озьыен, «йыромонэз» ортчытэк, югдурез вормыны ум быгатэ. Кузон пыртӥ «йыромыса» ортчыны кулэ: мон но, Узыбей но, Явуш но, Япанча но. Ачиз Кузон табере асьме азьын «Чутыри-Куалялюльы»… – нош ик кикурысьтыз вурыссэ корма Камит. Собере Палэсмуртлэн керттэтысьтыз куалялюльызэ поттэ… – Мон пайми вал, малы Палэсмурт та керттэтаз зарезь куалялюльы понэм…

– Тон шуыны турттӥськод «Куалялюльы» Лабиринт сярысь вера? – шӧдтэк шорысь юа кионвал.

– Лабиринт со Дедаллэн юри лэсьтэмез. Нош «Куалялюльы» ас понназ зарезьлэн кылдэмез… – валэктэ Камит, собере Кизили Пуртсэ поттыса куалялюльыезлэн йылсаськон палаз пичи усьто лэсьтэ. – Нош Кузон со туж вашкала «Куалялюльы». Та «Лабрес Чутырилэн» выжыез туж кыдёкысь ар калыкъёс дорысь потэ… Со кионэз улэп кутыны лэсьтэм «Кенер Котыртэт» кадь. Кион, кылсярысь, кенерлэн шораз думем ыжпи доры пыре, нош кык кенер вискы сюре, кытысь потыны уг быгаты. Озьы ик туннэ но Кузон сыӵе ик «Кенер Котыртэтлы» берыктэмын. Шораз солэн ыжпи интые «зарни» понэмын, вань «кыйёс» отчы мед нюжтӥськозы шуыса, кытысь потэмзы соослэн уз луы ни…

– Ваньзы Курбон Тылын пырсалозы?.. Со кенерез ӝуатэмзы бӧрсьы?..

– Эшшо кызьы пырсалозы…

– Нош асьмелы одно ик потоно…

– Асьмелы одно ик потоно… – пальпотэ Камит.

– Лабиринтэз лэсьтӥз грек Дедал, нош усьтонэз, пе, солэн «Куалялюльы» вал, кудзэ гадь вылаз ошыса нуллӥз… – тон кыӵе ке герӟетсэ татысь валаськод-а?.. – нош ик юа кионвал.

– Герӟетэз отын «сӥньыс но вень». Ширъяса эктонын кадь…

– Мон ӧй вала?.. – пайме кионвал.

– Ма, кызьы тон валалод, тон кион вал ук, нош табере – кионвал. Учкы ай, кыӵе чебер кылшудон кылдэ: «тон азьвыл кион вал, нош табере – кионвал»… Мон валасько, тон ноку шунды сиен – «шунды сӥньысэн», «шунды венен» тулыс гурезь бамалын пичи дыръяд ӧд шуды. «Зарни бугорез» но сэраса ӧд шуды, «ыжпи» доры пырем «кионэз», «чутыри кенер» котыртэтысь ӧд мозмытъя. Тон угось Дедал песятай доры но аслэсьтыд «бурдъёстэ» шедьтон амалэныд вуид, кудӥныз со, Икар пиеныз ӵош, Минос эксэй дорысь пегӟиз… Нош мон со доры вуи «шунды сиез» куалялюльы пыртӥ поттон понна. Ми сӥньысэз, Дедал кадь ик, кузьыли борды думыса, зарезь куалялюльылэн векчи усьто палаз чечы зырӟиськомы вал, собере синьысэз кыскись кузьылиез, куалялюльы пушкы лэзьыса, кырӟаськомы: «Шундые, пот, пот, мон тыныд чечы сёто!». Нош кузьыли, Шунды кадь ик, куалялюльы пушкысь векчи усьтотӥз, сӥньысэз кыскыса, чечы доры потэ вал… Палэсмуртлэн кышет керттэтаз куалялюльы сяна тани сӥньыс но вань, бугор но, чечы но.

– Иське, «Вень» со тём пеймыт инбамысь «Кизили» луэ, нош музъем вылын – «Кузьыли»?.. – пайме кионвал.

– Бен вань отын но герӟетэз. Индра Шундыез мозмытыкуз Кузьылилы но пӧрмиз Вритра доры пырон понна. Вень со Шунды-Кизили. Нош Шунды со Йыр. Нош Йыр – Югыт Тыл, нош Югыт Тыл – Йырвизь! – пальпотэ Камит. – Ярам, «вал йырвизе мынам», кыӵе Туй нунал отын мынэ, сокем трос калык люкаськемын ке?.. Кызьы сое, «Ош базарез усьтӥсь туез» мукет сямен верало, тодӥськод-а? – кионвалэз шоры кескич мыньпотэ егит туно.

– Мон ӧжытак шугъяськисько вераны, – синъёссэ кузёез кадь ик кескич кыньыртэ кионвал. – Но кырныжлэсь верамзэ санэ басьтоно ке, ӟучъёс та нуналъёсты «Маслянница» шуо кадь…

– Вот угось! Ачиз Шунды Куалялюльы пушкысь воректӥз! – мынекъя Камит.

– Нош асьмеос кызьы сое нимаськомы? – кузёез шоры учкыса юа кионвал.

– «Масленница» туй ке мынэ, нырысетӥ табанез «комъёслы» – гондыръёслы сётӥськомы, – бур пельпум сьӧраз табаньзэ зыргалтэ Камит. – Иське, асьме сямен ке верано, «Ош сайкан» шуиськомы та нуналъёсты, Ош сайка но Шундыез мозмытэ… Соин толэзез но солэн Оштолэзь.

– Нош ӟучъёс «первый блин комом…» шуо ук… – пырсъе валкион.

– Мар зэм со зэм! «Первый блин комам!» луыны кулэ… – пальпотэ Камит. – Вунэтӥзы, «комъёс» гондыръёс шуыса… Тани, кемалась ӧвӧл асьсэды «перма» калык шуись ӵыжы-выжыосмы но табере асьсэды «комиос» шуо ни, чик уг тодо, кин бордысь калык ним басьтэмзэс. Гондырез соос «ош» шуыса гинэ тодо. Нош «перма» кылысь гондырзэ но, гондыр музъемзэ но уг адӟо ни. Татын но «Йыромон-Чутыри» кылдэмын… Котькудӥзлы «Чутыриез» ортчыны кулэ, Кузьыли кадь Чечы доры потытозь. Тодӥськод на, Нурдаган батыр, Шундыез поттыны тыршыса, инбамысь кынмем йӧосты кораны кутскиз. Кӧня ке усьто поттэмез бере, солы Чечы кулэ луиз. Со келяз Сук но Сак эгызо пиоссэ анайзы доры Чечылы. Нош соосыз кышказы атайзы доры берытскыса Чечы вуттыны, пеймыт нюлэскы пегӟизы. Озьы Нурдаган ӧз быгаты ни, чечызэ со пичи усьто доры зырӟыса Шундыез чечы кылыныз чечы доры ӧтьыны… Соин солы йӧосты туж бадӟым корано луиз, соин Шунды шорын ӝуаз. Нош Инмар сое, Шундыез мозмытэмез понна, улӟытӥз но Каргалы, тулыс куакалы берыктӥз, кудӥз котькуд тулыс выльысен асьме пала вуэ. Ӵапак та понна анайзы, Табиба Чак-Чак, аслэсьтыз пиоссэ «каргаз», пе, Уйсылы но Кикылы соосты берыктӥз, табере ноку, пе, соос ог-огзэс медаз адӟе, одӥгез ӵукна акшанын улоз, мукетыз – ӝыт акшанын.

– Тон малпаськод Дедаллэн но Нурдаганэн герӟаськем мадьёс мае ке асьмелы усьто?.. – юа кионвал.

– Усьто. Юнме уг шуо ук Дедаллэн «Куалялюльыез» Лабиринтлэн усьтонэз… – мае ке валаса пальыштэ Камит. – Кин вал со Минос эксэй, кудӥз Дедалэз Лабиринт лэсьтытӥз?

– Со вал Зевслэн но Европалэн пизы.

– Озьы. Зевс валамон кин. Нош Европа?

– Европа финикия эксэйлэн нылыз. Шуо, солэн нимыз герӟаськемын «Шунды пуксёнэн»… – валэктэ кионвал.

– Озьы… Зевс «югыт» дуннеен ке герӟаськемын, Европа герӟаськемын «пеймытэныз». Солэн нимыз берыктӥське «Пуксёнэ пырон». Озьыен Минос пӧлы кык дуннелэн ик кужымыз пыӵамын. Соин со, кык дуннез ик чакласа, калыкъёслы улон катъёс кылдытъяз. Соин ик кулэм бераз но сопал дуннеысь Судэн кивалтэ. Нош ужпум солэн кышноез бордын, кудзэ шуо «Пасифая»…

– Пасифая Гелиослэн нылыз луэ кадь?..

– Озьы, со луэ «Шунды Инмарлэн» нылыз. Нош Дедал трос ужъёс лэсьтӥз Пасифаялы. Соин ик, мон сямен, со ӟеч тодэ Шундыен вераськон «Чечы» кылэз. Аслаз кылдытэм Лабиринтаз пыракуз, со нырысь Лабыртэ вылэм Лабиринтэ пырон кылъёссэ. Мон малпасько, соиз но Шундылы кырӟан кылъёс луо… Угось Лабиринтэз Шунды гинэ югдытыны быгатэ… Шундылы кырӟатэк сое ортчыны уг луы…

– Тон малпаськод, со Шундылы кырӟан кыл «Чечы» пуштросэ ватэмын? – пайме кионвал.

– Ӵапак со сярысь ик мон верасько. Нош сое умой валан понна кошкыны кулэ визьмолэсь но визьмо Квасир доры. Ачиз Квасир кылдэм Ванъёслэн но Асъёслэн кусыпсэс тупатыны сэбед ортчытыса лянэсэ сялам бервылзылэсь. Кинъёс со Ванъёс но Асъёс? Соос зэрпалъёслэсь пичигес луиллям. Ванъёс но, Асъёс но ог-огзылы ӵыжы-выжыос вылӥллям, малы ке шуоно кыксылэн ик вирсэръёсазы вашкала зэрпалъёслэн, йотунгъёслэн, вирзы бызе вылэм. Ванъёс «Ваннапалан» улӥллям, нош Асъёс, кинъёс бордысь арсавылъёс но кылдэмын, улӥллям «Уллапалан». Озьы ке но соос куспазы ӵемысь тэриллямтэ, ожмаськиллям. Нош Квасир кылдэм бераз ик соослэсь кусыпъёссэ тупатэм. Со ачиз туж пичи мугоро ке но, визьмыз сокем бадӟым вылэм. Вань юанъёслы валэктон сётыны быгатэм. Ванъёс но Асъёс вискысь кусыпсэс тупатэмез бере, Квасир Асгардысь кошкем огшоры калыкъёсты дышетыны, нош соосыз, сое укыр пичи мугоро карыса, кылзӥллямтэ. Соку Квасир кошкем музъем улын улӥсь карликъёс доры. Отын со пумитам кык «дверг» агайёсты. Фьялар но Галар туж вожъясько вылэм солэн йырвизьмызлы. Соос Квасирез пумитам беразы ик вииллям но, Асъёслы шуиллям: Квасир аслаз уно визьмызлы чидатэк кулӥз. «Дверг» яке «цверг» агайёс Квасирлэсь вирзэ чечыен сураллям но лянэсъёсы тыриллям. Ӵапак сое шуиллям «Акынъёслэн Чечызы», угось кин гинэ уг веръя вылэм сое, соку ик акын луыса кырӟанъёс кырӟаны кутскем. Но та карликъёслэсь йыружзэс адӟем Гиллинг зэрпал. Урод гномъёс, асьсэлэсь йыружзэс ватон понна, Гиллингез но виилям. Но урод ужъёсты ватыны уг лу, ваньзэ тае адӟем Гилинглэн бадӟым пиез Гуттунг зэрпал, кудӥз цвергъёслэсь «Акын Чечызэс», атайзэ виемзы понна, аслыз басьтэм. Асъёслэн валтӥсь инмарзы, ваньзэ тодӥсь-чаклась Один Гуттунглэн «Бауги» нимо выныныз ӵош пырем та зэрпалъёслэн улон гурезь гутёязы. Гуттунглэсь «Гуннлед» нимо нылзэ, кудӥз атаезлэсь косэмзэ быдэстыса возьма вылэм «Акын Чечыез», Один, воргорон мугорыныз пӧяса, вань «Акын Чечыез» юэм но Асгардаз кошкем. Гуттунг Одинлэсь «Чечызэ» лушкамзэ тодыса, со сьӧры бадӟым тылобурдо луыса уйиськем. Но Один быркытлы берытскыса быгатэм ик Асгардаз вуыны, но сюрес  вылаз со кӧня ке «Чечызэ», берпалтӥз поттоно луэм, бадӟым тылобурдо медаз сое суты шуыса… Асгардаз пырыса, Один вань «Акын Чечызэ» зарни кувшинэ бушатэм но сое аслаз пиезлы, акынъёслэн инмарзылы, Брагилы, сётэм. Со дырысен шуо, зэмос акынъёс луо соос гинэ, кинъёслы инмаръёс «Акын Чечыез» веръяны сёто. Нош кинъёс веръязы Одинлэсь быркыт дыръяз берпалтӥз виям чечызэ, соос буш жингырась акынъёс гинэ луо…

Кионвал куаныса ик кылзӥз Камитлэсь «Квасир но Акын Чечы» сярысь мадемзэ.

– Мынам пельёсы ик эзылӥзы тынад та мадемедлэсь! – вань сюлмыныз шумпотэ кионвал. – Мынам мар но со та сярысь кылэме вал, нош таӵе быдэсо но чебер мадемез нырысьсэ кылӥсько. Тон, Камит, зэмос Акын кадь мыным али усьтӥськид…

– Мон сое верай озьы, кызьы песятаелэсь кылӥ. Но тае кылэме берам, мынам быриз Акын луон мылкыды… Мон валай, кыӵе акынъёс пӧлысь вылэмме… – пальпотэ Камит.

– Оло тон астэ укыр ини ултӥяськод?..

– Уг, мон верасько сое, мар вань… Акынъёс дорозь мыным кыдёкын на… Тани Дедал, со вал зэмос Акын… Солы инмаръёсын сётэмын вал «Акын Чечы». Сое ачиз Афина Паллада вань ӧнерлыкъёсты усто тодыны дышетӥз. Соин Дедаллэсь лэсьтэм скульптураоссэ Афинаын улӥсь калык пыдъёстӥз думылэ вылэм, медаз пегӟе шуыса. Угось сокем соос «улэпесь» вылӥллям, лул ке пушказы пыре, соку ик улӟо, пегӟо…

– Но Дедалэз малы ке Афинаысь уллязы ук?..

– Дедал аслаз агаезлэсь Талос нимо пизэ тодон ӧнеръёсызлы дышетӥз. Талосэз но, шӧдске, инмаръёс адӟизы, со туж ӝог дышетӥз Дедаллэсь ӧнеръёсэ. Дедал кышканы кутскиз, со сое ассэ но ортчытоз шуыса. Нош со вакытэ солэн уг поты вылэм ассэ улэ кельтэмез. Соин со Талосэз ӝужыт из ярдурысен мур кыретэ донгем… Но Афина сётымтэ солы дышетскисьсэ быдтыны, Талосэз, муньылонэ усьыкуз, луд куреглы берыктэм. Афинаысь «Суд-Кенеш» солэсь йыружзэ шараям бере, Дедал Афинаысь пегӟоно луэм. Озьы со вуэм Минос эксэй доры.

– Верало, со уно паймымон арбериосты лэсьтӥз Минос эксэйлы… Тужгес но солэн «шунды инмар» кузпалэзлы Пасифаялы… Малы, малпаськод, со Пасифаялэн дурыстэм гомӟем мылкыдызлы юрттӥз, кудӥз визьтэммемын вал Посейдонлэн Минослы кузьмам «Тӧдьы Ошез» улэ выдыны?.. Со тодэ вал ук, Минос та сярысь тодӥз ке, солы ӟечсэ солэсь возьмано уз луы  шуыса?..

– Дедаллэн кемалась пегӟемез потэ ни вал Минос дорысь, угось со тодэ вал Минос сое ноку ас дорысьтыз уз лэзьы, ялан «уар» карыса возёз… Дедал огназ ке луысал, со кемалась пегӟысал. Но солэн «уар кышномуртлэсь» пиез вордскиз… Солэн потэ вал пиеныз ӵош пегӟемез… Нош Крит шормуӵысь пегӟон сюрес одӥг гинэ вал – омыртӥ. Зарезьтӥ сое Минослэн зарезьчиосыз кырмысалзы… Нош омыртӥ лобон понна бурдъёс кулэ вал… Нош бурдъёссэ Шунды медаз суты шуыса тодоно вал Шундылы веран «Чечы» кылъёсты… Мон малпасько, ӵапак со «Чечы Кылъёсыз» тодон понна, Дедал Пасифаялы пулэсь но скал кулэсь ньыль питырано скал мугор лэсьтӥз но со пушкы «шунды инмар» кышномуртэз интыяз, мылкыдзэ мед быдэстоз шуыса.… Озьы Пасифая вордӥз ош ымныро, адями мугоро «Менотаврез»… Тае тодыса Минос Дедалэз но, солэсь Икар пизэ но кечат сьӧры ворсаз… Менотаврлы «Лабиринт» лэсьтытӥз… Но Дедал бурдъёс лэсьтыса пиеныз ӵош пегӟиз…

– Нош малы, иське, Икарлэн бурдъёсыз ӝуазы, Дедал Шундылы веран «Чечы Кылэз»  тодэ ни ке вал?..

– Дедал тодэ вал, нош Икарлэн нокызьы но йыраз воземез ӧз луы со «Чечы Кылъёсты», угось со «уар кышнолэн» пиез вал… Соин Дедал пиезлы ялан валэктыны тыршиз, зарезь доры ке матэктӥд, бурдъёсыд котмозы, зарезе усёд, нош Шунды доры матэктӥд ке, бурдъёсыдлэн тылыоссэ возись сюсьёсыз ӵыжалозы шуыса… Со Икарзэ ялан возиськыны косӥз ас вӧзаз. Нош Икар ӧз быгаты пумитъяськыны Шундылэн кыскись кужымезлы, малы ке шуоно ӧз быгаты вераны «Чечы Кылэз». Соин со «атай! атай!» кесяськыса кошкиз выллань, нош сое Дедаллэн, Шунды сиослы луыса, адӟемез ӧз луы… Икар, бурдъёсыз ӝуаса, зарезе усиз… Дедал сое отысь поттыса, бӧрдыса-бӧрдыса шормуӵе ватӥз, кудзэ али ке но Икар шуо…

– Нош мар муген Дедал «кузьылиез куалялюльытӥ сӥньыс кыскытӥз»? – нош ик тунсыкъяське валкион.

– Дадал пизэ ватэмез бере вуэ Кокал нимо эксэй доры. Соиз но сое ӟеч пумита, малы ке шуоно Дедаллэн нимыз котькытын тодмо вал. Нош Минос нокызьы ӧз буйга сокем ӟеч ӧнерчизэ ыштэмен. Со котькытчы иворчиоссэ келяз, туж бадӟым кузьым сётоз шуыса со эксэйлы, кин быгатоз зарезь куалялюльы пыртӥ сӥньыс кыскыны… Кокал та иворез кылыса ӝуатскиз, бадӟым кузьым басьтэмез потыса. Куриз Дедалэз юрттыны. Дедал юрттӥз. Минос соку ик валаз, куалялюльы пыртӥ сӥньысэз кыскыны Дедал гинэ быгатоз шуыса. Угось Дедал озьы нуллэ вал гадьысьтыз Куалялюльызэ. Соин со вуиз Кокал доры но, кузьымзэ сётон интые, куриз солэсь ас азяз Дедалэз поттыны. Кокал, валамон ини, нокыӵе Дедалэз мон уг тодӥськы шуиз. Туж ӟеч куноямез бере Минослы со мунчо эстӥз. Нош мунчоын солэн адямиосыз Миносэз пӧсь вуэн пӧсьвуаса виизы… Озьы Дедал Кокал пыртӥ эрик басьтӥз, туж трос ужъёссэ собере но лэсьтӥз на…

– Нош Нардуган батыр малы, Шундыез мозмытыса, «Каргалы» соку берытскиз, малы кузпалыз но собере нылпиоссэ «каргаз»?.. – пальпотыса юа кионвал.

– Нурдаган батыр Шундылы «Чечы» ке сётысал, Шунды небӟысал, солэн ӟырдыт тылыз сое «Каргалы» ӧй берыктысал. Котькин яратэ, куке сое «вӧяло, чечыяло»… Нош пиосыз солы «Чечызэ» ӧз вае, нюлэскез шобыртэм сьӧд уйлэсь кышказы… Нош Карга со Карга, «карганы» гинэ быгатэ…

– Тон шуиськод нылпиоссэ Карга «каргаз»? Мадьёсын кузпалыз «каргаз» шуэмын ук?

– Быгатоз шат анай нылпиоссэ «карганы»? Табиба Чак-Чак со синучкон кадь пиштытӥз гинэ картэзлэсь но Шундылэсь сиоссэ. Угось «Табиба» яке «Таба» синучкон шуэмез вера, кыкетӥ пуштросэз «Табиба» нимлэн «эмъясь», малы ке шуоно туноос али ке но «табаен» кыско висисьлэсь висёнзэ, собере сое «табаен» ик келяло отчы, кытысь со лыктӥз… Озьыен Каргалэн шунды сиосын ӵош лыктэм кужымез, «Табиба» доры вуыса, пиосыз доры кошкиз… Малы ке шуоно, соос понна Нардуган «Каргалы» берытскиз…

– «Карга» сярысь, кылыса табере мон тон понна амалтэк кышканы кутскисько. «Шундыдэ» Кузон «Куалялюльы» пушкысь шедьтыса тон вылэ но уз усьы-а Нардаганлэн, «Шундыез вордскытӥсьлэн», учырез?..

– Уз, эше, эн кышка… – пальпотэ Камит. – Угось мынам та кутэтам Палэсмуртлэн кузьмам «Чечыез» но вань… Нош со огшоры чечы ӧвӧл… Я, мар, соку кошким Эске Базаре?.. – шулдырак юа со, кикурысьтыз пурт бервылзэ кормаса.

Кионвал мӧзмыт серектэ…

– Ӧвӧл, Камит, табере асьмелы люкиськоно луоз…

– Малы? – пайме Камит.

– Мон алэсьтым ужме быдэстӥ… Кылемзэ сюрестэ тон огнад ортчыны кулэ… – ӝожмыт валэктэ кионвал. – Мыным Кузонэ пырыны косэмын ӧвӧл… Мынам эшъёсылы но озьы ик…

– Нош мон косӥ ке? – юа Камит.

– Тон косӥд ке но, Камит, номыр уз воштӥськы… Мон мувыр сьӧры потӥ ке аслам дуннеям ышо… Мынам «Кыл Бугорылэн, Кылам Бурелэн, Каламбурелэн» гожтэмез сыӵе… Мынам Бугоре, Бубы Горе, котькудӥзлэн Бубы Горез кадь ик, уг быгаты гожтымтэез сьӧры потыны… Нокинлэн уг луы ортчемез созэ, мар гожтэмын ӧвӧл… – валэктэ кионвал. – Тодӥськод-а, малы тынад киыд лыдэ?.. – шӧдтэк шорысь юа со.

– Уг… Ачим но паймисько…

– Малы ке шуоно, кыдёкын ик ӧвӧл, эшъёсыд тынад… Шӧдске, соос но Эске Базартӥ ветло. Кикуредлэн калленгес яке вӧсьгес лыдэмезъя тон ӝог соосты шедьтод…

– Тӥни, иське, малы соос лыдо… – вал вылыстыз васькыса мӧзмыт лулӟе Камит. – Мон уг яратӥськы люкиськыны… – кык киыныз ик валэзлэсь чыртызэ ӟыгыртэ Камит.

– Мон но уг яратӥськы, но мар карод, люкиськытэк амал ӧвӧл… – лулӟе кионвал. – Мын, вамышты, шедьты «Шундыдэ», эн берытскы «Каргалы»…

– Уг, «Каргалы» уг берытскы, визьмо кионвалэ мынам, тау тыныд ваньмыз понна!

– Тыныд но тау! Мон ноку уг вунэты ӵошен ортчем сюресмес… – бӧрдыса кадь учке Камит шоры кионвал. – Тыныд но тау, Прохор! – вазе кионвал нюлэс шорысь писпуос вылэ учкыса.

– Аслыд но тау, Кышкасьтэмкион! – пальпотыса писпу вылысь ваське бабасыр.

– Прохор, ку тон вуид, ку отчы тубӥд? – пайме Камит.

– Тӥлесьтыд азьлогес… – серекъя бабасыр, Камитэз ӟыгыртыса, валэсь кымессэ маялтыса. – Ма, монэ но Палэсмуртлэн тупез татчы ик сэрпалтӥз… Шӧдске, кулэ луо ай мон тыныд «Шундыдэ» утчаны… Мон вань вераськемдэс кылзӥ, «Дедалэн Икар» сярысь но, «Квасирлэн вирызлэсь сурам Чечы» сярысь но, «Нардуган-Карга, Табиба Чак-Чак, Сук но Сак» сярысь но… Оглом мон тодӥсько, кыӵе ужпум асьме азьын сылэ «Кузон Базарын»…

– Малы тон соку ик ӧд поты? – юа Прохорлэсь Камит.

– Чебер вераськемдэс кылзӥ… Люкиськондэс возьмай… – пальпотэ бабасыр. – Малпай, ӝожомон мылкыддэс люкиськон шорады шулдыргес карыны…

– Тау, Прохор, мыным капчи луиз тонэ адӟыса. Табере Камит огназ уз кыльы. Луоз солы кинэн вераськыны, кинэн кенешыны… – пальпотэ кионвал, Прохор борды чыртызэ зырӟыса… – Визьмо ик тон, бабасыр Прохор…

– Ма, тӥ но солэсь Инмарен люкемын ӧвӧл, мон ӟеч валай сое писпу вылын пукыкум. Тӥляд «Чечы» сярысь вераськонды мыным кельшиз, малы ке шуоно туннэ татын ваньзы Ошлы «шертовать» каро, нош Ош ачиз но «Чечыез» тодэ ук, юнме шат  ӟучъёс «Медведь – мёд ведаед» шуо… Оло ӵапак соин Камитэз татчы Кизили Пурт ыстӥз?..

– Озьыен, Камитлы одно ик веръяно Ошлэсь вирзэ, Ошлэсь сӥльзэ, соку солы усьтӥськоз «Кузонлэн Куалялюльыез»?.. – шара малпаське кионвал.

– Ӵапак сое ик мон верасько… – пальпотэ Прохор. – Камитлы гинэ ӧвӧл, куиньназылы ик пиослы нырысь ик сое верьяно… Сотэк соос уз сюре отчы, кытчы соослы кулэ…

– Нош христианъёслы уг кельшы Гондыр-Ошез, Быдӟым Комез, инмар пи кареммы… – Камитэн Прохор шоры учкыса мӧзмыт валэктэ кионвал. – Асьмеос тодӥськомы, Быдӟым Ош инбамысь Ен Атаез дорысь кӧжы модостӥ музъем вылэ васькиз, нош кӧжы верямьез понна со татчы, та дуннее «Ком» луыса кылиз. Соин асьмеос, арсавылъёс, гондыр вирез – «Кумышкаез» юыса, гондыр сӥлез сиыса «Инмар Пилы» кыл сётӥськомы. Зэмзэ ке, христианъёс, асьсэос но черкъёсын озьы ик каро, инмар пилэсь, Христослэсь, «мугорзэ» сиё, «вирзэ» юо. Соин, оло, тросэз христианъёс но гондыр йыр, гондыр пыд, гондыр ку азьын «шертовать» каро. Кошким, «Быдӟым ошлэсь сайканзэ» учкыны, адӟом кыӵе сӥё-дано шулдыръяськон туй нуналъёс кузьма арсавылъёслы «Оштолэзь». Тӥ валалоды, малы та дырез «Оштолэзь» шуо, малы ар калыкъёслэн арзы «Ош сайканэн но Базарен кутске…

– Но тынад мувыр сьӧры потэмед уг луы шуид ук? – пайме Камит.

– Озьы… – пальпотэ кионвал. – Но сюресэз котьку пумозяз ортчоно… Озьы ук Прохор?

– Озьы, Кышкасьтэмкион… – ас манереныз пальпотэ Прохор бабасыр. Угось солы но табере адӟиськисьтэм луоно. Табере Камит гинэ сое адӟоз ни. Нокин сое арсавыл туно сяна Кузонын уз адӟы.

Валкион азь пыдъёссэ ӝутыса кык пыд вылаз султӥз но, ӧжытак гырдалтэм карыса, азьпалась мувыр вылэ тубиз… Ой-ё-ёй! Макем чебер суред усьтӥськиз соос азе. Куинь батыр лулъёс быдэсак выёмизы со чебер но паськыт дунне пӧлы, сюлэмъёссы шумпотыса йыгаське… Куаныса соос учкыло сопала но, тапала но. Нош кионвал, жаляса верано, омыре ышыны кутскиз ни, озьы ик Прохор но, Палэсмуртлэн ӧсъёсыз но огез бере огез шонерскизы…

– Кытыназ татын «Чутыри»? Малы та йыромонэз одно ик ортчыны кулэ? – паймыса чаклаське Камит, мар меда табере азьпалан сое возьма? Узыбейлэн ненег ымнырыз, мусо шоканэз, ассэ тодэ вайытыса, нош ик со азе лыктӥз… Лыктӥз гинэ ӧвӧл, тэбиниз, люконтэм, палэнтонтэм лякиськиз. Чечылэсь но ческыт зын вӧлске со бордысь… Камит шӧдэ ни солэсь бордаз лякиськем мугорзэ, пӧсь ымдуръёссэ, ческытлэсь но ческыт чуп каремзэ. Шӧдтэк шорысь со валаны кутске «Чечы» доры кыстӥськись «Кузьылилы» берытскемзэ…

– Эн курадӟыты монэ, Инмаре… – сюлворе Камит. Но Узыбей уг кошкы, палдэм муш кадь котыраз поръя солэн уно-уно уноям муш мугорыз, Камитэз вылэ муш палэп кадь пуксьыны медэ… «Малы меда муш палэп кадь? – пайме егит туно, но соку ик вала. – Бен, мукетыз дунне кутскиз… Татын ваньмыз мукет сямен луоз… Эй, кытын-о тӥ? – котыр чаклаське Камит, угось со адӟытэк кылиз эшъёсызлэсь ышемзэс.

– Мон татын… – нош ик усьтӥськиз Прохор бабасыр. – Табере, Камит, тон гинэ монэ адӟод ни, мукетъёсыз уз адӟе… Валкион но ас дуннеяз ышиз…

Камит вань кужмысьтыз ӟыгыртӥз бабасырзэ.

– Ярам, гожтэмез озьы бере, мар карод… Кылемзэ сюресме кыкнамылы ортчоно луоз ини, иське… Камитлэн Кизили Пуртэз куссэ ик шунтэ. Вурысо киыз но сокем зол лыдэ. «Озьыен пиос но татын, Япанча но, Явуш но…» – пальпотэ Камит выль шӧдонъёсызлы сётскыса. Камит шӧдэ, Палэсмурт но пальпотэ… Зэрпал но… Валкион но… Вӧзаз сылӥсь бабасырез но…

Нош озьы ке но, Быдӟым Кузонлэн но аслаз бадӟым мылкыдыз вань ук, аслаз ӟечбуръяськонэз, аслаз ӟыгыртонэз, тужгес но «Ар кутсконэз» – Быдӟым базарез усьтон азьын, Быдӟым Ошез данъяса шулдыръяськон нуналъёсы вань калык воштӥське. Соин ик Камит но, солэн бабасырез но ӝоген быдэсак сётскизы шулдыръяськон туй нуналлэн куронъёсызлы. Нош Узыбейлэн чечы зынэн тэбинись лул сульдэрезлы палэнсконо луиз. Мукет сямен вераса ас пушказ кыскиз Камитэз бызгетӥсь, эктӥсь-кырӟась калык нурдаган ӧр. Сое нокызьы палэнтыны уг лу вал. Кызьы уг лу палэнтыны Музъем Ошез – Одӥг Сюро Валэз,  «козара» кылэз, кудӥз борды, чечы доры мушъёс кадь кыстӥсько «казан, казар, казак» кылъёс. Угось ӟучъёс «идёт коза рогатая» шуыса нылпиоссэс уг кышкато вал, соос шуо вал «идёт козара рогатая», нош «сюро козара», сюро ош кадь, музъемез бышкалтэ но поттэ – масаръёсты, маскар-мескаръёсты, мишаръёсты, мадьяръёсты, массагетъёсты но уно мукет эрико лудвыл казакъёсты но арсавылъёсты… Нош ваньмыз шорын мыняса сылэ вашкала арийёсты тодӥсь Маскара вырйыл, кытчы дырын-дырын патало Зарни Мум, Одӥг Сюро Вал, но соос сьӧры ветлӥсь булган йыръёс…

Гужлась калыкез кылзэмъяз Камит валаз, Кузонын мынэ ни вал «Айдыргон» гондыр туйлэн витетӥ нуналыз.

– Бон, кызьы сотэк, Палэсмуртлэн ваньмыз лыдъямын… – ас понназ серектӥз Камит. Угось гондыр туйлэн витетэ нуналаз ульчаосын одӥг кышномурт но уг кыльы, вань сыӵе вужкат, кышномуртъёслы уг яра оштуйлэсь витетӥ нуналзэ адӟыны. Кышномуртъёс оштуйлэн ньылетӥ нуналаз шунды пуксён азьын ваньзы чолак ышо, собере куатетӥ нуналаз гинэ ӟардон азьын ульчаосы пото, пеймыт кылем дуннеез югдытыса.

– Мон та Узыбеен куаӵ-куаӵ шумпотыса но ӧй ву, нош сомында куректонэз оскалтӥ ини… – аслыз гинэ кылымон тышкаське Камит.

– Малпаськод, мон уг кылӥськы? – пальпотэ кыдёкысен бабасырез.

– Коть кыл, коть эн, мар зэм со зэм, булганъяськем но куддыръя потэ! – серектэ Камит.

Озьы соос ышо Быдӟым Ош сайкан туй пушкы. Кузьылиос кадь мар ке нуыса кытчы ке кыстӥськись калык соосты но, вень сьӧры кыстӥськись сӥньыслы берыктыса, бызгетӥсь но лабыртӥсь «Чутыре» кыске. Воксё мукет, куке тае палэнысен учкиськод, нош куке ачид сюриськод бадӟым «Куалялюльы» пушкы, котырысь гужлась куара но, тынад мынонэд но кыӵе ке бадӟым пуштрослы пӧрме. Зэмзэ ке Быдӟым Ошлэсь сайканзэ чик но юнме уг шуо Айдыргон. Малы ке шуоно татын уг верасько толалтэ гутёысьтыз сайкась гондыр сярысь, вераськон мынэ куке-кемалась йӧ шобыретъёслэсь кылдэм «Куалялюльы» пыртӥ потэм «Шундылэн» сайканэз сярысь, кудӥз вань дуннелы ӟеч иворзэ югдытыса  «Ӟечбур!» шуиз.

Соин ик та Оштолэзь Нуналъёсты котькуд палан туж ӟеч тодо, ваньзы сое кадырлэсь но кадыр каро, оло соин котькудӥз калык сое ас сяменыз нима: Аю, Айы, Ай, Айкай, Аюка, Аюака, Ош, Маска аяка, Маскара, Эхе, Беар, Биар, Ар, Гондыр, Айдыргон но мукет кылъёсын. Котькудӥзлэн аслаз валанэз, аслаз кадыр мадез но ачиз сямен гинэ кадырланэз. Но котькызьы сое нимазы ке но, Быдӟым Кузон кар вань буёлъёсын тылсия та бадӟым туй нуналъёсы… Кузон пӧлын но Идель вылын гинэ уг, котькуд адямилэн пушказ но…

* * *

Узыбей сайказ турын зурод вылын… Кыдёкын ик ӧвӧл со шоры одӥг гинэ укноеныз учке ӧжытак вужмем огшоры пу корка, кудӥз «Козара» кадь сылэ курег пыдъёсты тодэ вайытӥсь ӝужытэсь писпу мыркъёс вылын. Паллян урдэсысьтыз корка ӧс доры тупатэмын огшоры липет но тубатъёс. Корка азьын, нюлэс куш шорын ик лэсьтэмын гужем пӧраськон гур, со аратэмын, муръё гырктӥз ческыт зыно ӵынзэ лӧсъяськытэ, плита вылаз горшокен ву, эшшо мар ке пуке. Гур вӧзын ик – пичи ӝӧк но кык пукон ӟусъёс. Ӝӧк вылын сыло гужлась самор, нянь колды, сылал но мар ке кышетэн шобыртэм мукет ӝӧк выл арбериос. Котыр бычыра ни турын куар, ӵуж но лыз сяськаос усьтӥськиллям. Вань омырын тулыс шӧдӥське. Бубылиос поръяло.

«Тулыс?.. Кытын мон?..» – котыр чакласькыса малпаське Узыбей. Ӵапак со дыре солэн сьӧраз кылӥськиз ыж бӧксэм куара. Эксэйныл шуак берытскиз но адӟиз вить ыжъёсты. Соос зурод вӧзысь лабаз улын турын кыскало вылэм.

– Ӟечбур, нылоке мынам… – сое куаляк уськытӥз зурод улысен со шоры мяняса учкись мӧйы кышномурт. – Мон тонэ возьмай… Тодӥсько, кытчы сюремдэ тыныд валаны шуг луоз на… Но асьмелэн дырмы туж ӧжыт, малы мон доры сюремдэ каллен-каллен ачид ик валалод. Ойдо, нылоке, васькы отысь ӝоггес. Угось асьмелы «сьӧдъёслэн» ыстэм муртсы татчы вуытозь, троссэ лэсьтыса вуттоно. Палэсмурт, кызьы мон валай, тонэ мыным гинэ ӧз кельты, «кащейёслы» но вераз тонэ татчы вуттӥз шуыса… Угось со, куртчагы песьтэр, асьмелы но «сьӧдъёслы» но ужа… Тӥни котыр ӧсъёсыз тылъёсын ӟукырто. Соос возьмало кинлэсь ке татчы вуэмзэ…

Узыбей малы ке соку ик оскиськиз та ненег куараё кышномуртлы, дӥсяськемын ке но со ӧжытак куалектытӥсь дӥськутэн… Кышетэзлэн кымес шораз солэн, тӧдьы инӟыосты бырттылыса, адями йыркобы лэсьтэмын, нош гадяз сюмыс калэ сузем така ашыкъёслэсь весь нерге, нош кыкетӥ сюмыс калаз ашык быдӟаесь ик йыркобыос бырттылэмын… Куинетӥ весез оло гондыр, оло кион вазерпиньёслэсь… Мукет весьёсыз вань ватка кышномуртъёслэн кадь, ӵужо, вожо, гордо, лызо, тӧдьыё инӟыослэсь но эшшо марлэсь ке. Кипотэсъёсаз но пыдкукъёсаз но пӧртэм весьёсыз ошылэмын, бырттылэмын. Нош кӧт шоразгес но тыбыр шоразгес кык курег пыдъёс ошемын…

– Кошким, Узыбей нуноке, ыжъёс пала. Али мар луоз, тон номырлэсь эн кышка. Мон туж ӟеч тодӥсько тынэсьтыд песянайдэ, со мон доры ялан чай юыны ветлэ вал… Нимы мынам Яган, нош кин ке Яганай шуэ. Тани татын, тани та ӝӧк сьӧрын  ми трос пол песянаеныд самормес кык пол, куинь пол бушатытозь пукылӥмы. Соин ик оскы мыным. Тыныд кема улоно на, озьы синъёсад гожтэмын, ум сётэ тонэ «кащейёслы» курадӟытыны. Мон тодӥсько, мар соослы тынэсьтыд кулэ, соос тон пыртӥ Кузонлэн ватэм зарниез доры но Быдӟым Гырлыез доры вуыны туртто, угось Быдӟым Гырлы соосты ваньзэсты, дырыз ке вуиз, та дунне вылысь ӵушкалоз, быдтоз… Со Кузон улын ватэмын… Отчы Гырлы доры «эксэй вирез» нуллӥсь адями яке возьмась лул гинэ пырыны быгатэ… Со Гырлыез кин ке шуккиз ке, сьӧдъёс гинэ ӧвӧл, вань лулъёс, вань писпуос, вань турын куаръёс но бырозы, дунне буш кылёз… Соин ик ӧз на вуы дырыз со Гырлыез шуккыны. Со лэсьтэмын актык югдырлы гинэ, куке нокыӵе амалъёс уз кыле ни «сьӧдъёсты» та дуннеысь улляны…

– Нёжто сыӵе Гырлы но вань?.. – пайме Узыбей.

– Вань, нылы, сыӵеез но Гырлы вань… Табере асьме азе кышкытлык кылдэмын, угось арсавыл «эксэй ныл» пыртӥ со Гырлы доры «сьӧдъёс» но пырыны быгатозы… Быдтыны туртто сыӵе валлян оштӥрлыкъёсты «сьӧдъёс»… Я, мон верай, мае вераны кулэ вал, тырмоз кылмес огшоры лӧдыны… Дырмы асьмелэн туж пичи… Асьмелы ужмес лэсьтыны кулэ… Учкы ыжъёс шоры но вера, кудӥз тыныд тужгес но мусо потэ, кудӥз тужгес но кельше… Шонер вера… Сотэк номыр уз пӧрмы…

– Тӥни соиз, тапаласен куинетӥез… – пальпотэ Узыбей, мусо ыжъёс шоры учкыса.

– Иське, сыл кӧня ке татын… – шуэ Яганай но ыж доры вамыштэ. – Таиз-а? – юа со, ыжез сильсьӧртӥз кутыса.

– Озьы… – йырзэ мыкыртэ Узыбей.

– Кошким, чигое мынам, табере тон бадӟым лулъёс доры выжод, мозмиськоз табере лулыд пудо лул эгесэд бордысь… – ыженыз вераськыса Яганай сое лабазлэн мукет бӧлемаз нуэ. – Ойдо, нылоке, тон но татчы лыкты ай, – ӧте со Узыбеез ас дораз.

Яганайлэн ваньмыз, шӧдске, дасямын ни вал… Тусь но, ӝок но, пурт но, ошон гозы но, пыд вайян пулъёс но, калъёс но…

– Ой, акыльтӥз ни мыным та Палэсмуртлэн кык пала ужамез, ялан солэсь бервылзэ сузяно луэ… – марлы ке долаське Яганай. – Мар со паллян чиньыяд?.. – ыжезлэсь пыдзэ думонъяз шуак юа со.

– Палэсмуртлэн Зундэсэз… – валэктэ Узыбей.

– Ярам коть, Зундэссэ ке но тыныд сётэм, ой, тузысал мон сое,  ой тузысаз, пумитам ке шедиз… Вань веськырес кызьпуосме някыръяса кельтэм ук! Тӥни котыр Палэсмуртлэн Ӧсъёсыз! Возьмало соос кинэ ке, сотэк шонерскысалзы ини…

– Тӥ, Яганай апай, мар озьы карыны турттӥськоды, малы ыжез думылӥды, малы пурт кияды?.. – куалектыса юа Узыбей.

– Учкы ыжлэн синмыз шоры, синъёстэ вошъятэк учкы, валаны тыршы мар со тыныд вералоз! – чурыт вера Яганай но ыжезлэсь чыртызэ вандэ, вань вирзэ тусе виятэ…

Узыбей куалектэменыз катэм кать сылэ, сивуосыз льыр вияло. Нош синъёссэ ыжлэн синъёсыз бордысь басьтэмез ӧз луы ни, ыж синъёссэ ворсатозь ик учкыса сылӥз. Тани ыж кукъёссэ берпуметӥ ползэ ӵыжиз.

– Я, мар со тыныд вераз? – ас ужзэ лэсьтон кусыптӥз юаз Яганай.

– Тау шуиз-а, мар-а?.. Шумпотэмзэ, оло, малы ке, вераз, тау шуыса… – бӧрдыса валэктэ Узыбей.

– Иське, туж умой… – куанэ Яганай, ыжзэ сюрые ӝутыса. – Тон, зэм но «эксэй ныл»… – серекъя со. – Мынэсьтым самой яратоно ыжме бырйид…

– Мон уг тодӥськы вал, тӥ сое вандоды шуыса… – ялан викышъя на Узыбей.

– Мон тодӥсько, соин ик шумпотӥсько… – серекъя Яганай, ыжезлэсь кузэ син куспын ниыса сылалэн зыранъяз но бинялтонъяз. Собере  ӝутэм ыжлэсь кӧт пушсэ мукетаз тусе куштэ…

– Табере кылзы монэ, ваньзэ лэсьты озьы, кызьы мон курисько… – нош ик туж чурыт вера Яганай но тусьтыысь вирез кык пичи сюмыке гумыльтэ. – Тон тае, мон кадь ик, юыны кулэ! – сётэ со «эксэй ныллы» сюмыксэ но ачиз аслэсьтыз сюмыксэ син куспын бушатэ. – Мар сылӥськод, ю ӝоггес! – чурыт куре Яганай.

– Мон уг быгатӥськы вир юыны… – кӧсэктэ Узыбей, киосыз ик солэн калтыраны кутско.

– Быгатод! Кин понна, тон малпаськод, мон та ужез лэсьтӥсько? Татын мукет сямен уг лу, нуные, ваньзэ лэсьтоно озьы, кызьы кулэ, сотэк номыр уз пӧрмы, ю, ойдо! – эксэй ныллэсь сюмыкен кизэ кутыса со ваньзэ сое юытэ. – Табере киостэ пон ыжлэн сюлъёсыз борды, кылзы мар та сюлъёс тыныд вералозы. Вот тазьы, мон тапаласен киосме ляко, нош тон сопаласен. Кылзӥськом, нылы, кылзӥськом, мае соос вералозы. Сюлъёс асьмелы ваньзэ шонерзэ вералозы… Я вера мыным, мар кылӥськод?..

Узыбей паймыса кылзэ. Солэн синъёсыз я бадӟымало, я пичияло. Яганайлэн синъёсыз но солэн кадь ик ветло… Кыксы ик туж сак кылзӥсько…

– Мон адӟисько Кизили Пуртэз… – вераны кутске Узыбей. – Со монэ кыдёке ӧте, Камит сьӧры, «сьӧдъёслэн» ватосъёссы пӧлы пырыны косэ. Камитлы юрттыны косэ Палэсмуртлэн Зундэсэныз… Шуэ, Камит огназ та ужзэ уз пӧрмыты… «Сьӧдъёс» со котырын туж трос, пе, ялан котькуд паласен сое эскеро… Мон солы ӧй юртты ке,  Камитэз ӝуатозы… Остэ, яке йылсо ӵоге изьятозы… Нош ми ӵош ке луимы, ваньмыз умой ортчоз…

– Та ваньмыз шонер, ваньмыз озьы ик луоз! – оскытэ Яганай. – Учкы, учкы нылы…

– Адӟисько эксэй пуконме, со ыше зарезе бусъёс пӧлы… Со азе, Нойлэн ковчегъёсыз кадь ик, бадӟымесь карубъёс пото. Огез, кыкез, куинез, ньылез, витез, куатез, сизьымез, тямысэз, укмысэз… Укмысэтӥез сьӧрын тӧро пукон ӝутӥське…

– Ваньмыз валамон… – валэктэ Яганай. – Тынад эксэйлыкед тон дорысен укмысэтӥ выжыедлы гинэ сётӥськоз на… Соин ик улоно сюлмаськытэк, аслэсьтыд выжыостэ гажаса… Но со дыре ик «сьӧдъёс» кие сюрытэк, чамаласа улоно. Ыжлэн сюлъёсыз пыртӥ асьмеос пыримы Акашалэн Шыкысаз… Акаша асьмелы ваньзэ валэктӥз… Табере тон, мае ке тодэмед потӥз ке, монтэк но, пырыны быгатод Акаша доры… Тыныд ыжлэсь синзэ, ыжлэсь вирзэ но сюлъёсыз борды лякиськемдэ гинэ тодад ваёно луоз. Акаша соку ик тыныд усьтӥськоз…

– Мар со Акаша? – паймыса юа Узыбей.

– Акаша, нуные мынам, югыт лулъёслы гинэ усьтӥське. Акаша ваньзэ вуонозэ но ортчемзэ но аслаз кристалъёсаз-сандыкъёсаз возе. Отын вань дуннеез, вань калыкъёслэсь ортчем сюресъёссэ но вуонозэ адӟыны луэ. Отын вань эксэйлыкъёслэн ортчем сюресъёссы, кылдонзы, оглом ваньмыз, мар югыт дуннеын луиз но куке соку луоз на… Отын котькуд адями сярысь гожтэмын…

Яганай туж сак учке ыжезлэсь сюлэмзэ, пекляоссэ, сэпъёссэ но шуак мусэз доры вуэ. Тани со ыжлэсь муссэ ӝӧк вылэ поныса учке ни…

– Капчи ӧвӧл тыныд, мусокае, мус верамъя, кышкытлык ялан вӧзад ветлэ, туж утиськыса но туж чакласькыса улоно луоз… Тани таиз кышкытлык туж матын ветлэ ни… – кышкатскыса котыр учке Яганай, собере ыж сӥльзэ  юдылыса, муссэ но сюлэмзэ вандылыса со гылтэ но ваньзэ сое гурлэн плитаез вылысь горшоказ тыре. – Лыкты ӝоггес татчы. Ӝоген со вуоз.

– Кин вуоз? – пайме Узыбей, Яганай доры матэктыса.

– Со кышкытлык ваись урод лул. Сыл татын… – шуак дугдытэ сое Яганай но Узыбей котыре йырси бырттон вененыз котыр лэсьтэ. – Со тазьы тонэ шӧдоз на… Нош тазьы уз шӧды… – йырсизэ бырттон веньзэ со Узыбейлэн пуныса биням йырсияз бышкалтэ. – Пон зундэстэ бур чиньыяд! – дыртытэ со эксэйнылэз.

Узыбей зундэссэ бур ки чиньыяз понэ но омыре ыше, адскисьтэм луэ…

– Вот тазьы со тонэ уз шедьты, йырси кутон вень но тонэ туж ӟеч утёз, малы ке шуоно со аслаз Таралэн, Перунлэн нылызлэн, мыным кузьмам венез… Со туж кужмо, со котьмалэсь утёз тонэ, соин ик тон сое ноку эн ышты, улонысь кошкыкуд но нылпиосыдлы кельты, выжыысь выжые мед возёзы. Валад?

– Валай… – мар сярысь верамзэ но валатэк каллен гинэ вазе Узыбей. – Нош кызьы табере асьтэос, Яганай апай, со урод муртлэсь возьмаськоды?.. Та йырси кутэтдэс мыным сётыса, асьтэос но лябӟиськоды, дыр, ук?..

– Тон, нылы, мон понна эн сюлмаськы… Котькудӥзлэн куке-огпол вуэ аслаз калыкез понна мар ке но ӟечсэ лэсьтыса кошкон дырыз… Мон, малпасько, со мынам вуиз. Табере мон тонэ кынто… Куараед но медаз поты, шокамед но медаз кылӥськы, синвуэд но медаз усьы. Кынмы интыяд! Кынмид-а? Со урод мурт кошкем бере тон ачид ик шуналод, сыл озьы, номырлэсь эн кышка…

Узыбей ваньзэ адӟыны быгатэ, нош аслаз выремез но, номыр верамез но уг луы. Тани нюлэс куше Палэсмуртлэн одӥг ӧстӥз «озонаськиз» со урод лул. Солэн бур киыз но бур пыдыз кортлэсь, лэся, озьы ке но соос купыръясько, выро, ӟукырто. Кӧшкемыт солэн ымнырыз, бордысьтыз укыр кӧш зын лыктэ… Узыбейлэн шокамез но уг луы ни…

– Яган! Яган! – урмем кадь кесяське со котыр чакласькыса.

– Мар кесяськиськод, синмыд-а, мар-а быриз? – меӵкытэ солы Яганай.

– Тон монэн эн шуды, потты мыным чаляк Палэсмуртлэсь кузьымзэ! – куажгетэ ӝыныё корт адями.

– Кыӵе сыӵе кузьымзэ, номыр со тыныд ӧз кельты! Ассэ но мон сое ӧй адӟы! – вожез потыса кадь вера Яганай.

– Эн шуд монэн, шуисько! – чурыт кеське «озонаськем» мурт.

– Шудэм гинэ мыным уг тырмы вал кыӵе ке конгылёен! Лыктӥд ке, Конгрок, меӵак вера, мар тыныд мынэсьтым кулэ? – кеське солэн пумитаз Яганай.

– Потты «эксэй нылэз»! Палэсмурт сое тон доры кельтӥз! Мон тодӥсько!

– Кыӵе эксэйнылэз, тон мар, Конгрок?

– Тон умоен уд валаськы?!

– Коть умоен, коть уродэн, курег быж тыныд! Ӧвӧл татын эксэйныл! – чурыт вера Яганай.

– Палэсмурт ноку уг пӧяськы! –  вожоме Конгрок. – Мон адӟисько солэсь ӧсъёссэ! Озьыен со быдэстӥз верам кылзэ!

– Палэсмурт быдэстӥз, но Яганай ӧз быдэсты! Мон «озонаськытӥ» сое отчы, кытчы тон кадь зурмушъёс но тынад адями лул кужымез сюпсись кузёосыд уз сузе! Тон малпаськод, мон тӥледлы быдтыны сёто аслэсьтым югыт калыкме?..  Югыт «эксэй вирме»?

– Мон адӟысал, кин ке татысь «озонаськиз» ке! Татысь нокин ӧз «озонаськы»!

– Номыр тон ӧд адӟысалыд, номыр тон уд адӟиськы, синтэм курег! Та инты Шайтанлэн сялӟем берыз. Тон гинэ ӧвӧл, нокин сое адӟыны уг быгаты, вылаз ик Палэсмуртлэн ӧсъёсыз сое ӵоктало на! Тынад татчы пыремед но ӧй луысал, Палэсмурт ӧсъёссэ ке тыныд ӧй усьтысал. Бере тон кылид, Конгрок! Салам вера чёртъёсыдлы! Быжзэс мед сюпсёзы!

– Со татын, мон шӧдӥсько сое!

– Кытӥеныд шӧдӥськод, корт пыдыныд, корт киеныд, оло ини тынад сюлмыд но кортлэсь лэсьтэмын? Тон соос пала кошкид, соосын соглаш луон кагаз гожтӥд, кулытэк но байлыко улон понна… Ма нёжто тон али но ӧд вала, нокыӵе пумтэм улон соос тыныд уз сётэ! Кӧня арес тыныд? Нош пыдыд но, киыд но кортлэсь ини. Нош мынам калыкелэн 300 аресъем пересьёсыз нокыӵе жадёнэз тодытэк турнало, егитъёсын ӵош ю-нянь будэто! Кышнооссылэн нылпиоссы но вордӥськыло на!

– Эн мадьы выжыкыл!

– Милям выжыкылмы улэп! Ваньмыз син азьын! Сое милемлы ачиз Перун сётӥз! Нош тӥляд ваньмыз сисьмем ӟустариослэсь но сисьмем сӥньысъёслэсь вуремын! Тон вань кушез зынтӥд ни сисьмем зыныныд! Кошкы син азьысь, адӟем тонэ уг пот, ас калыксэ вузам лулэз.

– Нокытчы мон уг кошкы, нош тон, Яган, кошкод, ӧд ке потты али ик «эксэй нылэз»! Потты, шуисько!

– Улад лэзёд! Узыбеез мон кемалась келяй ни! Мон тон ӧвӧл, мон ноку уг вуза ас калыкме!

– Кыӵе калыктэ? Кытын тынад калыкед? Ӧвӧл ни со тынад, тютю! Берпум ошкуйчиосыз гинэ камъёстӥ ветло на. Нош Кузон кемалась бигеръёс киын!

– Бигеръёс киын ӧвӧл, бигаръёс киын… Шонер вера кылъёстэ, эн вошты пуштроссэ! Бигаръёс асьсэос но ляльчиос…

– Ма, котькызьы тон соосты шу, ӝоген Иоанн вань Кузондэс ӵошкатоз, ваньды тараканъёс кадь пегӟоды!

– Иоанн татчы аслэсьтыз «кыйёссэ» гинэ ӝуатыны вуттоз! Зилант гурезь вылын Курбон тыл ӝуатэмын ни, ваньды тӥ гыжкалъёс со тылын пырсалоды. Ноку Иоанн уз кушты аслэсьтыз калыксэ! Солэн калыкез солы, югыт эксэезлы, выль корка Кузонын дасяз ни!

– Иоаннлэн но пумыз вуоз. Сое Романовъёс воштозы! Вань историдэс соос ӝуатозы, мукет сямен тупатозы. Учкы Акашалэсь гожтэтъёссэ. «Иезуитъёс» ваньзэ воштозы. Иезуит Карамзин тӥледлы сыӵе история гожтоз, тӥ номыр асьтэ сярысь уд тодэ ни!

– Тодом! Ми Акашалэсь Хрониказэ ӟечгес лыдӟиськомы! Ваньмыз берытскоз! Ми ваньзэ кельтомы калыкмы сярысь!

– Кыӵе калыкты сярысь? Тӥляд кылды но уз кыльы!

– Ваньмыз кылёз! Милям Быдӟым но улэп Кылмы  Кылӥськон понна, Кылён понна кылдэмын! Кинлэн пельыз вань со Кылоз милесьтым Кылмес!

– Мынам буш кылъёстэ кылзэм но уг поты! Ӝуа, иське! Кошкы сьӧд сюе, пеньлы берытскы!

– Ма, ӝуаты, сут вань кужымдэ аслэсьтыд! Учкы, кызьы ми калыкмы понна асьмеды сётӥськомы! Малы ке шуоно ми тодӥськомы: кулонэн улон уг быры! Кин аслаз выжыез понна ассэ сётэ со вылӥ мертэтъёсы ӝутӥське, яке выльысен та дуннее берытске!

– Сюйысь уг лу берытскыны!  Нимыд но тынад уз кыльы та дунне вылэ! Карга!

– Сюйысь но, инбамысь но берытскыны луэ, чылкыт но югыт ке лулыд… – серекъя Яганай. – Нош тынад тани берытскемед уз луы ни, угось сояз дуннеын лулдэ но тынэсьтыд сутозы! Нокинлы тон кулэ уд луы: «сьӧдъёслы» но, «югытъёслы» но. Нош мынам котькытын нимы кылёз. Тынад со, Конгро, нокытын уз кыльы, Акаша но тонэ кылёнтэм сутоз.

– Созэ улыса учком! Мон кема уло на та дунне вылын!

– Учкы, ваньмыз луоз озьы, кызьы мон верай. Тынад улонэд вень йыл быдӟа но кылемын ӧвӧл ни! Ӝуаты! Быдты аслэсьтыд берпум кужымдэ!

Конгро сокем вожоме, урмеменыз со вань кужмысьтыз ӝуатыны кутске Яганаез. Нош тыл туж секытэн котыртэ Яганаез. Туж каллен со доры матэктэ. Но озьы ке но со каллен-каллен шобыртэ кышномуртэз, эгырӟытыны кутске. Тани со пеньлы берытскиз ини, Конгро вань кужымзэ, шӧдске, быдтӥз. Мырдэм шока. Шонаськыса кошке Палэсмуртлэн ӧсэз пала…

– Карга! – шӧтэм кеське со вань нюлэс кушез зуркатыса. Собере кӧня ке катьзэ утчаса, купырмыса пукемез бере, Палэсмуртлэн Ӧсаз ыше… Вань някырскем кызьпуос соку ик шонерско. Оло ке номыр ӧй вал татын…

Чал-чал кыле нюлэс кушын… Тани куараоссэс поттыны шӧтало бурдоос. Бубылиос выльысен лобаны кутско. Мушъёс сяськаысен сяськае поръяса гужгето ни. Кӧня ке улыса Узыбейлэн выкышъёсыз кылӥсько. Тани со ачиз но адӟиське. Вань ымнырыз солэн синвуэн котмемын. Зундэссэ паллян кияз поныса со музъем вылэ пыдесъяське…

– Остэ инмаре, кызьы тае ваньзэ чидано! – вань сюлэм вӧсьсэ шокыштыса бӧрдэ Узыбей. – Яганай апай, кызьы мон табере таин улом? – зар-зар бӧрдыса кесяське со буш кыре.

– Улом на, улом на, гыдыке, кече-пеле мынам! – турын зурод сьӧрысь пальпотыса потэ Яганай, озьы ик, сыӵе ик дӥськутэныз, бус гинэ потэ дӥськутэз бордысь… – Со табере ноку татчы уз ву… Быриз солэн улонэз, лулзэ но солэсь сопалаз дуннеын сутозы… Яганаез озьы гинэ быдтыны уг лу… Мыным трос ужме быдэстоно на калыке понна…

– Нош кин, иське, ӝуаз солэн тылэз пушкын? – паймыса юа Узыбей.

– Вужеры мынам отын ӝуаз, возь кӧня ке сьӧдэктӥз… Но инкуазь анай кужмо, ӵуказе номырез уз кыльы ни. Кошким нылы, ӝӧк сьӧры пуксём, сӥль но вуиз ни, дыр… Самор но кемалась кырӟа…

Узыбей вань кужмыныз ӟыгырске Яганай борды, соиз но вордэм нылзэ кадь ӟыгыръя «эксэй нылэз».

– Ойдо ӝӧк сьӧры, мусокае мынам… Пуком, вераськом, собере мон тонэ Кый доры келяло…

– Кыӵе Кый доры? – нош ик кышкатске Узыбей.

– Кузон улысь Арча каре мон тонэ келяло, отын пуке Арсавылэз чакласьмы. Кый сое шуо, яратыса. Тон сое тодӥськод ини, тынад аслад зэмос мугорыд но отын Кузон улысь Арча карын пияла коросын кылле. Нош таиз кыктосэд тынад… Ми ваньзэ тодӥськомы вал, мар тонэн луоз, соин ик мугордэ аслэсьтыдзэ ватӥмы… Ма, тон ачид но тодӥськод ук, кызьы тонэ ассасинъёс лушказы, Кый доры вуттӥзы. Нош Кый тонэ пиала коросэ выдтӥз…

– Со уйвӧт вал  ук?

– Ӧвӧл нылы, со уйвӧт ӧй вал… Соиз но ветлонэд, таиз но ветлонэд – ваньмыз зэм луиз. Арсавылын номыр но огшоры уг луы… Тон ортчид эксэй-ожгарчилы дышетскон сюрестэ… Нош таролэн 13 арканэз, кудзэ «Кулон» шуыса тодӥськомы, тонэ выль улонэ табере поттоз…

Яганай плитаяз пукись горшокысьтыз пӧзем лымзэ но сӥльзэ тусьтыосы тыре, Узыбейлы чебер пу пуньы сётэ.

– Ойдо, нылы, остэ! шу но, кутскы, тае одно ик тыныд веръяно, курбон пудоед тау шуыса ассэ тыныд сётӥз… Табере солы но тау шуоно! Табере со пудо луыса уз вордскы ни, вылӥ мертэтъёсы кошкоз… Та мугоредлы но соизлы но табере кужым кулэ луоз! Сӥльзэ но си, лымзэ но юзялты, сюлэмзэ но тани веръя, муссэ но, тызэ но… Музъем ныллы музъемез гинэ ӧвӧл тылэз но тодоно, вуэз но, омырез но…

– Яганай, мон мар кулэмын?

– Тани та пӧсь лымдэ юзьылӥд ке, сыӵе юанъёс йырад уз ни лыктэ… Ческыт ук?

– Туж ческыт!

– Нош мон мар шуисько… Си кӧтыд тырытозь! Тау шуыса выжыосмылы! Соку кужмыд котькуд вирсэрад шудыны кутскоз…

* * *

Кузон ульчаосын котькытын ошылэмын пӧртэм буёло флагъёс, лэсьтэм сяськаос, тасмаос, чилясь ӟустари жильыос, котькытысь чузъясько эктон крезьгуръёс но кырӟанъёс. Кузонъёс пӧртэм калык дӥськутъёсын эктыса но кырӟаса мыно адямиосын но вузъёсын тырмем ульчаостӥ Кузон Озон пала. Дуно дӥськутъёссы вылысь дуно куосты, дуно изъёсты, зарни но азвесь суредъёсын лэсьтэм парчаез адӟыса, соку ик валаны луэ, кузонъёс туж узыресь шуыса.

Явуш туж ӝог, ыбем кадь, Кузонэ вуиз. Кионвал кыӵе ке тӧлпери пӧлы пырыса, шуак сое татчы «озонаськытӥз». Кузонэ пырон азьын, кионвалэныз люкиськем бераз ик Явуш, дораз пыратэк, шонерен аслаз бадӟым пыжаз вуиз. Со тодэ вал, аслаз «пуась» мугоръёсызлэсь ку но кытын луэмзэс. Соин ик асэныз пумиськонлэсь утиськыса со ваньзэ лад-лад ужаз. Та нуналэ со аслаз бадӟым пыжаз, ву вылысь корказ, ӧй вал. Соин ик пыж солы тужгес но ӟеч инты луиз аслэсьтыз ик ватӥськыны. Пыжез возьмасьёс нырысь ӧжытак куалектӥзы… Ӧз возьмалэ вал соос Явуш князьзэс, угось со котьку ивортэ вал, ку вуоз. Нош туннэ со шӧдтэк шорысь инбамысь, оло, усиз. Ӧз адӟе на возьмасьёс котьку гань-гань вамышъясь Явушлэсь таӵе дыртыса ветлэмзэ… Но соос ӝог асьсэды киязы кырмизы. Кӧня ке улыса сиён но солы дась ни вал, мунчо но эстэмын. Но Явушлэн шутэтскыны чик но дырыз ӧй вал, со ваньзэ туж дыртыса ужаз. Али солы асэныз пумиськонлэсь но кышкыт вал «мардлаезтэк» кылён…

– Дасяське! – шуиз со возьмасьёсызлы, дыртыса сиён но дӥсяськон куспаз. – Асьмелы туж ӝог вогулъёсты шедьтоно!

– Мар-о, кузё, луиз? – вакчияк юаз солэсь Марико, Явушлэн япон нидзяез.

– Соос мыным вайизы атаелэсь арбериоссэ, пӧлазы вань пичи сандык, кудзэ «урод адямиос» утчало, оглом сандык соос кие шедьыны кулэ ӧвӧл… Урод лулъёс быдто ни вал вогулъёсты, но вылӥ инмысь ожчиосмы юрттӥзы соосты улэп кельтыны…

– «Урод адямиос» со – «сьӧдъёс»? – нош ик вакчияк юа Марико.

– Озьы, Марико,  шонер малпаськод… – валэктэ Явуш сурзэ юыса.

– Иське, сандыкын мар ке сыӵеез вань, мар соосты «урмытэ»?.. – нош ик юа Марико.

– Отын атаелэн «мардлаез»…

– Но «мардла» кынмем дыръяз нокинлы уг адӟиськы, иське, тон сое «дурӟытӥд»?

– Озьы, Марико, янгыш «дурӟытӥ»…

– Валамон, кузё… – шуак султэ Марико но палубае потэ. – Акико! – кылӥське солэн кеськем куараез.

Явушлы котьку кельше вал Мариколэн сыӵе ӝог югдурез валамез. Тани бызьыса со доры пыре ни Акико, кыкетӥез Явушлэн нидзяез.

– Марико вить кузя ярдуре кошкиз. Монэ тӥ доры, кузё, кельтӥз… – дыртыса вера Акико.

– Дасяське, асьмеос но потомы! – сиськон пыртӥз косэ солы Явуш. Акико туж ӝог кошке… Палубаын кылӥське ни солэн возьмасьёслы косонъёсыз.

Та зарни буёлъёсын туж узыр ворекъясь пыж юри лэсьтэмын вал шутэтскыны, кыдёкысь вузчиосты, «куноосты» пумитаны, соосын огкылэ вуон гожтэтъёс гожтыны. Яке Муское, Чускуалае, мукет тодмо каръёсы вуылыны. Ваньмыз татын вал. Но Явушлэн туж потэ ке но вал шутэтскемез, нокызьы уг лу ни вал чидамез вогулъёссэ адӟытэк, соин со дыртыса дӥсяз югыт но узыр байар дӥськутсэ, Акикоез басьтыны косӥз вогулъёслы дасям кузьымъёссэ. Вогулъёсты Явуш яратэ вал, угось атаез но туж юн кусып соосын возиз, ялан соос доры куное ветлӥз. Соин ик Явуш котькуд аре соослы кузьымъёс азьлопала ик дасяз. Ӝоггес соос доры вуоно, медаз сое азьланьтэ «сьӧдъёс»…

Явуш пуксьыса гинэ вуиз, ошкуй соку ик Идель вылтӥ ыбем кадь озон пала кошкиз ни, кызь кузя полысасьёс син куспын ярдуре вуттӥзы. Явуш мурза Кузонын самой тодмоез, тужгес но узырез байар вал. Солэн парчаен, буртчинэн, глазетэн, алтабасэн, брокатэн, баберекен, морен но трос мукетыныз тырмытэм карубъёсыз татын ик солэн шутэтскон пыженыз артэ радэн сылӥзы. Соосын артэ Идельлэн кык ярдуртӥз ик индурысен индурозь кыстӥсько вал мукет «куноослэн» но карубъёссы, кудъёсызлэн палубаоссы но трумъёссы тырмытэмын вал дуннелэн пӧртэм пумысьтыз вузъёсын – оглом ваньзы «куноос» возьмало вал Гондыр туй нуналъёслэсь быронзэ но Быдӟым базарлэсь усьтӥськонзэ. Ӵапак та базар сэрен Кузонэз тодо вал дуннелэн котькуд сэрегаз. Таӵе торжокъёс мукет каръёсын но, конечно, вал, одӥгез бадӟымез табере кылдӥз Чускуалаын, но Кузон Базар тужгес но узырез но даноез вал. Со туж кемалась вань вузчиослы тодмо луэмын. Угось уно дауръёс ӵоже со огазея ини шундыпотонэз но шунды пуксён палэз, уйпалэз но шуныт палэз. Кинъёс-кинъёс, но вузчиос, кудъёссэ «куноос» шуиськомы, умой тодӥзы асьсэлэсь вылэмзэс. Сюрс аръёс ӵоже мар та сюресъёс вылын луэмын, номыр но вунэмын ӧй вал. Караван сюресъёс ноку ӧз дугдылэ. Кытӥ гинэ соос ӧз ортчылэ, луо такыр вылтӥ-а, ву вылтӥ-а, нюръёс пыртӥ-а, гурезьёсысь лымы-йӧ вылтӥ-а – соос котьку мынӥзы со интые, кытын пумиськыло вал мукет караванъёсын, кытын люкаське вал вань дунне вылысь ваньбур но узырлык. Соин ик со «куноосын» пачылмись инты котьку одӥг вал. Шунды кадь тылсия вал со вань дунне шорын. Но вераны кулэ, ачиз со аслыз быръе вал кузёзэ.  Нош быръе вал со созэ гинэ, кинлэн киосыз кужмоесь вал сое ассэ, Бадӟым Базарез, ас бордаз ӝикыт возьыны.

Явушлэн Кузон Базар сярысь озьы малпаськонэз огшоры ӧз кылды. Со кемалась тодэ вал Кузон Базар со «Дуннелэн Гогыез» шуыса. Базарлэн вань ёзвиосыз, сӧзнэтъёсыз, вирсэръёсыз усьтӥськемын вал со азе. Тодмо мурзаос выжыысь Явуш князь пичи дырысеныз ик солэсь вань улонзэ тодэ.

Валлян-валлян дауръёсы та Базар сылэ вал Идельэн зарезе усён палазгес Семендэр кар вӧзын, нош солэсь но вазенгес Каспар зарезьлэн ярдуръёсаз. Соин ик пӧртэм аръёсы тросэз сое асьсэ ки улазы кырмыны выризы. Но троссэ та базар палэнтӥз, кужмоесь ке но киоссы вал – ӧз быгаты сое бордаз кыскыны турк османъёслэн султанзы но, узырлыклы синмаськем арабъёс но, персъёс но, ашкеназъёс но, сасанидъёс но, воръёс но, кудъёсыз сьӧд куака уллё кадь поръязы та «дунне гогы-чутыри» котыртӥ. Тӥни малы одӥг Инмарлы гинэ тодмо, кызьы сое уно дыр ӵоже возизы хазаръёс, нош хазаръёс бере булгаръёс, нош Булгар Кун куашкам бере, кызьы со ачиз ик лыктӥз Кузонэ. Но созэ, кызьы Быдӟым Кузонлэн кужмоесь луизы киосыз, туннэ нокинлы валэктоно ӧвӧл ни, созэ ваньзы тодо, Инмарлэн юрттӥсь киызтэк, ачиз коже озьы ӧй пӧрмысал. Кызьы, бон, сотэк арсавылъёслэн Кузон карзы быгатысал бордаз кыскыны вань дуннелы тодмо базарез? Но мар луиз со луиз, Дунне Базар аслэсьтыз вань яратонзэ кузьмаз та нокинлы азьвыл тодмотэм карлы, соин ик Кузонлэн даныз гудыртэм кадь вань дунне сэрегъёсы вӧлскиз. Нош ачиз Кузон соку ик воштӥськиз, чеберскиз, паськытаз, югытаз, яркытаз. Йырыз ик солэн сыӵе вылэ ӝутскиз, соин со шуак вунэтӥз аслэсьтыз арсавыл выжызэ но. Со шуиз, мон тӥляд гинэ ӧвӧл, мон табере ваньзылэн. Ӧйтод, яра вал меда солы йырзэ сокем вылэ ӝутыны, аслэсьтыд кин луэмдэ вунэтыны, созэ нокин туннэ Кузонлы уг вера. Но улон со ачиз возьматэ, ачиз дышетэ ук. Тӥни ук, табере Мускоос вань кужмысьтызы та Базарез Чускуалае кыскыны туртто, но соослэн уггес на пӧрмы, кужымзы ке но бадӟым. Угось Кузон Базарлэн кыкетӥ аспӧртэмлыкез но вань. Кин ке юаз ке, малы вань дунне вылысь «вузчи-куноос» азьлопала ик та Гондыр туй нуналъёсы сокем шедьыны турттӥзы, тожо нокинлы та Базарез тодӥсьёслы туннэ валэктоно ӧвӧл ни. Ваньзы валало, кин та дано карлэн кузёез, котькызьы сое мед шуозы – Ай, Аю, Аюка, Айкай, Ком, Гондыр, Медведь, Бор, Бури, Бер, Биар, Сопортар – но со Быдӟым Инмар Пи – Быдӟым Ош.

Соин ик, нокинлы валэктыны кулэ ӧвӧл, малы вань дуннеысь вузчи «куноос», ӵапак соос, кинъёслэн «кунъёсы» ӟепъёссэс пульдытыса улэ, туж дыртыса вуо вал та Гондыр туй пусъёнэ. Тани вань тӧдьы дуннеед та бадӟым пуртыын – ваньмыз татын пӧзе но лугыртэ адями куараен гинэ ӧвӧл, вань дунне сэрегъёсысь бурдоосын-изьверъёсын но. Озын вӧзын ик кесясько асланъёс, бӧксо буйволъёс, жирафъёс, черекъяло но нискето маймылъёс, коӵышъёс, коӵышпиос, куаньгето пӧртэм пуныослэн кучапиоссы, нурсгето пӧртэм парсьёс, бӧксо скалъёс, ошъёс, ыжъёс, гурт кечъёс, гырдалляло араб но урал валъёс… Татын кыӵе но калык ӧй вал – немецъёс, полякъёс,  англичанъёс, шведъёс, испанъёс – огкылын вань пуксён палась дунне, кудӥз аслаз карубъёсыныз вуиз уйпал зарезьёстӥ но уйпал тыос но уйпал шуръёс пыртӥ, нош мукет ласянь вань шуныт пал, шунды ӝутскон пал «куноос», кудъёсыз тубизы Каспар зарезьтӥ но музъем сюресъёс вылтӥ – китайёс, тибетъёс, индусъёс, персъёс, Иран но Африка палъёс, туркъёс, визаньтиос, грекъёс, италиос но уно мукетъёсыз, вератэк ини Фергана, Бухара, Багдат, Самарканд но уно мукет каръёсысь калыкъёслэсь «кунооссэс». Оглом, озынын ярдуре султон инты ик ӧй вал, пыжъёс вискы но донгиськыны уг лу. Калык муш палэп кадь гужла, ваньзы кузьылиос кадь мае ке ныпияса кытчы ке дырто. Котькытын кылӥське: «Тани со сӥё-дано Кузон! Тани со Быдӟым Ошлэн сайканэз!» Явуш куамынлэсь трос кылъёсты тодэ вал, но татын «куноос» 200–300 кылъёсын лабыртӥзы. Но самой паймонэз ваньзы кызьы ке ог-огзэсты валало вал. Ваньзы туннэ нуналлэсь мар ке но тужгес но паймытӥсьсэ возьмазы. Арабъёс «Кузон Эске» озонлэсь паймымон юртъёссэс но «туриоссэс» учкылыса асьсэлы суредало, паймыса дунъяло Кузонлэсь ульчаоссэ, храмъёссэ, эксэйлэсь но мукет байаръёслэсь ӝужыт юртъёссэс, дворецъёссэс, арамаоссэс, тыоссэс, ву пызгиськонъёссэс, чебер нылъёссэс, кудъёсыз ньыль нунал эктӥзы ни шулдыръяськись калык азьын чильпырась но пыр адскись дӥськутъёсын, маска сьӧры ватэм ымныръёсын. Ваньзы ушъяло вал та Быдӟым Ошлы сӥзем шулдыръяськон нуналъёсты.

Явуш, ошкуйзэ ярдур борды бышкалтыса, шуак калык пӧлы кошкиз. Возьмасьёсыз но Акикоен ӵош шуак со сьӧры вамыштӥзы. Ошкуйчиос кудӥз ке ошкуе кылиз, кудӥз ке гондыр туйын шудон дӥськутъёссэс дӥсяса калык пӧлы ышиз, кудӥз ке яратоно князьзэ вазьмасьёс пӧлы итӥськиз. Явуш синагогаысь ашкеназъёс пала вамыштӥз, кудъёсыз перс куноосын укыр сюлмо верасько вал. Ашкеназъёс туннэ солы пунэмамзэс берыктыны кулэ, соин ик со тодӥз, туннэ соос одно ик берыктозы шуыса. Малы ке шуоно, Быдӟым Ошлы сӥзем туй нуналъёс ӵапак со понна ик лэсьтӥсько, нокин нокинэ та Базарын медаз пӧя, нокин нокинлы аслэсьтыз пунэмзэ сётытэк медаз кыльы, нокин нокинэ медаз обидьы, сотэк котькудзэ Быдӟым Ош, Быдӟым Гондыр кесялоз.

Явуш ӧз люкеты ашкеназъёслэн перс куноосын вераськонзылы, адӟиськытэк гинэ соос вӧзтӥ кошкиз. «Адӟозы ай, асьсэос мед шедьтозы…» – малпаз со, там-таляосын шудӥсь уйпал калыкъёс доры дыртыса. Марико аслаз ожчиосыныз татын сылэ ни вал. Со азьын костасько вал куать думылэм адямиос…

– Мар луиз? – юаз Явуш Мариколэсь.

– Дыраз вуимы, кыльысалыд ни тон «мардлаедтэк»… – Явушлэн пеляз гинэ шыпыртӥз Марико, ас азьысьтыз думемъёс шоры возьматыса. – Ӝоггес «кынты» кристалдэ… Мон малпасько соос куать гинэ ӧвӧл…

Вогулъёс Явушез соку ик тодмазы, музъемозь ик йыбырттӥзы, Явуш но шумпотыса соослы йыбырттӥз. Угось соос котьку тужгес но чебер куосты Явушлы нуллӥзы, Явуш но соослы котьку ӟечен тыриз. Вылаз ик со ӟеч тодэ вал соослэсь вераськон кылзэс, вогулъёс со понна князез ки вылазы нуллыны дась ни вал.  Явуш юрттӥсьёссэ ӧтиз но, соослы выль пыӵалъёс но лэчыт пуртъёс сётӥз. Мар кулэ на пӧйшурасьёслы? Сокем соос шумпотӥзы. Котькуд аре Явуш паймытэ вал соосты кузьымъёсыныз, соин ик вогулъёс но чик пунэме ӧз кыле, сыӵе чебересь куоссэс но ву парсь пиньёссэс Явушлы кузьмазы. Кӧня ке вераськемез бере князь валаз, та вузчиослэн азьвыл тунозы, кинэ со туэ туж возьма вал, кылем аре бырыны шедем. Со интые табере пиез ветлэ. Егит вогул туно туж шумпотыса пуйыысьтыз ныпьет поттӥз. Тани, пе, ӵап та арбериез солэн атаез Явуш князьлы сётыны куриз вал…

Явушлэн синвуосыз ик пызьырскизы, тани со татаезлэн песьтэрез, нош со пушкын пичи сандыкез, кытын татаезлэн гожтэтъёсыз но «мардла»… Явуш шуак басьтӥз вогул туно киысь песьтэрез, учкиз пушсэ но мылкыдыз солэн куашказ… Пичи сандык но, атаезлэн гожтэтъёсыз но «мардлаез» но атаезлэн отын ӧй вал, кӧзныкез, матэктытӥсь гумыез но компасэз сяна…

– Оло тӥ тае возьмаськоды? – юаз егит вогул сандыксэ возьматыса.

– Сое… – вакчияк шуиз Явуш, сандык вылысь выжы пуссэ адӟыса…

Вогулъёс шумпотӥзы князьлы юрттыны быгатэмзылы. Тужгес но шумпотӥз егит туно, угось атаез солы уйвӧтаз лыктыса та арбериосты Кузонэ Явушлы нуыны косӥз вал. Но вогулъёс чик ӧз малпалэ, со понна соосты быдтыны быгатысалзы шуыса. Вогул туно пичи гинэ лулзэ ӧз сёты. Ярам ай, Явушлэн юрттӥсьёсыз ӝог куасазы урод адямиосты… Явуш ачиз но паймиз, аслаз ваньзэ тазьы адӟыны быгатэмезлы… Оло, «мардла» солы табере озьы ужа ни?..

Соин, дыр, сыӵе тау карыса Явуш ӟыгыртӥз вогул туноез, валэктӥз соослы кытчы куоссэс ӵуказе вайыны, вераз кӧняен басьтозы. Вогулъёс шумпотыса кошкизы асьсэлэсь ужъёссэс быдэстыны. Явуш усьтӥз пичи сандыксэ но соку ик ассэ адӟиз кристал шарысьтыз…

– Ӟечбур, мусое… – шуиз со «мардлазэ» чупаса… – Буйга ӝоггес, эн адӟиськы «муртъёслы», асьмеос вераськыны вуомы на… – куриз со «мардлазэ».

Пияла кадь гылыт вӧлэм шар соку ик буйгаз, лэся… Явуш шӧдӥз солэсь шумпотэмзэ, оло нош бӧрдэмзэ но… «Мардла» со улэп…» – шуэ вал Явушлы атаез, озьы ик, шӧдске, вань…

– Кузё, кошким татысь ӝоггес! – нош ик пеляз солы шыпыртэ Марико. – Ӝоген та «кый-кеӝалиос» уллёен татчы вуозы…

– Лэсьты, Марико, озьы, кызьы сюлэмыд вера… – шумпотэмзэ ватытэк косэ Явуш.

– Акико, ну та гыжкалъёсты отчы мурӝоламы, но потты ваньзэ, мар соос тодо… – косӥз юрттӥсезлы Марико.

Акико соку ик эшъёсыныз усьтыр-табыр гинэ куать гыжкалъёсты нуыса кошкиз. Марико нош матэктӥз Явуш доры.

– «Мардладэ» коркад нуоно луоз, дыр, шутэтскон пыжад секыт луоз сое возьманы… Соос ву пыдсысь но пыж доры потылозы… – нош ик кузёезлэн пеляз шыпыртӥз Марико.

– Соглаш… – шуиз Явуш. – Нуэ, иське, ваньзэ коркам но возьмасьёстэс кужмоятэ.

Марико ӧтиз возьмасьёссэ но ваньзэ вогулъёслэсь сётэмзэс нуыны косӥз Явушлэн юртаз.

– Ваньмыз умой луоз… – пальпотӥз со кузёезлы. – Асьмелы но татын ӝегатсконо ӧвӧл, со гыжкалъёсты озьы гинэ уд адӟы, соос лыктӥзы ке, уллёен лыкто… Кошким та интыысь ӝоггес…

– Кошком, иське, «шертовать» карыны… – пальыштӥз буйгам Явуш, угось гань-гань луиз солэн сюлэмыз. Явуш шӧдӥз табере, «мардла» со пушкы каръяськиз ни, табере со Явушлэн синъёсыныз ваньзэ учкыса мынэ. Атаез верамъя, «мардла» котьку ӝыны лулзэ кузёез пушкы кельтэ, нош мае ке солы секыт ке луэ тодыны, кузёзэ сандыкысь мардлаез доры мыныны косэ… Явушлы табере капчи базартӥ ветлыны. «Мардла» но «сьӧдъёс» понна ворсаськиз. Уг адӟо ни соос сое.

– Сопала эн мыны, отын кыктосэд ветлэ… – вера солы «мардла». – Мын «шертовать» карыны…

– Малпанъёсмы асьмелэн тупало… – пальпотэ солы Явуш.

– Озьы со луыны кулэ… – шуэ «мардла»

Озьы Марикоен но вить возьмасьёсыныз соос вамыштӥзы пумтэм ветлӥсь адямиос пӧлы. Явуш кемалась Кузонын улэ ни вал, улэ гинэ ӧвӧл, со вал одӥгез тужгес матысь адями эксэй пукон юртлы. Сое эксэйлы матэ кариськем адямиос пӧлын ваньзы вылӥ дунъяло, кузон эксэй ваньзэ вузаськон ужъёс котырысь югдуръёсты Явушлэсь гинэ юалляськылӥз. Ма, та Бадӟым Базарлы дасяськон ужъёс но ваньмыз Явуш вылын возиськизы. Соин ик со ӟеч тодӥз, кытын туннэ мар мыноз, кытын кыӵе вузчиос сылозы, кытын кыӵе возьматонъёс усьтӥськозы, кытын «шертовать» кароз калык, кытын ачиз эксэй, кытчы со ачиз мыноз. Ваньмыз паллян кам ярдур бадӟым карубъёсын но пыжъёсын шобырскемын вал. Карубъёслэн мачкоръёссы но гозыоссы вылын тӧласькизы пӧртэм буёло флажокъёс. Озон гинэ ӧвӧл, ачиз Идель но бадӟым туйлэн шоканэныз шоказ. Оло ке, та туйлэн чик но дугдэмез уг поты вал Кузон Озонэн гинэ, солэн потэ вал вань Идель ярдуръёстӥ вӧлдӥськемез. Калык шумпотыса тунсыкъяськиз тодмотэм кыр пӧйшуръёсын, бурдоосын, чорыгъёсын, пӧртэм чипчирганъёс но чипсонъёс улын эктӥсь кыйёсын. Гондыр туйлэн витетӥ нуналэз со туж аспӧртэм ымныро, угось со ортче мусо кышномуртъёстэк. Кузонъёс, озьы ик вань тапал калыкъёс лыдъяло, кышномуртлэн 4 лулыз гинэ шуыса, нош воргоронлэн со, пе – 5. Соин кышномуртъёс Айы Гондыр туйлэн ньыль нуналаз гинэ быгато вал шулдыръяськыны, нош витетӥ нуналаз, шунды потон палась ӟырдыт воргоронъёсты ӝожомытыса, шӧдтэк шорысь соос ышо. Ульчаосы воргоронъёс гинэ кылё – ожгарчиос но ожчиос, пӧйшурасьёс но чорыгасьёс, зарезьчиос но вузчиос, лэсьтӥськисьёс но пӧртэм ӧнерчиос, кинъёс кышномуртъёсты вошто пӧртэм йылолъёсты возьматӥсь адӟытонъёсын. Но со понна вань ньыль нуналаз ик гондыр туйлэн вань саклык висъяськылӥз чебер мусокайёслы. Кыдёкысь кунъёсысь воргоронъёс малпало вал, кышномуртъёс юри соос понна озьы гольык интыоссэс возьматъяса экто, но соос туж шонертэм малпаськизы, угось кышномуртъёс Быдӟым Аюлы, Быдӟым Айы Ошлы – Тӧдьы Гондырлы озьы тыршизы, вань зарезьёслэн но шуръёслэн, караван сюресъёслэн Кузёезлы, быдӟым Инмар Пилы, кудӥз адямиос доры инбамысь васькиз но вань дунне вылысь улон катъёсты табере чакласа возе. Угось ӵапак ачиз Быдӟым Гондыр – вань кыл сётонъёсты утись-чаклась луэ аслаз музъемъёсаз. Соин ик Быдӟым Гондырлы кыл яке присяга сётон пӧртэм сямен туж паськыт вӧлмемын Кузон эксэйлыклэн калыкъёсыз пӧлын. Асьсэос эксэйёс но со азьын «шертовать» каро, но со сьӧры вань эксэйлэн котырез, ожчиосыз, ляльчиосыз. Со луэ номырин ӵошатонтэм каттырись кужым, кудӥз возе вылӥ инбамысь васькем улон катъёсты. «Кылдэс сётэ кадыр сьӧсьлэн йырыз азьын, тӥледды курадӟытӥсь лул соку ик кесямын луоз. Котьку кадырлалэ Сое!» – ваньзы калыкъёс тодо та вылӥ инмаръёслэсь куронзэс.

Гондыр шоры тазьы учкон сям паськыт пыӵамын Кузон Базаре вуылӥсь «вузчи-куноос» пӧлын но. Базарысь инты басьтэмез но выт тыремез бере котькудӥз «куно» Гондыр туйлэн витетӥ нуналаз кылзэ сётэ Гондырлэн йырыз но куэз азьын, кудзэ «шерть» шуыса нимало. «Шерть» шуо ваньзэ христианской луисьтэм кыл сётонъёсты. «Мусульманъёс Куран вылын «шертовать» каро, монголъёс –  ламалэн куронъёсызъя, нош ми Быдӟым Ошмылэн ымныр азяз» – шуо  калыкын. Югдур, конечно, мудронгес но ӧжытак секытгес вал пудо будэтӥсь но пӧйшурась калыкъёс пӧлын, соослэн дунне шоры пӧртэм пойшуръёс но соосты утись уртъёс пыр учкемзы сэрен. Но соос асьсэлэсь инмаръёссэс ке но ӧз вунэтэ, ваньзы «шертовать» каризы «Лек Гондыр» азьын. Соин ик Гондыр туй нуналъёс ваньзэсты огазеяны быгатӥзы – огшоры калыкез но, каръёслэсь кузёоссэс но – ваньзы вужкатъёсты быдэстон кылзэс сётылӥзы Гондыр Ку азьын, кудӥз вылэ тыро вал тӥр, пурт, но мукет ожмаськон тӥрлыкъёсты. Кыл сётыкузы туноос Гондыр Ку вылысь пуртэз басьтыса, солэн йылыныз нянь но Гондыр Сӥль сёто вал кыл сётӥсьлы, соиз Нянез но Гондыр Сӥлез веръяса шуэ вал: «Мед монэ кесялоз Гондыр, Быдӟым Аю, мед гуньдом та Нянен, та Сӥлен, кудзэ сиисько, мед йырме ӵогоз та тӥр, мед виёз монэ та пурт, мон вужкатлэн гожез сьӧры потаны дӥсьтӥ ке!».

Соин ик котькудӥз «вузчи-куно», коть мед луоз со Африка палась, яке грек христианин, яке эксэй карысь вашкала Византиысь генуэй вузчи, яке оскись мусульман араб, туж ӟеч тодэ вал, вузаськон катъёслэсь палэнскиз ке, яке Быдӟым Базар азьын ӧз быдэсты ке сётэм кылзэ, сое одно ик Гондыр нюлэскын кесялоз; нош та Нянь, та Сӥль, кудзэ со сие, солэн ньылоназ дугдоз, нош пурт сое виёз, тӥр йырзэ ӵогоз. Кыл сётонэз возьмась – Гондыр – жалясьтэм судья, нокыӵе мукет амалъёсты утчасьтэм, лябытлыко луисьтэм, аслэсьтыз мылкыдъёссэ кылзӥсьтэм. Гондыр одно ик кесялоз, мукет амалъёсыз солэн ӧвӧл, угось сыӵе солэн  вылӥысен пуктэм интыез.

Таӵе валан Кузон Базарын гинэ паськыт вӧлмемын ӧй вал, со пыӵамын вал вань кузон калыкъёслэн улоназы. Кылсярысь, кыӵе ке арсавыл воргорон малпаны кутске ке, кузпалыз мукетыныз кушласькиз шуыса, со Гондыр Кулэсь кыӵе ке пичи люкетсэ вандэ но, сое кузпалэзлы сётэ; кышномурт картэз азьын янгышез ке ӧвӧл, нокыӵе луытэк со Гондыр Ку кэсэгез басьтэ, нош янгышез ке вань, ноку но уз басьты, шуак усёз картэз азе но сьӧлыкез сярысь ваньзэ вералоз. Нош со кышномуртэз, кин сьӧлыкаса но Гондыр Ку кесэгез басьтӥз, бӧрысь нюлэскысен одно ик сое Гондыр кесялоз – сыӵе тӥни осконзы арсавылъёслэн но кузон калыкъёслэн. Нош кин ке арсавылъёс пӧлысь пӧяськыса кыл ке сётӥз, калыклэн осконэзъя, со одӥг ар но уз улы, сое одно ик Гондыр сиёз. Нош кышномурт пӧяськыны дӥсьтӥз ке, Гондыр, кудӥз бордысь вандэмын вал Ку Кесэг, куинь нуналскын кулэмысь улӟоз но ӧрекчи кышномуртэз сиёз. Но самой паймымонэз, та ваньмыз улонын озьы ик быдэсъяськиз, нош со зэмос луэм учыръёсты калык вунэтытэк выжыысь выжые вераса улӥз. Соин ик Гондыр-Ошлы оскон сыӵе юн возиське калык пӧлын, нокин та осконлы пумитъяськыны но уг малпаськы. Вуэ чукындыремъёс но, мусульман осконэ пыремъёс но ваньзы бызьыса лыкто Быдӟым Гондырзы доры.

Кузон калыкъёс ӵемысь кыл сёто, Гондыр Пыдэз куртчылыса: мед, пе, та Гондыр сое кесялоз, со маин ке янгыш ке.  Куд огъёсыз кыл сёто Гондырлэн Йыркобыез азьын, угось сыӵе Йыръёс трос интыосын ошиськыса уло писпуос но юбоос бордын. Нош кыӵе ке гуртын уг лу ке сыӵе, Гондыр Пыд яке Йыр, сое вутто мукет гуртъёсысь, нош Пыд-Йыр кузёлы коньдон сёто, солэсь Йыр-Пыдзэ уже кутэмзы понна.

Соин ик котькыӵе кыр адӟиськиз ке но та оскон, мусульманъёс но, христианъёс но, иудейёс но туж валаса но гажаса учкизы Гондыр туй нуналъёс шоры. Соин, вылды, чик уг пумитъясько вал Гондыр Сӥлез но пурт йылысь сиыны. Та югдурез котькудӥз ачиз сямен валэктэ вал, кылсярысь, христианин малпа вал, Иисус но ук ӝытазе лушкем сиськоназ, аслаз апостолъёслы та мынам мугоры шуыса нянь люкылӥз, нош таиз мынам виры шуыса вина удылӥз. Нош кызьыгес малпаськизы та туй нуналъёс сярысь иудейёс Явуш уг тоды, но соослэсь ымныръёссэс учкыса, котькудӥзлэн валамез луэ, соослы но та нуналъёс туж кельшо шуыса.

– Кызьы, бон, сотэк? – соку ик ас понназ пусйиз Явуш. – Та нуналэ синагогаысь вузчиос вань пунэмо калыксылэсь азвесьсэс басьто ук. Пунэмо калыкъёссы асьсэос ик та нуналъёсы пунэмзэмъёссэс вутто.

Но тани ашкеназъёс адӟизы Явушез, персъёсын люкиськыса, шуак вуизы со доры.

– Милям дуно но гажано Явушмылы бадӟым салам! – шумпотыса удмурт кылын ӟечъяськизы табере ини, ӵуж чалмазы интые, сьӧд изьыосын ветлӥсь иудейёс, собере ваньзы кусъёссэс мыкыртӥзы.

– Бадӟым салам синагогалы! – пальпотыса соослы мыкырскиз Явуш, собере инбаме учкыса вераз котькытын туннэ чузъяськись кылъёсты. – Сӥ но дан  Кузонлы! Сӥ но дан Быдӟым Аю-Ошлы!

– Сӥ но дан Кузон эксэйлыклы! Сӥ но дан Быдӟым Ош-Гондырлы! – полэстӥзы иудейёс.

Собере иудейёс мултэссэ вераськытэк ужзы борды кутскизы. Соос нырысь ик асьсэлэсь янгышсэс шараяса, Явушез вожзэ медаз потты шуыса куризы… Собере соослэн юртӥсьёссы вить сандыкен ваизы азвесьсэс… Татын, пе, пунэммы гинэ ӧвӧл, будэтыса, пе, сётӥськомы кема ӝегатэммы сэрен… Базар азьын таӵе уно сандыкъёсын ветлӥсь азвесьлы нокин тапалан уг паймы, котькудӥз тодэ вал, Кузон Базарын лыдъяны луонтэм коньдон берга шуыса.

– Ярам… – шуиз Явуш, со но, иудейёс кадь ик, трос уг вераськы вал. «Зульыны ке кутскид, син куспысьтыд нырдэ ишкалтозы» – шуэ вал солы синагогаысь калык сярысь татаез.

Ма озьы ик вань, иудейёс нош ик Явушлэсь юрттэт куризы вузъёссэс Идельлэн усён палтӥз зарезе поттыны. Угось ӧй вал сыӵе вузчиос, кинъёс уг кышкало Каспаре усёнэз ортчыны. Отын зэмос воръёс уллёен-уллёен поръяло уго… Булгар но хазар вакытъёсысен нокыӵе вузчи огшоры гинэ уг быгаты зарезе потыны. Нош соосты, кинъёс котькыӵе учыре но потыны быгатӥзы, та «Чутыри» интыосын ымнырзыя ик тодмало вал. Явуш ӵап сыӵе вузчиос пӧлысь луэ, со азе нокыӵе «Чутыриос» ӧз кылдылэ, малы ке шуоно татаез но, бабаез но, бабаезлэн бабайёсыз но туж гажано адямиос вал ошкуйчиос пӧлын, кудъёсыз сюресэз чаклало вал, вузчиослэсь выт басьто вал, чускато вал кам вылъёсысь воръёсты. Соин Явушез воръёс пӧлын но ӟеч тодӥзы.

Явуш, дышем сямызъя, пумит ӧз кариськы синагогаослы юрттыны. Иудейёс куанӥзы. Соос умой тодо вал, кузон князь ӟеч-ӟеч христианин шуыса, со нокин вылэ вожзэ уг потты, соин ик быгатыса уже куто вал солэсь христиан сямзэ. Но Явуш киын но вал соосты кырмон биньгозы… Явуш тодэ вал, кызьы соосты кырымаз возьыны. Вылаз ик Явушез табере Камит христиан эгрегорысь мозмытӥз ни…

Оло соин, оло мукет мугъёслы луыса князь та кескич «коноосын» туж мыло-кыдо люкиськиз. Тани кинлэсь адӟем кароно вал, зэмос христианин луон понна. Явуш вить сандыксэ ик ыстӥз выль черк пуктӥсь отец Протопоп доры. Шуиз умой мед лыдъялозы сандык пуштроссэ, коньдон, пе, чётэз кулэ каре. Князь трос азвесь сётэ вал черкъёслы но, мечетьёслы но, нош ачиз чик но йырзэ ӧз ӝутылы. Озьы ик со ӧз утча узырмон амалъёс Кузон эксэйлэн, Муско эксэйлэн ас шораз туж умой учкемзы бордысь но. Со мугорыныз но, ымнырыныз но, ужъёсыныз но копаксэ татаез кадь вал, но со дыре ик трослы визьмогес, азинлыкогес, оло… Малы ке шуоно Явуш Инмарен улӥз, ӟеч утиз выжы вужкатъёссэ, яратӥз татазэ но бабайзэ, котырысьтыз калыкез но. Трос солы усьтӥз татаез, вузчи сюресъёсты, калыкъёсты тодон ласянь гинэ ӧвӧл, Мускоез, Кузонэз, Нукратэз валаны но. Мускоын сое туж тросэз тодо вал. Ма кызьы сотэк, Иоанн эксэен ӵош будӥз ук со. Озьыен юнме ӧз нуллы сое пичи дыръяз Муское татаез, юнме ӧз тодматы Мускоысь быдӟым князьлы матэ луись священник Сильвестрен но мукетъёсыныз. Табере ачиз Иоанн но сое шумпотыса пумита, Мускоысь тодмо вузчиос но уллёен ветло со сьӧрын, котькудӥзлы Идельтӥ Каспар зарезе поттӥсь ошкуйчиосын кусыпъёс кулэ. Явуш юрттылӥз, нокинэ ӧз палэнты. Эксэй кусыпъёс эксэй кусыпъёсын улӥзы, нош вузчи кусыпъёс котьку уло вал асьсэлэсь ужзэс кадырланэн.

Ӵапак вузчи Сильвестр дорын ик Явуш пичи дырысеныз вуэ чукындыремын, соин, оло, пичи дырысеныз ик со вераськиз иконаосын, святойёсын, кинъёсты со ачиз сямен кадыръёс шуэ вал. Пичи дырысеныз ик со тодэ вал, Иоанн Кузонэз басьтыны турттэ шуыса, Иоанн «тӧрнаса» улэ ни вал Каспаре потӥсь вузаськон сюресъёсты киултыны.

Явуш, татаез кадь ик, троссэ адӟыны быгатӥз, но солэн адӟонэз туннэ нуналозь сётӥське вал христиан черкъёслэн адӟонзы пыртӥ гинэ. Нош Камитлэн  адӟонэз, соин ӵошатоно ке, трослы паськытгес но мургес вал, малы ке шуоно со арсавыл выжыосыз бордысь ӧз люкиськы. Нош Явуш Япанчаен выль оскон ӧръёстӥ кошкизы. Нош озьы ке но Камит но, Япанча но, Явуш но адӟо вал, Быдӟым Кузон туж зол сӧсыртэмын луоз, ӵапак та Быдӟым базарез понна, ӵапак та Гондыр туй понна, кудӥз шоры узаса, вожомыса улӥзы Мускоысь  христиан черкъёс. Соосты тужгес но зол узатэ вал Гондырез вылӥ Инмар Пи карон, амарантаез вылӥ Инмар Нянь карон, нош Зарни Мумез – богородица интые пуктон. Ваньмыз со погань шуо вал Кузон вылэ доласькись священникъёс. Но Явуш нокыӵе поганьзэ татысь ӧз адӟы, со умой тодэ вал москальёсты, трос пол кылылӥз соослэсь «христиан заповедьёссэс» тапалан улӥсь калыкъёс вылын кызьы «чакламзэс»… Кинъёс-кинъёс, но москальёс ваньзылы тодмо луо вал узырлыкез таланы яратӥсь, кӧттырмостэм, жалясьтэм сямо луэменызы, соос быдтыны но быгато вал сьӧлыктэм адямиез, уарлы берыктыса вузало вал тапалась калыкъёсты пӧртэм гыжкалъёслы, кудъёсыз та «адями вузъёсты» камъёсмы кузя арабъёс но туркъёс доры нуллӥзы. Угось паськыт камъёс вылын котькыӵе «ошкуйчиос», котькыӵе «вузчиос» тырмо вал. Соин ик асьме ватагай ошкуйчиосмы котьку дась вал кышкыт гыжкалъёсын пумиськыны. Ваньзылы тодмо, кин кызьы асьме пала «куное» лыктэ, сое озьы ик пумитало. Ӵем луылэ озьы, Иоанн дорысь вуэм «вузчи-куноосты» берпум сӥньысозь кылё но, эксэйзылы асьме пал калыкъёслэсь салам вераны косыса Мускоязы келяло… Таиз понна тужгес йырзэ кур карылӥз Иоанн. Но Явуш соослэсь кызьы тапалан дауртэмзэс мадьылӥз Иоаннлы… Пуштэ вал Муско эксэй аслаз сыӵе «москальёсыз» понна но. «Ӵоге соосты пуктылыны кулэ!» – кесяськылэ вал со вожомыса.

Явуш туж шумпотӥз Эске Кузон озынэ сомында калык люкаськемлы. Адямиос вожен-вожен сиизы Гондыр Сӥлез, собере кыл сётыса кошкизы учкыны Гондыр туй адӟытонъёсты, кудъёссэ шудо вал кышномурт луыса дӥсяськем воргоронъёс. Мар вал татын уродэз? Явуш султӥз черодэ, кытын Гондыр Ку азьын кыл сёто вал арсавылъёс. Но калык шуак тодмаз но черодлэн азяз поттӥз яратоно князьзэ. Явуш Гондыр Сӥлез бигер пурт йылысь басьтӥз но, удмурт вӧсясь киысь Гондыр Вирен сурам кумышкаез юиз, собере гондыр сӥлез сиыса,  пыдес вылаз султӥз, лад-лад вераз кыл сётон кылъёссэ, собере султӥз но, кирос лэсьтыса, каллен вамыштӥз одӥг синмо аримаспаос пала, кудъёсыз асьсэлэсь валъёссэс вузаны лыктӥзы. Соос сыло вал юри Гондыр туй нуналъёслы дасям маскаосты вузась лавка азьын, асьсэ ымныр вылазы мертало вал кызьпу туйлэсь но мукет арбериослэсь лэсьтэм ымныръёсты. Соослы кельшиллям куака ымныръёс. Соос, конечно, туж умой валало вал, туннэ но мукет нуналъёсы но соосты татын нокин уз иса шуыса, малы ке шуоно ваньзы тодо аримаспаосты но соослэсь чебер валъёссэс. Но пичиосты медаз кышкатэ шуыса, соос ватыны тыршизы асьсэлэсь одӥг синмо ымнырзэс. Угось куака ымнырын нокин соос шоры уз долка ни, соос одӥг тусъемесь луо Гондыр туй ымныръёсын ветлӥсь калыкен. Зэмзэ ке верано, одӥг синмын но соос пӧртэм ымныръёсын ветлӥсь калыклэсь ӧз висъяськысалзы, но аримаспаослы малы ке потэ вал соос ваньзылэсь висъясько шуыса. Явуш соосты ӝог шедьтӥз, соос туж кулэ вал быдӟым князьлы.

– Умоесь, мынам гажано эшъёсы! – котькудзэс ӟыгыртыса ӟечъяськиз соосын Явуш.

Аримаспаос, ангесъёссэс мыкыръяса, йыръёссэс, киоссэс шонаса ӟечбуръяськизы князьлэн ватка кылыныз: «Ӟечбур, Явуш! Инмаред  тонэ мед утёз!»

Явуш пальышаса соосты пельпумъёсазы чабкылӥз, солы кельше вал аримаспаос вань сюлмынызы ватка кылэз ярато шуыса. Ватка кылэз гинэ ӧвӧл, аримаспаос туж умой тодо вал вашкала чудьяосты но соослэсь ватэм кладъёссэс. Ӟеч тодо вал Биармия шаер сярысь – «Быдӟым Гондырлэсь музъемзэ», кудӥз туж но туж узыр вал, кудӥз сярысь ӟеч тодо вал уйпалась варягъёс но викингъёс. Аримаспаос тодо вал ваньзэ Ватка но Калмез музъемъёсты, но соос уг тодо вал, кытын кылле яке сылэ беклербек Мамайлэсь арсавыл ошкуйчиосын лушкам кыкетӥ Зарни Вал. Со туж кулэ вал аримаспаослы асьсэ калыксэс быронлэсь утьыны. Явуш кемалась тодэ вал соослэсь мар утчамзэс… Но та аримаспаос но, Явуш но уг тодо на вал, соослэсь ужпумзэс Камит тупатӥз ни шуыса…

Аримаспаослэн югдурзы, Явуш тодэмъя, зэмзэ но туж секыт ни вал, соос пӧлын ӵемысьгес вордскылӥзы кык синмоос, нош одӥг синмооссы, кудъёсызлэн лул кужымъёссы валъёслэн кадь ик быректыса улӥз, арысь аре ӧжыт кыльылӥзы. Соин ик соослэн Кузонэ вуылон мугзы, вузаськон сяна, валамон ини, Зарни Вал доры сюрес шедьтон вал. Соос ӟеч тодӥзы, Батыйлэн Валъёсыз, Мамайлэн Сараяз сылыку, кузонысь казакъёсын но ошкуйчиосын лушкамын вал шуыса. Казакъёс Валъёсты лушканы лыктӥзы ӵап соку, куке Мамай аслэсьтыз Сарайзэ пересьёслы, кышноослы, нылпиослы гинэ кельтыса, ачиз Мускоез котыртыны кошкиз… Соин ик казакъёслы нокин ӧз люкеты. Но чылкыт зарнилэсь кисьтэм Валъёс сокем секытэсь вылӥллям – сюрес вылазы соослэн ялан тӥяськиллям я уробоосы, я питранъёссы. Нош бадӟым кык пыжъёссы, кытчы соос Валъёссэс бӧрысь понӥллям, туж мырдэм мынӥллям вулы пумит. Угось ошкуйчиос но казакъёс но уг тодо вал бурлакъёслэсь тодонъёссэс. Бурлакъёс ке луысалзы, соос туж ӝог камлы пумит кошкысалзы… Но егит ошкуйчиослэн но егит казакъёслэн визьзы тырмымтэ бурлакъёсты та уже кыскыны, соин-сэрен соос туж каллен тубиллям вулы пумит. Нош Мамай та иворез кылэмез бере ик, Мускозэ куштыса, шутэтскытэк дыртэм Валъёссэ утчаны, кызьы ке мамай ожгарчиос туж ӝог сутӥллям бадӟым пыжъёсты. Соку казакъёс одӥг Валэн пыжзэс шурлэн бызён ӧрезлы сётӥллям… Мамайлэн ожгарчиосыз Валзы сьӧры кошкиллям, сое ярдуре поттон понна. Кема соос выриллям сое поттыны. Нош со вакытэ кыкетӥез бадӟым пыж чиптэм-чаптэм ышем… Шӧдске, казакъёслы бурлакъёс юрттӥзы… Со дырысен нокин со Валъёс сярысь уг тоды. Мамайлы кылемез шуо: аслаз ик Быдӟым беклербеклэн шайгуаз ватэмын, нош асьме пала вуэмез Вал, кытчы ватэмын, нокин уг тоды… Аримаспаослы туж кулэ одӥгез ке но Вал, асьсэлэсь сэбедзэс ортчытыны. Сое ӧз ортчытэ ке, соос ваньзы чолак бырозы. Соин соос сыӵе возьмазы Явуш князез, кудӥз соослы азьвылаз Кузон базарын кылзэ сётӥз, шедьтоз соослы тодӥсь адямиез шуыса… Явуш табере тодэ, Валъёсты шедьтыны соослы Камитэн герӟаськоно…

– Ӧвӧл ни соослы Камитэн герӟаськоно… – шӧдтэк шорысь вера Явушлы «мардлаез»…

– Малы тон озьы малпаськод? – пайме Явуш.

– Мукет сизьым аримаспаос шедьтӥзы ни Зарни Валъёсты, сэбедзэс но ортчытӥзы… Табере вань аримаспа калыкъёс шулдыръясько, Камитэз данъяло…

– Озьы, Явуш, шонер вера «мардлаед»… – шуэ солы кеч ымныро адями.

Марико но солэн возьмасьёсыз шуак котыртӥзы кеч ымныроез… Нош соиз, югдурез валаса, ӝогак ымнырзэ куштӥз…

– Камит! –  шумпотыса ӟыгырскиз со борды Явуш. – Тон вуид?!

– Мон но вуи, тон но вуид… – пальпотэ арсавыл туно. – Асьме инмаръёсмы котьку утёзы! Аримаспаос! – вазиське со палсинъёслы. – Туннэ тӥлядъёс туж бадӟым вӧсь ортчыто, шулдыръясько, малы ке шуоно тӥляд эксэйды но солэн куать эшъёсыз шедьтӥзы Зарни Валъёсты, сэбед но ортчытӥзы…

– Кытысь тон тодӥськод? – оскытэкгес юа аримаспаослэн валтӥсьсы.

– Мон ачим но отын вал… – вакчияк валэктэ Камит.

– Кин тон? – юа аримаспа.

– Мон со, кинэн тӥледыз Явуш тодматыны турттэ вал, мон Арсавыл Туно… – валэктэ Камит. – Зэм верасько тӥледлы, мон ачим но вал отын. Мон сяна отын вал куинь кузё кышномуртъёс: арсавыл эксэй ныл, со тэралэн кузёез, вӧсь лудлэн кузёез…

– Нош куӵо вал?.. – юа аримаспа.

– Кызьы сотэк, вал отын куӵо вал но, пуны адями но, адями вал но, кырныж но, кык бабасыръёс но, сизьым адымась валъёс но, сизьым аримаспаос но… Мон малпасько, со тӥледлы троссэ вера… Ваньмыз озьы, сэбедды куремъя… – пальпотэ Камит.

Аримаспаос мар ке асьсэлы тодмозэ кылыса ваньзы шумпотыса ог-огзы борды ӟыгырско, собере ваньзы Камит азе пыдесъясько.

– Тау тыныд, ӟеч адями, таӵе иворед понна… – вераськыны кутске азьпал радысь валтӥсьсы. – Иське, тон зэм но арсавыл туно… Вань улонэд тынад таӵе ик шумпотонэн мед ортчоз, кыӵезэ тон милемлы али кузьмад…

– Я, я, султэ ӝоггес, эшъёс… Калык адӟе ук, возьыт луэ мыным… Татӥ Кузон ханмы но ветлэ, вожез потоз мыным мыкырскемдылы. Тӥ ойдо, валъёстэс вузалэ но дыртэ дорады… Малпасько сизьым бурдъёс вылын ӝог вуоды, шулдыръяськондэс но адӟоды на. Салам вералэ эксэйдылы, тунодылы но вить эшъёссылы, эн вунэтэ нимысьтыз тунодылэн бабасырезлы но салам вераны…

Аримаспаослэн синъёссы ваньзылэн ӝуатскизы…

– Ярам… – шуиз Камит. – Люкиськомы мултэс кылъёстэк. Тӥ ойдо, лэсьтэ озьы, кызьы верай. Ӟеч луэ, ӟеч бертэлэ.

– Ӟеч луэ! – шуизы аримаспаос но кузёзы соослэн Камит азе лыктыса зундэссэ поттӥз. – Басьты, арсавыл туно… Вань сюлмысьтымы сётӥськомы… Со тыныд кулэ луоз. Нулды бур чиньыяд, позыртӥд ке соку ик тон доры ачиз Тулпар потоз, Шурали эксэйлэн пегӟем валэз…

– Шуралилэн Тулпарез?.. – пайме Камит. – Зундэсэз бур чиньыям позыртӥ ке, со потоз?

– Тӧлпери кадь азяд султоз! – пальпотэ аримаспа. – Султоз гинэ ӧвӧл, со тонэ кытчы мынэмед потэ, отчы туж ӝог вуттоз! Но татысен эн позырты, татын калыкез кышкатод… – кизэ сюлэм вылаз поныса мыкырске аримаспа. – Уйёсы гинэ, калык адӟымтэ дыръя эскерод…

– Валай. Тау тӥледлы, эшъёс! Жаль ке уг поты, мон басьто сое… Мыным со, зэм но, кулэ луоз на, дыр…

– Басьты туно, басьты! Со тыныд одно ик кулэ луоз. Озьы шуо милям выжыосмы… Вань сюлмысь сётӥськомы! – куро аримаспаос.

Камит басьтэ, кема-кема учкыса, бур чиньыяз понэ. Аримаспаос шумпотыса кошко.

Аримаспаосын люкиськемзы бере Явуш, зундэссэ эскерись Камитлэсь ӧжытак кышкаса юаз Узыбей сярысь.

– Секыт юан со, Явуш… – кунэрскиз Камит.

– Со улэп?.. Тон сое шедьтӥд? Мар соин карем Япанча? – юам вылысь юа Явуш.

– Япанча зэмос эш! Со сое туж ӟеч интые ватэм вылэм…

– Шуи ук мон, Япанча номыр уродзэ уз лэсьты! – шумпотэ Явуш.

– Нош Узыбей со, шӧдске, бадӟым кайгуэ мынам… – кизэ шонтэ Камит.

– Малы?..

– Табере сое Палэсмурт кытчы ке сэрпалтӥз…

– Палэсмурт?..

Камит ваньзэ, мар вал, верамез бере мӧзмыт учкиз шулдыръяськись Кузон шоры…

– Эх, кошкы вылэм Тулпарен али ик со доры… Но мон уг адӟиськы со доры сюресэз… – куректэ Камит. Уг возьматы мыным сое Кузонлэн «Ӟугыриез»…

– Кыӵе ке пияла сандыкын со кылле, кытын ке пыдлон музъем улын… – аслыз ачиз оскытэкгес шуэ Явуш.

– «Мардлаед» тыныд озьы вера? – лулӟе Камит.

– Со уг вера, возьматэ гинэ… Адӟытэ пыдлось музъем пыдсысь кыӵе ке карез… Отчы туж мур васьконо… Собере – кыӵе ке пияла сандыкез возьматэ, Узыбей со пушкын кылле…

– Созэ мон но адӟисько, со коросын кылле… «Сьӧдъёс» киын… – лулӟе Камит…

– Малы «сьӧдъёс» киын? – пайме Явуш.

– Мон адӟисько, кинъёс сое возьмало … Соос ассасинъёслы кельшо… Нош ассасинъёс «сьӧдъёсын» герӟаськемын… Но котьма ке но, мыным отчы пырано луоз…

– Ӧвӧл, Камит, мон тонэ огнад  уг лэзьы… Вылаз ик ассасинъёс доры… Ӵош мыном, Камит… Марико!

– Кылзӥсько, кузё!

– Тынад вань-а пумиськылэмед ассасинъёсын?

– Исмаилит-низаритъёсын, кудъёсыз гольык ветлӥсь чебер нылмуртъёс доры, рае, шедьыны туртто, кӧшкемыт ужъёссэс лэсьтэмзы бӧрсьы?.. – пальпотэ Марико. – Али гинэ, кузё, куатьсэ соосты думылӥмы ук… Шузиесь соос, «сьӧдъёссы» кадесь ик…

– Соос ассасинъёс вал шат? – пайме Явуш.

– Мон соосты уг сураськы, кузё… Огпол гинэ ӧм пумиськылэ ни ук…

– Но соос сыӵе усто ожгарчиос, шуо?..

– Котькуд усто ожгарчилы, кузё, туж устоез ожгарчи шеде…

– Тон ачид сярысь-а, Марико?

– Уг… Али мон ачим сярысь уг вераськы… Мон ӝог адӟи соосты, азязы вамыштӥ ни вал, но монэ азьпалтӥз кырныжен ветлӥсь мурт, син куспын соосты ми азе куяз… Милемлы думылыны гинэ кылиз на…

–  Кырныжен мурт?.. Со усьтӥз ассэ? – паймыса юа Явуш.

– Ӧз, кузё. Кызьы потӥз, озьы ик ышиз… – ачиз но пайме Марико, шӧдтэк шорысь солэн синъёсыз бадӟымесь луизы. – Со нош ик татын, со тӥ сьӧрын… – кӧдэктыса шыпыртӥз Марико. Явушлэн возьмасьёсыз туж ӝог Явушен Камитэз асьсэ сьӧры ватӥзы…

– Ӟечбур, пиос… – мусо пальыша Япанча, «кызьпу туйзэ» ымнырысьтыз куштыса. Нокыӵе Кырныжез бордаз солэн ӧй вал…

– Ӟечбуресь, Япанча батыр, – кикуръёссэс ангес улазы карыса мыкырско Явушлэн япон возьмасьёсыз.

– Япанча! – ӟыгыртэ эшсэ Явуш.

– Тау тыныд ваньмыз понна, Япанча… – шумпотыса ӟыгыртэ сое Камит.

– Аслыд но, Камит, тау, Кизили Чачаез берыктэмед понна… Мон ваньзэ тодӥсько, мадиз ни мыным Кырныже… – пальпотэ Япанча, олокытысь нош вуэм Кырныжзэ пельпум вылаз пуктыса. – Паймисько мон солы, кызьы со монэ котькытысь шедьтэ, кызьы одӥг дырысь мукет дыре пота?..

– Кырныжъёс котькытчы потаны быгато… – пальпотэ Камит, Кырныжлэсь йырзэ маялляса. Кырныж но, шумпотыса кадь, аслэсьтыз йырзэ солэн киез борды зыра…

– Марико, табере ми куиньнамы кошкомы… Нош тӥ возьмалэ эшмылэсь «мардлазэ»… – шуэ Япанча, Кырныжзэ вешаса.

– Шонер, озьы ӟечгес луоз, Марико… – Япанчаен соглаш луэ Явуш.

– Нош тӥ кытчы? – юа Марико.

– Милям вань одӥг ужмы, кудзэ ми сяна нокин тодыны кулэ ӧвӧл… – валэктэ Япанча.

– Валай, Япанча батыр… – мыкырске Марико но возьмасьёссэ сьӧраз басьтыса кошке…

– Я, мар, Камит, кошком «Ӟугыриедлэсь» ӧссэ утчаны?.. Кырныж шуэ, секыт луоз сое шедьтыны… Нош Узыбеез ассасинъёс кие кельтоно ӧвол… – зэмос ожгарчиосын валтӥсьсы кадь ик вераське Япанча. – Кыӵе тӥляд та ласянь малпанъёсты?..

– Тӥ ваньды «шертовать» кариды-а ни? Веръяды-а ни гондыр вирез, гондыр силез? – юа Камит. – Мон сэбедэз ортчи… Соин ик мон отчы пырыны дась… – валэктэ со эшъёсызлы.

– Мон но ортчи… Озьыен, мон но дась… – шуэ Явуш.

– Мон но ортчи… Мон но кемалась дась… – пальпотэ Япанча.

– Иське, кошким Никон доры, Несториан черке… – вакчияк вера Камит.

– Малпаськод, Никон тодэ музъем пыдсысь кар сярысь?.. – юа Япанча.

– Никон адӟемын Бадӟым Ву Нюртонэз, кудӥз ог кык сю ар талэсь азьвыл гинэ ортчиз на, озьыен музъем пыдсысь каръёсты но тодыны кулэ… – валэктэ Камит.

– Ассасинъёс кытысь ке тодо бере, Никон но тодыны кулэ, дыр… – соглаш луэ Явуш.

– Кырныж но озьы шуэ… Кошким соку Никон доры! – соглаш луэ Япанча но.

Никонлэн черкез Кузон Кремль пушкын сылэ вал. Пиос шонерен отчы кошкизы. Пыризы Несториан черклы матэ луись капкатӥ. Нырысь ик Камит черке пыриз, собере Явуш, собере Япанча. Ваньзы пырыны быгатӥзы, нокинэ тылыныз шуккыса ӧз погырты Никонлэн черказ пырон аркаез, озьыен чылкытэсь вал пиослэн лулъёссы, ма, гондырлы «шертовать» карон но лулэз югдытэ, шуо…

– Никон возьма ни вал пиосты. Солэн пиослэсь одӥг куиньмослы ӝужыт мугорыз туж тупа вал та ӝужыт черклэн вӧлдэт купырезлы. Зэрпал черкъёс котьку паймытӥзы калыкез асьсэлэн быдӟалаенызы, зэрпалъёслы тупатэм ӧсъёсынызы но трос мукетъёсыныз. Та черкъёс асьсэ шуныт борддоръёсыныз но калыкез эмъязы. Угось та черкъёсын нокыӵе шунтӥсь гуръёс ӧй вал ке но, соос сокем шунытэсь вал, соослэн борддоръёссы «эфир» кужымен «эстӥськизы», нош борддоръёсын пиалаос сьӧрын ӝуало вал лызпыръем висёнъёсты эмъясь тылъёс. Соин ик черк пушкы пырыса арсавылъёс соку ик шӧдо вал эмъясь кужымъёсты, гань-гань луэ вал соослэн вань мугорзы.

Арсавыл калыклэсь одӥг куиньмослы бадӟым мугоро зэрпалъёс берло дыре ӧжытгес кылизы ни, инкуазь воштӥськемен тросэз соос та дуннеысь кошкизы… Нош та дуннее кылемъёсыз тросэз уло вал асьсэлэн ик лэсьтэм черкъёсазы но черк котырысь юртъёсазы… Вань та зэрпал черкъёс дуннелэн котькуд пумаз сыло ке но вал, ог-огенызы соос ӟоскыт кусып возизы. Черкез чаклась зэрпалъёс черкъёсысьтызы потытэк ик вань дунне вылысь но, дунне сьӧрысь но, бадӟым ӟазег сюрес вылысь мукет дуннеосысь но иворъёсты тодӥзы. Соин «сьӧдъёс» зэрпалъёсты но соослэсь черкъёссэс туж уг ярато вал. Соин ик, валамон ини, кинъёслэн «тыршемзы» улсын та паймымон черкъёс но зэрпал юртъёс дунне вылын ӧжытгес но ӧжытгес кылизы…

Никон шоры учкыса, Камит вань сюлэмшугъяськонзэ солэсь шӧдӥз, зэрпал аслаз ымнырыныз нокинлы сое ӧз возьматы ке но… Нош мар бон карод, дуннеез воштыны уг лу, отын Кузон Базарез кырмись киос кадь ик, ворме соиз, кинлэн кужымыз бадӟымгес… Нош «сьӧдъёслэн» али дыре со, шӧдске, туж бадӟым…

Никон куаныса ик ӟыгыръяз аслэсьтыз дышетэм пиоссэ. Синъёсыз ик солэн котмизы. Пиос солы нокыӵе юанъёс сётыса ӧз вуттэ на, нош Камит, шӧдтэк шорысь, омыре «зымиз», лобась адями кадь… Тани со омыртӥ каллен гинэ матэктӥз черклэн бур палдур борддораз туж вылӥе юнматэм бадӟым суред доры. Пиослы со суред соку ик тодаз вайытӥз Бадӟым Арканысь «Куинетӥ» лыдпусо «Императрицаез», кудӥз вера шудбурен пумиськон сярысь, выль улон сярысь… Нош «Императрица» йырыныз уллань ке сылысал, Камит азе кӧшкемыт кайгу лыктысал… Но суред ӧз выры, озьы ик йырыныз выллань сылӥз… Озьыен Камитлэн ваньмыз умой луыны кулэ… Озьы вера «Императрицаез» пумитан. Вылаз ик со асьмелэн Ватка Нылмы… Гадь вылысьтыз чигвесьёсыз вылын ворекъя «Ибырвесь», пельёсаз «Шунды Мумы» угыос. Чыртыяз но кипотэсъёсаз арсавыл нылъёслэн яратоно весьёссы. «Императрица» пуке эксэй пуконын, йырсиосаз кизилиос ворекъяло, йыр вылаз но солэн – зарни коронаез… Со сьӧрын сусыпуос но кызо нюлэс адӟиське, паськыт шур кошке со сусыпуо но кызо нюлэс вӧзтӥ… Вераны кулэ, «Императрица» пыртӥ тросэз адӟо Музъем Анаез, кудӥзлэн кужымыз вазь ӵукна потӥсь Чулпон кизилиен герӟаськемын.

– Арчамы мӧзмем Камитэзлэсь… – пальпотэ Никон. – Ӧс дорысен ик ас азяз  кыскиз… Кемалась ӧз пыра ни вал Камит со доры…

Арчалэн бадӟым суредэз туж вашкала дырысен та черклэн борддораз сылэ. Но тросэз калыкын уг тодо ни сое, угось сьӧлыко адямиос кышкало со доры та черке пыраны… Соин ик Арча сярысь но вераськемзы уг поты. Угось одӥгез сьӧлык ас дораз соку ик мукетсэ кыске. Дунне вылысь быдӟым кат озьы ужа, ӟеч кужым бордаз кыске ӟеч кужымез, нош уродэз – уродзэ гинэ… Нош Арча туж яратэ аслэсьтыз калыксэ. Зэмос арсавылъёс кемалась дырысен тодо Арча соослэн утись кадыр нылзы шуыса. Соин ик вань музъем улысь утиськон каръёссэс соос «Арчакар» яке «Арча» шуо. Ма, музъем вылын но вань на Арчалэсь нимзэ нуллӥсь каръёс, но троссэ калык вунэтӥз, табере соосты мукет сямен нима… Арчалэн суредъёсыз, пичи иконаосыз, трос вӧлмемын ке но арсавылъёс пӧлын, кин ке соосты кадырла, нош кин ке сямлы луыса гинэ нуллэ. Соин пеймытын улӥсьёс Арча «Императрица» сярысь но номыр уг тодо. Ма, кин гинэ тодэ меда Пичи но Бадӟым Арканъёсты. Соосты валан туноос пӧлын гинэ вӧлскемын уга. Но Арча, озьы ке но, туж яратэ ассэ кадырлась калыкез, котьку соослы юрттэ. Нош кин солэсь юрттэт уг куры, кызьы со юрттыны быгатоз?.. Иисус но шуэ ук: «Курелэ, соку тӥледлы сётӥськоз!» Нош Камит ноку ӧз вунэты кадыр Арчаез, ялан сое тодаз вайылӥз. Тани али но бадӟым суредысь ассэ улэп Арчаез адӟыса, со нырысь ик солы аслаз куронэныз вазиськиз.

– Ӟечбур, мусо но кадыр арсавыл анай-нылмуртмы! – ӟечъяськиз соин Камит. – Тон котьку мыным юрттӥськод вал, котьку дугдытэк мед тылсиялоз тынад сӥед но даныд! Туннэ мон курисько тонэ юрттыны Узыбейме шедьтыны…

– Тодӥсько, Камит, малы лыктэмдэ… – кылӥськиз Камитлэн пеляз Арчалэн мусо но жингырес куараез, кудзэ арсавыл туно пичи дырыеныз ик тодма. – Мон усьто тыныд «эксэй нылэд» доры ӧсэз… Узыбейдэ мон ватӥ аслам Арчакарам, нокыӵе «ассасинъёс» отын ӧвӧл, эн кышка. Со вылтуссы гинэ милям ожчиосмылэн, нош пушсы соослэн югытэсь. Соос югыт лулъёслы ужало… Нокыӵе «сьӧдъёслэн»  Арчакаре пыремзы уз лу. Шумпотыса усьтӥсько мон тыныд со ӧсэз, зым отчы, тонэ отын возьмало ни…

– Нош эшъёсме? – юа Камит.

– Эшъёстэ но отчы зымытом… Куиньнадэс ик отын возьмало, куиньнады ик тӥ быдэстӥды ни Кузонысь ужъёстэс… Бабасырдэ но келялом…

Камит азьын вуюись буёлъёсын ворекъясь кульчо усьтӥськиз. Бергась вуберган кадь, со Камитэз бабасыреныз ӵош ас пушказ кыскиз…

– Мар луиз? – кышкатскизы Явушен Япанча.

– Номыр паймонэз ӧз луы… – пальпотэ Никон. – Арча Камитэз Узыбеез доры музъем улысь Арчакараз ыстӥз…

– Отын Узыбеез «сьӧдъёслэн» ассасинъёсы возьмало ук? – кышкатскыса юа Явуш.

– Уг лу отчы «сьӧдъёслэн» пыремзы, сюлзы пырсалоз тыл дуннеын… – пальпотэ Никон. – Нош «югыт» ожчиос юри ассасин дӥськутъёсын ветло… Ойдо, тынад черодэд Явуш, матэкты но мыкырскы Арча анай-нылмуртлы.

Явуш матэктэ но аслэсьтыз кылъёссэ вераса мыкырске. Соку ик сое вуюись берган ньылэ…

– Табере тынад черодэд, Япанча… – пальпотэ Никон.

– Нош Кырныженым яралоз-а? – юа Япанча.

– Мынэлэ ӵош… – вакчияк вера Никон.

Япанча Кырныженыз ӵош мыкырске но пиос сьӧры вуюись берганэ ыше…

* * *

Пиос огзы сьӧры огзы вуо музъем улысь черке. Татын но озьы ик борддорын сылэ Арчалэн бадӟым суредэз. Солэн азяз кык сыӵе ик суредъёс возьмато Адӟон дуннелэсь Нырысетӥ («Пӧртмась» яке «Маг» нимо) но Кыкетӥ («Вылӥ Вӧсясь кышно» яке «Жрица» нимо) Арканъёссэс. Нырысетӥ Аркан со «Инбам Атай» ке, кудӥз герӟаськемын кылдытӥсь, пӧртмась, пӧрась кужымъёсын, Кыкетӥ Аркан «Вылӥ Дуннеен», «Инбам Дуннеен», «Лул но Визь Дуннеен» герӟаськем «Императрица» луэ, соин ик солэн йыр вылаз ву вылын пукись ошкуй кадь толэзь суредаын. Нош Куинетӥ Арканлэн «Императрицаез», «Арчалэн Суредэз», «Музъем Анай Дуннеен» гинэ геӟаськемын. Соин ик соосты шуо «Троича».

Та «Куинь Аркан Суредъёслы» пумит борддорысен кутско мукетъёсыз «Бадӟым но Пичи Арканъёс». Ньылетӥ Аркан «Император», со луэ «Музъем Атай, Воргорон Кужым, Кузё». Витетӥ Аркан – «Иерофант», «Вылӥ Вӧсясь», «Вылӥ Туно», со чакла дунне осконъёслэсь «эгрегор тылъёссэс». Куатетӥ Аркан – «Яратон» (Воргоронэн Кышномурт сыло Яблокпу улын). Со возьматэ дунне вылысь яратонэз. Сизьыметӥ Аркан – «Колесница» (адями сылэ кык питрано уробо вылын), со возьматэ ӝог бызись сюресэз, ӝог бызись улонэз… Тямысэтӥ Аркан возьматэ «Карнанэз, Весаез», кудӥзлэн кык пумаз ошем чашаосыз «тэгыз» сыло. Укмысэтӥ Аркан – «Тодӥсь», со возьматэ ӝужыт гурезь вӧзын омырын огназ малпаськыса пукись нылмуртэз, кудӥз ваньзэ Тодэ. Укмысэтӥ Аркан – «Удалтонлэн Питыранэз», возьматэ «Питыран» вылын сылӥсь «дэлето адямиез», кудӥз мар борды гинэ уг кутскы, ваньзэ пӧрмытэ. Дас одӥгетӥ Аркан – «Кужым», со возьматэ «ыжпиен сылӥсь нылмуртэз», кудӥзлэн ӝыны ымнырыз арысланлы берытскемын. Дас кыкетӥ Араканлэн нимыз –  «Ошиськем», со возьматэ пыдтӥз ошем нылмуртэз…

Котькудӥз Аркан аслаз дуннеяз кыскыны быгатэ, соин ик пиос Арканъёслэн «Адӟон Дуннеязы» пырытэк, каллен мыно югыт тылъёсын югдӥсь вӧлмыт коридортӥ. Борддоръёслэн кык палаз ик дугдытэк кыстӥсько «Пичи но Бадӟым Арканъёс». Котькудӥз Аркан пиослы тодаз вайытэ асьсэ улонысьтызы кыӵе ке луэм учыръёсты. Угось вань Арканъёс соослы тодмо арсавыл инкуазез но арсавыл ымныръёсты возьмато. Тани пиос потӥзы Дас куинетӥ Аркан доры. Со нимаське «Кулон». Суред вылын кышномуртлэн горд кышетэз. Нош ымнырыз солэн ӧвӧл. Ымнырыз интыын адӟисько пеймыт кызъёс но лыз инбам. Нош инбам шорын яркыт-яркыт тылсиосты пазясь тыл… «Кулон Аркан» бӧрсьы ик борддор бадӟым гыркеслы пӧрме. Пиос со доры вуо но адӟо пиала коросэз, кытын кылле Узыбейлэн мугорыз. Камит бызьыса пырыны турттэ со югдыса улӥсь бадӟым гыркесэ, но со адӟиськисьтэм борддор борды шуккиське… Солэсь шуккиськемзэ кылыса Узыбей сайка, синъёссэ усьтэ. Нырысь со кышкатске, собере кӧшкемыт вожоме. Пиала корос кыметсэ усьтыса со лобӟыса вуэ Камит азе но адскисьтэм борддоре шуккиське… Солэн виресь ымдуръёсыз усьтӥсько но убирлэн кадь кузёмем вазер пиньёссэ возьмато. Шӧтэм кураен черектэ Узыбей – пиослэн куиньназылэн ик вань лулзы пыдтышказы вуэ… Узыбей сьӧрын адӟиське пальпотыса сюмыкысь вир юись Яганай но солэн курег пыдо коркаез…

– Тӥ мар татчы лыктӥды! Али ик кошке татысь! Утелэ лулдэс! – адӟиськисьтэм борддор борды шуккиськылыса, кӧшкемыт кесяське Узыбей. – Эн каре монэ «сьӧлыко»!

Пиос шуак сьӧрлань тэтчо. Бабасырен Кырныж но, синъёссэс ворсаса, Япанчалэн Камитлэн паськыт пельпум сьӧразы пегӟо. Ӵапак та шорын пыдлось вӧлмыт залысь гурак серекъям куара кылӥське. Шуак югдытске зал. Узыбей берен коросаз ворсаське. Нош пиос азе усьтӥсько купырес заллэн кык палаз пукись ассасинъёс но заллэн шораз тронын пукись зэрпал…

– Мар шуод на, ӟечбуресь арсавыл батыръёс… Синтэм коӵышпиос кадь тӥ ми доры пыриды, татысь потон сюресэз но тодытэк… Асьтэос ик мыным ваиды Арсавыл Кизили Пуртэз… – вераськыны кутске тронын пукись зэрпал. – Мынам нимы Кый, нош ассасинъёс мынам пиосы…

Зэрпал но ассасинъёс ваньзы кый мугоро адямиослы берытско…

– Табере адӟиськоды, кинъёс ми… – кӧшкемыт пальпотэ Кый. – Тазьы асьме мугорынымы милемлы но капчигес луоз тӥледын вераськыны. Адями мугор пушкын ӟоскыт милемлы…

– Иське, тӥ «кащейёслэн» ляльчиоссы «кый-кенӟали» мугороос… – паймыса учке соос шоры Камит…

– Озьы, кызьы адӟиськод… – серекъя Кый. – Табере милемлы номыр ватыны… Кыӵе капчи вал мыным тӥледыз пӧяса татчы пыртыны… Тӥ асьтэ адӟондылы оскытэк, оскиськиды Никонлэн пӧртмам мугорезлы, Арчалэн «Императрицалы» кельшись сульдэрезлы… Мар, бон, карод, мон ворми, мон табере котьмар тӥледын дауртыны быгатӥсько. Соин ик кылзэ монэ туж сак. Тӥледлы мон дэмласько татысь потон «куинь сюрес». Нырысетӥез, тӥ ми пала ужаны соглаш луон кагазэ асьтэлэн виреныды гожтӥськиськоды… Соку ми тӥледды лэзиськомы… Мон малпасько, таиз сюрес валамон. Вань кыкетӥез сюрес, ми тӥледды пыртӥськомы Узыбей доры, кудзэ Яганай ачиз кадь ик убирлы берыктӥз. Узыбей тӥледды куртче но берыктэ ачиз кадь ик убирлы… Тӥ басьтӥськоды пумтэмлыко улон, луиськоды котьку егит, улӥськоды туж узыр, тӥляд котькытын коньдонды луоз, тӥляд луоз сомында яратоно нылъёсты… Но вань татын ӧжытак умойтэмез, нырысь ик тӥ вир юоно луоды, нош кыкетӥез – шунды шорын улыны уд быгатэ, ӝуалоды… Соин ик уй пеймытын гинэ эрикоесь луоды… Тӥледлы улоно луоз ми сямен музъем улын… Угось ми но ум яратӥське Шундылэсь югытсэ… Но тӥ убиръёс луыса но милемын кусып возёды…  Ми быгатӥськомы, кызьы убиръёсты кортнаны… Нош куинетӥез сюрес тани со гыркын…

Зал вӧзын югдытӥське бадӟым гырк. Отын сомында кыйёс куасаллясько. Выж вылын кыллё пудо но адями шӧйёс, лысьӧмъёс, мечьёс, шибодыос но уно мукетыз кулон сярысь возьматӥсез…

– Татын тӥ туж курадӟыса кулоды… Христос кадь ик… Собере, оло, вылӥ инбамозь но ӝутскоды… Мынам мукетыз дэмланэ ӧвӧл… Мон быдтӥ ас веранме. Табере кылзӥсько тӥледыз…

Пиос ог-огзы шоры учкыса, палашъёссэ потто но Кыйлы пумит омырско. Но соос адскисьтэм борддоре дыгиськыло.

– Нёжто тӥ милемды сыӵе шузи кожаськоды? – серекъя Кый. – Ми тодӥськом ук тӥлесьтыд вань сямъёстэс…

– Котьма ке но мон тӥ пала уг ужа… – шуэ Камит, собере эшъёсызлы вазиське. – Мон бырйисько «Кулон» сюресэз. Простить каре монэ, татчы пыртэме понна…

– Мон но тон сьӧры, эше… – шуэ Камитэз ӟыгыртыса Япанча. – Пумиськом кулэммы бере…

– Мон но тӥледын, пиос… – шуэ соос борды ӟыгырскыса Явуш.

– Нёжто Узыбейды но тӥледлы жаль уг поты? – серекъямез потытэк серекъя Кый.

– Ми сое выжыосмы пыртӥ мозмытом… Со ачиз тӥ пала ӧз луы, тӥ сое кужмысь берыктӥды, соин ик кылемын на солэн адями палдурыз… – номырлэсь кышкатэк валэктэ Камит.

– Ыстом-а али сое тӥ вылэ, адӟоды мар со тӥледын дауртоз? – кӧшкемыт дэмла Кый.

– Узыбей нокинэ уз кеся, со ми кадь ик кулоз… – нокыӵе луытэк вера Камит. – Нош кужмысь нокинэ тӥляд берыктэмды уг лу, тӥледыз но Вылӥ Кат, Вылӥ Кенеш эскере. Ойдо, усьты кыйёсыд доры ӧстэ, адӟод кызьы кошко арсавыл пиос… Таоссэ но ассасин кыйёстэ ысты ми вылэ, ми тодом, мар соосын карыны…

– Нош тон, бабасыр, малы уд вераськиськы? – юа Кый.

– Мон кузёе сьӧры… – шуэ бабасыр.

– Мон но кузёе сьӧры… – шуэ Кырныж.

– Мон катъёслы пумит уг ужаськы… – шуэ Кый. – Юэлэ, иське, кулон азяды арсавыл мусурдэс… Ваньмыз катъёсъя мед луоз… Озьы ке тӥляд потэ…

Пиос азе адӟиськисьтэм борддор пыртӥ пыре питранъёс вылын пичи ӝӧк, нош ӝӧк вылын куинь бадӟым но кык пичи кобы мусур… Пиос ӝуто кобыоссэс но шуккиськыса юо. Бабасырен Кырныж но озьы ик юо. Юэмзы бере ик соос доры пырыны кутско кыйёс, туж зол шиетыса соос пиос вылэ тэтчало. Пиос соосты корало. Но кыйёс вӧлдэтъёсысь но, борддоръёсысь но соос вылэ тэтчало. Олокытчыязы но вутско леканы. Тани кырныж но усиз ни вирӟектэм выж вылын костаськись ранӟем кыйёс вылэ. Бабасыр но коскаса выдӥз. Тани Явуш но ӟигартэм погра ни ас азьысьтыз корам кыйёсыз вылэ. Япанчаен Камит но Явуш доры матэктыса пограло… Та пиослэн коскаса но курадӟыса усьылонзы ассасинъёслэсь но, Кыйлэсь но пигонзэс но ӧз вырты. Дэймем адямиос кадь соос кезьыт учко. Оло мае ке эшшо возьмало? Зэм но, тани вырытэк кыллись пиос котырын берганы кутске вуюись буёло тыл берган. Со кужмо берганэз пӧлы пиосты но, бабсырез но, Кырныжез но, корам кыйёсты но басьтэ… Тыл берган чалмем бере вань тылъёс кысо. Котыр тём-тём пеймыт луэ. Чал-чал луэ… Кытысь ке шуак мычиське Бадӟым Тыр Толэзь. Со югдытэ ӵынаса улӥсь, сутскем коркаосты. Соос сьӧрын югдытске кызо нюлэс… Кыз вайёс вылын кырныжъёс адӟисько, дырын-дырын соос ог-огзылы кесясько. Нош музъем выл быдэсак ӵоктаськемын огзы вылын огзы кыллись шӧйёсын. Та кӧшкемыт ӵындӥсь бервылъёстӥ вистэм-вожтэм кыллись шӧйёс вӧзтӥ лыкто кык югдӥсь лулъёс, Узыбей но Яганай.

– Яганай апай, табере асьмеос кытын? Кытчы асьмеос сюримы? – бӧрдыса юа Узыбей.

– Асьмеос ветлӥськомы тынад адӟоно сюресъёстӥд… – ӝожмыт валэктэ Яганай. – Таиз ожбусы тынад Кузон каредлэн ож бӧрсьы  кылем бервылыз. Татын тон будӥд, со табере тыныд тодмантэм кылемын, тӥни  тынад корка бервылыд ӵынаса кылле…

– Остэ Инмаре… – бӧрдэ Узыбей. – Нош малы та ожчи шӧйёс пӧлын сомында ӝуам кыйёс костасько?..

– Кыйёс, мусокае мынам, туж трос вал та ожчиос пӧлын, кызьы тапалаз, озьы ик сопалаз но… Соос ӝуаны татчы лыктӥзы… Адями мугоръёссы тыл азьын пӧсьтылӥзы но кый мугоръёссэс поттӥзы… – валэктэ Яганай.

– Остэ Инмаре… – бӧрдэ Узыбей. – Нош со мында арсавыл пиосмы соос вӧзын кыллё ук…

– Кыллё, нылы, мар бон карод на, кыллё… Соос шаерзы понна вирзэс кисьтӥзы, шаерзэс та кыйёслэсь чылкытатон понна…

– Ыж вирез юэме бере, мон но аслым ачим убир кадь табере потӥсько… Оло ке мынам вазер пиньёсы туж кузесь луэмын, нош ымдуръёсы виресь, мугоры ке оло вирлы шумпотэ… – бӧрдэ Узыбей. – Уг луы мынам тамында вирез адӟеме… Туж секыт мыным…

– Со кышканэд тынад, кече-пеле мынам… – буйгатэ Узыбеез Яганай. – Курбон Ыжпилэн вирыз юрттӥз гинэ тыныд вань аслэсьтыд сюресъёстэ но вань та ожбервылъёсты адӟыны… Тон вакчи дыр куспын ваньзэ ӝуам Кузонэз но вань Арсавылысь ӝуам гуртъёсмес но адӟид… Ӵапак тани та шуръёс вылтӥ кошкись арсавыл вирмы пушкысь пушъёз тынад Эксэйлыкедлэн Мугорыз…

– Кузон гурезь, казак йыръёслэсь сюрем гурезь… – бӧрдэ Узыбей. – Малы кулэ вал сомында йыръёсты кораны? Малы кулэ вал кам дурозь ик гуртъёсты таласа, вийылыса, ӝуатыса ортчыны? Кыӵе сьӧлыкъёссы вал со сюрсэн-сюрсэн корам нылпиослэн, кышноослэн, пересьёслэн? Малы кулэ вал сомында вир кисьтыны? Дуаръёсын люкам узырлыксэс таланы? Малы кулэ вал собыдӟа кайгуэз та мусо калыклы адӟытыны?..

– Кыйёс но, гыдыке мынам, Курбон Тылын сутсконзы азьын асьсэлэсьсэ басьто… Котькудӥз аслэсьтыз басьтэ… Мар карод, сотэк уг ортчы Бадӟым Ожмаськон… – валэктэ Яганай.

– Мынам ноку уз лу вунэтэме та адӟонъёсме… – бӧрдэ Узыбей. – Укыр со кӧшкемыт…

– Эн вунэты, нылы, ноку эн вунэты, уг яра сое вунэтыны! – чурыт вера Яганай. – Тон котьку ас пушкад возьыны кулэ котькуд корам нылпилэсь бӧрдэмзэ, кышкамзэ, котькуд кышномуртлэсь кыйёслэн пуртъёссы улын вандылӥськемзэс, котькуд синвузэс но викышъёссэс пересьёсмылэсь! Ошкуйчиосмылэсь но казакъёсмылэсь кышкатэк ожмаськемзэс! Ваньзэ тон син азяд возьыны кулэ! Угось али тынад синъёсыд пыртӥ ваньзы адӟизы, мар татын луиз! Тон гинэ сое быдэсэн адӟыны вормиськод, малы ке шуоно тон Арсавыл Эксэй Ныл! Тон ке вунэтӥд, ваньзы тае вунэтозы! Нош ӧд ке вунэты, татысен вордӥськоз тынад Эксэлыкедлэн Лул-Бугорыз! Соин ик уг яра сое вунэтыны! Табере, нылы, кошким, табере тон дась аслад мугорад берытскыны… Тон ваньзэ ортчид, ваньзэ адӟид, табере тодӥськод, мар тон лэсьтыны кулэ Эксэйлыктэ Кылдытон понна!

Нош ик берганы кутске вуюсь буёло тылберган кульчо. Узыбеен Яганай со пушкы ышо. Нош ик ваньмыз пеймыт но чал-чал луэ. Кӧня ке дыр ортчыса, пеймытын ӝуштэм куараос кылӥсько. Ӝуатске тыл. Ас вылысьтыз корам кыйёсты сэрпалтыса мырдэм султэ Камит. Озьы ик султыны турттэ Япанча… Камит солы султыны юрттэ. Собере ӵош соос султыны юртто Явушлы, Япанча сайканы кутскись Кырныжзэ кияз ӝутэ, Камит бабасырзэ султытэ…

– Кытын асьмеос?.. – юа Камит, кый куртчылэм бервылъёссэ ымнырысьтыз ӵушылыса.

– Йырме ӵогыны сёто, сопал дуннелы та уг кельшы… – серектэ Япанча.

– Нош мон сямен, асьмеос отын ик, кытын кыйёс леказы… – кый куртчылэм бервылъёссэ зыраса вера Явуш. – Тыл гинэ асьме шоры мертамын,  котырысь борддоръёсты уг возьматы…

– Иське, асьмеос малы ке улэп кылимы?.. – шара малпаське Камит.

– Малы ке кылимы, шӧдске… – котыр чаклаське Япанча.

– Озьыен курадӟонмы ӧз быры на… Нош ик, шӧдске, куломы на… – котыр чаклаське Явуш но.

– Эшъёс, мон дас пол но табере татын кулыны дась… – шӧдтэк шорысь пальыштэ Камит. – Кый лекамъёслэсь пограм берам, туж вӧсь ке но вал мыным, мон адӟи паймымон «уйвӧт», кудӥзлэсь мон али но калтырасько но, кужмоясько но…

– Мае тон, эше, адӟид? – юа солэсь Япанча.

– Мон адӟи Узыбеез… Со Яганай апаен ветлӥз ож бервылъёстӥ. Узыбейлэн эксэй синъёсыз пыртӥ мон адӟи ваньзэ, мар луоз Иоанн ожчиосыныз тапала вуэм бере. Мон адӟи, мар кылёз Кузонлэсь но мар луоз Арсавыл муъеммы вылын…

– Мон но, Камит, сое адӟи… – шӧдтэк шорысь усьтӥське Япанча. – Мынам али ке но син азям со адями мугоро кыйёслэн сьӧлыктэм нылпиосты вандылэмзы, кышномуртъёсты корамзы, узырлыксэс, сиёнзэс таламзы, пересьёсты жалятэк быдтылэмзы… Мон али но сюлэмы вӧсь луыса адӟисько, Кам палась гуртъёсмылэсь ӝуамзэс, калыкъёсмылэсь быремзэс…

– Мон но, эшъёс, ваньзэ сое, мар сярысь вераськоды, Узыбейлэн синъёсыз пыртӥ адӟи. Мынам пигонъёсы али ке но шонер сыло… Соин ик табере мон вань кужымме сёто Арсавыл Эксэйлыкмес будэтонлы. Мон юн тодӥсько, мар мон табере сётыны кулэ шаерелы! Ноку уз вуны мынам синъёсы азьысь «кыйёслэн» арсавыл калыкмес вандылэмзы…

– Мынам но вань быгытъёсы кужымен пульдыло аслэсьтым сюресме Арсавыл калык понна ортчыны… – чурыт вера Япанча.

– Мон но, эшъёс, вань кужымме сётыса табере аслэсьтым сюресме ортчо! – шуэ Камит. – Тӥ мынам дунолэсь но дуно эшъёсы. Ойдо кылмес сётом, котьмар асьмемын луиз ке но, пумозяз калыкмы понна сылыны. Со сьӧлыктэм нылпиосмы, кышноосмы, пересьёсмы понна!

Пиос ваньзы ӵош ӟыгырско. Кырныжен бабасыр но ог-огзы борды ӝиптӥсько.

– Тӥ кулыны кулэ ӧй вал… – пиосты куаляк уськытыса, пеймытысен кылӥське Кыйлэн куараез. – Мусурады ми кый агуослэсь эмъюм понӥмы…

Со дыре ик котырак югыт тыл ӝуатске. Ассасинъёс но, Кый но пуконъёсысьтызы султыса чабыны кутско… Соос ваньзы адями мугоръёсын. Кыкез ассасинъёс костаськись кыйёсты адӟиськисьтэм борддор сьӧрысь гыркъёсазы куяло, пияла кадь вольыт выжез вирлэсь утялто, ӵушыло.

– Та, пиос, берпуметӥ эскерон вал… – шумпотыса ивортэ Кый. – Тӥ сое ӟеч ортчиды… Ӟечкыласько тӥледыз!

Ассасинъёс огзы бере огзы пиослэсь киоссэс кырмыса но бордазы ӟыгыртыса, асьсэлэн интыосазы берытско. Кый но лыктыса ӟыгыртэ пиосты.

– Куиньнады ик тӥ зэмос ожчи туноос! – куиньназэс ик бордаз ӟыгыръяса вера Кый. – Табере тӥ Кикытэльысь мугоръёсады сайкаса  асьтэлэн бугор сюрес вылады вамыштоды. Камит, тон тодӥськод аслэсьтыд уждэ, зэрпал тыныд со сярысь вераз ни. Табере, Кикытэльын сайкам берад ик, кошкод Муское Иоанн доры… Тон тодӥськод, отчы «озонаськыны» уг яра, соку ик «чакласьёс» адӟозы, Соин тон кошкод отчы уйин Тулпареныд. Лобась валэз «сьӧдъёслэн» адӟемзы уг луы… Нош Иоаннлы возьматод тани та гожтэтэз. Со ваньзэ валалоз. Дасялоз тонэ аслаз дышетӥсь зэрпалъёсыныз. Мускоын дасяськем берад тонэ нырысь Ватиканэ ыстозы… Ватиканысь ватка книгамес татчы Арчакаре ваемед бере тонэ  мукет люкетызлы мукет интые ыстозы… Озьы вить люкетсэ ик ваёд…

Кый Камитлы гожтэт сётэ. Камит сое кый куртчылэм киосыныз мырдэм басьтэ. Кый пальпотэ Камитлэсь яра бервыло киоссэ адӟыса.

– Эн кышкалэ, пиос, Кикы тэльысь мугорады кый яраос уз луэ ни… – буйгатэ Кый, пиосты эскеронъяз. – Нош тон, Явуш, мынод аслад карубеныд Сильвесторлы но Иоаннлы кузьымъёстэ нуыса. Мар сярысь вераськыны тыныд Усман тата пыртӥ верамын ни… Нош тыныд, Япанча, ваньзэ Кузонэ пырон азяд вераз Кырлуд Туно. Тон аслэсьтыд секыт сюрестэ умой тодӥськод. Огдылэн но сюресты капчи ӧвӧл. Но соосты одно ик ортчоно. Угось соос куиньнадылэн ик Арсавылэз утён понна кылдытэмын, бугорамын… Камит утёз но ас сьӧраз кельтоз Тодонэз, Япанча сярысь мадьёс будэтозы зэмос ожчиосты. Явуш сьӧры кылдозы дэлето вузчиосмы… Ваньмыз со ужалоз Югыт Арсавыл Эксэйлыкмы понна. Тӥ но Кырныжен бабасыр пумозяз юрттоды эшъёстылы. Тӥ но кылёды Арсавыл Эксэйлыклэн Тодаз.

– Нош мар луоз Узыбеен?.. – юа Камит.

– Узыбей но тӥ доры кикытэле вуоз… Кылемзэ, Камит, ваньзэ ачид адӟод… Я, иське, ӟеч сюрес тӥледлы! Эн вунэтэ Арчаез. Сое ке син азяды пуктӥды, тӥ соку ик татчы сюроды… Ми котьку тӥледлы юрттомы…

Зал шорын ик вуюись буёло тылберган кульчо кылдэ. Со вуберган кадь пиосты но соослэсь эшъёссэс ас пушказ кыске…

* * *

Кикытэльын нош ик ваньмыз берытскиз аслаз улон ӧраз. Сюдӥсьёс сиёнъёс пӧраны кутскизы, эмъясьёс кикыпиоссэс эмъяло. Ваньзы шумпотэмын, нокин бырыны ӧз шедьы, нош пичи яра – со данъяськон гинэ. Кыкыпиослэн оло ке кыкетӥ шоканзы усьтӥськиз, соос люкен-люкен котыръёс кылдытыса ог-огзылы «храмчиосын» ожмаськемзы сярысь мадё. Паймо, кыктосъёс вылӥллям шуыса. Тросэзлы соос шаккато, «храмчиослэн» кырныж-куакаослы пӧрмемзылы но, бусъёсты вӧлдыны быгатэмзылы но, шӧйёссылэн ышылэмзылы но. Оглом, та нунал сярысь туж уно соос вераськозы на, шӧдске…

Усман тата но туж ӝог эмъяз аслэсьтыз ватаманзэ, Ӟумъя батыр валесысьтыз султыны турттэ ини, нош сое тата уг лэзьы на, кылльыны косэ, соин ватаман ӟус вылысеныз пальпотыса учкылэ кикыпиос шоры. Пиосты но, ӝытпал тылсиос ышыку, гуосысьтызы поттӥзы. Тани соосты Уча «сьӧд мунчояз» ӵынатэмез но паремез бере Усман татаен Ӟумъя батыр котыре вуттӥз. Камит шумпотыса татазэ ӟыгыртӥз, собере Усман татаез. Озьы ик ватаманзэс но татазэс ӟыгыртӥзы Явуш но Япанча. Пиослэсь вань ортчем сюрессэс кылзэмзы бере, Усман тата серекъяны кутскиз.

– Котьма ке но, улон со визьмогес асьмелэсь, ачиз Инмар ыстӥз асьме вылэ «храмчиосты», кӧня мон йырме тӥяй, кызьы со асьме вылэ погыльскем ужпумъёсты вырӟытыны, нош тӥ ваньзэ одӥг нуналскын радъяды… – пиос шоры учкыса пальпотэ Усман тата. – Кизили Пуртлэн табере вань выль кузёез, Кизили Чача – пуны адямиезлы берыктэмын, Зарни Валъёслэн сэбедзы йылпумъямын, Аримаспаос бурмытэмын. Зарни Мумлэн табере, вашкала мумы инмаръёслэн кадь ик, аслаз пар валъёсыз вань. Кышкытлык кылдыку, со табере ачиз, кытчы мылыз потӥз отчы кошкоз. Камитлэн кияз – Тулпарез, Узыбейлэн – Палэсмуртлэн валэз. Эксэй вирмы но табере пеймытысь потэмын. Асэныз Яганаен кусып юнматэмын. Тӥ нокин юрттытэк пырады Арчакаре. Тӥледды табере тодэ Арча сузэрмы но, Кый агаймы но… Тӥ адӟиды ваньзэ, мар луоз Кузонэн…

Ӟумъя батыр, Усман тата кадь ик, пальышаса учке пиос шоры. Со но паймемын пиослэн ужъёссылы. Тужгес но Камитэзлэн воштӥськемезлы. Яратон кужымъёсызлы сётскыса, ватаман пизэ ас дораз пуктытӥз но кустӥз ӟыгыртӥз. Кыкназылэн ик соослэн мугортӥзы атай но пи яратон тылъёс ортчизы.

– Тата… – шуэ Камит, вань ненег яратонэныз атаез шоры учкыса.

– Вера, пие… – ӝожомем куаразэ ватытэк шыпыртэ Ӟумъя.

– Мыным ӝоген кошконо луоз… Туж кемалы кошконо луоз…

– Тодӥсько, пие… – синвуаське Ӟумъя.

– Кызьы ке буйгатоно вал анаез… Шӧдӥсько, туж бӧрдэ… Оло соосты но вань гуртэнымы тапала, Япанчалэн Мырдакымесэз пала ваёно, Эркынаен Чачок апай доры?.. Отысь нокыӵе «кый-ожгарчиос» соосты уз шедьтэ. Озьы мыным но капчигес луоз… Кышканэ сюлмысьтым кошкоз, сотэк мон ялан шӧдӥсько «сьӧдъёслэсь» отчы ӝабырскыны турттӥсь гижыоссэс…

– Кызьы курид, пие, озьы ик каром. Озьы мыным но капчигес луоз… – пальпотыны тырше Ӟумъя батыр, но уг вормы ӝожомон мылкыдзэ, котьма ке но та люкиськон солы но туж секыт, вылаз ик тодӥськод ке, кыӵе кӧшкемыт кужымъёслэн «каразы» кошке аслад вордэм пиед. Ӟумъя сое ноку отчы ӧй ыстысал, ӧй ке валасал, кыӵе «Ватка Кужым» со вить люкето «Быдӟым Книга» пушкы дуннелэн вить сэрегаз «ватэмын»… Со «Книгаез» берыктон со «Ватка Эксэйлыкез» гинэ «улӟытон» ӧвӧл, со вань «Югыт Дуннемес» адями лул кужымъёсмес сиись «сьӧдъёслэсь» утён… Усман тата, валамон ини, вань та вераськонэз но малпаськонэз кылӥз.

– Шонер вера, Камит… – шуиз со Ӟумъялы. – Ӟечгес луоз, вань выжыостэ, быдэс гурттэ ик Япанчалэн адӟиськисьтэм интыяз ваид ке… Шӧдске, Узыбейлэн синъёсыз пыртӥ вуонозэ адӟон соослы огшоры сётэмын ӧй вал…

– Ваём, тата, мон но озьы малпасько… – соглаш луэ Ӟумъя. – Табере со инты вӧсямын. Ветлом отчы, дивъёсты быдтом, юртъёс пуктом, шуралиос но обыдаос асьсэос кошкозы… Танзилялы но капчигес луоз выль интыын, мӧзмон дырыз ӧжытгес кылёз… Выль интылы дышонъяз ӧжытгес бӧрдоз…

– Ярам, Камитмы аслаз Тулпареныз туннэ акшанлэн пеймыт дукесэз улын кошкоз… Нош Явушен Япанча Кузоназы ӵуказе ӟардонэн кошкозы Ӟумъялэн ошкуйчиосыныз… Соос ошкуйзэс дасяло ни… Тӥ дасесь?.. – юа Усман тата, пиос шоры учкыса.

– Дасесь, тата… – шуо Япанчаен Явуш.

– Явуш, тынад Кузонысь Муское мынон карубед дасямын ни? – нош ик юа Усман тата.

– Ваньмыз дась, тата, мускоослы кузьымъёс но, книгаос но… Ми Иоанлы хазаръёслэсь но булгаръёслэсь книгаоссэс шедьтӥмы, асьмелы но кельтӥмы. Никон юрттӥз асьмелы но гожтыса кельтыны… – валэктэ Явуш.

– Ярам, Инмармы мед юрттоз Камитлы но, тыныд но, Япанчалы но… – пиосты ӟыгыртыса шуэ Усман тата. Собере со нимысьтыз ӟыгыртэ Япанчаез. – Секыт луоз, пие, тыныд кузон ханэз, Ядыгарез чиданы. Мед гинэ кужмыд тырмоз…

– Кужымы тырмоз, тата, эн сюлмаськы… Узыбейлэн синмыныз вань ӵынась ож бусыосты адӟеме бере, мынам одӥг пигоны уз вырӟы кыӵе ке Ядыгарлэсь! – чурыт вера Япанча. Усман тата нош ик сое вань кужмысьтыз ӟыгыртэ… – Мон оскисько тӥледлы, пиос… – ватса тата синвуаськыса.

Усман тата доры дыртыса вуо кык кикыпиос.

– Усман тата, лыкто ни! Ӝоген нюлэс кушамы пырозы… – ӝутскем мылкыдын верало кикыпиос.

– Ымныръёссы лекесь? – пальпотэ тата.

– Шайтанъёслэн кадесь! – пальпото кикыпиос.

– Озьыен, капчи уз лу вераськонмы… Ӝӧкъёстэс дасяды? – ас понназ пальпотыса юа тата.

– Сыӵе бусьтыр ӝӧк дасямы, йӧгуосысь но ваньзэ поттӥмы, кам дурысь озынъёсысь но вуттӥмы! Пирогъёс пыжимы! Дильдыос шыр вияло! – пальпото пиос. – Но пуксёзы меда соосыд ӝӧк сьӧры?.. Укыр лек лыкто…

– Пуктомы, пиос…Эн сюлмаське… – пальпотэ Усман тата.

Азвесё ож дӥськутъёсынызы вань нюлэс кушез югдытыса, чебер валъёссы вылын пото ожгарчи нылъёс. Вань нюлэс куш пыдчиньы вылаз султэ, соосты адӟыса. Чал-чал луэ нюлэскын. Ӟумъя но ӟус вылысьтыз пиосын ӵош султэ. Ожгарчи нылъёс валъёссы вылысь туж чырткем васько но Усман тата доры матэкто.

– Ӟечесь-буресь, дуно куноосмы! Укыр кема тӥ лыктӥды… Умой-а вал сюресты?.. – соос азе мыкырске Усман тата.

Ипполитаен Заринаос уг ик мынекто. Ожчи нылъёссы но лекомем ымныръёсын порто Усман татаез.

– Тӥ доры шедён понна сомында котыртэтъёс лэсьтоно, кызьы меда асьтэос татчы ветлӥськоды?.. – валэктэмез потытэк валэктэ Ипполита. – Тон, тата, эн кусалляськы, меӵак вера, кинъёс Зарни Мумез утчаны лыктӥзы, кызьы соос шедьтӥзы  эксэй нылэз, малы тон эксэй нылэз быдтыны косӥд, кытчы тӥ Узыбеез ошиды, кытчы быдтӥды?

– Тӥ троссэ уд тодӥське, мар туннэ луиз, капчи уз лу мыным сое ваньзэ валэктыны… – ӧжытак калтыраса вера Усман тата.

– Ми валасьтэмесь ӧвӧл, тон валэкты кытын экэй ныл? – лек куре Зорина.

Усман тата мур лулӟе, кема малпаське мар бордысен кутскыны.

– Верано луоз кыдёкысен… – шуэ со, пиос шоры учкыса.

– Нош ик кый кадь куасалляськиськод! – вожоме Зорина.

Ӵапак со вакытэ Усман тата вӧзысь векчи кызьпу тылъёсын шиетыса буко кадь някырске. Со улын, зундэссэ паллян кияз поныса, шӧдтэк шорысь кылдэ Узыбей. Кызьпу нош ик омыре ыбиське, азьвыл кадь ик шонерске, шиетӥсь тылъёссэ кысыса.

Вань кикыкуш интыяз катэ. Ожгарчи нылъёслэн ымныразы шумпотон кылдэ. Озьы ик шумпото Явуш, Япанча, Уча, Ӟумъя батыр. Нош ваньзылэсь но зол шумпотэ Усман тата, мозмиз со кӧшкемыт эстӥськись «сьӧд мунчолэсь»… Камитлэн гинэ ымныраз туж вакчи шумпотонэз шуак кылдӥз но ышиз, собере со секыт пилем кадь кунэрскиз.

– Умоесь, танӥськись кужымъёс! – пальпотэ Узыбей. – Тӥледлы, мон малпасько, ӵап дырыз ӝӧк сьӧры пуксьыны… – шуиз со эксэй ныл куараеныз. – Нылмурт ожчиос «Махабхаратаын» но, «Иллиадаын» но, «Ведаосын» но, котькытын «Югыт Кужымъёс» палан ожмаськизы. Соин ик, умой уз лу, Кузонысь «Курбон Тылэз» ӟырдатыны ожчи нылъёс ӧз ке пыриське! Пукселэ ӝӧк сьӧры! Асьмелы туннэ нокыӵе даллашонъёс, танӥськонъёс кулэ ӧвӧл! Вань кужымез кыйёсын ожмаськонлы дасяно!

Узыбейлэсь верамзэ кылзыса ваньзы со азе мыкырско. Нырысь ик Усман тата, со сьӧры Ӟумъя батыр, Уча, Явушен Япанча, но ваньзы мукетъёсыз. Камит гинэ мыкырскытэк сылэ. Кылъёссэ верамез бере Узыбей Камитэз ас бордаз ӟыгыртӥз.

– Уг лэзьы мон тонэ, Камит, огнад кошкыны, монтэк тон бырод, оскы мыным! – ваньзылы кылымон ӟырдыт вераз Узыбей.

– Уг, мон тонэ сьӧрам уг басьты, тонтэк мыным капчигес луоз… – соглаш уг лу эксэй нылыныз Камит.

– Тон кышкаськод кузёмем вазер пинё убир нылмуртлэсь, кудзэ тон музъем улысь Арчакарын адӟид? Со кышканэ вал мынам… Мон соку аслам мугорам ӧй вал на…

– Мон тодӥсько, со кышканэд вал шуыса… – кыдёке учкыса вера Камит. – Но кышкатӥсь суредъёс но огшоры уг кылдо, тон мынэсьтым сомында вирме юид ни… Соин ик, мон малпасько, мыным отын, кытчы мон али кошко, тонтэк капчигес луоз ас ужме быдэстыны…

– Уз, мон адӟи, монтэк тонэ тылын сутозы, йылсам юбое пуктозы… – синвуаське Узыбей.

– Ӧвӧл, Узыбей, мон огнам кошко! Ӟеч луэ ваньды! – шуэ со Усман татаез, Учаез, Явушез, Япанчаез, аслэсьтыз татазэ ӟыгыртыса.

Камит зундэссэ позыртэ но со азе потэ Тулпар. Камит туж ӝог со вылэ пуксе.

– Прохор, Пуксьы мон сьӧры! – кеське со котыр чакласькыса.

Бабасыр олокытысь чулькак гинэ потыса Камит азе Тулпар вылэ пуксе. Тулпар соку ик омыре вуюись тылъёс кельтыса акшанлэн сьӧд дукес улаз зыме…

– Выль тамплиеръёс кадь одӥг вал кык кузя кошкизы… – шуизы кулэмъёс…

– Но таосызлэн валзы кыӵе катар! – шуизы мукетъёсыз…

Узыбей топ! шуккиз пыдзэ. Собере ваньзы шоры учкыса, валэктыны кутскиз.

– Со монтэк быроз! Озьы мыным веразы Яганайлэн вандэм курбон ыжпиезлэн вирыз но, сюлыз но ты-мусъёсыз… Мон со сьӧры кошкисько, нош тӥ вераське, кызьы калыкмес но югыт лулъёсмес Кузон Ожмаськонын утьыны! – чурыт вера Узыбей но зундэссэ бур чиньыяз поныса позыртэ. Усман тата вӧзысь кызьпу нош ик шиетӥсь тылъёсын ӝуатскыса буко кадь куасалске. Узыбей, отчы вамыштэ но «вуюись бервылъёс» кельтыса ыше. Кызьпу нош ик шонерске, ваньзылы Чурыт Пусэз тодэ вайтыса. Чалмыт кыле нюлэс тэльын. Ваньзы асьсэлэсьсэ малпаса сыло…

– Крон! Крон! – кеське инбаметӥ пуксёнлэн гордэктӥсь тылъёсыз пала кошкись кырныж.

– Крон! – вазе солы Япанчалэн Кырныжез…

– Крон! – шуэ Усман тата. – Кырныжъёс но тӥни ӝӧк сьӧры пуксьыны косо, озьыен амалмы уз луы пуксьытэк… Вераськонмы асьмелэн трос люкаськемын. Ойдолэ, эшъёс, пуксёмы арсавыл ӝӧкмы сьӧры. Мед кылзозы асьмеды кулэмъёс но… Ваньмы ӵош кенешомы… Катаресь ужпумъёс асьме азьын усьтӥсько…

Бер кыл

Гажано лыдӟисе, мон тодӥсько, котькуд романлэн пумаз вуыса, ӧжытак асьмелы мӧзмыт но ӝожмыт луэ. Но та учырын тӥледлы со мылкыдъёстылы сётӥськоно ӧвӧл на. Та геройёсын тӥ выльысен пумиськоды та трилогилэн кыкетӥ но куиньметӥ люкетъёсаз. Соос нимасько «Япанча» но «Явуш». Оскисько, соос ӝоген потозы. Али мон ужасько «Япанча» романме волятон вылын. Озьы волятыса, «Камит» романысь мон одӥг куинетӥ люкетсэ гинэ кельтӥ. Озьы ик ӵышкиське, вандылӥське «Япанчалэн» но текстэз, вылаз ик мар но со ватсаське но ай. Оглом ке верано, куиньназы ик та романъёс калыкмылэсь эскерымтэ дуннеоссэс, «зарни шыкыссэс» усьто. «Камит» роман «трикстер» пыртӥ дуннемес ке ӟубиса, «Япанча» сое усьтэ «карез басьтон, карез талан» сюжет пыртӥ. Нош «Явуш» вузчиослэн дуннеенызы ке но герӟаськемын, татын ваньмыз возиське «Инмарлэн ассэ быдтонэз» сюжет вылын. Мон та романъёс вылын дас ар ужанъям туж трос артефактъёсты эскери, трос архивъёсын бугыръяськи, соин ик шумпотӥсько, троссэ аслым выльзэ усьтӥ шуыса, малпасько, тӥледлы но со озьы ик усьтӥськоз, ас калыкмес гажан мылкыд пыӵатыса. Юанъёсты кылдӥзы ке гожтэлэ, мон одно ик ответ сёто. Суредасьёслэн суредамзы ке потӥз, ыстэлэ, ӟечъёссэ мон одно ик уже куто. Угось али дасяське солэн кагаз вариантэз.

Гажаса но яратыса, книгалэн авторез Пётр Захаров.